TBP Balochi

یاسر گوستگیں یک سالے ءَ بی آر اے ءِ پتر ءَ راجی آجوئی ءِ ھاتر ءَ سلاہ بندیں جنگ ءَ گوں بندوک بوتگ آئی ءِ داتگیں دیمونی پہ ورنایاں یک روکیں چراگے ئے بستار داریت آئی ءَ سھر چکیں دروت ندر کنیں – بیبگر بلوچ

دی بلوچستان پوسٹ

بلوچ سلاہ بندیں گل بلوچ ریپبلکن آرمی ءِ جارکش بیبگر بلوچ ءَ وتی شنگ کرتگیں درشان ءِ تہ ءَ گوشتگ کہ گل ءِ جوانیں سرمچار یاسر ابراھیم پنام گل محمد جاھمنند کیچ ناسرآباد نادراھی سوب ءَ مکران ءَ اوتاک ءَ شھید بوتگ – آ گوستگیں یک سالے ءَ گل ءِ پتر ءَ راجی آجوئی جنگ ءَ گوں بندوک بوتگ – یاسر ابراھیم وانندہ ءُ سسّا زانتیں سنگتے بوتگ آئی ءَ شھیدی پہ ورنایانی ھاتر ءَ روکیں چراگے ءِ بستار ءَ داریت –

جارکش ءَ گوشتگ گل آئی داتگیں دیمونیاں سھر چکیں دروت ندر کنت –

گڈسر ءَ جارکش بیبگر بلوچ ءَ گوشتگ کہ پہ راجی آجوئی ھاتر ءَ دیمونی دیگ یک آجوئیں ڈیھے آرگ ءَ تاں برجاک مان انت –

دی بلوچستان پوسٹ

سر بیتگیں ھالانی رد ءَ بلوچستان ءِ دمگ کیچ ءِ بنجاھی شھر تربت ءَ پریس کلب ءَ انسداد منشیات کمیٹی ءِ نیمگ رھشونانی نیمگ ءَ یک پریس کانفرنسے کنگ بیتگ –

پریس کانفرنس ءَ آئی ءَ گپ کنان ءَ نشہ باپاری ءِ گر ءُ دار ءِ سر ءَ وتی بژنی گپ درشان کرتگ ءُ گْوشتگ اَنت کہ اے ھمے سرپد بہ ایں کہ سرکار ءُ آئی ءِ واکدار نشہ باپاری ءَ ھوار اَنت –

آیاں گْوشت کہ انسداد منشیات کمیٹی بلیدہ زامران ءَ ھمے سال ءِ مئی ءَ وتی جد ءُ جھد بندات کرتگ ءُ اے کاروان ءِ بازیں جد ءُ جھداں دمگ ءَ نود ءُ پنچ درسد نشہ ءِ باپاری بند بیتگ اَنت –

آیاں تران کنان ءَ گْوشت کہ مئے مول ءُ مراد تھنا اے نہ اِنت کہ بلیدہ زامران ءَ نشہ بند بہ بیت بلکیں سرجمیں بلوچستان ءَ نشہ ءِ باپاری دارگ بہ بیت-

آیاں گوشت کہ مئے واھشت اِنت بلوچستان ءِ ورناہ نشہ ءِ نیمگ ءَ یلہ بہ کن اَنت ءُ بلوچستان ءِ آ دگہ دیمری ءُ زانتانی نیمگ ءَ وتی دلگوش ءَ بہ کن اَنت ءُ آیان گوشت کہ ما چاگردی رسانکجاھانی زور ءَ وتی توار ءَ بلوچستان ءِ جاہ جاہ ءَ سرکنان بہ ایں ءُ سرجمیں بلوچستان ءِ مھلوک نشہ باپاری ءِ ھلاپ ءَ توار چِست بہ کن اَنت –

