TBP Balochi

بلوچ لبریشن آرمی ءَ پنچ شمبے ءِ روچ ءَ تربت ءَ 50 کلومیٹر ءَ دور روکپتی نیمگ ءَ سیکیورٹی کاروان ءِ سر ءَ وت کُشیں اُرش کتگ ءُ اے گل ءِ آپریشنل توانائیانی تہ ءَ گیشی ءُ ھنر ءُ رپکانی تہ ءَ مزنیں بدلی یے اتکگ۔

اھوالکار کیّا بلوچ ءَ اے اُرش ءِ سر ءَ چمشانک دیان ءَ گْوشتگ کہ چوشیں اُرش ءَ پد مردم بیران بوگ ءِ ھال گیشتر بنت بلے بی ایل اے ءِ وڑیں جنگولی گلانی واستا وھد ءُ چیدگ گیشتر ھژدری اَنت۔ تربت ءِ وت کُشیں اُرش ءِ شوربندی ءِ ھاتر ءَ دمگی ءُ ملکی جاور ھال ءِ بدلی ءِ سر ءَ ھیال ءُ لیکہ کنگ بوتگ۔

آئی ءَ گوشتگ کہ اولی گپ ایش انت کہ اُرش پاکستان ءُ سعودی عرب ءِ نیام ءَ پھریزی مسام ءِ سر ءَ دزنشان کنگ ءِ روچ ءَ پد بوتگ وھدیکہ پاکستان وت تہ ئِے سیکورٹی چیلنجاں گوں دوچار انت۔ دومی بلوچستان ءِ مڈیانی تہ ءَ میان اُستمانی سرمایہ کاری گیش بوھگ ءَ اِنت ءُ نوکیں مسام کنگ بوھگ ءَ اِنت۔ سیمی ایش کہ اے اُرش شنگھائی کمک گل ءَ بی ایل اے ءِ ایرجنگ ءَ چہ دو ھپتگ ءَ پد بوتگ۔ ءُ چارمی ایش کہ یک ماھے ءَ پد امریکہ ءِ مھمکہ ھارجہ ءَ بی ایل اے ءُ آئی ءِ مجید بریگیڈ ءَ را درملکی ناشرکاریں گلانی نام داتگ۔

“گوں اے اُرش ءَ بلوچ آجوئی لشکر اے کلوہ ءَ دیم دیگ لوٹ اِیت کہ اے بندش آئی ءِ کارروائیاں بند کُت نہ کن اَنت۔”

“اے اُرش بی ایل اے ءِ زور ءُ ملکی ءُ میان اُستمانی تک ءَ وتی اهمیت ءِ پدراھی کنگ جزم ءِ درشان کنت۔ وت کُش اُرش ءِ گچین کاری ءَ چہ اے گل ءِ دیمروئی کنوکیں تاکت ءِ ھمراھی ءَ آئی ءِ انٹیلی جنس ءُ شوربندی ءِ رپک ءِ درشانی ءَ کنگ بیت۔”

اھوالکار ءَ نبشتگ کہ اے وئیل پہ اسلام آباد ءَ یک یاداشتائی یے کہ سپارتی ءُ زرکاری سوبمندی ءِ باوجود تہ ئِے ایمنی یک مزنیں چیلنجے ءِ بستار ءَ ھست اِنت۔

بلوچستان ءَ بلوچ جنگولانی گیشیں اُرشانی گر ءُ دار کنگ ءَ پاکستانی پوج بے سوبی ءَ گندگ بیت انت کہ گوستگیں روچ ءَ داش دوشیگیں شپ ءَ بازیں جاھاں پوج ءِ سر ءَ اُرش بیتگ انت-

ھمے وڑ کلات ءَ سلاہ بنداں سیکیورٹی پورسز ءِ سر ءَ دزبمبے چگل داتگ ءُ دومی نیمگ ءَ لکپاس ءُ دگہ جاھاں بلوچ جنگولاں راہ بستگ ءُ مھلوک ءَ تران کتگ-

دومی نیمگ ءَ پاکستان ءَ پوج ءَ ٹاہ داتگ کہ آئی ءَ زھری ءَ بلوچ جنگولانی بنجل ڈرون اُرش ءِ نشانگ کتگ انت ءُ بلے ایشی ءِ چپ ءَ دمگی مردمانی گوشگ انت زھری ءَ لس شھری نشانگ کنگ بیتگ انت کہ آیانی توک ءَ زالبول ءُ کماش ھوار انت-

بلوچستان ءَ بلوچ جنگولانی تاکت یک پدراھی ءِ کنت کہ اود ءَ بلوچ جنگول پرکار ءُ تاکت دار انت آ ھرکجا اُرش کنگ ءِ تاکت ءَ کت کن انت –

گوستگیں دو روچ پیش ھم دشت ءَ ھمے دمگ ءَ پوج ءِ کاروان ءِ سر ءَ اُرش بیتگ ات کہ آ اُرش ءِ زمہ واری بلوچستان لبریشن فرنٹ ءَ زرتگ ات-

جارکش گوھرام بلوچ ءَ چار پوجی کارندھانی کوش ءُ وتی سرمچارانی نمیران بوگ ءِ درشان کتگ ات-

