TBP Balochi

روکپتی بلوچستان ءِ بنجاھی شھر زاھدان (دزاپ) ءَ بندیگیں مردمے پاھو دیگ بیتگ-

پاھو دیگ بوتگیں مردم ءِ پجار آمر ء مھمد انت کہ آ سراوان جھمنند انت ۔

اھوالانی رد ءَ آمر گوستگیں روچ ءِ سھب ءَ ماں زاھدان ءِ زندان ءَ ایرانی آمیدگس ءِ ھکم ءَ پاھو دیگ بیتگ-

گوشگ بوتگ آمر چھار سال پیش ءَ یک کوشے ءِ بھتام ءَ دزگیر ءُ زندان ءَ برگ بوتگ ، آمیدگس ءَ پیش کنگ ءَ پد آئی ءِ سر ءَ پاھو ءِ سزا جنگ بوتگ-

اھوالانی رد ءَ آمر پنچ رَنداں پیش ءَ ھم پہ پاھو دیگ ءَ ایوکی ءِ واڑ ءَ برگ بوتگ کہ اے ششمی رندا پاھو دیگ بوتگ ۔

ایران ءِ دگہ ھوار سیستان و بلوچستان ءَ بازیں مردم جتا جتائیں بھتاماں پاھو دیگ بوگ ءَ انت کہ آیانی گیشتریں بھر سیستان و بلوچستان ءَ انت-

بلوچستان ءَ زورانسری آوار جنی ءِ دْرچ یکشل ءَ برجاہ چار مردم آوار جنگ بیتگ ءُ چار یل کنگ بیتگ اَنت، وھدے کہ اسلام آباد ءُ کراچی ءَ بیگواھیں مردمانی کھولانی زھرشانی نندانک یکشل برجاہ ءَ اِنت-

زانگ بہ بیت بلوچستان ءَ یک بلاھیں مدتے بیت کہ زورانسری آوار جنی ءِ درچ گوں تُرندی ءَ برجاہ ءَ اِنت ھمکروچ بلوچستان ءِ جتاجتائیں دمگاں آوار جنی ءِ رپورٹ نکش بیگ ءَ اَنت –

دومی نیمگ ءَ انسانی ھکانی گلاں اے درگت ءَ تُرس درشان کتگ ھمُک وھد ءَ آ بلوچستان ءِ ریاستی زوراکی ءُ بلوچانی چُکچینی ءِ گر ءُ دار لوٹ کتگ-

گیشیں ھالانی رِد ءَ بلوچستان ءِ دمگ چہ سبی ءَ پاکستانی لشکر ءَ یک دمگی اِھوالکارے آوار جتگ ءُ چریشی ءَ پد آئی ءِ درگت ءَ ھچ وڑیں ھال نیست-

ھالانی رِد ءَ چہ کوھلو ءَ سیادی داروکیں اِھوالکار شیر جان مری ءَ سبی پولیس ءُ سادھیں پوشاکانی تہ ءِ کارمنداں آوار جتگ-

کھول ءِ رِد ءَ آئی ءِ درگت ءَ تنی وھدے ھچ وڑیں ھال سر نہ بیتگ-

گوشگ بیگ ءَ اِنت کہ شیر جان مری سوشل میڈیا سر ءَ زورانسری آوار جنی ءِ ھلاپ ءَ پُرکار بیتگ-

دومی نیمگ ءَ کیچ ءِ ھند بلیدہ ءَ پاکستانی لشکر ءَ دو براتاں ھوار سے مردم آوار جنگ ءَ پد بیگواہ کتگ اَنت۔

ھالانی رد ءَ بیگواھیں مردمانی نام شیھک بلوچ ءُ وسیم بلوچ ء نصرت اللہ ءُ عنایت اللہ بلوچ ء درمحمد اِنت کہ پاکستانی لشکر ءَ 13 ستمبر 2025 ءَ چہ بلیدہ ءِ میتگ میناز ءَ آوار جتگ ءُ بیگواہ کتگ اَنت۔

ھمے وڑ چہ کیچ ءِ تھسیل تمپ ءَ یک ماھے ءَ ساری پاکستانی پوج ءِ دست ءَ زورانسری بیگواہ کنگ بیتگیں سے مردم یل کنگ بیتگ اَنت کہ آیانی پجّار مجیب ء رسول بخش، امجد ء دین محمد ءُ ولید ء نظر محمد ھوار اَنت- وھدے کہ آیانی ھمراھی ءَ زورانسری بیگواہ کنگ بیتگیں راشد ء دین محمد انگت پاکستانی پوج ءِ دست ءَ بیگواہ ءَ اِنت-

دومی نیمگ ءَ گوستگیں سال بیست ھشت اگست ءَ چہ بحرین ءَ ڈی پورٹ کنگ ءَ پد کراچی ایئرپورٹ ءَ پاکستانی پوج ءِ دست ءَ بیگواہ کنگ بیتگیں اسد عثمان بلوچ جھمنند مند پہ سلامتی یل کنگ بیتگ –

ھمے وڑ اسلام آباد ءَ بی وائی سی سروک ءُ بیگواھیں مردمانی کھولانی نندانک ءَ مروچی ششست یک روچ سرجم بوتگ کہ بلے آیانی زھرشانی نندانک انگت برجاہ ءَ اِنت-