آیاں تران کنان ءَ گْوشت کہ اے بژنیں رنگے ءَ گوشگ بیت کہ مردمانی بازیں جد ءُ جھد ءَ ابید ھم سرکار ءِ کرد ھچ رنگ ءَ دیم ءَ نیایگ اِنت، آیاں گْوشت کہ اگاں سرکار ءَ تُشے ءَ ھم نشہ باپاری ءِ بند کنگ ءِ نیمگ ءَ وتی مشینری ءَ کار بہ بند اِیت گڑا بلیدہ زامران ءَ ھوار سرجمیں مکران ءُ بلوچستان ءَ اے سِلگتیں نادراھی ھلاس بیتگ اَت –

آیاں گْوشت کہ اے درگت ءَ دمگدار ءُ سرکار ءِ بے تواری، بے دلگوشی اجکہ کنت نِی گڑا مھلوک ھمے سرپد بیت کہ سرکار اے سِلگتیں کاراں دزمانجن اِنت ءُ اے باپاری ءِ پلامرزی ءَ کنگ ءَ اِنت –

پریس کانفرنس ءَ تران کنوکیں مردماں بلیدہ زامران ءَ نشہ گورجتگیں مردمانی ٹپاستگیں جاورھال پیش کرتگ ءُ گوشتگ کہ وتی کمک ءَ گیشتریں نشہ آماچیں مردمانی جاندراھی بیتگ ءُ آیاں گوشت کہ اگاں سرکار ءَ اے سِلگتیں نادراھی ءِ ھلاس کنگ ءَ گامگیج نہ زُرت اَنف گڑا مئے زھرشانیانی پتر دراج تِر بیان کنت –

آزمانک: زاکر جان من ءَ پَھِل کن

آزمانکار: کندیل بلوچ

دی بلوچستان پوسٹ

روچ ءَ ٹک دات چاہ ءِ پیالہ یے وارت دیم پہ شھر ءَ دات کہ روان راشن ءِ پہ چُک آں کار آں
روڈ ءِ سرا اوشات اوں لاری یے اتک من دست دات سوار بوت اوں دیم پہ شہر ءَ روان اَت اوں نیم کلاک ءِ سپر ءَ شت آں نیم راہ ئے سرا پوجی ءِ بنجل ءِ نزیک ءَ سر بوت آں یک پوجی اے چہ وتی بنجل ءَ در اتک دست ءِ برز ءَ کت کوکار ءِ جت ءِ چہ لاری ءَ ایر بہ کپ اِت پند ءَ بیا ات وتی پجار ءَ بہ کن ات ۔

ما گاڑی ءَ چہ ایر کپت آں اندازگ بیست ءُ سی کدم بُر ات بنجل ءَ سر بوت آں ۔ پوجی ءَ آواز دات وتی پجار کارڈ آں کیسگ ءَ چہ بہ کش ات منا پیش بہ دار ات۔

درائیں آں وتی پجار کارڈ چہ کیسگ ءَ در کت دست ءَ کت پوجی ءَ گشت وتی دست آں برزا بہ کن ات من شمے کیسگ آں پٹ ءُ پول کن ایں ۔ ایدگہ درائیں مردم آں وتی پجار کارڈ کش ات دست ءَ کت بھلے من وتی پجار کارڈ لوگ ءَ شموشتگ اَت۔

درائیں مردم آں وتی پچار کارڈ دست ءَ کت آں ما دراہ ریسگ ءَ اوشات آں ہر کس ئے پچار کارڈ دست ءَ ات آں یک پوجی ءِ پجار کارڈ آں چارگ ءَ ات یک پوجی ءِ کیسگ آں پٹ ءُ پول کنگ ءَ لگ ات۔

منی باری اتک ءُ من ءَ گشتے وتی پجار کارڈ ءَ بہ کَش من ترا کوکار داتگ ءُ چے گوشتگ تو کر ءِ نہ اُش کن ئے یاں گنوک ئے ۔من گشت من وتی پجار کارڈ لوگ ءَ شموشتگ منا گشت ئے شما زان ات کہ مردم ءَ را وتی پجار الم کنگ لوٹ ایت شما وتی پجار کارڈ ءَ پرچہ ہر وھد ءَ جیب ءَ نہ کن ات ۔ من گوشت من روچ ءَ وتی ڈگار آں کار کن ایں ۔ من پمیشکہ لوگ ءَ ایر کتگ کہ ھاکی بیت ءُ لیکہ ئے گار بنت یاں جاگھے ءَ کپیت گار بیت ۔ پمیشکہ لوگ ءَ ایر کتگ، مروچی دیم پہ شھرا روگ اوں بلے من زورگ ءَ شموشتگ۔

