TBP Balochi

نبشتانک: بیا کینگاں آس ءَ دے اِیں

نبشتہ کار: سعید احمد بلوچ

دی بلوچستان پوسٹ

بلوچی زبان ءِ نمیرانیں شائرے گوش اِیت کہ “کینگ ءِ سانکلاں انگت بندیگیں ما” همے کینگ اِنت کہ مارا ھر جاه ءَ پروشت ءُ پروش ءِ آماچ ئِے کُتگ همے کینگ اِنت کہ مارا تپاکی هچبر نیل ایت همے کینگ ءُ کَست کہ دائم گوں وتی براتاں ءُ مردماں جیگ پہ جیگ اِنت همے کینگ مارا پروش دیگ ءُ گوں تپاکی ءَ جُنزگ لوٹ اِیت-

واجہ گل هسن تئی نویس اِتگیں نِبشتانک ونت باز بژن بوت پرچا کہ تئی نِبشتانک چَہ کست ءُ کینگ ءَ چے سریچ اَت کہ تو یک مردمے یکدم نِشانگ جوڑ کنگ ءَ ئے واجہ گُل هسن یک اُستادے کدی ھم وت یک شریں ڈاکٹرے، ٹیچرے یا سائنسدانے جوڈ نہ بیت بلے هزاراں ٹیچر ڈاکٹر یا سائنسدان جوڑ کنت کسّ کسّ نہ بیت بلے گوں همے کاراں گوں همگرنچ بیت ءُ دیم ءَ بَرگ ءِ جُھد ءَ کنت-

اگاں ما بچار اِیں مروچی عارف بلوچ نورخان بزنجو بوت نہ کنت بلے عارف بلوچ عارف اِنت بلوچی زبان ءِ جوانیں گُشنده منّگ ءُ گوشدارگ بیت اَنچُش کہ منزور بسمل اِنت مبارک کازی بوت نہ کنت بلے منزور بسمل بلوچ زبان ءِ جوانیں شائرے زانگ بیت تئی هساب ءَ ما منزور ءَ داں ھما وھد ءَ مہ منّیں هما وهد ءَ منزور کازی مہ بیت ھر مرگ بال ءِ وت ھر کسّ وتی بِستار ءَ ءُ ھر کسّ وتی کار ءَ-

واجہ گُل هسن منی هیال ءَ اے گپ ءَ تو جنگ ءَ ئے، تو هما مردماں گُوشگ لوٹ ئے کہ همایاں گُوشتگ اَت کہ “زنده ہے بانک، ماه رنگ کی شکل میں زنده ہے” منی واجہ تو تچک اے گُشتن ءِ هلاپ ءَ رؤگ ءَ ئے کہ “پِگر بندیگ نہ بیت” اے گُشتن ءِ مراد همیش اِنت کہ آیانی پِگر ءَ دیم ءَ بَروکاں ما آیانی درور گُشیں بلے تو پھک اے گُشتن ءِ هلاپ ءَ کنگ ءَ ئے، ماه رنگ کریمہ نہ اِنت بلے بانک کریمہ ءِ درور اِنت کسّ کسّ بوت نہ کنت درور الّم بوت کنت پِگرانی منوگر بنت ءُ پِگرانی دیم ءَ بروک بنت-

بائد همیش اِنت ما کست ءُ کینگاں آس ءَ بدے اِیں کہ کِست ءُ کینگ ءَ مارا پیسر ءَ ناتپاکی ءِ امبازاں داتگ، مئے بے سوبی ءِ بُن همے نہ تپاکی اِنت ءُ ناتپاکی ءِ بُن کینگ اِنت کہ مارا هچبر تپاکی ءَ نیلیت نوں مارا همے کینگ آس دئیگی ءُ دیم ءَ جُنزگی اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ آماچ بوتگیں نود ءُ پنچ دگہ نوکیں کیس دیم ءَ اتکگ اَنت ءُ اے وھد ءَ کرونا وائرس ءَ آماچ بوتگیں درسیں مردمانی کچ بیست ءُ چار ھزار ءُ سَے سد ءُ ھژدہ ءَ سر بوتگ اَنت-

