TBP Balochi

میان استمانی انسانی ھکانی روچ ءِ درگت ءَ اسلام آباد ءَ بلوچستان نیشنل پاٹی ءِ چیردستی ءَ مراگشے اڈ دیگ بوتگ کہ آئی ءِ تہ ءَ چہ بلوچستان ءَ زورانسری آوار جنگ بوتگیں مردمانی کھولاں ھم بھر زرتگ –

بلوچستان نیشنل پاٹی ءِ نیمگ ءَ مرگش پاکستان ءِ بنجاھی شھر اسلام آباد ءَ اڈ دیگ بوتگ کہ بلوچستان نیشنل پاٹی ءِ رھشون سردار اختر مینگل، پشتونخوا ملی عوامی پاٹی سر مستر محمود خان اچکزئی، پشتون تھپز مومنٹ ءِ رھشون منزور پشتین، انسانی حکانی رھشون آمنہ مسعود، اھوالکار ھامد میر، عاصمہ شیرازی، مطیع اللہ جان، سلیم صحافی، اسمبلی ءِ باسک ءُ نیشنل ڈیموکریٹک مومنٹ ءِ رھشون محسن داوڑ، افسریاب خٹک، جمئیت علما اسلام ءِ جنرل سیکٹری مولانا عبدالغفور حیدری، مسلم لیگ ن ءِ احسن اقبال، نیشنل پاٹی ءِ کبیر محمد شہی ءُ وائس فار بلوچ مسنگ پرسنز ءِ رھشون سمّی دین بلوچ ھوار بوتگ اَنت –

مراگش ءَ تران کنوکانی گوشگ ات کہ مروچی میان استمانی انسانی ھکانی روچ ءِ درگت ءَ ھما بنگپ ءِ سر ءَ کہ اے مراگش اڈ دیگ بوتگ ھستیں وھد ءَ پاکستان ءِ تہ ءَ درساں مستریں ءبیمناکیں گپ ئِے، بیگواھیں مردمانی جیڑہ مروچیگینیں نہ انت بلکیں پاکستان ءِ تہ ءَ بازیں دھکاں اے جیڑہ ھست انت اے درسیں وھد ءَ بازیں ھکومتے اتکگ بلے مردمانی آوار جنی درچ ھچبر ھلاس نہ بوتگ اَنت –

مراگش ءَ ھواریں آل پارٹیز ءِ رھشوناں چہ بلوچستان ءَ اتکگیں بیگواھیں مردمانی کھول ءِ گوم ءَ دچار کپتگ انت چہ بلوچستان ءَ زورانسری آوار جنگ ءُ بیگواہ بوتگیں ڈاکٹر دین محمد بلوچ، جہانزیب محمد حسنی، چہ ھب ءَ آوار جنگ بوتگیں عامر بلوچ، بی ایس او آزاد ءِ رھشون شبیر بلوچ، زاھد کرد بلوچ، چہ مستونگ ءَ بیگواھیں سعید احمد، بیگواھیں انسانی ھکانی باسک راشد حسین بلوچ، ھزدار ءِ جھمنند آصف بلوچ، رشید بلوچ ءِ کھولان ھوار دگہ بیگواھیں مردمانی کھولاں مراگش ءَ بھر زرتگ –

مراگش ءَ تران کنان ءَ بلوچستان نیشنل پاٹی ءِ رھشون اختر مینگل ءِ گوشگ ات کہ مروچیگیں بنگپ ءَ ھواریں بیگواھیں مردمانی کھولانی کچ ھرچی بہ بیت بلے بلوچستان ءِ تہ ءَ ازاب ءِ اتکگ ءُ ھزارانی کچ ءَ مردم بیگواہ انت ما ھر وھد ءَ کہ بیگواھیں مردمانی بارو ءَ گپ جنیں یا بلوچستان ءَ ھر وڑیں جیڑھے ءِ سر ءَ درشان دئیں گڑا مار ءَ ھمے گوشگ بیت کہ شما بلوچستان ءَ نشتگے ءُ گلہ کنے بیائے اسلام آباد ءَ وتی جیڑھاں دیم ءَ بیار ایت گڑا مروچی ما اے مراگش پاکستان ءِ بنجاہ اسلام آباد ءَ اڈ داتگ –

اختر مینگل ءِ گوشگ ات کہ مروچی اسلام آباد ءَ سیاسی باسک ءُ اھوالکار آ کچ ءَ ساڑی نہ انت پرچا کہ ھما بنگپ ءِ سر ءَ ما اے مراگش اڈ داتگ بوت کنت پاکستان ءِ دگہ جاھاں ھاسکر اسلام آباد ءَ اے انکس بلاھیں گپ ئِے نہ انت اشی ءِ بدل ءَ اگاں ما ھمے جار بہ جتیں کہ مروچی ما اد ءَ ھکومت ءِ پلا مرزی ءَ گپ جنیں گڑا اد ءَ ھما جاہ کہ بیگواھیں مردم نشتگ انت آھاں پہ نندگ ءَ جاہ نہ رس اتگ ات مروچی اد ءَ کہ مزلومانی گپ بوگ ءَ انت گڑا آ کچ ءَ مردم ساڑی نہ انت –

دیریگیں اھوالکار ءُ تجزیہ نگار حامد میر ءِ گوشگ ات کہ اد ءَ پوج مردماں آوار جنت ءُ آھانی کھولاں جون ھم دیگ نہ بنت انت اختر مینگل ءِ برات اسد مینگل ءَ چہ بندات بوتگیں بیگواھیں مردمانی درچ روچ مروچی یکشل ءَ برجاہ انت – حامد میر ءِ گوشگ ات کہ اشی ءَ پیش ریاستی ادارھاں ھمے بھانہ کتگ کہ بیگواھیں مردم افغانستان ءَ تتکگ ءُ شتگ انت، اشرف غنی آھاں پناہ دیگ انت بلے نوں افغانستان ءَ شمئے تالبانانی سرکار انت بلے انگت مردم آوار جنگ بوگ ءَ انت نوں کجا روگ ءَ انت –

