TBP Balochi

دی بلوچستان پوسٹ

ٹی بی پی پتر ھال ءَ سر بیتگیں ھالانی رد ءَ وائس فار مسنگ پرسنز آف سندھ، سندھ سجاگی فورم ءُ سول سوسائٹی کراچی ءِ نیمگ ءَ شنگ بیتگیں جارے ءِ رد ءَ دَہ دسمبر ءَ مردمی اگبالانی جھانی روچ ءِ درگت ءَ زھرشانی کنگ بیت اِنت –

آیانی رد ءَ ریگل چار راہ ءَ داں کراچی ءِ پریس کلب ءِ دیم ءَ یک روانکے کشگ بیت اِنت ءُ آیاں روانک ءَ سیاسی، چاگردی ءُ مردمی اگبالاں گوں بندوکیں مردماں گوں بھر زورگ ءِ دزبندی کرتگ –

دومی نیمگ ءَ بلوچ ہیومین رائٹس کونسل (بی ایچ آر سی) ءِ نیمگ ءَ ھم دَہ دسمبر ءَ مردمی اگبالانی جھانی روچ ءِ درگت ءَ یک نیادے ئے کنگ ءِ جار جتگ –

آئی ءِ جار ءِ رد ءَ دَہ دسمبر ءَ مردمی اگبالانی جھانی روچ ءِ درگت ءَ دیوان ءِ کنگ بیت ءُ اے دیوان ءَ بلوچستان ءَ پاکستانی پوج ءُ دگہ ادارھانی دست ءَ مردمی اگبالانی لگمتالی ءِ سر ءَ دنیا سرپد کنگ بیت اِنت –

آئی ءِ رد ءَ دیوان ءَ برزین واگمر سوس یونیورسٹی آف لندن، مارٹن ویٹ مین چرچ آف سائیکولجی، بلوچ نیشنل مومنٹ ءِ حسن دوست بلوچ، اھوالکار طہ صدیقی، ورلڈ سندھی گانگریس ءِ ڈاکٹر ھدایت بھٹو، انسانی ھکانی باسک احمد وقاص گوریا ءُ دیوان ءِ مھمانداری ءَ کمبر مالک بلوچ کنت –

آئی ءِ گوشگ اِنت بلوچستان ءَ مردمی اگبالانی لگتمالی ءُ رسانکدرانی بے تواری ءِ سر ءَ ڈیھ ءَ گیشتر مردمی اگبال لگتمال بیگ ءَ اَنت –

ھمے وڑ ءَ بلوچ نیشنل مومنٹ ءِ نیمگ ءَ ھم چاگردی رسانکجاہ ٹوئیٹر ءَ مردم اگبالانی جھانی روچ ءِ درگت ءَ یک کمپئن ءِ بندات کنگ بیت اِنت –

بلوچ نیشنل مومنٹ ءِ شنگ کرتگیں ھال ءِ تہ ءَ دَہ دسمبر ءَ چاگردی رسانکجاہ ٹوئیٹر ءَ #StandU4BalochRights ھیشٹیک کارمرد کنگ بیت اِنت –

دی بلوچستان پوسٹ

ممبئی: بالی وود رسانک ءِ رد ءَ تامرکار ورن دھون ءُ لیجنڈری تامر نیتو کپور جھانی کرونا وائرس آماچ ءُ آھانی کرونا ٹیسٹ ءَ نادراھی ءِ گورجنگ پدر بیتگ، دوئیں ازمکار اے وھدی چندی گڑھ ءَ انت، انیل کپور بارو ءَ ھم ھال شنگ بوتگ کہ آ ھم کرونا وائرس ءِ آماچ انت بلے انیل کپور ءَ وتی درگت ءَ کرونا ٹیسٹ ءِ نادراھی ءِ گورجنگ ءِ ھال رد کُرتگ انت گوشتگ کہ آئی ءِ ٹیسٹ ءَ نادراھی پدر نہ بیتگ –

