TBP Balochi

بلوچستان ءِ جتاجتائیں دمگاں چہ پاکستانی پوج ءِ دست ءَ زورانسری بیگواہ کنگ بیتگیں کم چہ کم شانزدہ مردم کنگ بیتگ اَنت، انسانی ھکانی گل بلوچ یکجھتی کمیٹی ءُ کھول ءَ اے مردمانی یل بیگ ءِ گپ راست کتگ-

ھالانی رِد ءَ بلوچستان ءِ دمگ چہ کیچ ءِ تھسیل تربت ءُ ناصر آباد ءَ شش مردم یل کنگ بیتگ اَنت آیانی تہ ءَ انضمان حسن ء محمد حسن، جھمنند ناصر آباد ، عبدالمجید ء عبدالغنی جھمنند بلیدہ، غلام قادر ء دوست محمد جھمنند بلیدہ، دلسرد ء محمد حسین جھمنند آسکانی بازار آپسر ، ذاکر حیدر ء حیدر جھمنند آسکانی بازار، زید ء ملا عبداللہ جھمنند صلالہ بازار تربت ھوار اَنت-

بلوچ یکجھتی کمیٹی ءِ رِد ءَ بلوچستان ءِ دمگ ھُزدار ءِ تھسیل چہ نال ءَ یکیں روچ ءَ زورانسری بیگواہ کنگ بیتگیں شش مردم ممتاز علی ء محمد اسماعیل شاھوانی، وزیر احمد ء رحمت اللہ، اقبال ء غلام رسول شاھوانی، نظیر احمد ء رحمت اللہ، لیاقت علی ء محمد انور شاھوانی، حکمت اللہ ء عزیز اللہ یل کنگ بیتگ اَنت-

گل ءِ رِد ءَ اشانی تہ ءَ دو مردم نُھ مئی ءَ یل کنگ بیتگ اَنت، وھدے کہ آ دگہ چاریں بیست سئی مئی ءَ بیتگ اَنت-

بی وائی سی رِد ءَ چہ گوادر ءَ زورانسری آوار جنی ءِ نشانگ کنگ بیتگیں شعیب رفیق ء رفیق بلوچ، جھمنند ٹی ٹی سی کالونی گوادر، دوازدہ مئی دوھزار بیست پنچ ءَ زورانسری آوار جنی ءِ نشانگ کنگ بیتگ اَنت آ سی مئی ءَ یل کنگ بیتگ ءُ وتی لوگ ءَ سر بیتگ-

بی وائی سی رِد ءَ شش اپریل ءَ چہ موسیٰ خیل ءَ زورانسری آوار جنی ءِ نشانگ کنگ بیتگیں دو مردم ظفر بزدار ء خان محمد، جھمنند شام موسیٰ خیل، آفاق بزدار ء ایوب بلوچ جھمنند رارا، ردا گوستگیں روچ ءَ یل کنگ بیتگ-

ھمے وڑ چہ مشکے ءَ سیادی داروکیں بیاندر بلوچ ء مرید خان، بیست نُھ نومبر دوھزار بیست چار ءَ چہ بیگواہ بیتگ، یک جون دوھزار بیست پنچ ءَ چہ ھب ءَ یل کنگ بیتگ-

ناروے ءِ شھر للے ھامر ءَ برجاھیں گلوبل انسانی ھکانی دیوان ورلڈ ایکسپریشن پورم (WEXFO) ءَ بلوچ یکجھتی کمیٹی ءِ سروک ڈاکٹر ماہ رنگ بلوچ ءِ نہ بوگ ءِ یات ءَ سک شرپداریں رنگے ءَ یات کنگ بوتگ۔ کانپرنس ءِ جارچیناں آئی ءِ نشست چیدگی نمائندگی ءِ دروشم ءَ ھالیگ کتگ ءُ اے شریکیں مردمانی واست ءَ یک باسانیں پیامے ءَ جوڑ بوتگ۔

