TBP Balochi

ریاستی چاریگ ملا برکت ءِ سر ءَ بوتگیں اُرش ءِ زمّہ واری ءَ منّ اِیں – میجر گْوھرام بلوچ

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں تربت ءِ دمگ آپسر ءَ نیشنل پاٹی ءِ رھشون ملا برکت ءِ سر ءَ تیرگواری کتگ – تیرگواری ءَ ملا برکت رکتگ ءُ سلاہ بندیں مردم درایگ ءُ روگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ ملا برکت ءِ سر ءَ بوتگیں اُرش ءِ زمہ واری منّ اِتگ ءُ گوشتگ کہ مئے سرمچاراں آدینگ ءِ روچ ءَ پاکستانی پوج ءُ چیریں ادارھانی جوڑ کرتگیں ھندی سلاہ بندیں ٹولی ڈیتھ اسکواڈ ءِ سرکماش ملا برکت سر ءَ تربت ءَ اُرش کتگ بلے آ ریاست ءِ داتگیں بلٹ پروف گاڑی ءِ سوب ءَ اے رند ءَ رکیتگ “بلے پس مات داں کدین ءَ ھیر لوٹ ایت” –

گوھرام بلوچ ءَ دیمتر ءَ گوشتگ کہ یک پاکستانی پارلمانی ٹولی ءِ نیمگ ءَ چہ ریاستی چاریگ ملا برکت ءِ سر ءَ سرمچارانی اُرش ءِ ایر جنگ ءُ ھُکانی پوست ءِ تہ ءَ ٹپتگیں ھُک راجداریں رھشون دروشم ءَ پیش دارگ یک شرمناکیں املے ءِ کرار داتگ ءُ گوشتگ کہ ما زانیں کہ پاکستان ءَ پارلیمانی سیاست کنوکانی نزوری کجام ھم مردم ءُ ٹولی ءِ اوٹانی کچّ اِنت، اگاں کہ آئی ءِ اوٹانی سوب ءَ ھما مردم یا ٹولی ءَ چاگردی بستار بہ بیت، مال ءُ دولت بہ بیت یاکہ سلکاری ءُ ریاست ءِ سرکماشی ءَ چہ رس اِتگیں تاکت ءُ دزرسی ءَ چہ تالان کتگیں ترس ءُ بیم ءَ چہ بہ بیت- وتگڑیں پارلیمانی ٹولیانی ھمے نزوریانی پُشت ءَ سیت چست کنان ءَ ریاست وتی کُمکار ءُ چریکاں سیاسی گلانی توک ءَ دیم دَنت سیاسی دبوکھے آھانی دیم ءَ دنت دانکہ اے راج ءِ سودا جنوک ءُ زِرد ءِ سودا جنوکیں سلکارانی دوتل ءُ دوپوستیاں چیر بہ دنت بلے بلوچ راج ءُ سرمچار اے راج دژمنانی کاراں شرّی ءَ سرپد اَنت-

گوھرام بلوچ ءَ گوشتگ کہ وتگڑیں پاکستانی پارلیمانی ٹولیاں سوَڑگ کنگ لوٹ اِیت کہ آ اے وڑیں راج ءُ ڈیھ ءِ سودا جنوکیں سلکارانی پلّہ مرزی ءَ بلوچ سرمچارانی دیما تچک ءَ اوشت اَنت، بلوچ سرمچاراں ناشرکار گوش اَنت ءُ ریاست ءِ درشان کتگیں گپّاں وتی کن اَنت یاکہ اے ریاستی کُمکارانی راج ءُ چاگرد بدواھیں چست ءُ ایراں چہ دور بنت- اے پارلیمانی ٹولیانی سوڈگ کجام ھم بہ بیت بلے بلوچ سرمچار پاکستانی پوج ءُ چیریں ادارھانی کُمکاراں نشانگ کنان کن اَنت آ تُری نیکراھی ءُ پِرکھانی کُلاہ ءَ سر ءَ بہ کن اَنت یاکہ راجکاری ءِ دبوکہ ءَ بہ بندنت ھر وڑیں سیاسی ٹولی ءِ تھا بہ بنت –