جاندراھی ءِ بنشون ءِ نیمگ ءَ چہ شنگ بوتگیں رپورٹ ءِ رِد ءَ گوستگیں روچ ءَ بزاں پنچ شمبے ءَ یک ھزار ءُ سے سد ءُ ھپتاد ءُ ھپت مردم ءَ کرونا وائرس ءِ ٹیسٹ کنگ بوتگ اَنت کہ بلوچستان ءِ یانزدہ دمگاں نود ءُ پنچ مردم ءَ کرونا وائرس بوتگ، وھدیکہ چار سد ءُ سی مردمانی رپورٹ دنیگت ءَ نہ اتکگ اَنت –

رپورٹ ءِ رِد ءَ بلوچستان ءِ تھ ءَ کرونا وائرس ءِ پوزٹیو کیسانی گیشی شش بما ھشتاد نُہ درسد بوتگ کہ آھانی تہ ءَ بلوچستان ءِ بنجاھی شھر شال ءَ شست ءُ ھشت، کلعہ سیف اللہ ءَ شش، مستونگ ءَ چار، جھل مگسی ءَ چار، نسیرآباد ءَ سَے، کیچ، چاگی، جعفرآباد ، ھاران ءَ دو دو، سبی ءَ یک ءُ پنجگور ءِ یک مردمے کرونا وائرس آماچ بوتگ انت – چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ بیست ءُ چار ھزار ءُ سَے سد ءُ ھژدہ ءَ سر بوتگ اَنت-

رپورٹ ءِ رِد ءَ گوستگیں بیست ءُ چار ادارانی میان ءَ یک سد ءُ پنجاہ ءُ یک مردم وش بوتگ اَنت، وش بوتگیں مردمانی کچ نوکیں کیساساں ھوار سرجمی ءَ بیست ءُ سَے ھزار ءُ بیست ءُ پنچ انت –

رپورٹ ءِ رِد ءَ بلوچستان ءِ تہ ءَ کرونا وائرس ءِ یک ھزار ءُ بیست ءُ سَے نادراہ ھست انت ءُ آھانی تہ ءَ بیست ءُ یک نادراہ ہائی ءُ دو لاؤ آکسیجن فلور ءِ تہ ءَ الاج انت، وھدیکہ جھانی وبا کرونا وائرس نادراھی ءَ دو سد ءُ ھپتاد مردم بیران بوتگ اَنت –

سربوتگیں ھالانی رِد ءَ ھب کور ءَ جانشودگ ءِ میان ءَ ورنایے آپ ءَ بک اتگ بیران بوتگ ءُ کلات ءَ ورنایے ءَ وتکشی کتگ –

گیشیں ھالانی رِد ءَ بلوچستان ءِ دمگ ھب ءَ منگوپیر ءِ نزیک ءَ ھب کور ءَ جان شودگ ءِ میان ءَ شانزدہ سالی ئیں ورنایے بُک اتگ ءُ بیران بوتگ-

بیران بوتگیں ورنا ءِ پجار پرویز ء دولت خان ءِ جھمنند کراچی ءِ نام ءَ چہ بوتگ – دمگی پھازدار جون چہ آپ ءَ کش اتگ ءُ نادراھجاہ ءَ سرکتگ –

دومی نیمگ ءَ کلات ءَ ورنایے ءَ وتکشی کُتگ –

پولیس ءِ رِد ءَ گوستگیں روچ ءَ محمد رحیم ء خدابکش ءَ وتی گٹ ءَ ساد ءِ لوپ کُتگ وتکشی کتگ – وتکشی کنگ ءِ سوب زانگ نہ بوتگ – پولیس ءَ لاش نادراھجاہ ءَ برتگ اژدری چار ءُ ٹپاس ءَ پد کھول ءِ ھوالگ ءَ کنگ بیتگ –

بلوچستان ءِ دمگ آواران ءَ پاکستانی پوج ءِ بیھارانی پژدر ءَ آواران ءِ جھمنندے ءَ وتکشی کرتگ، وتکشی ءِ وئیل آواران ءِ ھند ھارون ڈن ءَ دیم ءَ اتکگ –