چوشکہ پاکستان ءِ پوج وتی روٹاں مٹ کت کنت بلے بلوچ جنگولانی ھُنر ءُ رپکاریاں آ گپت کنگ ءَ نہ انت اے دابیں اُرش گوست ءَ ھم بلوچستان ءِ دگہ جاھاں پاکستانی بسانی پوجی کاروان نشانگ کنگ بیتگ انت-

بلوچستان ءَ زورانسری آوار جنی ءُ بلوچ چُکچینی ءِ یکشل ءَ برجاہ ءَ اِنت-

بلوچ یکجھتی کمیٹی ھر وھد ءَ بلوچستان ءَ بلوچ راج ءِ ھلاپ ءَ بیؤکیں زوراکی ءِ ھلاپ ءَ توار چست کتگ ءُ توار چست کنگ ءَ اِنت ءُ مدام گوں پُرایمنی دروشم ءَ زھرشانی روانک کش اِتگ ءُ آیاں گوں سرکار ءَ مدام ھمے لوٹ کتگ کہ زورانسری آوار جنی ءُ درکانودی کوش ءِ بند کنگ لوٹ کتگ بلے ھمشی ءِ پُشدر ءَ پاکستانی ریاست ءَ بلوچ یکجھتی کمیٹی ءِ سروک پنچ ماہ ءَ گیش بیت کہ بندیگ کتگ یکو ریمانڈ دیگ بیگ ءَ اَنت –

ھمے وڑ اسلام آباد ءَ بلوچ کھولانی نندانک ءَ شست پنچ روچ سرجم بوتگ – جاوید ہاشمی بُنجل ءَ اتگ، بلے ھکومتی ھساب ءَ آیانی لوٹ تنی وھدے سرجم کنگ نہ بیتگ اَنت، کھول ءِ گوشگ اِنت اے میان ءَ آیاں ریاستی ادارہ ءُ انتزامیہ نیمگ ءَ چہ تاوان جاہ ءَ گیش تُرسینگ ءُ دلیساھی دیمپانی کنگ کپتگ-

زھرشانی کنوکانی گوشگ اِنت کہ آیانی ھکومت ءِ دیم ءَ دو بُنکی لوٹ ایر کتگ اَنت آیانی تہ ءَ بی وائی سی ءِ سروکانی ھلاپ ءَ آسری کاروائی ءِ ھلاسی ءُ چہ بلوچستان ءَ زورانسری آوار جنی ءِ ھلاس کنگ ءُ بیگواھیں مردمانی یل کنگ ھوار اِنت-

زانگ بہ بیت کہ جولائی ءَ اسلام ءَ برجاہ زھرشانی بُنجل ءِ بنداتی روچ پولیس ءَ دیر کنگ ءِ جھدکتگ چریشی ءَ پد زھرشانی کنوک پچیں آزمان ءِ چیر ءَ نندانک دیگ ءَ لاچار بیتگ اَنت-

مروچی بُنجل ءَ پاکستان ءِ گوستگیں وزیر جاوید ہاشمی ءُ بازیں سیاسی ءُ وکیلانی گل ءَ نمائندگ ءَ بھر زرتگ-

اے درگت ءَ جاوید ھاشمی ءَ پوج ایر جتگ گوشتگ کہ یکرندے رودرتکی پاکستان جتا بیتگ ءُ نی ھما جاور بلوچستان ءَ گندگ بیگ ءَ اَنت توانمندیں پوجی تاکت بلوچستان ءِ آجوئی ءِ نیمگ ءَ جُنزینگ ءَ اَنت-

آئی ءَ گوشتگ کہ اود ءَ بلوچستان ءَ بُتیں نمائندگ نادارینگ بیتگ اَنت آ اسلام آباد ءَ کاینت نند اَنت بلے یکرندے ھم بُنجل ءَ نیا اَنت اشی ءَ چہ پدر بیت آ راجی نمائندگ نہ اَنت-

جاوید ہاشمی ءَ زھرشانی کنوکانی ھمت ءُ جُھد ءِ ستا کتگ-

بلوچ کھولاں اے درگت ءَ گوشتگ کہ مروچی ما شست پنچ روچ سرجم کتگ سارتی، گرمی، ھوار ءُ اُمیت ءِ آزمائش ءَ ما وتی رھشونانی یل کنائینگ ءُ دوستناکانی یل کنائینگ ءَ تاں پُشت ءَ نہ کنز ایں، اے تھنا نندانکے نہ اِنت یک زندگیں کولے دانکہ مئے سیاسی رھشون ءُ بیگواھیں دوستناکانی واتر نیا اَنت ما وتی تواراں بے تواری ءَ نیل ایں-

آیاں دیمتر ءَ گوشتگ کہ دُژمن ھمینچو دروازگ ءَ بند بہ کن اَنت مئے ماتانی دوا، گھارانی ھوسلہ ءُ ورنایانی جزبگ ھچ تاکت ءَ چہ کم نہ اِنت ءُ مئے کلوہ تچک اِنت انساپ مئے ھک اِنت-

گُڈی ءَ کھول ءَ راج ءَ چہ دزبندی اِنت کہ آ انساپ ءِ اے جُھد ءَ ھوار بہ بنت نندانک ءَ بیا اَنت، توار چست بہ کن اَنت ءُ زُلم ءِ پُشت ءِ مردماں پدر بہ کن اِت-

