TBP Balochi

بلوچستان ءِ تیابدپی دمگ پسنی ءَ “معذوراں ” پسنی پریس کلب ءِ دیم ءَ زھرشانی کرتگ ءُ گوشتگ کہ “معزور “ھکاں زبھر کنگ بیگ ءَ اَنت، آیان گوشتگ کہ “معذورانی بھت ءَ بس پنڈگ ءُ زکات ایر کنگ بیتگ اَنت باید مارا نوکری دیگ بہ بنت –

“معذورانی”زھرشانی ءَ بی این پی(عوامی) پاٹی ءِ زالبول ونگ گوادر ءِ آرگنائزر میڈم مریم صاحب خان ءَ تران کرتگ ءُ گوشتگ کہ من وتی پاٹی ءِ سروک اُستانی وزیر میر اسد اللہ بلوچ ءَ دزبندی کن آں آ تھسیل پسنی ءِ “معذوروں سوشل ویلفیئر ڈیپارٹمنٹ گوادر ءَ کمک بہ کنت –

آئی ءَ گوشت کہ الاج ءِ واستا سرکاری درچاں زر دیگ بہ بیت ءُ تانکہ معذوراں شریں وڑے ءَ کمک بہ کنت –

آئی ءَ گوشت کہ معذورانی واستا ایمبولینس ءِ بند ءُ بست کنگ بہ بیت ءُ آئی ءَ گوشت کہ من زاناں معذورانی ھکاں کَے جنگ ءَ اِنت ءُ بلے اشی ءِ دزبندی ءَ کن آں آیاں آیانی ھک دیگ بہ بیت کہ معذوراں دگہ کس نیست اِنت –

زھرشانی ءَ “معذور ” راشد بلوچ ءَ تران کرت گْوشت کہ ھما وھد ءَ گوادر ءَ سولر بھر بیتگ بلے گل ءِ سروک ءَ مارا معذور پدر نہ کرتگ ءُ مارا ایف آئی آر ءِ ترس داتگ –

آئی ءِ گوشت کہ معذورانی جست کنوک نیست ءُ معذوراں بس پِنڈگ ءِ نوکریانی بھت ءَ اِنت ءُ باید معذور نوکری دیگ بہ بنت – آئی ءَ گوشت کہ معذورانی نام ءَ راشن مُچ کنگ بنت بلے معذوران اش کس نہ دنت درستاں وت ھڑپ کن اَنت –

آئی ءَ گوشت کہ پسنی ءَ ھپتاد ءِ کچ ءَ معذور ھست اَنت بلے مروچی ءَ داں کسے ءَ جست نہ کرتگ اَنت ءُ دراھیں سرکاری ادارھاں گوں دزبندی اِنت کہ معذوریں مردماں گوں وت دچار بہ کپ اَنت ءُ آیانی بارہ ءَ جست بہ کن اَنت –

بلوچستان ءَ چوشیں روچے پِر نہ گوز ایت کہ اود ءَ مردم دگ ءِ وئیلانی آماچ نہ بیگ ءُ بیران ءُ زدگ بیگ ءَ نہ اَنت ھمک روچ بلوچستان ءِ دگانی سر ءَ بیتگیں وئیلاں لس مردم مرگ ءِ آماچ بیان اَنت ءُ لس مھلوک چرے وئیلاں زدگ بیگ ءَ اَنت –

سر بیتگیں ھالانی رد ءَ بلوچستان ءِ دمگ سبی ءَ مزن شھدگ ءِ سر ءَ لمجی ءِ نزیک ءَ گیس گاڑی ءَ ٹرالرے ءَ ٹکرے جتگ ءُ چریشی ءَ یک مردمے بیران ءُ یکے زدگ بیتگ –

سبی ءِ وئیل ءَ لیویز ءِ کارمنداں ھال ءِ سر بیگ ءَ آیاں وت ءَ وئیل جاہ رسینتگ ءُ جون ءُ زدگ بیتگیں مردم چِست کرتگ ءُ سبی ءِ سول ھسپتال ءَ برتگ اَنت –

سبی ءَ گیس ٹنکر ءَ سواریں بیران بیتگیں مردم ءِ پجار ھمایوں گل ءُ زدگ بیتگیں مردم ءِ پجار اورنگزیب ءِ نام ءَ زانگ بیتگ ءُ پنجاپ ءِ دمگ ملتان ءِ نندوک گوشگ بیگ ءَ اَنت –

زدگ بیتگیں مردم ءِ جاور ھم نگیگ گوشگ بیتگ اَنت ءُ آ سی ایم ایچ ءَ برگ بیتگ –

واکدارانی گوشگ اِنت ٹرالر ھرابی ءِ سبب ءَ دگ ءِ کش ءَ اوشتوک بیتگ کہ گیس ٹنکر اتکگ ءُ آئی ءَ را ٹکر جتگ –

ھمے وڑ ءَ بیلہ آر سی ڈی دگ ءَ لنگڑو ءِ ھند ءَ شال ءَ دیم پہ کراچی ءَ رؤکیں اے جے موورز بس وئیل ءِ آماچ بیتگ –

وئیل ءَ زالبول ءُ چُکاں ھوار بیست مردم زدگ بیتگ اَنت –

ھال ءِ سر بیگ ءَ بیلہ پولیس ءُ ریسکیو ءِ کارمند سر بیتگ ءُ زدگ بیتگیں مردم بنداتی درمان ءَ بیلہ ءِ ھسپتال ءَ سر کنگ بیتگ ءُ گیشیں درمانی ءَ کراچی ءَ برگ بیتگ اَنت –

نبشتانک: رودپتر ءِ سیمی بھر

(سیمی بھر)

نبشتہ کار: شاؔری لال

دی بلوچستان پوسٹ

من ایران شُشت اَنت۔ مات پسانی کاہ ءُ کدیم کنگ ءَ پد آتکگ آت لوگ ءَ دست ئِے پیماز کَوٹگ اِت اَنت ءُ چم ئِے ماں وتگِند ءَ سک اِت اَنت وتی دوستیں کسمانک “وسو ءُ نشار ءِ مِڑ”ءَ چارگ ءَ اَت مات کہ یکبرے وتی چمّاں کسمانک ءِ تہ ءِ “وسّو ءُ نشار ءِ مِڑ” ءَ گِند اِیت آئی ءَ وتی کرّ ءُ گْور ءِ ھچ ھیال نہ بیت مات ءِ پُشت ءَ مئے لوگ ءِ مدامی ئیں دُزّیں پشّی ھما ایران ءَ چَٹّگ ءَ اَت کہ من شودگ ءَ بیھیال کتگ اَت من ھنچو کہ پشّی دیست پہ آئی ءَ زھر آتک دل ءَ گوشت گلین ئِے بلے نہ زاناں منی دل ءَ چونی ءَبزّگی یے آتک من ءَ پہ پشّی ءَ بزّگ بوت، ودار کت بِلّے وارت ءُ روت۔ ھنچوکہ پشّی ءَ من ءَ دیست یکدم چہ لوگ ءَ در آتک۔

