TBP Balochi

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ آماچ بوتگیں شست ءُ شش دگہ نوکیں کیس دیم ءَ اتکگ اَنت ءُ اے وھد ءَ کرونا وائرس ءَ آماچ بوتگیں درسیں مردمانی کچ بیست ءُ چار ھزار ءُ پنچ سد ءُ ھشتاد ءُ سَے ءَ سر بوتگ اَنت-

جاندراھی ءِ بنشون ءِ نیمگ ءَ چہ شنگ بوتگیں رپورٹ ءِ رِد ءَ گوستگیں روچ ءَ یکشمبے ءَ بلوچستان ءِ تہ ءَ یک ھزار ءُ دوسد ءُ پنجاہ ءُ چار مردم کرونا وائرس ءِ ٹیسٹ کنگ بوتگ اَنت کہ آھانی تہ ءَ شال ءِ چل ءُ دو ، لورلائی ءَ یانزدہ، نوشکی ءِ چار، مستونگ ءَ سَے، چاگی ءَ ھم سَے، ھزدار ءَ دو ءُ لسبیلہ ءَ یک مردمے کرونا وائرس آماچ بوتگ انت- وھدیکہ دو سد ءَ سی ءُ ھشت مردمانی رپورٹ دنیگت ءَ نہ اتکگ اَنت – چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ بیست ءُ چار ھزار ءُ پنچ سد ءُ ھشتاد ءُ سَے ءَ سر بوتگ اَنت-

رپورٹ ءِ رِد ءَ گوستگیں بیست ءُ چار ادارانی میان ءَ یک سد ءُ شانزدہ مردم وش بوتگ اَنت، وش بوتگیں مردمانی کچ نوکیں کیساساں ھوار سرجمی ءَ بیست ءُ سَے ھزار ءُ سَے سد ءُ چل ءُ ھپت انت-

رپورٹ ءِ رِد ءَ بلوچستان ءِ تہ ءَ کرونا وائرس ءِ نُہ سد ءُ شست ءُ شش نادراہ ھست انت ءُ آھانی تہ ءَ بیست نادراہ بلوچستان ءِ دگہ دگہ نادراھجاھاں ہائی آکسیجن فلور ءِ تہ ءَ الاج انت، وھدیکہ جھانی وبا کرونا وائرس نادراھی ءَ دو سد ءُ ھپتاد مردم بیران بوتگ اَنت –

رپورٹ ءِ رِد ءَ بلوچستان ءِ تہ ءَ جھانی وبا کرونا وائرس گیش تالان بوگ ءِ پنچ بما بیست ءُ شش درسد انت –

سربوتگیں ھالانی رِد ءَ بلوچستان ءِ دمگ دکی ، شال، پشین ءُ کوسٹل ہائی وے دگ ءُ دگہ وئیلاں نُھ مردم بیران بازینے ٹپی بوتگ اَنت –

گیشیں ھالانی رِد ءَ دُکی ءَ دو ٹولیانی میان ءَ جنگ ءُ چوپ ءَ یک مردمے بیران پنچ ٹپی بوتگ اَنت-

لیویز ءِ رِد ءَ بیران بوتگیں مردم ءِ پجار عبداللہ خان ء طور خان جھمنند بنی کوٹ نام ءَ چہ بوتگ ٹپی بوتگیں مردمانی تہ ءَ سَے مردمانی پجار رضا خان، زرغون، اسلم ء اکبر جھمنند جھالار ءِ نام ءَ چہ بوتگ انت –

لیویز ءَ ٹپی ءُ بیران بوتگیں مردم سول ھسپتال ءَ سر کتگ ءَ وئیل ءَ ھواریں مردم لیویز ءَ دزگیر کرتگ اَنت-

ھمے وڑ پشین کلی گا نگلزئی ءَ آروسی مراگشے ءَ تیرگواری ءَ چہ دوازدہ سالی ئیں گونڈو ءِ بیران ءُ یکے ٹپی بوتگ –

بیران بوتگیں گوندل ءِ پجار محمد اصغر جان ءِ نام ءَ چہ بوتگ – لاش ءُ ٹپی بوتگیں مردم ھما دمان ءَ دمگی نادراھجاہ ءَ اود ءَ اژدری چار ءُ ٹپاس ءَ پد کھول ءِ ھوالگ ءَ کنگ بوتگ اَنت –

ھالانی رِد ءَ گوستگین روچ ءَ سبی ءِ دمگ بختیار آباد ءِ نزیک ءَ شیخوپورہ ءَ چہ شال ءَ رؤکیں گاڑی ءَ مچ بولان ءَ چہ سبی ءَ رؤکیں پرپٹ ءِ ڈیکر کتگ – ڈیکر کنگ ءِ سبب ءَ زالبولے ءَ ھوار سَے مردم بیران بوتگ اَنت دو ٹپی بوتگ – بیران بوتگیں مردمانی پجار ھیا بی بی، صاحب خان ءُ شمس علی جان ءِ نام ءَ چہ بوتگ انت- بیران بوتگیں مردم بولان ءِ دمگ مچ ءِ جھمنند انت وئیل ءَ بیران ءُ ٹپی بوتگیں مردم پولیس ءَ نادراھجاہ ءَ سر کتگ انت –

