TBP Balochi

سر بیتگیں ھالانی رد ءَ بلوچستان ءِ بنجاھی شھر شال ءَ کرونا وائرس ءِ نادراھی ءَ کَس بیران بیتگ اَنت –

سرجمیں بلوچستان ءَ جھانی وبا کرونا وائرس ءَ بیران بیتگیں مردمانی کَچ تنی وھدی دو سد ءُ ھپتاد ءَ سَے ءَ سر بیتگ اَنت –

ھالانی تہ ءَ گوشگ بیتگ کہ جھانی وبا ءَ بلوچستان ءَ گوستگیں روچ ءَ دگہ نود ءُ پنچ مردماں نادراھی ءِ پدراھی بیتگ ءُ چریشانی ھواری ءَ بلوچستان ءَ نادراھی ءَ گپتگیں مردمانی کچ بیست ءُ چار ھزار ءُ ھپت سد ءُ سِی ءُ سَے ءَ سر بیتگ اَنت –

جانسلامتی ءِ گوشگ اِنت بلوچستان ءَ اے نادراھی ءَ تنی وھدی بیست ءُ سَے ھزار ءُ چار سد ءُ ھپتاد ءُ چار مردم وش بیتگ ءُ وتی لوگاں شتگ اَنت –

زوراکی وتی گڈی سیمسراں سر انت سرجمیں انسانیت لگتمال کنگ بوگ ءَ انت – ماما قدیر بلوچ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چارھزار ءُ سَے سد ءُ بیست ءُ شش روچ سرجم بوتگ – جتا جتائیں پگرانی منوگراں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

بیگواھیں رحیم الدین ءِ گھار ءَ بنجل ءَ اتکگ ءُ زھرشانی نبشتہ کنائینتگ – آئی ءَ گوشتگ کہ مروچی بیگواھیں مردمانی کمیشن دیم ءَ پیش بوتگاں گڑا آھاں گوشتگ کہ شمئے ھک ءَ پیسلہ بوتگ بلے منی برات پنچ سال ءِ گوزگ ءَ پد دنیگت ءَ یل کنگ نہ بوتگ –

آئی ءَ گوشتگ کہ رحیم الدین بیست ءُ شش اگست دوھزار شانزدہ ءَ مئے لوگ ءَ چہ آوار جنگ بوتگ کہ گواہ مئے گور ءَ ساڑی انت بلے اگاں کسے ءِ گور ءَ مئے برات کتکاری ءِ گواہ ھست انت گڑا آمیدگس ءَ بیا انت ءُ پیش بدار انت –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ ھمود ءَ کہ جونانی امبار لگتگ اود ءَ زند ءِ براھینگ نہ انت، ھمود ءَ کہ جنازہ وانینگ بیت اود ءَ وشی نہ بیت، ھمود ءَ کہ بلوچانی زند پھازگ نبیت اود ء پُلانی ھار دست نہ کپ ایت، ھمود ءَ کہ مرگ چو مستیں ھپس ءَ تِردّ بندیت اود ءَ وشی ءُ شادھانی موتک بنت –

آئی ءِ گوشگ ات کہ واک ءِ شُدیکاں اے لجّی ءُ انسانیت ءِ بگیری ءَ بلوچ چکچینی ءَ وتی چم اش بند کرتگ انت، ڈیھ ءِ ازت دار ھدایانی بُٹانی چیر انت ازیت سگگ انت، زوراکی وتی گڈی سیمسراں سر انت سرجمیں انسانیست لگتمال بوگ ءَ انت –

سر بیتگیں ھالانی رد ءَ چہ پسنی ءَ کولواہ ءَ رؤکیں گاڑی شھدگ ءِ سر ءَ ٹائر ءِ ترکگ ءَ مات ءُ یک سالی زھگ ءَ بیران بیتگ اَنت ءُ دوازدہ کس زدگ بیتگ اَنت –

زدگ ءُ بیران بیتگیں مردم جی ڈی اے ھسپتال گوادر ءَ برگ بیتگ اَنت ءُ اشانی تہ ءَ یک زالبولے ءِ جاور نگیگ گوشگ بیتگ ءُ کراچی ءَ برگ بیتگ –

زدگ بیتگیں مردمانی تہ ءَ گیشتر زالبول ءُ چُک ھوار اَنت کہ اے مردم کولواہ ءَ آروس ءَ روگ ءَ بیتگ اَنت –