زانگ بہ بیت زھرشانی نندانک ءَ نشتگیں کھول ریاستی پولیس ءِ نیمگ ءَ تُرسینگ ءُ بیھار دیگ، ھور ءُ گرم ءَ اَبید آیاں وتی زھرشانی نندانک برجاہ داشتگ-

آیانی لوٹ ھمش اِنت کہ بی وائی سی ءِ بندیگیں سروک ءُ بیگواھیں مردم یل کنگ بہ بنت ءُ زورانسری آوار جنی ءُ دروگیں میڑاں بیگواھیں مردمانی کُشگ بند بہ بیت-

بلے تنی وھدے ھکومت نیمگ ءَ ھچ وڑیں گپ دیوان گوں آیاں کنگ نہ بیتگ-

دومی نیمگ ءَ کراچی پریس کلب ءِ ڈن بیگواھیں نودربر زاھد علی بلوچ ءِ پت زھرشانی نندانک ءَ ھما وھد ءَ اوشت آماچ بیتگ وھدے زاھد ءِ پت عبدالحمید بلوچ ءِ تبیت اناگاہ ءَ ھراب بیتگ، چریشی ءِ سبب ءَ یکروچے ءِ واستا دارگ بیتگ-

یکشمبے ءِ سُھب ءُ عبدالحمید بلوچ ءِ تبیت ھراب بیتگ آ پیسر ءَ چہ ھیپاٹائٹس ءِ نادُراھی ءِ آماچ اِنت کھول ءَ آ دمگی کلینک ءَ برتگ اود ءَ ڈاکٹراں آرام کنگ ءَ گوشتگ-

اے جاور ءِ چارگ ءَ پد زھرشانی بُنجل ءَ برجاھیں شُدکُشیں ھڑتالی بُنجل اداروکی ھلاس کنگ بیتگ-

زاھد علی ءِ مات ءُ پت ءُ کھول گوستگیں چل یکروچ ءَ چہ کراچی پریس کلب ءِ دیم ءَ نندانک ءَ نشتگ اَنت، آئی ءِ گوشگ اِنت آئی ءِ ورنائیں چُک لھتے ماہ ءَ ساری زورانسری بیگواہ کنگ بیتگ ءُ انگت بیگواہ ءَ اِنت-

زاھد علی کراچی یونیورسٹی ءِ نودربرے آ وانگ ءِ ھمراھی ءَ رکشہ ھم چلائینتگ دانکہ لوگ ءِ ھرچ ءُ درچاں سرجم کُت بہ کن آں وتی نادُراھیں پت ءِ الاج ءَ کُت بہ کن آں-

کھول ءِ رِد ءَ پاکستانی پوج ءَ زاھد رکشہ ءَ ھوار آوار جتگ ءُ اشی ءَ پد آ بیگواہ ءَ اِنت-

آئی ءَ کھول ءَ یکرندے پد ءَ ھکومت ءُ انسانی ھکانی ادارھاں چہ دزبندی کتگ کہ زاھد علی ءَ دیم ءَ بیار اَنت ءُ آئی ءَ پہ سلامتی یل کنائینگ ءِ ھاتر ءَ گامگیج بہ زور اَنت-

بلوچستان ءِ دمگ کیچ ءِ دو جتا جتائیں جاھاں پاکستانی پوج ءِ بیڑ برجاہ انت ءُ لوگ پوج ءُ مانداشتگ انت ءُ زالبولے ءِ لٹ ءُ کٹ کنگ ءَ زالبول ءِ جاور ناگیگ –

سر بیتگیں اھوالانی رد ءَ کیچ ءَ پاکستانی فوج ءَ ٹوھیں کچے ءَ آپریشن بندات ۔ مھلوک ءِ گشگ ءِ رد ءَ دمگ ءَ گن شپ ءُ دگہ ھیلی کاپٹرانی آیگ برجاہ انت ءُ جتا جتائیں جاھاں کواڈ کاپٹراں بمبگواری کتگ۔

زامران، ساہ دیم، ءُ جالگی ءَ فوجی آپریشن ءِ زد ءَ اَنت۔ دمگی مردمانی رد ءَ دمگ ءَ گن شپ ھیلی کاپٹراں شیلنگ کنگ ءَ پد کمانڈو ایر کنگ بوتگ اَنت۔

گوستگیں شپ ءَ گردانگ ءِ شھر بلیدہ ءَ کواڈ کاپٹراں بمبگواری کتگ۔ دمگ ءِ نندوکیں مردمانی گشگ ءِ رد ءَ لشکر ءَ کواڈ کاپٹراں لس آبادی ءِ سر ءَ بمب چگل داتگ انت کہ دو لوگانی سر ءَ کپتگ ءُ دو مردم ٹپیگ بوتگ اَنت۔

اے درگت ءَ انگت ءَ واکداراں ھچ وڑیں ھال ءُ اھوال نہ داتگ۔

ھمے وڑ ءَ چہ کولواہ ءَ سر بیتگیں ھالانی رد ءَ پوج ءَ بیڑ برتگ ءُ اود ءَ مھلوک ءِ لوگ مانداشتگ انت-