دگہ وئیل ءِ مکران کوسٹل ہائی ءَ دیم ءَ اتکگ کہ وئیل ءَ سَے مردم بیران چار ٹپی بوتگ اَنت –

ھالانی رِد ءَ اُتھل ءَ چہ چل کیلومیٹر دیر مکران کوسٹل ہائی وے ءَ لیاری رضو ہوٹل ءِ نزیک ءَ گاڑی ءِ چپی بوتگ – وئیل تیز رؤگ ءِ سبب ءَ دیم ءَ اتکگ وئیل ءَ سَے مردم بیران ءُ چار ٹپی بوتگ اَنت – بیران بوتگیں مردمانی پجار روبیل ء نعیم، اریض ء اشرف، فھاد ء سلطان ءُ ٹپی بوتگیں مردمانی تہ ءَ محمد سلیمان، محمد عمر، شھباز، احسان ءُ اسامہ ھوار انت –
پولیس ءِ رِد ءَ وئیل تیز روگ ءِ سبب ءَ دیم ءَ اتکگ اے مردم کراچی ءِ دمگ نیو کراچی مدینہ کالونی نندوک انت کہ کنڈ ملیر ءَ سیل ءُ سواد ءَ پد واتر کراچی ءَ روگ ءَ بوتگ انت –

شال ءَ کار کنگ ءِ میان ءَ دیوال کپگ ءَ یک مردمے بیران بوتگ-

ریسکو ءِ رِد ءَ گوستگیں روچ ءَ شال بائی پاس ءَ بوسہ منڈی ءِ دمگ ءَ طاھر ء حاجی عمیر خلجی دیوار ءَ چیر تریتگ ءُ بیران بوتگ – آئی ءِ جون نادراھجاہ برگ بوتگ اژدری چار ءُ ٹپاس ءَ پد کھول ءِ ھوالگ ءَ کنگ بوتگ –

آزمانک: جون

آزمانکار: بلال بھار

دی بلوچستان پوسٹ

من ترا گُشگ ءَ آں, او ترا، ترا چیزے وھد بیت کہ تو وت ءَ چہ بے آشنائے،تئی بے آشنائی ءَ اگاں من نامے دات بہ کُتیں گُڑا الم من نام ئِے داتگ اَت زان ئے چے ؟ وتی جِندے کاتل (کُشوک)ھو تو وتی جند ءِ زمیر ءِ کاتل ئے تو وتی زمیر کُشتگ، تو من ءَ کُشتگ ترا گپے جست بکناں؟ من زاناں کہ تو اے جُستے پسہ ءَ وت ھم نہ زان ئے بلے اے جُست منی دل ءِ سر ءَ ایر اِنتءُ لوٹاں کہ ترا جُست ئِے بکناں؟ تو اگاں جواب مہ دے ئے ، من ءَ چہ تو جواب ءِ اُمیت ھم نیست اِنت تو ھما اِنت کہ وت ءَ چہ من سستگ ءُ ھما انت کہ منی جون ماں زمین ءَ کل کُتگ، کمو بژنیگ بوتگ ئے؟ تو جیڑ اتگ کہ من تئی اندر ءِ مردم بوتگاں تئی شری ءُ ھرابیانی بابت ءَ ترا شون داتگ ترا چہ بدیں کار ءُ اِلتاں مکن کُتگ من ءَ ھچ گلگ نیست کہ تو من ءَ کُشتگ, من بس ترا ھمے گُشگ لوٹاں کہ تو وتی جِند ءِ راستی کُشتگ ءُ تو وتی اندر ءِ شری کل کُتگ, تو وتی زمیر کُشتگ نو تو من ءَ بگیر یک رسترے ءَ ھچ نہ لیک ئے؟ ھو رستر تئی تہ ءَ انسان بوھگ ءِ ھچ چیز نیست ھچ کہ ھچ تو جناورے ئے۔