ہمے پوچی کہ مئے کیسگ آں پٹ ءُ پُول کنگ ءَ ات ۔ ہمیشی منی گپ اش کت منا شَت کش ات شھمات ءِ گوْشت ءِ ترا من یک سبق ءِ دیاں دگہ وھد ءَ وتی پجار کارڈ ءَ لوگ ایر نہ کنے ءُ نہ شموش ئے۔
منا ھمدا دو سئے شھمات گرم ایں جت اِش من کپت اوں دو سئے لگت ھم جت اِش۔

۔لاری ءِ واھند ءَ را کوکار ءِ جت ئے گوْشت ءِ مروچی بہ بر ئے دگہ وھد ءَ ہر کس ءَ پجار کارڈ گون نہ بوت بزان آئی ءِ ھیر نہ انت ۔

شت اوں شھر ءَ سر بوت اوں راشن گپت شپ ءَ اتک اوں لوگ ءَ سر ءُ جان ہمے زالم ءِ جنّگ ءِ وجہ ءَ ہنچو بزان ٹُکر ٹُکر بیگ ءِ گواہی دیگ ءَ ات انت سک دم ھم برتگ ات ۔سر ایر کت پہ بے سمائی واب شت اوں

واب ءَ دیست یک برز ءُ مڑاہ داریں مرد ءِ اتک سیاہیں کلاہ ءِ سر ءَ ات ئے ءُ پیسرا منی سرے بر داتگ ایں دزمال دور کت ءِ منا یک ترندیں لگت ءِ شت کش ات ئے من پچ درشْپت سماء کت وتی چمان ءَ مشت سر چست کت

اوھو زاکر جان تو اے!!!

پہ زہر ءُ بیہارے گون ءَ منا گوْشت ءِ مرگ بات ئے گون شپ روچ ءِ واب ءَ

من گوشت زاکر تو بندیگ بوتگ ءِ تو کدی آجو بوت ءِ ؟

پدا گون زہرگے گون ءَ گشت ءِ من بندیگ نہ بوتگ آں منی ھیالا شما بندیگ ات ۔

من پھم ات کہ زاکر منا چیا چش گشگ ءَ ایں۔
من چہ بازیں جیڑگ ءَ چہ رند پھم ات کہ زاکر گشگ ءَ انت کوم گلام انت کوم کربانی لوٹ ایت جہد لوٹ ایت تو چیا چو بے سمائے ءِ واب ءَ چہ کدی سماءَ کن ئے
من چہ واب ءَ سماء کت چارت کہ زاکر ادا نہ انت ۔

دل ءَ جیڑگ ءِ چست بوت کہ راست اِنت زاکر جان بندیگ نہ انت ما بندیگ آں کہ مارءَ ہچ سُد پر نہ انت ما نزا ایں کوم گلام انت کوم ءِ آجوئی ءِ واستہ مردم ہرچ وڑیں کربانی ءَ آسرا نہ کنت۔
زاکر مروچی بندیگ ایں آئی وتی کوم ءِ ھق سرجم کتگ اَنت ما راجی بندیگانی ءُ شھیدانی وام دار انت ۔

ھمے ھیال چست بوت ءَ منا واب نئیتک ءُ پاد اتک اوں تاس زرت مشک ءَ آپ ئے وریں ءَ شت اوں ماس ءَ منی پاد برمش اِش کت آ ھم پاد اَتک ۔

منی بچ ترا واب آیگ ءَ نہ انت، من زان ایں ہمے زالم ءِ لگت آں ترا نا دراہ کتگ ھال بہ دئے کجام جاگہ تکانسر ایں۔
من رئیں تئی بلوک ءِ گوْرا سنچ ءُ پکی کاریں بؤر ۔