سر بیتگیں ھالانی رد ءَ روکپتی بلوچستان ءِ دمگ زر آباد کنارک ءَ ایرانی لشکر ءَ تیرگواری کرتگ ءُ یک تیل کشیں بلوچ ءِ کُشتگ ءُ دگہ یکے زدگ کرتگ-

بیران بیتگیں مردم ءِ پجار ایوب درکالہ ء در مھمد ءُ زدگ بیتگیں مردم ءِ پجار یاسر درکالہ ء ولی مھمد جھمنند چیلسر دشتیاری ءِ ناماں زانگ بیتگ اَنت-

اھوالکار ءِ گوشگ اِنت کہ ایرانی لشکر ءِ تیرگواری ءَ ایوب ھما جاہ ءَ بیران بیتگ ءُ یاسر زدگ بیتگ، زدگ بیتگیں مردم امام علی نادراہ جاہ چھبار ءَ برگ بیتگ ءُ اود ءَ آئی ءِ جاور نگیگ گوشگ بیگ ءَ اَنت –

بلوچ کمپعن فعالین ءِ گوشگ اِنت کہ ایرانی نوکیں سال ءِ بنداتی ءَ داں انیگ ءَ چِل ءُ شش کس ایرانی لشکر ءِ تیرگواری ءَ بیران بیتگ اَنت کہ آ تیل کشیں مردم بیتگ اَنت –

سیستان ءُ بلوچستان ءَ بندوکیں مردمانی گوشگ اِنت تیل ءِ باپار ءَ ابید دگہ روزگار نیست اے روزگار ءَ ھم مردمانی ساہ ءُ سر زوال بیگ ءَ اَنت –

روکپت ءُ رو دراتکی بلوچستان ھردوکیں ڈیھانی میان ءَ کش اِتگیں لکیر ءَ لس مردم زندگی ءَ زبھر بیان اَنت ھردوکیں نیمگاں آبادیں مردم مرگ ءِ دیمپان اَنت –

نبشتانک: مھلبیں دشت

نبشتہ کار: ھسار بلوچ

دی بلوچستان پوسٹ

اولی رند ءَ کہ منی سر دشت ءِ مھلبیں پُلکاں کپت من ھمے پھم اِت کہ من جنت ءَ آں بیگاہ ءِ وھد ءَ ما کورے ءَ داشت سنگت ءَ وتی لوگ ءَ پون کُت کہ باریں ماھول چون اِنت؟ ما اتکگ ءُ نزیک ءَ جاھے داشتگ مارا شُد ءَ ھم بیوار کُتگ ما سُباھی دپارے باریں وارتگ نہ وارتگ!-

گُڑا لوگیگاں گْوشت ماھول ساپ اِنت بلے دژمن زانگ نہ بنت شُما اینچُک ءَ برداشت کُتگ نوں کمُک ءَ ھم برداشت کن اِت مگرب تھار بیت بیا اِ گُڑا ما نشت ایں کھورے چیر ءَ سنگت ءَ گُشت ھسار تو نند من کا آں سنگت شُت کمو رند ءَ آتک داں چاھے کیتلی یے گون ئے ءُ شکر ءُ چاھی تاک اَنت۔

من گُشت اے تو کُجا آؤورت اَنت! سنگت ءَ گُشت اے مئے ٹکانہ اِنت کمو دیم ءَ چیر داتگ اَنت کہ یکے مہ گند ایت اِش نی من شُت ءُ آؤورت اَنگ کہ مگرب ءِ تھار داں بہ بیت مارا شُد کنس کنت چاھے گراد ایں ور ایں۔

من ءُ سنگت ءَ آس روک کُت ءُ چاھے گراست ءُ وارت داں کمو نشت ءُ گپ ءُ کسّہ کُت مگرب تھار بیت لوگ ءِ ھم پون آتک کہ بیا اِت نی سنگت ءَ کیتلی پد ءَ چیر دات اَنت ءُ پر پَٹ گَزّے توک ءَ کُت ءُ ما در آتک ءُ رھادگ بوت ایں دیم پہ لوگ ءَ-

