TBP Balochi

بلوچستان ءِ دو جتاجتائیں دمگاں پاکستانی پوج ءِ نشانگ کنگ وئیل دیم ءَ اَتکگ اَنت-

مستونگ ءِ دمگ کردگاپ ءَ پاکستانی پوج ھما وھد ءَ اُرش ءِ نشانگ کتگ وھدے آ دمگ ءَ پیشگامی کنگ ءَ بیتگ-

بنداتی ھالانی رِد ءَ پجّار نہ بوتگیں سلاہ بندیں مردماں پوج ءِ سر ءَ تیرگواری کتگ، چریشی ءَ پد کمو دیر ءَ تاں میڑ برجاہ بیتگ-

دومی وئیل کیچ ءِ دمگ زامران نوانو ءَ بیتگ اود ءَ پاکستانی پوج ءِ یک کاروانے ریموٹ کنٹرول بمب تراک ءَ چہ نشانگ کتگ-

دمگی اِھوالکار ءَ گوشتگ کہ تراک ءِ آسر ءَ بیرانیانی ھال اِنت، بلے کچانی پدری نہ بیتگ-

وئیلانی زمہ واری انگت ھچ گل ءَ نہ زرتگ اَنت-

بلوچ یکجھتی کمیٹی ءَ لیکہ درشان کتگ انت کہ نزیک ءَ یک سالے بیت کہ گل ءِ بنجاھی سروک ڈاکٹر ماہ رنگ بلوچ ءُ دگہ رھشون دروگیں ءُ وتگڑین کیسانی چیر دستی ءَ ناجائزیں وڑے ءَ دزگیر کنگ بوتگ اَنت۔ چہ ھچ وڑیں چَمدیست ءُ مھکمیں شاھد ءِ نہ بوھگ ءَ آ انگت ءَ بندیگ جاہ ءَ دارگ بوگ ءَ اَنت۔

آئی ءَ گوشتگ کہ گوستگیں شش ماہ ءِ تہ ءَ جیل ءَ ڈاکٹر ماہ رنگ ءِ جان سلامتی ءِ سر ءَ سک باز تاوان رس اتگ۔ آئی ءَ چہ جیل ءِ سروک ءَ بازیں نبشتھی لوٹ کتگ کہ آ دوا ءُ درمان ءِ آسراتی ءَ بہ دنت بلے آئی ءِ لوٹ یکشل ءَ رد کنگ بوتگ اَنت۔ گُڈسر ءَ چہ کانونی ٹیم ءَ آمیدگس ءَ درھواست ءِ دیم دیگ ءَ پد جیل ءِ ڈاکٹر ءَ آئی ءِ پٹ ءُ پول کتگ ءُ جتا جتائیں تبی ٹیسٹ نبشتہ کتگ بلے اے گپ ءَ ابید آئی ءَ را نادراھجاہ ءَ راہ اش نہ کتگ۔

ھژدہ فروری ءَ آئی ءِ جاور گیشتر ناگیگ بوتگ اَنت کہ ایشی ءِ سبب ءَ جیل ءِ واکداراں آئی ءَ را شیخ زاید نادراھجاہ ءَ برگ بوتگ انت کہ اود ء آئی ءِ کمر ءِ ایم آر آئی کنگ بوتگ۔ رپورٹ ءَ سیرین ءِ ھڈ سنگینیں جیڑھانی نشانی کتگ کہ ایشی ءِ تہ ءَ ڈسک ءِ ابھار، اعصابی جڑانی زور ءُ L4-L5 ءِ درچ ءَ اینولر ٹیئر ھوار انت۔ ڈاکٹراں آرام ءُُ تبی الاج ءِ سر ءَ ھاسیں رنگے ءَ سوج داتگ۔

گل ءَ گْوشتگ کہ اے گپ سک باز اپسوز اِنت کہ پولیس ءَ بنداتی وھد ءَ ایم آر آئی ءِ رپورٹ ءِ دیگ ءَ چہ انکاری کتگ ءُ آئی ءَ را پُشدر کنگ ءِ کوشست کتگ۔ چہ یکشلیں قانونی زور ءَ پد اے رپورٹ چہ دہ روچ ءِ جھد ءَ پد دست کپتگ۔

