TBP Balochi

یوروپئین پریمئیر لیگ فٹبال گوازی برجاہ انت گوستگیں روچ ءَ ارسنل ءُ ایورٹون ءِ میان ءَ گوازی کنگ بوتگ ایورٹون ءَ دو پہ یک گول ءَ گوازی کٹیتگ –

دو شمبے ءَ روچ ءَ بوتگیں پریمئیر لیگ فٹبال گوازی ارسنل ءُ ایورٹون ءِ میان ءَ کنگ بوتگ ـ ھردو ٹیمانی لیبیاں جوانیں گوازی پیش داشتگ –

اولی ھاپ ءَ ارسنل ءِ لیبی ایم.اوڈیگارڈ ءَ یک گول ءِ اسکور کُتگ وھدیکہ ایورٹون ءِ لیبیاں ھچ گول اسکور کُت نہ کتگ – دومی ھاپ ءَ ایورٹون ءِ لیبی ریچارلیسن ءَ اولی گول اسکور کتگ ھردو ٹیم یک یک گول ءَ دیمیگ بوتگ انت دومی ھاپ ءَ اَرسنل ءِ لیبی ھچ وڑ ءَ گول اسکور کنگ ءَ سوبین نہ بوتاں وھدیکہ گوازی ءِ گڈی وھد ءَ ایورٹون ءِ لیبی ڈی.گرے ءَ وتی گول اسکور کتگ گوازی وتی ٹیم ءِ نام ءَ.کنائینتگ –

بلوچستان ءِ تیاب دپی شھر گوادر ءَ وتی لوٹانی ھاتر ءَ ” بلوچستان ءَ ھک دو حق دو تحریک” ءِ نندانک ءَ مروچی 22 روچ اِنت کہ برجاہ ءَ اِنت – بلوچستان ءِ جتاجتائیں دمگاں چہ مردمانی یکجھی ءِ ھاتر ءَ آیگ ءِ دْرچ برجاہ ءَ اِنت-

جماعت اسلامی پاکستان ءِ بُنجاھی امیر سراج الحق ھم مروچی لاھور ءَ چہ گوادر ءَ نندانک ءِ یکجھی ءِ ھاتر ءَ بھر بوتگ-

سراج الحق وتی تران ءِ تہ ءَ مالی بدھالی ءُ دگہ جیڑھانی زمہ وار ھندوستان ءُ امریکہ ءِ سر ءَ داتگ ءُ کشمیر ءَ ھندوستان ءِ زوراکی ءِ سر ءَ ھندوستان ایر جتگ-

سراج الحق وتی تران ءِ تہ ءَ گْوشتگ کہ گوادر ءَ ننداک ءِ سرجمیں لوٹانی منوگری کتگ ءُ گْوشتگ کہ اد ءِ مردماں ازت دیگ بہ بنت ءُ بیگواھیں مردمانی جیڑہ ھلاس کنگ بہ بیت-

آئی ءَ گْوشتگ کہ بلوچ ءُ اد ءِ مردم سی پیک ءِ بگیر ءَ نہ آں بلکیں ھمبھری لوٹ اَنت ءُ آئی ءَ چین ءَ گوں دزبندی کتگ کہ آ وت بَیت جیڑہ ءَ بہ چار اِیت-

دومی نیمگ ءَ سوشل میڈیا بلوچ ایکٹیوسٹانی نیمگ ءَ چہ گوادر ءَ راجی ننداک ءَ سراج الحق آیگ ءُ تران ءِ سر ءَ ایرجنگ ءَ اَنت-

رسانکدر ءَ دلگوش فتح جان ءَ نبشتہ کتگ کہ پاکستانی پوج ءِ دست ءَ زوراور ءُ ایردستیں راج ءِ دیم ءَ کشمیر سر ءَ گروگ منافقت اِنت-

دگہ یک رسانکدر ءَ دلگوش ایاز بلوچ ءَ نبشتہ کتگ کہ سراج الحق ءَ زانگ لوٹ اِیت سی پیک مئے واست ءَ زندگی ءُ مرگ سر اِنت ءُ بلوچ ءِ پجّار ھترہ ءِ تہ ءَ اِنت-