گیشیں ھالانی رد ءَ جھانی وبا کرونا وائرس ءِ آماچ بوتگیں دؤئیں مزن نامیں ازمکار انیل کپور ءُ کائرہ ایڈوانی گون ءَ چندی گڑھ ءَ “جُگ جپگ جیو ” تامر ءِ شوٹنگ ءَ بوتگ انت – ازمکار نیتو کپور ءِ کرونا ٹیسٹ ءِ نادراھی ءِ گورجنگ ءَ پد آ نوں واتر ممبئی آیگ ءَ انت – کہ اود ءَ آئی ءِ چُک رنبیر کپور ءَ جاڑیگی ءِ گر ءُ دار ھم کرتگ – ازمکار نیتو کپور کرونا ھال راست بوگ ءَ پد آئی ءِ چُک رنبیر کپور ءَ وتی مات ءِ ھاتر ءَ گچینی ءِ بالیگے ءِ چِن ءُ لانچ ھم کُرتگ تاکہ آ زوت ممبی ءَ آرگ بہ بیت وتی جاندراھی ءَ زوت کُرت بہ کنت ءُ ڈبگی ءِ تہ ءَ بہ بیت اے وھدی آ چندی گڈھ ھم آئیسولیشن تہ ءَ انت –

اشی ءَ ابید ازمکار ورن دھون ءُ تامر ءِ ڈائریکٹر راج مھتا کرونا ٹیسٹ ءِ نادراھی ءِ گور جنگ ءَ پد چندی گڈھ آئیسولیشن رؤگے شور کُرتگ – انیل کپور ھم اے تامرے تہ ءَ ازمکاری کنگ ءَ انت بلے آئی ءِ چہ جھانی وبا کروبا رک اِتگ ـ بلے پد ءَ آئی ءِ پُشت ءَ دروگیں ھال شنگ بوگے پد ءَ آئی ءَ چاگردی ترمجاہ ٹویٹر ءَ وتی ٹویٹ ءِ تہ ءَ گوشتگ کہ منی کرونا ٹیسٹ ءَ سلامتی اِنت پہ منی ھاتر ءَ پگر مند بوگ ءَ من شمئے منتواراں –

بلوچستان تنک ءُ پُرشت پروشیں دگانی سوب ءَ مدامی مردم مرگ ءِ دیمپان انت –

دی بلوچستان پوسٹ

ٹی بی پی پتر ءَ سربوتگیں ھالانی رِد ءَ بلوچستان ءِ دمگ بولان ءَ دگ ءِ وئیل ءَ سَے مردم بیران بوتگ ءُ چار ٹپی بیتگ اَنت –

لیویز بنشون ءِ رِد ءَ بولان ءَ درینجن ءِ نزیک ءَ چھڑک ءَ دو گاڑیانی ڈیک ورگے سوب ءَ سَے مردم بیران بوتگ اَنت ءُ وھدیکہ چار مردم ٹپی بوتگ اَنت –

بیران بوتگیں مردمانی پجار غلام رسول، عزت اللہ ءُ محمد گل ءِ نام ءَ چہ بوتگ انت وھدیکہ محمد عمر، نوراللہ، مسلم خان ءُ محمد ایوب وئیل ءَ زدگ بوتگ انت –

لیویز ءَ زدگ ءُ بیران بوتگیں مردم نادراہ جاہ ءَ بُرتگ انت اود ءَ اژدری چار ءُ ٹپاس ءَ پد جون کھول ءِ ھوالگ ءَ کنگ بوتگ انت ٹپی بوتگیں مردم پہ گیشیں درمان ءِ ھاتر ءَ شال ءَ دیم دیگ بوتگ انت –

دومی نیمگ ءَ بلوچستان ءِ دمگ پنجگور پرومی کپ ءَ بیست چار ادارانی میان ءَ دو دگ ءِ وئیل دیم ءَ اتکگ، وئیل ءَ دو مردم بیران وھدیکے چار مردم ٹپی بوتگ –

اھوالکار ءِ رِد ءَ پروم ءُ پنجگور ءِ میان ءَ پروم کپ ءَ دو تیز رؤکیں گاڑیاں ڈیک وارتگ، ڈیک ورگے ءِ آسر ءَ یک مردمے بیران ءُ یکے زدگ بوتگ –
بیران بوتگیں مردے پجار زاہد ء عبدالکریم نام ءَ چہ بوتگ وھدیکہ وئیل ءَ منصف ء نظام جان ٹپی بوتگ- دوئیں مردم واشک ءِ نندوک انت –
زدگ ءُ بیران بوتگیں مردم ڈسٹرکٹ ھیڈکوارٹر ھسپتال ءَ برگ بوتگ-