من انوں یک روچے ھمے بابت ءَ یک وابے دیست, تو یک مسیتے ءِ دپ ءَ چہ گوزگ ءَ بہ ئے مسیت ءِ دپ ءَ چہ ترا مسیت ءِ مُلا توار پِر جنت او ورناہ, ورناہ اِد ءَ بیا تو مُلاہ ءِ نیمگ ءَ رھادگ بے,ملا ترا جُست کنت کُجا روگ ءَ ئے تو پسہ دے ئے کہ میر ءِ بازار ءَ ملا ترا پد ءَ جست منی یک کارے کن ئے گوں۔؟تو گوش ئے جی واجہ بہ گش وتی کار ءَ مُلا یک جونے دنت بہ زاں لاشےدانت ءُ گُش ایت کہ اے جون ءَ میر ءِ بازار ءِ مُلاہ ءَ بہ دے ءُ بُگش ئِے کہ اے جون ءَ جنازہ بدے ءُ ھمود ءَ کل ئِے کن، بگش اِش کہ مئے میتگ ءِ قبرستان ءَ جاگہ نیست، تو ھیران بہ ئے بلے ھچ گُشت نکن ئے، تو ھمے جون ءَ بڈ ءَ کن ئے ءُ رھادگ بے دیم پہ میر ءِ بازار ءَ,جون سک گران بیت تو نیم راہ ءَ سر نہ بئے کہ دم برے ءُ تئی تیوگیں گُد ھید ءَ میچل بنت ءُ تو ھید ءَ چہ جان شود بے, جون ءَ ایر کن ئے پہ دم ءِ بالا کنگ ءَ ھمے دمان ءَ تئی دیم ءَ چہ یک مردے گوازگ ءَ بیت, تو مرد ءَ وتی دم برتگیں توار ءَ گوں توار پِر جن ئے ءُ گش ئے بیا اِے جون ءَ بگر گوں من سک دم بُرتگ مرد تئی نزیک ءَ کیت ءُ ترا جُست کنت اے جون چہ کُجا زُرتگ تو، تو ملاہ ءِ تیوگیں کسہ ءَ ھمے مرد ءِ کِرءَ کن ئے مرد ترا روک روک ءَ چار ایت ءُ گُش ایں اے جون ءَ من بڈ ءَ کُت نکناں, من وتی گُڈسر ءَ دست ء وت برباد نکناں اے جون سکیں بد کرداریں مردمے ءِ جون اِنت کہ ترا گون اِنت, اے مرد ءَ زندگی ءَ پہ وت یک شریں کارے نہ کتگ نہ کہ پہ دگراں, اے مرد یک قاتلے (کشوک) اِیشی ءَ وتی جِندے زمیر کُشتگ, اِشیا مردم گوزگ ءَ نیشتگ ایشی ءَ وتی میتگ ءِ جنینانی سر ءِ گُشان دور کُتگ اَنت, منا پھل کن گوں من اے کُنٹ بڈ ءَ کنگ نہ بیت –

مرد ھمے گپاں جنت ءُ پہ وت روت ءُ وتی دیم ءِ ایریں جون ءَ روک روک ءَ چار ایت ءُ جیڑ ایت کہ اے چونیں مردے ءِ جون اِنت کہ اِیشی ءَ پہ کوپگ دیگ ءَ کس نیست؟ جون ءَ پد ءَ بڈ ءَ کن ئے ءُ دیم پہ میر ءِ بازار ءَ رھادگ بئے پد ءَ نیم راہ ءَ سر بئے ءُ سک دم بر ئے تو وتی بڈ ءِ جون ءَ جَل ءَ ایر کن ئے ءُ جیڑے کہ اے جون ءَ نو من چتو میر ءِ بازار ءَ سر بکناں ساھتے ءَ پد تو جون ءَ زور ئے ءُ گِرّان کن ئے تو چہ ھید ءَ جان شود ئے ءُ ایسک ءُ امپان ءِ نیم راہ ءَ سر بئے ءُ پُشت ءَ چک جن ئے ءُ چار ئے کہ اسپیتیں کفن (مردگ ءِ پوشاک) تیوگ ءَ ھون ءَ چہ سور سور اِنت ءُ جون ءِ گِران کنگ ءِ ٹپاں زمین ءِ سر ءَ یک دراجیں ھونے ءِ لکیر ے کش اِتگ تو جلدی جلدی جون ءَ چہ دست ءَ یلہ کن ئے ءُ دور دے ئے ءُ دستاں سر ءَ کن ئے ءُ نندےگوں وت ءَ گپ کن ئے گُش ئے اُفففف اللہ اے چونیں آزابے کہ منی سر ءَ کپتگ ساھتے ءَ پد تو پاد کائے ءُ جون ءَ وتئ کوپگ ءَ کن ئے ءُ رھادگ بہ ئے نیم راہ ءَ سر بئے پد ءَ مردے ترا دپ کپ ایت مرد ترا گِند ایت ءُ روک روک ءَ چارگ ءَ لگ ایت ،تو مردے نزدیک ءَ رو ئے ءُ تو لوٹ ئے کہ گپ ئِے بکناں گوں بلے مرد پیسر ءَ وتی دپ ءَ پچ کنت “ترا کے ءَ گُشتگ کہ اے بد کردار ءَ کوپگ بہ دے اِش تئی چے اِنت کہ تو چو مجبور بُوتگ ئے پہ اِشی ءِ کوپگ دیگ ءَ تو مرد ءَ جُست کن ئے زاناں اِشیا ءَ چون اِنت کہ تو چُش گُشگ ءَ ئے؟ زاناں اے مرد ءَ چے کُتگ؟ مرد پد ءَ وتی گپاں بِنا کنت ءُ گُشگ ءَ لگ ایت اے مُرتگیں مرد ءَ وتی وھد ءَ سک باز زلم کُتگ اِیشی ءَ شپانی نِسپ ءَ دگرانی لوگ ءَ دور کُتگ ءُ دُزی کُتگ مردم کُشتگ جنین آدم کُشتگ اَنت اے انسانے نہ بوتگ اے رسترے بوتگ جناورے بوتگ اِیشی ءَ وتی جِندے زمیر کُشتگ ھو اے جناورے بوتگ ھمئے گپاں گوں مرد دگہ گپ گوش ندار ایت ءُ پہ وت رھادگ بیت, من ھم جون ءَ بڈ ءَ کن آں ءُ پہ وت رھادگ باں دیم پہ میر ءِ بازار ءَ وھدے من میر ءِ بازار ءَ سر باں تیوگیں گُد چہ ھون ءَ پُر بنت ءُ ھید ء بدل ءَ چہ ھون ءَ میچل ات اَنت من وھدے میر ءِ بازار ءِ مسیت ءِ دپ ءَ ھوشتات آں ءُ مُلاہ ءَ چہ مسیت ءَ توار پِرجت مُلا او مُلا مُلاہ کیت بلے ترا گِند ایت ءُ ھوادگیں بِچکنیدے چہ مُلایے لُنٹاں درائی دنت ءُ اے بِچکند ءَ گوں ھیران بیت ءُ ھبر ءَ بِنا کنت۔