گوستگیں روچ ءِ سُھب ءِ پنچ ءَ روکپتی بلوچستان ءَ بندوکیں دو مردم ماں اسپھان ءِ مزنیں بندیگ جاہ ءَ پاھو دیگ بیتگ انت-

پاھو دیگ بوتگیں مردمانی پجار ندیم ء سید مھمد جھمنند چھبار، ءُ ابدالکادر ء مِھرالی جھمنند زاھدان ءِ ناماں زانگ بیتگ انت۔

ندیم ھپت سال پیش ءُ کادر دہ سال پیش مَنشیات ءِ بھتام ءَ دزگیر کنگ بوتگ انت ، امیدگس ءَ پیش کنگ ءَ پد آھانی سر ءَ پاھو ءِ ھکم دیگ بوتگ ۔گوشگ بوتگ ابدالکادر مزدورے بیتگ اھانی گُرا ھچ وڑیں منشیات نہ بوتگ آ لس مردمے ھساب ءَ زند ءَ گوازینگ ءَ بوتگ اَنت ۔

یات ببیت کہ ھمے چار روچانی نیام ءَ ایرانی آمیدگس ءِ ھکم ءَ زنداناں نُھ بلوچ پاھو دیگ بیتگ اَنت ، ھمے سال ءِ نیام ءَ روکپتی بلوچستان ءَ ھپتاد بلوچ کساس ءَ گیش پاھو دیگ بیتگ انت، ایرانی آمیدگس ءِ پرمان ءَ زنداناں بلوچ ورنایانی پاھو دیگ ما وڑ وڑیں بھتامانی سر ءَ گوں تیزی ءَ برجاہ انت ، چُش کہ گیشتریں پاھو دیگ ماں منشیات ءِ نام ءِ سر ءَ بوگ ءَ انت کہ چہ آھاں بازیں مردم بے میار لیکگ بیگ ءَ انت ، جھان ءِ انسانی ھکانی ادارھاں بازیں براں ایرانی آمیدگس ءِ سر ءَ ایراد گپتگ ءُ گوشتگ بندیگیں مردماں وتی سپائی دیگ ءِ موہ ءَ بہ دنت دانکہ آیانی سر ءَ جتگیں بھتام راست بہ بنت-

بلوچستان ءِ دمگ کیچ ءَ چین پاکستان اکتسادی راھداری سی پیک ءِ بنجاھی شھدگ ایم 8 ھائی وے ءِ سر ءَ ءَ پاکستانی پوج ءِ بسانی کاروان وتکش تراکے ءِ نشانگ کنگ بیتگ- ویل دشت ءِ ھند کنچتی کراس ءَ بیتگ کہ تربت ءَ کساس 60 کلو میٹر ءِ دوری ءَ انت-

دمگی مردمانی رد ءَ تراک دشت کنچتی ءِ کراس ءَ بیتگ کہ اود ءَ شورو ءَ پُریں گاڑی ءَ پاکستانی پوج ءِ بسانی کاروان نشانگ کتگ ءُ اُرشکاراں کاروان ءِ سر ءَ تیرگواری ھم کتگ-

دمگی مردمانی رد ءَ تراک ءَ لھتے دمان پد دمگ ءَ پوج ءِ کمک ءَ ھیلی کاپٹر سر بیتگ انت ءُ گیشیں پوج ءَ راہ ءُ در بستگ انت ءُ بنداتی اھوالانی رد ءَ بازیں کارندہ بیران ءُ زدگ بیتگ انت-

دمگی مردماں ٹی بی پی ءَ گوں گوشتگ شش بسانی کاروان ءُ سیکورٹی ءَ ھواریں کاروان چہ گوادر ءَ دیم پہ تربت ءَ پیداک بیتگ تراک ءِ توار دور دور ءَ اشکنگ بیتگ ءُ تراک ءَ یک بسے سرجم ءَ تباہ بوتگ ءُ سلاہ بندیں مردماں بساں سواریں کارندہ ھم نشانگ کتگ انت-

بلوچستان ءَ بازیں سالاں آجوئی لوٹوکیں سلاہ بند پرکار انت ءُ پوج ءِ کارواناں یکشل ءَ نشانگ کنگ ءَ انت-

بلوچستان ءِ دمگ ھزدار ءِ ھند زھری ءَ تراسانی کاز وے ءِ نزیک ءَ پاکستانی لشکر ءِ نیمگ ءَ ڈرون اُرش ءَ یکیں ھاندان ءِ دو جنین ءُ یک مردینے ءَ ھوار چار مردم بیران ءُ پنچ ٹپیگ بوتگ اَنت۔

دمگی مردمانی رد ءَ ڈرون ءِ اُرش مچی ءِ نزیک ءَ کنگ بوتگ کہ ایشی ءِ تہ ءَ علی اکبر میراجی ، آئی ءِ لوگ بانک ءُ دگہ دو سیاد بیران بوتگ اَنت ۔ یک راہ گوزے ھم بیران بوتگیں مردمانی تہ ءَ ھوار اِنت ءُ جنین ءُ مردین ھم ٹپیانی تہ ءَ ھوار اَنت۔