زانگ بہ بیت گوستگیں بیست چار ادارانی میان ءَ پروم کپ ءِ اے دومی وئیل انت اشی ءَ پیش دو گاڑیاں ڈیک وارتگ ـ ڈیک ورگے سوب ءَ یک مردمے بیران ءُ سئے مردم زدگ بوتگ –

اھوالکار ءِ گوشگ انت کہ پروم کپ پنجگور ءُ پروم ءِ میان ءَ دراجیں پڑگ اِت ءُ گاڑیانی تیز رؤگے سوب ءَ اے دمگ ءَ گیشتر وئیل دیم ءَ کاینت –

ٹی بی پی چاگردی اھوالکار ءِ رد ءَ ورنائیں بلوچ گشندہ کیفی خلیل ءِ نوکتریں سوت آئی یوٹیوب چینل ءَ کساس یک ساھت ءِ پیسر شنگ بیتگ۔

دی بلوچستان پوسٹ

تامری دروشم ءَ شنگ بیتگیں سوت ءِ سرھال بے قرار اِنت ءُ اے سوت ءِ گشندہ ءُ ازمکار کیفی خلیل وت اِنت۔ اے سوت ءِ تہ ءَ بلوچی ءُ اردو زبان کارمرد کنگ بیتگ۔

یکیں ساھتے ءِ تہ ءَ اے سوت یک ھزار سئے سد مردماں بُرزءَ چار اِتگ ءُ داں اے ساھت ءَ چار سد ءَ بُرز مردماں دوست داشتگ ءُ ھپتاد ءَ بُرز مردماں کمنٹسانی تہ ءَ کیفی خلیل ساڑایگ بیتگ۔

زانگ بہ بیت کیفی خلیل ھما نوک باھندیں گشندہانی لڑءَ ھوار اِنت کہ آیاں نہ تھنا بلوچی سوتاں نوکیں دروشم ءِ داتگ۔

بلکیں وتی جتائیں وڑءُ پئیمانی سوبءَ بلوچ میوزک انڈسٹری ءِ تہ ءَ پہ وتی سوتاں مزنیں گوشداروک ءِ جوڑ کُتگ اِش۔

بلوچ چاگردی رسانکدر کارمرز کنوکیں ورنایانی ردءَ کیفی خلیل، نعیم دل پُل، اسلام زیمر، ملگزار بلوچ ءُ ایاز رنگوانی چہ ھما لھتیں تواراں یک اَنت کہ ایشانی کشتگیں راہ پہ آیوکیں پدریچءَ یک سکین ءِ بیت ءُ بلوچی ساز ءُ زیمر گوں نوکتریں دروشم ءَ دیم روی ھم کنت۔

نبشتانک: ودار  

نبشتہ کار: چیدگ بلوچ 

دی بلوچستان پوسٹ

ودار اَنگت سرجم نہ اِنت اے پَند دراج اِنت ، اوپار الم لوٹ اِیت، من وَ ھلواھے سرپد بوتگاں ھاھاھا من وتی سنگت ءَ گشت واب مہ گند دیم پہ راستی ءَ سرپد بہ بو ءُ بہ جنز ، اے سھریں تیرانی دیم ءَ اوشتگ مسکرایے نہ اِنت ، ایشی ءِ سرپد بوگ ءُ جھد کنگ ءَ تپاوت ءُ دِگری ھست، اِد ءَ واھشت گُٹ گیر کنگ لوٹ اَنت، زات ءَ چہ در آیگ کپ ایت، اے جنگ ھون لوٹ اِیت سنگت ءَ بچکند ات ءُ دَرّائینت-

آ بنداتی روچ اِت اَنت وھدے نوک من جھد ءَ ھوار کپتاں، اوتاک ءَ سنگتانی مھر ات انت ءُ من بازیں مھراں چہ دل ءَ نہ مَن اِت کہ وتی مھروانیں سنگتاں چہ گستا بہ باں ءُ چِداں چہ در بہ کپاں-

بلے اے جنگے ، باز پرمائیت، وڑ وڑیں ھُنر ءُ ھیلہ کنت چہ گلامیں زند ءَ  رکّگ ءِ ھاتر ءَ ترا ھما کار کنگ کپ انت کہ آ تئی دل ءِ تب ءِ نہ بنت بلے اوپار کنگی اَنت ھیر ما چہ اوتاک ءَ  در کپت ایں دیم پہ وتی میتگ ءَ۔