واجہ اے من ءَ مئے بازار ءِ مُلاہ ءَ داتگ “گُشتگ ئِے کہ مئے بازار ءِ قبرستان چہ قبر ءَ پُر انت جاگہ نیست” اِیشی ءَ وتی قبرستان ءَ جنازہ بہ دے ات ءُ پد ءَ کل ئِے بہ کن اِت گوں مُلاہ تئی گپ ءَ گُوش داریت ءُ درائینت ورناہ قبرستان ھست بلے اے جون ءَ مُلاہ جنازہ دیگ نہ لوٹ ایت ءُ اے مُلاہ ءِ میار نہ اِنت پرچا کہ من ھم جنازہ دات ئِے نہ کن آں ، تو چو کن اے جون ءَ شے یے بازار ءِ مُلاہ ءِ کِر ءَ بر اِیشی ءَ تھنا ھما جنازاہ دات کنت مئے گوما نہ بیت ھمئے گپاں گوں شے یے بازار ءَ رھادگ بوت آں۔

بلے سک دم بُرتگ ءَ نیم راہ ءَ سر بوت آں درچکے دیست وت ءَ پہ دراچک ءِ ساھگ ءَ سر کُت،منی نُک ھشک اَت من درچک ءِ چیر ءَ نشت آں ءُ جیڑگ ءَ لگ ات آں کہ اے چونیں مردمے کہ اِیشی ءِ جنازاہ دیگ ءَ کس ساڑی نہ اِنت, من جیڑ اِت کہ اے بد کرداریں مرد چے رنگیں مردے کہ اِشی ءَ قبر ءِ ایر دیگ ءَ پہ کس تیار نہ اِنت ھمے جیڑگاں گوں مرد ءِ ھونی ئیں کفن ءَ پچ کت ءُ دیم چار اِت، دیم ءِ چارگ ءَ گوں من ھُشک ءُ ھیران بوت آں مرد ءِ دیم ءِ پوست لُڑ اِتگ اَت˝ دیم ئِے چہ ھون ءَ پُر اَت مرد ءِ دپ پچ اِنت ءُ للک ئِے در اتکگ اَت ˝ھمے ندارگ ءِ چارگ ءَ گوں من کوکار کت ءُ زار زار ءَ گریوگ ءَ بِنا کت ءُ وتی دیم تر اینت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بے آپے ءِ ھلاپ ءَ زالبولانی بازیں کچے دگانی سر ءَ اتکگ اَنت ءُ شھر ءِ دکان اش بند کتگ اَنت ءُ مکران کوسٹل ھائی ءِ آ آئی مھتل اش کرتگ –

زھرشانی کنوکانی گوشگ اِنت جیونی ءَ بازیں ماھاں آپ بند اِنت چریشی ءِ سبب ءَ ترندیں گرم ءَ مھلوک تُن ءِ پروشگ ءَ درپہ در اَنت –

زھرشانی کنوکاں گوشت: جیونی ءَ آپ ء ڈُکال ءِ جیڑہ بازیں وھداں برجاہ اَنت بلے مھکمہ پبلک ھیلتھ، دمگ ءِ انتزامیہ، ھستیں نمائندگ، اُستانی سرکار آپ ءِ جیڑہ ءِ گشینگ ءَ دل ءُ ستک نہ اِنت آیاں جیونی ءِ شھریانی جیڑہ ءُ مشکلانی ھچ سما نیست اِنت ءُ نانکہ سَدکیاں جیونی ءِ مھلوک ءَ تسلہ دیگ ءَ اَنت –