جارچیناں ھمے موہ ءِ سر ءَ جار جت کہ ڈاکٹر مھرنگ بلوچ پہ انسانی ھکاں وتی توار چِست کنگ ءَ مروچی زندان ءَ بند اِنت ءُ پہ زھرشانی ءِ رد ءَ ما آئی ءِ کرسی ھالیگ یلہ داتگ۔

اے چیدگی گامگیج ءِ رد ءَ گوں ھما جھدکاراں یکجھتی ءِ درشان کنگ بوتگ کہ آ پہ آجوئی ءِ درشان ءُ انسانی ھکانی رکینگ ءَ گپ جنگ ءَ انت۔

اے دیوان ءَ انسانی ھکانی وکیل ایمان مزاری، اھوالکار کیّا بلوچ، ءُ بازیں میان استمانی انسانی ھکانی جھدکار ءُ باسک راھشوناں بھر زرتگ۔

اے موہ ءِ سر ءَ انسانی ھکانی جھدکار ءُ وکیل ایمان مزاری ءَ ھالیگیں نشست ءِ اکس شنگ کتگ ءُ نبشتگ ” ادا للے ھامر ءَ انسانی ھکانی دیوان ءِ وھد ءَ ڈاکٹر مھرنگ بلوچ ءَ یات کنگ بوتگ۔”

اھوالکار کیّا بلوچ ءَ گُشتگ کہ ریپلر ءِ شریک بانی ماریا ریسا ءِ پُریں ھال ءَ گُشتانک ءِ وھد ءَ یک ھالیگیں کرسی یے ءَ ڈاکٹر مھرنگ بلوچ ءَ را بے تواری ءَ شگر ءُ منت گپت، ھما مردمانی یات ءَ کہ پہ راستی ءِ گشگ ءَ بے توار انت۔

ڈاکٹر مھرنگ بلوچ ءِ گْوھار کہ آئی ءِ کیس ءَ گوں نزیکی ءَ، رندگیری کنگ ءَ اِنت آئی ءَ اے موہ ءَ گْوشتگ کہ من WEXFO ءِ بے دروریں منت واراں کہ مرچی ڈاکٹر مھرنگ بلوچ ءَ نہ ایوک ءَ نام ءِ بستار ءَ بلکیں دلیری ءُ زمیر(زرد) ءِ نشان ءِ بستار ءَ یات کنگ ءَ آں ۔

ماہ رنگ بلوچ ءِ گْوھار نادیہ بلوچ ءَ گُشت کہ بس گوستگیں سال ءَ ماہ رنگ ھمے پڑ ءِ سر ءَ اوشتاتگ ءُ بھادری ءَ گوں راستی ءِ گپ جتگ۔ مرچی ھمے راستی ءِ ھاتر ءَ بندیگ اِنت۔ آئی ءِ یکیں ‘جرم’ ایش ات کہ آئی ءَ ناانساپی ءِ سر ءَ بے تواری ءَ چہ انکار کت۔ انچو کہ ما دگہ ائیدے ءَ آئی ءِ ھست نہ بوگ ءَ گوازینگ ءَ ایں آئی ءِ نہ بوگ یک انچیں ٹپے کہ انگت ءَ وش نہ بوتگ۔

نادیہ بلوچ ءَ گْوشتگ کہ ھالیگیں کرسی ایوک ءَ آھانی نہ بوھگ ءِ نشانی نہ بوتگ بلکیں ھما زوراکانی یات بوتگ کہ آ نہ ٹھگ ءِ ھاموش کنگ لوٹ اَنت بلکیں اے ھم یات بوتگ کہ گھگیری ھاموشی ءَ ھم زندگ اِنت۔

زانگ بہ بیت کہ بلوچ یکجھتی کمیٹی ءِ سروک ڈاکٹر ماہ رنگ بلوچ گوستگیں بازیں ماھاں چہ 3MPO ءِ چیر دستی ءَ شال ءَ بندیگ اِنت۔ اے وھد ءِ تہ ءَ آئی ءِ تھری ایم پی او ءِ ھلاپ ءَ درخواست ھم آمیدگساں رد کتگ اَنت۔