ننداک ءَ ساڑی ئیں وسیم سفر ءَ گوشتگ کہ حق دو تحریک بلوچستان ءِ ننداک ءِ سر ءَ ھچ کس ءَ ھچ شک بوگی نہ اِنت – اگاں کسے یکجھی ءِ ھاتر ءَ کیت ءُ گُڑا آ ازت دیگ بیت ءُ اے مئے دود اَنت-

وسیم سفر گوش اِیت کہ سیمسری باپاری بندی ، بلوچ تیاب ءِ سر ءَ بے کانودی ٹرالرنگ ءُ دگہ لوٹانی سر ءَ اگاں کسے منوگری بہ کنت گُڑا اشی ءِ اجبیں گپے نہ اِنت-

مروچی شپ ءَ ننداک ءَ چہ مولانا ھدایت الرحمان ءَ دگہ مردماں تران کنان ءَ گْوشتگ کہ تاں لوٹانی منّگ ءَ زھرشانی برجاہ بیت-

آئی ءَ گْوشتگ کہ بلوچستان ءَ بے ایمنی ءِ زمہ وار ایف سی اِنت ءُ ایف سی ءَ بلوچستان ءِ تہ ءَ بہ کش اَنت-

آئی ءَ گْوشتگ کہ بلوچستان ءَ بیگواھیں مردمانی یل کنائینگ ءِ ھاتر ءَ ھم زھرشانی کن ایں ءُ اد ءِ مردمانی ھمراھی ءَ جُھد کن ایں-

بلوچستان ءِ جتا جتائیں دمگ ھُزدار ، بیلہ ءَ دگ ءِ وئیلاں چہ سے مردم بیران بوتگ اَنت ءُ سے ٹپی بوتگ اَنت-

ھُزدار ءِ دمگ ورش آباد ءَ ٹکٹرے ءَ پرپٹے ڈک ورگ ءَ یک مردمے بیران ءُ یکے ٹپی بوتگ-

بیران بوتگیں مردم ءِ پجار عطااللہ نام ءَ چہ بوتگ ءُ ٹپی بوتگیں اسحاق نام ءَ زانگ بیتگ-

ھمے وڑ ھُزدار ءَ دگہ یک وئیلے ءَ نال ءِ ھند ءَ یک ٹکٹرے ءَ یک مردمے لگت داتگ ءُ مرد بیران بیتگ-

آئی ءِ پجّار جانزادہ پٹان نام ءَ چہ بوتگ ءُ آ ماربل کمپنی ءَ پوریاگری ءَ بوتگ-

بیلہ شھدگ ءَ جمانی گھوٹ ءَ دو پرپٹ ءَ وت ماں وت ءَ ڈک وارتگ ءُ چریشی ءِ آسر ءَ عبداللہ ء ابدالرحمان ءُ خان محمد ء محمد صالح ٹپی بیتگ اَنت، پہ الاج کنگ ءِ ھاتر ءَ بیلہ نادراھجاہ ءَ برگ بوتگ اَنت ءُ وھدے کہ عبداللہ ءِ جاور نگیگ بوتگ اَنت پہ گیشیں الاج ءِ ھاتر ءَ کراچی ءَ برگ بوتگ –

وندر ءَ شال ءُ کراچی ءِ شھدگ ءَ کریم بخش ھوٹل ءِ نزیک ءَ مساپر بسے ءَ یک مردمے لگت داتگ ءُ کُشتگ –

بیران بوتگیں مردم ءِ پجّار صوالی ء محمد عیسیٰ نام ءَ چہ بوتگ-

بلوچستان لبریشن فرنٹ ءِ جارکش میجر گْوھرام بلوچ ءَ آواران ءَ پاکستانی پوج ءِ سر ءَ دو اُرشانی زمہ واری منّ اِتگ ءُ گْوشتگ کہ مرچی مشکے ءِ دمگ جکی ءَ نیمروچ ءِ ادار یکّ ءَ پوج ءِ یک ویگو گاڑی یے گوں ریموٹ کنٹرول گون ءَ نشانگ کتگ-

آئی ءَ دیمتر ءَ گْوشتگ کہ تُرندیں اُرش ءِ تہ ءَ اَتکگیں گاڑی سرجم ءَ تباہ بوتگ ءُ آئی ءِ سواریں چار کارندہ مرتگ ءُ دو زدگ بوتگ اَنت-

