TBP Balochi

سپریم کورٹ آف پاکستان ءَ راجی پتر ءِ باسک ءُ پشتون تھپز مومنٹ ءِ رھشون علی وزیر زمانت ءِ سر ءَ یک کنگ ءِ پرمان کتگ –

جسٹس سردار طارق مسعود ءِ سروکی ءَ آمیدگس ءِ پتر ءَ سَے رکنی بینچ ءِ کیس ءِ پتر کرتگ –

آمیدگس ءِ نیمگ ءَ راجی پتر ءِ باسک علی وزیر ءَ را چار لک کلدار ءِ جمع کنگ ءِ پرمان ھم کرتگ –

سپریم کورٹ آف پاکستان ءَ گوشتگ کہ علی وزیر ءِ ھمراھی ءَ جرم ءَ ھواریں جرمکار ھم یل کنگ بیتگ گڑا علی وزیر ءَ جیل ءَ بند کنگ ءِ ھچ منانک نیست اِنت –

زانگ بہ بیت راجی پتر ءِ باسک علی وزیر شانزدہ دسمبر دوھزار ءُ بیست ءَ دزگیر کنگ بیتگ اَت-

بلوچستان لبریشن فرنٹ ءِ جارکش میجر گوھرام بلوچ ءَ گوشتگ کہ زیردستیں بلوچستان ءِ وتگڑیں وزیرعلیٰ میر عبدالقدوس بزنجو ءَ“ عرب نیوز” ءِ گون ءَ یک گلگدارے ءَ ٹاہ داتگ کہ آ بی ایل ایف ءَ ھوار بلوچ آجوئی دوستیں گلاں گپ ءُ تران ءَ اَنت – بی ایل ایف قدوس بزنجو ءِ اے ٹاہ ءَ سیاھیں دروگ کنت ءُ اشی ءَ رد کنت –

میجر گوھرام بلوچ ءَ گُشتگ کہ ریاست پاکستان ءُ آئی ءِ وتگڑانی گون ءَ نا رھوت ءُ نا نزیکی ھست اِنت –

آئی ءَ گُشتگ کہ بلوچ راج ءِ گران بھائیں دیمونی بلوچستان ءِ آجوئی اِنت ءُ آجوئی ءِ بنگپ ءَ گپ ءُ تران، یا دگہ مسام ءُ دگہ چیزے ءِ سر ءَ دلجم کنگ قدوس بزنجو ءِ وڑیں وتگڑانی واک ءَ نہ اِنت –

میجر گوھرام بلوچ ءَ گُشتگ کہ وتی راجی مڈیانی سر ءَ زورگریں پاکستان ءِ گون ءَ کسان بھرے ءِ بارو ءَ جیڑگ نا ایوک ءَ بلکیں بلوچ راج ءِ مزن نامیں دیمونیانی کمشرپی اِنت قدوس بزنجو وتی واجھاں چوشیں دروگ بندگ ءُ آیاں وش کنگ اِنت –

شائر : شیردل بلوچ

دی بلوچستان پوسٹ

جنگجاہ ءِ ملیں سرمچار
راج ءِ یَلیں تو نرمزار
اللہ ءِ باھوٹ اِت شما

ڈیھ ءِ لگوریں دژمناں
سُھریں چَمّاں تو پیشبدار
اللہ ءِ باھوٹ اِت شما

انچو شمئے سوبمندی ءَ
دوا اَنت مدام مات ءُ گُھار
اللہ ءِ باھوٹ اِت شما

پدکنزگ ھیبے کہ بہ بیت
دیم ءَ برو پُشت ءَ مچار
اللہ ءِ باھوٹ اِت شما

ھون رِتکگ ءُ سر داتگ اِت
جنگ ءِ پڑ ءَ سک بے شمار
اللہ ءِ باھوٹ اِت شما

دلگوش ءُ گْور تو کہ بہ بو
مات اِنت ترا گوانک ءُ توار
اللہ ءِ باھوٹ اِت شما

جُنزان باں شیردل کہ من
دو گام ءَ باں من ھم ھوار
اللہ ءِ باھوٹ اِت شما

بلوچستان ءِ تیابدپی شھر گوادر ءَ حق دو تحریک ءِ نندانک ءَ گوستگیں شپ ءَ مولوی ھدایت الرحمان بلوچ ءَ تران کنان ءَ گوشتگ کہ لوٹاں کس دلگوش کنگ ءَ نہ اِنت زھرشانی گیش کنگ بیت اِنت –