بلوچستان سرکار ءِ نیمگ ءَ ڈاکٹر مھرنگ بلوچ ءِ ھلاپ ءَ سئے ایم پی او کیس جوڑ کنگ بیتگ اَنت ءُ ڈاکٹر مھرنگ ءِ ھمراہ بی وائی سی بیبو بلوچ، شاھجی سبگت اللہ، بیبرگ زهری ءُ گلزادی بلوچ ھم زندان ءَ بند اَنت۔

بولان ءِ بازیں دمگاں یکبرے پد ءَ مزنیں کساسے ءَ پوجی آپریشن بندات بوتگ۔

بلوچستان ءِ ھَند بولان ءِ بازیں دمگاں گونی پرا، یکو ءُ کِرّ ءُ کشاں مزنیں کساسے ءَ پاکستانی لشکر ءِ نیمگ ءَ آپریشن بندات کنگ بوتگ، ءُ ھمے وھد ءَ لشکر مزنیں کچّے ءَ اے دمگاں پترتگ۔

اتکگیں ھالانی رِد ءَ لشکر ءِ آپریشن ءِ وھد ءَ بازیں جاھے ءَ مزنیں کساسے ءَ گوں ھیلی بالگرداں تیرگواری ھم کنگ بوتگ۔

بولان ءُ کِر ءُ کش ءِ دمگاں گْوستگیں بازیں روچاں وھد وھد ءِ سر ءَ پوجی آپریشن ءِ ھال آیان بوتگ۔ چریشی ءَ پیسر ْگْوستگیں ماہ ءَ بولان ءِ دمگ سانگان، جالڑی ءُ کِرّ ءُ کشاں ھم پوجی آپریشن کنگ بوتگ۔

بلوچ لبریشن آرمی ءَ گْوستگیں ماہ ءَ شورکنڈ ءُ مَچ ءِ دمگ ءَ پہ آپریشن ءِ ھاتر ءَ اد ءَ اتکگیں لشکر ءِ یک موٹلے گوں بمب ءَ نشانگ کرتگ اَت۔

بی ایل اے ءِ گْوشگ ءِ رِد ءَ اے اُرش ءِ وھد ءَ موٹل ءَ سواریں سرجمیں بزاں دوازدھیں لشکر ھما جاہ ءَ مرتگ اَنت، ءُ گلّ ءَ اے اُرش ءِ تامر پوٹیج ھم وتی آپیشل اکاؤنٹ ”ھکّل“ ءَ داتگ اَت۔

بلوچستان ءِ ھَند کیچ ءِ دمگ بالگتر ءَ پزور گاریں مردمانی بیگواھیانی بگیری ءَ گاریں مردمانی کھولانی نیمگ ءَ زھرشانیں نندانک برجاہ اِنت، چریشی ءِ سوب ءَ سی پیک ءِ مزن دگ ایم 8 پہ ھرچ وڑیں رَو آ ءَ بند کنگ بوتگ۔

نندانک ءَ مزنیں کچّے ءَ زالبول ءُ زھگ ھم گون اَنت کہ وتی دوستیں مردمانی آجوئی ءِ لوٹ ءَ کنگ ءَ اَنت۔

زھرشانی کنوکیں مردماں گْوشتگ: دانکہ گاریں مردم زاھر ءُ دیم ءَ آرگ نہ بنت، زھرشانی برجاہ اِنت ءُ دگ پچ کنگ نہ بیت۔

زھرشانی ءِ سوب ءَ تربت، گوادر، پنجگور ءُ شال ءِ میانجی ءِ زمینی رھوتکاری سرجم ءَ بند اِنت، مزن دگ ءِ دوئیں نیمگاں سدانی کچّ ءَ موٹل اوشت ءِ آماچ اَنت کہ ماں آیاں زالبول، کماش، زھگ ءُ ائید ءِ موکلاں رند گِساں واترّوکیں نودربر ھور اَنت۔۔

سرکار ءِ ھَندی مردمانی گْوشگ ایش اِنت بند ءُ بستی مردم (انتظامیہ) گوں زھرشانی کنوکاں نند ءُ نیاد ءِ جھد ءَ کنگ ءَ اِنت تاکہ جیڑہ توجیل کنگ بہ بیت۔

