دیوانے گوں ناکو مراد بکش ءَ سرھال:انیتا ءِ گواچن
نبشتہ : سفر خان بلوچ
دی بلوچستان پوسٹ
وھد سُھب ءِ سر اَت من وھدے وتی چم پچ کُت آں داں ساھت پنچ بج اَت ۔ من مروچی اے وھد ءَ پمیشکا پاد اتکگ اِت آں کہ دوشی ناکو مُراد بکش من ءَ ھال کُت باندا مھلہ پاد بیا کہ من ءُ تو ، پروم ءَ مردمے بیران بوتگ پُرس ءَ رو آں ۔
پرے ھاتر ءَ من مھلہ پاد اتک آں ءُ جان شُشت دیم پہ ناکو ئے لوگ ءِ نیمگ ءَ رھادگ بوت آں۔ وھدے من ناکو ءِ لوگ ءَ سر بوت آں روچ ءَ نوکی ٹِکّ کُتگ اَت ءُ ناکو گوں وتی اَلٹو لاری ءَ گُلائیش اَت۔۔۔۔۔۔۔۔، من سلام دات۔ ناکو ءَ چَکّ ترّینت ءُ والیک سلام ءِ بدل ءَ پہ بچکندگ گْوشت بیا سپرؔو بیا۔۔۔۔۔۔۔۔۔شرّیں کہ تو اتک ئے پہ وشی ، بلے من ءَ باور نہ بوتگ کہ تو کائے۔۔۔۔۔۔۔۔!!
من اِرادگ کُتگ لاری ءَ تیل ءُ آپ کن آں ءُ تئی رند ءَ وت کایاں ، بلے ھیر تو اتک ئے ۔ ساھتے ءَ پد ناکو ءَ گاڑی برابر کُت ءُ لھتیں ورگی سامان ھم زُرتگ اَت کہ آیاناں لاری ءَ کُت ۔ وھدے ما دوھیں لاری ءَ نِشت اِیں دیم پہ وتی مِنزل ءَ رھادگ بوت اِیں۔۔۔۔۔۔۔۔۔
من ءُ ناکو اِت آں ءُ اے وھد ءَ لاری ءِ تہ ءَ مئے ھمراہ ناکو پیزُک ءِ چاڑ بکشیں گانا ” کُشتگ من ءَ گُل ءَ ، باگ ءِ بُلبُل ءَ ” بِندات اَت کہ لھم لھم ءَ مئے جبین ءَ تاھیر بکشگ ءَ اَت۔۔۔۔، بلے ناکو اے ساھت ءَ گوں وت ءَ دلگوش اَت ءُ ھچ گْوشگ ءَ نہ اَت۔ من چہ کیسگ ءَ وتی موبائل کش اِت ءُ پیس بُک (فیس بُک) ءِ چارگ بندات کُت۔۔۔۔۔۔، کمیں دیم ءِ جُنزگ ءَ پد ناکو ءَ من ءَ جُست کت بھتاور اِیں سپرؔو اے وھد ءَ موسم ءَ بِچار چینچو ڈولدار ءُ دِلکش اِنت ، زیبائیں گُلزمین ءِ بوہ ءُ باس ،تو انگت نِشتگ ءُ گوں کلنڈیں موبائل ءَ دِلگوش ئے ،چے کنگ ءَ ئے گوں موبائل ءَ ، ناکو ءَ من ءَ جُست کت۔۔۔۔۔۔؟من پسّو دات ، ناکو کمیں پیس بُک (فیس بُک) ءَ سیل کنگ ءَ اُوں۔۔۔۔۔۔انوں ما چہ کاردام ءَ در کپ اِیں پد ءَ موبائل ءَ ھچ دست اُوں نہ جن آں۔۔۔۔۔۔۔۔۔۔
ھیر! چے ھست نوکیں پیس بُکّ (فیس بُک) ءَ۔۔۔۔۔۔۔، ناکو ءَ جُست کت۔۔۔۔۔۔؟