ھمے رنگ ءَ بلوچستان ءَ دگہ یک وئیلے ءَ نیکراھی پاٹی ءِ رھشون سلاہ بندیں مردمانی تیرگواری ءَ بیران بیتگ –

گیشیں ھالانی رد ءَ پنجگور ءَ سلاہ بندءں مردمانی تیرگواری ءَ جمعیت علمائے اسلام پنجگور ءِ نائب امیر مولوی عبدالحئی بلوچ بیران بیتگ –

ھالانی تہ ءَ گوشگ بیتگ کہ مولوی عبدالحئی ھما وھد ءَ سلاہ بندیں مردماں نشانگ کرتگ آ بازار ءَ دیم پہ وتی لوگ سوردو ءَ روگ ءَ بیتگ – لاش چِست کنگ بیتگ ءُ سول ھسپتال ءَ برگ بیتگ ءُ اود ءَ اژدری چار ءُ ٹپاس ءَ پد کھول ءِ گور ءَ سر کنگ بیتگ –

بلوچ ءِ مال مڈیانی لٹ ءُ پُل کنوکیں کمپنیانی سر ءَ اُرش چد ءُ گیشتر برجاہ مان انت دانکہ لٹ ءُ پُل دست کش نہ بہ اَنت – دوستین بلوچ

سربوتگیں ھالانی رِد ءَ مروچی چارشمبے ءِ بانگواہ ءَ ڈیرہ بگٹی ءِ دمگ کوھلو ءَ ناشناسیں سلاہ بندیں مردماں تیل ءُ گیس شوھاز کنوکیں کمپنی ءِ گاڑی ءِ سر ءَ بمب تراکے کتگ، تراک ءَ کمپنی کارمنداں جانی ءُ مالی تاوان رس اتگ –

دومی نیمگ ءَ بلوچ آجوئی لوٹوکیں سلاہ بندیں بلوچ ریپبلکن گارڈ ءِ جارکش دوستین بلوچ ءَ رسانکدراں وتی شنگ کرتگیں درشان ءِ تہ ءَ تراک ءِ زمّہ واری منّ اِتگ ءُ گوشتگ کہ مئے سرمچاراں مروچی کوھلو ءُ بارکھان ءِ میانی دمگ ءَ ڈی جی سی ایل ءِ کاروان ھما وھد ءَ تراک ناکیں شوروانی نشانگ جوڑ کرتگ وھدیکہ آ وتی کمپنی ءِ نیمگ ءَ رؤگ ءَ بوتگ انت-
جارکش ءَ گوشتگ کہ تراک کمپنی ءِ انجینئیر ءُ ٹیکنیشن گاڑی ءِ سر ءَ کنگ بوتگ، تراک آسر ءَ سَے انجینیرز ءُ دو ٹیکنیشنز مرتگ اَنت –

جارکش دوستین بلوچ ءَ وتی درشان ءِ تہ ءَ گوشتگ کہ ما دنیا ءَ سرپد کنگ لوٹ ایں کہ بلوچ ءِ مال ءُ مڈیانی لٹ ءُ پُل ءَ پاکستان ءُ در ملکی کمپنیانی سر ءَ مئے اُرش چد ءُ گیشتر بنت داں ھما وھد ءَ کہ آ لٹ ءُ پُل ےَ دست کش نہ بہ اَنت – آئی ءَ گوشتگ کہ مئے اے دابیں اُرش بلوچستان ءِ آجوئی ءَ تاں برجاہ مان انت –

بلوچستان ءِ دمگ ءِ کیچ ءَ پاکستانی پوج ءَ یک لوگے ءِ سر ءَ بیڑ برتگ ءُ اود ءَ جاڑیگیں زالبول ءُ چُک جتگ اَنت –

ٹی بی پی پتر ھال ءَ سر بیتگیں ھالانی رد ءَ گوستگیں شپ ءِ ساھت دو ءَ تمپ ءِ دمگ گومای ءَ پاکستانی پوج ءَ ھاجی سالہ مھمد ءُ منیر ء ایوب ءِ لوگانی سر ءَ بیڑ برتگ ءُ لوگاں جاڑیگیں زھگ ءُ زالبول پوج ءَ جتگ اَنت –

دمگی مردماں ٹی بی پی ءَ گوں گپ کنان ءَ گوشتگ کہ پوج بازیں شپانی نپس کنت ءُ بیڑ بارت ءُ اود ءَ جاڑیگیں زھگ ءُ زالبولاں کمشرپ کنت ءُ لوگانی ساز ءُ ساماناں گوں وت بارت اِنت-