انا جیجہ بوپس اے درد آں سنچ ءُ پکی دراہ نہ کن انت ۔
ہمے واب ءِ گندگ ءَ پد من زانت مارا پجار نیست ۔من زی پوجی ءَ را گوشتگ کہ منی پجار کارڈ لوگ ءَ انت ۔اسلی ءَ منا پجار نیست مئے پجار چہ ما پچ گرگ بوتگ۔
اگاں پجار ءِ بوتیں چہ وتی لوگ ءَ چہ در کپگ ءَ مارا کس ءَ جست نہ کتگ ات کہ وتی پجار ءَ بہ کن ات ۔

مئے پجار مئے سر زمین بوت ءَ چہ ما پچ گرگ بوتگ، ہزاراں سال جھمند ایں کوم را وتی لوگ ءَ چہ در آیگ ءَ چونیں پجارے لوٹ ایت ؟ جیڑگی گپ ئے۔

من پھم ات کہ زاکر دری کوماں وتی سرا ھاکم بیگ نہ من اِتگ پمیشکہ مروچی چہ ما جتا ایں۔
مئے سر زاکر ءُ آئی سنگتانی عکس ءِ دیم ءَ جھل انت پرچہ کہ ما آھانی پگر ءَ پیلو نہ کنگ ءَ آں۔

مروچی راجۓ بندیگاں ءُ شھیدآں وتی نگرھیں جان پہ مئے باندات ءِ واستہ ندر کتگ ما نزا ایں کہ مئے زمہ واری چی انت ۔آھانی پگر چے بوت ءَ ؟ مارا آھانی پگر چتور سرجم کنگی انت ۔

مروچی اگاں ما شر بے جیڑ آں ما وتی وتن ءَ آجو کنگ ءِ واستہ سر ءِ ندر کنگ ءَ چَک بہ جن انت مئے آؤکیں نسل مئے کبر آں نالت دنت ۔ پرچی کہ مئے مروچی ایں پکر، نظریہ، جیڑگ، کربانی مئے آؤ کیں نسل ءِ زند انت ۔ اگں ما وتی آؤکیں نسل ءَ یک آزاتیں زندیں بکشاھگ لوٹ آں گُڑا مروچی، پہ ہرچ پیمیں کربانی ءَ آسرا مہ کن آں ۔ انچش کہ زاکر جان ءُ آئی سنگتاں وتی راجی آجوئی واستہ ہرچ وڑیں اڑ ءُ جنجالانی باوست ءَ نہ جیڑتگ وتی آجوئی ءِ پگر ءُ زمہ واری پورا کتگ اَنت نوں مارا زمہ واری داتگ اِش ۔

اگاں ما انگت سما نہ کت بزان ما اے مہ پھم اِنت کہ ایوک ءَ زاکر جان، زاہد جان ءُ آھانی ایدگہ ہزاراں سنگت بندیگ انت، ہمے بہ پھم اِنت کہ ما دراہ بندیگ آں پرچہ کہ ما گلامی ءَ نہ مار انت۔
دگنیا ءِ تہا ہزاراں کوم گلام بوتگ اَنت بلے نون آزات انت آھاں گلامی ءِ سانکلانی پروشگ ءَ ہرچ وڑیں کربانی دیگ ءَ آسرا نہ کتگ

زاکر جان آجو بات ئے

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

دی بلوچستان پوسٹ

سر بیتگیں ھالانی رد ءَ روکپتی بلوچستان ءَ ایرانی سپاہ ءِ تیرگواری تیل کَشیں کُردے بیران بیتگ –

اھوالکار ءِ رد ءَ مگس ءِ دمگ آشار ءَ ایرانی سپاہ ءَ تیرگواری کرتگ ءُ کردستان ءِ جھممندیں مردمے کُشتگ-

بیران بیتگیں مردم ءِ پجار بیزاد مھمدی جھمنند بانہ کردستان ءِ نام ءَ زانگ بیتگ –

اھوالکار ءِ رد ءَ بیزاد مھمدی ءِ گاڑی ءِ تیل مان بیتگ ءُ ھمے وھد ءَ ایرانی سپاہ ءَ تیرگواری کرتگ ءُ آئی ءَ تیر لگ اِتگ ءُ بیران بیتگ –