ناکو ھچ نیست ، بس انیتا ءُ سرپِراز ءِ جیڑہ اِنت ،ءُ دگہ یک بلوچ ھُسین نامیں مردمے ھم انیتا ایف آئی آر کُتگ۔۔۔۔۔۔۔۔۔
من اے بابت ءَ سرپد آں ، دوشی من سرپِراز ءِ گپ اُوں چہ ریڈُو بلوچستان ءَ گوشداشتگ اَنت ، ناکو ءَ من ءَ گْوشت دِگہ چے ھست نوکیں۔۔۔۔۔۔۔۔۔؟؟
نوکیں دِگہ ھچ نیست۔۔۔۔۔، من ناکو ءَ را گْوشت۔۔۔۔
من وتی موبائل بند کُت ءُ کیسگ ءَ مان جت۔۔۔۔۔۔۔۔۔
ٹیپ ءِ آواز ءَ بُرز کن آں ، ناکو ءَ من ءَ جُست کُت۔۔۔۔۔۔؟
اِنّا ناکو ، شر اِنت۔۔۔۔۔۔۔من پسّو دات۔۔۔۔
اے گپ ءَ پد ما دوھیں ھاموش بوت آں ۔۔۔۔۔۔۔، اے وھد ءَ بس کِشک اَت کہ آئی ءِ سر ءَ لاری تچگ اَت ۔ لاری ءِ تہ ءَ من ءُ ناکو ، ٹیپ ءِ دپ ءَ ناکو پیزُک ءِ سَوت الھان اَت۔۔۔۔۔۔۔۔
کمیں ھاموشی ءَ پد من ناکو جُست کُت۔۔۔۔۔۔۔، ناکو تو اگاں انیتا ءُ سرپِراز ءِ گپ گوشداشتگ اَنت۔۔۔۔۔۔۔۔گُڑا اے بابت ءَ تئی ھیال ءُ لیکہ۔۔۔۔۔۔۔۔۔۔۔؟
بِچار من و گپ نہ کن آں۔۔۔۔۔۔، اگاں من گپ بِہ کن آں بلکیں منی لھتیں گپ تئی تب ءَ مہ کپ اَنت تو نارزا بِہ بَہ ئے ءُ پھک چمن گِسر بِہ کپ ئے ھاھاھاھاھا۔۔۔۔۔۔۔
ناکو ءَ من ءَ پسّو دات ، من ھم بچکند گْوشت۔۔۔۔۔۔۔
نا ناکو! من دِلگران نہ بَہ آں ، تو وتی گپّاں بہ کن ، چی ءَ کہ تئی کستر پاد مُدام راستی ءِ منّوگِر اِنت۔۔۔۔۔۔۔، من ناکو گْوشت۔۔۔۔
بِچار من ءَ گوں نا واجہ سرپِراز ءَ سْیادی یے ھست نیکہ گوں بانُک انیتا جلیل ءَ ، بلے! من وتی ھیال ءُ لیکو ءِ گپّاں جن آں ، چی ءَ کہ من وتی ھیال ءُ لیکھانی جھان ءَ آجو آں۔۔۔۔۔۔۔۔ چے جیڑ آں ، چے ماراں ، ءُ چے سرپد بَہ آں ، ھمائی ءَ دیم ءَ کاران ءُ درشان کن آں۔۔۔۔۔۔۔ دِگہ کسے ءِ تِپاک بُوَگ ھژدری نہ اِنت۔۔۔۔۔۔۔
اولی گپ اِش اِنت کہ اے وھد ءَ بلوچ ءِ مستریں جیڑہ ءُ بیماری چی اِنت۔۔۔۔۔؟؟ گُلامی ، آئی ءِ اِلاج آجوئی۔۔۔۔۔۔۔۔
پمیشکا بلوچ سرڈگار ءِ سر ءَ چونیں جیڑھے کہ دیم ءَ کَیت ، آئی ءِ بابت ءَ مارا الم جیڑگ لوٹ اِیت ۔
تو گْوشت کن ئے اے جیڑہ بلوچ راجی جُنز ءِ ھِلاپ ءَ یک پندلے نہ اِنت۔۔۔۔۔۔؟؟ اِیشی ءِ پُژدر ءَ تو سرپدے چے کڑے بڑے نبشتگ اِنت۔۔۔۔۔۔؟؟