آیاں گوشت اے وھد ءَ جیونی ءِ مھلوک آپ ءِ واستا سکیں مشکل ءُ جیڑھانی دیمپان اَنت –

زھرشانی کنوکاں گوشت کہ تُنیگیں مھلوک ءَ نِی گیش چکاس مہ کن اَنت ءُ سرجمی ءَ جیونی ءُ کش ءُ گوراں آپ سر بہ کن اَنت –

زانگ بہ بیت جیونی ءَ آپ ءِ واستا گوستگیں روچاں ھم زھرشانی کنگ بیتگ اَنت –

بلوچستان ءِ دمگ کیچ ءِ ھند تمپ گومازی ءَ سر بیتگیں ھالانی رد ءَ گوستگیں شپ ءَ پاکستانی لشکر ءَ بیڑ برتگ ءُ نُھ کس آوار جتگ ءُ برتگ –

دمگی مردماں ٹی بی پی ءَ گوں گپ کنان ءَ گوشتگ کہ گوستگیں شپ ءَ پاکستانی پوج ءَ گومازی ءِ بازار ءَ بیڑ برتگ ءُ بلوچ دوداں لگتمال کنان ءَ نُھ کَس آوار جتگ ءُ برتگ –

آوار جنگ بیتگیں مردمانی پجار کفا ء سیٹھ علی، زبیر ء داد مھمد، الطاف ء سبزل، افضل ء سبزل، مسلم ء علی، احسان ء حمید، عمران ء نادل قومی، تکاک دوست مھمد ءُ بیست مئی ءَ نائک داد مھمد آوار جتگ ءُ برتگ اَنت –

گومازء ءَ دو ھپتگ ءَ پیسر ھم بازیں مردمے گرگ بیتگ اَنت کہ ایانی تہ ءَ درستیں مردم یلہ بیتگ اَنت ءُ سابت ء ملا بلال تنی وھدی گار ءُ بیگواہ اِنت –

بلوچستان ءَ بازیں جاھاں پاکستانی پوج ءِ زوراکی برجاہ اَنت ءُ سیاسی مردمانی گوشگ اِنت کہ بلوچستان ءَ ھمک جاہ ءَ پوجی آپریشن بیگ ءَ اَنت اود ءَ لس مردم گرگ ءُ گار کنگ بیگ ءَ اَنت –

دومی نیمگ ءَ شال ءَ گار ءُ بیگواھیں مردمانی ھاتر ءَ برجاھیں شدکشیں ھرتالی زھرشانی وائس فار بلوچ مسنگ پرسنز ءِ نیمگ ءَ برجاہ اِنت ءُ ھشت جون ءَ وائس فار بلوچ مسنگ پرسنز ءَ گاریں مردمانی روچ ءِ درگت ءَ شال ءِ پریس کلب ءِ دیم ءَ زھرشانی ءِ جار پِرینتگ اَنت –