جارکش ءَ گْوشتگ کہ گوستگیں روچ ءَ یکشمبے ءِ سُھب ءَ آواران ءِ دمگ جھاؤ نونڈڑہ ءَ پاکستانی پوج ءِ چوکی ءِ سر ءَ سرمچاراں اسنائپر رائفل اُرشے کتگ ءُ اُرش ءِ آسر ءَ یک کارندھے مرتگ-

میجر گْوھرام بلوچ ءَ گْوشتگ کہ زورگریں پوج ءِ سر ءَ اُرش داں زور گپتگیں بلوچستان ءِ وتواجھی ءَ برجاہ بنت-

اسپنی دگ ءِ سر ءَ پولیس سر ءَ دستی بمب اُرشے کُتگ سے کارمند زدگ کتگ اَنت – جئیند بلوچ

سربوتگیں ھالانی رِد ءَ بلوچستان ءِ بنجاھی شھر شال ءَ ناشناسیں پرپٹ سواراں پولیس گاڑی ءِ سر ءَ دزبمب اُرشے کُتگ –

اُرش شال ءَ اسپنی دگ ءِ سر ءَ پولیس ءِ گاڑی ءِ سر ءَ کنگ بوتگ، اُرش ءَ پولیس ءَ جانی تاوان رس اتگ ءُ ارش ءِ زمہ واری بی ایل اے ءَ منّ اِتگ-

بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں شال ءَ اسپنی دگ ءِ سر ءَ زورگیریں پاکستانی پولیس پوج ءِ سر ءَ دستی بمب اُرشے کتگ، اُرش ءِ آسر ءَ سَے پولیس کارمند زدگ بوتگ اَنت –

جارکش ءَ گوشتگ کہ بلوچ لبریشن آرمی بلوچستان ءِ سر ءَ زورگیریں پوج ءُ آئی داشتگیں دمگی دلارانی سر ءَ تاں ھما وھد ءَ مئے اُرش گیشی ءِ گوم ءَ برجاہ مان انت تانکہ زورگیریں پاکستانی بلوچستان ءِ سر ءَ وتی ایردستی ھلاس نہ کنت ءُ بلوچستان در نہ ایت –

بلوچستان ءِ تیابدپی شھر گوادر ءَ سی ٹی ڈی ءَ تراکناکیں شوروانی دزگرگ ءِ ٹاہ داتگ –

گیشیں ھالانی رد ءَ سی ٹی ڈی ءَ ٹاہ داتگ کہ ڈپٹی کمشنر ءِ کارگس ءِ نزیک ءَ یک پرپٹے ءَ تراکناکیں شورو پِٹ بیتگ اَنت-

ایس پی سی ٹی ڈی مھمد بلوچ ءِ رد ءَ دزکپتگیں شورو بمب ڈسپوزل اسکواڈ ءَ بے سوب کتگ اَنت-

پولیس ءِ رد ءَ بمب سرکاری نمبر پلیٹیں پرپٹے ءَ پِٹ بیتگ اَنت ءُ پولیس ءَ دو ناشناسیں مردم ھم دزگیر کرتگ اَنت –

پولیس ءِ رد ءَ دزگیر کرتگیں مردم پَٹ ءُ پول کنگ بیگ ءَ اَنت بلے تنی وھدی پولیس ءَ اے مردمانی نام دیم ءَ نیاؤرتگ اَنت –

نبشتانک: گُمنام سپاھیگ

نبشتہ کار: میرین بلوچ

دی بلوچستان پوسٹ

دیگر ءِ وھد ءَ آ مُدام بارگیں کوہ ءِ سر ءَ شُت ءُ ھلک ءُ میتگانی ندارگ ءُ پد ءَ گواڑگ ءِ پُلانی وشبوُاں چہ آئی ءِ گین پُر اَت ءُ پد ءَ روزرد ءِ ابیتکیں ساھت ءَ رولھ ءِ ندارگ ھم آئی ءَ بے کساس یات پِرّینگ ءَ اَت ءُ دومی نیمگ ءَ آئی ءِ دیم ءَ تیگاپ ءُ دروازگ ءِ کوھانی نیاد ءَ آئی ءِ دیدگاں ھزار واب بندوک اِت اَنت ءُ آ بس ھمے گوشگ لوٹگ ءَ اَت کہ من بولان ءِ گَٹّ ءِ کوھانی تہ ءَ گار بوگ لوٹاں ءُ تگران ءَ کوہ ءِ ٹُلّ ءِ سرے روزرد ءِ زردی ءَ گوں مھروان ءِ نبشتہ ءَ ایر رَوگ لوٹاں-