اھوالانی رد ءَ گوستگیں شپ ءَ کولواہ ءِ دمگ ءَ بیڑ برتگ ءُ لوگ ستکگ ءُ بلڈوزر کتگ انت-

اھوالانی رد ءَ کولواہ سگک ءُ بلور ءَ مروچی سھب ءَ ھم بیڑ برتگ ءُ اود ءَ ھم لوگ مانداشتگ انت –

اھوالانی رد ءَ بلور ءَ درین نامیں زالبولے ءِ سر ءَ پوج ءَ بیڑ برتگ ءُ لٹ ءُ کٹ کتگ ءُ آئی ءِ جاور ناگیگ بیتگ انت ءُ ھمے میان ءَ پوج ءَ درین ءِ لوگ ءُ جاگہ مانداشتگ انت-

اھوالانی رد ءَ دُرین پیش ءَ نادراھیں زالبولے بیتگ ءُ پوج ءِ زوراکیاں پد آ گیشتر ناگیگ بیتگ –

روکپتی بلوچستان ءِ دمگ ھاش ءَ دو جتا جتائیں وئیلاں سلاہ بندیں مردماں تیرگواری کرتگ کہ چریشی ءَ یک مردمے بیران بیتگ، دومی وئیل ءَ سلاہ بندانی تیرگواری ءَ دو مردم ٹپی بیتگ انت ۔

ھاش ءِ شھر ءَ سلاہ بندیں مردماں تیرگواری کرتگ ءُ مردمے کُشتگ ۔
بیران بوتگیں مردم ءِ پجار شھرام ء الیاس انت کہ ھاش ءِ جھمنند انت۔

اھوالانی رد ءَ شھرام شھر ءِ تھ ءَ پِستہ چوک ءَ پجار نہ بوتگیں سلاہ بندیں مردمانی تیرگواری ءَ ٹپی بوتگ کہ نادراہ جاہ ءَ برگ ءَ پد آئی ءَ ٹپانی درد نہ سگ اتگ انت ءُ بیران بیتگ ۔

کوش ءِ سوب زانگ نہ بیتگ بلے وئیل جاہ ءَ ساڑی ءِ مردمانی گوشگ انت کہ سلاہ بندیں مردماں ھاش ءَ شھنوازی ٹک ءِ سردار ھوبیار شھنوازی ءِ بَچّ بیتگ کہ تنیگاں کہ اے گپّ سرکاری رسانکدر ءَ دیم ءَ نیاؤرتگ۔

دومی نیمگ ءَ ھاش ءَ پجار نہ بوتگیں سلاہ بندیں مردماں تیرگواری کرتگ ءُ دو مردم ٹپی کرتگ انت ۔

اھوالانی رد ءَ ھاش شھر ءِ نیام ءَ رودراتکی کوچگ ءَ گاڑی ءَ سواریں سلاہ بندیں مردماں دو راھگوز ءِ ورنایانی سر ءَ تچکیں تیرگواری کرتگ کہ چریشی ءَ آ ٹپی بیتگ انت ۔
ٹپی بیتگیں مردمانی پجار زانگ نہ بیتگ ،آ پہ اِلاج ءَ نادراہ جاہ ءَ برگ بوتگ انت ۔

روکپتی بلوچستان ءَ گیشتر چوشیں پیش اتکگیں ویلانی بارو ءَ سرکاری تکاں ھاسیں رنگے ءَ پدراھی یا آیانی گر ءُ دار ءِ ھاتر ءَ گامگیج زیرگ ءَ گندگ نہ بنت انت-

روکپتی بلوچستان ءَ بندوکیں سیاسی مردمانی گوشگ انت کہ اے مردماں سلاہ گون انت ءُ شھر ءُ بازاراں لس مردمانی سر ءَ تیرگواری کن انت ءَ پد ءَ پشت ءَ مان دے اَنت ءُ رو انت ءُ کس آیاں جست ءُ پرس نہ کنت-

بلوچستان ءَ بلوچ ورنایانی بیگواہ کنگ ءِ درچ گوستگیں دو دھکاں گیش برجاہ انت کہ اود ءَ ورنا گرگ ءُ بیگواہ کنگ بوگ ءَ انت-

دومی نیمگ ءَ بیگواھیانی ھلاپ ءَ بلوچ زالبول روڈانی بند کنگ ءُ جاک ءُ کوکار کنگ ءَ گندگ بوگ ءَ انت کہ اود ءَ گیشتریں وھداں مردم زھرشانی کنگ ءَ گندگ بنت انت کہ ھمے درچ ءَ سندھ ءِ مزن شھر کراچی ءُ پاکستان ءِ بنجاھی شھر اسلام آباد ءَ دو ماہ ءِ کچ ءَ بلوچ کھول پہ وتی مردمانی یل کنگ ءِ ھاتر ءَ زھرشانی نندانک ءَ نشتگ انت-

بلوچ کھولانی لوٹ انت کہ بلوچستان ءَ بیگواہ کتگیں مردم دیم ءَ آرگ ءُ آمیدگس ءَ پیش کنگ بہ بنت ءُ بلوچستان ءَ بیگواھیانی درچ ھلاس کنگ بہ بیت انت-