نبشتانک:بُلّی

نبشتہ کار: شاری بلوچ

دی بلوچستان پوسٹ

من کَلیرے ءِ شاھے ءِ سر ءَ نندوک اِت آں، ءُ پشّ اِتگیں کلیر ورگ ءَ اِت آں توارے منی گْوشاں کپت، من بُرزتریں شاہ ءِ سر ءَ شُت آں کہ آواز شرتر بئیت، من اِشکُنگ لوٹ اِت آواز ساپ نہ اَت، من شُت آں آواز ءِ نیمگ ءَ داں مسیتے ءَ واز اَت، من وَ کلیر وارتگ اَت لاپ سیر اَت چُکان ءَ اوں کلیر وارینتگ اَت ما دانکہ تیرے ءِ آماچ مہ بئیں، مئے وَ زِند گیشتر پہ آپ ءُ ورگی چیز ءِ شوھاز ءَ گوں گْوز اِیت، بلے مروچی من ءَ  دگہ کارے نیست اَت، من رپت آں پہ مسیت ءِ نیمگ ءَ، من چپ ءُ چاگرد ءَ چار اِت سیاھگ نیست اَت گڑا من شُت آں مسیت ءِ مینار ءِ اسپیکر ءِ چیر ءَ نِشت آں،مُلا مرچی سک جزباتی اَت، چہ مُلّا ءِ کوکار ءَ اسپیکر لرزگ ءَ اَت، چہ اسپیکر ءِ چیر ءِ نندگ ءَ منی گوشاں دَردے زُرت، دگہ جاہ نیست اَت کہ من بہ نِنداں بلے دگہ سیاھگ اوں نیست اَت من نِشت ءُ اوپار کت،من ھمے اوست ءَ آتک آں بلکیں مُلّا پہ ما ءُ مئے پُشپدانی رکینگ ءِ ھاتر ءَ چیزے بہ گُوش اِیت، ءُ چہ ھُدا ءَ مئے ھاتر ءَ دُوایے بہ لوٹ اِیت، بلے مُلّا واز ءَ ات،
ارے اِے مسلماناں بے گناہ ءُ بے میار ءَ پلستین ءُ کشمیر ءَ مسلمان کُشگ بوگ ءَ اَنت کسان سالیں چُک چوریگ بوگ ءَ اَنت، جنین زھگ جنوزام بوگ ءَ اَنت، نازھکیں ماتانی بچ گوں بے دردی ءَ کُشگ بوگ ءَ اَنت، پادا اِت پہ جھاد ءَ،بلے مُلّا ءِ پچیں چم کُور اَنت آئی ءِ جند ءِ ڈیھ بلوچستان ءِ دلبند ءَ ھنچوش بوگ ءَ اِنت بلے پہ کشمیر ءُ پلستین لانک بستگ ئِے ارے اے مسلماناں بے گناہ ءُ بے میار ءَ مسلمان کُشگ بوگ ءَ اَنت کسان سالیں چُک چوریگ بوگ ءَ اَنت، جنین زھگ جنوزام بوگ ءَ اَنت، نازھکیں ماتانی بچ گوں بے دردی ءَ کُشگ بوگ ءَ اَنت، پادا اِت پہ جھاد ءَ،گوں مُلّا ءَ اے گپّاں منی ارس رِتک شل ات اَنت اِے ھاتر ءَ ناکہ من ءَ پہ مردماں ھمدردی ھست، بلکیں اِے ھاتر ءَ کہ من  ھم  کسانی ءَ چوریگ کنگ بوتگ آں چہ ھمے مردمانی دست ءَ، من جیڑ اِت مارا کجا کہ انسانے گِند اِیت پہ مئے جنگ ءَ گُبند کنت ڈوک ءُ تیرشانی کنت بلے وھدے کہ جِند اِش جنگ بنت  گڑا گْوش اَنت بہ رئیں جھاد ءُ جنگ ءَ، اراں مارا ھنچیں ساھے مان نیست؟ مارا اوں چو مردمانی ڈول ءَ  واھگ ءُ ارمان ھست، کہ وتی چُکّاں گوں لیب بہ کنیں جنگل ءُ گیاباناں بہ گردیں ءُ وتی زند ءَ پہ وشی بہ گْوازین ئیں، من وتی ارس پھک نہ کتگ اِت آں کہ یک تیرے ءَ توار کُت ءُ میست ءِ مینار ھونین بوت-

“چو نہ اِنت پُلّیں پلستین ءِ منا گم پر نہ بیت”
“من بلے انوں وتی ڈیھہ ءِ گماں چیر ءُ سراں”
(مبارک کازی)

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بیگواھیں ڈاکٹر دین مھمد ءِ جنک سمی بلوچ ءَ چاگردی رسانکجاہ ٹوئٹر ءَ گوشتگ مہ جون ءِ ماہ ءَ منی پت ڈاکٹر دین مھمد ءُ زاکر مجید ءِ بیگواھی ءَ دراجیں وھد ءَ دگہ یک سالے گیش بیگ ءَ اِنت –

آئی ءَ گوشت کہ اگاں زاکر ءَ دین مھمد ریاست ءِ نگاھاں مجرم اَنت اے دوازدہ سالاں کھولاں پرچا سزا دیگ ءَ اَنت؟ مئے کسور چی اِنت؟ آئی ءَ دردمندگانی ءَ جُست کرتگ ءُ گوشتگ کہ زوراکیں ریاست ءِ دل ءَ ھچ رھم نئیت اِنت؟ –

زانگ بہ بیت ڈاکٹر دین مھمد بلوچ بیست ءُ ھشت جون سال دوھزار ءُ نُھ ءَ ھزدار ءِ دمگ اورناچ ءَ ھمایانی سرکاری منند جاہ ءَ دزگیر کنگ ءُ بیگواہ کنگ بیتگ کہ روچ ء مروچی بیگواہ اِنت – ڈاکٹر دین مھمد بلوچ ءِ زھگ سمی بلوچ ءُ مھلب بلوچ ءَ آئی ءِ یلہ کنائینگ ءِ واستا شال ءُ کراچی ءِ پریس کلبانی دیم ءَ زھرشانی ءُ جتائیں پھناتانی شتگ ءُ وتی پِت ءِ شوھازگ ءَ توار چِست کنان بیتگ اَنت – چریشاں پد آیاں شال داں کراچی ءُ اسلام آباد ءَ داں وائس فار بلوچ مسنگ پرسنز ءِ پندی روانک ءِ بھر جوڑ بیتگ اَنت –