آئی ءَ گُشتگ کہ دو دسمبر ءَ نیشنل کوسٹل ھائی وے پنچ جاھاں بند کنگ بیت اِنت –

آئی ءَ گوشتگ کہ دریاورد پشمبے ءَ سرجمیں دمگ ءَ درویاورد زر ءَ مہ رو اَنت ءُ پشمبے ءَ تاجر برادری ھم وتی دکاناں بند بہ کن اَنت – آئی ءَ گُشتگ کہ پشمبے ءَ مئے گامگیج بندات بنت آدینگ ءَ کوسٹل آئی وے ءِ ھمراھی ءَ دی پیک ءِ کار ھم دارگ بیت اِنت ءُ زھرشانی کنوک کار ءَ دار اَنت –

آئی ءَ گُشتگ کہ نِی مئے لوٹ سیزدہ ءَ چہ گوستگ اَنت بیست ءُ شش اَنت –

آئی ءُ انیگیں وزیر اعلیٰ عبدالقدوس بزنجو ءِ سر ءَ ایراد گپتگ ءُ گُشتگ کہ اے جام کمال ءَ گیش بُت اِنت بیت کنت ما اے لوٹ ءَ ایر بہ کن ایں عبدالقدوس بزنجو ھم وتی اگدو ءَ یلو بہ کنت –

بلوچ یکجھتی کمیٹی ( کراچی) ءِ جارکش ءَ وتی درشان ءِ تہ ءَ گوشتگ کہ مروچی ھمے وڑ بلوچ راج ءِ زالبولاں مولانا ھدایت الرحمان ءِ ھمراھی ءَ بلوچستان حق دو تھریک ھوار بوگ ءِ اے گپ ءِ نشانی اِنت کہ اے دُرست مولانا ھدایت الرحمان ءِ مھکمی ءُ بامردی ءِ بوگ ءِ سبب ءَ بوتگ اَنت ءُ گوادر ءِ زالبولاں سد سلام اِنت کہ آھاں مولانا ھدایت الراحمان جار ءِ سر ءَ یکجاہ بوتگ اَنت ءُ مزنیں کچے ءَ گوں جوش جزبگ ءِ ھمراھی ءَ وت ءَ اے تھریک ءِ بھر ءِ جوڑ اِش کتگ ءُ اے تھریک بلوچ ءُ بلوچستان راجدپتر ءَ گوں جوانیں لبزاں نبشتہ کنگ بیت –

جارکش ءَ گوشتگ کہ مولانا ھدایت الرحمان سیادی گوں کجام سیاسی پارٹی ءَ چہ بہ بیت اے گپ الّم نہ اِنت بلے گوں مھکم ءُ جوانیں ارادگانی ھمراھی ءَ مولانا ھدایت الراحمان ءَ بلوچ ءُ بلوچستان ءِ جیڑہ ءِ سر ءَ توار بُرز کتگ ءُ وت ءَ بلوچے سرپد بوتگ ءُ وت ءَ بلوچستان ءِ وارس سرپد بوتگ ءُ بلوچ راج ءَ را یکجاہ کتگ توار چست کتگ ءُ اے ستا کرز اِیت ءُ ھمے یکجاھی ءُ یکجاہ بوگ بلوچ راج ءِ جیڑہ گِشّینگ اِنت – اے شعوری ءِ سبب ءَ مروچی گوادر مروچی جکّسیتگ ءُ چست بوتگ یک نوکیں تاریکے ایر کتگ – بے شک اے مولانا ھدایت الرحمان سوبمندی ءِ بنداتی اِنت ءُ اشی ءَ دیم ھم ھمے وڑ مردماں یکجاہ کنت اشانی ھک ءِ ھاتر ءَ اشی ءِ چہ گیش یکجاہ بنت ءَ توار چست کن اَنت-

جارکش ءَ دیمتر ءَ گوشتگ کہ مولانا ھدایت الرحمان ءُ ھاسکار گوادر ءِ زالبولاں اے گپ پدر کتگ ما یکجاہ ایں ءُ ما وتی ھک ءِ ھاتر ءَ ھر وھد ءَ وتی توار ءَ چست کن ایں ءُ ما وتی ھک ءِ ھاتر ءَ ھچ وڑ پچکنز نہ بہ ئے- اے گوادر ءِ سوبمندی اِنت ، اے زالبولانی سوبمندی اِنت ، اے مھکمی ءِ سوبمندی اِنت ، اے رُژنا ایں پگر ءِ سوبمندی اِنت ، اے مزنیں سوچ ءِ سوبمندی اِنت، اے بلوچ ءِ سوبمندی اِنت ءُ اے بلوچستان ءِ سوبمندی اِنت ،اشی ءَ چہ ساری ھم مولانا ھدایت الرحمان ءِ اھمت ءُ جزبگ بُرز بوتگ اَنت بلے مروچی اے اھمتاں جبرئیل لگ اِتگ بوتگ اَنت مروچی اے اھمتانی چست بوگ گوادر ءِ زالبولانی سبب ءَ چہ بوتگ ءُ اے اھمتانی ءِ چستی نہ اوشت اِیت ناں جھل بیت ناں ھلاس بیت-