ھمے وڑ ءَ گوستگیں روچ ءَ کیچ ءَ ھواریں دمگ بلیدہ ءَ پاکستانی پوج ءَ سَے ورنا آوار جنگ ءَ پد بیگواہ کتگ انت-

اھوالانی رد ءَ بلیدہ ءِ دمگ میناز ءَ گوستگیں روچ ءِ بیگاہ ءَ پوج ءَ بیڑ برتگ ءُ سَے کس آوار جتگ ءُ بیگواہ کتگ انت-

آوار جنگ بیتگیں مردمانی پجار شے حق ء نصر اللہ، وسیم ء نصرت اللہ ءُ عنایت اللہ ء در مھمد ءِ ناماں زانگ بیتگ انت- ھرسئیں مردم بلیدہ میناز ءِ جھمنند انت-

دمگی مردمانی رد ءَ اے سئینانی آوار جنگ ءَ پد بیگواہ انت ءُ دگہ مردمانی آوار جنگ ءُ بیگواہ کنگ ءِ ھال دیم ءَ ھم آیگ ءَ انت-

بلوچستان ءَ بیگواھیانی یک نہ کُٹوکیں درچے چہ گوست ءَ بندات بیتگ کہ اود ءَ ھروھد ءَ انسانی ھکانی گل وتی زھر ءِ درشان ءَ کنگ ءَ انت-

اسلام آباد ءَ بلوچ کھولانی زھرشانی نندانک ءَ دو ماہ سرجم بوتگ بلے سرکاری تکاں آھانی لوٹانی سر ءَ ھچ وڑیں گامگیج زیرگ نہ بوتگ ۔

کھولانی گْوشگ انت کہ اے وھد ءَ چہ ریاستی ادارگ ءُ انتزامیہ ءِ نیمگ ءَ کمک ءِ بدل ءَ ایوک ءَ آزار ءُ مشکلانی دیمپان انت۔

کھول گوستگیں دو ماہ ءَ چہ اسلام آباد ءَ زھرشانی نندانک ءَ نشتگ ءُ بلوچ یکجھتی کمیٹی ءِ رھشونانی دزگیر کنگ ءُ زورانسری بیگواھیں مردمانی یل کنگ ءِ لوٹ ءَ کنگ ءَ اَنت۔

زھرشانی کنوکیں مردمانی گشگ اِنت کہ آیاں سرکار ءِ دیم ءَ دو بنیاتی لوٹ ایر کتگ اَنت کہ آھانی تہ ءَ بی وائی سی ءِ رھشونانی ھلاپ ءَ بندشانی ھلاس کنگ ءُ چہ بلوچستان ءَ زورانسری بیگواہ کنگ ءِ ھلاس کنگ ھوار اَنت۔

زانگ بہ بیت کہ جولائی ءَ اسلام آباد ءَ نزیکیں مردمانی نیمگ ءَ جوڑ کتگیں زھرشانی کیمپ یک روچے پیسر پولیس ءَ پاد کتگ ءُ ایشی ءَ پد زھرشانی کنوکاں پچیں آسمان ءِ چیر ءَ نندگ ءَ لاچار بوتگ۔

کھولانی گشگ ءِ رد ءَ اے وھد ءَ آھاں پریس کلب ءَ روگ ءَ دارگ بیگ ءَ انت۔ زھرشانی ءِ جاہ ءِ کش ءُ گوراں چادر ءُ کنٹینر ایر کنگ بوتگ اَنت کہ چہ لس مھلوک ءُ رسانکدر ءِ چماں دور بہ بنت ءُ آھانی نندگ جاہ ءَ آپ ءُ بجلی بند کنگ بوتگ ءُ آ زورانسری ءَ پاد کنگ بیتگ انت-

کھولانی گشگ انت کہ آ اسلام آباد ءَ اتکگ انت پمیشکا ریاست ءِ لیکہ ھمیش انت کہ بلوچ گپ نہ کنت یا گپ کنگ نہ زانت۔ ما دو ماہ اِنت کہ اِد ءَ نشتگ ءُ گپ ءُ تران کنگ ءَ ایں بلے مارا مدام ڈلچار کنگ ءَ اَنت۔

آیانی رد ءَ اسلام آباد ءَ زھرشانی کنوکیں مردمانی گون ءَ ھما رویش ءَ کنگ ءَ انت کہ بلوچستان ءِ مھلوک ءَ گوں ھاسیں رنگ ءَ گندگ ءَ اَنت۔ پاکستانی میڈیا ءَ مئے سر ءَ بندش جنگ بہ بیت یا بلوچستان ءِ انٹرنیٹ ءِ بندش بہ بیت مھلوک ھر چیز ءَ گندگ ءُ سرپد بوگ ءَ انت۔

کھولاں گیش گْوشتگ کہ آیانی لوٹ گوشدارگ ءِ بدل ءَ بی وائی سی ءِ سروکی گیشتر ناجائزیں ریمانڈ ءَ روان دیگ بیگ ءَ اَنت ءُ بلوچستان ءَ زورانسری ءَ بیگواہ کنگ ءِ سلسلگ گیش بوتگ۔ ریاست مارا اے کلوہ ءَ دئیگ ءَ اِنت کہ شما ھر چنچو لوٹ بہ کن اِت، ھچ پرواہ نیست۔