من ھیران بوت آں اینچو وھد ءَ مات نندوک بوتگ چہ آئی ءَ نہ ترس اِتگ ئِے ھنچو کہ من ءَ دیست ئِے پرچا جِست؟ منی ءُ مات ءِ تہ ءَ چے تپاوت ھست کہ پشّی ءَ چہ مات ءَ نہ ترس اِت چہ من ترس اِت ئِے من وَ ھچبر پشّی ءَ را نہ جتگ، بلے انگت چہ من ءَ ترس اِت ئِے من جیڑگ ءَ پد ترانگ کپت آں کہ من ءَ رودپتر وانگی اِنت بلے من ءَ شُد ءَ جتگ اَت ورگ تیار نہ اَت مات نوکی پیماز کوٹگ ءَ اَت۔ من پریج پچ کت داں پریج ءَ چاکلیٹے ھست اَت من وارت شد کمو جھل کپت من پد ءَ شُت آں دومی لوگ ءَ رودپتر دیم ءَ کت۔

رودپر ءِ ھژدھمی تاک ءَ نویس اِتگ اَت “سھب کہ بوت من رند ءَ ترانگ ءَ کپت آں من بلاھیں ردی یے کتگ ءُ من ءَ سک اپسوز بوت اے ھاتر ءَ نہ کہ ما کاردام ءِ ویر بُرّ اتگ اَت، بلکیں اے سوب ءَ ویر بُرّگ ءَ پد ما ویر بُرّگ ءِ سوب ھما جاہ ءَ ایر نہ کتگ اَت کار ءِ کنگ ءَ ءَ پیسر من گوں سنگت ءَ سوڑگ کتگ ات وھدے ما ویر ءَ بُرّیں ھما ویر ءِ سر ءَ یک تاکے ءِ سر ءَ بیھارے دئیں کہ “دانکہ میتگ ءِ دامگ پچ کنگ نہ بیت، مارا ھشکیں کاردام ءِ زلورت نہ انت ءُ ھمے ڈول ءَ کاردام ءِ ویر ءَ بُرّیں”-

من پد ءَ سھب ءَ گوں سنگت ءَ وتی کارجاہ ءَ نندوک اتیں من ھمے گپ گوں آئی ءَ کت آئی ءَ ھچ بژن نہ بوت گشت ئِے مشکل نہ اِنت ھر وھد ویر پد ءَ شر کنگ بوت من تو ویر ءَ پد ءَ بُرّیں ءُ کاگز ءَ ھمود ءَ ایر کنیں من ءُ سنگت ھمے سوڑگ کنگ ءَ اتیں کہ مئے دروہ اتگیں سنگت سیہ گوک آتک ءُ اوشتگ ءَ گوں زھر زھر ءَ گشت ئِے ھاں شما ویر بُرّ اِت؟ ءُ پد ءَ یکدم شُت آئی ءِ اے گپ ءِ جنگ ءَ من ءُ سنگت ءَ سک کند اِت ءُ من گوشت سکیں بے اکلے ما اگاں ویر بُرّ اتگ پہ میتگ ءِ دیمروئی ءَ نئیکہ پہ کارزوالی ءَ۔

دو روچ گوست ما ودار ءَ اتیں چہ شھر ءَ کاردام ءِ شرکنوکیں یک گاڈی یے آتک میتگ درھیں ویراناں چار ات ئِے ءُ مئے ھما بُرّ اتگیں ویر ءَ را سِست ئِے دگہ نوکیں ویرے بِر کت اِش، کاردام ءِ ویر ھنچین ئِے اگاں آ یکبرے بُرّگ بہ بیت گڑا دوبر شر نہ بیت باید تیوگیں ویر ءَ دُور بہ کن ئے وھدے من سستگیں ویر دیست کہ سک مزن اَت گڑا من ءَ کمو درد بوت کہ کاردام ءِ کمپنی ءَ ما مزنیں تاوانے داتگ یکے بلاھیں ویرے زوال کتگ ءُ پد ءَ اِے ویر ءِ نھاد سک باز اِنت ءُ اینچوکیں راھے ءِ آیگ ءَ آھانی وھد زوال بوتگ ءُ پد ءَ گاڑی ءِ تیلانی سوچگ بلے من ناچار اِت آں کہ پہ میتگ ءِ دیمروئی ءِ ھاتر ءَ کمو کربانی دیگ لوٹ اِیت کاردام دوبر شر کنگ بوت آں ھما روچ ءِ روچ منی دلیریں سنگت آتک ءُ گوشت ئِے کاردام وَ پد ءَ شر بیتگ اَنت بریں دوبر پد ءَ ویر ءَ سِندیں بلے من آئی ءَ مکن کت کہ دو رو سبر کنیں گڑا پد ءَ بوت کنت کسے ویرانی پانگ بہ بیت ءُ مئے سر ءَ مشکلے مہ بیت ما دو روچ ودار کت ودار کنگ ءَ پد ویر ءِ بُرّگ ءِ بارو ءَ ما دوئیناں جیڑ اِت کہ نی ویر کجا ءُ چے وھد ءَ بُرّگی اِنت مئے اِے رندی دل ڈڈتر اِت ما روچ ء رھمی دیگر ءِ وھد ءَ چہ میتگ ءَ نیم ساھت ءِ دُوری ءَ ھنچیں جاھے ءَ شتیں کہ ویر ٹوھیں روڈ ءِ کش ءَ اَت ما سیکل شیپے ءِ تہ ءَ داشت پہ پند شتیں ویر ءِ گْور ءَ، منی سنگت کسانیں کوھے ءِ سر ءَ اوشتات ھمے ھاتر ءَ مردم کسیکہ آیگ ءَ بہ بیت آ من ءَ ھال دات بہ کنت من تیربرگ ءِ سر ءَ روگ لوٹ اِت بلے روڈ ءِ سر ءَ گاڈیانی سک روگ ءُ آیگ اَت من تیربرگ ءِ سر ءَ شت نہ کت من پد ءَ شُت آں شیپ ءِ تہ ءَ اوشت آں کہ روگ ءُ آیگ کمتر بہ بیت بلے اِے ھنچیں جاھے ات یک دمانے ءَ روڈ ھالی نہ اَت چہ گاڈی ءَ۔ پد ءَ ما اِے ھند ءِ کار ماٹو کت شُتاں دگہ جاھے ءَ کہ اود ءَ کَورے اَت ءُ گاڈیانی روگ ءُ آیگ کمتر اَت اود ءَ کہ ما شتیں من سیکل کَور ءِ تہ ءَ دازے ءِ بُن ءَ داشت منی سنگت شُت پہ آپدستے ءَ ءُ من ھرّگ زُرت شُت آں پہ وتی کار ءَ من تیربرگ ءِ سر ءَ آت آں ویر ءِ نیم بُرّ اِتگ لھتے گاڑی ءِ توار بوت من چہ تُرس ءَ تیربرگ ءِ سر ءَ چَہ دَور کُت شُت آں داز ءِ کش ءَ کہ گاڈی والا ءَ ھچ شک مہ بیت تنا وھدی منی سنگت آتک آئی گوشت تو ویر چی ءَ نہ بُرّ اِتگ من آئی ءَ گاڑی پیشداشت اَنت آئی ءَ گوشت تو سوچ گاڈیاں آئی ءَ منی دست ءِ ھرّگ وت زُرت شُت پہ تیربرگ ءِ نیمگ ءَ۔ ھنچوکہ گاڈی نہ بوت آئی ءَ ھما دمان ءَ ویر بُرّ اِت ءُ چہ تیربرگ ءَ ایر آتک جت ئِے کندگ ئِے گوش اِیت بہ روئیں من گوشت مروچی ھنچو نہ روئیں من شُت کاگزے ءِ سر ءَ بیھار ءَ دات ءُ بُرّ اِتگیں ویر ءِ سر ءَ لونجان کت ما پد ءَ ساری ءِ وڑ ءَ لوگ ءَ آتکیں۔ مئے لگوریں سنگت سیہ گوک ءَ زانت کہ اِے کار ما کتگ گڑا یکروچے گوں من دچار بوت گشت ئِے اگاں شما دوبر چشیں کار کت من شمئے راز ءَ پاشک کن آں۔ من آئی ءِ دل ءِ ھال ءَ سرپد اَت آں من دلجم اِت آں کہ ایشی ءَ چشیں جان نیست بلے اسل ءَ من رَد اِت آں اے بری یک ھپتگے ءِ گْوزگ پد کاردام دوبر شر کنگ بوت اَنت بلے دامگ انگت شر کنگ نہ بوت اَنت۔