بلوچی زبان ءِ نامداریں جُھدکار ءُ نبشتہ کار ابدلستار بگٹی ءِ کتاب “بلوچی زبان ءِ گالوار، لبزانک ءُ بُنرھبند” جریدگ بوتگ ءُ انی بلوچ راج ءِ نودربر ءُ لس وانِندھاں اے کتاب رودراتکی ءُ تو ایرشُتی بلوچستان ءِ مزنیں شھر ءُ ھنداں دزکپ ایت۔

شنگ بیتگین درشان ءَ گوشگ بیتگ عبدالستار بگٹی چہ بلوچستان یونیورسٹی ءَ ٹیل ءُ گیس ءِ انجینئیرنگ کُرتگ ءُ انی ٹیل ءُ گیس ءِ کارجاہ(انڈسٹری) ءَ سینئیریں پرپیشنل انجینئرے پمیشکا راجکاری ءِ زُبانزانتیں مردم گْوشگ ءَ اَنت کہ آئی ءِ نبشتگیں کتاب ءِ تہ ءَ راجی زبان ءِ جتا جتائیں.جیڑھاں ھلاس کنگ ءِ جھد کتگ ءُ بلوچی زبان ءُ آئی ءِ نبشتہ ءَ بے کساس دیمروی رس ایت پرچا کہ ھمے کتاب ءِ تہ ءَ بلوچی زبان ءِ گالوار، لبزانک ، ءُ نبشتہ بُنرھبند ءِ ھر وڑیں سرپدی درشان کنگ بیتگ اَنت۔

عبدلستار ءَ وتی شنگ کتگیں درشان ءَ گوشتگ اے کتاب کالج ءُ یونیورسٹی ءِ بلوچ نودربر ءُ وانِندھاں نوکیں رسانکدری ھُنر(موڈرن کمیونیکشن سِکل)، نبشتہ ءُ زِند ءِ ھر پِڑ ءَ ھم پائدگ دنت۔

آئی ءَ گوشتگ مھمد شکاری ءُ دِگہ بلوچی زبان ءِ جُھدکار ءُ زانتکارانی رِد ءَ من اے کتاب بلوچی زبان ءِ یک شریں دربری یے کہ ھمے کتاب ءِ تہ ءَ بلوچی گالوار، لبزانک ءُ بُنرھبند ءِ بابت ءَ ھر وڑیں سرپدی دیگ ءِ جھد کتگ۔

آئی ءَ گوشتگ باید اِنت بلوچ زبان دوست ءُ راجدوستیں مھلوک واجہ ءِ کتاباں زُور اَنت، وان اَنت ءُ وتی سْیاد ءُ سنگتاں ھم ٹیکی بہ کن اَنت کہ راج ءِ تہ ءَ بلوچی وانگ ءُ راست نبیسگ البار بہ بیت ءُ واجہ ابدلستار بگٹی ءِ وڑیں آدگہ بلوچ راجی زبان ءِ جھدکاراں دلبڈی بہ رس ایت کہ بلوچی زبان ءِ سر ءَ گیشتَر کار پٹ ءُ پول بہ کن اَنت۔

شال ءِ رودرتکی بائی پاس ءَ پسانی منڈی ءِ نزیک ءَ پولیس کارمندانی سر ءَ دستی بمب اُرشے کنگ بیتگ، چریشی ءِ آسر ءَ ایس ایچ او ءَ ھوار سے مردم ٹپی بیتگ اَنت-

پولیس رِد ءَ ناشناسیں پرپٹ سواراں پولیس ءِ گاڑی نشانگ کتگ ءُ دستی بمبے چگل داتگ چریشی ءِ آسر ءَ تُرندیں تراکے بیتگ-

تراک ءِ آسر ءَ ایس ایچ او سک ٹپی بیتگ، وھدے کہ دو دگہ کارمند ھم ٹپی ئیں جاوراں نادُراھجاہ ءَ برتگ اَنت-