بنشون ءِ رد ءَ بیران بوتگیں مولوی علی اکبر میراجی وتی ھاندان ءِ ھمراھی ءَ سوراب گدر ءَ پہ دلپدردی ءِ درشان کنگ ءَ شتگ بیتگ ءُ وتی ملک ءَ واتر بوھگ ءَ بیتگ کہ آئی ءِ کاروان ڈرون ءِ اُرش ءَ نشانگ جوڑ کنگ بوتگ۔

دمگی مردمانی گشگ انت کہ اے دمگ ءَ ڈرونانی بال برجاہ انت کہ ایشی ءَ چہ ترس ءُ بیمی جاور ودی بیتگ انت-

پاکستانی لشکر ءَ مرچیگیں ڈرون اُرش ءِ بابت ءَ سرکاری بیان شنگ نہ کتگ بلے دو روچ پیسر آئی ایس پی آر ءَ زھری ءَ جیٹ بمبتراک ءِ ھال راست کتگ۔

یک فوجی جارکش ءِ رد ءَ اے بمبتراک ءَ بلوچ آجوئی لوٹوکیں مردمانی پناہ گاھے نشانگ جوڑ کنگ بوتگ بلے دمگی مردمانی گْوشگ اِنت کہ اے بمبتراک ءَ لس مھلوک ءَ را تاوان رس اتگ کہ ایشی ءِ تہ ءَ پندرانی ٹک ءِ سئے مردم بیران بوتگ اَنت۔

گوستگیں ھپتگاں زھری ءُ آئی ءِ کش ءُ گوراں پاکستانی لشکر ءِ نیمگ ءَ چہ بالی اُرش ءِ اے دومی وئیل اِنت۔ اگست ءَ چہ اے دمگ ءَ سئے ءَ چہ گیش بالی اُرش کنگ بوتگ کہ ایشی ءِ تہ ءَ دو ڈرون اُرش ھم ھوار اَنت۔

زانگ بہ بیت چہ 11 اگست ءَ زھری ءِ جتاجتائیں دمگ بلوچ آجوئی لوٹوکیں مردمانی دستیگی ءَ بوتگ اَنت کہ اے وھد ءَ پاکستانی لشکر بازیں اُرشانی دیمپان بوتگ ءُ ایشی ءِ تہ ءَ بازیں کارندہ بیران بوتگ اَنت۔

زھری ءِ کنٹرول ءُ پاکستانی لشکر ءِ سر ءَ اُرشانی زمہ واری بلوچ آجوئی لوٹوکیں یکجاھیں گل براس ءَ من اتگ انت-

شھید میرک تو باز یات کائے

نبشتہ کار: سنگت کوھی

رجانکار: دروشم بلوچ

دی بلوچستان پوسٹ

چوناھا بلوچستان ءِ جنگ ءَ ھزاراں ورناھاں وتی سر پہ وتن ءَ ندر کتگ اَنت۔ اے شھیدانی تہ ءَ ھر یکے ءِ جاہ مئے دلانی تہ ءَ سک برز اِنت بلے لھتے سنگت ھست کہ آ تھنا سپاھیگ ناں بلکیں دل ءَ گوں سک نزیک بنت۔ مئے نزّیکی گوں آیاں تھنا جھد یا سنگرانی تہ ءَ نہ بیت، بلکیں آ مئے یات، گپ ءُ دوایانی مُجتی بھر جوڑ بنت۔

شھید میرک ھم یک انچیں سنگتے اَت۔ آ تھنا یک ھمکارے نہ اَت بلکیں یک براتے اَت، یک رازدارے ءُ یک انچیں سنگتے اَت کہ آئی ءِ ھمراھی ءَ نندگ ءَ گوں وھد ءِ ھچ سما نہ کپت۔ آئی ءِ بچکند، آئی ءِ دلیری، آئی ءِ لیکھی پُھتگی ءُ آئی ءِ گپ ءُ تران انگت ھم مئے ذھن ءُ دل ءَ تازگ اَنت۔

یات اِنت کہ آئی مدام گُشتگ اَت: “زند ءِ مستریں سوبمندی ایش اِنت کہ مردم وتی مول ءُ مراد ءِ سر ءَ مھکم بہ بیت۔” ءُ بے شک، میرک وتی گپ ءِ سر ءَ سرجمی ءَ اوشتات۔ آئی ءَ وتی جان دات بلے ھچبر چہ وتی تچکیں راھبنداں پُشت ءَ نہ کنز اِت۔

مرچی ھم کہ ما چہ آیانی کوچگ ءَ گوزیں گڑا آئی ءِ ھالیگیں جاہ مئے دل ءَ سوراک کنت ۔ مُچّیانی تہ ءَ آ بچکندگاں نہ گندیں ، سنگرانی تہ ءَ آ دلبڈی ءَ نہ اشکن ایں. بلے ما زانیں، آ مئے تہ ءَ زندگ اِنت، مئے ھیالانی تہ ءَ، مئے جھد ءِ تہ ءَ ءُ ھرچ ھما روچ ءَ کہ ما آجوئی ءِ واب گندیں۔