اے سیمی رند ءِ ھاتر ءَ ما داں یک ھپتگے ءِ ودار کت کہ جاور گیگ بہ بنت مئے مشورہ ھمے بوت کہ اے بری ھما اولی شپ ءِ وڑ ءَ شپ ءَ روئیں بلے اِے رندی بازار ءِ دیم ءِ کور ءِ تہ ءَ چے ویر گوز اِیت ھمے کور ءِ تہ ءَ وتی کار ءَ کنیں چہ کار ءِ کنگ ءَ پیسر من ءَ یات آتک سیہ گوک ءَ گشتگ ات اگاں شما پد ءَ چشیں کار کت من شمئے راز ءَ پاشک کن آں، گڑا من چہ زِدّ ءَ آئی ءَ پیسر ءَ ھال دات کہ ما روگائیں وتی کار ءِ کنگ ءَ ترا ھرچ زھمے جنگی اِنت برو بجن۔
ما دوئیناں اے بری تھنا یک ھرّگے ءُ دو دانگ چادر زُرت اگاں کسے بہ گند اِیت گڑا مارا درس مہ کنت۔ ما سرشپ ءَ سیکل زُرت ءُ شُتیں من سیکل ھچ جاہ ءَ چیر نہ دات من شُت آں تیربرگ ءِ کَش ءَ سیکل داشت گوں اوشتگی جاہ ءَ من سیکل ءَ ایر نہ کپتگ اِت آں کہ تنا وھدی سنگت شُت ھما سھت ءَ ویر بُرّ اِت ما پہ تیزروانی واتر شُتیں۔

ما روگ ءَ اِتیں کہ راہ ءِ سر ءَ گاڈی یے اوشتاتگ اَت کہ مارا چو گمان بوت کہ بلکین ءَ ایجنسی ءِ گاڈی اِنت مئے وَ سیکل ءِ لیٹ پیسر ءَ بند اِت اَنت شپ ماھکانی اَت من سیکل یک دازے ءِ پُشت ءَ داشت ءُ چار اِت باریں چونیں گاڑی یے مئے راہ ءِ سر ءَ نندوک اِنت “من ءَ گمان بوگ ءَ انت اے گاڑی پہ مئے راہ ءِ بندگ ءَ نِشتگ” سنگت گشت کمو ھمد ءَ ودار کنیں دانکہ گاڑی بہ رُوت بلے گاڑی ھچ نہ شُت یکوئی گاڑی ءَ وتی لیٹ ویرانی نیمگ ءَ جت اَنت ءُ چارگ ءَ اَت من کہ گاڑی چو کنگ ءَ دیست من سِتک بوت آں اے گاڈی پہ مئیگی نِشتگ۔ منی جان ءِ پُٹ چِست بوت اَنت من ءَ تُرس ءُ لرزے ءَ زُرت من سنگت ءَ گوشت پہ اِد ءِ نندگ ءَ ما گنتر جنجالے ءَ کپیں شرتر ھمیش اِنت ما چد ءَ چِہ وت ءَ بہ کشّیں شرتر اِنت ھرچی آورتگ اللہ ءَ آورتگ ما دوئیں سیکل ءَ سوار بوتیں دیم ءِ راہ ءَ گاڈی اوشتوک اَت ما دگہ راھے گپت ءُ آھستہ آھستہ راہ گپتیں۔ نہ زاناں کدی گاڈی ءَ مارا دیست مئے پُشت ءَ پیداک اَت۔ وھدے کہ گاڈی من دیست مئے پُشت ءَ گون اِنت سیکل ءَ ھرچی شُت کت من بُرت پُشت ءَ چار اِت گاڈی لیٹ سر ءَ اشارہ دیگ انت۔ من ھچ جمپ ءُ چول نہ چار اِت بس روان اِت آں چکّے منی ءُ چکّے منی پُشت ءَ گاڈی ءَ چارگ ءَ ات آں باریں گاڑی نزیک اِنت یا دُور اِنت بلے گاڈی مئے پُشت ءَ کپتگ یل دیگ ءِ نام ئِے نہ زانت۔ من اوں چہ ترس ءَ برے راہ چار اِت ءُ برے پُشت ءَ گاڈی ءَ۔

من جیڑ اِت اگاں ما ایشانی دست ءَ گِرگ بہ بیں مئے ھال کچکانی ھال بیت ما اگاں گرگ بوتیں کے بہ زانت مارا کجام بھتام ءَ بندیگ کن اَنت سیکل گوں تیزی روان اَت من جیڑگ ءَ پد کمو پُشت ءَ چار اِت باریں گاڈی انگت دمبہ گون اِنت پُشت ءِ چارگ ءَ گوں سیکل چہ منی دست ءَ لگشت سرگ منی پُلکے ءِ تہ ءَ کپت دپ چہ ھاک ءَ پُرّ بوت۔ سنگت کہ پُشت ءَ سوار اَت چہ کپگ ءَ چہ منی سر ءَ گْوست دگہ سیکل ءِ انڈل ءِ سر ءَ شُت۔ من ھما سھت پاد آتک آں گاڈی چار اِت گاڈی دُور اوشتوک اَت من زانت آئی ءَ اے شپ ءَ مارا گار کتگ من ھچ نہ چار اِت کہ من یا سیکل چون اِنت سیکل چالو کت ما پد ءَ دوئیں سوار بوتیں۔ پد ءَ ھما گوں تیزی ءَ روان بوتیں کمو دُور روگ ءَ پد من مار اِت منی سروشک ءَ سُچگ ءَ اِنت نوں من مار اِت منی سروشک کپگ ءَ گوں کرّگ بوتگ۔ من سنگت ءِ ھال ءِ جست کت آئی ءَ گوشت من برابر آں۔ من شُت آں سنگت لوگ ءِ دپ ءَ روکیں بلب ءِ دیم ءَ سیکل اوشتارینت ما دوئیناں ھدا ءِ شکر گپت وتی ٹپ ءُ ٹوریں جاگہ چار ات انت منی دست انچو ھراب ات کہ چوکہ منی سیکل اَت سیکل ءِ میٹر۔ بریک لیور ءُ پیڈر پرشتگ اِت اَنت من سنگت ءَ آئی ءَ لوگ ءَ رسینت وت آتک آں لوگ ءَ۔ وھدے من لوگ ءَ آتک آں سروشک ءِ ھدّ ءِ آستونک کمو ھونین اَت نوں من زانت کہ چہ کپگ ءَ دست اوں ھونین بوتگ ءُ منی پُچ سک ھاکین اِت انت من شُت وت جان شُشت ءُ پُچ بدل کت اَنت نان ورگ ءَ پد رودپتر دیم ءَ کت۔