آیام چہ اقوام متحدہ ، انسانی ھکانی ادارہ ءُ میان استمانی برادری ءَ دزبندی کتگ کہ آ بلوچستان ءَ برجاہیں زورانسری بیگواھی ءُ ریاستی ناشری ءِ ھلاپ ءَ گامگیج ءَ بہ زور اَنت ءُ سرکار ءَ را اے جست ءَ بہ کن اَنت۔

بلوچستان ءَ تیرگواریانی سبب ءَ مردمانی بیرانی ھمک روچ پیش آیگ ءَ انت ءُ گوستگیں روچاں تمپ ءَ ھمے ڈولیں یک تیرگواری ویلے ءَ یک مردمے بیران بیتگ ات ءُ مروچی تربت ءَ ناشناسیں مردماں تیرگواری کتگ ءُ یک مردمے کشتگ ءُ چہ پنجگور ءَ پوج ءِ دست ءَ آوار جنگ بیتگیں یک مردمے ءِ لاش دزکپتگ-

گیشیں اھوالانی رد ءَ بلوچستان ءِ کیچ ءِ بنجاھی شھر تربت ءَ شمبے ءِ روچ ءَ ناشناسیں سلاہ بندیں مردمانی تیرگواری ءَ یک مردمے بیران بوتگ۔

اے وئیل نیشنل بینک ءِ نزیک ءَ فرنیچر ءِ دکان ءَ بوتگ کہ اود ءَ نامالومیں مردماں تیرگواری کتگ۔ تیرگواری ءِ آسر ءَ کلگ ءِ نندوکیں عبدالغفار ء شیر دل سک ٹپیگ بوتگ۔ ءُ ٹپیگیں جاوراں نادراھجاہ ءَ سر کنگ بوتگ بلے چہ وتی ٹپاں بیران بوتگ۔

کوشکار تنی وھدی زانگ نہ بیتگ ءُ نانکہ بنشوناں دگہ گپ درشان کتگ انت-

ھمے وڑ بلوچستان پنجگور ءِ دمگ کوھنیں پروم کراس ءِ نزیک ءَ یک بیگواھیں مردمے ءِ تیرسپتگیں لاش دزکپتگ-

پولیس ءِ رد ءَ پنجگور ءِ کوھنیں پروم کراس ءِ دمگ ءِ نزیک ءَ یک مردے ءِ لاش دزکپتھ کہ آئی ءِ لاش ءِ سر ءَ تیرانی نشان گندگ بوتگ اَنت۔

پولیس ءِ رد ءَ لاش ءِ پجار اسداللہ ء ء ھاجی عبدالحالق ءِ نام ءَ بوتگ کہ آ دیز پروم ءِ نندوک اِنت کہ انوگ ءَ چیتکان ءَ جھمنندی بیتگ ۔

دمگی مردمانی گشگ اِنت کہ 9 ستمبر 2025 ءِ شپ ءَ پنجگور ءِ دمگ دیز پروم ءِ نندوکیں حاجی عبدالخالق ءِ چک اسداللہ پاکستانی لشکر ءَ پنجگور ءَ چہ وتی لوگ ءَ زورانسری ءَ بیگواہ کتگ۔

بلوچستان ءَ پاکستانی دست ءَ ھمود ءَ مردم بیگواہ بنت گڑا چریشی ءَ اود ءَ باز کم مردمانی زند واتری بیت بازیں مردمانی ٹپ ءُ ٹوریں لاش گندگ ءَ کاینت مھلوک وتی بے وسی ءَ زھرشانی ءَ ابید دگہ وڑ ءُ پیماں اے لاشانی دزکپگ بند نہ بیتگ-

گوستگیں روچ ءَ بلوچستان ءِ دمگ مستونگ ءَ پاکستانی لشکر ءِ بنشون ءَ ھم چار سلاہ بندیں مردمانی جنگ ءِ ٹاہ داتگ ات بلے تنی وھدی آ لاشانی پجار یا سلاہ بندانی نیمگ ءَ چوشین درشان دیم ءَ نیتکگ انت-

بلوچستان ءِ دمگ مستونگ ءَ ریل بمب تراک ءِ نشانگ کنگ بیتگ چریشی ءِ آسر ءَ ریل ءَ ھوار ٹریک ءَ تاوان رس اِتگ- اُرش ءِ زمہ واری بلوچ ریپبلکن گارڈز ءَ منّ اِتگ-

لیویز واکدار ءِ رِد ءَ تراک ٹریک ءِ نزیک ءَ بیتگ ءُ تُرندیں تراک ءِ توار دیر دیر اشکنگ بیتگ – پولیس ءُ لیویز کارندہ زوت وئیلجاہ ءَ سر بیتگ اَنت ءُ تراک ءِ تُرندی ءُ وئیل ءَ ھواریں مردمانی پٹ ءُ پول اش بندات کتگ-