کسانیں وھدے ءِ تھ ءَ سنگتانی ھمراھی ءَ اے مارشت جوانی ءَ بوت کہ اے پند سک دراج اِنت، اے دگ ءَ اوپار کنگ ءُ جنزگ ءِ برورد ءَ یک چاگردے آجو بوت کنت، ایشی ءَ چہ پیش آجوئی ءِ واب گندگ ناسرپدی یے۔

اے جنز ءِ پڑ ءَ کسانیں وھدے ءَ من ھما سنگت دیستگ اَنت کہ آیاں کُلیں سَکّی اوپار کتگ ءُ وتی جان اش پہ سرڈگار ءِ ھاتر ءَ ندر کتگ انت، آیاں وتی جند ءِ زند ءَ چہ گیش سرڈگار ءِ پگر بوتگ کہ ھر ھال ءَ وتی سرڈگار ءَ چہ بدواھاں بہ رَکّین اَنت، آیاں دژمن بیھار داتگ کہ اے ڈیھ مئیگ انت ءُ ما وتی ڈیھ ءِ پھازگ ءَ زان ایں ءُ تو اِد ءَ ھچ وڑ ءَ باج نہ بر ئے۔

مروچی ھما سنگتانی سَکّیانی اوپار ءِ برورد انت کہ چہ زانت ءَ چکاریں ورنا اے جنز ءَ گوں ھمگرنچ پیوست اَنت، آیانی رتکگیں ھوناں اے پگر مھکم کتگ اے سرڈگار کَسّی میراس نہ اِنت، اے ھما شھیدانی ءُ بلوچ راج ءِ میراس اِنت۔

چہ اے ھیال ءَ  در کپگی اِنت کہ زوت آجوئی رس ایت، زند ءِ کُلیں واھشت کُشگی اَنت، چہ وت مَنّی ءَ در کپگی اِنت،سَکّیانی دیمپانی کنگی اِنت، وتی جند ءَ چہ سر گوزگی اِنت، زانت ءَ چہ چکار بوگی اِنت ءُ اے جنز ءِ لوٹانی دگّ ءَ روگی اِنت،کربانی دَیَگی اِنت اے پند دراج اِنت، اوپار کنگی اِنت ودار اَنگت سرجم نہ اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ بازیں جاھاں مولم شناساں ترندیں ھورانی گوارگ ءِ گمان کرتگ –

ٹی بی پی ءِ چاگردی رسانکدر اھوالکار ءِ رد ءَ مروچی روکپتی بلوچستان ءَ مروچی شپ ءَ مولم شناساں ترندیں ھورانی آیگ ءِ گمان کرتگ ءُ مولم شناساں مھلوک کورانی دپ ءُ ڈن ءُ دراں شیوار کرتگ اَنت –

مولم شناسانی رد ءَ مروچی شپ ءَ ترندیں رگامانی گوارگ روکپتی بلوچستان ءِ دمگ میناب، ھشتبندی، جگین ءِ کش ءُ گور، کلاگنج، اسلام آباد، زرباری دمگ سیریک ءَ ترندیں ھورانی آیگ ءِ گمان اِنت –

مولم شناساں گوشت کہ دگہ یک ھورے بلوچستان ءِ دمگ گیھ، پھرہ، ھاش، تپتان ءِ ھنداں بیت اِنت بلے اے ھور چرا ھور ءَ کمتر اِنت –

مولم شناساں مھلوک شیوار کرتگ ءُ گوشتگ کہ اے ھور سک ترند اِنت ءُ پیسری تُپانی رنگ ءَ تُپانی کرت کنت –

دی بلوچستان پوسٹ

ٹی بی پی پتر ھال ءَ سر بیتگیں ھالانی رد ءَ سباہ دشتیاری اکیڈمی وشکوشیں پروم ءِ نیمگ ءَ بلوچی زبان ءِ نمیرانیں شائر سلمان ھمل ءِ شئرانی دپتر “ھون ءِ بھار ” شنگ بیگ ءُ چاپگ ءَ جریدگ اِنت –

سبا دشتیاری اکیڈمی ءَ بندوکیں باسکے ءَ گْوشتگ کہ نمیرانیں سلمان ھمل ءِ شئرانی دپتر “ھون ءِ بھار ” تہ ءَ آئی ءَ آشوبی شئراں گوں آئی ءَ رد ءُ بند داتگ اَنت –