دمگی مردمانی رد ءَ پوج ءِ نیمگ ءَ جنکیں چُک ءِ پیش کنگ ءِ لوٹ ءِ پژدر ءَ پت ءَ ساد گُٹ ءَ کرتگ ءُ وتکشی کرتگ –

نورجان ء ھارون جھمنند ھارون ڈن آواران جنکیں زھگ بلوچ جھدکارے ءِ گون ءَ آروس کنگ بیتگ چارشمبے ءِ روچ ءَ پاکستانی پوج ءَ نورجان ءُ آئی ءِ زھگ ءُ دگہ یک سیادے دزگیر کرتگ ءَ لَٹ ءُ کُٹانی نشانگ کرتگ اَنت ءُ پوجی واکداراں آئی ءَ را مروچی پشمبے ءِ روچ ءَ جنکیں زھگ ءِ گون ءَ پیش بیگ ءِ پرمان کرتگ -مروچی سھب ءَ نورجان ءَ پوج ءِ دیم ءَ پیش بیگ ءَ ابید ساد گُٹ ءَ کرتگ ءُ وتکشی کرتگ –

زانگ بہ بیت نورجان بیست ءُ ھشت اگست دو ھزار ءُ چاردہ ءَ سید عیسیٰ زیارت ءَ عبادت کنوکانی سر ءَ اُرشے ءَ زدگ بیتگ اَت کہ اے اُرش ءَ ھپت عبادت گزار بیران ءُ بازینے زدگ بیتگ اِت اَنت –

ھمے درگت ءَ بلوچستان ءِ آجوئی ءِ واستا جد ءُ جھد کنوکیں سیاسی گل بلوچ نیشنل مومنٹ ءِ بنجاھی جارکش ءَ گوشتگ کہ پاکستانی پوج یک جارے ءِ پد ءَ بلوچ راج ءِ ننگ ءُ ناموس ءَ لپاشان اِنت-

آئی ءَ گوشتگ کہ زند ءِ چوشیں پِڑے نیست کہ اود ءَ پوج دزمانجن نہ اِنت وھد اے جاہ ءَ سر بیتگ کہ بلوچ وتی زھگاں وتی مرزی ءِ سر ءَ نگاہ کرت نہ کن اَنت –

آئی ءَ گوشتگ کہ آواران ھارون ڈن ءَ پاکستانء پوج ءَ نور جان بلوچ پوجی بنجل ءَ برتگ ءُ اود ءَ آئی ءَ را وتی جنکیں چُک ءَ را پوج ءِ دست ءَ دیگ ءِ بیھار دیگ بیتگ اَنت –

آئی ءَ گوشت: نورجان ءَ وتی گیرت ءُ ننگ رکینتگ ءُ وتی جان ببا داتگ بلے وتی ناموس رسترانی دست ءَ بھرنگ نہ کرتگ آئی ءِ دیمونی ءَ سلام اِنت –

آئی ءَ گوشت کہ نورجان ءِ جرم بس ھمے بیتگ کہ آئی ءَ وتی جنک یک بلوچ جھدکارے ءِ گون ءَ آروس داتگ، بلے پاکستان ءَ اے اوپار کرت نہ کتگ ءُ چریشی ءِ پژدر ءَ پاکستانی پوج ءَ آ ءُ آئی ءِ سیاد دزگیر کرتگ ءُ بنجل ءَ برتگ ءُ لَٹ ءُ کُٹ کرتگ اَنت ءُ نورجان ءِ ھردوکیں گُٹگ ناکارہ کنگ بیتگ اَنت –

آئی ءَ گوشت کہ پاکستانی پوج ءَ نورجان بلوچ ھمے شرت ءَ یلہ کرتگ کہ آ وتی جنکیں زھگ ءَ پوجی بنجل ءَ پیش بہ کنت اگاں ناں گڑا آ گوں زھگاں ھوار سزا دیگ بیت اِنت –