وائی ڈی اے بلوچستان ءِ ینگ ڈاکٹرانی دزگیری ءِ بگیری ءُ وتی لوٹانی ھک ءِ ھاتر ءَ شال سول ھسپتال ءَ زھرشانی بنجل برجاہ – بنجل ءَ سیاسی ءُ چاگردی گلانی باسکاں اتکگ ءُ ینگ ڈاکٹرانی سر ءَ بوتگیں زلم زوراکی ءُ آھانی دزگیری ایر جتگ اَنت –

آل بلوچستان بلوچستان فارماسسٹ ایسوسیشن سرکماش زھرشانی بنجل ءَ تران کنان ءَ گوشتگ کہ بلوچستان ھما بدکسمتیں اُستان انت کہ ڈاکٹر ھم سرکار ءِ زوراکی ءَ نہ رک اِتگ انت آئی ءِ کابینہ ءِ باسکاں ینگ ڈاکٹرانی گوم یکجھتی کتگ ءُ آھانی لوٹانی پلامرزی کتگ –

ھمے وڑ ینگ ڈاکٹرز ایسوسیشن بلوچستان ءِ نیمگ ءَ ارزی ءِ نبشتہ کنائینگ ءِ بگیری ءُ لوٹانی نہ منّگ ءِ سبب ءَ گوستگیں روچ ءَ بزاں بیست ءُ نُھ رمس دو شمبے ءَ سرجمیں بلوچستان ءِ آپریشن ٹیٹرز ءُ او پی ڈی ءِ سروسز ءَ بند کنگ ءِ جار پرینگ بوتگ کہ بلوچستان ءِ بنجاھی شھر شال ءَ ھوار دگہ دمگاں آپریشن تیٹر ءُ او پی ڈیز بند بوتگ انت –

اے درگت ءَ ینگ ڈاکٹرز ءِ رھشون ڈاکٹر حفیظ مندوخیل ءِ گوشگ ات کہ تاں ھما وھد ءَ ینگ ڈاکٹرانی ارزی واپس زورگ نہ بیت ھچ وڑیں گند ءُ نند نہ بیت اِنت ءُ دزگیر کنگ بوتگیں ینگ ڈاکٹر واپس گاڑیاں سوار کنگ بہ بنت ءُ ازت ءِ سر ءَ یل کنگ بہ بنت –

ینگ ڈاکٹرانی گوشگ ات کہ سند ءُ پنجاپ ءَ چہ ھم وائی ڈی اے ءِ سنگت کائینت زنداناں جاہ نہ بیت ما استعفی دیگ ءَ ساڑی انت – مئے استعفی گرگ بہ بنت ما واتر وتی گِساں رویں سرکار نوکیں ڈاکٹر بہ لوٹائینیت –

آھانی گوشگ ات کہ قدوس بزنجو نادراہ بوتگ مار ءَ گوانکو کنگ بوتگ ءُ لوٹائینگ بوتگ ، ڈاکٹراں ردیں ایکسیپلیشن دئیگ مہ بیت ما پدکنز نہ بئیں –

بلوچستان ءَ تیرگواری ءُ دگ ءِ وئیل ءَ یک مردمے بیران ءُ یک ٹپی بوتگ-

سربوتگیں ھالانی رِد ءَ بلوچستان ءِ شھر شال ءِ ھند بادینی دگ ءَ ناشناسیں سلاہ بندیں مردمانی تیرگواری ءَ چہ یک مردمے بیران بوتگ-

تیرگواری ءَ چہ بیران بوتگیں مردم بجّار خالد حسین نام ءَ چہ بوتگ ءُ پولیس ءَ آئی ءِ لاش چِست کتگ ءُ نادُراھجاہ ءَ برتگ ءُ پہ گیشیں چار ءُ ٹپاس ءَ پد کھول ءِ دستیگ کتگ –

ھمے وڑ پنجگور ءِ دگ ءِ وئیل ءَ یک گاڑی یے چپ بوتگ ءُ چریشی ءِ آسر ءَ یک مردمے ٹپی بوتگ –

گاڑی ءِ چپ بوگ ءِ سبب ءَ ٹائر ءِ ترکگ بوتگ ٹپی بوتگیں مردم ءِ پجّار عبداللہ احسان الحق نام ءَ چہ بوتگ آ پہ الاج ءِ ھاتر ءَ نادرھجاہ ءَ برگ بوتگ-