من ءَ انگت یات اِنت کہ من اولی رند ءَ 2023 ءَ شھید میرک ءَ گوں گند ءُ نند کتگ اَت ، ھمے ساھت ءِ اکس انگت منی ھیال ءَ تازگ اِنت۔ آئی ءَ من ءَ چار اِت، آئی ءِ دیم ءَ کسانکیں بچکندے اتک، انچو گُش ئے آئی من ءَ پیسر ءَ زانتگ اَت۔ آئی ءِ چمّانی تہ ءَ یک اجبیں تاھیرے اَت ءُ آئی ءِ دیم ءَ یک انچیں شرپے اَت کہ بوت کنت کہ راستی ءُ کربانی ءِ راہ ءَ گچین کنوکیں مردمانی گور ءَ بوت کنت۔پد ءَ کمو دیر ءَ پد کہ درستیں سنگت شتگ اَت اَنت ءُ مچّی ءِ شور کم بوتگ اَت گڑا میرک آھستہ منی نزیک ءَ اتک۔ آئی ءَ نرم نرم ءَ گُشت ” من ترا زاناں “۔ من ھمے گپ ءِ اشکنگ ءَ گوں ساھتے بے توار بوتاں۔ آئی ءِ توار ءَ یک اجبیں آشنائی یے اَت، انچو گش ئے ما پیسر ءَ ھم چکرے دچار کپتگیں ۔ آئی ءِ دروشم ءَ ناں گھمنڈے ھست اَت، ناں دکھاوھے ھست اَت۔ بس راست ءُ ھکیکت دوستے اَت-

گُڑا شھید میریک ءَ بچکند اِت ءُ گْوشت ئِے تو سک شر نبشتہ کن ئے من تئی نبشتانک ونتگ اَنت ۔ من ءَ اے گپ ءِ اِش کنگ ءَ ھیرانی ھم بوت ءُ وشی ھم ۔” آئی ءَ گیشتر من ءَ گْوشت کہ مئے پیسر ءَ ھم گوں یک دومی ءَ رھوت بوتگ۔ چو کہ آئی ءَ اے گپ جت گڑا آ کوھنیں ساھت منی ھیال ءَ پد ءَ اتک اَنت ءُ من ھما دمان ءَ میرک پجا آؤرت۔ ھمے ساھت ءَ پد مئے دوستی ءِ تہ ءَ نوکیں گھتری یے اتک۔ انچو سما بوت کہ ما کرنے بیت یکے دومی ءَ زان ایں۔

ما دو سال ءَ یکجاہ یکیں کیمپ ءَ بوتیں ۔ ھما روچاں منی ءُ میرک ءِ سیادی چہ سادگیں دوستی ءَ ابید براسی دروشمے ءَ بدل بوتگ ات۔ ما گوں یکے دومی ءَ سک نزیک بوتگ اتیں۔ ما گم ، وشّی، تھنائی، مھنت درست ھواری ءَ گوازینت اَنت۔ شھید میرک ناں ایوک ءَ دلیریں مردمے اَت بلکیں یک انچیں سنگتے ھم بوتگ کہ آئی ءَ گوں دل ءِ جھلانکی ءَ مئے ھیالداری کتگ ات۔ آئی ءِ گپ، آئی ءِ کندگ، آئی ءِ ھیال انگت منی دل ءَ زندگ اَنت۔

مئے سنگتی تھنا دو مردمانی سیادی نہ اَت، بلکیں شھید میرک ءِ مھر گوں وتی زمین، وتی بلوچ راج ءَ گوں باز گھتر ءُ گیشتر اَت۔ دو گھار ءِ یکیں برات اَت آ وتی کھول ءِ گڈی کمککار اَت ۔ انگت ھم آئی ءَ وتی زاتی گم ءُ مات ءُ گھارانی مھر یلہ دات انت ءُ وتی سرڈگار ءُ راج ءِ ھاتر ءَ وتی جان ندر کت۔

مروچی ھم من آئی ءِ شھادت ءَ یات کناں دردیگیں مارشت وَ کیت بلے چہ ایشی ءَ گیش من ءَ شان بیت کہ میرک ءِ وڑیں دلیر، زانتکار ءُ راست دوستیں ورنا مئے ھمراہ بوتگ اَنت۔ ایشانی کربانیانی سوب ءَ ما اے سرپدی ، دلیری ءُ جھد ءِ جاہ ءَ سر بوتگیں ۔

میرک تو مرچی مئے گوما جسمانی دروشم ءَ ھست نہ ئے بلے تئی کربانی، تئی ھما جزبہ ءُ تئی یات مئے دلانی تہ ءَ مدام زندگ بنت من زاناں میرک ءِ کربانی انچو مزن اِنت کہ آئی ءِ دیم ءَ منی لبز انچو کسان ءُ نزور گندگ بنت۔ بلے من چے بہ کناں؟ ھر وھد ءَ کہ من ءَ تئی یات کیت دل بے تاھیر بیت ءُ من کلم ءَ چست کناں۔بَلے پد ءَ من ءَ سما بیت کہ منی کلم ءَ ھمے زور نیست کہ تئی کربانیاں گوں انساپ بہ کنت۔

میرک تو بس یک سنگتے یا ھمکارے نہ بوتگ ئے، تو پہ مئے واستا یک جزبگے بوتگ ئے، یک رژنائی یے بوتگ ئے، کہ انگت مئے دلانی تہ ءَ روژناہ اِنت۔ تئی بے دروریں کربانی مارا وانین ایت کہ پہ زمین، راج ءُ راستی ءَ زندگ ءُ مرگ راستیں شرپ اِنت۔