چوش کہ اے انیتا ءِ جیڑہ نوک دیم ءَ اتکگ ، اِیشر ءَ کہ چوش مئے مردماں زُرتگ چوش نہ اِنت۔۔۔۔۔۔۔۔۔؟؟
من ھمے سرپد بَہ آں اے بلاھیں سازش یے، یک دْراج کشّیں اَملے کہ اِیشاں دیری بِندات کُتگ۔ بلے مارا چارگی اِنت کہ اے پردھے پُشت ءَ کَے نِشتگ ءُ چے کنگ لوٹ اِیت۔۔۔۔۔۔۔۔
پمیشکا من پہ جزم گْوش آں اے ھما کڑی اِنت ، بلے من ھیران آں مئے لھتیں مردُم ھست اَنت کہ آ شپ ءَ راجدوست ءُ سُھب ءِ سر ءَ آجوئی پسُند اَنت۔۔۔۔۔، نیمروچ ءَ ریس ءُ پرّیس کار (تجزیہ کار) ءُ بیگاہ ءَ اِنسانی اُکبالانی (ھکّانی) نماھندگ اَنت ۔ اِیشاں اولی سر ءَ نزانت کہ کِسّہ ءِ جِند چی اِنت۔۔۔۔۔۔۔۔؟ جیڑھے جِند چی اِنت۔۔۔۔۔۔۔؟ ایشی ءِ لوٹ چی اَنت۔۔۔۔۔۔۔؟ آیاں ھم جامگ لگوشت ءُ گْورم ءَ دور کُت کہ ما ھم جان شُوداں ، بزاں ما نہ کُشتگ ھِلار نہ اِنت۔۔۔۔۔۔۔۔ بھتاوراں کمو سبر کن اِت گپ سرجم ءَ پدّر بیت نوں دوچاپی ءَ بِگ اِت گُڑا پہ شرپ بَہ اِت۔۔۔۔۔۔۔ چو نہ زان اَنت جیڑھے جِند چی اِنت ساری ڈُھل ءُ سُرنا اَنت۔۔۔۔۔نُوں شما گپ بہ کن اِت، بلے نا۔۔۔۔۔۔ ھرکس ءَ وتی جامگ کُوپگ ءَ کُت کہ مارا ھم اے گْورم ءَ جان شُودگی اِنت ۔بھتارواں اے پیم ءَ شُمئے جند گورم ءَ بُڈّ اِیت۔۔۔۔۔۔۔ ءُ دومی نیمگ ءَ ھمے روچ ءَ چہ دشت ءِ مھلبیں پُلکانی ھنکین ءَ بزّگیں گُلاتون ءِ زھگ پاکستانی لشکر ءَ چِست کُت ءُ بیچارگیں گُلاتون ھُوشگ چوپ کُت ءُ آئی ءِ دست چہ بنداں پْروشت۔ ھمے داب ءَ دومی روچ ءَ چہ شال ءَ زھگ ءُ زالبُول پد ءَ پاکستانی لشکر ءَ چِست کُرت اَنت ءُ وتی تھارونکیں زِندان ءَ بُرت اَنت ، بلے اے ساھت ءَ اے کھروارانی زُبان لِلّ اَت کہ چار دانک درشان بکن اَنت ، ند بے سْیاھی اَت کہ دو لبز نبشتگ بکن اَنت۔۔۔۔۔۔۔۔۔۔۔۔ بس اِیشانی کَور بے جمبر ءَ آپ کار اِیت کہ بند ءُ ڈگار ھچ نہ زان اَنت ، ھرچی دیم ءَ کہ کَیت پتار دیان اَنت۔۔۔۔۔۔۔۔۔۔۔۔۔وھدے سما کن گُڑا لُنٹاں گٹّ پاچ اَنت۔۔۔۔۔۔۔۔۔۔
اے درگت ءَ مئے یک جْوانیں زانتکارے گْوش اِیت انیتا ءِ جیڑہ پدّر بوتگ ، زُور آوریں مردیناں پدّر کُتگ کہ مردین یکمُشت اَنت ءُ زالبُول بیچارگ بزّگ اَنت ، بلے چہ ھما زالبُولاں شمشکار اَنت کہ لشکر ءَ چست کُرتگ اَنت۔ اُود ءَ پرچا مئے زانتکار گُنگ ءُ کرّ ھچ نہ گْوش اَنت۔۔۔۔۔۔۔۔۔؟؟
