TBP Balochi

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ پھرہ ءَ یک تیل کشیں ٹنکرے کلٹی بیتگ کہ چریشی ءِ سوب ءَ ٹنکر ءِ ڈرائیور زدگ بیتگ –

اھوالکار ءِ رد ءَ ٹنکر پھرہ ءَ دیم پہ سرباز ءَ روگ ءَ بیتگ کہ نیم راہ ءَ کھیری ءِ ھند ءَ وئیل ءِ آماچ بیتگ کہ چریشی ءَ ٹنکر ءِ ڈرائیور زدگ بیتگ –

وئیل ءَ پد دمگدار وئیل جاہ ءَ سر بیتگ اَنت ءُ زدگ بیتگیں ڈرائیور نادراہ جاہ ءَ سر اش کرتگ –

روکپتی بلوچستان ءَ بندوکیں مردمانی گوشگ اِنت دگانی سر ءَ یکشل ءَ وئیل بیگ ءَ اَنت ءُ اے دگاں بازیں کچے ءَ مردمانی ساہ ءُ جاناں تاوان بیتگ اَنت –

دی بلوچستان پوسٹ

سر بیتگیں ھالانی رد ءَ گوستگیں روچ ءَ پنجگور ءِ دمگ پروم ءَ لیویز کارمنداں بار کشیں گاڑیانی ڈرئیورانی سر ءَ زوراکی کنگ ءُ لٹ ءُ کُٹ کنگ ءِ بگیری ءَ پنجگور ءِ ڈپٹی کمشنر عبدالرزاق ساسولی ءَ گامگیج زرتگ ءُ وئیل ءَ ھواریں دو لیویز کارمندانی ماٹو کنگ ءَ ھوار آھانی سر ءَ المیں جست ءُ پُرس کنگ ءِ پرمان کرتگ –

دمگی انتزامیہ نیمگ ءَ شنگ کرتگیں درشان ءِ تہ ءَ گوشگ بوتگ کہ پنجگور ءِ ڈپٹی کمشنر عبدالرزاق ساسولی ءَ لس مھلوک ءِ شکایت کنگ ءُ چاگردی ترامجاھاں شنگ بوتگیں تامرے ئے سر ءَ گامگیج زرتگ ءُ دو لیویز کارمند ماٹو کُتگ اَنت –

شنگ بیتگیں ھالانی تہ ءَ گوشگ بوتگ کہ لیویز کارمند مھلوک ءِ پھازدار انت آھانی کار لس مھلوک ءِ جان ءُ مالانی پھازگی انت ، ھچ وڑیں کارمنداں اے اجازت دیگ نہ بیت کہ لس مھلوک ءِ سر ءَ لٹ ءُ کُٹ بہ کن انت – ماٹو بوتگیں لیویز کارمندانی بگیری ءَ پَٹ ءُ پول کنگ بوگ ءَ انت –

آھاں دیمتر ءَ گوشتگ کہ ھر وھد ءَ کہ کارمند لس مھلوک ءَ تنگ کن انت ءُ آھاں چہ ملام گِر انت گڑا ھما دمان ءَ مارا ھال کنگ بہ بیت آھانی بگیری ءَ گامگیج زورگ بیت اِنت –

دی بلوچستان پوسٹ

سربیتگیں ھالانی رد ءَ بلوچستان ءِ دمگ دکی ءَ اشکرانی کاریز ءَ ٹالی لگگ ءِ وئیلے ءَ یک کاریزکارے بیران ءُ یکے زدگ بوتگ – وئیل ٹالی ءِ ساد سِدگ ءِ سوب ءَ دیم ءَ اتکگ –

وئیل ءَ بیران بوتگیں کاریزکارے پجار کریم خان ء ولی محمد جاھمنند افغانستان ءِ نام ءَ چہ بوتگ ، وھدیکہ زدگ بوتگیں مردم ءِ پجار نصیر ء صاحب محمد جاھمنند افغانستان نام ءَ چہ بوتگ –

بیران ءُ زدگ بوتگیں مردم چہ کاریز ءِ تہ ءَ کَشگ بوتگ ءُ دمگی نادراھجاہ ءَ برگ بوتگ انت –

ھمے وڑ ءَ وندر ءَ شارجہ پمپ ءَ یک مردمے ءَ وت ءَ وت مانداشتگ ءُ وتکشی کرتگ –

وتکُشی کنوکیں مردم ءِ پجار عبدالمجید ء رمضان خاصخیلی جھمنند لاکہ گوٍ اوتھل ءِ نام ءخ زانگ بیتگ –