تراک ءَ پد دمگ ءَ سیکورٹی ھائی الرٹ کنگ بیتگ، واکدار ءَ دلجمی داتگ کہ مستونگ ءُ آئی ءِ کش گوراں سک پٹ ءُ پول کنگ بیگ ءَ اِنت دانکہ دیمتر ءَ چُشیں وئیلاں داشت بہ کن ایں-

اے وئیل ءَ راجی پھاز ءِ درگت ءَ چہ تُرس ودی کتگ ءُ بلوچستان ءَ ٹرانسپورٹ ءِ ھاسیں راھانی نشانگ کنوکانی جُھد کنوکانی ھلاپ ءَ تُرندیں گامگیجے ءِ زرورت اِنت-

زانگ بہ بیت گوستگیں ماہ ءَ ھم دشت ءِ دمگ جعفر ایکسپریس ریموٹ کنٹرول آئی ای ڈی اُرش ءَ نشانگ کتگ چریشی ءِ آسر ءَ ریل شش بوگیاں چہ چپی بیتگ-

اے اُرش زمہ واری بلوچ سلاہ بندیں آجوئی لوٹوکیں یکجاھی بلوچ راجی آجوئی سنگر ( براس ءَ) منّ اِتگ اَت-

مروچی ریل سر ءَ تراک ءِ زمہ واری بی آر جی ءَ منّ اِتگ- گل ءِ جارکش دوستین بلوچ ءَ شنگ کتگیں درشان ءِ تہ ءَ گوشتگ کہ بلوچ ریپبلکن گارڈز ءِ سرمچاراں مروچی مستونگ ءِ دمگ دشت تیرہ میل ءِ ھند سر ءَ ریل ریموٹ کنٹرول آئی ای ڈی ءَ چہ نشانگ کتگ- اے تراک ءِ آسر ءَ ریل ءِ انجن ءَ ھوار بوگیاں سک تاوان رس اِتگ-

جارکش ءَ گوشتگ اے اُرش زمہ واری ءَ مئے گل بی آر جی منّ اِیت ءُ اے وڑیں کاروائی بلوچستان ءِ وتواجھی ءَ تاں برجاہ بنت-

‏نِمدی یے پہ شے پُل ءَ

نبشتہ کار : آئشہ بلوچ

دی بلوچستان پوسٹ

مھروانیں شے اِے ساهت ءَ شَپ ءِ نیم پاس ءِ 3 بَج بوگ اِنت من چہ واب ءَ بُست کُتگ اَت گوانکو چار اِت کہ چاراں چُنت بَج اِنت منی چّم اِسکرين ءَ تئی اَکس ءَ کپت اَنت کہ ترا سِگريٹ دپ ءَ اِنت ءُ تو بِچکندگ ءَ ئے گُڑا اِے ساهت ءَ دِل ءَ گُشت کہ پہ تو دو لبز نِبشتہ بِکن آں بلے منی ارواہ من نہ زان آں کہ کُجا بِندات بِکن آں ءُ کُجا آسر بِکن آں نانکہ نِبشتہ کنگ دو لبز زان آں بلے گوں نِزوريں لبزاں پہ تو دو لبز نِبشتہ کن آن ءُ من زان آں اَگاں ترا منی نِبشتانک سر بوت تو ٹھک دے ءِ ءُ گوش ئے اڑے بیبُو ھم نِبشتہ کنگ زانت تو وَ مئے نابُودی ءَ سرپد ئے پد ءَ من ءَ کلاگ ھم بَند ئے من زان آن ءُ گوش ئے کہ تو بِشتّیں اِے بِری تو شر کلاگ بَند بلے من وتی نِبشتانک ءَ سرجم کن آں شیھو من کجُام گپ ءُ کِسّہ ءَ نِبشتہ بِکن آں یار ؟ کُجام تُوسیپ ءُ ستا ءَ بہ کن آں تئی مھروانی ءِ اَگاں تَمردی ءِ؟ شیھو تو وَ گُشتگ اَت کہ منی ستا ءَ مہ کن اِت کسے کہ اَگاں تئی ستا کُت ترا بھ وش نہ بوتگ پرچاکہ تو زانتگ اَت کہ تو اَنچيں کِردے ءِ واهُند ئے توسيپ سَتا کنگ کسے ترا بھ دوست نہ بُوت تو گُشتگ اَت کہ وهد ھر کس ءَ ھر کسے کِرد ءَ وت پَدر کنت ۔