بَلے آئی ءِ کماش ءَ کَرنیں بیتگ اَت کہ زھگ ءَ گوں نہ نند ءُ نیاد ءُ نہ گپ ءُ ترانے بیتگ اَت آئی ءِ کماش دلگران اَت کہ تو پرچا رپتے ءُ شُتے اے گیابان ءُ ویران ءَ بَلے آ بژنیگ نہ اَت چیاکہ آ جھدکاراں گوں ھمسپر ءَ اَت ءُ آئی ءَ وتی سرجمیں واب ھاکاں گوں ھوار کُتگ اَت آئی ءِ زند ءِ پشکپتگیں بس یکیں واب اَت کہ گُلزمین ءِ آجوئی اَت-

اے مھر جنگ ءِ پڑا ھزاراں کارست وتی کاراں گوں دست گٹ اَتاں ءُ آ سُتکگیں دیوالے دریگ ءِ شھم ءَ چہ ھر شئے ندارگ کنیگ ءَ اَت ءُ آ دریگ ءِ شھم ءَ ھزاراں وشیں ءُ گمیں لزتاں ایرموش کنیگ ءَ اَت بَلے آئی ءِ مھروانیں دریگ ءِ شھم ءَ آئی ءِ مھروان ساڑی نہ اَت-

بَلے ھمے کارست ھانی لُڑ ءَ دیگہ یک کارستے دست مُنڈ اَت بَلے آ جنگجاہ ءَ ساڑی اَت ءُ تمردی ءَ گوں دژمن ءَ بیھار دیگ ءَ اَت ءُ دژمن ءَ گوں دیم پہ دیم جنگ ءَ اَت ءُ دژمنے بازیں کاراندھاں کُشگ ءَ اَت ءُ دُرستں سلاہ ءُ ساز ءُ ساماناں ھم دستیگ کنگ ءَ اَت ءُ دژمنے گَرّ ءُ یکرّ ءَ گوں دوچار اَت آئی ءِ واھشت مُدام ھمے بیتگ اَت کہ دژمن ءِ سلاھاں دستیگ بکن آں ءُ آ بازیں جنگجاھاں ھم سوبین بیتگ اَت ءُ نویسوک ھمے گوشگ ءَ اَت کہ اے کارست منی زندئے مستریں کارست بزاں ساچان ءَ پد ھمے گوشگ بیت چیاکہ من اے کارست ءَ چہ بازیں شئے دربرُتگ ءُ ھمے کارستانی لُڑاں آئی ءِ سنگت کَے کَے ھم یک جوانیں کارستے گوشگ بیت کہ مُدام آئی ءِ ھمراہ اَت ءُ بابا ءَ مُدام آئی ءَ گُشت اَڑِے ریپتگ اِد ءَ بیا اگاں تو آئی ءَ کریمو بگُشے تو ھم رد نہ ئے چیاکہ کے کے یک سکیں لاجوابیں سنگتے اَت ھر کار ءَ آئی ءِ دست مان اَت ءُ آ مُدام چراگ ءِ پسو ئِے گوماں ھر جاہ ءُ دیاراں جنگجاہ، اوتاک ءُ سپراں آ دوئین ھمراہ ات اَنت ءُ ھمراہ انت چُش کہ اھسان ءُ شھداد ءِ پیم ءَ ءُ کماندار شھیک تنیگت ءَ کارانی گر ءُ لانچاں گوں دوچار اَت آئی ءِ چماں واب نیستگ اَت ءُ بُرزتریں کوہ ءِ ھما دیم ءَ آ اندیم انت ءُ آ ھروھدی ءِ پیم ءَ دژمن ءِ ودارِیگ اَت بَلے ساچان ھمے دمک ءُ دراں ویل اَت ءُ آ یک کِشکے ءَ گَٹّ اَت ءُ وتی جند ءَ وت شوھازگ ءَ اَت بَلے وت ءَگندگ ءَ نہ اَت بابُل ءِ لبز ءُ رھبند گوں کس ءَ وانگ نہ بیگ ءَ اَتاں ءُ آئی ءِ لبز سک ھورت ھورت ءَ نبشتہ اَتاں من پہ ازابی ءَ گوں پُرشتگین ھینک ءِ ھمراہ داری ءَ گوں بس لھتیں لبز گیش ءُ گیوار کُت اَنت کہ اِشکندیں ودار ءُ اَو ڑِے ملنگو ءُ سلیمان آگائی ءَ واب گندگ ءَ اَت ءُ مجید بابُل ءِ کِسّہ ءِ کارست ءِ دروشم ءَ گندگ بیگ ءَ اَت ءُ مجید ءِ کِسّہ ءِ نویسوک مھلوک ءَ بس ھمے گوشگ ءَ اَت اگاں تو مرچی زِندگ منتگے ءُ گیدی ءِ کُنڈ ءَ کسے زانت ءُ جاہ کار اِیت گُڑا اے ھمے سالونکیں بچّ ءُ کُنگریں پُسّگانی کُربانی اَنت –