جار کش ءَ گوشتگ کہ اے گیرت مندیں بلوچ ءَ وتی جنگ زورگریں پوج ءِ رستری ءِ دیم ءَ پیش بیگ ءَ رکینتگ ءُ وتی ساہ کربان کرتگ – مارا پاکستانی میڈیا، سول سوسائٹی ءُ وتگڑیں پارلیمنٹرینزاں گوں ھچ اُمیت نیست اِنت بلے بلوچ راج ءِ ھمک پرد ءِ سر ءَ اے زمہ واری بیت اِنت توار چِست بہ کن اَنت ءُ اشی ءَ بہ منارین اَنت پاکستانی پوج مئے جان ءُ ساہ ءَ گپت کنت بلے مئے دیم ءَ مئے ننگ ءُ ناموس ءَ پادمال کرت نہ کنت – ما اے زُلمانی ھلاپ ءَ ترندیں گھگیری کن ایں ءُ انیگیں گھگیری ءُ جد ءُ جھد بلوچ ننگ ءُ ناموس ءِ پھریزگ ءَ اِنت -یک آجوئیں ڈیھے ءِ ابید ناممکن اِنت –

سر بیتگیں ھالانی رد ءَ روکپتی بلوچستان سراوان ءَ یک جون ءِ دزکپتگ، کہ آ کمبل ءِ تہ ءَ پتایگ ءُ چگل دیگ بیتگ –

گیشیں ھالانی رد ءَ جون سراوان ءِ دمگ جورانی گورم دپکور دھستان بمپشت ءَ گندگ بیتگ کہ اود ءَ کمبل ءَ پتاتگیں مردمے ءِ جون دزکپتگ –

جون کور ءَ آپ رؤکیں کسانیں چُکاں دیستگ ءُ چریشی ءَ پد میتگ ءِ مردماں دمگ ءِ انتزامیہ ھال داتگ –

ھال ءِ رسگ ءَ انتزامیہ سر بیتگ ءُ آیاں جون چِست کرتگ ءُ سراوان ءِ نادراہ جاہ ءَ پجار ءِ ھاتر ءَ رسینتگ –

گڈی ھالانی رد ءَ جون ءِ پجار نہ بیتگ ءُ جون سراوان ءِ نادراہ جاہ ءَ مردگانی جاہ ءَ ایر کنگ بیتگ –

سیستان ءُ بلوچستان ءَ مردمانی کُشگ ءُ جنگ ءِ وئیل ھروھد ءَ رپورٹ بیگ ءَ اَنت بلے آیانی پژدر ءَ انتزامیہ ءِ نیمگ ءَ ھچ درشانی شنگ بیگ ءَ نہ اَنت ءُ نانکہ آیانی گیشیں سوب گوشگ بیگ ءَ اَنت –

نبشتانک: کِچگ

نبشتہ کار: شاری بلوچ

دی بلوچستان پوسٹ

آ چہ وتی لوگ ءَ کمو دُور روان اَت۔ کِشک ءَ چہ آدیم بوگ ءَ گوں آئی ءَ یک سُرگے مار اِت دوئیں کپلانی میانجی ءِ ھڈّ ءِ کِرّ ءَ سُرپُرے بوت آ روان اَت۔ بنداتی سُرگ ءَ گوں کِچگے ودی بوت کِشک ءِ سر ءَ روان اَت کہ بے ارادھی رنگ ءَ کچینگ ءِ ھاتر ءَ آئی ءِ دست پُشتی نیمگ ءَ شُت، بلے نا، آ دست ءِ ھُشکیں سُرینگے بوت۔

اراں اِے پُرّیں کِشک ءِ سر ءَ آ وتی کپلانی میانجی ءِ کچگ دیوکیں ھڈّ ءَ کچینت کنت آئی ءَ کہ اود ءَ روگی اِنت آ ۴۰۰ چارسد گزّ ءِ دُوری ءَ اِنت نوں آ ھما کِشک ءِ سر ءَ روان اَت، کہ اود ءَ گیشتر تک ءُ تھنائی اَت یک ءُ دو رھگْوز ءُ اگاں نا دیم ءَ ءُ پشت ءَ موٹلے اَت آئی ءَ آھستہ پُشت ءَ چار اِت آئی ءَ ارادہ کتگ اَت کہ اگاں موٹلے دُور بہ بیت یا کِشک ءَ کسے مہ بیت گڑا آئی ءَ موہ بہ رس اِیت گڑا آئی ءَ وتی ھما جاہ کچینتگ اَت بلے ھر وھد ءَ یک نہ یک موٹلے دیم ءَ چے یا چہ پُشت ءَ گْوست۔