وائس فار بلوچ مسنگ پرسنز ءِ رھشون سمی دین بلوچ ءَ بلوچستان ءَ زورانسری آوار جنگ ءُ بیگواہ بوتگیں مردمانی کھولانی نمائندگی کتگ ءُ تران کنان ءَ آئی ءَ گوشتگ ادارھانی تہ ءَ بیگواھیں مردمانی کھول کم شرپ کنگ بنت وھدیکہ سرکار ءِ کانود سازی ءَ بیگواھیں مردمانی کھولانی کیس ثابت نہ بوگ ءَ سزا ءِ تجویز کتگ کہ ھر ھوالہ ءَ ناھکی یے پرچاکہ پاکستان ءِ عدلیہ ءُ پولیس ءَ چیریں ادارھانی دیم بے بسی درشان اتگ گڑا بیگواھیں مردمانی کہ چوں وتی کیساں سابت کت کن اَنت –

سمی دین بلوچ ءِ گوشگ ات کہ دہ ماہ ءَ پیسر اسلام آباد زھرشانی ءِ وھد ءَ کھولانی گوم ءَ دروگیں کول کنگ بوتگ ءُ واتر کنائینگ بوتگ انت بلے روچ مروچی بیگواھیں مردمانی درگت ءَ ھچ وڑیں گامگیج زورگ نہ بوتگ –

اھوالکار عاصمہ شیرازی ءِ گوشگ ات کہ بیگواھیں مردمانی المیہ ترسناک ءُ گمزدگیں المیھے بلے بیگواھیں مردمانی کھول ھما وڑ کہ جھد کنگ انت الم ھمے زالبول انکلاب کار انت –

نیشنل ڈیموکریٹک مومنٹ رھشون محسن داوڑ ءِ گوشگ ات کہ بیگواھیں مردمانی جیڑہ سرجمیں پاکستان ءِ تہ ءَ ھست انت ٹکی دمگاں ھم پوج ءِ نیمگ ءَ اے امل دوبر کنگ بوگ ءَ انت بلے بلوچستان ءَ بیگواھیں مردمانی جیڑہ چد ءُ گیشتر انت ءُ اے جیڑہ ءِ سر ءَ اقتدار ءَ اتکگیں بازیں مردماں داواہ کتگ بلے جیڑہ گیش ءُ گیوار نہ کتگ –

مراگش ءَ مزنیں کچے ءَ راجداریں باسک، انسانی ھک ءُ سول سوسائٹی باسک ءُ وکیل ھم ھوار بوتگ انت –

مراگش ءَ تران کنان ءَ پشتونخواہ ملی عوامی پاٹی ءِ رھشون محمود خان اچکزئی ءِ گوشگ ات کہ دمگی مردمانی بگیری ءَ ڈن ءَ چہ اتکگیں پوج ءِ رویش انگریز ءِ وھد ءَ چہ ھم ترندتر ءُ جتا بوتگ اَنت مردم وتی ڈیھ ءَ مھر کنگ ءِ سبب ءَ آوار جنگ بوگ ءَ انت پاکستان ءَ پھمگ لوٹ ایت ناھکی ءَ ملک پُرش انت ھمے ھاتر ءَ یکبرے پیسر ملک پرشتگ –

پشتون رھشون ءِ گوشگ ات کہ پنجاپ ءَ مدامی پاکستان ءَ ھستیں دگہ مُچیتگیں رویش ءَ گوں چارتگ انت – بلوچ، پشتون، سندیانی سر ءَ زوراکی ءِ کوہ پروشگ ءَ پد مار ءَ چہ ھمے امیت دار انت کہ ما پاکستان زندہ باد بہ گوش انت اے بیوکوپی یے بیت اِنت –

پشتون تحفظ مومنٹ ءِ سرکماش منظور پشتین ءِ گوشگ ات کہ پاکستان ءَ زورانسری آوار جنگ ءُ بیگواھیں بوتگیں مردمانی ھاتر ءَ نا آمیدگس ھست ءُ ناکہ آمیدگساں ھک دو، مروچی ھر لوگ، زانشجاہ، بلوچستان ءُ فاٹا ءِ ھر دمک در زورانسری اوارجنی ءِ آماچ انت ورناہ ھچ جاہ وت ءَ پھریز کرت نہ کناں کہ ھمود ءَ بہ بننداں وتی وانگ ءَ برجاہ بدار انت یا روزگار ءِ کرت بہ کن اَنت – یک مردمے ءِ اوارجنی بس تھنا ھمائی جند بیگواہ نہ بیت بلکیں آئی ءِ سرجمیں کھول آزاب ءِ آماچ بیت اِنت –

پشتون رھشون ءِ گوشگ ات کہ اے ملک ءِ تہ ءَ آزاتیں پٹ ءُ پولی ادارہ نیست انت ریاستی ادارہ شوربندی ءَ گوں مردماں آوار جن انت بیگواہ کن انت آ شری ءَ سرپد انت ءُ زان انت کہ آھاں جُست کنوک نیست –