دُرین ءَ تنیگت ءَ واب آیگ ءَ نہ اَت کہ کدین کچکول ءِ نوکیں پربندیں گالے بیت ءُ من وتی دلا بساڑین ءَ ءُ آئی ءِ پُر مھریں زھیراں وتی چنکاں بکناں بَلے کچکول گُمنام اَت ءُ تنیگت ءَ گُمنام اَنت من آئی ءِ پٹ ءُ پول ءَ سرجمیں دریگاں شوھازیتگ بَلے آ تنیگت ءَ من ءَ دست نہ کپتگ –

آئی ءِ کِسّہ کارستاں چہ سریچک اَت انت ھمے کارستانی لُڑ ءَ بولان ءِ گٹ ءُ گراں گوں سیادی کنوک امام بکش سوری وت یک جتائیں کسھے اَت بَلے آئی ءِ گوما سوری نبشتہ کنگ نہ بوت چیاکہ سوری ھانُل ءِ کسھے مستریں کارستے اَت پمیشکا آ گوں کس ءَ نبشتہ کنگ نہ بوت ءُ مرید ھانُل ءِ چیدگ ءَ گوں لبزاں کماھگ ءَ اَت-

نزاناں زندگی ءِ تھار دیم ءَ چُنت گُمنام بیتگ انت ءُ باریں دگہ چُنت ھست اَنت اے جنگجاہ ءِ میدان ءَ بس یک ءُ دو ءِ سرپدی ھست باریں گُمنام چیکس انت بلے آ گُمنام سپاھیگ انگت ءَ جنگ ءَ اَنت ءُ نا امیتی آئی ءِ تہ ءَ نیستگ اَت ءُ ھک ءِ سر ءَ وتی اوشتاتگ اَت ھک ءِ بابت ءَ نویسگ ءَ اَت گپ ءَ اَت جنگ ءَ اَت آئی ءَ بس ھمے گُشت کہ آزاتی مئے بُنُکّی ھک انت ءُ آئی ءِ سر ءَ گپ جَنگ ءِ ھک ھست ءُ انسانیت ءِ سبک من مذھب ءَ چہ در نہ بُرتگ بلکیں انسان دوستیں دوستاں چہ دربُرتگ ءُ کدی ھم وتی دست ءَ پہ دِگر ءِ دیم ءَ شانک اِش نکنان بلکیں وتی قوم ءِ دیم ءَ چیاکہ من وتن ءِ یک قومی سپاھیگے آں اگاں آ دریا انت من گُڑا دریا ءِ ماھیگ انت ءُ من کُل برداشت کُت کناں ھالیگیں لاپ ءَ گوں وپت کُت کناں، سرد ءُ گرم،ھار ءُ ایروپ کُل بَلے زوراک ءِ دیم ءَ سر ءَ جھل کُت نکناں ءُ آ وتی مھروانیں کارست ءَ بس انچُش گوشگ لوٹَگ ءَ اَت کہ ” آ واب کہ تو گومن دیستگ آ واب تئی نا سرجم انت منی ءُ تئی کِشک جتا انت ءُ من تو ھما وھد ءَ ھور بہ ایں وھدے منی مرگ ءَ چہ پد اگاں تئی سرے گُشان بدل بہ بیت تو بزان من واتر بیتگ انت ” ءُ آ گُڈی ءَ اے ھم گوشگ لوٹَگ ءَ اَت کہ من باں یا نہ باں بلے تئی نام ءِ گُڈی لبز ھر وھد ءَ منی ھست بیگ ءِ گواھی ءَ دے اَنت تو ھمے ساھت ءَ سگریٹ ھم وتی گُڈی ساہ ءَ کَشگ اَت ءُ اناگاہ ءَ آ گار بوت بَلے آئی ءِ سگریٹ ءِ بُنڈ زمین ءِ سر ءَ پشکپتگ اَت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ پنجگور ءَ سلاہ بندیں مردماں کرش پلانٹ ءِ سر ءَ اُرش کرتگ ءُ مشنیری مانداشتگ اَنت –