اے بری داں دَہ روچ ءَ کاردام گار بوت اَنت کس نیتک کاردام ءِ شَر کنگ ءَ پہ بے کاردامی ءَ منی بازیں کارے اوشتوک بوت۔ ءُ من مار اِت کہ میتگ ءِ درھیں مردم ھم ھمے آس ءَ سُچگ ءَ اَنت بلے من جزم اِت آں کہ من شَر کتگ، ھر کجا کہ من گشت آں ھرکس ءَ ویر گُڈّوکاں بدوا دات بلے من ھچ بد نہ مُرت چے ءَ کہ بدیں بدوا ھمائی ءَ گیپت کہ ردیں کارے بہ کنت من وَ پہ میتگ ءِ شرّی ءَ اے کار کتگ اَت دامگ ءِ شرّی سک باز اَنت کسے کہ بہ زانت بلے مئے میتگ ءِ بہ زانت ءُ بہ اگل ءَ کے سرپد کنت چرے شرّیں آسراتی ءَ۔

دھ روچ ءَ گیش گْوستگ اَت۔ کاردام گار اِت اَنت ھمک مردم سماگو اَت یک دو روچ ءَ پد آتک آدینگ ءِ روچ بوت من شُت آں مسیت ءَ آدینگ ءِ نماز ءَ ءُ واز ءِ گوشدارگ ءَ اے وھد ءَ کہ من مسیت ءَ شُت آں مسیت ءِ مولوی نہ یتکگ اَت من مسیت ءَ نشت آں چو ایدگہ مردمانی ڈول ءَ مولوی ءِ ودار ءَ کم کم ءَ مسیت چہ مردم ءَ پُرّ بوت مسیت ھنچو پُرّ بوت لٹّے دَور بہ داتیں بُن ءَ نہ کپت کمو ودار ءَ پد مولوی اوں آتک بلے اے روچ ءَ مولوی ءِ تب شَر نہ اَت چونائی ءَ مولویانی تب گیشتر ھراب انت ھمک وھد ءَ رنجیگ اَنت۔ بلے اے روچی من مار اِت ھبرے ھست اِنت۔ مولوی ممبر ءِ سر ءَ نِشت بندات ءَ تازی زبان ءَ یک ھدیسے ونت ئِے بس تیوگیں آدینگ ءِ واز ءِ جاہ ءَ مولوی ءَ کاردام ءِ جیڑہ ءِ سر ءَ گپ کت۔

آئی ءَ بندات ءَ دوبر ءَ شاکار اِت ءُ آئی ءَ وتی گپ چوش بندات کت اَنت کہ من آئی ءِ گپّاں گوں گونڈگیری ءَ درشان کن آں”-

مولوی ءَ وتی گپ بنا نہ کتگ اَت کہ مات ءِ توار چہ دومی لوگ ءَ آتک، “جنے بیا ورگ تیار اگاں ورئے” من وَ پیسر ءَ کمو شدیگ ات آں۔ بلے ھنو شد ءَ باز گْور جتگ اَت۔ وھد من چار اِت شپ ءِ دھ ءُ نیم اَت۔ من رودپتر ءِ دپ بند کت ءُ وتی سرجاہ ءِ سر ءَ ایر کت۔ پد ءَ من شت آں بورچی ءِ نیمگ ءَ پہ لاپ ءِ مان چینگ ءَ۔

روان اِنت

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نیشن پاٹی ءِ دمگی سروک عبدالغنی رند ءُ اُستانی ورکنگ کمیٹی ءِ رکن چیئرمین عمران بلوچ تھسیل ءِ سروک روشن جتوئی ءِ چیردستی ءَ چائینیز ءُ سندھ ءِ ٹرالزر بلوچستان ءِ زری سیمسراں لگتمال کنگ، گیر کانودی ءَ پترگ ءُ دریا وردانی لاپاں لگت جنگ ءِ بگیری ءَ لسبیلہ پریس کلب ءِ دیم ءَ زھرشانی کرتگ –

زھرشانی کنوکاں بلوچ زر ءَ گیرکانودی اتکگیں ٹرالنگ ءِ ھلاپ ءَ اوگام جتگ ءُ اشانی دارگ ءِ لوٹ کرتگ –

زھرشانی ءَ نیشنل پاٹی ءِ بازیں باسکے ھوار بیتگ ءُ ٹرالنگ ءِ ھلاپ ءَ بازیں مردماں زھرشانی ءَ تران کرتگ –

زھرشانی ءَ نیشنل پاٹی ءِ دمگہ سروک عبدالغنی رند، اُستانی ورکنگ کمیٹی ءِ رکن چیئرمین عمران بلوچ تھسیل سروک روشن جتوئی، جنرل سیکرٹعی جان مھمد بلوچ، تھسیل فنانس سیکرٹری علی دوست رند، تھسیل کسان کمک سروک بلال بلوچ ڈپٹی جنرل سیکرٹری سوفی مھمد مٹھل فقیر، بی ایس او (پجار) ھب زون ءِ سروک حفیظ بلوچ، غلام رسول بلوچ، مھمد شریف مری، نوید لاڈلہ رند، ستار بلوچ، عابد ملازئی، بشیر پیچواوں ءَ تران کرتگ-

تران کنوکاں گوشتگ کہ زر ءِ لمب ءَ آبادیں مھلوک ءِ زرکاری گوں دریا وردی ءَ بندوک اِنت گڈانی بہ گر داں جیونی ءَ لَکانی دریا ورد زر ءَ ماھیگ گر اَنت ءُ وتی زھگانی شد ءَ پروش اَنت –

آیاں گوشت کہ یک شوربندی ءِ درچ ءَ ھستیں سرکار بلوچستان ءِ زر ءَ وتی پنجگانی تہ ءَ آرگ ءُ وھد وھد ءَ دریا ورداں ھڑپ کنگ اِنت چہ سندھ ءَ داں بلوچستان ءَ زر ءَ گیر کانودی ٹرالنگانی درچ یکشل ءَ برجاہ اَنت ءُ نِی چائنیز ٹرالرزاں ھم دیم پہ بلوچ زر ءُ داتگ –