تنی وھدی وتکُشی ءِ سوب زانگ نہ بیتگ ءُ وتکُشی کنوک ءِ جون چِست کنگ ءُ نادراہ جاہ ءَ برگ بیتگ –

نبشتانک: حنیف شریف ءُ مردمانی پرمائش

نبشتہ کار: هسا بجار

دی بلوچستان پوسٹ

بلوچی لبزانک ءِ تہ ءَ من بہ گشاں کہ پنونِ لتیپہ ءِ تہ ءَ، حنیف شریف هما مردم انت کہ هر کجا بہ اوشت اِیت ، تاں لین چہ همود ءَ بندات بیت – ( انچو کہ لینے یا سرپے بہ بیت ، اے وَ ملکے نہ اِنت ، اد ءَ مردم ءِ جند ءَ کدر ءُ کیمت نیست سرپ چہ کجا ) اے انچائیں گپے نہ اِنت ، مرد ءَ کتگ ءُ پیش داشتگ – تامر ساچی بہ بیت کہ لبزانک ءِ تہ ءَ کسّھی لبزانک کہ ایشانی نام گرگ بیت تاں حنیف ءِ نام اولی سرپاں گندگ بیت –

هو ! ایشی ءِ ناشری یا گڑبڑ کنگ ءُ مردمانی سُرینگ هست انت – انچو کہ بالاچ اتک ، تاں هر کس ءَ شور کت کہ اے نی تامرے ؟ بلے مرچی گش انت کہ بلوچی تامر چہ بالاچ ءَ بندات انت – مرچی پد ءَ حنیف ءَ بلوچی لبزانک بڈّ ءَ بستگ – یا سر ءَ زرتگ – هر یکے کوکار ءُ جاک ءَ انت – زاه وَ لیبے ! هر یکے وتی دل ءِ گپ ءَ جنگ ءَ انت کہ حنیف ءَ چش نبشتہ کتیں یا حنیف ءَ آ ڈول ءَ کتیں – همینچک دپ ءُ همینچک هبر –

بلے من گشاں حنیف ءَ مرچی دگہ سرپے بندات کتگ – هنچو کہ حنیف ءِ زیکیں بالاچ ءِ سرپ ءِ بندات کنگ ءَ آئی ءِ پُشت ءَ مردمانی کتّارے کہ روچ پہ روچ گیش بُوان انت ، علی بکش داد ، بیبگر ، سیٹ هلیل ، سعید شاد ءُ دگہ بازینے – هنچو کسھانی سرپ ءَ حنیف ءِ پشت ءَ زیک نزر دوست گوں بازیں کسے ءَ اوشتوک انت – مرچیگیں اے سرپ ءَ باندا هم بازینے اوشت اِیت –

هو ! انی زاه ورگ ءَ انت – نہ زاناں اے مرد ءَ زاه ءِ ورگ پرچا وش بیت ؟ بہ گند ئے وت ءَ زاه وارینگ ءُ دومیگ ءَ پہ راه ءُ در بُوجگ ایشی ءِ ابرمی کردے ، پد ءَ هما مردمانی جند مدان مدان ءَ همے کشک ءَ آیان بنت ءُ منزلیگ بنت-

انی هر یکے گشگ ءَ انت ” چشیں بے گیرتیں مردم جنیناں مُٹ جنگ پرمایگ ءَ انت – زاناں وت ءَ مات ءُ گهار ئِے نیست “- همے وڑیں دگہ بازیں بے پکراتیں زاه – هر یکے لوٹگ ءَ انت هنچو کہ ما نبشتہ کنیں حنیف هنچو نبشتہ بہ کنت – بلے حنیف انت کہ پرمائشانی گوشدارگ ءِ هچ موڑ ءَ نہ انت ءُ وتی وڑ ءَ هرچی کہ آ مارگ ءَ انت ، گندگ ءَ انت ، زورگ ءَ انت – وتی دیدانک ءِ آسراتی ءَ ، ءُ وتی وانگ ءُ زانگ ءُ تجربھاں لنکُکانی میار کنگ ءَ انت –