سر بیتگیں ھالانی رد ءَ پنجگور ءِ دمگ خدابادان ءَ پسکول کور ءَ ٹھیکیدار درمھمد ءِ کریش پلانٹ ءِ سر ءَ ناشناسیں سلاہ بندیں مردماں اُرش کرتگ ءُ شیول ٹریکٹر مانداشتگ اَنت –

بلے وئیل گیشیں سرپدی نہ بیتگ ءُ ناکہ انتزامیہ ءَ دگہ گپ دیم ءَ آورتگ –

زانگ بہ بیت اے کریش پلانٹ ءِ سر ءَ اُرش بیتگ، اشی ءَ ھوار بلوچستان ءِ دگہ جاھاں کریش پلانٹانی سر ءَ اُرش کنگ بیتگ اَنت کہ آیانی زمہ واری بلوچ سلاہ بندیں گلاں منّ اِتگ اَنت بلے اے اُرش ءِ زمہ واری تنی وھدی ھچ گل ءَ پہ وت ءَ نہ زرتگ –

بلوچستان ءِ ضلع قلات ءِ دمگی مردماں لین ءُ گیس کمی ءُ بُنکی آسراتیاں چہ زبھری ءِ بگیری ءَ زالبول ءُ چکاں شال ءُ کراچی شھدگ ءَ زھرشانی کتگ-

قلات ءَ لین ءِ تاراں ٹو فیس کنگ ءُ سوئی گیس بندی ءِ بگیری ءَ زالبول ءُ چُک دگانی سر ءَ درتکگ اَنت – زالبولاں شال ءُ کراچی ءَ چہ ھوار کنگ ءِ راجی شھدگ ءِ سر ءَ نندانک جتگ ءُ زھرشانی کتگ ءُ بُنجاھی شھدگانی سر ءَ دیم ءَ اوشتوک بوتگ اَنت ٹریفک ءِ ھاتر ءَ بند کتگ چریشی ءِ آسر ءَ دراجیں کَتار لگ اِتگ ءُ مساپر پس اِتگ اَنت-

زھرشانی کنوکاں انتزامیہ ءِ نابودی ءُ نزوری ءِ بگیری ءَ تُرندیں نارا جتگ- زھرشانی کنوکاں گْوشتگ کہ قلات ءَ ناں لین ھست نانکہ گیس پُجارینگ ءَ اَنت

زھرشانی کنوکاں گْوشتگ کہ قلات کیسکو ءِ نیمگ ءَ لین ءِ تاراں ھر روچ ٹو فیس کنت ئے چریشی ءَ لین ھچ درد نہ ور اَنت لین ءَ ھر روچ ٹو فیس کنگ دمگ ءَ آپ ءِ کمی ودی بوتگ-

دمگ مردماں گوشتگ کہ قلات سوئی گیس گوستگیں بازیں سالاں چہ نیست اِنت سوئی گیس پریشر سرجمی ءَ سپر اِنت بلے سوئی گیس کمپنی نیمگ ءَ چہ سلو چارجز ءِ نام ءَ چہ قلات ءِ مردماں دوئیں دستاں چہ پُلگ دْرچ برجاہ ءَ اِنت-

زھرشانی ءَ جتائیں سیاسی ءُ نیکراھی پارٹی ءِ باسکاں یکجھی ءَ ھاتر ءَ سر بوتگ اَنت-

آیانی گْوشگ اِنت کہ مروچی ما وتی ھک ءِ ھاتر ءَ دگانی سر ءَ درتکگ ایں اگاں مارا گیس ءُ لین دیگ نہ بوت گُڑا ما زھرشانی گولی ءَ سرجمیں صوبہ ءَ شنگ کن ایں چریشی ءَ آئی ءِ زمہ واری کیسکو بنشون ءُ سوئی گیس کمپنی ءِ سر ءَ بنت-