ما کہ لوگ ءَ رس اِت ایں یک گور ءَ کُڈوے ھست اَت ما پُترت ایں ھمے کُڈو ءَ سنگت شُت لوگ ءَ کمو رند ءَ وت ءُ کستریں برات آتک اَنت گوں آپ ءُ ناناں کہ ما سُھب ءَ لیٹ ءَ پاد آتک ءُ دپارے وارت نوارت وت ءَ کش اِت نو سنگت ھم شُدیگ اَت ءُ من ھم شُدیگ اِتاں سنگت ھیلدار اَت بلے من کدی اے وڑ نہ بوتگ اِتاں۔

گُڑا نان آورت اَنت ئِے ءُ ما نشت ءُ وارت ءُ سنگت ءِ کستریں برات ءَ چاہ آؤورت اَنت ما چاہ وارت بے وھد ءَ دو سنگت آتک ءُ ما سلام دوا بوت ایں سنگتانی واستا شام آؤورت سنگتاں شام کُت داں شپ ءِ یک ءُ دو بیت گُڑا سنگتاں گُشت ما سنگت ءَ زور ایں رو ایں کہ مارا واب ءَ گپتگ اِد ءَ وَ وپسگ نہ بیت۔

گُڑا ما سنگت موکل کُت ءُ دراتک ءُ رھادگ بوت ایں ما شُت ایں سنگتانی پَرپٹ ءِ گور ءَ سنگتاں پَرپَٹ زورت ءُ ما دراتک ایں ما داں کوہ ءَ پُترتیں سے ءُ نیم بیت سنگتاں پَرپٹ جاھے چیر دات ءُ پیادگ ءَ کمو راہ ءَ شتین ءُ سنگت اوشتات اَنت گُشت اِش مئے ٹکانہ ءِ سر ءَ گُش ئے بْرمشے ھست؟ –

سنگتاں جاھے وج کُت ءُ توار کُت اَنت کہ شُما کے اِت دیم ءِ سنگتاں سنگت ءِ توار پجاہ آؤورت کہ وارس تو ئے وارس ءَ گُشت ھو وارس ءَ گُشت اسلم شُما اِت لگّ اِت اَنت کندگ ءَ گُشت اِش ھو ما ایں ما شُت ایں ٹکانہ ءِ سر ءِ سنگتانی گور ءَ رس اِت ایں سلام دوا کُت اَنت-

سنگت داں شامے جوڑ کنگ ءَ اِت اَنت سنگتاں گُشت ما انی آتکگ ایں مارا شُد ءَ کُشت وارس ءَ گُشت شر شُما اڑ کن اِت ور اِت ما وپس ایں کہ مارا واب ءَ بیوار کُتگ گُڑا سنگت پہ شام ءِ جوڑ کنگ ءَ گسی بوت اَنت ءُ ما شُت ءُ وپت ایں ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءَ دو ھلکاں ایرانی چیریں ادارھاں دو کس آوار جتگ ءُ برتگ اَنت –

گیشیں ھالانی رد ءَ روکپتی بلوچستان ءِ تیادپی شھر چھبار ءِ ھند کُمب ءَ گوستگیں روچاں ایرانی چیریں ادارھانی کارمنداں یک مردمے آوار جتگ ءُ برتگ –

آوار جنگ بیتگیں مردم ءِ پجار علی رضا ھوت پنام ءِ اختر ءِ نام ءَ زانگ بیتگ ءُ ھالانی تہ ءَ گوشگ بیگ ءَ اِنت کہ علی رضا ھوت ھمراہ ءِ پَرپٹ ءَ چیریں ادارھاں آوار جتگ ءُ برتگ کہ تنی وھدی آئی ءِ بارہ ءَ دگہ ھچ ھال نیست اِنت –

ھمے وڑ ءَ سرباز ءَ ایرانی لشکر ءَ بیڑ برتگ ءُ یک مردمے آوار جتگ ءُ برتگ –

ھالکار ءِ رد ءَ سرباز ءِ ھند میناب باتک ءَ ایرانی لشکر ءَ یک لوگے ءَ بیڑ برتگ ءُ یک مردمے آوار جتگ ءُ برتگ –