دمگی مردمانی رد ءَ پوج ءِ ھمراھی ءَ دمگ ءَ سرکار ءِ نیمگ ءَ سلاہ بند کرتگیں گل ڈیتھ اسکواڈ ءِ کارمند ھم گون اَنت –

دمگی مردمانی رد ءَ چریشی ءَ پیسر ھم پوج ءَ بیڑ برتگ ءُ اود ءَ بازیں مردمے آوار جتگ ءُ بیگواہ کرتگ اَنت –

دومی نیمگ ءَ بلوچستان ءَ بندوکیں سیاسی گلانی گوشگ اِنت کہ پاکستانی پوج ھما لوگانی سر ءَ بیڑ بارت اود ءَ جاڑیگیں زالبولاں کمشرپ کنت ءُ مردماں آوار جنت ءُ بیگواہ کنگ اِنت –

بلوچستان ءِ دمگ کیچ ءِ بنجاھی شھر تربت ڈنک ءَ گوستگیں سال ءِ ھمے روچ ءَ ناشناسیں سلاہ بندیں مردماں یک لوگے ءَ دور کتگ اَت ءُ اود ءَ ملکناز نامیں زالبولے کُشتگ اَت ءُ آئی ءِ کسان سالیں زھگ برمش زدگ کرتگ اَت –

ملکناز ءِ کوش ءِ ھلاپ ءَ بلوچستان ءَ ھوار کراچی ءُ دگہ جاھاں نشتگیں بلوچانی زھرشانی تہ ءَ گیشی اتکگ اَت –

بلوچ مھلوک ءِ گوشگ اَت ملکناز ءِ کوش بلوچ ننگ ءُ ناموس ءِ سر ءَ یک اُرشے کنگ بیتگ ءُ چریشی ءَ چہ ھمے زانگ بیت اِنت ریاست ءِ چماں تھناں ملکناز ءُ آئی ءِ زھگ برمش نہ اَنت بلکیں سرجمیں بلوچستان ءِ ننگ ءُ ناموس ریاست ءِ دست ءَ لگتمال اِنت –

ملکناز ءِ کوش ءُ برمش ءِ زدگ کنگ ءَ پد بلوچستان ءَ لس مھلوک ءَ ھوار سیاسی مردمانی زرمبشت یک گامے ءَ دیم ءَ جنزگ ءَ گندگ اَتکگ اَت –

بلوچ مھلوک ءَ ملکناز ءِ کوش ءُ برمش ءِ زدگ کنگ ءِ پژدر ءَ ریاست ءِ پاکستان ءَ ترندیں لوٹ کتگ اَت کہ ملکناز ءِ کشندہ ءُ برمش ءِ زدگ کنوک گرگ ءُ پاھو ءَ درنجگ بہ بنت ءُ بلوچستان ءَ لس مردم کہ ریاست ءِ نیمگ ءَ سلاہ بند کنگ بیتگ اَنت آیانی سلاہ پچگرگ بہ بنت –

اے وئیل بیست ءُ شش مئی ءُ بیست ءُ پنچ مئی ءِ میانی شپ ءِ تھاری ءَ کیچ ءِ دمگ ڈنک ءَ یک لوگے ءَ دیم ءَ اتکگ اَت کہ اود ءَ لھتے سلاہ بندیں مردم لوگے ءَ دور کن اَنت ءُ لوگ ءَ دُزی ءِ گمان ءَ رو اَنت بلے اود ءَ جاڑیگیں زالبول ملکناز گوں دُزاں اڑ اِیت گوں دُز آئی ءِ سر ءَ تیرگواری کن اَنت ءُ ملکناز ھما جاہ ءَ بیران بیت اِنت –

ھمے میان ءَ میتگ ءِ آ دگہ مردم کشندھانی رندگیری ءَ کن اَنت ءُ یک کوشکاراں یکے دزگیر کن اَنت ءُ پد ءَ آئی ءَ پولیس ءِ دست ءَ دے اَنت –

ملکناز ءِ کوش ءَ ریاست ءِ نیمگ ءَ جوڑ کرتگیں نام “ڈیتھ اسکواڈ ” ءِ نام ءَ زانگ بیت اِنت گڑا اے وئیل ءَ چیزے کارمند کہ آیانی سروکی ءَ سمیر سبزل نامیں مردمے ءَ نام گپت کن اَنت –