چاگردی مردمانی گوشگ اِنت کہ کردستان ءُ روکپتی بلوچستان ءَ سیمسری ءَ لاپ ءِ والینگ ءَ تیل ءِ باپاری کن اَنت کہ چریشی ءَ بازیں مردم بیران بنت –

آئی ءَ گوشت کہ روکپتی بلوچستان ءِ جھمنند ءُ کردستان ءِ سیمسری ءِ بندوکی ءَ بازیں بلوچ ھم ایرانی لشکر ءِ تیرانی آماچ بیتگ ءُ بیران بیتگ اَنت –

آئی ءَ گْوشت کہ گیشیں روزگار ءِ نہ بوگ ءَ مردم پہ لاچاری اے بیمناکیں باپاری ءَ کنگ ءَ اَنت کہ ایشی ءِ بند کنگ ءَ ھم مردمانی جان ءُ ساھاں تاوان دیگ ءَ اَنت –

شال ءَ بیگواھیں مردمانی ھاتر ءَ زھرشانی برجاہ –

دی بلوچستان پوسٹ

وائس فار بلوچ مسنگ پرسنز ءِ رھشون ماما قدیر بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ بلوچ زالبولانی زورانسری آوارجنی پاکستانی ریاست ءِ بلوچستان ءِ درگت ءَ پالیسیانی درنگازی بلوچ راج زالبولانی زورانسری آوار جنی ءِ بگیری یکجاہ بہ بنت ءُ توار چست بہ کن انت –

ماما قدیر بلوچ ءَ دیمتر ءَ گوشتگ کہ بلوچستان ءِ تہ ءَ ھچ کس ایمن نہ انت- گوستگیں روچاں بلوچستان یونیورسٹی ءِ پروفیسر ءُ مروچی پنجگور گچک ءَ چُک ءُ زالبولانی زورانسری آوارجنی وت اشی گواہ انت –
آئی ءَ گوشتگ کہ اشی ءَ پیش ھم پاکستانی پوج ءُ چیریں ادارھاں لشکر کشی ءَ چُک زالبول شھید کُتگ ءُ بیگواہ کرتگ انت – اشی ءَ پیش آواران ءَ ھم زالبول آوار جنی ءَ پد آ ناشرکار گوشتگ ءُ دیم ءَ آؤرتگ انت – وھدیکہ ھرنائی ءِ دمگ نشپا ءَ لشکر کشی ءِ میان ءَ پاکستانی پوج ءِ دست ءَ شھید بوتگیں جنکو ءِ وئیل ھم دپتر ءِ تہ ءَ ھست انت –

آئی ءَ گوشتگ کہ زالبولانی زورانسری آوار جنی پدرد ءُ کابل ایرجنگ انت ءُ بگیری ءَ توار چست کن ایں –

زانگ بہ بیت بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ مروچی چارھزار ءُ یک سد ءُ پنجاہ روچ سرجم بیتگ ءُ جتائیں پگر ءِ منوگراں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ پدردی درشان اِتگ –

اشی ءَ پیش ماما قدیر بلوچ ءَ وتی شنگ کرتگیں تامر درشان ءِ تہ ءَ گوشتگ کہ پہ عمرے ءِ ھاتر ءَ وھدے من کاگدانی جم کنگ ءَ پاسپورٹ آفس ءَ شُتگ انت گڑا من ءَ گوشگ بوتگ کہ منی نام دوبر ای سی ایل ءَ تہ ءَ کنگ بوتگ –

ماما قدیر بلوچ ءَ گوشتگ من نزاناں منی نام چی ءَ ای سی ایل ءِ تہ ءَ کنگ بوتگ، وائس فار بلوچ مسنگ پرسنز پہ بیگواھیں مردمانی ھاتر ءَ ملکی کانودانی رِد ءَ ھک ءُ انساپ لوٹ ایت، ناکہ ما سلاہ بستہ انت ناکہ ما جرمے کتگ کہ مئے نام ای سی ایل ءِ تہ ءَ مان کنگ بوتگ –