مراگش ءَ ھواریں دگہ سیاسی رھشون تجزیہ نگاراں ھم تران کتگ – وھدیکہ مراگش ءَ ترانکاراں بلوچستان ءَ اتکگیں بیگواھیں مردمانی کھولانی کیسانی سر ءَ جوڈیشنری ءُ آزادانہ پٹ ءُ پول ءِ ادارہ جوڑ کنگ ءَ ھوار بیگواھیں مردمانی دیم ءَ آرگ پِری ٹرائل موہ دیگ ءِ لوٹ کتگ –

وائس فار مسنگ پرسنز آف سندھ ءَ رسانکدراں وتی شنگ کرتگیں درشان ءِ تہ ءَ گوشتگ مروچی مئے گل سند سجاگی زرمبشت ہیومن رائٹس کمیشن ءُ سول سوسائٹی ءِ ھمراھی ءَ سرجمیں سند ءَ زورانسری اوار جنگ بوتگیں مردمانی یل کنائینگ ءِ ھاتر ءَ ریگل چار راہ ءَ بگر تاں کراچی پریس ءَ زھرشانی کتگ ءُ روانک ءِ کش اتگ –

درشان ءَ گوشگ بوتگ کہ بیگواھیں مردمانی آزاتی روانک ءَ سند ءِ راج دوستیں باسک ، راجدار ءُ چاگردی رھشون، سند بار کونسل ءِ وکیل، نودربر ءُ بیگواھیں مردمانی کھولاں مزنیں کچے ءَ بھر زرتگ –

زھرشانی روانک ءَ تران کنان ءَ رھشونانی گوشگ ات کہ گوستگیں بازیں وھداں سند ءُ بلوچستان ءَ ھوار سرجمیں ملک ءَ سندی، بلوچ، پشتون ءُ دگہ راجداریں باسک زورانسری آوار جنگ ءُ بیگواہ کنگ بوتگ انت کہ آھانی ھاتر ءَ سرجمیں ملک ءَ مزنیں زھرشانی ھم کنگ بوتگ بلے اے زرمبشتان چہ ریاستی ادارہ ھچ اسر مند نہ بوتگ انت –

درشان ءَ گوشگ بوتگ کہ سند ءَ چہ پنجاہ ءَ گیش راجدوستیں رھشون آوار جنگ بوتگ اَنت –

وائس فار مسنگ پرسنز آف سند ءَ وتی درشان ءِ تہ ءَ انسانی ھکانی میان استمانی روچ ءِ درگت ءَ درسیں انسانی ھکانی گل، ایمنسٹی انٹرنیشنل، اقوام متھدہ ءَ ھوار درسیں میان استمانی ادارھاں چہ لوٹ کتگ کہ پاکستانی ریاست ءِ نیمگ ءَ چہ سند ءُ بلوچستان ءَ ھوار سرجمیں ملک ءِ انسانی ھکانی لگتمالی سر ءَ گامگیج بہ زوریت –

درشان ءِ تہ ءَ گوشگ بوتگ کہ ما میان استمان ءَ چہ لوٹ کنیں کہ آ پاکستان ءِ پوجی ادارھانی تہ ءَ بندیگیں سند ءُ بلوچستان ءِ درسیں آوار جنگ بوتگیں مردمانی آزاتی ءِ ھاتر ءَ میان استمانی سیاسی سفارتی ءُ انسانی کرد ءَ پیلو بہ کن انت –

بلوچستان ءِ تیابدپی شھر گوادر ءَ وتی ھکانی لوٹانی پژدر ءَ “بلوچستان ءَ کو حق دو تحریک “ءَ انسانی ھکانی میان اُستمانی روچ ءِ درگت ءَ یک روانکے کش اِتگ – روانک ءَ بھر زیرگ ءَ مکراج ءِ بازیں جاھاں مردماں بازیں کچے ءَ بھر زرتگ –

چہ جاوید کمپلیکلس ءَ ھزارانء کچ ءَ شھر ءِ جتا جتائیں دگاں پند ءَ روانک کشان ءَ بلوچستان ءَ انسانی ھکانی لگتمالی ءَ اوگام جتگ – ھمے وھد ءَ مولوی ھدایت الرحمان بلوچ ءَ تران کنان ءَ گوشتگ کہ ھزارانی کچ ءَ مردمانی مُچ بیگ اشی ءَ منانک ءَ دنت کہ مھلوک زلماں بیزار اَنت- آئی ءَ گُشتگ کہ سی پیک ءَ چہ نوکی ءُ فیکٹری نا جنازہ، میت ءُ ورنایانی لاش دزکپتگ اَنت-

آئی ءَ گُشتگ کہ ما سیمی تبک ءِ شھری نہ اِنت، بلوچستان یک کالونی یے نہ اِنت بلوچستان یک بندیگجاھے جوڑ کنگ بیتگ کہ اد ءَ کس گپ مہ جنت –

آئی ءَ اُستانی سرکار ءِ سر ءَ ایراد گران ءُ گُشتگ کہ اے ھم وتی وزیری ءَ وش اَنت، بلے اے بُٹ پالیش کنوک اَنت –

آئی ءَ گُشتگ ما جست کن ایں مئے کمشرپی پرچا بیت اِنت ھاں ما ناشرکار اِنت؟ھا مئے دریاورد ناشرکار اَنت، استاد، مئے بلیدہ ءُ زامران ءِ زھگ ھم ناشرکار اَنت کہ آیانی سینگاں تیراں دُروشے – کلثوم ءُ ملکناز ءِ سینگاں ایف سی ءُ ڈیتھ اسکواڈ تیراں گوں دروش ایت، ھا اے ناشرکار بیتگ اَنت –

آئی ءَ گُشتگ کہ حیات بلوچ ناشرکارے بیتگ کہ پت ءُ مات ءِ دیم ءَ ایف سی ءَ تیراں گوں دروشتگ –