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ دگہ یک مردم ءِ بیران بوتگ، بیران بوتگیں مردمانی کچ چار سد ءَ سر بوتگ انت وھدیکہ مروچی دومی روچ ءَ کرونا نادراھی ءِ ھچ کس رپورٹ نبوتگ –

بلوچستان ءِ جانسلامتی واکدارانی ءِ نیمگ ءَ چہ شنگ بوتگیں رپورٹ ءِ رِد ءَ گوستگیں بیست ءُ چار ادارانی میان ءَ بلوچستان ءِ شش دمگاں دو سد ءُ ھپتاد مردماں کرونا وائرس ءِ ٹیسٹ کنگ بوتگ کہ آھانی تہ ءَ ھچ کس ءَ نادراھی آماچ نہ بوتگ وھدیکہ یکسد ءُ بیست ءُ دو مردمانی رپورٹ تنی وھدی نہ اتکگ انت –

رپورٹ ءِ رِد ءَ بلوچستان ءِ تہ ءَ کرونا وائرس ءِ آماچ بوتگیں سَے نادراہ وش بوتگ انت وش بوتگیں مردمانی کچ نوکیں کساسیاں ھوار سِی ءُ دو ھزار ءُ شست ءُ نُھ ءَ سر بوتگ –

رپورٹ ءِ رِد ءَ اے وھدی بلوچستان ءِ تہ ءَ چِل ءُ دو نادراہ ھست اَنت کہ آھانی تہ ءَ پنچ نادراھجاھاں الاج کنگ انت ءُ پنچ ھائی فلو آکسیجن ءَ الاج کنگ بوھگ انت – وھدیکہ کرونا وائرس ءِ سرجمی ءَ چارسد مردم بیران بوتگ-

ھب چوکی ءَ جاھمنند نازیہ بلوچ ءِ رِد ءَ آئی ءِ برات عامر بلوچ ھب پولیس ءَ زورانسری بید وارنٹ ءَ دزگیر کُتگ پاکستان ءِ چیریں ادارھانی ھوالگ ءَ داتگ چریشی ءَ پد منی برات ھما انت گار ءُ بیگواہ انت –

نازیہ بلوچ ءِ رِد ءَ ھمے ماھے بیست ءُ سَے نومبر ءَ آئی برات عامر بلوچ ھب گڈانی کراس ءِ نزیک پی ایس او پٹرول ءَ وتی ڈوٹی سر ءَ بوتگ کہ لس مھلوکی پوشاکیں لھتے مردم ویگو گاڑی ءَ سوار بوتگ ءُ پٹرول پمپ ءَ اتکگ انت –

نازیہ ءَ بلوچ ءِ رِد ءَ گڈانی کراس ءِ پولیس کارمننداں پد ءَ رند ءَ اتکگ ءَ منی برات زورانسری آوار جتگ ءُ ھما مردمانی ھوالگ ءَ داتگ چراھی ءَ پد منی برات عامر گار ءُ بیگواہ انت –

ھب ءِ جھمنند نازیہ بلوچ ءِ رِد ءَ پولیس ءَ اے وئیل ءَ پد مار ءَ ھچ وڑیں پسو دیگ نہ بوگ انت، مار ءَ گمان انت کہ منی برات پولیس ءَ چیریں ادارھانی ھوالگ ءَ داتگ –

نازیہ بلوچ ءَ شال پریس کلب دیم ءَ برجاھیں بیگواھیں مردمانی پانکجنیں گل ءِ بنجل ءَ اتکگ ءُ وتی بیگواھیں برات ءِ زورانسری آوارجنی اھوال وائس فار بلوچ مسنگ پرسنز ءِ گل ءِ کرا جمع کنائینتگ –

بیگواھیں عامر بلوچ ءِ گھار نازیہ بلوچ ءِ رِد ءَ آئی برات ٹی بی ءِ نادراھ انت آئی ءِ زورانسری آوار جنی ءُ آئی چیریں جاھاں بندیگ کنگ آئی ءِ ھترہ ءِ تہ انت – نازیہ بلوچ ءَ لوٹ کتگ کہ آئی ءِ برات دیم ءَ آرگ بہ بیت ءُ آئی ءَ ھک دئیگ بہ بیت –

نازیہ بلوچ ءَ انسانی ھکانی گل ءُ بلوچستان سرکار ءَ لوٹ کتگ کہ عامر بلوچ ءِ زاھر کنگ ءُ آئی یل کنگ ءَ وتی کرد ءَ پیلو بہ کن انت –