بلے اے جاکانی تہ ءَ یکے هم آئی ءِ آزمانکاری ءِ ازم ءِ سر ءَ گپ ءَ نہ انت – بیت کنت کہ ایشی ءِ تہ ءَ گپ کنگ ءِ گنجائش حنیف ءَ پہ مردماں پشت نہ گیتکگ – یا وَ همے چندے کوکار کنوکانی تہ ءَ اے واک نیست کہ اود ءَ سر بہ بنت – یا آیانی دزرس ءَ مہ بیت – حنیف یک یاگی ئیں نبشتہ کار ءُ تامر ساچے ، پمشکا مردمانی پهم ءَ آئی ءِ ساچشت اچُست ءَ نیا انت ، حنیف چو سلو فاؤزن ءَ مدان مدان ءَ کشوکیں زهرے –
حنیف شریف ءِ وانگ پمشکا گران انت کہ حنیف ءِ آزمانکانی پلاٹ مشکلیں پلاٹے ، حنیف واکیاتانی بُر ءُ برین ءَ زبر انت ، کجام گپ ءَ کجا سند اِیت ءُ پد ءَ کجا جوڑ ئےِ دنت همے تاب ءُ ریس هر کسی گْور ءَ نیست اَنت – جنیف منی ءُ یا اے دگرانی وڑ ءَ تچک ءَ گپ ءَ ایر نہ کنت ءُ همے آزمانک انت ، چو وَ کسہ ءِ آرگ ءَ بہ گند ئے درست زبر بہ بنت ، بلے آزمانک ءِ زیبائی گوں آئی ءِ مهکمیں پلاٹ ، تکینک ءُ درشانداب ءَ انت ءُ حنیف ءَ اد ءَ باج بُرتگ – آئی ءِ رد سازی باز زیبا ءُ دلکش انت ، زبان ئےِ وش انت – حنیف ءِ همے یکیں ناشری هست انت ءُ دست نہ اوشتی ، کہ حنیف چاگرد ءِ هما رگ ءَ دست جنت کہ بازیں ٹیکہ دارے سر ءُ روزگار کنت – آ چو مھتر آدم بهشت ءِ هما نیبگ ءَ وارت کہ مکن کنگ بوتگ ( شجرِ ممنوع ) انت –

حنیف ءِ نام من ءَ پمشکا دوست بیت کہ اد ءَ حنیف ءَ وتی انا ءُ وتسریں گیرت ، ( همے باریں چی یے کہ چیزے بلوچ ءَ بڈّ ءَ انت ءُ تر اِیت – آ دگہ گپے کہ وت نہ زانت گیرت چی ءَ گُش انت ) ءِ بار بوتکگ ءُ وت ءَ مردمے کتگ ءُ باز زیبا نبشتہ کتگ – همے چیز من ءَ دوست بوتگ کہ حنیف وتی ساچست ءِ سپر ءَ گوں جوانی ءَ دیم ءَ جنزان انت ءُ گوں نوکیں دابے ءَ دیم ءَ اتکگ اے حنیف انت ، یا حنیف ءِ نام –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

یونائیٹڈ بلوچ آرمی ءِ جارکش مزار بلوچ ءَ وتی شنگ کرتگیں درشان ءِ تہ ءَ گوشتگ کہ گوستگیں شپ ءِ ساھت ھشت ءَ لجے ءَ فرنٹئیر کور ءِ بنجاھی بنجل ءِ سر ءَ گرنیڈ لانچر ءُ دگہ مزنیں سلاھابی گون ءَ اُرش کرتگ –

آئی ءَ گْوشت کہ اُرش نیم ادار ءَ برجاہ بیتگ چریشی ءَ دشمنیں پوج ءَ جانی ءُ مالی تاوان رس اِتگ –

جارکش ءَ دیمتر ءَ گوشت کہ مئے اُرش دشمنیں پوج ءِ سر ءَ چہ بلوچستان ءَ درکپگ ءُ بلوچستان ءِ آجوئی ءَ برجاہ مان اَنت –

دی بلوچستان پوسٹ

ٹی بی پی پترءَ سر بیتگیں ھالانی بلوچستان ءِ نامی ئیں آزمانکار ءُ تامر ساچ حنیف شریف ءِ آزمانکانی نوک چاپ بوتگیں کتاب “حنیف نام ” اولی چاپ کنگ ءِ ھلاسی ءَ پد دومی چاپکاری بندات کنگ بیتگ –