چونائی ءَ آ ھمک روچ کہ اے ھدّاں چہ گْوستگ اَت، راہ ءِ دوری یے کم مار اِتگ اَت ئِے، موٹلانی روگ ءُ آیگ اوں انچو گیش نہ دیستگ ات ئِے۔ یک رندے پد ءَ تک ءُ تھنائی مار اِت ئِے ءُ کچگ گوں تیزی ءَ جِکّ جنگ ءَ مٹّ اِت آئی ءَ گوں اشتاپی ءَ دست پُشت ءَ بُرت آئی ءِ دست پُشتی نیمگ ءِ شلوار ءِ تہ ءَ اَت کہ یک رھگْوزے ءِ کدمانی توار ءَ آئی ءَ را انچوش بوگ ءَ لاچار کت ئِے کہ آ بہ زانت شلوار ءِ کِرچکانی دیم ءَ آرگ ءَ اِنت۔

کِچگ ءِ تیزی ءَ آئی تیوگیں جان ءَ گُشے مُوراں پتاتگ اَت آئی ءِ دوئیں کپلاں اوں کچگ ءَ مان پتاتگ اَت آئی ءَ کدم تیز کت اَنت نوں آ ھما پارک ءِ گیٹ ءِ دیم ءَ اَت کہ چہ ھمائی دیم ءَ آ ھرروچ گْوستگ اَت چہ پارک ءِ درمیان ءِ گْوزگ ءَ آئی ءِ راہ کستر بوتگ اَت پارک ءِ تہ ءَ لھتے مردم دُور دُور ءَ نشتگ اَت۔ بلے تیوگ ءَ ھچ کس کسے ءِ انان ءَ نہ اَت۔ آ شَر گندگ ءَ اَت کہ ھچ کس آئی ءَ گْوزگ ءَ گِندگ ءَ نہ اَت۔ چہ اِد ءَ گْوزگ آئی مدامی کارانی یک بھرے اَت۔ آئی ءَ کے گِندگ ءَ انت۔

ءُ نوں آئی ءِ کچگ ءَ آئی ءَ جان مانپوش اِتگ اَت۔ آئی ءِ دست یک دم چِست بوت ءُ آئی ءِ دست کپلانی میانجی ءَ جاھے پولگ ءَ اَت کہ کے بہ زانت یک ٹِلّے ٹھک ءَ آئی ءِ پادانی سر ءَ کپت آ اوشتاتگ اَت دو نوجوانیں بچک چہ ھجالتی ءَ کَندگ ات اَنت آئی ءَ اوں کند اِت۔ پارک ءِ ھما کُنڈ آتکگ اَت کہ گیشتر آ کُنڈ ءَ کس نہ بوتگ اَت آ اِے کُنڈ ءِ آیگ ءَ بے تاھیر اَت دو چار کدم ءَ رند آ کُنڈ ءَ سر بوگی اَت آ جیڑگ ءَ اَت۔ آ اوشت اِیت چہ اِے کِچگ ءَ وتی جان ءَ چُٹّین اِیت چہ روگ ءَ، کپلانی سُرگ آئی ءِ دست ءَ ھڈّئیگ ءَ سر بوگ ءَ نیلگ ءَ اَت نوں آ اوشتاتگ اَت، آئی ءِ دست پُشت ءِ نیمگ ءَ ساجو اَت کہ پونش پونش ءِ توارے اِشکنگ بوت۔ آئی دیم پہ دیم ءَ کسانیں بزیں کاھانی تہ ءَ کے بیت کاہ گوں تیزی ءَ سُرگ ءَ لگ اِتاں آئی ءَ یک کُچکے ءِ لپونز دیست کُچک وتی لپونز ءَ پُشت ءَ بَرگ لوٹگ ءَ اَت۔ پُشت ءَ وتی کپلانی میانجی ءَ۔ لپونز اود ءَ رسگ ءَ نہ اَت پونش پونش ءِ توار ءُ کُچک ءِ گول گول ءِ چرّگ اراں آئی ءَ اوں کِچگ ءَ گپتگ ات؟ لپونز ئِے چکرینتگ اَت کپل ئیگ ءَ برگ لوٹگ ءَ اِت ئِے،آئی ءَ اوں پہ زور وتی دیم چکرّینت ءُ گول بوت۔ گول بوگ ءَ گوں آ بھمان اِت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءِ دمگ ھُرموزگان بندر عباس ءَ ھواریں ھند لیردف ءَ سلاہ بندیں مردمانی تیرگواری کرتگ ءُ یک مردمے زدگ کرتگ –