تو مئے دلانی تہ ءَ مدام زندگ بہ ئے تئی نام تئی کرد ءُ تئی مشن مئے ھرچ کٹم ءِ تہ ءَ زندگ مان ایت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءَ پاکستانی پوج ءِ زوراکی یکشل ءَ برجاہ ءَ چہ ڈرون بالگردانی بمبگواری ءُ بمب تراکانی آسر ءَ شش مردم بیران چار ٹپی بیتگ اَنت اشانی تہ ءَ زالبول ھم ھوار اَنت-

دو روچ ءَ زھری ءِ جتاجتائیں دمگاں جیٹ بالگرداں چہ بمبگواری ءُ ڈرون اُرش کنگ بیتگ اَنت-

بلوچستان ءِ دمگ ھُزدار ءِ تھسیل زھری ءَ پاکستانی پوج ءَ گوستگیں دو روچ ءِ میان ءَ آبادی ءِ بمبگواری ءُ ڈرون اُرشانی نشانگ کتگ اَنت، کہ دمگی مردماں جانی ءُ مالی تاوان چست کنگ کپگ ءِ ھال اِنت-

دمگی اِھوالکار ءِ رِد ءَ مروچی زھری تراسانی ءِ نزیک ءَ یک لوگے ءِ سر ڈرون اُرشے ءَ نشانگ کتگ اَنت، وھدے کہ ڈرونانی بُرز بال یکشل ءَ برجاہ ءَ اِنت چریشی ءَ دمگ مردمانی تہ ءَ تُرس ودی بیتگ-

اشی ءَ ساری گوستگیں روچ ءَ زھری ءِ کوھی دمگ ءَ ھم یک لوگے ءِ سر ءَ جیٹ بالگرداں چہ بمبگواری کنگ بیتگ، چریشی ءَ بیران بیتگیں مردمانی تہ ءَ پندرانی ٹک ءِ سے مردم ھوار گوشگ بیگ ءَ اِنت-

پاکستانی پوج ءِ ھمگرنچیں ادارہ آئی ایس پی آر ءَ گوستگیں روچ ءِ جیٹ بمبگواری ءِ پدری کنان ءَ ٹاہ داتگ کہ کاروائی ءَ بلوچ آجوئی لوٹوکاں نشانگ کتگ اَنت ءُ پنچ مردم ءِ بیرانی ءِ ٹاہ داتگ اَت-

زانگ بہ بیت کہ ھمے سال اگست ءَ بلوچ سلاہ بندیں آجوئی لوٹوکیں گلاں زھری ءِ جتاجتائیں دمگاں دستیگ کتگ اَنت چریشی ءَ پد پاکستانی پوج ءِ بازیں اُرشانی دیمپانی کنگ کپتگ وھدے پاکستانی پوج ءِ اے ماھاں زھری کش ءُ گوراں بُرزی چارگی ءُ ڈرونز کارمرزی گیشی کتگ-

ھالانی رِد ءَ اگست ءَ چہ تاں انو زھری ءَ کم چہ کم جیٹ بالگرداں بمبگواری ءُ ڈرون اُرشاں سے رپورٹس دیم ءَ اَتکگ، بلے بلوچ آجوئی لوٹوکاں پاکستانی پوج ءِ ٹاھانی پدری نہ کتگ-

ھمے وڑ ڈیرہ بگٹی ءِ تھسیل ءِ دمگ یارو پٹ ءَ پد ماں پد سے چیرکتگیں بمب تراک ءِ آسر ءَ یک زالبولے ءَ ھوار سے مردم بیران بیتگ وھدے کہ چہ چُک ءُ زالبولاں ھوار چار مردم ٹپی بیتگ اَنت-

تراک ءِ نشانگ ءِ آیگ ءَ چہ ھپت مال ءُ دلوت ھم مرتگ اَنت-

گیشیں ھالانی رِد ءَ گوستگیں روچ ءَ ناشناسیں مردمانی نیمگ ءَ چہ چیرکنگ بیتگیں تراکناکیں شورواں دمگ جکسینتگ ، بندات ءَ دو تراک ءَ یک زالبولے ءَ ھوار سے مردم جاہ جاھی بیران بیتگ اَنت وھدے دو زالبولے ءُ یک چُکے ءَ ھوار چار مردم ٹپی بیتگ اَنت-

سیمی تراک ءَ ھپت میش ءُ پس مرتگ اَنت-

وئیل ءَ پد ٹپی زوت پی پی ایل نادُراھجاہ ءَ برتگ اَنت کہ اود دوا درمان کنگ ءَ پد گیشیں ٹپی پنجاب ءُ سندھ ءِ جتاجتائیں نادُراھجاہ ءَ برتگ اَنت-

دمگ ءَ تُرس ءُ بیم ودی بیتگ ءُ دمگی آبادی تراکناکیں شورورانی بیگ ءِ مردم بے پھازی ءِ آماچ اَنت-