رسانکدر ءَ چہ تران کنان ءَ جمعیت علماء اسلام ءِ ضلعی جارکش ءَ گوشتگ کہ کیسکو قلات ءُ سوئی گیس زُلم ءُ زوراکی ءِ درگت ءَ مروچی چُک ءُ زالبولاں وتی لوگاں چہ درتکگ ءُ زھرشانی کنگ ءَ اَنت اش اَنت کیسکو ءُ سوئی گیس کمپنی ءِ نابودی ءِ نشانی-

رسانکدر ءَ چہ گپ ءُ تران کنان بی این پی ضلعی صدر میر قادر بخش مینگل ءَ گوشتگ کہ قلات ءِ مھلوک کیسکو ءُ سوئی ءِ نزوری ءَ چہ لاچار بوتگ اَنت کیسکو ءِ نیمگ ءَ چہ لین ءِ تاراں ٹو فیس ءِ کنگ ءُ ھمکروچی برجاہ ءَ اِنت ءُ سوئی گیس کمپنی ءِ نیمگ ءَ گیس نہ پُجارینگ ءَ قلات ءِ شھریانی سر ءَ زُلم اِنت-

زھرشانی کنوکاں دو کلاک ءَ دگ ءِ بند کنگ ءَ پد ایڈیشنل ڈپٹی کمشنر سید مقصود احمد شاہ ءُ ایس ڈی او کیسکو قلات گوں سوبمندیں گپ ءُ تران ءَ پد زھرشانی ھلاس کتگ-

ھمے وڑ بلوچستان ءِ ضلع کوھلو ءَ لین بے جار ایں لوڈشیڈنگ ءُ دراجیں بریک ڈاؤن ءِ بگیری ءَ شھر مردماں تُرندیں سارتی ءَ شپ ءِ وھد ءَ دگانی سر ءَ اَتکگ ءُ گریڈ اسٹیشن ءِ دیم ءَ زھرشانی کتگ ءُ واپڈا بگیری ءَ نارا جتگ-

نندانک ءَ نشتگیں مردماں گْوشتگ کہ یک ھپتگے بیت کہ دمگ لین ءَ چہ زبھر اَنت – دمگ مردم لین گندگ ءَ تلوسگ ءَ اَنت چُشیں وھداں لین ءِ دنت بلے آ ھم کم سے سال ءَ ما اے جیڑہ ءِ سر ءَ واپڈا ءُ پی ایچ آئی ءِ بگیری ءَ زھرشانی کنگ ءَ ایں بلے تنی وھدی مئے ھچ وڑیں گپ گوشدارگ نہ بوتگ اَنت-

زھرشانی کنوکانی گوشگ اِنت کہ گوستگیں ھپتگے ءَ سٹی فیڈر ءُ کش ءُ گوراں یکشلہ لوڈشیڈنگ برجاہ ءَ اِنت چریشی ءِ سبب ءَ ڈسٹرکٹ ھسپتال ءُ نادُراہ سکّیانی دیمپان اَنت وھدے کہ شھر ءَ آپ ءِ یک یک ترمپے ءَ تلوسگ ءَ اَنت ءُ کشت ءُ کشکاری ھم تباہ بوگ ءَ اِنت-

زھرشانی کنوکاں ڈپٹی کمشنر کوھلو ءُ دگراں گوں لوٹ کتگ کہ آ واپڈا ءُ پی ایچ آئی ءِ دُزاں سانکل بہ جن اَنت ءُ بجٹ ءِ ھساب ءَ بگر اَنت-

بلوچ اسٹوڈنٹس ایکشن کمیٹی ءِ بنجاھی جارکش ءَ وتی شنگ کرتگیں درشانی ءَ گُشتگ کہ پاکستان میڈیکل کمیشن ءِ شنگ کرتگیں پالیسی ءِ سر ءَ زھر درشان کنان ءَ گوشتگ کہ بلوچستان میڈیکل کالجز ءِ واستا پی ایم سی ءِ سر بیتگ ءُ تعلیم دشمنی پالیسی ءِ آرگ جانسلامتی ءَ بندوکیں ھزاراں نودربرانی شان ءِ سر ءَ پولینگ کنگ ءِ بروبری اِنت ءُ بنجاھی پتر ءِ ادارھانی نیمگ ءَ بلوچستان ءَ وانگی ادارھانی واستا کٹر ءُ گیر شوربندکنوکیں رویش ھچ رنگ ءَ اوپار کنگ نہ بیت اِنت –