آیاں گوشت نا ایوک ءَ بلوچستان ءِ دریا وردانی لاپ ءَ لگت جنگ اِنت بلکیں زر ءَ ھستیں ماھیگانی نسل کُشی ءَ کنگ ءَ اَنت ءُ آیاں گوشت کہ بلوچستان ءِ زر ھما زر اِنت کہ آئی ءِ تہ ءَ ھر وڑیں ماھیگ ھست اَنت ءُ دنیا ءِ تہ ءَ آیانی نھاد سک گران اِنت –

آیاں گوشت کہ اے ٹرالر وتی نپ ءِ واستا ھما رنگ ءَ دام ءَ چیر کن اَنت کہ ماھیگانی ھمراھی ءَ ماھیگانی ھیک ھم روپگ ءُ برگ بیگ ءَ اَنت ءُ چریشی ءِ سبب ءَ گران نھادیں ماھیگانی ھلاسی ءَ گوں بروبری اِنت –

آیاں گوشت کہ چریشانی سبب ءَ نیزگاریں دریا ورد ھُشکیں دستاں واتر اَنت ءُ آیانی لُنٹ ھشک دابی ءَ اَنت ءُ اے بلوچستان ءِ مھلوک ءَ گوں ٹوھیں زُلمے بیگ ءَ اِنت –

آیاں گوشت کہ بژن اِنت اُستان ءِ سرکار تنی وھدی واب اِنت ءُ ھچ گوشگ ءَ نہ اِنت چریشی ءِ نیموناں ھمے سما بیت اِنت کہ آئی ءَ ایوک ناں دزیں ٹرالرزاںی گون ءَ ھوار اِنت بلکیں آئی ءَ بلوچ زر کم نھادیں دامانی گور ءَ بھا کنگ ءِ پیسلہ کرتگ –

آیاں گوشت کہ اے گیر کانودی گامگیجانی ھلاپ ءَ نیشل پاٹی المیں گھگیری کنت –

آیاں گوشت کہ گوادر دریا وردانی میتگ اِنت بلوچستان ءِ سرجمیں زر ءِ لمب ھمے روزگار ءَ گوں بندوک اِنت بلے گوادر ءَ اے ھاسیت ھست اِنت کہ ابرم ءِ نیمگ ءَ ڈیپ سی، یا جھلیں زر ءِ بوگ ءَ اود ءَ سال ءِ دوازدھیں ماھاں ماھیگیری بیت اِنت –

آیاں گوشت کہ سرکار ءِ نادلگوشی ءَ گیرکانودی ٹرالنگ ءِ سبب ءَ اود ءَ دریا ورد ھمک شکار کنگ ءَ پد گوں کمیں زراں ھمے جیڑ اِیت کہ باریں اے زر منی لوگ ءِ ھرچ ءَ پور ءَ کرت کن اَنت یا ناں –

آیاں گوشت کہ بلوچ راج ءَ ھمک وھد ءَ سبزاوگیں باگ ءَ پیش دار اَنت ءُ آیانی دلاں وش کن اَنت ءُ آیاں رپین اَنت سی پیک ءِ سبب ءَ بلوچ مھلوک نیست ءُ نابود کنگ بیگ ءَ اَنت پائدگ پنجاپ ءُ تاوان بلوچستان ءَ گندگ بیگ ءَ اَنت اے کجام دیمروئی اِنت کہ سی پیک ءِ بنریشگ گوادر دراھیں آسراتیاں زبھر اِنت اود ءَ مھلوک ءَ ترمپے آپ نُک ءِ تر کنگ ءَ نیست اِنت ءُ آیاں آیانی ھک ءُ سرزمین پُلگ بیگ ءَ اِنت –

آیاں گوشت کہ اے ھچ دیمروئی نہ اِنت کہ ھما جاہ ءَ ما وتی زمین ءِ سر ءَ گلینگ ءُ لڈینگ بیگ ءَ اِنت ءُ راستی ءَ اگاں سی پیک پہ بلوچاں بہ بیت اِنت گڑا آئی ءِ مستریں پائدگ بلوچستان ءُ گوادر ءَ بہ رس ایت اِنت مہ اود ءَ مھلوک وتی ازابیں زند ءِ گوازینگ ءَ لاچار اَنت –

سی ٹی ڈی ءَ یک رندے پد ءَ پیسر ءَ دزگیر ءُ بیگواھیں مردم کُشتگ اَنت ءُ آ دیم پہ دیمی جنگ ءِ نام داتگ اَنت، دمگی مردمانی رد ءَ گوستگیں روچاں بلوچستان ءِ بنجاھی شھر شال ءَ سی ٹی ڈی ءِ دروگیں دیم پہ دیمی جنگ ءَ کُشگ بیتگیں مردم پیسر ءَ آوار جنی ءَ پد بیگواہ کنگ بیتگ اَنت –

سی ٹی ڈی ءَ ٹاہ داتگ اَت کہ دی ٹی ڈی ءُ ناشرکارانی میان ءَ تیرگواری ءَ پنچ مردم کُشگ بیتگ اَنت، بلے واکداراں کُشتگیں مردمانی نام پدر نہ کرتگ اَنت –

دی بلوچستان پوسٹ ءَ پَٹ ءُ پول ءَ پد یک مردمے ءِ پجار کنگ ءَ سوبمند بیتگ کہ آئی ءِ پجار بلوچستان ءِ دمگ ھاران ءِ ورنا قدرت اللہ ء مھمد وارس ملازئی ءِ نام ءَ زانگ بیتگ –

قدرت اللہ سَے ماہ ءَ پیسر سیکورٹی فورسز ءَ ھاران ءَ آئی ءِ لوگ ءِ سر ءَ بیڑ برتگ ءُ آوار جتگ ءُ بیگواہ کرتگ اَت کہ دو روچ پیسر سی ٹی ڈی ءَ دروگیں جنگ ءِ نام ءَ کُشتگ –

زانگ بہ بیت اے اولی وئیل نہ اِنت کہ بوگ ءَ اِنت چریشی ءَ پیسر سی ٹی ڈی ءَ دزگیر کرتگیں مردمانی کوشانی دزمانجن اِنت –

ھمے سال ءِ ھژدہ جنوری ءَ بلوچستان ءِ بنجاھی شھر شال ءِ رودراتکی شھدگ ءِ سر ءَ پاکستانی پوج ایگل اسکواڈ ءَ پٹ ءُ پول ءِ وھد ءَ دو ورناہ سمیع اللہ پرکانی ءُ جمیل اھمد پرکانی دزگیر کنگ ءَ پد سی ٹی ڈی ءِ دست ءَ داتگ اَنت ایگل فورس ءَ ٹاہ داتگ اَت گپتگیں مردمانی گور ءَ دزبمب دز کپتگ –

ھردوکیں ورنا پد ءَ سی ٹی ڈی ءَ مستونگ ءَ دگہ سَے مردمانی ھمراھی ءَ کہ پیسر ءَ دزگیر کنگ بیتگ اَنت ءُ دروگیں جنگ ءِ نام ءَ کُشتگ ءُ چگل داتگ اَنت –

