نبشتانک: بے تپاکی ءِ آسر
نبشتہ کار: آئیشہ بلوچ
رجانک: پاتما بلوچ
دی بلوچستان پوسٹ
وھدیکہ بلوچستان ءِ بھر ءُ بانگ ءِ باوست بیت گُڑا مارا بے کساس درد بیت ءُ مئے دل ھم ھونیں ارس گْوار ایت کہ سرڈگار وَ مئیگ اِنت بلے مئے دژمن مئے مال ءُ مڈّیاں پُلان ءُ مئے ماتیں سرڈگار ءَ بھر ءُ بانگ کنگ لوٹ ایت۔ البت ما اِے کاریچ ءَ ھجبر موکل نہ دے ایں بلکیں وتی ھون ءِ گُڈی ترمپ ءُ ساھاں ندر کنان ءَ وتی سرڈگار ءِ پھریزگ ءُ بلوچ ھَکّ ءِ ھاتر ءَ جُھد ءُ گپ کن ایں۔
بلے من ءَ لگ ایت کہ دژمن مارا بھر ءُ بانگ نہ کنگ ءَ ایں بلکیں ما وت دژمن ءَ موہ دیگ ءَ ایں کہ مارا بھر ءُ بانگ بہ کنت۔ بہ گِند ئے اِے مرچیگیں بھر ءُ بانگ ءِ زمہ وار ما بلوچ راج وت ایں چی ءَ کہ ما یکجاہ ءُ یکمُشت بوگ ءِ جاہ ءَ ما چہ یکدومیگ ءَ جُتا بوگ لوٹ ایں پمیشکا دژمن چہ مئے بھر ءُ بانگی ءَ پائدگ زِیران ءَ مئے سر ءَ ٹوھیں زُلم ءُ زوراکی کنان اِنت بزاں ما وتی بیرانی ءِ زمہ وار ما وت ایں، دژمن ءَ انچو زور ءُ ھاٹیگ مان نیست اِنت۔
ھما وھد ءَ کہ بی این ایم ماں دو بھر ءَ پْروشت گُڑا ما چو گُنگ ءُ کَرّ ءِ لیکہ ءَ بے توار بوت ایں۔ وھدے بلوچ نودربری گل بی ایس او ھم پْروشت ءُ پْروش ءِ آماچ بوگ ءَ اَت گُڑا اود ءَ ھم ما بے توار ات ایں نی چیزے روچ ما گِندگ ءَ ایں کہ بساک ھم دو بھر بوگ ءَ اِنت گُڑا اِد ءَ ھم ما بے توار ایں کہ اِے مئے جیڑہ وَ نہ اِنت بلکیں گل ءِ رھبندی جیڑہ اَنت۔ اگاں گل ءِ رھبندی جیڑہ اَنت گُڑا ما وَ وتی کھتکاری ءِ ھساب ءَ سرسوج کُت کن ایں۔ چوناھیگا بے تواری ءَ ھمے جیڑہ ھم گیش ءُ گیوار وَ نہ بنت اگاں بوتین اَنت گُڑا باسک بھر ءُ بانگ ءِ آماچ نہ بوتگ اَت اَنت۔
چوناھیگا اگاں ما ماں یک گلی پِڑے ءَ یکجاھی ءَ کار کُت نہ کن ایں، یکدومیگ ءَ اوپار نہ کن ایں گُڑا ما ھمے گل ءِ پْروشت ءُ پْروش ءَ ھم داشت کُت نہ کن ایں۔ چریشی ءَ زاھر اِنت مئے ھال وَ ھمے وڑ ءَ بنت کہ ما مرچاں گِندگ ءَ ایں! ما تھنا پژن گْوش ایں۔ بلے ما تچک بِہ بَہ ایں کہ ما ھچ جُھد کُت نہ کن ایں داں وھدیکہ کہ ما یکدومی ءَ امباز مہ کن این ءُ یکدومیگ ءَ اوپار مہ کن ایں گُڑا مئے دژمن ھم مارا ھمے داب ءَ زُلم ءُ زوراکی کنت۔