مھلوک ءِ زھرشانیاں پد سمیر سبزل گرگ بیت اِنت ءُ آ چیزے وھدے بندی ءَ پد یلہ کنگ بیت ءُ آئی ءِ یک ھمراھے ءَ پاھو ءِ ھکم دیگ بیت اِنت –

ھمے درگت ءَ بی ایس او ءِ سیکریتری جنرل مھرزاد چاگردی رسانکجاہ ٹوئٹر ءَ نبشتگ کنت کہ ھمے روچ ءَ ملکناز ءُ آئی ءِ کسان سالیں زھگ برمش ریاست ءِ ڈیتھ اسکواڈ ءِ کارمندانی دست ءَ کُشگ بیتگ اَنت ءُ اے روچ برمش ءِ نام ءَ نامینگ بیتگ ءُ ما ملکناز ءُ آئی ءِ زھگ ءِ دیمونیانی سر ءَ پھر ءُ شان کن ایں –

ھمے درگت ءَ بلوچستان ءِ آجوئی ءِ واستا جد ءُ جھد کنوکیں گل بلوچ نیشنل مومنٹ ءِ سروک ھلیل بلوچ وتی بیان ءِ تہ ءَ ھم اے روچ ءَ برمش ءِ نام ءَ نامینگ گوشتگ –

ھلیل بلوچ نبشتگ کنت پاکستانی پوج ءَ سرجمیں بلوچستان ءَ کُشت ءُ کوش ءِ زور ءَ پد وتی سلاہ بندیں مردم دیم ءَ کتگ اَنت –

ھلیل بلوچ ءَ گوشتگ کہ ڈنک ءِ ناوشیں وئیل ءَ ھما زوراکی پدر کرتگ اَنت ءُ ریاست ءَ نہ منّ اِتگ اَنت، ملکناز ءِ گھگیری ءَ جد ءُ جھد ءَ یک رھشونے ءِ پدر کرتگ –

آئی ءَ گوشتگ کہ ملناز ءِ بھادری ءَ بلوچ ءَ را یک زور ءُ ھمت ءِ داتگ، ملکناز نمیران بیتگ بلے آئی ءِ پاکیں ھون بلوچ دمگاں زرمبشت ءَ گوں ھمسنت بیتگ اَنت –

بلوچ نیشنل مومنٹ ڈنک ءِ وئیل ءَ بھادریں زالبول شھید ملکناز ءِ زھگ برمش ءِ نام ءَ یک چیدگے ءِ دروشم ءَ داریت ءُ بیست ءُ شش مئی ءَ ھمے روچ ءِ بستار ءَ سرپد بیت اِنت ءُ اے روچ بلوچ راجدپتر ءَ زالبولانی کرد ءُ آیانی دیمونیانی نشانی ءَ پدر کنت ءُ اے روچ پوج ءُ آئی ءِ کریہ داریں مردمانی واستا یک سیاھیں روچے سابت بیت اِنت –

نبشتانک: اِشک یک نشھے جوڑ بوتگ

نبشتہ کار : ھان ساجدی

دی بلوچستان پوسٹ

اگاں یک مردمے ءِ باتن ءَ پہ چیزے ءَ لوٹ ءُ واھگ بہ بیت ءُ زرد ءَ بس ھما یکیں چیز ءِ ھیال ءُ جیڑہ بہ بنت گُڑا آ اشک ءِ نام ءَ زانگ بیت ءُ اِشک مردم ءَ ھما یکیں چیز ءِ ھیالانی تہ ءَ گار کنت اِشک گوں وتی راجی زبان، وتن ، راج ءُ برے گوں مردم ءَ ھم بیت اِشک یک ابابت ھساب ءَ اِنت اشک ھنچیں نادْرائی یے کہ آ مردم ءِ باتن ءَ تھنا کنت  ءُ گوں زرد ءِ جیڑھاں ھمگرنچ بیت  مردم مُدام گْوش اِیت من تھنا بِہ  باں ،   مرچاں ھمک مردم اشک ءِ آماچ اِنت ۔