زانگ بہ بیت اشی ءَ پیش ھم ماما قدیر بلوچ ءِ نام دو رند ءَ ای سی ایل ءِ تہ ءَ مان کنگ بوتگ ھمے سوب ءَ آئی ءَ جنیوا، امریکہ ءَ انسانی ھکانی گلانی مراگشاں بھر زرت کرت نہ کتگ –

دی بلوچستان پوسٹ

کیچ ءِ دمگ بلیدہ الندور ءَ ناشناسیں مردماں گورنمنٹ ھائی اسکول بُن داتگ، چریشی ءَ اسکول ءِ درستیں ریکارڈاں ھوار ٹاٹ ءُ ڈیسک سُتکگ ءُ پُر بوتگ انت –

دنیگت ءَ کُتکارانی پجار ءُ آ دزگیر کنگ نہ بوتگ انت دمگی مردماں کتکار ایرجتگ انت –

زانگ بہ بیت گوستگیں ماہ ءَ بلیدہ ءِ دمگ کوچک ءَ چیرمین بازار ءِ ھم یک زری وانگجاھے سوچگ بوتگ بلے دنیگت ءَ دمگی پھازدارانی نیمگ ءَ ھچ وڑیں گامگیج زورگ نہ بوتگ –

دمگی مردمانی گوشگ انت کہ اے وڑیں وئیلاں سرکار ءِ چیر دستی ءَ کارکنوکیں ٹولیانی دست مان انت –

دی بلوچستان پوسٹ

چہ گچگ ءَ پاکستانی پوج ءِ دست ءَ دو زالبول ءُ چکاں ھوار نُھ مردم بیگواہ کنگ بیتگ اَنت –

ٹی بی پی پتر ءَ سر بیتگیں ھالانی رد ءَ بلوچستان ءِ دمگ پنجگور ءِ ھند گچک ٹوبہ ءَ درمھمد ءِ پیرزالیں لوگبانک بی بی مریم ءُ آئی ءِ دو کسان سالیں نماسگ راشد ء عواض ءُ اجمل ء شھجان ءِ ھمراھی ءَ پنجگور ءَ دیم پہ گچک ءِ روگ ءَ ٹوبہ ءِ ھند ءَ پاکستانی پوج ءَ پاسینجری گاڑی ءَ ایر گپتگ ءُ دزگیر کنگ ءَ پد ناشناسیں زنداناں برتگ اَنت –

دمگی مردمانی رد ءَ کسان سالیں راشد ءُ اجمل ھردوک نودربر اَنت ءُ کیچ ءَ وانگ ءَ بیتگ اَنت ءُ وتی موکلانی آیگ ءَ کھول ءِ گِندوک ءَ بنکی ھنکین ءَ روگ ءَ بیتگ اَنت کہ نیمراہ ءَ پوج ءَ دزگیر کرتگ ءُ بیگواہ کرتگ اَنت –

زانگ بہ بیت گچک ءَ اگست ءِ ماہ ءَ ٹوھیں کچے ءَ لشکر کشی بندات کنگ بیتگ اَنت کہ چریشی ءَ جانی تاوانانی ھواری ءَ لوگ ءُ کشت ءُ کشار ماندارگانی وئیلانی ھال اتکگ اَنت –

دمگی مردمانی رد ءَ پوجی لشکع کشی ءِ زوراں بازیں مردماں لَڈ ءُ بار کرتگ ءَ جتا جتائیں جاھاں لاچاری زند ءِ گوازینگ ءَ لاچار اَنت –

دگہ یک ھالے ءِ رد ءَ گچک ءِ دمگ ءَ سِی نومبر ءَ پاکستانی پوج ءَ گچک ءِ جھمنندیں مھمد کریم ء یار مھمد ءُ آئی ءِ لوگی بی بی شاہ پری کہ آئی ءِ لوگ ءَ دزگیر کنگ ءُ ناشناسیں زنداناں برگ بیتگ اَنت کہ چریشی ءَ پد آیانی بارہ ءَ ھچ وڑیں ھال نہ بیتگ –