آئی ءَ سرکار ءَ گوں ٹوک دیان ءَ گُشتگ کہ ما مروچی نارازیں بلوچاں پُر ایمنیں روانکے کش اِتگ، چریشی ءَ لکانی کچ ءَ مردماں بھر زرتگ – اے روانک ءِ مھزبیں ناکامیں آمیدگس ےُ وابیں نزام ءِ ھلاپ ءَ اَنت – ما سرپد بیتگیں سی پیک مارا وانگجاہ دنت، کالجز ءُ یونیورسٹی رس اَنت بلے مارا چیک پوسٹ رس اِتگ –

آئی ءَ گُشتگ کہ وانگی ادارہ لوٹ ایں ءُ مارا چیک پوسٹ دے اَنت-

آئی ءَ گُشتگ کہ پولیس ءَ من ءَ کلوہ داتگ ما تئی زرمبشت ءِ بھر اِنت ءُ تئی نندانک ءِ سر ءَ ما دست چست نہ کن ایں- ھدایت الرحمان – ھدایت الرحمان ءَ گُشتگ آئی جی پولیس وت گوادر ءَ بئیت، بلوچ پولیس کارمند وتی براتانی سر ءَ دست چست نہ کن اَنت –

مولوی ھدایت الرحمان بلوچ ءَ گُشتگ کہ اگاں ریاست زالم جرنیلانی نام اِنت گڑا ما اے ریاست ءِ ھلاپ اِنت – اگاں ریاست عمران خان ءِ وڑیں نائلاکیں مردمے گڑا ما اے وڑیں نالائیکیں ریاست ءِ ھلاپ اِنت –

ما پُر ایمنی ءَ زھرشانی ءَ کنگ ءَ ایں ما ھچ باگی نہ اِنت مارا انگت گدار گوش اَنت – ما زانیں برتھ سرٹیفکٹ ءُ ڈیتھ سرٹیفکٹ نادرا ءَ رس ایت گڑا وتن دوستی ءِ سرٹیفکٹ رس ایت مارا گوشگ بہ بیت –

آئی ءَ گُشتگ کہ وھدیکہ جرنیل ءِ ھرچی لوٹ ایت ھماھی ءَ گدار گوش اَنت، 1971 وھدیکہ پاکستان پرشتگ یک بلوچے ءِ نام ءَ بہ گوش اِت گون بیتگ کہ پاکستان ءِ پروشگ ءَ، پرچا ما گداریں؟

آئی ءَ گُشتگ کہ ھرکسی ءَ پاکستان پروشتگ آ جرنیل کنگ بیتگ اَنت، آیاں پاکستان ءِ پروشگ ءِ داد دیگ بیتگ اَنت – ھاں پاکستان ءِ جوڑ کنگ ءَ کلبھوشن مھمد علی جناح ھمراھداری کرتگ؟ پرچا آئی ءَ اینکس پروٹوکول دیگ بیت اِنت، عمران خان ءِ ناکوزھگ اِنت ءُ قمر جاوید باجوہ ناکوزتک ءِ چک اِنت –

آئی ءَ گُشتگ کہ بیست ءُ شش روچ اِنت ما لوٹ کنگ ءَ ایں، ھا اے ناجائز اِنت کہ ما گدار اِنت، ما بنکی ھک لوٹ ایں – تئی آئین پاکستان شھری ءَ دنت – ما ھما لوٹگ ءَ ایں – روزگار لوٹ ایں، ٹرالر مافیا ءُ بارڈر مافیا ءِ ھلاپ ءَ گپ کنگ گدار اِنت – مئے دہ لک ورناہ نشہ ءِ آماچ اَنت، اے گندگیں کار ءُ بار کئی سروکی ءَ ھَلگ ءَ ایں؟اے روچ ءِ رھمانی ءَ کنگ ءَ اَنت – ھما کہ منشیات بھا کنت، ھما درستاں گیش وتن دوست اِنت –

آئی ءَ گُشتگ کہ ما ھر تک ءَ دیمپانی ءَ کن ایں نی اد ءَ اے وڑ نہ بیت اِنت کہ ھیکی کاپٹراں پُریں بلٹ باکس کاینت، ما آیانی ھلاپ ءَ چوک ءُ چار راھانی سر ءَ آیانی دیمپانی ءَ کن ایں –

مروچی گوادر ءَ بیوکیں روانک ءِ وھد ءَ شھر ءِ جتا جتائیں ھلکاں زالبولاں بازیں کچے ءَ نندانک جاہ ءَ سر بیتگ اَنت ءُ زھرشانی اش کتگ –

زانگ بہ بیت مروچی گوادر ءَ بیوکیں زھرشانی روانک ءَ بھر زورگ ءَ بازیں جاھاں مھلوک سیکورٹی فورسز ءَ داشتگ اَنت ھمے رنگ ءَ کراچی ءَ مکران ءَ آوکیں مساپر بس اوتھل ءِ ھند ءَ دارگ بیتگ اَنت-

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ سبی ءِ دمگ کرمووڈ ءُ ببرکچ ءَ پاکستانی پوج ءِ سر بوتگیں اُرشانی زّمہ واری منّ اِتگ –

بی ایل اے ءِ جارکش جئیند بلوچ ءَ گوشتگ کہ مئے سرمچاراں سبی ءَ دو جتائیں جاھاں زورگیریں پاکستانی پوج ءِ سر ءَ اُرش کُتگ اُرش ءَ چہ یک پوجی کارمندے مُرتگ ءُ دو زدگ بوتگ وھدیکہ پوجی پانگس ءَ تاوان بار بوتگ –