شيھو من زان آں اِے دمان ءَ تو گوں ناکو جان ءُ تاھر پُل ءُ ھاتم جان ءَ دیوان ءَ ئے تو کُلبر ءُ اُوتاک ءِ کِسّہ ءَ کنگ ءَ ئے ءُ ھاتم نِشتگ مچکدگ ءُ هامین ءِ کِسّہ ءَ کنگ ءَ اِنت ناکو من زان آں دائمی وڑ ءَ بے تواری ءَ نِشتگ ءُ بِچکندگ ءَ اِنت تاھر نِشتگ ءُ ھسپتال ءِ کِسّہ ءَ کنگ ءَ اِنت ءُ من زان آں تو هاتم ءَ کلاگ بَندگ ءَ ئے شيھو تو سرپد ببو کہ تلال جان ھم مزن ءُ ورنا اِنت ءُ تئی مھلبو ھم مزن ءُ شُوکيں جِنکے مھلبو من زان آں گوں دزگُھاراں نِند اِیت ءُ تئی مھروانی ءِ کِسّہ ءَ اَلّم کنت ءُ پہ تو پھر بَند اِیت ءُ من ترا هال دیگ لوٹ آں کہ دُژمن تئی برات ءُ همبلاں سِرين پُروش کُتگ سّسی نادُراہ کُتگ آ چہ وتی بُنجل ءَ نہ سُر اِيت شيھو تو گِندئے ھردیں گوں سُنٹُک ءَ ڈیکّ وارت گُڑا آئی ءَ هال بِد ئے کہ تئی گِس ءَ نِندُوکیں لشکر ھمُک هپتگ آس ءُ اَنگراں کُتگ شُمئے یار ءُ بیلاں ءُ سُنٹُک ءَ بُگش گومازی ءَ دُژمن تنیگت ءَ تئی نام ءِ اِشکُنگ ءَ پَچ لرز اِیت ،من زان آں الی جان ءَ شُمارا کُليں هال سر کُتگ اَنت شُما کُل ھم نیاد بیتگ ئے ٹھک داتگ ءُ کلاگ بَستگ دُژمن ،شيھو دُژمن ھمینکس نِزور ءُ پُروش داتگ تئی برات ءُ همبلاں کہ دست ئِے پہ چُک ءُ زالبُول ءَ كُتگ چہ مند ءُ تَمپ ءَ توارے کیت آ چہ وتی بُنجل ءَ پَچ لرز اِیت ۔۔

شيھو ترا گْوش آں ناکو جان ءَ چہ منی نیمگ ءَ اَمبازاں کن دست ءُ سران ئِے بہ چُک آئی ءَ بُگش کہ تئی بیبُک ءَ گُشتگ من ءَ پر تو بے کِساس زهیر کنت بُگش من تئی اَکس ءَ بھ چار اِت نہ کن آں ھردیں کہ چاران ئِے نِزوری بالاد ءَ گیشتر پُروش اِیت ءُ هلاس بیتارس شیپ گران بنت تاں مردُم ءَ بے وار کن اَنت ءُ ناکو ءَ بُگش من زان آں تو گوں من گِلّہ ئے کہ تئی داتگيں نام من مَٹ کُتگ بلے بُگش باور کن من ءَ تئی داتگيں نام گیش دوُست بیت ءُ من وشاں من ءَ ھمُک مردُم تئی داتگيں نام ءِ سر ءَ توار پِر بِکنت ءُ بُگش اِیت سری بازار ءَ من ءَ تنیگت ءَ کُل تئی داتگيں نام ءِ سر ءَ توار پِر جن اَنت ءُ ناکو ءَ بُگش سری بازار تنیگت ءَ پر تو مُوتک کار اِیت ءُ، تو من ءَ پھل کن کُربان آں کہ تئی گُڈی اَکس من گار کُت یار تو من ءَ گُڈی وهد ءَ اَکس دیم داتگ ءُ گُشتگ اَت اِے اَکس ءَ بِدار کہ رُوچے بہ چار ئِے ءُ مارا گیر بیار ئے شيھو گیر من ترا ھمُک روچ کاراں بلے یار تئی راھداتگيں گُڈی اَکس من گار کُت شيھو تِپليں مھمد تئی میار اِنت من زان آں تو مھمد ءِ شھیدی ءَ پَد ٹھک داتگ ءُ گُشتگ کہ رستر ءِ دُژمن ءَ مئے تِپلُکيں مھمد ھم نہ بَکش اِت گوں بَمب ءُ ٹوپاں شھید ئِے کُت، شیھو بلے اِے بری پَمن چنکيں بِچکند روان بِد ئے شیهو تو پہ زمین کُل بکشات اَنت من زان آں شُمئے رتکگيں هُون لگتمال ءُ دِرتہ پُچ ءُ گُژنگی راج ءَ وشھالی باندات ءِ واهُند کن اَنت شیھو مرچی ترا هال دیاں کہ بلوچستان ءِ کُنڈ کُنڈ ءَ ھرچ میتگ ءُ کوچگ ءَ رستريں دُژمن ءِ زُوراکی گوں تُرندی ءَ برجاہ اِنت آ همُک روچ تئی راج ءَ لاش دیگءَ اِنت همُک مات ءِ گُشان راڑ راڑ اِنت همُک گُهار ءِ جَبین ءَ آس بُن اِنت ءُ مئے باسما ئیں برات ءُ ورنایاں یک یک ءَ گار کنان ءُ شھید کنگ ءَ اِنت شيھو رستریں دُژمن ءَ کُشنڈہ ٹولی ءُ وتی چانوگِر بے کِساس بے لگام کُتگ اَنت آ همُک رُوچ ماتے ءِ دِل ءَ آس پِر دارگ ءَ اَنت همُک گُھار ءِ لُنٹ ءِ سر ءِ بِچکندگ ءَ گار کنان اَنت همُک مات ءِ آہ ءُ پِریات آزمان ءُ زمین ءَ پچ لرزین اَنت بلے من جَزم گوش آں کہ سیاه شَپ رُژناہ بیت
گُڈی ءَ کُليں شھیداں سلام کن کُربان۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت- 