آوار جنگ بیتگیں مردم ءِ پجار اویس ھسین زئی ءِ نام ءَ زانگ بیتگ، ھالانی تہ ءَ گوشگ بیتگ کہ ایرانی لشکر ءُ دمگدار ءِ ھمراھی ءَ پرمان کرتگ ءُ اویس ھسین زئی ءِ زمینانی سر ءَ یک بنجلے جوڑ کن ایں چریشی ءِ پشدر ءَ اویس ءَ گوشتگ کہ ما وتی زمینانی سر ءَ بنجل جنگ ءَ نئیل اِنت –

ھالکار ءِ گوشگ اِنت دمگدار ءَ گوشتگ کہ اویس ھما وھد ءَ یل کنگ بیت اے زمین سرکار ءِ نام ءَ کنگ بیت اِنت –

گیشیں ھالانی رِد ءَ کیچ تربت ءَ میرانی ڈیم دگ ءِ سر ءَ گاڑی ءِ ٹکر ءَ یک مردمے بیران بوتگ – بیران بوتگیں مردمے پجار اکرم مندوست ءِ نام ءَ زانگ بوتگ –

شال ءَ دگ ءِ وئیل ءَ یک مردمے بیران بیتگ –

اھوالکارانی رِد ءَ شال ءَ سریاب دگ موسی کالونی نزیک ءَ لوکل بس ءِ ٹکر ءَ موٹر سیکل سوار ءِ بیران بوتگ –

سبی ءَ تیرگواری ءِ وئیل ءَ یک مردمے بیران بوتگ –

ھالانی رِد ءَ سبی ءِ دمگ تلی لیویز تھانہ ءِ نزیک ءَ محمد اکبر سیلاچی نامیں مردمے ءَ وتی ناکو محمد بخش سیلاچی تیرانی آماچ کتگ کُشتگ ءُ وت تتکگ ءُ شُتگ –

وئیل ءِ ھال ءِ سربوگ ءَ دمگی لیویز ءَ وت ءَ وئیل جاہ ءَ سر کتگ لاش دست گپتگ سول ھسپتال ءَ سر کتگ، اژدری چار ءُ ٹپاس ءَ پد لاش کھول ءِ ھوالگ ءَ کنگ بوتگ – ھمے گوشگ بوھگ انت کہ وئیل سانگبندی ءِ جیڑہ ءِ سر ءَ ودی بوتگ-

ھب ءَ لوگے ءَ زالبولے ءِ جون دست کپتگ –

ایدھی ءِ رِد ءَ ھب ساکران دگ ءِ نزیک ءَ لوگے ءَ زالبولے ءِ جون دست کپتگ کہ آئی ءِ گُٹ ءَ ساد ءِ لوپ بوتگ – زالبول ءِ اُمر سی ءُ سَے سال انت ـ وئیل ءِ درگت ءَ پولیس ءِ گیشیں پٹ ءُ پول برجاہ انت لاش کھول ءِ ھوالگ ءَ کنگ بوتگ –

تربت ءَ ڈینگی نادراھی ءَ ورنایے بیران بوتگ –

ھالانی رِد ءَ گوستگیں روچاں راشد ء فقیر نامیں ورنایے تپ ءَ گپتگ، نادراھجاہ ءَ برگ ءَ بوتگ ڈاکٹرانی گوشگ ءِ رِد ءَ آئی ءَ ڈینگی تپ بوتگ، پہ گیشیں جاندراھی ءِ ھاتر ءَ آئی ءِ کھول ءِ مردماں ورنا زرتگ ءُ دیم پہ کراچی ءَ رؤگ ءَ بوتگ انت کہ نیم راہ اورماڑہ ءَ ورنا بیران بوتگ –

یکیں درد، یکیں دژمن ءُ یکیں رکّگ ءِ راہ ءَ بلوچ ءُ سندی بندری یکجاہ کرتگ اَنت، دوئیں ایردستیں راجانی پُرایمنیں جھد ءَ یکجاھی بوگ المّی انت – ماما قدیر

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چارھزار ءُ سَے سد ءُ بیست ءُ یک روچ سرجم بوتگ – چہ لاڑکانہ ءَ سیاسی ءُ چاگردی باسک صدام جتوئی، خاور محمد جنید جتوئی ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ سندیانی وتی راجی پجار ءُ زمین ءِ سما ھاکمانی وش گمانیانی بگیری ءَ پُرایمنیں جھد ءِ تہ ءَ گیشی گندگ آیگ ءَ انت ھنچو بلوچ پُرایمنیں جھد ءَ پرزندانی یل کنائینگ ءِ بندری سان ءَ وتی املی ءُ مھکمیں درشان ءِ ھاتر ءَ ھوسلہ بکش اتگ –