اگاں ما شرّی ءَ چمشانک بہ دے  ایں گُڑا مئے چاگرد اشکی گنوک ءَ سر ریچ اِنت ءُ ھمک ورناہ ھمے نادْرائی ءِ آماچ اِنت اے انچیں نادْرائی یے کہ مردم ءِ باتن ءِ تہ ءَ گار اِنت ایشی ھال گوں ھمک مردم ءَ شنگ کنگ نہ بیت اشک ءِ آس  روچ پہ روچ ءَ مئے چاگرد ءَ اندیم کنان اِنت اگاں یک ورناھے اشک ءِ آماچ بیت گُڑا  آ نہ پہ وت ءَ جیڑ اِیت ءُ نہ دوئمی ءِ بستار ءَ زانت ءُ لوگ ءِ مردم ءُ چاگرد آئی واست ءَ ھچ ارزشت نہ دار اَنت آ بھ نہ جیڑ اِیت کہ منی سَوب ءَ منی ھاندان چاگرد ءِ تہ ءَ بَنام بُوّگ ءَ اِنت کمالان بیبگر ءِ جوڑ کُتگیں تامُر ” مَلار ” ءَ ما بہ چار ایں مارا بلاھیں سرپدی یے رس اِیت کہ اشک چتور مردم ءَ تباہ کنت ھما ورناہ کہ وتی پِت ءُ ماتانی باندات ءِ اُمیت اَنت ءُ راج ءِ آوکیں باندات ءِ چِراگ اَنت بلے ھما ورناہ مرچی یک ھنچیں سِلّیں نادْرائی یے ( اشک ءُ نشہ ) ءِ آماچ اَنت کہ راج آھان چَہ  ھچ اُمیت نہ دار اِیت اے دَور ءِ مردماں اشک ءَ را یک بلاھیں کاروبارے جوڑ کُتگ ءُ دروگیں مھر ءِ نام داتگ ءُ دروگیں مھر مردم ءَ انچو دلپروش کنت کہ مردم ھمے جیڑ اِیت منی زند  زوت ھلاس بہ بیت شَرّتر اِنت ءُ اے زندمان ءِ تہ ءَ ھچ مول ءُ مراد نیست ، آ ھمک وتی زند ءِ تباہ کنگ ءِ جْھد ءَ اِنت یکے اِشک ءِ نادْرائی ءُ دوئمی  مردم پد ءَ نشہ کنگ بندات کنت گُڑا آئی زند تبائی ءِ نیمگ ءَ جُنزان بیت ۔

اگاں ما بہ چار ایں مئے چاگرد ءِ تہ ءَ مستریں نادْرائی نشہ ئیگ اِنت کہ مئے ورناہ آ ءَ را شوک ءِ ھساب ءَ زور اَنت ءُ وتی زند ءَ تباہ کن اَنت ھمک نیمگ ءَ چماں چِست بہ کن ئے داں ورناہ( گُٹکا ، پان ، سگریٹ ، چرس ءُ شراب ) ءُ دگہ بازیں  سلّیں نشہ ءِ آماچ اَنت ۔ ما دْرست  ایشی ءِ ذمہ وار ایں پرچا ما وت اے نشہ ءِ چیزان شرّیں وڑے ءَ  بھا کنگ ءَ ایں پہ کلدار ءِ واست ءَ بلے ما اے نہ چار ایں کہ مئے جند ءِ پدریچ تباہ بُوّگ ءَ اِنت ، اے پیمیں پندلانی سازگ ءَ مئے مسترانی دست ماں اِنت آھانی لوٹ ھمیش اِنت ورنا چَہ وانگ ءُ زانگ ءَ دُور بہ بنت ءُ ھمے سلّیں نشہ ءِ آماچ بہ بنت ، آ بھ نہ لوٹ اَنت اے چاگرد ءِ تہ ءَ دیمروئی ءُ بدلی بئیت ، مارا مُدام تھاری ءِ نیمگ ءَ تیلانک دے اَنت بلے ما ھم ناسرپد ایں کہ وتی نیک ءُ بد ءَ ھچ نہ پھم ایں نوں مارا وتی چم پچ کنگی اَنت ءُ نشہ ءِ آماچیں ورناھانی لاچاری زانگی اِنت پرچاکہ  یک ورنایے نشہ ءِ آماچ بیت گڑا آ ھمنچو ھَنوش ءُ  لاچار بیت کہ وتی مات ءِ جامگ ءَ ھم پہ کلدارے ءَ  بھا کنت ءُ آ را وتی بستار ءِ واست ءَ ھچ سما نہ بیت ، نوں مارا نشہ بھا کنوکانی ھلاپ توار چِست کنگی اِنت دانکہ ما چَہ اے ناھکیں نادْرائی ءَ دُور بِہ بَہ ایں –