تْرانگ: شہید کیّا جان

نِبشتہ کار: کیّازی بلوچ

دی بلوچستان پوسٹ

سنگت تئی ترانگ ءَ ￴کپتگ آں! من نہ زاناں چے نبشتہ بہ کناں یار، دل دردیگ ءُ چمّانی اَرس دارگ نہ بنت۔ تئی اِشتاپی ءَ ￴مارا باز بے تاھیر کُتگ، من نہ زاناں کُجا چہ گَپ ءَ ￴بندات بہ کن آں۔ پرچا کہ منی کِرّ ءَ گال نیست من ترا بہ گش آں ( شہید کیا پُل بِھشت ءَ ￴بات ئے￷)، چیاکہ من ءَ ￴تو اِے وڑ گْوشگ ءَ ￴دل نہ بہ ئے￷ یار۔ تئی روگ پمّن ءَ ￴باز گْران اِنت، نوں اِے میتگ ابیتک ابیتک اَنت بے تئیگ ءَ، ￴مارا وشّ ھَم نہ بیت ءُ من چَٹ بے تاھیر آں۔ من ءَ ￴انگت سنگت ءِ ￵گپّے یات اِنت، گْوشتگ اَت ئے: ” یار تو وتی میتگ ءِ مردماں سرپدی بہ دئے ءُ بہ گْوش بہ وان اِت۔“ وت سرپد بہ اِت، چوش کہ بازیں چیزّے یات اِنت بلے نبشتہ نہ بنت۔

کیّا جان : باریں ترا چونے ءَ ￵زالم ءَ اَچ ما دور کُت، تئی یات ءُ ￶زھیر بے کساس پیداک اَنت۔ ما چَٹ اِیوک ایں، تئی داتگیں مھر مارا باز اندوہ بکشک ءَ ￴اَنت۔ منی پگر، ￶ھیال ءُ لیکک تئی نیمگ ءَ ￴اَنت، دل ھما اِنت تئی پگر ءَ ￴کپتگ۔ تئی گِیر گیش ءَ ￴چہ گیش پیداک اِنت، تو پرچا چو اِشتاپ کُت۔ تئی سنگت ءُ ￶دوست ترا یات آرگ ءَ ￴اَنت، تئی انچیں مھرے ￵ھر مردم ءِ دل ءِ توک ءَ ￴زندگ اِنت۔

کیّا جان :مرچی چراگ تھار ءُ تئی رُوژنائی ھم شُتگ، بلے زھیر ءُ ￶یات انگت دل ءِ ￴توک ءَ ھست اَنت۔ پُل تئی گَیر گیش ءَ ￴چہ گیش پیداک اِنت، اِے گال گوں من ٹاھینگ ھَم نَہ بوَگ ءَ ￴اَنت۔ چیاکہ تئی انچیں مھرے مئے دل ءَ ￴ھِچ وڑ ءَ ￴در نئیت۔ پُل تئی مھر مئے دل ءِ ￵توک ءَ ￴زندگ اِنت، تئی زھیر ءُ ￶یات ￴بازیں مردم ءِ دل ءِ ￵توک ءَ ￴زندگ اِنت۔ تئی روگ مارا باز درد دیگ ءَ ￴اِنت، گندئِے￸ مرگ ھمروچ کئیت۔ ھرچ بنی آدم ءِ ￵سر ءَ کئیت، اگاں مرگ کئیت گُڑا اِے وڑیں مرگ ماتانی دل ءَ نزور کنت۔ زالم زور ءُ ￶زوراکی کن اَنت، ماتانی شھزادگیں بچّاں ￴پَچگِر اَنت گُڑا بزاں مات ءِ ￵چمّاں ھون ءِ ￵اَرس رِچ ایت۔

کیّا جان : تئی مات ءِ ￵دست ￵سر ءَ اَنت ءُ ￶چمّانی اَرس جیگ ءَ ￴چہ ترمپ ترمپ ءَ ￴رِچان اَنت، ھمے گْوشگ ءَ ￴اِنت منی پُلیں بچ تئی توار گار اِنت؟ تو چرے دنیا ءَ ￴نہ رپتگ ئِے ءُ بْیا واتر کن، منی چم تئی رھچار اَنت۔ منی پُل نہ زاناں ￴تو کُجا شُتے ءُ ￵ترا چونے ءَ دژمن ءَ ￴ترا اَچ من دور کُت؟ منی ساہ! اِے کُجام زالمیں دژمن اِنت کہ اِے وڑیں بچّان چہ ماتاں ￴دور کن اَنت؟ باریں چنچو بچ وتی مات ءَ ￴چہ دور اِنت؟

کیّا جان: تئی داتگیں مھر تھنا مئے کِرّ ءَ یل دات ءُ ￶شُت ئے￷، بس تئی مھر انگت مئے دل ءِ ￵توک ءَ زندگ اِنت۔ بِھشت تئی ھَنکیں ءُ گُلباگ ءِ شادھاں شادمان بات ئِے۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت- 
￵