گُڈی ھالانی رِد ءَ تنی وھدے ھچ وڑیں میاربار دزگیر کنگ نہ بیتگ اَنت-

دومی نیمگ ءَ بی آر پی ءِ جارکش شیر محمد بگٹی ءَ شنگ کتگیں درشان ءِ تہ ءَ گوشتگ کہ ایپ سی ءُ دمگی ڈیتھ اسکواڈ کمک ءَ چہ ڈیرہ بگٹی ءِ دمگ لنجو ءُ سغاری ءَ شھید نواب اکبر خان بگٹی زمینانی سر ءَ دستیگ کنگ جُھد ءَ اَنت ءُ ھمے مول ءُ مراد ءَ ڈیتھ اسکواڈ ءَ را ایف سی ءِ نیمگ ءَ جوانیں وڑے مالی کمک کنگ ءَ اِنت ءُ مزنیں کچے ءَ سلاہ ، گولہ شورو ءُ نوکیں کواڈ کاپٹر ڈرون ھم دیگ ءَ اِنت-

روکپتی بلوچستان ءِ جتا جتائیں جاہ زاھدان، کاشمر، گنا باد ءُ بیر جند ءِ زنداناں دو روچانی نیام ءَ پنچ بلوچ ایرانی آمیدگس ءِ ھکم ءَ پاھو دیگ بوتگ انت ۔

اھوالانی رد ءَ بیرجند ءَ مزنیں بندیگ جاہ ءَ دو مردم پاھو دیگ بیتگ انت ۔

پاھو دیگ بوتگیں مردمانی پجار ابدالسمد ء ھاجی ھان مھمد جھمنند ھیرمند ءُ ابدالمجید کوس الدین جھمنند زاھدان ءِ ناماں زانگ بیتگ انت-

اھوالانی تہ ءَ گوشگ بیتگ ابدالسمد چھار و نیم سال ءَ پیش ءُ ابدالمجید شش سال ءَ پیش ھر دو منشیات ءِ بھتام ءَ دزگیر کنگ بوتگ انت کہ آمیدگس ءَ پیش کنگ ءَ پد آھانی سر ءَ پاھو ءِ ھکم جَنَگ بوتگ۔ ابدالمجید ابید ءِ کھول ءِ ھال دیگ یا گُڈی ملاکات ءَ پاھو دیگ بیتگ ۔

ھمے وڑ ءَ کاشمر زندان ءَ بلوچ ورنایے پاھو دیگ بیتگ ۔

پاھو دیگ بوتگیں مردم ءِ پجار رَزا حیدر انت کہ زابل جھمنند انت۔

اھوالانی رد ءَ رزا پنچ سال پیش کاشمر ءَ منشیات ءِ بھتام ءَ دزگیر بیتگ ءُ پاھو ھکم دیگ ءَ پد زندانی بوتگ دا پئیری آ پاھو دیگ بوتگ ۔

ھمے وڑ گناباد ءَ زندان ءَ بندیگیں مردمے پاھو دیگ بیتگ ۔

پاھو دیگ بوتگیں مردم ءِ پجار پرویز ء شیر اھمد انت کہ زاھدان جھمنند انت ۔

ھالانی رد ءَ پرویز پنچ سال ءَ پیش منشیات ءِ بھتام ءَ دزگیر بوگ ءَ پد امیدگس ءَ پاھو ءِ ھکم داتگ ات کہ زی پاھو دیگ بیتگ ۔ پرویز ابید کھول ءِ ھال دیگ یا گُڈی ملاکات ءَ پاھو دیگ بیتگ۔

ھمے وڑ ءَ زاھدان زندان ءَ ھم بندیگیں بلوچے پاھو دیگ بوتگ-

پاھو دیگ بوتگیں مردم ءِ پجار الیاس شیروزھی ءِ نام ءَ زانگ بیتگ – اھوالانی رد ءَ الیاس ءِ بابت ءَ گوشگ بوتگ کہ آ پنچ سال پیسر ءَ کوش ءِ کرتگ ات اوں لشکریاں اوار جنگ ءَ پد امیدگس ءَ برتگ اودا آئی سر ءَ پاھو ءِ ھکم جنگ ءَ پد زندان ءَ رھادگ بوتگ کہ زی پاھو دیگ بیتگ ۔

بلوچستان ءِ دمگ چہ اورماڑہ ءَ آوار جنگ بیتگیں صغیر بلوچ ءُ اقرار بلوچ ءِ گھار ءَ دوئینانی یل کنائینگ ءِ لوٹ کتگ ءُ دومی نیمگ ءَ شال ءَ یک ورنایے آوار جنگ ءُ بیگواہ کنگ بیتگ-

چہ آواران ءَ سیادی داروکیں دو ورنا، صغیر بلوچ ءُ آئی ءِ سیاد اقرار بلوچ، یازدہ جون 2025 ءَ پاکستانی پوج ءَ چہ اورماڑہ ءَ آوار جتگ ءُ بیگواہ کتگ اَنت- چار ماہ ءِ گوزگ ءَ اَبید ورنا ءِ درگت ءَ ھچ وڑیں ھال دیم دیم ءَ نیتکگ-

کھول ءِ رِد ءَ صغیر بلوچ بھاؤالدین زکریا یونیورسٹی ملتان ءَ چہ ماسٹرز کتگ ءُ کار ءِ نہ رسگ ءِ سوب ءَ ذمیاد گاڑی یے گون بیتگ کہ تیل بھا ئِے کتگ، پت مات ءُ برات گھارانی ءُ وتی گھار حمیدہ ءِ چُکانی ھرچاں چست کنگ ءَ بیتگ -سیاد اقرار بلوچ گردھانی نادُراہ ءَ اِنت ءُ الاج ءِ چمّداریں-