جانسلامتی ءِ سبوت ءَ چہ اے گپ پدر اِنت کہ ڈاکٹر ماہ رنگ ءَ را زوت ءُ سرجمیں الاج ءِ زلورت اِنت۔ اے گپ ءَ ابیع آمیدگس آئی ءِ زمانت ءَ ھچ وڑیں مھکمیں کانونی بنیاد ءَ رد کنگ ءَ اِنت ءُ آمیدگس ءِ دراجیں ءُ درگیریں امل ءِ سر ءَ زور دیگ ءَ اِنت، اگاں چہ آئی ءِ سر ءَ ھچ وڑیں ناوشین بھتام نیست۔

بلوچ یکجھتی کمیٹی تچک ءَ جار جنت کہ انسانی ھک ءُ انساپ ءِ توار چست کنگ جرمے نہ انت۔ داکٹر ماہ رنگ ءِ آسراتی درمانی ءُ آئی ءِ آزاتی ءَ چہ زبھر کنگ آئین ءُ قانونی ءُ انسانی ھکانی لگتمالی اِنت۔

گُڈسر ءَ مئے لوٹ اِنت کہ ڈاکٹر مھرنگ بلوچ زوت سرجم ءُ شرین درمان کنگ بہ بیت، ءُ آ زوت زمانت ءِ سر ءَ یل کنگ بہ بیت۔ بلوچ یکجھتی کمیٹی ءِ دراھیں وتسر ءَ دزگیریں راھشون بے دیر ءُ تاھیری ءَ آجو کنگ بہ بنت۔

کراچی ءِ زھرشانی کنوکاں امریکی کونسل خانہ ءِ تہ ءَ روگ ءِ جھد کتگ ءُ ماڑی پروشت ءُ پروش کتگ کہ چریشی ءَ تیرگواری ءَ کم چہ کم 8 مردم بیران بوتگ انت۔

امریکہ کونسل خانہ کراچی ءِ بندر ءِ نزیک ءَ انت۔

سوشل میڈیا ءِ ویڈیوانی تہ ءَ گندگ بیت کہ لھتے مردماں گیٹ پروشتگ ءُ تہ ءَ شُتگ اَنت، ایشی ءَ پد استقبالیہ ءُ سیکورٹی روم ءِ شیشگ پروشتگ اَنت۔

مجلس وحدات مسلمین ءِ جارکش ءِ رد ءَ اے مھلوک ءِ زھرشانی یے بوتگ کہ ایشی ءِ تہ ءَ لس مھلوک امریکی قونصل خانہ ءَ سر بوتگ ءُ یک مذھبی مردمے ءِ بیرانی ءِ پسو ءَ زھرشانی اش کتگ۔ آئی ءَ گوشتگ کہ زھرشانی کنوکاں چہ تہ ءَ ھم تیرگواری کنگ بوتگ۔

پولیس ءُ انتزامیہ ءَ انگت ءَ اے گپ پدر نہ کتگ کہ تیرگواری کجا چہ بوتگ ءُ کئے ءَ تیرگواری کتگ۔

پولیس ءِ سرجن ڈاکٹر سمیعہ سید ءَ اے گپ ءِ پدرائی کتگ کہ 8مردم بیران ءُ 8 ٹپی بوتگ انت۔

کراچی پولیس ءِ ڈی آئی جی ایسٹ زون ءَ گشتگ کہ لھتیں زھرشانی کنوک کونسل خانہ ءَ چہ دیم ءَ روگ ءَ سوبین بوتگ انت بلے پولیس جاہ ءَ سر بوتگ ءُ جاور ھال کنٹرول کتگ انت۔

دومی نیمگ ءَ صوبائی داخلہ ءِ وزیر ضیاؤلحسن لنجار ءَ ایڈیشنل آئی جی کراچی ءَ چہ امریکی کونسل خانہ ءِ دپ ءَ بوتگیں زھرشانی ءِ بابت ءَ اھولانی لوٹ کرتگ۔

صوبائی وزیر ءَ وتی بیان ءِ تہ ءَ گوشت کہ کس ءَ را کانود ءَ را وتی دست ءَ زورگ ءِ موہ دیگ نہ بیت امن ءُ ایمنی ءَ ناگیگ بہ کن انت ناشرانی ھلاپ ءَ کانود ءِ رد ءَ کارروائی کنگ بیت۔

آئی ءَ پولیس ءَ را کڈن کنگ کتگ کہ آ گچینی جاھانی سیکورٹی ءَ گیش ترند بہ کنت۔

امریکہ ءُ اسرائیل ءِ اُرشانی تہ ءَ ایران ءِ سروک آیت اللہ خامنہ ای ءِ بیرانی ءِ پدر کنگ ءَ پد دگنیا ءِ جتا جتائیں ملکاں امریکی سفارت ءُ کونسل ھانھانی دپ ءَ زھرشانی ءِ ھال اِنت۔