اگست سال دوھزار ءُ بیست ءَ ھم ھمے وڑیں وئیلے درپیش بیتگ اَت کہ راجن پور ءَ پیش اتکگ اَت اود ءَ پولیس ءَ پنچ مردم جنگ ءِ نام ءَ کُشگ ءِ ٹاہ داتگ اِت اَنت ءُ پد ءَ بلوچ سیاسی تکاں بندوکیں پاٹیاں پولیس ءِ ٹاہ رد کرتگ اَت –

گوستگیں ماہ جون ءَ سی ٹی ڈی ءَ ٹاہ داتگ اَت کہ لشکر کشی ءِ وھد ءَ فورسز ءُ سلاہ بندیں مردمانی میان ءَ تیرگواری بیتگ چریشی ءَ چار مردم کُشگ بیتگ اَنت ءُ بیڑی ءِ وھد ءَ شش مردم تتکگ ءُ شتگ اَنت –

جارکش ءَ دیمتر ءَ گوشتگ اَت کہ ناشرکارانی کارمرزی ءَ کمپاؤنڈ ءِ تہ ءَ بازیں کَچے ءَ سلاہ دزکپتگ اَنت – سی ٹی ڈی ءَ اے ٹاہ داتگ اَت سلاہ بندیں گل ءِ باسک چہ یک ماھے ءَ پوج ءِ سر ءَ اُرشاں ھوار بیتگ اَنت –

دومی نیمگ ءَ دی بلوچستان پوسٹ ءَ پَٹ ءُ پول کرتگ ءُ راستگیں ھالانی پکاہ کنگ ءَ پد یک مردمے ءِ پجار کنگ ءَ سوبمند بیتگ اَت – کہ پیسر ءَ سالاں بندیگیں مردمے بیتگ اَت آ دگہ سَے مردمانی ریش ءُ میداں زانگ بیتگ اَت اے مردم پیسر ءَ دزگیر ءُ بندیگیں مردم اَنت –

دمگی مردمانی ٹی بی پی ءَ گوں گپ کنان ءَ گوشتگ کہ کُشگ بیتگیں مردمانی تہ ءَ ملا مادو مزارانی مری ھوار اِنت کہ آ دو سال ءَ پیسر شال ءَ جتک اسٹاپ ءَ لوگ ءِ تہ ءَ پاکستانی پوج ءُ چیریں ادارھاں آوار جتگ ءُ بیگواہ کرتگ –

نبشتانک: جولس فیوچک ءُ حمید بلوچ

نبشتہ کار : جاوید بلوچ

دی بلوچستان پوسٹ

جولس فیوچک 23 فروری 1903 پیراگ ءَ ودی بوتگ آئی ءِ پت پولاد ءِ کارجاه ءَ پوریاگِرے بوتگ فیوچک شانزده سال ءِ اُمر ءَ پوریاگِر زُرمبِشت ءَ بَهر زوریت آئی ءَ پیراگ ءِ مزن شاهدربرجاه ءَ چہ لبزانک ءُ ساز ءُ زیمل ءِ بابت ءَ ونتگ هردیں کہ جرمنی ءِ زوراکیں هِٹلر چیکوسلواکیہ ءِ سر ءَ کبزه کنت گڑا آیانی جند ءِ گُلزمین ءَ آیانی واست ءَ جَهنم جوڑ کنت چیک راج ءِ سر ءَ زُلم ءُ زوراکی کنت اود ءِ مردمانی ننگ ءُ ناموس ءُ اِزت ءِ پادمالی کنت هَمُک نیمگ ءَ تُرس ءُ بیمّ بیت گڑا چیکوسلواکیہ ءِ  مردمانی جذبگ ءُ نپرت نوکیں پُسّگ ودی کنگ ءَ ات اِنچو پیراگ بے توار اَت اے مَرگ ءِ بے تواری نہ ات غصہ ءِ بیرے ات –

همے نپرت ءُ جذبگاں فیوچک ءِ رنگیں هستی ءُ نڈریں مردمے نازیّانی زوراکیانی بَگِیری ءَ توار چِست کنگ ءِ هِمّت ، هاٹیگ ءُ بودناکی دات هردیں کہ آئی ءَ نازی سپاهی دیست انت گڑا آئی مُشت بند بوت انت جان ءِ رَگّ تِرنْگ گِپت انت ءُ آئی ءِ دیم ءِ سر ءَ نپرت ءِ مزن مزنیں لکیر گندگ اَتک آئی ءَ نازی هکومت بیهار دات ءُ آئی ءِ هِلاپ ءَ جْوانیں رنگے ءَ کار کرت گڑا چرے سوب ءَ فیوچک دزگیر کنگ بوت آ یکّ سال ءُ چار ماه جیل کنگ بوت مرگ یَکوئی آئی ءِ چمّانی دیم ءَ ناچ کنگ ءَ ات آ هَمُک روچ ءَ گْڈی روچ ، هَمُک شپ ءَ گُڈّی شَپ فَهمگ اِت ءُ گْوازینت همے جیڑگ ءُ یاتانی تہ ءَ ات کہ نازی آں 25 اگست 1943 ءَ پہ دائمی واست ءَ فیوچک بے توار کرت اِیردَستیں راجانی بامرد جوڑ کرت فیوچک وتی کتاب هما کہ بندی جاه ءِ تہ ءَ Notes from the Gallows نبشتہ کرتگ ، آ گْوش ایت هردیں کہ من ءَ سیاه ءُ تهاریں بندی جاه ءِ تہ ءَ آرت اش گڑا اچ من چہ جُست گرگ بوت کہ زندگی چون اِنت من گْوشت من نہ زان اوں بلے اِش کرتگ باند ءَ من ءَ پاهو دیگ بیت پد ءَ آئی ءَ جُست کرت تو نہ ترس ئے؟ ترا ترس مارشت نہ بیت؟ پد ءَ فیوچک گْوش ایت من لیکهی دِرچ ءَ مَرگ ءِ واست ءَ تیار اوں-

یک پولیس ءِ سپاهی ءَ اچ من چہ جُست کرت چے کلوه وتی مردماناں دیگ لوٹ ئے—؟؟
گڑا فیوچک هَبکّہ بیت کہ اِے مردک اچ من همدردی کنگ ءَ انت ءُ ایشی ءِ وردی ءَ چہ درستیں چیک راج ءِ هون ءِ بو آیگ ءَ اِنت ایشی ءِ بوٹاں چہ هزارانی کساس ءَ چیک راج  لگت مال کنگ بوتگ آ وردی ءَ مئے ماس ءُ گھارانی ازت تار تار کرتگ آ ودری ءَ مئے آجوئی پچ گپتگ همے ودری ءِ تہ ءَ انسان دوستی ءِ دست منی دست ءَ دیگ بوگ ءَ انت آئی نام کونسکی ات آ چیک راج ءِ مردکے اَت- من راجی درد مار اِتگ وتی نوکری ءِ پرواه کنگ ءَابید فیوچک ءِ کمک کرت رند ءَ آئی ءَ را نوکری ءَ چہ کشگ بوت –