زانگ بہ بیت حنیف شریف ءِ کتاب “حنیف نام” چیزوکے روچ ءَ پیسر علم و ادب پیبلیشع اینڈ بکسیلر ءِ نیمگ ءَ چاپ ءُ شنگ بیتگ ءُ آئی ءِ اولی چاپ ءَ پد دومی چاپکاری ءِ کار بندات بیتگ اَنت –

دومی نیمگ ءَ حنیف نام کتاب ءِ تہ ءَ نبشتگ آزمانکانی سر ءَ بلوچی زبان ءَ بندوکیں مردمانی ایراد ھم چاگردی رسانکجاھاں برجاہ اَنت ءُ جتا جتائیں مردم کتاب ءِ سر ءَ نگدی درشان ءُ گپ جنگ ءَ اَنت –

بلوچ لبزانکارانی گوشگ اِنت کہ حنیف نام ءِ شنگ بیگ ءَ پد بلوچستان ءَ بندوکیں وانوکاں نوکیں رنگیں سوگاتے سر بیتگ –

بلے کتاب ءِ اولی چاپگ ءَ پد دومی چاپگ ءِ کار بندات بیتگ ءُ چاپکارانی رد ءَ زوت دومی چاپ چریدگ بیت ءُ وانوکاں سر کنگ بیت اِنت –

حنیف شریف بلوچستان ءِ نامی ئیں تامرساچے ءِ ھواری ءَ یک آزمانکارے ھم ءُ آئی ءِ دو کتاب پیسر ءَ شنگ بیتگ اَنت –

حنیف شریف آزمانک ءُ تامر ساچی ءَ ھوار ھوار چاگردی رسانکجاھاں جتا جتائیں سرھالانی سر ءَ گپ ءُ تران ھم کنت ءُ آئی ءِ گوشدارک کچ بازیں رنگے ءَ گندگ ءَ کاینت –

ھمے وڑ بلوچ اھوالکار عابد میر ءَ وتی چاگردی رسانکجاہ فیس بک ءَ شکساتگیں گپانی تہ ءَ گوشتگ کہ حنیف شریف ءِ کتاب بلوچی ءَ چہ اردو ءَ رجانک کنگ بہ بیت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ چار ھزار یکسدو پنجاہ دو روچ سرجم بیتگ –

دی بلوچستان پوسٹ

کراچی ءَ چہ متحدہ قومی مومنٹ اھوالکاری باسک، گوستگیں ایم این اے عبدالوسیم، گوستگیں ایم این اے سلمان مجاھد بلوچ، صوبائی سرکماش ملک عمران کاکڑ، گوستگیں صوبائی سرکماش سلیم اختر ایڈوکیٹ ، نوراللہ سمالانی ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولاں گوں پدردی درشان اِتگ ۔

ھمے درگت گوستگیں ایم این اے عبدالوسیم ءَ گوشتگ کہ بیگواھیں مردم کسی یے چُک انت آ یل کنگ بہ بنت آھانی جیڑہ گشگیوار کنگ بہ بنت، پرچاکہ پاکستانی جاورھال انچو شر نہ انت کہ گیشتر اے وڈ بہ کنت ءُ جیڑہ جنجالانی تھا گیشی بیاریت ۔

ایم کیو ایم ءِ رھشون ءِ گوشگ ات کہ اگاں کسی ءِ دست ءَ ردی ءِ بوتگ گڈا کانودانی رِد ءَ آ سزا دئیگ بہ بیت یا یل کنگ بہ بیت۔

وائس فار بلوچ مسنگ پرسنز ءِ وائس چیئرمین ماما قدیر بلوچ ءِ گوشگ ات کہ بلوچ راج ءِ گم سکی سوری ءِ گندگ ءَ پد کزا یک سنگدلیں انسان ءِ وتی ارساں داشت بہ کنت بلے اے بلوچ راج انت کہ انچو درد ءِ سگگ ابید اوپار کنگ انت ۔

آئی ءِ گوشگ ات کہ ھمے اوپار ءِ پشدر ءَ لھتے سودابازی کنگ ءَ اِنت، زوراکی سگگ بلوچانی لاچاری انت پرچاکہ ایردستیں راج ابید اشی دگے ھچ کرت نہ کنت ۔