پولیس ءُ پوج ءَ دمگ انگیر ءَ کتگ سرچ آپریشن بندات بیتگ-

تنی وھدے اے اُرش زمہ واری ھچ گل ءَ نہ زرتگ-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ بی ایل اے ءِ گچینی باسک “ اسپیشل ٹیکٹیکل آپریشنز اسکواڈ ( ایس ٹی او ایس) ءَ گوستگیں شپ ءَ شال ءَ یک کاروائی ءِ وھد ءَ زورگریں پوج ءِ گچینی کارندہ بابل مھمد حسنی کشتگ- اے کاروائی بی ایل اے ءِ انٹیلی جنس ونگ “ زراب” ءِ چیریں ھالانی بنیاد ءَ سوبمندی ءَ کتگ-

آئی ءَ گوشتگ بی ایل اے ءِ سرمچاراں شال ءِ دمگ بروری دگ، اسٹاپ ءِ ھند ءَ زورگریں پوج ءِ کمکار بابل ء زبر مھمد حسنی ءِ گاڑی ءَ لِچوکیں آئی ای ڈی بمبے پِٹ کتگ ءُ نشانگ کتگ- چریشی ءِ آسر ءَ آ ھما جاہ ءَ مرتگ ءُ آئی ءِ ھمراہ نبیل ء مھمد امین جھمنند کلات سکا ٹپی بیتگ – اے اُرش ءَ آئی ءِ گاڑی سرجم ءَ تباہ بیتگ-

جارکش ءَ گوشتگ بابل ء زبر مھمد حسنی جھمنند کلات پاکستانی پوج ءُ آئی ءِ چیریں ادارھانی گچینی کارندھے بیتگ- کہ سلکاریں ڈیتھ اسکواڈ ءِ کارندہ زکریا مھمد حسنی ءَ گوں تچک ءَ ھوار بیتگ – بابل حسنی کلات ءَ یک سلاہ بندیں گلے ءِ سروک بیتگ- کہ کلات ءُ کش ءُ گوری دمگاں پرکار بیتگ-

“بابل حسنی ءَ زورگریں پوج ءِ سروکی ءَ یک لٹ ءُ کٹی بنجلے برجم کتگ آئی ءَ اود ءَ ورنا گپتگ ءُ لٹ ءُ کٹ ءُ بندیگ کتگ انت- اے ٹولی ءَ بازیں جاھاں سنگر ھم برجم کتگ انت – کلات ءِ دمگ “ گراپ” ءَ پوجی چوکیانی برجم کنگ ءَ کرد پیلو کتگ انت ءُ سرھین ءُ کش ءُ گوری دمگاں بابل ھسنی ءِ سروکی ءَ اے ٹولی ءَ لس مھلوک ءِ سر ءَ زُلم ءُ زوراکیاں تچک ءَ ھوار بیتگ – گیش منگچر ءِ دمگ کوھک ءَ ھم اے ٹولی ءَ بازیں ورنایے آوار جتگ ءُ بیگواہ کتگ انت-”

آئی ءَ گوشتگ بابل ھسنی ءَ بندوکیں نیٹورک ءِ دگہ مردمانی پجار ھم بیتگ انت کہ آیانی سر ءَ بی ایل اے ءِ انٹیلی جنس ونگ زراب ءَ یکشل ءَ وتی نگاہ ایر کتگ انت – اے دابیں دراھیں مردم بابل حسنی ءَ زانت یا نازانتی ھوار انت آیاں بی ایل اے گڈی موکل ءَ دنت کہ آ بلوچ راجی لشکر ءِ دیم ءَ سلاھاں چگل بہ دے انت اگاں ناں گڑا آیانی ھال چو بابل حسنی ءَ کنگ بیت انت-

بلوچ استاد کندیل سباء دشتیاری ءِ شھیدی ءِ چاردھمی سالروچ ءِ درگت ءَ سید زھورشاہ ھاشمی ریفرنس کتاب جاہ ءِ چیردستی ءَ ملیر ءَ یک مراگشے اڈ دیگ بیتگ-