وھدے کہ تو پوسٹ کن ئے “من بساک ءِ باسکے نہ آں” گُڑا اد ءَ زاناں تو رَد ئے یا شکیل اِنت۔ گُڑا دوئیناں گوں مئے دزبندی اِنت کہ آ دوئیں وتی زاتی جیڑھاں ھلاس بہ کن اَنت ءُ بساک ءَ پْروشت ءُ پْروش ءِ آماچ مہ کن اَنت کہ ھزارانی کچ ءَ نودربرانی اُمیت گوں ھمے گل ءَ ھمگرنچ اَنت۔ بژن اِنت کہ سدانی کچ ءَ من ءَ مردماں کمنٹ کُت ءُ گْوشت کہ تو پوتاری کنگ ءَ ئے تو بساک ءِ باسکے نہ ئے گُڑا ترا ھَک ءُ موکل نیست اِنت کہ تو اِے بابت ءَ چیزے دْرنگازی بہ کن ئے۔
البت اِے وَ راستی یے کہ من بساک ءِ باسکے نہ آں بلے من بلوچ نودربری گل(بی ایس او) ءِ دپتر جْوان ونتگ ءُ دلگوشی ءِ وانگ ءَ پد من ءَ مار اِت کہ ھمے بی ایس او ءِ بھر ءُ بانگی ءِ آسر ءَ راجدوست ماں راجی جُنز ءَ بازیں ڈنگر ءِ آماچ بیتگ اَنت پمیشکا من نہ لوٹ آں کہ بساک ءِ وڑیں گلے بھر ءُ بانگ ءِ آماچ بہ بیت بلے اِے بھر ءُ بانگ لھتیں مردمانی نگرانی ءَ بیتگ۔
ھما روچ کہ من پوسٹ کُت “اگاں بساک ءِ جیڑہ گیش ءُ گیوار نہ بوت اَنت گُڑا ماں راجدپتر ءَ نواب ءِ نام گِیرآرگ بیت”
گُڑا لھتیں مردماں زاہ ءُ زکتیں کمنٹ نبشتگ اَنت کہ بھر ءُ بانگ ءِ زمہ وار نواب نہ اِنت۔ البت بِہ گِند ئے نواب وَ گل ءِ پاگواجہ اَت اگاں بودی یے بیت اِنت ئِے گُڑا باید اِنت آئی ءَ باسک یکجاہ بہ کُتین ءُ گل ءِ رھبندی جیڑہ وت ماں وت ھلاس بہ کُت انت ءُ اِے جیڑہ دیم ءَ مہ شُتیں ءُ بساک ءِ بھر ءُ بانگ کس ءَ مہ جیڑ اِتیں ءُ گُڑا وتی باسک ئِے ھم سنبھال اِتیں۔ البت کس ءِ توار ئِے دلگوش نہ کُتگ، جیڑہ ئِے ھلاس نہ کُتگ گُڑا اَلم اے بیت کہ بساک دو بھر بیتگ۔
نی ما ھمے بہ جیڑ ایں کہ اگاں ما یک کسانیں گلے ماں رِد ءَ بند ءَ داشت کُت نہ کن ایں۔ ما یکمُشت بیت نہ کن این ءُ وتی وتواھی ءَ لگام نہ دے ایں، ما یکدومیگ ءَ اوپار نہ کن ایں گُڑا آسر ئِے ھم بد کیت۔
اگاں ما وتی ھستی ءَ زِندگ دارگ لوٹ ایں گُڑا ما بلوچ راج ءَ یکجاہ ءُ یکمُشت بوگ لوٹ ایت۔ اگاں ما یکدومیگ ءَ دلگوش مہ بِہ این ءُ اوپار مہ کن ایں گُڑا ما مُدام نیم جانیں زِند ءِ گْوازینگ ءَ بے وس بَہ ایں۔ بِہ گِند ئے دژمن ءَ چو زور ءُ ھاٹیگ مان نیست کہ بلوچ راج ءَ نزور تَرین ایت بلکیں بلوچ وتی جیڑھاں وت ودی کنان اِنت ءُ دژمن چہ ھمے جیڑھاں پائدگ زِیران اِنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