مئے مستریں لاچاری ھمیش اِنت کہ ما گُلام ایں ، اگاں گْوست ءَ بہ چار ایں گُڑا ھمک گُلامیں راج ءِ ھالت ھمے وڑ اِنت آ ھرچ وڑیں گرنباریانی  تہ ءَ دَور دیگ بیت نوں مارا ایشی ءِ واستا جْھد کنگی اِنت کہ وتی ورناھاں چَہ نشھاں بہ پھریز ایں اے ورنا مئے راج ءِ باندات اَنت مئے ورناہ مئے راج ءَ را یک رژنائیں بانداتے دے اَنت اگاں ما زند ءَ گوں اِشک ءُ نشہ ءَ ھمگرنچ بہ کن ایں گُڑا کس مئے مدت ءُ کُمک ءَ نہ کنت نوں مارا وت ءَ را جْھد کنگی اَنت ءُ اے دوئیں نادْرائیاں چَہ وت ءَ دُور کنگی اَنت ءُ وانگ ءِ واست جْھد برجم دارگی اِنت ، اگاں ما کتاب ءَ وتی سنگت بہ کن ایں گُڑا کس مارا داشت نہ کنت ۔

مارا لوٹ اِیت ما ھما سنگتانی کُمک ءَ بہ کن ایں کہ آ نشہ ءِ آماچ اَنت ، ھما  نشہ ءِ آماچیں مردماں ءَ نادْراھجاہ الاج کنگی اِنت ءُ دانکہ آیاں ءَ وشیں زند ءِ گُوازینگ ءَ موہ بہ رس اِیت انچُش کہ بلیدہ مکران ءِ مردماں نشہ ءِ ھلاپ ءَ  توار چست کُت ءُ نشہ ءِ کاروبار بند اِش  کُت ءُ نشہ آماچیں مردمانی الاج کنگ بِنا بوت دوئمی ھمے اشک ءِ آماچیں سنگت ءُ برات کہ اے ناھکیں نادْرائی ءَ گوں ھمگرنچ اَنت ءُ آیانی زرد اے سلّیں مھر ءُ دوستی ءَ مانپوش اِتگ ءُ دائم گوں دروگیں مھر ءِ جیڑگاں گُلائیش اَنت مارا لوٹ اِیت کہ ما وتی دوستیں برات ءُ ھمبلاں ءَ اے مھر ءُ دوستی ءَ چَہ دُور کنگ ءِ سکین ءَ بہ دے ایں  پرچاکہ اے ھنچیں ھرابیں کارے کہ مردم ءَ ملور ءُ لاچار کنت ءُ مردم ءِ باتن  ءِ ھستی ءَ گار ءُ بیگواہ کنت ۔ مردم روچ پہ روچ ءَ اِشک ءِ تاروکی ءَ گار بوان کنت  ءُ چَہ سَنچ ءُ مارشت ءَ گِستا بیت مارا اے پیمیں کاراں چَہ دور دارگی اِنت ، وتی نُگرھیں زندمان  آس ماندارگی نہ اِنت مارا لس مھلوک ءَ را ھمے جْھد برجم دارگی اِنت ءُ وتی پُلگدیں ورناہ چَہ نشہ ءُ اشک ءَ  دُور کنگی-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ پنجگور ءَ سربیتگیں ھالانی رِد ءَ پنجگور خدابادان ءِ جھمنند حاجی بیداد بلوچ، کفایت اللہ بلوچ ارشاد احمد، محمد ھاشم، عنایت اللہ قومی، عبدالوحید، زوہیب احمد ءَ وتی کھول ءِ ھمراھی ءَ پریس کانفرنس ءَ کنان ءَ گوشتگ کہ ما ڈنی آباد کار نہ اِنت عبدلرھمان ءِ زمین مئے مِلک انت ما کسی بگیری ءَ پریس کانفرنس کنگ ءَ نہ ایں بلے وتی ھک ءِ ھاتر ءَ گپ جنگ ءَ ایں –

آھانی گوشگ ات کہ ما پیش ءَ ھم کبرستان ءُ گوازی ءِ ھاتر ءَ زمین داتگ کھور ء کبرستان مئے زمین ءِ سر ءَ انت ھر ھما وھد ءَ دمگ ءِ تہ ءَ دیمروئی کار کنگ بنت مارا چہ کربانی دیگ ءَ گوشگ بیت زاناں کربانی دیگ ءَ بس ما پش کپتگیں –