زدگ بیتگیں مردم لیردف ءَ گوستگیں چار سالاں یک وانگے ءَ استادے ئے اگدو ءَ بیتگ –

زدگ بیتگیں اُستاد ءِ پجار ایوب رشید ءِ نام ءَ زانگ بیتگ کہ آ گوستگیں روچاں لیردف ءَ روگ ءَ بیتگ ءُ اود ءَ سلاہ بندیں مردماں تیرگواری کرتگ ءُ زدگ کرتگ –

لیردف ءِ وانگ ءِ سروک ءِ گوشگ اِنت کہ تنی وھدی زانگ نہ بیت کہ کَے ءَ جتگ ءُ ما کسے ءِ سر ءَ اے وئیل ءَ لَڈ اِت نہ کن ایں –

روکپتی بلوچستان ءَ وھد وھد ءِ سر ءَ اے وڑیں وئیل پیش آیگ ءَ اَنت کہ آیانی گیشتریں بھتاماں ایرانی اطلات ءِ نیمگ ءَ سلاہ بند کرتگیں مردمانی سر ءَ جنگ ءَ اَنت –

بلوچستان ءِ دمگ چہ کیچ ءَ پاکستانی پوج ءَ سَے براتاں ھوار شش کس آوار جتگ ءُ ناشناسیں زنداناں برتگ اَنت –

سر بیتگیں ھالانی رد ءَ کیچ ءِ دمگ پُل آباد ءَ گوستگیں شپ ءَ یک لوگے ءَ پوج ءَ بیڑ برتگ ءُ اود ءَ چار کس دزگیر کنگ ءَ پد ناشناسیں جاھاں برتگ اَنت، کہ اشانی تہ ءَ سَے برات ءُ آیانی زامات ھوار اِنت کہ آیانی پجار شعیب، جنید، شے حق ء تاج مھمد ءُ گپور ءِ ناماں زانگ بیتگ اَنت –

دمگی مردمانی رد ءَ پوج ءَ گوستگیں شپ ءِ کساس ساھت سَے ءَ بیڑ برتگ ءُ لوگ ءَ جاڑیگیں زالبول ءُ چک لَٹ ءُ کُٹ کتگ اَنت ءُ اے مردم دزگیر کرتگ اَنت –

دمگی مردماں ٹی بی پی ءَ گوں گوشتگ کہ دو روچ ءَ پیسر تمپ ءِ دمگ کوھاڑ ءَ پاکستانی پوج ءَ دو کس بابا ء عباس ءُ اصغر ء عبدالرھمان دزگیر کنگ ءَ پد آوار جتگ اَنت کہ تنی وھدی آیانی ھچ ھال نیست اِنت –

زانگ بہ بیت بلوچستان ءَ بیگواھیانی جیڑہ روچ پہ روچ گیش ودان اَنت ءُ گوستگیں بیست ءُ چار ادارانی تہ ءَ یک درزنے ءَ گیش مردم بلوچستان ءِ جتا جتائیں جاھاں پاکستانی پوج ءَ دزگیر کرتگ ءُ گار کتگ اَنت –

دومی نیمگ ءَ شال ءَ گار ءُ بیگواھیں مردمانی واستا توار چِست کنوکیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چاھزار ءُ سَے سد ءُ نوزدہ روچ سرجم بیتگ –

بنجل ءَ چہ مستونگ ءَ بی ایس او پجار ءِ گوستگیں دمگی سروک ناصر بلوچ، جمیعت طلبا اسلام ءِ گوستگیں جنرک سیکرٹری خالد مسعود ءَ تر ءُ تاب کرتگ ءُ بیگواھیں مردمانی کھولانی گون ءَ پدردی درشان اِتگ –