چریشی ءَ پد ھمے ماہ ءَ گچک ءِ جھمنندیں سلیم ء مھمد جمعہ، واحد ء قادر بکش، نزیر ء اُمیت ءُ یار جان ء دلمراد ھم پوج ءَ دزگیر کرتگ ءُ ناشناسیں زنداناں برتگ اَنت –

گوک رودان ءَ پاکستانی پوج ءِ پانگس ءِ سر ءَ اُرش کتگ دو کارمند کُشتگ یکے زدگ کُرتگ – میجر گْوھرام بلوچ

دی بلوچستان پوسٹ

سربیتگیں ھالانی رِد ءَ ناشُناسیں سلاہ بندیں مردماں کیچ ءِ دمگ مند گوَک ءَ رودان ءِ کوہ ءِ سر ءَ برجاھیں پاکستانی پوج ءِ پانگس ءِ سر ءَ اُرش کتگ- اُرش ءَ پاکستانی پوج ءَ جانی تاوان رس اِتگ – اُرش ءَ پد سلاہ بندیں مردم درآیگ ءُ رؤگ ءَ سوبین بوتگ انت وھدیکہ چہ پاکستانی پوج ءِ بنجاھی پانگس ءِ نیمگ ءَ چہ ھم سک باز تیرگواری کنگ بوتگ بلے ھچ وڑیں جانی ءُ مالی تاوانانی ھال نیست – زانگ بہ بیت ھردیں پاکستانی پوج ءِ سر ءَ اُرش بیت دومی نیمگ ءَ پاکستانی پوج لس مھلوک ءِ سر ءَ تیرگواری کنت –

دومی نیمگ ءَ بلوچ سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمہ واری منّ اِتگ ءُ گوشتگ کہ مروچی سھب ادار یازدہ ءَ مئے سرمچاراں کیچ ءِ دمگ مند گوک ءَ رودان کوہ ءِ سر ءَ برجاھیں پاکستانی پوج ءِ پانگس ءِ سنگر ءَ یک پوجی کارمندے دور جنگیں توپکے گون ءَ نشانگ کرتگ ءُ کُشتگ –

جارکش ءَ دیمتر ءَ گوشتگ کہ ھمے میان ءَ پانگس ءِ سر ءَ وتکاریں سلاھاں گون اُرش کُتگ اُرش ءَ یک دگہ کارمندے مرتگ ءُ یکے زدگ بیتگ –

گڈسر ءَ جارکش ءَ گوشتگ کہ اے اُرش بلوچستان ءِ آجوئی تاں برجاہ مان انت-

دی بلوچستان پوسٹ

بلوچستان ءَ بیست ءُ چار ادارانی تہ ءَ کورونا ءِ نادراھی ءِ کمتری ھال دیم ءَ اتکگ اَنت –

اُستانی جانسلامتی ءِ رد ءَ چار شمبے ءَ سرجمیں بلوچستان ءَ 425 مردمانی کورونا وائرس ءِ ٹیسٹ کنگ بیتگ اَنت کہ چریشی ءِ آسر ءَ اُستان ءِ 4 دمگاں 53 نادراھانی نادراھی ءِ ھال دیم ءَ اَتکگ اَنت –

بلوچستان ءَ کورونا وائرس ءِ نوکیں نادراھانی دیم ءَ آیگ ءَ پد نادراھانی کَچ 17ھزار 268 ءَ سر بیتگ اَنت –

ھال ءِ رد ءَ گوستگیں بیست ءُ چار ادارانی تہ ءَ کورونا ءَ آماچ بیتگیں 81 نادراہ وش بیگ ءَ پد بلوچستان ءَ دراہ بیتگیں مردمانی کچ 16 ھزار 547 ءَ سر بیتگ اَنت –