جارکش ءَ دیمتر ءَ گوشتگ کہ مئے سرمچاراں اولی اُرش سبی ءِ دمگ کرمووڈ ءَ وھدیکہ دومی اُرش سبی ءِ دمگ ببرکچ ءَ کُتگ کہ اودا بیست ءُ چار نومبر ءَ بی ایل اے ءِ سرمچاراں پیسر ءَ چہ کل کُتگیں تراک ناکیں شوروانی زد ءَ آھگ ءَ زورگیریں پاکستانی پوج ءِ یک کارمند ءِ ھما دمان ءَ مرتگ ءُ دو زدگ بوتگ –

جارکش ءَگوشتگ کہ بی ایل اے ھردو اُرشانی زمّہ واری ءَ منیت ءُ مکسد گرگ ءَ اُرش برجاہ مان انت –

یونائیٹڈ بلوچ آرمی ءِ جارکش مرید بلوچ ءَ رسانکدراں شنگ کرتگیں وتی یک درشانے ءِ تہ ءَ گوشتگ کہ گوستگیں مگرب ءَ بلوچ سرمچاراں کلات ءِ دمگ منگچر ءَ پاکستانی آرمی ءِ بنجاھی کینٹ ءِ مین گیٹ ءَ جاڑیگیں سکیورٹی پورس ءِ سر ءَ ھینڈ گرنیڈ اُرش کرتگ-

جارکش ءِ رد ءَ بلوچ سرمچاراں ھینڈ گرنیڈ اُرش ءَ سکیورٹی پورس ءِ دو کارندہ ھما جاہ ءَ مرتگ اَنت ءُ یکے زدگ بیتگ اے اُرش ءِ زمہ واری ءَ یونائیٹڈ بلوچ آرمی من ایت-

مرید بلوچ ءَ گُشتگ کہ اے اُرش ءَ پد بلوچستان لیویز پورس ءَ مئے سرمچارانی بیست ادار ءَ داں رند ءَ بیتگ اَنت ءُ سرمچاراں جوانیں جنگی رپکاں لیویز پورس ءِ انگیر پروشتگ ءُ درایگ ءَ سوبمند بیتگ اَنت-

آئی ءَ گُشتگ کہ یونائیٹڈ بلوچ آرمی ءِ نیمگ ءَ لیویز پورس بازیں براں سرپد کنگ ءَ ابید ھم بلوچ سرمچارانی دیم ءَ مِک بیگ ءَ اَنت مئے گل یک رندے پد ءَ ترندی ءَ لیویز پورس ءَ سرپد کنت کہ آ دشمنیں ریاست پاکستانی آرمی ءِ رنگیں رویشاں گستا بہ بنت اگاں ناں ما کجام ھم وھد ءَ آیانی سر ءَ ترندی ءَ اُرش کرت کن ایں –

آئی ءَ گُشتگ کہ ھمے رنگیں اُرش بلوچستان ءِ آجوئی ءَ داں برجاہ دارگ بنت –

بلوچستان ءِ ضلع لسبیلہ ء صدر ھند ءَ اوتھل ءَ چہ دی بلوچستان پوسٹ ءَ سربوتگیں ھالانی رِد ءَ مساپراں کراچی ، شال ءِ شھدگ سرجمی ءَ بند کتگ-

کراچی ءَ چہ تربت ءَ رؤکیں مساپر بس خورشید بلوچ ءَ دی بلوچستان پوسٹ ءِ اھوالکاراں گوں تران کنان ءَ گْوشتگ کہ مروچی سُھب ءِ ساھت ھشت ءَ کراچی ٹرمینل ءَ چہ سپر بندات کتگ ءُ اوتھل زیروپوائنٹ ءَ پولیس ءَ مزنیں کچے مئے کوچ اوشتارینتگ اَنت ءُ داں شپ ءَ اد ءَ نندگ ءَ گوشتگ اِت-

آئی ءَ گْوشتگ کہ اے وھد ءَ مزنیں کچے کوچاں سوار ھزارانی مردم پس اِتگ اَنت کہ آیانی تہ ءَ نادُراہ ، کماش ، زالبول چُک ھوار اَنت ءُ میت گاڑی ھم اوشتارینتگ اَنت-

آئی ءَ گوشتگ کہ انتزامیہ ءَ گْوشتگ شما گوادر ءِ نندانک ءُ روانک ءَ بھر زورگ ءَ روگ ءَ ئے-

خورشید ءِ رِد ءَ ما وتی سپر سُھب ءِ ھشت ءَ بندات کتگ ءُ شپ ءِ ساھت دہ ءَ تربت ءَ سر بہ ئے ما چون نندانک ءُ روانک ءِ واست ءَ درتکگ ایں؟

آئی ءَ گْوشتگ کہ مساپراں زھرشانی کنان ءَ کراچی ءُ شال ءِ شھدگ بند کتگ اَنت-

مساپرانی رِد ءَ اود ءَ کہ مارا اوشتارینگ بوتگ اود ءَ زالبولانی واست ءَ ھچ وڑیں آسراتی نیست چُک پیرزال بزگی ءِ دیمپان اَنت-

مساپرانی رِد ءَ ھکومت ردیں پالیسیانی سبب ءَ چہ نو اد ءَ ھم نندانک ءِ دروشم ءَ مردم زھرشانی جوڑ بوتگ اَنت-

مساپرانی زھرشانی ءِ سبب ءَ کراچی ءُ شال ءِ ھوار بؤکیں شھدگ ءِ سر ءَ گاڑیانی دراجیں لین لگ اِتگ-

مکران ءِ دگہ دمگاں ھم مساپراں دارگ ءِ ھال ھست اِنت – داں گُڈی ھالاں دمگی انتزامیہ ءُ مساپرانی میان ءَ گپ ءُ تران برجاہ ءَ اِنت-