ھمے وھد ءَ سال دوھزار ءُ سیزدہ ءَ شال کلی جیو ءَ زورانسری آوار جنگ بیتگیں ظفر اللہ ءِ مات بنجل ءَ اتکگ ءُ وتی زھرشانی نبشتگ کنائینتگ ئِے –

آئی ءَ گوشتگ کہ منی زھگ ءَ بازیں سالے بیت کہ گار کنگ بیتگ ءُ من نزاناں آ کجا اِنت ءُ چتور اِنت آئی ءِ بارہ ءَ مارا ھچ ھال دیگ بیگ ءَ نہ اِنت -ھاکمی زمہ واری بیت اِنت آ منی زھگ ءِ بارہ ءَ بہ گوش اَنت ءُ آ کجام جرم ءِ بنیاد ءَ گرگ بیتگ –

ھمے وھد ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گوشت کہ ما یک رند ءِ پد ءَ وتی کوھنیں زمانگ ءَ گوں دُچار کپان اِنت ھمود ءَ ما بندات کرتگ یکے دومی ءَ نہ منّگ، کینگ ءِ رودینگ، زاتی پسند ءُ ناپسندی، زانتی زانش ءِ جاہ ءَ وتی گپانی درانگازگ –

آئی ءَ گوشت: بلوچ وتی گران بھائیں سراں دگانی سر، جنگل ءُ دمکاں سھر کنگ ءَ اَنت، مات وتی ورنائیں بچانی لاشانی سر ءَ موتک آرگ ءَ اَنت، پیر ءُ کماشیں پت وتی ورنائیں بچانی جسداں کوپگ دیگ ءَ اَنت –

ماما قدیر ءَ گوشتگ اَت کہ ما پرچا بے ھیال بیتگ اِنت کہ آیاں وتی بھر ءِ پرز پیلو کرتگ مارا نی چیزے کنگی اِنت، شھیداں وتی سھریں ھونانی گون ءَ ھما چراگ روک کتگ -بلے مئے نادانیں دوست وتی دوستانی پاد ءِ کشگ ءَ گر ءُ چِل اَنت –

سر بیتگیں ھالانی رد ءَ روکپتی بلوچستان ءِ دنگ بیرجند ءِ جیل ءَ دو بندیگیں بلوچ پاھو دیگ بیتگ اَنت –

پاھو دیگ بیتگیں مردمانی پجار یونس توتازئی جھمنند چاہ رھمان دزاپ ءُ عبداللہ توتازئی ء سھراب جھمنند دزاب ءِ ناماں زانگ بیتگ اَنت –

ایرانی آمیدگس ءِ گوشگ اِنت کہ ھردوکیں مردم نشہ ءِ بھتام ءَ پاھو دیگ بیتگ اَنت –

اے مردمانی ھمراھی ءَ دزگیری ءِ وھد ءَ ایرانی لشکر ءِ تیرگواری ءَ عبدالغیاث توتازئی بیران بیتگ اَنت ءُ اشی ءِ دو ناکو زتک ھم دزگیر کنگ بیتگ اَنت –

ھالانی تہ ءَ گوشگ بیتگ کہ ھردوکانی کھول گڈی گندگ ءَ پرمان کنگ بیتگ اَنت بلے ایرانی سیکورٹی ءَ پندل ءُ ھنراں مردم واتر کرتگ ءُ آیانی مردم پاھو داتگ اَنت –

بلوچ فعالین کمپئن ءِ گوشگ اِنت کہ ایرانی آمیدگس لس مردماں پاھو دیگ ءُ کُشگ ءَ اِنت کہ آیانی سر ءَ آمیدگس ءِ سرجمیں ھُکم ءُ رھبنداں پاھو نامہ نیست اِنت –

ھمے وڑ ءَ گوستگیں دو شمبے ءَ اسپھان ءَ سِی ءُ چار سالی ئیں مھران ناروی جھمنند نسرت آباد دزاپ پاھو دیگ بیتگ –