ھال ءِ رد ءَ بلوچستان ءَ بیران بیتگیں مردمانی کچ 169 ءَ سر بیتگ اَنت –

جانسلامتی ءِ رد ءَ بلوچستان ءِ وانگجاھاں کورونا ءِ یک دگہ نوکیں نادراھی ءِ دیم ءَ آیگ ءَ پد کورونا وائرس ءَ اسرمند بیتگیں نودربر ءُ استادانی کچ 1027 ءَ سر بیتگ اَنت –

نبشتانک: بیگواھی

نبشتہ کار: جاوید اکبال

دی بلوچستان پوسٹ

مردمانی بیگواھی اے ملک ءِ بادشاہ ءَ بندات کُتگ بَلے شَریں کارے نَہ اِنت۔ بادشاہ نَزانت کہ تھنا ھما مردم کہ چست کنگ بیت بیگواہ نَہ بیت آئی ءِ دراھیں لوگ ءِ وشی بیگواہ بنت۔ ھما انت کہ من اِش کتگ بادشاہ نودربراں بیگواہ کنگ ءَ اِنت من وتی چُک چہ وانگجاہ ءَ کشتگ ءُ کار ءَ پرماتگ۔ بیزار اِنت دگہ وانگ ءُ زانگے نَہ بیت منی چُک منی چمانی دیم ءَ وَ بِہ بیت،
شَر اِنت واجُل من نی رواں زندگ بیت آں الم تئی نیمگ ءَ کایاں۔
من داں دیراں ھمود ءَ نشت آں ناکو ءِ گپاں جیڈگ ءَ اتاں۔ من چون ناکو ءَ سرپد بِہ کناں؟ چہ وانگ ءِ کَشگ ءَ چہ بیگواھی دارگ نہ بیت اد ءَ بازیں چُک بے وانگ ءُ زانگ ءَ بے گپ ءُ تران بیگواہ کنگ بیتگ اَنت بادشاہ ءَ را مئے وانگ ءُ زانگ ءَ ھچ متلب نیست آئی ءِ متلب دگرے۔

لھتیں مُدت ءَ چہ رند من پہ شال ءَ روگ ءَ بس ءِ ودار ءَ اِتاں من ناکو دیست کہ سک گَل اَت۔ من ءَ گُشت ئِے مرچی من سک گَل آں۔ پرچاکہ باندا منی چُک ءِ اولی پگار رس اِیت۔ زان ئے منی چُک اولی پگار ءَ چون کنت؟
منی چُک گش اِیت من ءَ سمسنگ(Samsung) ءُ اوپو(Oppo) نہ لوٹ اِیت آ گُش اِیت آ وتی پت ءِ واستا اڑے من تئی گنوکیں ناکو ءِ واستا کوش گراں وتی مات ءِ واستا چادرے گراں۔ ھمےگپاں گوں ناکو ءِ ارس رتک انت ءُ پہ گریوگ گشت ئِے من سک گَل آں منی چُک ءَ منی سِستگییں کوش ءُ آئی ءِ مات ءِ درتگیں چادر یات انت ۔ ءُ پد ءَ ناکو ءَ گشت من مرچی پلُان ءِ گور ءَ وتی چُک ءِ گپ ءَ بَراں۔ کمو دور روگ ءَ رند ناکو اوشتات ءُ پہ کوکار گشُت ئِے سور ءَ الم بیا اِت پد ءَ دو ماہ ءَ رند من ناکو دیست کہ بیگواہ بیتگیں مردمانی کیمپ ءَ وتی چک ءِ اکس ئِے دست ءَ اِنت۔ من ناکو دیست ناکو ءِ گور ءَ شُتاں ناکو ءَ من ءَ امباز کت ءُ گشت ئِے منی چک اِش برت۔۔۔ منی وشی بیگواہ کنگ بیت اَنت۔ من وتی چک پرچاکہ وانگ ءَ نہ اِشت بلے ۔
ناکو ءِ گپ سرجم نہ بوت انت آئی ءِ گریوگ ءُ گپ ھوار بوت انت۔ من ناکو ءِ چک ءِ اکس ءِ چارگ ءَ چم جھلا کت اَنت داں دیست ناکو ءِ چُک ءِ اکس ءِ کَش ءَ ناکو ءِ سِستگیں کوش اِیر ات اَنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