نبشتانک: من ءَ زهیر کنت پہ وتی میتگ ءَ

نبشتہ کار : جلال اهمد

دی بلوچستان پوسٹ

درکسانی ءَ من یک کُچگی ءَ ودی بُوتگ آں کہ همود ءَ منی پِت ءُ پیرکی زمین هست اَنت همود ءَ کہ منی هاندان ءِ هپت پُشت ءَ وتی زند گوازینتگ گڑا منی میتگ ءَ یک وانگ جاھے هست اَت کہ اُود ءَ پنچ کلاس ءَ تک وانگ هست اَت من وتی بِنداتی وانگ چہ هما وانگ جاه ءَ بِندات کُت سُهب ءَ ادار هشت ءَ من وانگ جاه ءَ شُتگ اَت آں ءُ دُوازده ءَ چُٹّی بُوتگ اَت من واتر گِس اتکگ اَت آں سُبارگ کُتگ اَت گڑا ادار سِے ءَ وتی چاگل چہ مَشک ءَ سارتیں آپ آں پُر کتگ اَت ءُ شُتگ آں کہ پَسانی چارینگ ءَ ءُ مگرب تھار ءَ گِس ءَ واتر کُتگ اَت چِراگ ءِ وٹ مانداشتگ اَت ءُ وتی وانگجاه ءَ سبک یات کتگ اَت اَنت بِزاں کہ سُهب ءَ وانگ ءُ بیگاه ءَ پَسانی شوانگ بُوگ منی دنداه اَت همے پیما گڑا مئے میتگے مردم سکیں مہروانیں مردم اَت آں دْراه تِپاک اَت آں ءُ یکّے دُهمی ءِ درد وار اَت-

مئے گِس ءَ مارا گوک هم هست اَت ءُ هُشتِر هم هست اَت گڑا دُکّال ءُ بے هوری ءِ سبب ءَ چِے مئے میتگ ءَ آپ ءِ باز کمّی اَت آپ هست اَت بلے باز دُور اَت گڑا مئے گِسے مردماں هُشتِر زُرتگ اَت ءُ دیم پہ آپ آرگ ءَ رهادگ بُوتگ اَت اَنت دُور یک چمّگے هست اَت کہ هما مئے میتگ ءِ آپ اَت سجّهیں میتگ ءِ مردم پہ آپ ءِ واست ءَ هما چمّگ ءَ شُتگ اَت اَنت گڑا دِیر گوست کہ مئے هَند ءُ دَمگ آں ڈُکّال بُوت هور نہ بُوت سرجمیں هلک ءِ درچگ ءُ دار چہ بے هوری ءَ مِران بُوت اَنت میتگ ءَ سبزیں همب مَچ بے هوری ءَ چے تُن ءَ کُشت اَنت ءُ مُرت اَنت گڑا هند ءُ دمگ ابیتگ بُوت اَنت سرجمیں بازار ءِ زیبائی کہ همے درچک ءُ دار اَت اَنت اِشاں چے میتگ زِبھر بیت-

همے پیما گڑا مزنیں مُدّتے گوست کہ هور نہ بُوت مهلوک ءَ وتی پَس ءُ گوک بھا کتگ اَنت کہ مردم لاچار بُوت اَنت دِگے هِچ راه ءُ در نیست اَت مئے گِس ءِ مردماں منی هم پَس بھا کُت اَنت گڑا من سک بیوار بُوت آں چیا کہ نوں بیگاه آں من ءَ هِچ دِگے دنداه نیست اَت منی ءُ همے پَس اَت اَنت کہ من چارینگ ءَ بُرتگ اَت اَنت-

گڑا منی برات دائم گوں وتی هُشتِر ءَ شُتگ اَت آپ ءَ آرگ ءَ من هم یک رُوچے شُتاں گوں منی اے اولی روچ اَت کہ من گوں وتی برات ءَ آپ ءَ شُتاں گوں راه انچوش دُور اَت ما سِے ادار ءَ رند گِس ءَ سر بُوت اِنت گڑا اے روچ ءَ من سک دَمبرت ءُ من شپ ءَ زُوت وپت آں گڑا اے رُوچ ءَ چے رند من نہ شُتاں گوں –

همے پیما وهد گوزاں بُوت هپت سال سرجم بُوت کہ مئے هند ءُ دَمگ آں هور نہ بُوتگ اَت گڑا یک روچ ءِ اناگت آں جمبر بُوت ءُ سجّهیں روچ ءَ سرگوات ءَ شِکِت موسم سک دلکش بُوت جمبر سر ءَ ساهیل اَت اَنت روچ شُت ءُ مگرب ءِ وهد بُوت گِروک ءَ دڑامب ءِ سر ءَ جَنگ بِندات کُت سرگوات هم سُست بُوت گڑا نیم ادار گوست گِروک نزیک بُوان بُوت ءُ شپ ءَ ادار هشت ءَ هور ءِ ترمپ بِندات بُوت اَنت کمو دِیراں رند هور ءَ اِیر دات من گِس ءِ دروازگ ءَ دَپ ءَ نِشت آں ءُ هور ءِ نِدارگ ءَ چارگ ءَ اَت آں هیر شپ تھار اَت شرّیں ڈولی ءَ گِندگ نہ بُوگ ءَ اَت بلے هما وهد ءَ کہ گِروک ءَ جتگ اَت گڑا گُشے سرجمیں میتگ ءِ روژناه کتگ اَت میزان میزان ءَ هور تُرند بُوان بُوت ءُ دِیران داں هور رِتک ءُ پد ءَ گَرّو ءِ گوات ءَ سر کُت ءُ هور هلاس بُوت-