ماما قدیر بلوچ ءَ دیمترا گوشتگ کہ بلوچستان ءِ تھا پوجی آپریشن ھزاراں بلوچ پرزندانی شھیدی ءَ گوں بندات بوتگ کہ روچ مروچی یکشل ءَ برجاہ انت -بلوچستان ءِ تھا انسانیت سوز پالیسیاں چہ ریاستی رسانکدراں ھچبر سر چست نکرتگ ءُ نچارتگ ءُ ناکے اے درگت ھیال ءُ پگر کُتگ کہ بلوچانی سرا پرچہ انچو زوراکی کنگ بوھگ انت ۔

دومی نیمگ ءَ چاگردی ترامجاہ ٹوئیٹر ءَ بلوچ سوشل میڈیا ایکٹوسٹس آنی نیمگ ءَ بلوچ نودربر رھشونانی زورانسری آوار جنی ءِ بگیری ءَ سرپدی کمپین ءِ جنزینگ بوھگ انت بلوچ اسٹوڈنس آرگنائزیشن کمپین ءِ ھمراہداری جار جتگ ءُ کمپین ءِ تھا ھوار انت وھدیکے دگہ تکاں چہ سیادی داروکیں مردم ھم کمپین ءَ ھوار انت ءُ بھر زورگ ءَ انت ۔

کمپین ءَ بھر زوروکیں ریحان بلوچ ءَ نبشتگ کہ بلوچ نودربر رھشون پہ ھمے ھاتر ءَ زنداناں بندیگ کنگ بوتگ انت کہ آ وتی راج ءَ الم زانت نیمگ ءَ برگ ءَ بوتگ انت ۔ جھانے کجام ڈیھ انت کہ الم ءُ زانت ءِ ھاتر ءَ جھد کنوکاں زنداناں بندیگ کنت۔ انسانی ھکانی ھاترءَ کارکنوک وتی کرد ءَ پیلو بہ کن انت ۔

ھمے وڑءَ بلوچ سوشل میڈیا ایکٹوسٹ گروشک بلوچ ءَ بیگواھیں نودربر شبیر بلوچ، انسانی ھکانی باسک راشد حسین بلوچ، نودربر رھشون فیروز بلوچ ءُ بلوچ نودربر گل آزات ءِ گوستگیں سرکماش زاھد بلوچ ءِ اکس شنگ کرتگ ءُ گوشتگ کہ بیگواھیں مردمانی کھولاں انساپ ءِ ادارھانی دروازگ ٹُک اِتگ انت، آمیدگس آں شُتگ انت، زھرشانی کُرتگ بلے یک ادارہ ءَ ھم آھانی یک گپ ءِ ھم اِش نہ کُرتگ ۔

گوستگیں بیست ءُ چار ادارانی تہ ءَ ڈیھ ءَ کورونا وائرس ءَ ھپت ٹِک پنجاہ ءُ نُھ درسد گندگ ءَ اتکگ اَنت –

دی بلوچستان پوسٹ

پاکستان ءِ نیشنل کمانڈ اینڈ آپریشن سینٹر ( این سی او سی) ءِ نیمگ ءَ کورونا وائرس ءِ بارہ ءَ شنگ کرتگیں ھالانی رد ءَ بیست ءُ چار ادارانی تہ ءَ ایبٹ آباد ءَ درستاں گیشتر نادراھانی کچ دیم ءَ اتکگ اَنت کہ ھبدہ ٹِک پنجاہ ءُ ھپت ءَ سر بیتگ اَنت –

چریشی ءَ پد راولپنڈی ءَ بیتگیں درسد پانزدہ ٹِک بیست ءُ شش درسد بیتگ ءُ کراچی ءَ چاردہ ٹِک سِی ءُ یک بیتگ ءُ چریشی ءَ پد حیدر آباد ءَ دوازدہ ٹِک سیزدہ درسد بیتگ اَنت –

این سی او سی ءِ رد ءَ سرجمیں ڈیھ ءَ اے وھد ءَ کورونا وائرس ءَ دو ھزار ءُ چار سد ءُ چِل ءُ یک نادراھانی جاور نگیگ اَنت ءُ اے وڑیں نادراھانی کچ روچ پہ روچ گیش بیان اَنت –