آئی ءِ گوشگ ات کہ یکیں درد، یکیں دژمن یکیں رکّگ ءِ راہ ءَ بلوچ ءُ سندی یکے دومی ءِ بندر ءَ یکجاہ جوڑ کرتگ انت ھمیشی ءِ پشدر ءَ دؤئیں ایردستیں راجانی پرایمنیں جھد ءِ تہ ءَ یکجاھی امل پیدا بوگ الّمی انت – ھما جُرم بلوچ کتکار گوشگ بوتگ اَنت ھما جرم ءِ سبب ءَ تپر سندیانی گردن ءَ ھم، پیش ءَ بلوچ ماورائے کانود اوارجنی، کشت ءُ کوش ءُ بیگواھیں مردمانی زانگولیں جونانی دروشم ءَ چکچینی شکار اَت نوں ھمے زوراکی سندیانی سر ءَ جوڑ کنگ بوتگ –

آئی ءَ دیمتر ءَ گوشتگ کہ بلوچانی وڑ ءَ سندی ھم شری ءَ سرپد انت ءُ زان انت کہ اے زوراکیاں کَے ءُ پرچا کنگ انت بلے ایوک ءَ بلوچ سندی پرچا نوں سرجمیں دنیا ءِ سلوات کنگ انت کہ پاکستان ءِ ریاست تاکت وتی نوک آبادی مفاد ءُ ھستی ءَ چہ ترسگ ءَ انت وتی زوراکی ءَ کنگ انت –

نبشتانک: بلوچ ءِ گیرت ءُ ننگ

نبشتہ کار: مھم جان گُل

دی بلوچستان پوسٹ

من وت ءَ جُستانی تہ ءَ بُکّ دات ءُ کشّ اِت کہ من کے آں؟ منی پجّار چِی اِنت؟ چوشیں باز جُست من گوں وت ءَ کُت، بلے من ءَ پسّو یکّے ھم نہ رس اِت پرچا من ءَ اِنچو ھاٹیگ مان نیست اَت کہ من جُستانی پسّوھاں دات بکن آں ، چی ءَ کہ من وت زانگ ءَ نہ اِت آں کہ من کے آں؟-

نا من زانگ ءَ اِت آں کہ من کے آں ، بلے ھاٹیگ مان نیست اَت کہ بِہ گْوش آں من کے آں پرچا کہ من اگاں بِہ گْوش آں کہ من پدمنتگیں چاگردے ءِ تہ ءَ رُستگ ءُ مزن بیتگ آں ، گُڑا اِد ءَ من یک گُلام ءُ لگتمالیں راجے ءِ بستار ءَ زانگ بَہ آں۔

من یک بلوچے آں ، منی گیرت ، منی ننگ ءُ شرپ ءِ سر ءَ زندگی ءَ کس ءَ لنکُک چست نہ کُتگ ، بلے مرچی ھمے ننگ ءُ شرپ دژمن ءِ دست ءَ اِنت گوں اے دردناکیں جاوراں گُڑا من وتی جند ءَ چار اِت نہ کن آں کہ یک گُلامیں راجے ءِ بِستار ءَ وتی جِند ءِ سرڈگار ءِ دامُن ءَ روچ پہ روچ درامد بُوَگ ءَ آں ءُ منی گیرت ، ننگ ءُ شرپ دُژمِن ءِ پوجی بوٹانی چیر ءَ لگتمال بُوَگ ءَ اِنت منی مات ءُ گوھارانی سلھیں شار دژمن ءَ چاک چاک کُتگ ءُ منی زُبان انگت ءَ گُنگ اِنت ، پہ وتی ھَکّ ءَ گپ جت نہ کن آں دست مُنڈ اَنت وتی راج ءِ بزّگی ءُ دُژمن ءِ زوراکیانی سر ءَ نبشتہ کت نہ کن آں، گُڑا من چوں جُستانی پسّھاں دات کن آں کہ من کَے آں؟-