آئی ءَ گْوشت کہ پہ بلوچی زبان ءِ وانوکاں نوکیں سوگاتے ھمے زوتاں آیانی دست ءَ بیت اِنت اے دپتر پہ بلوچ ورنایاں یک سکینے ءِ دروشم ءَ دیم ءَ آیگ ءَ اِنت کہ نمیرانیں سلمان ھمل ءَ وتی شائری ازم ءِ تہ ءَ زمین ءِ بزگی ءُ بلوچ مھلوک ءِ بزگی درشان کرتگ اَنت –

زانگ بہ بیت سلمان ھمل بلوچستان ءِ آجوئی ءَ جھد کنوکیں سلاہ بندیں گلاں ھوار بیتگ ءُ گوست ءَ آئی ءَ کراچی ءَ چار ھمراھانی ھمراھی ءَ اسٹاک ایکسچینج ءِ سر ءَ “فدائی ” اُرش کرتگ اَت –

رسول بخش فرید ءِ یوٹیوب تندجاہ ءَ شنگ بیتگیں یک جارے ئے رد ءَ گوشگ بیتگ بینجو ساز ءِ ھیل دیگ بیت اِنت-

دی بلوچستان پوسٹ

ٹی بی پی ءِ چاگردی اھوالکار ءِ رد ءَ بینجو ساز کنگ ءِ درگت ءَ اُستاد رسول بخش فرید ءَ اولی زانشتی تامر ھم شھباز آر بی فرید ءِ یوٹیوب ءَ شنگ کنگ بیتگ۔

بلوچستان ءِ نامی ئیں بینجو اُستاد ءُ گشندہ رسول بخش فرید ءَ دو روچ ساری شنگ بیتگیں تامری جارے ئے تہ ءَ گوشتگ کہ آ نوک باھندیں بینجو دربرانی ھاتر ءَ شھباز آر بی یوٹیوب چینل ءِ زانشتی تامر جوڑ کنت کہ اود ءَ کسانیں تامرانی سوج دنت کہ بینجو چون ساز کنگ بیت۔

اُستاد رسول بخش فرید ءِ پجار بلوچستان ءِ مزن نامیں بینجو اُستاد ءُ گشندھانی تہ ءَ کنگ بیت۔ وتی وش تواریں سوت ءُ بینجو سازی ءِ سوب ءَ بلوچستان ءُ بلوچستان ءَ ڈن جھان ءَ ھمک کُنڈ ءَ کہ بلوچ جھمنند اَنت اُستاد ئِے ازم ءِ منوک ءُ ھبناک اَنت۔

بینجو ساز کنگ ءِ درگت ءَ اُستاد رسول بخش فرید ءِ اولی زانشتی تامر ھم شھباز آر بی فرید ءِ یوٹیوب چینل ءَ مروچی شنگ کنگ بیتگ۔

اُستاد رسول بخش فرید ءَ چہ وتی چاروک ءُ دوست داروکاں دزبندی کُتگ کہ ھمے یوٹیوب چینل ءَ سبسکرائب بہ کن اَنت۔

کرونا ءَ گپتگیں مردمانی کَچ بیست ءُ چار ھزار ءُ دو سد ءُ سِی ءُ سَے ءَ سر بیتگ اَنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءَ کرونا ءِ نادراھی گیش بیان اِنت گوستگیں روچ ءَ کورونا نادراھی ءَ دگہ شست ءُ چار مردمانی چارگ ءُ ٹپاسگ ءَ نادراھی ءِ گرگ ءِ پدراھی بیتگ اَنت ءُ نادراہ جاھاں ڈبگ بیتگ اَنت –

دزاپ ءِ میڈیکل سینٹر ءِ سروک ھاشم شھری ءَ گوشتگ کہ روکپتی بلوچستان ءِ جتا جتائیں شھراں کورونا وائرس گیش بیگ ءَ اِنت ءُ بازیں مردمانی چِک ءُ تان بیگ ءَ نہ اَنت –

آئی ءَ گوشت کہ بازیں مردم تنی وھدی نادراہ جاھاں ڈبگ بیتگ اَنت ءُ اشانی تہ ءَ ھپتاد ءُ نہ کس دزاپ ءِ نادراہ جاہ ءَ ڈبگ بیتگ اَنت ءُ آ دگہ بلوچستان ءِ جتا جتائیں شھراں نادراہ جاھانی تہ ءَ اَنت ءُ آیانی دارو درمان بیگ ءَ اَنت –