چو کہ مئے گِس کوه ءَ چے باز دُور نہ اَت انچوش کہ هور هلاس بُوت گڑا کوه ءَ چِے آپانی آواز پیداک اَت گڑا میتگ ءِ دْراهیں مردماں وتی اَزباب زُرت اَنت ءُ دیم پہ وتی ڈگاراں رهادگ بُوت اَنت من ءَ هم دل ءَ نہ مَرینت من هم گوں وتی گِس ءِ مردماں گوں شُتاں گو گڑا سرجمیں بازار ءِ مهلوک وتی ڈگاراں آپینکی کنگ ءَ اَت اَنت دْراهیں مردم گَل ءَ اَت انت کہ تیوگیں بازار ءَ مردمانی ڈگار آپ بُوت اَنت گڑا پاٹی ءَ آس ءِ روک ءُ دْراهیں مردم آس ءَ چپ ءُ چاگِرد ءَ نِشت اَنت گپ ءُ تران اَت سک وش اَت کندگ ءُ مسکرائی اَت شپ بے وهد بُوت گڑا ما چیزے مردم شُت اِنت گِس آں ءُ کماش پاٹی وتی ڈگارانی پانِگ اَت اَنت گڑا من گِس ءَ سر بُوت آں وپت آں بلے من ءَ واب نہ یتک کہ من سک گَل اَت آں چیا کہ هپت سال ءَ رَند هور بُوت بلاهیں مدّتے بے هوری ءَ چے ما پہ هور ءِ واست ءَ مهتاج اَت اِنت-

گڑا لھتے روچ گوست زمین کمو هُشک بُوت ما شُت اِیں کُوٹینگ ءِ چِنگ ءَ هر روچ نیم روچ ءَ وهد ءَ ما شُت اِیں کور ءَ اُژناگ کُت سک وش بُوت ڈگارنی آپ کہ کم بُوان بُوت اَنت دِهکان آں کِشگ بِندات کُت دْراهیں دمک ءُ در روچ پہ روچ سبز ءُ شاداب بُوان بُوت اَنت پد ءَ کِشار مزن بُوت اَنت همک سُهب کپوتانی کُوکُو ءُ بُلبلانی شِہزارگ ءَ تیوگیں میتگ سرا زُرتگ اَنت سک وش اَت کہیرانی لمب بُن ءَ گِر اَت اَنت هر کس گوں وتی ڈگاراں گوں مُشکول اَت سرجمیں بازار ءَ مردم شات اَت اَنت منی زندگی ءِ وشتریں ساهت هما اَت اَنت-

نوں من ءَ مُدّتے گوستگ کہ من وتی هنکین ءَ واتر نہ شُتگ آں من ءَ سک زهیر کنت پہ وتی میتگ ءَ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: تْرانگ

نبشتہ کار: دُرناز

دی بلوچستان پوسٹ

مرچی پَد ءَ ھور گْوارگ ءَ اِنت، جمبر اَنچو سیاہ ءُ تھار اَنت گوش ئے تیوگین دُنیا ئِے تھار کُتگ! اَنچو گُمان بیت کہ تیوگیں دُنیا ھاموش اِنت ءُ کِرّ ءُ کش ءَ کس مردم نیست ھور پد ءَ گوں تُرندیں گْواتے ءَ انچو کَشّگ ءَ اِنت ءُ دْراھیں جھان ئِے سر ءَ زُرتگ۔

من ءَ پد ءَ ھور انچو وش بوگ ءَ اِت۔ چوناھا من ءَ ھور دوست بنت۔ وھدے کہ ھْور گْوار ایت گُڑا من باز گَل بہ آں ءُ من لُوٹ آں کہ دْراھیں دُنیا ھَاموش بہ بیت ءُ تھنا ھمے ترمپ بہ بنت کہ بْرمش ئِے منی گوشاں بہ کپ ایت وھدے کہ بہ گْوار ایت گُڑا من پد ءَ جیڑگ ءَ بِندات بکن آں۔

گُڑا مرچی پد ءَ ھور ءِ موسم اِنت ءُ من وتی گِس ءِ دپ ءَ تھنا نشتگ آں۔ گِند ئے لین ھم نیست ءَ تھاری ءَ انچو مانشانتگ اَت گْوش ئے چمّ پہ چمّ ءَ میم نہ بوت ءُ دُراہ واب ءَ اَنت۔

وھدے کہ من وتی سَر جھل ءَ کُتگ اَت ءُ کُونڈانی سر ءَ ایر کُتگ۔ گُڑا یک اجبیں ھیال ءُ جِیڑگ ءَ اِت آں کہ پرچا ما بلوچ راج چو بزّگ ایں؟ اے دُنیا ءِ تہ ءَ زاناں پرچا ما بلوچ چو بے وَس ایں۔ ما پرچا گوھر ءُ تھاریں شپاں دگ ءُ روڈانی سر ءَ کپتگ ایں ءُ ھمے گْوھارانی چمّ مُدام ارسیگ اَنت، ماتانی جگر ھون اَنت، ماتانی تَنگوئیں بَچ گار ءُ بیگواہ کَنگ بوگ ءَ اَنت ما بچار ایں کہ سمّی ءُ مھلب ءَ چو بزّگ ءُ لاچار اَنت روچ ءُ شپ ءَ وتی زِند ءَ روڈانی سر ءَ گُوازینگ اَنت۔ اے درد مارا کُجا آرام ءَ کِل اَنت۔ انوں کُجام ماتے کہ گِریوگ ءَ نہ اِنت، کُجام لوگ اِنت کہ آس روک نہ اِنت۔ ھرچ لوگ ءَ بچار واہ ءُ زاری اِنت۔ ما چنچو بے وس ءُ ناوس ایں۔