تو بِہ گْوش منی دردواریں دوزواہ! چوشیں زند ءَ من چون کن آں کہ ماتانی آہ ءُ کوکاراں مہ مار آں ،  چوشیں زند ءَ چوں کن آں کہ منی دیم ءَ منی گیرت درآمد ءِ دست ءَ ءُ من ھچ کُت کنگ ءَ نہ آں بلے! نوں جُستانی پسّو دَیگ لوٹ اَنت کہ من بلوچے آں ءُ من ءَ یک دژمنے ھست کہ آئی منی گیرت ءِ سر ءَ اُرش کُرتگ من ءَ وتی گُلام ءُ ایردست ءِ کُتگ ، منی پجّار ، منی نام ءُ نشان ءَ گار کنگ لوٹ اِیت گُڑا تو وتی چاریں آتراپاں چَکُ بجن ءُ بچار کہ چینچو بے وسیں پِت گندے کہ وتی گیرت ءِ پھازگ ءَ مَرگ ءَ امبازاں زُور اِیت؟-

تو چینچو برات گندے کہ پہ راج ءِ وشیں باندات ءَ وتی نُگرھیں سراں کُربان کنگ ءَ اَنت؟ تو چینچو شیرزالیں مات گندے کہ وتی تاسُپیں بچّاں دست بڈُ ءَ جن اَنت کہ بُرو ماتیں زمین ءِ ھَک ءَ اَدا بکن؟ نوں جُست ءِ پسّو کہ من ءَ رس اتگ جُنزگی اِنت، چی ءَ کہ جُنز زِندگی اِنت۔ اگاں نا گُلامی مارا پہ ابد گار ءُ بیگواہ کنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ اسٹوڈنٹس ایکش کمیٹی ھب ءِ نیمگ ءَ ” نوشت ” ءِ وانشت ءِ دیوان ءِ اڈ دیگ بیتگ، دیوان بنزہ ءِ سروک فراز بلوچ ءِ سروکی ءَ برجم دارگ بیتگ، دیوان ءِ بندات بنزہ ءِ ڈپٹی آرگنائزر اھسان بلوچ ءَ کرتگ –

دیوان ءَ زانت ءُ زانشت ءِ سرھال ءِ یاسر جی ایم ءِ نبشتانک، راجداری ءِ باسکی ڈبہ ءَ دگہ سرھالانی سر ءَ گپ ءُ تران بیتگ –

دیوان ءَ یاسر جی ایم ءِ نبشتانک ءِ سر ءَ شرگداری کنگ بیتگ ءُ آئی ءِ تہ ءَ نبشتگ کرتگیں ھیال ءُ گپ دیوان ءَ پریچگ بیتگ اَنت، اشاں ابید دیوان ءَ ھمے نبشتانک ءِ تہ ءَ نبشتگیں جُست ھم گوشگ بیتگ اَنت –

دیوان ءَ نبشتانک ءِ تہ ءَ نبشتگ کرتگیں بنیاتی جُست ءُ پرسانی سر ءَ درساں وتی لیکھانی سر ءَ ھیال درشان کرتگ اَنت ءُ نبشتانک ءِ تہ ءَ بیتگیں زانشت ءِ تہ ءَ گپ ایر کنگ بیتگ اَنت، راجداری چی ءَ اژدری اِنت؟ گل پرچا جوڑ کنگ بنت؟ –

راجداری چاگرد ءِ لوٹانی واستا چی ءَ اژدری اِنت آ پہ چاگرد ءَ چی پیلو کُرت کنت، راجداری چاگرد ءِ لوٹ ءُ مول ءُ مرادانی واستا کنگ بیت اِنت ادارہ یا گل چندے ھاسیں مردم یکجاہ بنت یک جوانیں مول ءُ مرادے ءَ جھد کن اَنت –

دیوان ءَ بھر زیروکیں باسکاں تران کنان ءَ گوشت کہ یک راجداریں گلے ءِ باسک ءَ بنیاتی ڈبہ بیت اِنت آ وتی گل ءِ روشت ءُ گل ءِ دیوان ءِ نیاد، رھبندانی زمہ واریاں پیلو بہ کنت –