فیوچک وتی کلوه ءِ تہ ءَ گْوش اِیت زندگی ءَ چہ بے  کساس مهر ءُ محبت بوتگ مهر ءُ زندگی ءِ زیبائی ءَ من ءَ جنگ ءِ واست ءَ پِڑا دیم داتگ انساناں من ءَ شما چہ مِهر بوتگ من آ وهد ءَ باز گل ءُ شات باں هردیں کہ شما منی رند گیری ءَ کن اِت زالم ءِ هلاپ ءَ هکّ ءِ گپّ ءَ کن اِت وتی ماس ءُ پس ءَ را گْوش ایت من پہ وشی ءُ شاتمانی ءِ واست ءَ زندگ اوں وشی ءُ شاتمانی ءِ واست ءَ جان دیگ ءَ اوں همے واست ءَ منی کبر ءِ سر ءَ گَم ءِ بُت ءَ مہ جن ات ءُ منی گوم ءَ نا انصافی مہ کن ات بلے اے راستی یے فیوچک مریت هم مروچی زندگ انت همے وڑ ءَ فیوچک ءِ رنگ ءَ حمید بلوچ ءُ آئی مردمانی سر ءَ جنرل ضیاء ءِ وهد ءَ جند ءِ گلزمین ءَ پہ آیانی واست ءَ جهنم جوڑ کن انت، بلوچستان ءِ تہ ءَ زلم ءُجبر ءِ بازار ءَ گرم کن انت گلزمین زهگ حمید بلوچ گوں زانت ءُ سرپدی ءَ آشوب ءِ  دَگّ ءَ گچین کنت زَالمِیں هُکمران ءِ هلاپ ءَ گَھگِیری کنت بلوچ ورنایاں زوراکیانی هلاپ ءَ توار چست کنگ ءِ واست ءَ تیار کنت-

جهد کنت همے گوش ایت مدام زلم ءِ آماچ بوتگیں مردمانی کُمکّ ءَ بِہ کَن اِت ءُ زُورَاک ءِ زُورَاکیانی دیم ءَ بوشت اِت، هردیں کہ جنرل ضیاء بلوچ ورنایاں مسقط ءِ فوج ءَ بهرتی کنگ ءِ جهد کنت گڑا حمید ءَ سک باز درد بیت همے گوش ایت یک ایردستیں راجے ءَ را دُهمِی لَگتمالیں راجے ءِ واست ءَ کارمرز کنگ اے اِستانی پندل انت ایش را بے سوب بہ کن ات آئی ءِ سر ءَ باز رند ءَ تیرگواری کنگ بیت آئی ءِ کوشگ ءِ باز رند ءَ جهد کنگ بیت پد ءَ رند ءَ حمید بلوچ پاهو دیگ بیت بلے گڈی وهد ءَ تاں ثابت قدم بیت ءُ مریت هم زندگ انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

1966 ءَ پد اولی رند اِنت انگلینڈ ءَ مزنیں جاھے ءَ وت ءَ سر کرتگ ءُ آئی ءَ باج بران کرتگ ءُ وت ءَ سیمی پائنل ءَ وت ءَ سر کرتگ –

یورو کپ سیمی پائینل ءِ دومی گوازی ءَ انگلینڈ ءَ ڈینمارک ءِ دیم ءَ دو گول ءَ باج برتگ ءُ وت ءَ پائینل ءَ سر کُتگ –

یوئیفا یورو کپ فٹبال گوازی برجاہ انت دوشی شپ ءَ سیمی پائینل ءِ دومی گوازی ڈینمارک ءُ انگلینڈ ءِ میان ءَ بوتگ – دوشیگیں گوازی ءَ ڈینمارک ءِ نیمگ ءَ یک گولے اسکور کنگ بوتگ وھدیکہ انگلینڈ ءِ نیمگ ءَ دو گول اسکور کنگ بوتگ – ڈینمارک ءِ نیمگ ءَ ڈینمارک ءِ لیبی میکل ءَ یک گول ءِ داتگ وھدیکہ انگلینڈ ءِ لیبیاں جوانی ءَ گوازی کنان ءَ انگلینڈ ءِ لیبی سیمن ءُ ھیری ءَ یک یک گولے اسکور کتگ باج برتگ ءُ وت ءَ پائینل ءَ سر کتگ –

زانگ بہ بیت یوئیفا یورو کپ ءَ بیست ءُ چار ٹیماں بھر زرتگ ءُ بیست ءُ چار ٹیمانی تہ ءَ اٹلی ءُ انگلینڈ ءِ لیبیاں جوانی ءَ گوازی کنان ءَ وت ءَ پائینل ءَ سرکتگ – انگلینڈ ءُ اٹلی ءِ میان ءَ پائینل گوازی یانزدہ جولائی ءَ یکشمبے ءِ روچ ءَ ویمبلے پٹ ءَ بوگ ءَ انت –

ھستیں وھد ءِ سرکار مشرف ءِ دور ءِ رندپدانی رندگیری ءَ کنگ ءَ اِنت -ماما قدیر بلوچ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ چار ءُ ھزار سَے سد ءُ شست ءُ ھشت روچ سرجم بوتگ – چہ مستونگ ءَ سیاسی ءُ چاگردی باسک عبدالستار بلوچ، زبیر بلوچ ءُ دگراں بنجل ءِ تر ءُ تاب کرتگ ءُ بیگواھیں مردمانی کھولانی گوم ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ وتی ھیال درشان کتگ ءُ گوشتگ کہ بلوچستان ءَ زلم ءُ زوراکی لٹ ءُ کُٹ لُٹ ءُ پُل ءُ ایردستی ءِ بگیری ءَ بلوچ راج ءَ توار چست کتگ ءُ پُرایمنیں جھد ءِ بندات کرتگ، بندات ءَ کمے بلوچ ھوار بوتگ ءُ وی بی ایم پی ءَ پُرایمنیں جُھد ءِ بنھشت ایرکتگ –

آئی ءِ گوشگ اَت کہ زورگیر ءَ لٹ ءُ کٹ، زلم ءُ زوراکی ءِ تہ ءَ گیشی آورتگ ءُ ھزارانی کچ ءَ بلوچ شھید کنگ بوتگ انت ءُ ھزارانی کچ ءَ مردم ریاستی زوراکی ءُ زنداناں ازیت سگگ انت –

ماما قدیر بلوچ ءِ گوشگ ات کہ بلوچستان ءِ تہ ءَ زیادتی ھنچو گیش بوتگ کہ سرکار ءِ جندے گلانی لھتے باسک زورانسری آوارجنی کُشت ءُ کوش ءَ ایرجنگ ءَ انت – بلوچ راج ءَ درساں چہ مستریں ھترہ چہ ریاستی اجنسیانی نیمگ ءَ انت کہ زورانسری اوار جن انت ءُ کُش انت –