انیتا ءِ سر ءَ مئے کلم چو زھم ءَ سُوھان اِنت ءُ شپ ءِ چار بج ءَ نِبشتہ کنت ۔بلے بژن ھزار بژن کہ بیچارگیں گُلاتون ءِ باری ءَ مئے ند ءُ زُبان دوھیں گُنگ اَنت۔۔۔۔۔۔۔۔۔۔۔۔، ھمے ھاتر ءَ کہ گُلاتون بزّگ ءَ سِلپی ءِ کشک نہ زانتگ ، ھمے ھاتر ءَ گُلاتون ءَ یوٹیوب چینلے نیست ، اجب اِنت۔۔۔۔۔۔۔۔۔۔۔۔۔،ءُ مئے مُناپِکی ءَ ھزار سلام اِنت۔۔۔۔۔۔۔۔
یکّے دُگنیا ءِ آ کُنڈ ءَ نِشتگ ءُ چہ راستی ءَ نابلد اِنت بلے لانکے لانچتگ۔۔۔۔۔۔۔۔چو نہ زانت گپ چی اِنت۔۔۔۔۔۔۔؟ بس ھرکس پہ دیم گون کپتگ۔۔۔۔۔۔۔۔۔۔
ناکو گپ ءَ اَت کہ من گپ گُڈ اِت ءُ گْوشت ناکو بِچار تو چہ سرھال ءَ ڈنّ در کپگ ءَ ئے ، آ دِگہ جیڑھے اے دِگہ جیڑھے ، ھمے جیڑہ ءِ سر ءَ گپ بہ کن ۔۔۔۔
من نہ زاناں ھروھد ءَ کہ من تچکیں گپ کن آں ترا پرچا سرھال یات کَیت۔۔۔۔۔۔، اگاں تو انیتا ءِ جیڑھے راستی ءَ گوشدارگ لوٹ ئے گڑا بچار تچکیں گپ اِش اِنت کہ انیتا کَے اِنت۔۔۔۔۔۔۔۔۔۔۔۔؟ انیتا ءِ کِرد پہ بلوچ چاگرد ءَ چی بوتگ یا چی اِنت۔۔۔۔۔۔۔۔؟بس تھنا اگاں ما اے بِہ گْوش آں کہ جِنکّے دیم ءَ اتکگ بس۔۔۔۔۔۔۔۔!!
گڑا دیم ءَ اتکگ آئی مُزّ کَے ءَ را داتگ۔۔۔۔۔۔۔۔؟؟ بلوچ چاگِرد ءَ را آئی چینچُک مُزّ داتگ۔۔۔۔۔۔۔۔۔؟؟راستے انیتا وتی بلوگ ءُ ویڈیوھانی تہ ءَ سی پیک ءِ پروموٹ کنگ ءَ جکانسری کُتگ ، انیتا زان ءَ اے ھبر ءَ نابزانت اِنت کہ ھمے سی پیک بلوچ ءِ رِتکگیں ھون ءُ ژانگولیں جونانی سر ءَ گْوزگ ءَ اِنت۔۔۔۔۔۔۔؟؟ انیتا وتی بلوگ ءُ تامُرانی تہ ءَ گْوادر ءِ دیمروئی ءِ گپ ءَ کنت کہ مردمے ارمانی بِہ بیت پہ تُنّیگاں آپ ئِے۔۔۔۔۔۔۔، ھو اے گپ ءَ کنت کہ گْوادر ءَ دیمروئی کتگ ءُ چین ءِ مھلوک تیاب دپ ءَ چو مور ءُ مدگ اَنت ، بلے چرئے ھبر پھک شمشکار ءُ بے تْرانگ اِنت کہ گوادر ءِ جھ مِنند پہ تْرمپے آپ ءَ زنزرگ ءَ اَنت۔۔۔۔۔۔۔