چریشاں ابید دیوان ءَ دگہ سرھالانی سر ءَ ھم گپ ءُ تران بیتگ کہ آیانی سر ءَ راجداری جیڑہ ءُ زاتی جیڑھانی سر ءَ گپ بیتگ –

آیاں گوشت کہ راجداریں باسکے ءَ گل ءِ روشتانی ھیال دارگی اِنت گل ءِ دیمروی ءُ ترومبشت راجداری ءِ یک بلاھیں کردے بیت کُت کنت، دیوان ءَ گپ ءُ باوست بیت کہ راجداری گلانی تہ ءَ راجداری ءُ راجداری جیڑھانی سر ءَ تپاوت ءِ زانگ المی اِنت –

دیوان ءَ نبشتانک ءِ میان ءَ ادارہ ءِ زمہ واری سر ءَ گپ ءُ تران بوت کہ ادارہ ءِ بنداتی مول ءُ مراد وتی نیادگشت ءُ وتی لیکھانی سر ءَ ھچ وڑ ءَ چَک ءُ پد بیگی نہ اِنت ءُ اشی ءَ ھوار وتی باسکانی راجداری، زانشتی، ساچشتی، ازمی ءُ لیکھی ھُنر ءَ بہ بیت اِنت –

ھمے وڑ ءَ گل ءِ تہ ءَ سنگتی ءِ سان ءِ ارزشت گوشگ بیتگ کہ سنگتی ءِ سان زانت ءُ زانشت ءِ گل ءِ تہ ءَ یک جوانتریں سانے ءَ بیت کُت کنت –

گُڈسر ءَ دیوان ءَ گوشگ بیت کہ جمھوری گلے ءِ تہ ءَ نگد ءِ ارزشت، وت نگدی ءِ ارزشت ءُ راجداری ءِ گپ ءُ ترانانی ھلاسی ءَ دیوان آس کنگ بوت –

بلوچستان ءِ سیمسری شھر چمن ءَ مرغی بازار ءَ بمب تراکے ءَ کساس چہ کساس شش مردم بیران ءُ بازیں کچے ءَ زدگ بیتگ اَنت –

ھالانی تہ ءَ گوشگ بیتگ کہ تراک پرپٹے ءَ بندوک بیتگ، تراک ءَ بازیں دکانے ءَ اسر کپتگ ءُ چریشی ءَ بازیں مردمے ھم زدگ بیتگ اَنت زدگ بیتگیں مردم نادراہ جاہ ءَ سر کنگ بیتگ اَنت –

تراک یک ھنچیں وھدے ءَ کنگ بیتگ کہ اود ءَ جمعیت ءِ نیمگ ءَ فلسطین ءِ روانک کشگ بیتگ کہ اود ءَ مردماں واتر کرتگ روگ ءَ بیتگ اَنت ءُ تراک بیتگ –

تراک ءَ پد سیکورٹی فورسز ءَ دمگ انگیر ءَ کرتگ ءُ بازار ءَ مردمانی رو ءُ آ بند کرتگ –

ڈانڈار ءَ پاکستانی پوج ءِ پانگس سرا دو نیمگ ءَ اُرش کتگ ءُ جانی مالی تاوان داتگ – میجر گوھرام بلوچ

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں کیچ ءِ دمگ ڈانڈار پاکستان ءِ پوجی پانگس ءِ سر ءَ اُرش کتگ، اُرش ءَ پاکستانی پوج ءَ جانی مالی تاوان رس اتگ، سلاہ بندیں اُرشکار درایگ ءُ رؤگ ءَ سوبین بوتگ انت –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تھا اے اُرش ءِ زمّہ واری منّ اِتگ گوشتگ کہ مئے سرمچاراں پنچ شمبے ءِ بیگاہ ءَ ڈنڈار کور ءَ برجاھیں پاکستانی پوج ءِ پانگس سرا دو نیمگ ءَ گوں راکٹ ءُ مزنیں سلاھاں گوں اُرش کتگ ، پانگس ءِ سر ءَ دونیمگی اُرش ءَ زورگیریں پوج ءَ جانی ءُ مالی تاوان بوتگ-

آئی ءَ گوشتگ کہ زورگیریں پوج ءِ سر ءَ اُرش ایر دستیں بلوچستان ءِ آجوئی ءَ تاں برجاہ مان انت-