ھمے جیڑگ ءَ گوں من گُلائیش اِت آں من کمو چست بوت آں چار ات ھور ءَ بس کُتگ ءُ استال یک ءُ دو دانگ چو دْرپشگ ءُ شھم دیگ ءَ اِت اَنت۔ گوں ھمے چارگ ءَ من ءَ چہ پشت ءَ یکے ءَ دست جت ءُ من گُڑ ات ءُ منی دست لَرز ات اَنت۔ وھدے کہ من پُشت ءَ چار ات گُڑا گِند آں کہ اے وَ منی مھکیں مات اِنت ءُ چو کُوہ ءَ منی دیم ءَ مِک اِنت ءُ من ءَ گْوش ایت “اڑے کامریڈ تو اے وھد ءَ ھم آگاہ ءَ ئے؟ برو بہ وپس “من گوشت “ھو منی مات ، من وپس آں”پد ءَ گوں من ھمے جیڑگ ءَ منی چمّ ارسیگ بوت اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ تیاب دپی شھر گوادر ءَ وتی لوٹانی ھک ءَ بلوچستان ءَ ھک دے تھریک نندانک ءَ مروچی 25 روچ اِنت برجاہ ءَ اِنت-

بلوچ تیاب ءَ بے کانودی ٹرالرنگ ، پوجی چیک پوسٹانی سر ءَ راج ءَ زلیل کنگ ، سیمسر ءَ باپاری ءِ بند کنگ ءِ بگیری ءُ دگہ لوٹانی ھک ءَ مردمانی مزنیں کچے ءَ نندانک ءَ ساڑی اَنت-

مروچی پولیس ءِ مزنیں کچے ءَ نندانک ءِ چاریں نیمگاں انگر ءَ کتگ ءُ مولونا ھدایت الرحمان بلوچ ءِ دزگیری ءِ دزبندی کتگ-

پولیس ءَ نندانک ءِ جاہ ءَ آیگ ءَ پد شھر ءَ چہ زالبولانی مزنیں کچے ءَ نندانک جاہ ءَ سر بوتگ اَنت- دانکہ شپ ءَ زالبولانی مزنیں کچے ءَ ساڑی بوتگ اَنت –

مروچی ءَ نندانک ءَ نشتگیں مردماں گوں مولوی ھدایت الرحمان ءَ تران کنان ءَ گْوشتگ کہ اگاں اد ءَ تاکت کارمرز کنگ بوت گُڑا زمہ وار بلوچستان ءِ سر وزیر قدوس بزنجو ءُ ایم پی اے حمل کلمتی بنت-

آئی ءَ گْوشتگ کہ وتی ھکّیں لوٹانی ھاتر ءَ بندیگجاہ ءُ مرگ ءَ چہ تُرسینوکیں اھمکانی جنت ءَ نشتگ ایں-

آئی ءَ گْوشتگ کہ اے جُھد برجاہ بیت ءُ باندا روانک ءَ پد ھزارانی ھساب ءَ دیم پہ تھانہ ءَ رو ایں-

آئی ءَ گْوشتگ کہ ھکومت چمّاں پچ بہ کنت ءُ بہ چار اَنت مروچی سرجمیں گوادر ءَ اد ءَ یکجاہ بوتگ ءُ باندا سرجمیں مکران چہ مردم اد ءَ سر بنت-

آئی ءَ گوں راج ءَ لوٹ کتگ کہ آ اے جُھد ءَ گیش ءَ گیش بھر بزور اَنت-

مولوی ھدایت الرحمان بلوچ ءَ گْوشتگ کہ بلوچستان ءَ تاکت ءِ کارمرز کنگ ءَ چہ جیڑہ ودی بوتگ اَنت ءُ نو ھم ھکومت ھمے جیڑگ ءَ اِنت تاکت ءِ کارمرز کنگ ءَ مارا بے توار کنت-

آئی ءَ گْوشتگ کہ باندا اے شھر ءَ یک بلاھیں روانکے کشگ بیت دْراھیں روانکاں چہ مستر بیت ، ھکومت ءِ بانداتگیں روانک ءَ چہ تُرس آماچ اِنت-

زانگ بہ بیت مروچی گوادر ءَ پولیس ءَ کماشیں بلوچ راھشون یوسف مستی خان گداری ءِ نام ءَ دزگیر کتگ-

یوسف مستی خان زیک کراچی ءَ چہ گوادر ءَ زھرشانی ءِ ھاتر ءَ ھمدردی ءِ ھاتر ءَ اَتکگ بوتگ-

واپڈا گریڈ ءِ نزیک ءَ پاکستانی پوج ءِ سر ءَ اُرش کتگ دو کارمند کُشتگ اَنت – میجر گوھرام

بلوچ سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں پنچ شمبے روچ ءَ مستونگ ءِ واپڈہ گریڈ ءِ نزیک ءَ پاکستانی پوج ءِ کاروان ءِ سر ءَ مزنیں سلاھانی گوما اُرش کتگ –

جارکش ءَ گوشتگ کاروان ھواریں پرپٹ اُرش ءِ زد ءَ اتکگ آئی ءِ سواریں دو پوجی کارمند ھما دمان مرتگ –

جارکش میجر گوھرام بلوچ ءَ بلوچ راج ءَ چہ لوٹ کتگ گوشتگ کہ پاکستان پوج ءِ تکانہ، تر ءُ گرد کنوکیں گاڑی کاروان ءَ چہ دور بہ بیت آئی گوشتگ اُرش بلوچستان ءِ آجوئی ءَ تاں برجاہ مان انت –