آئی ءَ گُشتگ کہ بلوچستان ءَ وانگی نزام یکدم پشت کپتگ اے دمگ ءَ وانگی درچ ءِ رد ءَ پشکپتگیں دمگے ءِ لڑا ھوار بیت اِنت – کہ اود ءَ وانگی درچ زبھر کنگ بیتگ اَنت، پرائمری ءَ بہ گر داں میٹرک ءَ وانگی ادارہ گیشتریں جاھاں بند اَنت یا اسٹاف ءِ کمی ءِ سبب ءَ جوانیں وانگی دات کُت کنگ ءَ نہ اَنگ – ھمے رنگ ءَ شریں وانگی ءِ واستا اُستان ءِ بنجاپ نیزوری ءِ آماچ اِنت – ھمود ءَ استان ءَ وانگی ادارہ بازیں کچے ءَ جاڑیگ اَنت بلے گیشتر جاھاں کالج نیست اَنگ ھمے رنگ ءَ گوستگیں لھتے وھداں ھستیں وانگی ادارہ بازیں جیڑھانی دیمپان اَنت ءُ وانگیاں سرجم کنگ ءَ بے تھمبل اَنت- اشی ءِ منانک گوستگیں سرکار ءِ وھد ءَ برجم کرتگیں مکران میڈیکل کالج، جھالاوان میڈیکل کالج ءُ لورالائی میڈیکل کالج ءَ نودربرانی گون ءَ پیش اتکگیں ناھکیں رویش –

آئی ءَ گُشتگ کہ گوستگیں روچ ءَ شنگ بیتگیں جارے ءِ رد ءَ مزنیں میڈیکل کالجزاں بھر زورگ ءِ واستا نودربراں پاکستان میڈیکل کمیشن ءِ رجسٹریشن ءِ دزگرگ ءَ یک برے پد ءَ جاڑیگ بیگی اِنت ءُ ٹیسٹ ءِ بے سوب بیگ ءَ آیاں پاکستان میڈیکل کمیشن ءِ رجسٹریشن رس اِت کُت نہ کنت ءُ آیانی میڈیکل ءِ بستار ھلاس کنگ بیت اِنت – ھمود ءَ نودربراں بھر زورگ ءَ پیسر ءَ ٹیسٹاں بھر زرتگ ءُ میرٹ ءِ بنکی ءَ جتا جتائیں میڈیکل کالجزاں بھر زورگ ءَ سوبمند بیتگ اَنت ھمے وڑ ھمے نودربرانی چکاس بلوچستان یونیورسٹی یا بلوچستان یونیورسٹی آف میڈیکل اینڈ ہیلتھ سائنسز ءِ چیردستی ءِ واستا بیت اِنت چُشکہ ھائر ایجوکیشن کمیشن ءَ ھواریں ادارہ اَنت – بلوچستان ءَ وانگی ادارھاں گوات ءَ بال دے اَنت یک نوکیں پالیسی ءِ درچ ءَ یک بنجاھی ادارھے ءَ چہ پی ایم سی ءِ رجسٹریشن ءِ واستا ٹیسٹانی نامو کنگ باز جست ایر کن اَنت –

آئی ءَ وتی بیان ءِ گڈسر ءَ گُشتگ کہ اے پالیسی ءِ بنکی مول نودربرانی بستار ءِ ھلاس کنگ ءُ آیاں وانگ ءَ گستا کنگ ءُ آیاں تاوانباری ءِ نیمگ ءَ برگ ءِ بروبری اِنت بلوچستان ءِ نودربرانی واستا سربتگیں ءُ تعلیم دشمنی ھچ رنگ ءَ اوپار کنگ نہ بنت ءُ اے پالیسی ءِ ھلاپ ءَ جمھوری رنگ ءَ زھرشانی ءِ جد ءُ جھد ءَ دیم ءَ کاریں استانی سرکار ءُ دراھیں ادارھاں گوں دزبندی کن ایں اے وڑیں گیر سر کَش بیتگیں پالیسیانی ھلاپ ءَ آسنی دیوالے جوڑ بہ بیت ءُ بہ اوشتیت ءُ پی ایم سی ءِ نیمگ ءَ نودربرانی باندات ءَ پولینگ کنگ ءَ بہ رکین ایت دانکہ نودربر اے وڑیں چیزانی ھلاپ ءَ دگانی سر ءَ سرکپگ ءَ لاچار مہ بنت –