این سی او سی ءَ گْوشت کہ ڈیھ ءِ اُستان ءُ دمگانی نادراھی ءِ کمی جاور ھال چارگ بہ بنت گڑا اشانی تہ ءَ زیردستیں کشمیر یازدہ ٹِک بیست ءُ چار درسد اولی رد ءَ اِنت ءُ چریشی ءَ پد سندھ دَہ ٹِک ھپتاد ءُ چار درسد، بلوچستان ءَ دَہ ٹِک چِل ءُ شش درسد، خیبرپختونخوا نُھ ٹِک شست ءُ ھشت درسد ، اسلام آباد پنچ ٹِک بیست ءُ ھپت درسد، پنجاب چار ٹِک پانزدہ درسد ءُ گلگت بلتستان ءَ سَے ٹِک نود ءُ دو درسد اِنت –

دی بلوچستان پوسٹ

سر بیتگیں ھالانی رد ءَ ایرانی لشکر ءِ تیرگواری ءَ یک مردمے بیران بیتگ ءُ یکے زدگ بیتگ –

اھوالکار ءِ رد ءَ پھرہ ءُ سرباز ءِ دگ ءَ ایرانی لشکر ءَ یک گاڑی ءِ سر ءَ تیرگواری کرتگ ءُ چریشی ءَ یک مردمے بیران بیتگ ءُ یکے زدگ بیتگ –

بیران بیتگیں مردم ءِ پجار مھمد رحیم ء عبدالرحیم دازاندر دھستان سرکور سرباز ءِ جھمنند اِنت ءُ دومی زدگ بیتگین ءِ پجار نہ بیتگ –

اھوالکار ءِ رد ءَ مھمد رحیم وتی گاڑی ءِ سر ءَ سرباز ءَ دیم پہ پھرہ “ایرانشھر ” ءَ روگ ءَ بیتگ ءُ راہ ءِ نیمگور ءَ ایرانی لشکر ءَ آیانی سر ءَ تیرگواری کرتگ ءُ اے ھردوک زدگ بیتگ اَنت –

اھوالکار ءِ زدگ بیگ ءَ پد مھمد رحیم زدگیں جاوراں ایرانی لشکر ءَ گپتگ ءَ لٹ شاپ کرتگ ءَ پد ءَ آ ٹپی ءِ جاورانی تہ ءَ ایرانی لشکر ءَ دوبر آئی ءِ سر ءَ تیرگواری کرتگ ءُ چریشی ءَ آ بیران بیتگ –

اھوالکار ءِ رد ءَ دومی زدگ بیتگیں مردم تچگ ءُ روگ ءَ زدگیں جاوراں سوبین بیتگ –

اھوالکار ءِ رد ءَ ڈاکٹرانی چار ءُ ٹپاس ءَ ھم آیانی رپورٹ ءَ گوشگ بیتگ مھمد رحیم ءَ تیر بیست انچ ءَ دور جنگ بیتگ اَنت –

دی بلوچستان پوسٹ

چمبور ءَ پاکستانی پوج ءِ یک کارمندے دور جنگیں توپک ءِ گون ءَ نشانگ کُتگ، ءُ پانگس ءِسر ءَ اُرش کتگ ءُ تاوان داتگ – میجر گْوھرام

سربوتگیں ھالانی رِد ءَ مروچی آدینگ ءِ روچ ءَ ناشناسیں سلاہ بندیں مردماں آواران ءِ دمگ چمبور ءَ برجاھیں پاکستانی پوج ءِ پانگس ءِ سر ءَ اُرش کُتگ، اُرش ءَ پاکستانی پوج ءَ جانی ءُ مالی تاوان رس اِتگ – اُرشکار درایگ ءُ رؤگ ءَ سوبین بوتگ انت –

دومی نیمگ ءَ بلوچ راجی آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ گوشتگ کہ مروچی آدینگ ءِ روچ ءَ مگرب ءِ وھد ءَ مئے سرمچاراں آواران ءِ دمگ چمبور ءَ برجاھیں پاکستانی پوج ءِ پانگس سر ءَ دور جنگیں توپک ءَ گوں یک پوجی کارمندے نشانگ کُرتگ کُشتگ –
جارکش ءَ گوشتگ دورجنگیں توپک اُرش ءَ پد سرمچاراں ھما دمان ءَ پوجی پانگس ءِ سر ءَ راکٹ ءُ دگہ مزنیں سلاھاں گوں اُرش کُتگ، چریشی ءِ آسر ءَ پاکستانی پوج ءَ جانی ءُ مالی تاوان رس اِتگ –

گڈسر ءَ میجر گْوھرام بلوچ ءَ گوشتگ کہ زورگپتیں بلوچستان ءِ آجوئی تاں مئے اُرش برجاہ مان انت –