زاکر بلوچ، بلوچ اسٹوڈنٹس آرگنائزیشن آزاد ءِ سینئر وائس چیئرمین بیتگ کہ آ ھشت جون دوھزار ءُ نُھ ءَ مستونگ پڑنگ آباد ءَ پوج ءُ چیریں ادارھانی کارمنداں دزگیر کرتگ ءُ بیگواہ کرتگ –

زاکر مجید بلوچ ءِ گوھار فرزانہ مجید بلوچ ءَ شال ءَ کراچی ءُ اسلام آباد ءَ داں دوریں پند ءَ پند جنگ ءِ ھواری ءَ شال ءُ کراچی ءِ پریس کلب ءُ دگہ جاھاں بیگواھیں برات ءِ یل کنگ ءِ واستا زھرشانی کرتگ اَنت –

اے گپ ھم دلگوش کرزیں گپ ئِے کہ زاکر مجید ءِ مات ھم وتی زھگ ءِ یل کنگ ءِ واستا زھرشانی کنگ ءُ پیداک اِنت ءُ ھمے سال ءَ بیگواھیں مردمانی یل کنگ ءِ واستا اسلام آباد ءَ نندانک جنگ بیتگ کہ اود ءَ ھم زاکر مجید ءِ مات گون بیتگ-

گوستگیں ماہ ءَ سمی ءَ وتی یک تامربندے ءَ گوشتگ ءُ پدر کرتگ کہ ھما روچ ءَ کھولاں اسلام آباد ءَ ھلاس کرتگ گڑا زاکر مجید ءِ مات ءَ اے پیسلہ کرتگ کہ من اسلام آباد ءِ پارلیمنٹ ءِ دیم ءَ زند تاں مرگ ءِ نندانک ءَ ننداں ءُ دنیا ءَ اے کلوہ ءَ سر کن آں بلوچستان ءِ مات کجام زند ءِ ناوشیں جیڑھانی آماچ اَنت ءُ کجام درداں سگگ ءَ اَنت –

دومی نیمگ ءَ ھشت جون ءَ “ بلوچ مسنگ پرسنز ڈے” دارگ بیگ ءَ اِنت، اے روچ ءَ ھمک سال بیگواھیں مردمانی بارہ ءَ بازیں کساسے ءَ سرپدی زھرشانی ءِ واستا نامینگ بیتگ – بی ایس او آزاد ءَ وتی جارانک ءَ گوشتگ کہ اے روچ ءِ درگت ءَ سرپدی ءِ جارانک جتگ ءُ وائس فار بلوچ مسنگ پرسنز ءَ ھمے روچ ءَ شال ءَ زھرشانی ءِ جار پِرینتگ –

سربوتگیں ھالانی رِد ءَ بلوچستان ءِ شھر شال ءَ تیرگواری ءِ وئیل ءَ یک مردمے بیران ءُ آئی ءِ لوگی ٹپی، لورلائی ءَ چات جنگ ءِ میان ءَ ؤئیل آماچ بوگ ءَ یک مردمے بیران بیتگ –

گیشیں ھالانی رِد ءَ بلوچستان ءِ بنجاھی شھر شال سریاب دگ ءَ ناشناسیں مردمانی تیرگواری ءَ یک مردمے بیران زالبولے ٹپی بیتگ –

بیران بوتگیں مردم ءِ پجار محمد علی ءِ نام ءَ بوتگ وھدیکہ آئی ءِ لوگی نوشین ٹپی بوتگ – دمگی پولیس ءَ ٹپی ءُ بیران بوتگیں مردم نادراہ جاہ ءَسر کتگ انت اے درگت ءَ گیشیں پٹ ءُ پول کنگ ءَ انت –

دگہ وئیلے لورلائی ءَ دیم ءَ اتکگ کہ چات جنگ ءِ میان ءَ یک مردمے وئیل ءِ آماچ بوتگ ءُ بیران بوتگ –

ھالانی رِد ءَ لورالائی ءِ دمگ کلی شبوزئی ءَ نواب خان چات جنگ میان ءَ چات ڈرویتگ ءُ چیرتریتگ ءُ بیران بوتگ –

ریسکو کارمنداں مردے جون درکتگ ءُ دمگی نادراھجاہ ءَ سرکتگ اود ءَ اژدری چار ءُ ٹپاس پد کھول ءِ ھوالگ ءَ کنگ بیتگ –

بلوچ زالبول جُھد ےِ بھر جوڑ بہ بنت ءُ وتی زمّہ واریاں پیلو بہ کن انت – ماما قدیر

دی بلوچستان پوسٹ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چارھزار ءُ سَے سد ءُ بیست ءُ دو روچ سرجم بوتگ – وکیل ءُ دگہ پگرانی منوگراں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات دنیا ءِ جوڑ کنگ ءُ دیمروئی ءُ راجانی بنھشت ءِ بدل کنگ ءِ ھاتر ءَ مردیناں ھوار ھوار زالبولاں وتی بے دروریں دیمونیاں چہ دنیا ءِ نکشہ ءِ سر ءَ وتی وتی کرداناں چہ وتی سربرز کتگ – زرمبشتاں ما یک نگاھے چاریں گڑا آ پڑے تہ ءَ مارا زالبولانی بے دروریں دیمونی گندگ ءَ کائنت –