مراگش ءَ سبا دشتیاری ءِ زند ءُ ازم ءِ درگت ءَ گپ ءُ آئی ءِ کتگین کارانی سر ءَ چمشانک دیگ بیتگ-

مراگش ءَ جتا جتائیں لبزانکاراں بھر زرتگ نامی ئیں لبزانکار اے آر داد، پروفیسر رمزان بامری، سادک سباء ءُ دگہ دگراں بھر زرتگ –

دیوان ءَ سباء زند ءِ ازم ءُ بلوچی ءَ کتگیں آئی ءِ کاروانی بارو ءَ چمشانک دیگ بیتگ انت-

گشتانکاراں گشتگ سباء ھما ناماں یکے بیتگ کہ آئی ءَ وتی سرجمیں زند بلوچی ءِ زبان ءُ بلوچ ءِ زند ءِ بارو ءَ ندر کتگ-

گشتانکاراں گشتگ سباء دشتیاری پہ بلوچی زبان ءَ بے مٹ ءُ بے دروریں کواسے بیتگ کہ آئی ءَ ھمک کار کہ جنزینتگ گڑا آ آسر کتگ ءُ یل داتگ –

دیوان جتا جتائیں تھرانی توک ءَ بیتگ کہ بنداتی سباء زند ءُ دومی شائری ءُ سیمی کتاب دیمدراھی بیتگ کہ اود ءَ چاپ ءُ شنگ بیتگیں کتاب پیش کنگ بیتگ انت-

زانگ بہ بیت استاد کندیل سباء دشتیاری سال دوھزار ءُ یازدہ ءَ یک جون ءَ ماں بلوچستان ءِ بنجاھی شھر شال ءَ ناشناسیں مردماں تیرانی آماچ کتگ ءُ آ چریشی ءَ پد آ شھید بیتگ-

ھمک سال ءَ سباء یک استادے ءِ دروشمے ءَ ھوار کندیلے ءِ رنگ ءَ یات کنگ بیت انت-

بلوچ لبریشن آرمی ءِ جارکش جیئند بلوچ ءَ رسانکدر ءَ وتی شنگ کتگیں درشان ءَ گوشتگ کہ بی ایل اے ءِ سرمچاراں مستونگ ءَ لیویز ءِ تانہ ءُ چوکیانی دستیگ کنگ ءَ ھوار زورگریں پوج ءِ سر ءَ اُرش کُتگ ، ھمے وڑ پاکستانی پوج ءِ چاریگے ءِ سر ءَ ھم اُرش کُتگ –

جارکش ءَ سرجمیں ھال داتگ ءُ گوشتگ کہ بی ایل اے ءِ سرمچاراں گوستگیں شپ ءَ مستونگ ءَ ولی ھان پولیس تانہ دستیگ کُتگ ، ھمے وڑ سرمچارانی دگہ یک ٹولی یے ءَ شال – کراچی ءِ مزنیں شھدگ ءَ لیویز ءِ چوکی گپتگ ءُ شھدگ داں یک ادارے ءَ بستگ –

جارکش ءَ گوشتگ کہ اے کار ءَ سرمچاراں تانہ ءُ پورس گاڑی مانداشتگ ءُ تباه کُتگ اَنت ، ءُ کارندھانی شش توپک پچ گپتگ انت ، سرمچاراں دزگیر کُتگیں ششیں لیویز کارندہ ھمے واست ءَ یل داتگ انت کہ آ بلوچ بوتگ انت –

آئی ءَ گوشتگ کی بی ایل اے ءِ سرمچاراں یک شمبے ءِ شپ ءَ مستونگ ءِ ھند کھڈکوچہ ءَ زورگریں پاکستانی پوج ءِ چوکی ءِ سر ءَ ھم اُرش کتگ ءُ اے اُرش بیست دمان ءَ گیش برجاه بیتگ ، سرمچاراں گوں وتکار ءُ ٹوھیں سلاھاں اُرش کُتگ ، چریشی ءَ دژمنیں پوج ءِ دو کارندہ ھما جاہ ءَ مرتگ ءُ دژمن ءَ بازیں جانی ءُ مالی تاوان بیتگ –