آھانی گوشگ ات کہ ما پساد نہ لوٹ ایں بلکیں پہ باوست ءُ ایمنیں وڑے ءَ جیڑہ ءَ گیش ءُ گیوار کنگ لوٹ ایں اگاں کسے ھمے لیکیت کہ کسے چہ سرکاری تاکت ءَ مئے زمیناں پچ گپت گڑا آ رد پھمی ءِ تہ ءَ انت –

آھانی گوشگ ات کہ اُستانی وزیر میر اسداللہ بلوچ ما ؤوٹ داتگ ءُ گچین کتگ مروچی اگاں آ اسمبلی ءِ تہ ءَ انت گڑا مئے وؤٹانی برورد انت آئی ءَ بایدیں دمگی بستاری نمائندگ مئے ھکانی پھازداری بہ کرتیں بلے پہ زورانسری مارا چہ مئے زمیناں پچ گرگ لوٹ ایت – پنجگور ءِ تہ ءَ سرداری رواج نیست کہ زورانسری کسے ءِ زمین ءِ سر ءَ زورگر کنگ بہ بیت-

آھانی گوشگ ات کہ نوزدہ سد ءُ ھپتاد ءُ پنچ ءَ چہ اے زمین مئے مِلک انت بلے گوازی ءُ دگہ ادارھاں زورانسری اد ءَ آرگ لوٹ انت – ما چہ ھکومت ءَ لوٹ کنیں کہ آ مئے مِلکانی پھازداری ءَ بہ کنت ءُ ما بلوچی ءُ شریئت ھساب ءَ ھم میر اسداللہ گوما نندگ ءَ ساڑی انت –

آھانی گوشگ ات کہ مفتی آصف ءَ ملا قاسم ءِ گور ءَ ھم ما وتی جیڑہ سر کتگ بلے جیڑہ انگت نہ گیشتگ ـ باند ءَ اگاں مئے گوما زیادھی بوت گڑا آئی ءِ تہ ءَ درسیں ھما مردم زمہ وار انت کہ جیڑہ پہ باوست گیش ءُ گیوار کرت کن انت – آھاں گوشگ ات زان انت ءُ سرپد انت بلے انگت مئے زمین ءَ پچگر گرگ بوگ انت تانکہ اشی ءِ سر ءَ کوزہ کنگ بہ بیت – خدابادان ءِ مھلوک ءَ پہ اے ھاتر ءَ اسداللہ وؤٹ نہ داتگ کہ آ مھلوک ءِ ھکاں بہ پلکیت – اھانی گوشگ ات کہ خدابادان اسپورٹس کمپلکس ھاتر ءَ سی کروڈ منگ بوتگ وھدیکہ شما کسے ءِ زمین ءِ سر ءَ منصوبہ تیار کن ئے پہ اشی ءِ ھاتر ءَ زمین ءِ مالک رازی کنگی انت آئی ءَ آئی ءِ تاوان دیگ بیت –

آھانی گوشگ ات کہ مئے زمین ءِ سر ءَ ھر وڑیں جنگ جیڑہ ءِ بوت گڑا آئی ءِ زمّہ وار دمگی انتزامیہ پولیس ءُ مکران کمشنر بنت – اگاں اسداللہ بلوچ زمین ءِ سر ءَ اسکیم ءِ جوڑ کنگ لوٹ ایت گڑا بئیت گوں زمین ءِ مالکاں گپ بہ جنت ءُ اھاں رازی بہ کنت –

گڈسر ءَ آھاں پریس کانفرنس ءَ تران کنان ءَ گوشتگ کہ بلوچستان ءِ وزیراعلی، بلوچستان ءِ چیف سکریٹری، چیف جسٹس ءُ سیکٹر کماندار مئے گوما بوتگیں زوراکیانی سر ءَ گامگیج بہ زور انت –

زانگ بہ بیت گوست ءَ ھم پنجگور ءَ زمینانی جیڑہ ءِ سر ءَ لس مردماں زھرشانی کرتگ ءُ باز وھد ءَ چوشیں جیڑھانی ھال رسانکدراں گندگ بیگ ءَ اَنت –