لیلٰی خالد ءَ اسرائیل ءِ ایردستیں فلسطین ءِ تہ ءَ یک زورگپتیں سرڈگارے ءَ وتی چم پچ کُتاں ءُ پگر ءُ نزریہ ءَ گوں وتی سرڈگارے ھاتر ءَ گلامی ءِ زمزیلانی پروشگ ءِ ھاتر ءَ یک زالبولے ءِ بستار ءَ مردمانی تہ ءَ آگھی ءُ جھد ءِ درونت دیگ بندات کرت –

الجزائر ءَ سرڈگار ءِ جھدے کہ بندات بوت گڑا آوھدی زالبولانی دیمونیاں تہ ءَ شاھی گِس ءَ سیادی داروکیں جمیلہ نام ھم دیما کیت – کہ آئی ءَ وتی سرڈگارے سر ءَ زورگیرانی زلم ءُ زوراکیاں گلامی ءِ ماریت ءُ وتی پت ءِ وش شادانی زند یلا دات ءُ جھد بندات کرت – آ ناں وش شادھانی زند ءَ داشت کرت ناکہ دشمن ءِ تاکت ءُ ناکہ پت ءِ سیادی ءَ ھمے وڑ بلقیس بازیں سیکورٹی ءِ تہ ءَ وتی براتاں چہ مستریں دلگوش کرزیں کارے کرت –

ماما قدیر ءِ گوشگ ات کہ زالبولانی سر ءَ باوست بہ بیت ءُ زرینہ مری ءِ درور دیگ مہ بیت گڑا بلاھیں ناھکی ءِ بیت – بانک زرینہ مری ھمے ھاتر ءَ پاکستانی ادارھاں آوار جتگ ءُ زنداناں بندیگ کرتگ تانکہ آ چہ بلوچ راجی جھد ءَ یکّر بہ بیت بلے زرینہ مری ءَ ھر وڑیں زوراکی سگتگ ءُ زالبول ءُ بلوچ راج ءِ سر بُرز کتگ تاں گڈی ءَ برز بیت –

ماما قدیر بلوچ ءَ گوشگ ات کہ دنیا ءِ زالبولانی گندگ ءَ وتی سرڈگارے بے دروریں دیمونیں دیوکیں زالبولانی چارگ ءَ مئے مروچیگیں زالبول اے دور ءِ تہ ءَ ھم وتی کرد ءَ پیلو کنگ ءَ انت وتی براتانی ھواری ءَ یک پاکیں جاھے ءَ سر بنت – مروچی بلوچ زالبولانی سر ءَ پرز بیت کہ آ پُرایمنیں جھدے بھر بہ بنت زورگیرانی گلامی زمزیلانی پروشگ ءِ جھد ءَ بہ کن انت ءُ وتی زمہ واریاں پیلو بہ کن انت –

بلوچستان ءِ دمگ کیچ ءِ بنجاھی شھر تربت ءَ سر بیتگیں ھالانی رد ءَ بارڈر ٹریڈ یونین بلوچستان ءِ جار ءِ پد ءَ بارڈر بندش ءُ لشکر ءِ تیرگواری ءِ ھلاپ ءَ ڈی بلوچ پوئنٹ ءَ ایم 8 شھدگ مروچی دومی روچ ءَ ھم بند کنگ بیتگ-

بارڈر ٹریڈ یونین بلوچستان ءِ جار ءِ پد ءَ شمبے ءِ سھب ءَ گاڑیانی واھنداں ایم 8 شھدگ بند کرتگ ءُ رؤ ءُ آئی ءَ جیڑہ ودی کتگ – ٹریڈ یونین ءِ رھشونانی گوشگ اِنت کہ بارڈر بند کنگ بیتگ ءُ گاڑی والا لوٹائینگ بیتگ اَنت ناگیگیانی دیمپان کنگ ءَ اَنت ئِے –

زھرشانی کنوکانی رد ءَ دانکہ بارڈر پچ کنگ نہ بیت زھرشانی ایم 8 شھدگ ڈی بلوچ پوئنٹ ءَ نندانک برجاہ مان اِیت –

آیاں گوشت کہ یک نیمگے ءَ بارڈر ءِ کار ءُ بار بندش دسمی نیمگ ءَ گاڑی والا لوٹائینگ ءُ آیانی سر ءَ تیرگواری کن اَنت کہ تچک ءَ زُلمے ءُ اشی ءِ پَٹ ءُ پول بہ بیت –

زانگ بہ بیت گوستگیں روچ ءَ ھم ٹریڈ یونین ءِ دزبندی ءَ زھرشانی دگ بند کنگ بیتگ –