جارکش ءَ گوشتگ کہ بی ایل اے ءِ سرمچاراں 27 مئی ءَ شال ءِ جی ڈی اے گراونڈ ءَ زورگریں پاکستانی پوج ءِ چاریگ محمد نبی کلجی ءِ سر ءَ اُرش کُتگ اُرش ءِ آسر ءَ سک باز ٹپی بیتگ ، نشانگ کنگ بیتگیں چاریگ وتگڑیں تھریک جوانان پاکستان ءِ مارکور ونگ شال ءِ سروک اِنت کہ زورگریں پاکستانی پوج ءِ چیردستی ءَ وتگڑیں مراگش ءُ روانک برجاه دار اَنت ، چاریگ محمد نبی مردماں لب ءُ بیھار دنت ءُ آیاں پہ پاکستانی پوج ءِ ھاتر ءَ کار گپتگ –

درشان ءِ گڈسر ءَ گوشگ بیتگ ما اے گپ ءَ تچک کن ایں کہ پاکستانی پوج ءِ چیردستی ءَ وتگڑیں مراگش ءُ روانکانی برجاه داروکیں چاریگ تچک ءَ مئے نشانگ ءَ اَنت ، ءُ چہ لس مھلوک ءَ لوٹ اِیں کن ایں کہ آ وت ءَ چہ اِے چاریگاں دور بہ دار اَنت دانکہ آ ھر وڑیں جانی ءُ مالی تاوان ءَ بہ رکّ اَنت –

بلوچستان ءِ بُنجاھی شھر شال ءَ روکپتی بائی پاس ءِ سر ءَ برجاہ بروری دگ ءِ گُڈی اسٹاپ نزیک ءَ یک گاڑی یے گمانی یک چنوکیں آئی ای ڈی تراک ءِ نشانگ کتگ، چریشی ءِ آسر ءَ یک مردمے جاہ پہ جاھی مرتگ وھدے کہ چار مردم ٹپی بیتگ اَنت-

ایس ایچ او بروری تھانہ محمود خروٹی ءِ رِد ءَ تراک ءَ بیران بیتگیں مردم ءِ پجّار بابُل محمد حسنی ء محمد حسنی جھمنند کلات نام ءَ چہ بیتگ وھدے کہ آئی ءِ ھمراہ نبیل احمد ء محمد امین سک ٹپی بیتگ اَنت-

تراک ءِ آسر ءَ سے راھگوز ھم ٹپی بیتگ اَنت کہ آیانی تہ ءَ بلاول ء فتح، محمد انور ء کریم، عبدالظاھر بنگلزئی ھوار اَنت-

واکدار ءَ راست کتگ کہ ٹپی زوت بولان میڈیکل کمپلیکس ءَ برتگ اَنت اود ءَ الاج کنگ بیگ ءَ اَنت-

پولیس گوشگ اِنت کہ ٹپیانی تہ ءَ یکے گاڑی ءِ تہ ءَ بیتگ وھدے کہ آ سئیں راھگوز بیتگ اَنت کہ تراک نشانگ تہ ءَ اتکگ اَنت، ایس ایچ او ءِ رِد ءَ اے ھم پدر نہ بیتگ کہ تراکناکیں شورو گاڑی تہ ءَ بیتگ اَنت یا کہ ڈن ءَ چہ لچینگ بیتگ بلے پٹ ءُ پول برجاہ ءَ اِنت-

اِھوالکار رِد ءَ بابُل محمد حسنی پاکستان آرمی ءِ پلامرزی ءِ بدنامیں ” ڈیتھ اسکواڈ ” ءِ ھاسیں باسک بیتگ اَنت، وھدے کہ اشی ءِ پِت گوستگیں سال ءَ بلوچ لبریشن آرمی ءِ ” آپریشن ھیروپ ” ءِ میان ءَ کُشگ بیتگ اَت-

پولیس ءُ سیکیورٹی ادارہ وئیلجاہ ءَ سر بیتگ اَنت منانک یکجاہ کنگ ءَ اَنت وھدے کہ سیکیورٹی گیش ترند کنگ بیتگ-