آئی ءِ گوشگ ات کہ ھستیں وھد ءِ سرکار ءَ مشرف دور ءِ رندپدانی رندگیری ءَ کنگ ءَ اِنت اگاں تاکت ءِ زور ءَ راج ءِ واھشت ایرموش کنگ بوتیناں گڑا اے دنیا ءِ سر ءَ ھمائی ءِ راج بوتگ ات کہ کہ آئی ءَ درساں پیش وت ءَ یک سلاہ بندیں ٹولی ءِ وڑ ءَ مھکم کرتگ ات-

جھانی نادراھی کرونا نادراھی ءِ نوکیں درچ ءَ بازیں ڈیھ وتی لپاش ءَ زرتگ اَنت ءُ بازیں ڈیھاں جنجالانی دیمپانی اِنت –

ھمے وڑ ءَ کرونا نادراھی ءَ بلوچستان ءَ بیست ءُ چار ادارانی تہ ءَ دو مردم بیران بیتگ اَنت ءُ یک سد ءُ شش نوکیں کیس رپورٹ بیتگ اَنت –

بلوچستان ءَ سرجمیں بیرانیانی کچ سَے سد ءُ ھبدہ ءَ سر بیتگ اَنت ءُ گوستگیں بیست ءُ چار ادارانی تہ ءَ دو کس بیران بیتگ اَنت –

جانسلامتی ءِ نیمگ ءَ شنگ بیتگیں رپورٹ ءِ رد ءَ اُستان ءَ ھبدہ جولائی ءَ کرونا ءِ نادراھی ءَ دگہ دو مردم بیران بیتگ اَنت بیران بیتگیں مردمانی کچ سَے سد ءُ ھبدہ ءَ سر بیتگ اَنت –

جانسلامتی ءِ نیمگ ءَ شنگ بیتگیں رپورٹ ءِ رد ءَ بیست ءُ چار ادارانی تہ ءَ یک سد ءُ شش نوکیں مردماں کرونا نادراھی پدر بیتگ اَنت –

جانسلامتی ءِ رد ءَ بیست ءُ چار ادارانی تہ ءَ کرونا وائرس ءِ شنگ بیگ یازدہ ٹِک شانزدہ بیتگ ءُ رپورٹ ءِ رد ءَ گوستگیں روچ ءَ نُھ سد ءُ پنجاہ مردمانی ٹیسٹ کنگ بیتگ اَنت ءَ یک سد ءُ شش مردماں کرونا نادراھی پدر بیتگ اَنت –

نبشتانک: شھید ءِ وتن ناکو شریپ

نبشتہ کار: الی شیر بلوچ

دی بلوچستان پوسٹ

چونا بلوچ سر ڈگارے ما کبز ءَ گیری ءَ بہ چاریں ھر بلوچ ءِ پرز بیت کہ وتی وس ءَ وتی سر ڈگارے رکینگ ءِ ھاترا کربانی بداں وتی بگیری ءِ ھلاپ ء جھد بہ کنت اے تھنا یک بلوچے ءِ پرز نہ اِنت کَل بلوچانی پرز,انت ھرکس اے بگیری ءِ ھلاپ ءَ جھد بکنت جنگ بہ کنت وتی سرڈگارے ھک ءَ اد ءَ بکنت ھمے وڑا بازیں بلوچے روچ ء مروچی گوں دژمن ءَ پہ سرڈگارے آجوئی ءِ ھاترا جنگ کنان ءُ وتی سرانی دیمونی ءَ دیگ ءَ انت چاہے کجام مکتبے شکل بہ بیت ماسٹر ڈاکٹر شوانگ دوکاندار ءُ نودربر ءُ دانشور مروچی وتی جنانان کربان کنگ ءَ انت شھید ناکو شریپ ھمے مکتبے پگرانی رد ءَ ھوار انت شھید ناکو شریپ دوھزار 2009 ءَ یک برے ماں پا پوریاگری ءَ پہ لاپ گژنءِ ھاترا ماں ( دبئ بزاں عمارت ءَ رؤت آ ھمود ءَ ,چیزے وھد پہ پوریاگری ءَ باگے ءَ کارا بیت بلے اے وھد ءَ بلوچستان ءِ تہ ءَ بلوچ آجوئی زرمبش گیش چہ گیش,بوان ات ھر بلوچے ءِ دل ءَ زرمبش ءِ آچ پتاھان ات ھرکسی دل ءَ یک جزبگے ودی بوان ات ھرکس ءَ گوشت کہ من اے زرمبش ءَ پشت مہ کپاں شھید ناکو ھم ھمے ورنایانی جزبگ ءُ پگرانی تہ ءَ ھوار ناکو ءَ ھم سر ڈگارے روکیں گلامی ءِ آچ برداشت نہ کت آ اوں ( دبئ عمارت ءَ ھمے سال ءَ مھتل نہ بوت پد ءَ واتر وتی سرڈگار ءَ اتک آ گڑا دو ھزار ءَ 2009 ءَ بلوچ مزاحمتی گل بی آر اے جوائن کرت آ ھمود ءَ گوں خلوص ءُ ایمانداری ءَ وتی جھد ءَ بندات کنت ناکو یک ایماندار ءُ دل پھکیں جھدکار ءِ بیت شپ روچ پہ کوم ءُ سر زمین ءِ واستہ جھد کنت آ پہ کوم ءُ گل ءِ واستا ھچ وڑا کارے ءِ واستا چک ءُ پد نہ بیت آ ھمے وڑا گل ءِ کسانیں نیٹ ورکے ءِ زمہ دار جوڑ کنگ بیت زمہ دار جوڑ بوگ ءَ پد ناکو گیشتر مھکم ءُ ایمانداریں جھدکارے جوڑ بیت چہ ناکو ءِ ایمانداری ءُ دلیری ءُ مکلسی ءَ بازیں ورنایے ھم ناکو ءِ ھمراہ داری ءَ پہ بلوچ ءِ بگیری ءِ ھلاپ ءَ ناکو ءِ سرپ ءَ اوشتیت گوں ناکو گوں ورنایانی جزبگ ءَ دوھزار ءُ چاردہ ءَ گڑا بلوچ ءِ جھد یک جوانیں رنگے ءَ دیم ءَ بارت ءُ 2014 ءَ یک اوتاکے ءِ بزان کیمپ کمان ءِ زمہ داری دیگ بیت اَنت ءُ ناکو داں آ روچاں بگر داں روچ ء مروچی ھما جھد کار ات ھما وڑ مھکم ءُ مزبوت ات ناکو ءِ پگر ءُمارشت چو کوہ ءِ البرز ءُ سیاجی ءُ دڑامب ءَ برزتر ءُ مزن ات ناکو اے نگیگیں ساھتاں تُشے ھم بدل نہ بوتگ ات ناکو ءَ داں گڈی ءَ شھادت ءِ امبر ءَ وتی راجی دوستی ءُ ایمانداری نہ شموشتگ ات بلوچ راج دپتر داں ھست انت شھید ناکو شریپ ءِ کربانیانی کرد ءُ آسر مان انت ناکو وتن یک دیوانگ ءُ مولانگیں انسانے ات پمیشکا ناکو ءَ وتی سر ءُ جان پہ سرڈگارے آجوئی ندر کت انت سھریں دروت شھید ناکوشریپ ءُ راج ءِ کُلیں شھیداں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