بلوچ راج جونانی چست کنگ ءَ گٹ انت، سرجمین راج پُرسیگ اِنت – ماما قدیر بلوچ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چارھزار ءُ سَے سد ءُ بیست ءُ پنچ روچ سرجم بوتگ – چہ ھزدار ءَ منیر احمد بلوچ، بیبرگ بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ زندگیں ءُ ازت داریں راجانی پرزند مرگ ءُ شھیدی ءَ من انت – آ گلامی زند گوازینگ ءَ چہ وتی زند ءَ کربان کن انت ءُ گرانتریں راھاں پند جن انت ءُ وتی دوستگیں مردمانی یل کنائینگ ءَ گام جن انت، آ سپر ءِ ھلاس کنگ ءَ پیسر زوراکانی جوڑ کتگیں زنداناں بندیگ کنگ بنت یا انسانی ھکانی لوٹگ ءِ ھاتر ءَ شھیدی ءِ منگہ ءَ زور اَنت –

آئی ءِ گوشگ ات کہ بلوچستان ءَ چکچینی ءِ بازار لگتگ، بلوچ ءَ کُشگ ءِ نھاد ایر کنگ بوتگ ھر ھما کس کہ گیشتر بلوچ کُشیت آئی ءِ نھاد گیشتر کنگ بیت، کنگال ءَ چہ کروڈ پتی جوڑ بیت – بلوچ ءِ کُشگ جُرم ءِ نہ انت بلکیں سیر ءُ آباد بوھگ ءِ چانسے، بوت کنت آؤکیں روچاں بلوچ ءِ کُشگ ءِ ھاتر ءَ پاکستان ءِ کانود ءَ شک مان کنگ بہ بیت ءُ بلوچ ءِ کشگ ءَ کانودی جواز بہ رس ایت –

آئی ءَ دیمتر ءَ گوشتگ کہ بلوچستان ءَ تُرس ءِ جاورھال انت، ھر نیمگ ءَ ھاموشی ایں، مرگ ءِ ترس سرے سر ءَ میلانک انت گوات تبت ءُ لیوار ءُ درشک انت بلے ھما کہ وتپرستیں سیاست لوٹوک انت ا اے درد ءَ چہ چَم کُٹ گندگ کائنت – بلوچ ءِ راج ءِ ورنایانی سر بُرگ بوگ ءَ انت –

ماما قدیر بلوچ ءِ گوشگ ات کہ بلوچ راج اے وھدی جونانی چست کنگ ءَ دست گٹ انت ءُ سرجمیں راج پُرسیگ اِنت – اسلامباد وتی تُن ھلاس کنگ ءِ ھاتر ءَ بلوچ ءِ ھون ءَ چونسگ انت –

بلوچستان ءِ دمگ کیچ ءِ ھند دشت ءَ مروچی ھور ءُ ترندیں گواتانی سبب ءَ مھلوک ءِ لوگ کپتگ اَنت –

گیشیں ھالانی رد ءَ دشت بلنگور ءَ ترندیں گوات ءِ سبب ءَ مھلوک ءِ باگ ءُ لوگ ءُ سولر تاوان داتگ اَنت –

ھالانی تہ ءَ گوشگ بیتگ کہ بازیں کچے ءَ مھلوک ءِ لوگ، چاپڑا ءُ کمپان گوات ءَ دور داتگ اَنت ءُ باگانی تہ ءَ آم، چکو ءُ دگہ درچک ھم گوات ءَ پروشتگ ءُ زوال کتگ اَنت –

دمگی مردماں سرکاری واکداراں گوں لوٹ کرتگ ءُ گوشتگ کہ آ دمگ ءَ چار ءُ ٹپاس بہ کن اَنت ءُ مھلوک ءِ تاوانانی کمک ءَ بہ کن اَنت –

ھمے وڑ ءَ مکران ءَ بجلی ءِ تار گم سِستگ ءُ بجلی بند بیتگ اَنت –

ھالانی تہ ءَ گوشگ بیتگ کہ تمپ ءُ نزر آباد ءِ نزیک ءَ مین ٹرانسمیشن لائن 185 ارت بیتگ ءُ چریشی ءَ تار سِستگ ءُ بجلی بند بیتگ اَنت –

بجلیانی شر کنگ ءَ کیسکو ءِ واکدار رھادگ بیتگ اَنت ءُ آیانی گوشگ اِنت کہ شپ ءَ داں وھدے ءَ بجلی شر کنگ بنت اِنت –