اے گپ ءَ پرچا جار ء بادشاھی نہ جنت گوں کہ باندا مید وتی زِر ءَ شُت نہ کن اَنت ءُ چہ جِند میتگ ءَ درآمد بہ اَنت ، بلے یکروچے انیتا ءِ زُبان ءَ اے ھبر پہ رد کپتی ھم در نیاتکگ۔۔۔۔۔۔۔، گپ کیت انیتا ءُ سرپِراز ءِ جیڑھے بابت ءَ ھُدا بزانت انیتا وتکشی ءِ جُھد کتگ یا نا ، بلے اے گپ کُتگ ئِے کہ من چوشیں کارے ئِے جُھد کتگ۔ گڑا مارا سرپِراز ءِ ھم گپ چارگ لوٹ اَنت کہ سرپَراز ھم گپ چیزے گپ جتگ ، ما پرچا سرپِراز ءِ گپّاں گوش نہ دار اِیں ھمے ھاتر ءَ کہ سرپِراز بچکّے ءُ انیتا جِنکّے ۔جِنکّ ھرچی گْوش اِیت راست گْوش اِیت ، سرپِراز دروگ بند اِیت۔۔۔۔۔۔۔۔۔۔۔چوش نہ اِنت۔ سرپِراز ءِ گپّانی ھِساب ءَ اے وھد ءَ آئی ءِ لوگ ءِ مردُم نِندوک بوتگ اَنت ءُ دومی روچ ءَ آئی ءِ جند ءِ مردمے ءَ بُرتگ انیتا ءِ کِرّ ءَ ،گُڑا چوشیں گپّے بوت اِیں کہ انیتا کنگ ءَ اِنت۔۔۔۔۔۔۔چوں آئی ءِ مردُماں آئرا وت برت کہ۔۔۔۔۔۔۔۔۔۔
ناکو ءَ گپ کنان ءَ گْوشت۔۔۔۔۔، من اِد ءَ یک گپّے پدّر کن آں منی مول ءُ مراد اے ھچ نہ اِنت کہ زالبُول چار دیوالی ءِ باھوٹ بِہ بَہ اَنت ءُ دیم ءَ میا اَنت۔۔۔۔۔، من گْوش آں بیا اَنت ءُ کار بہ کن اَنت ، بلے منی لیکہ چہ اے مُناپِکّیں فیمنسٹاں جُتا اِنت۔ اے یکّے زالبُولانی ھکّ ءِ گپ ءَ کن اَنت ، زالبُولاں دیم ءَ آیگ ءِ سِکین ءَ دے اَنت بلے وتی مات ءُ گْوھار ، جنین آدم ھپتاد گُدے ءِ تہ ءَ پیڑاتگ ءُ بان ءِ باھوٹ کُتگ اَنت کہ آئرا تھنا یک دروازگے پِر دریگ ھم پِرے نیست۔ اے ھما گپ بوت، من ترا سِکین دے آں تو اے کار ءَ انوں بہ کن بلے من ءَ دِگہ کار ھست انوں۔۔۔۔۔۔ھیر من پد ءَ کا آں انیتا ءِ نیمگ ءَ کہ تو گْوش ئے تو سرھال ءَ ڈنّ لیب کنگ ءَ ئِے۔۔۔۔۔۔۔۔۔۔
اے گپ چہ کس ءَ چیر نہ اِنت کہ انیتا بلوچے ، بلے بلوچ ءِ چینچُک درد وار اِنت ،انیتا ءَ چینچُک مھر گوں بلوچ ءَ ھست ءُ اے گپ مارا بیھال کنگی نہ اِنت۔ اے وھد ءَ بلوچ ھالت ء جنگ ءِ توکا اِنت ، اِد ءَ بازیں پندل سازگ بَہ اَنت۔ اے وھد 5th جنریشن وار ءِ وھد اِنت ، مروچی پپجی ءِ نام ءَ مھلونک گُمراہ کنگ بیت، مروچی ڈرامہ ءُ پِلمانی نام ءَ مردُم گُمراہ کنگ بَہ اَنت ءُ اے وھد ءَ مئے دُژمِن انچوش تْرند ءُ چالاک اِنت کہ آ ھر پِڑّ ءَ مارا پْروش دَیَگ لوٹ اِیت ، آ گْوش اِیت بلوچ نیست ءُ نابود بہ بَہ اَنت ، مروچی تانسر ءَ پاکستانی پِلم ءُ ڈرامہ انڈسٹری ءَ چہ آئی ایس پی آر ءِ نیمگ ءَ ٹاسک دَیَگ بوتگ کہ آ بلوچ ءُ بلوچستان ءِ سر ءَ چینچو ڈرامہ ءُ پِلم کش اِت کن اَنت بکن اَنت ، تو سرپدے کہ انوں پاکستان ءِ تہ بلوچ ءُ بلوچستان ءِ سر ءَ چینچو تامُر کشگ بُوَگ ءَ اِنت، تئی ھیال ءَ اے یک پندلے بوت نہ کنت کہ بلوچ لِلم انڈسٹری ءَ اوں آ وتی ھساب ءَ کارمرز بہ کن انت۔۔۔۔۔۔۔، ءُ بلوچ پِلم انڈسٹری ءَ رسانک ءَ آرگ ءُ نامدار کنگ ءِ ھاتر ءَ انیتا ءَ گیش دیم ءَ بیار اَنت، پمیشکا مارا کِسّہ ءِ سیمی بھر اُوں چارگ لوٹ اِیت۔۔۔۔۔۔۔
ناکو ھاموش بوت گوں اے گپ ءَ ۔۔۔۔۔۔۔ساھتے ءَ پد من ءَ جُستے کُت تو شترنج (شطرنج) ءِ گْوازی زان ئے۔۔۔۔۔۔۔؟
اِنّا ناکو من پسّو دات۔۔۔۔۔۔۔۔۔۔
گُڑا تو اِنڈئن تامُر وزیر ءَ الم بچار۔۔۔۔۔۔۔۔، ناکو ءَ من گْوشت۔۔۔۔۔
ناکو شترنج (شطرنج) ءُ وزیر تامُر ءَ گوں انیتا ءَ چے کار۔۔۔۔۔۔من گْوشت۔۔۔۔۔۔۔۔۔۔؟
بوت کنت نزّیکی مہ بیت ،بلے اگاں تو شترنج (شطرنج) بہ زانت اِیں من ترا شوکیں درورے دات۔۔۔۔۔۔۔۔۔
ناکو تو وتی درور ءَ بِہ دئے۔۔ ۔۔۔۔
بچار من گیشیں گپ نہ کن آں اے بابت ءَ ، من تھنا اے گپ ءَ گْوش آں کہ انیتا اے وھد ءَ شترنج (شطرنج) ءِ یک گوڑا ءُ بزّگیں سرپِراز یک پیادگے۔۔۔۔۔۔۔۔۔۔،ءُ گوڑا پیادگ ءَ جَنّگ لوٹ اِیت ءُ گوڑا ءِ پُشت ءَ وزیر نشتگ آ چیک دَیَگ لوٹ اِیت۔۔۔۔۔۔۔
ناکو منی سر پِر بُوَگ ءَ نہ اِنت تو چت گْوشگ لوٹ ئے۔۔۔۔۔۔۔۔۔۔۔
تو ھچ کہ سرپد نہ بَہ ئےمن چوں بکن آں ، بلے ھمے کہ مئے مردُم گْوشگ ءَ اَنت کہ اے مُرگ بانگ دنت بلکیں رُوژنائی ءُ سُھب بیت۔۔۔۔۔۔۔۔۔۔۔،مُرگ ءِ بانگ ءَ پد سُھب الم بیت بلے اے مُرگ بانگ پنڈی ءِ کُدو ءَ دنت۔۔۔۔۔۔۔۔ سُھب مئے بھت ءَ نہ بیت۔۔۔۔۔۔۔۔۔۔۔۔
من گپ بس کت ءُ ناکو ءَ ٹیپ ءِ آواز بُرز کُت ءُ لاری گیشتر تیز بران کُت ، بس تھنا پُشت ءَ دْنز زاھر اِتاں کہ ماں آزمان ءَ چیلک بندان اِتاں۔۔۔۔۔۔۔۔۔۔۔۔۔۔۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