صغیر بلوچ ءِ گھار ءَ گوشتگ کہ اے آئی ءِ کھول ءِ گوم ءَ بیتگیں اولے وئیل نہ اِنت – آئی ءِ رِد ءَ اشی ءَ ساری ھم صغیر سی ٹی ڈی ءُ ایم آئی ءِ کارندھاں بیگواہ کتگ -آ وھد ءَ منی گھار حمیدہ بلوچ ءَ توار چست کتگ مئے سرجمیں کھول نُھ ماہ ءَ تاں درد ءُ گمانی تہ ءَ بیتگ، چریشی ءَ پد صغیر یل کنگ بیتگ نو دومی رند ءَ زُلم بندات کتگ ءُ ما ھر روچ ازیت ءِ تہ ءَ ایں-

آئی ءَ دیمتر ءَ گوشتگ کہ ریاست مات گوشتگ بیت بلے مات وتی چُکاں اے وڑ بیگواہ کنت؟ اگاں منی برات سر ءَ بھتامے ھست گُڑا آمیدگس ءَ پیش بہ کن اِت- ما آئین ءُ کانود ءَ منّ ایں- اگاں آ میاربار اَنت گُڑا آمیدگس سزا بدنت، بلے اے وڑ بیگواہ کنگ زُلم اِنت-

کھول ءَ لوٹ کتگ کہ بیگواھیں مردماں زوت آمیدگس ءَ پیش بہ کن اِت ءُ کھول آیانی زندمان ءِ درگت ءَ سرپدی بدے اِت-

دومی نیمگ ءَ گوستگیں شپ ءِ یک ءَ چہ سبزل دگ شال ءَ سی ٹی ڈی ءُ چیریں ادارھانی کارندھاں اکیل جان آوار جتگ ءُ گوں وت برتگ-

شنگ بیتگیں سی سی ٹی کیمرہ ءِ تامُر ءَ چہ گندگ بیت کہ مزنیں کچے ءَ سی ٹی ڈی ءُ چیریں ادارھانی کارندہ کاینت ءُ لوگ ءَ پُتر اَنت ءُ ورنا اکیل ءَ گران کن اَنت بر اَنت ھمے میان ءَ کھول ءِ زالبول گھگیری ءِ جُھد کن اَنت بلے آیاں نہ مرّین اَنت-

اے وھد ءَ کھول سبزل دگ سر ءَ نندانک داتگ ءُ زھرشانی کنگ ءَ اَنت-

بلوچستان ءِ دمگ کیچ ءِ ھند پیدرک ءَ ناشناسیں سلاہ بندیں مردماں پاکستانی فوج ءِ کاروان ءِ سر بستگ ءُ اُرش کتگ۔

دمگی مردنانی رد ءَ تیر گواری ءَ لشکر ءَ تاوان رس اتگ بلے بیران ءُ ٹپیانی کساس ءِ لس رنگ ءَ پدر کنگ نہ بوتگ انت۔

اے وئیل انگت ءَ سرکاری بنشونانی نیمگ ءَ چہ پدر ءُ رد کنگ نہ بوتگ۔ اے اُرش ءِ زمہ واری کس ءَ نہ زرتگ۔

بلوچستان ءَ چہ گوستگیں بازیں سالاں پاکستانی لشکر ءِ سر ءَ اُرش برجاہ اَنت ۔ بلے گوستگیں ماھاں اُرشانی تہ ءَ گیشی اتکگ۔ گوستگیں سئے ماہانی تہ ءَ پاکستانی لشکر ءِ سر ءَ اُرشانی تہ ءَ شش مزنیں فوجی افسراں ھوار سداں فورسز ءِ کارندہ بیران بوتگ انت۔ بیران بوتگیں لشکری ​​افسراں دو کپتان ءُ چار مزنیں اگدوداریں افسر ھوار اَنت۔

زانگ بہ بیت گوستگیں روچ ءَ ھم کیچ ءَ ھواریں دمگ دشت ءَ سلاہ بند ءُ پاکستانی پوج ءِ میان ءَ جنگ ءُ چوپ بیتگ کہ چریشی ءَ دو سلاہ بندانی جنگ ءِ اھوال دیم ءَ اتکگ انت –

گوستگیں روچ ءَ بیتگیں اُرش ءِ درگت ءَ انگت ءَ بلوچ آجوئی لوٹوکانی نیمگ ءَ ھم دگہ درشان دیم ءَ نیتکگ انت-

ھمے وڑ ءَ بلوچستان ءِ دمگ شیرانی ءَ پولیس ءُ لیویز ءِ تھانہ ءِ سر ءَ اُرش ءَ دو کارندہ بیران بیتگ انت-

ڈپٹی کمشنر شیرانی ءِ گوشگ انت کہ اُرش ءَ تھانہ ءِ کمیونی کیشن سسٹم ءَ ھم تاوان رس اتگ –

اُرش ءَ شش کارندھانی زدگ بوگ ءِ ھم ھال انت ءُ ویل ءَ پد سول ھسپتال ژوب ءَ ایمرجنسی جنگ بیتگ-