مھران ناروی ءِ بارہ ءَ ایرانی انٹرنیشنل ایمسنٹی ءَ ھم گوستگیں روچاں پاھو نہ دیگ ءِ دزبندی کرتگ ءُ ایرانی سرکار ءَ لوٹ کرتگ ءُ گوشتگ کہ مھران ناروی یلہ کنگ بہ بیت اِنت –

سربوتگیں ھالانی رِد ءَ بلوچستان دمگ ڈیرہ اللہ یار، بارکھان ءُ پنجگور ءَ تیرگواری ءِ وئیلاں ھپت مردم بیران زالبولے ءَ ھوار پنچ مردم ٹپی، وھدیکہ پنجگور ءَ آس لگگ ءِ سوب ءَ یک مردمے ٹپی بیتگ-

گیشیں ھالانی رِد ءَ بارکھان ءَ زمینی جیڑہ ئِے سر ءَ دو ٹولیانی میان ءَ جنگ ءُ چوپ ءَ شش مردم بیران سَے ٹپی بوتگ اَنت –

بلوچستان ءِ دمگ بارکھان ءَ دو ٹکانی میان ءَ زمینی جیڑہ ئِے سر ءَ تیرگواری ءِ وئیل ءَ ھپت مردم بیران، تیرگواری ءَ جنگ ءُ گاجانی ٹَکانی ءِ میان بوتگ – بیران بوتگیں مردمانی تہ ءَ راھگوزی ءِ ھم ھوار اِنت وھدیکہ سئیں ٹپی بوتگیں مردم نادراھجاہ ءَ سر کنگ بوتگ انت –

ھمے گوشگ بوگ ءَ انت کہ بیران بوتگیں مردمانی تہ ءَ چار مردمانی سیادی گاجانی ٹک انت –

ڈیرہ اللہ یار ءَ تیرگواری ءِ وئیل ءَ یک مردمے بیران بوتگ ءُ زالبولے ٹپی بیتگ –

ھالانی رِد ءَ گوستگیں شپ ءَ ناشناسیں مردماں خادم حسین گولہ ءِ گِس ءَ دور کتگ ءُ خادم حسین تیرانی آماچ کتگ ءُ کشتگ ءُ آئی ءِ لوگی ٹپی کتگ –

ھمے گوشگ بوگ ءَ انت وئیل پیشی زاتی جیڑہ ئِے سر ءَ دیما اتکگ – پولیس ءَ وت ءَ وئیل جاہ ءَ سرکتگ ءُ دؤئیں مردم دمگی نادراھجاہ ءَ سر کتگ انت – اژدری چار ءُ ٹپاس ءَ پد لاش کھول ءِ گور ءَ رسینتگ –

ھمے وڑ پنجگور ءَ دُزانی تیرگواری ءَ یک مردمے ٹپی بوتگ –

ھالانی رِد ءَ پنجگور ءِ دمگ تسپ ءَ دُزانی تیرگواری ءَ افضل ء اسحاق جھمنند تسپ ٹپی بوتگ –

ھمے گوشگ بوگ ءَ انت دُزاں گاڑی دست داتگ آ نہ اوشتاتگ گڑا دُزاں گاڑی ءِ سر ءَ تیرگواری کُتگ، تیرگواری ءِ سوب ءَ گاڑی ڈرائیور ٹپی بوتگ ءُ گاڑی چپ بوتگ –

دگہ وئیلے پنجگور ءَ آس لگگ ءِ سوب ءَ یک مردمے ٹپی بوتگ –

ھالانی رِد ءَ پنجگور ءَ ٹی وی اسٹیشن ءِ نزیک ءَ گیٹ ءَ آس لگگ ءِ سوب ءَ لیاقت ء صالح جھممند تسپ ٹپی بوتگ –

ھالانی تہ ءَ گوشگ بیتگ کہ لیاقت سک ستکگ ءُ آ کراچی ءَ برگ بیتگ، آس تیل ءَ لوڑیں گاڑی ءَ لگ اِتگ ءُ چریشی ءَ تیل ءَ لوڑیں گاڑی سرجم ءَ سُتکگ ءُ پُر بیتگ –