زھرشانی کنوک عراق ءِ شھر بغداد ءِ گرین زون ءِ سر ءَ اُرش کنگ ءِ جھد ءَ اَنت کہ اود ءَ امریکی سفارتھانہ اِنت۔

بلوچ یکجھتی کمیٹی ءَ گوشتگ کہ گل کیچ ءَ دو ورنایانی لاشانی دور دیگ ءَ گوں تُرندی ءَ ایر جن ایں- اے وئیل زورانسری آوار جنی ءُ درکانودی کوش ءِ دْرچ اِنت یک تُرسناکیں مسالے، کہ بلوچستان ءَ انسانی ھکانی سنگین ءِ جاور ءَ پیشدار اِیت-

ھپدہ سالی ئیں منزور بلوچ ء نبی بخش ھشت جولائی 2025 ءِ شپ ءَ آئی ءِ لوگ ءَ چہ کولواھی بازار، آبسر ءَ زورانسری بیگواہ کتگ- نُھ ماہ ءَ تاں آئی ءِ کھول انساپ ءِ ھاتر ءَ دروازگ ٹُک اِتگ، بلے ناں چُشیں ایف آئی آرے دیم ءَ آورتگ نانکہ آمیدگس ءَ پیش کتگ- بیست شش فروری 2026 ءَ آئی ءِ لاش چہ کیچ کور، تربت ءَ دزکپتگ-

دیمتر ءَ گوشتگ ھمے وڑ عمران تاج بلوچ ء محمد تاج، اُمر 26 سال کہ یونیورسٹی آف تربت ءِ نودربرے بیتگ، 27 جون 2025 ءَ روچانی رھم راہ ءَ چہ آوار جتگ- 27 فروری 2026 آئی ءِ لاش دزکپتگ کہ آئی ءِ سر ءَ لَٹ ءُ کُٹانی نشان ھست بیتگ اَنت-

بلوچ یکجھتی کمیٹی ءَ تچک کنت کہ اے گامگیج آئین، میان اُستمانی کانود ءُ بُنیادی انسانی ھکانی تچکی ءَ ھلاپ ورزی اِنت- زورانسری آوار جنی ءُ درکانودی کوش ھچ مزھب چاگرد ءَ منّگ نہ بیت-

آئی ءَ گْوشتگ کہ ما لوٹ کن ایں کہ دوئیں وئیلاں زوت، پلگاری پٹ ءُ پول بہ کن ات، زورانسری آوار جنی ءِ دْرچ ءَ زوت بند بکنت-

گُڈی ءَ گوشتگ کہ بلوچ یکجھتی کمیٹی میان اُستمانی ھکانی گلاں، اکوام متھدہ ءُ میان اُستمانی مردماں چہ لوٹ کن آں کہ آ بلوچستان ءَ برجاہ انسانی ھکانی ھلاپ ورزیاں زوت گامگیج بذور اَنت-

ایران ءِ ھال رسانکدر ءَ امریکہ ءُ اسرائیل ءِ اُرشانی تہ ءَ ایران ءِ سپریم لیڈر آیت اللہ علی خامنہ ای ءِ بیرانی ءِ پدرائی کتگ۔

ایشی ءَ چہ پیسر ڈونلڈ ٹرمپ ءَ سوشل نیٹ ورک ٹرتھ ءِ سر ءَ نبشتہ کتگ کہ ‘گوستانک ءِ بدترین مرداں چہ یکے خامنہ ای کشتگ’۔

ڈونلڈ ٹرمپ ءَ گوشتگ کہ ‘اے انساپ نہ ایوک ءَ ایران ءِ راج ءِ ھاترا اِنت بلکیں پہ ھما درستیں مزنیں امریکی ءُ دنیا ءِ جتا جتائیں ملکانی مردماں کہ خامنہ ای ءُ آئی ءِ ھون واریں ٹولی ءِ دست ءَ کُشگ یا ناتوان کنگ بوتگ اَنت’۔

چریشی ءَ پیش گوستگیں شپ ءَ سرائیل ءِ سروزیر نیتن یاھو ءَ ھم رسانکدراں جار جتگ ات کہ خامنہ ای گوستگیں روچ ءِ اُرشاں کشگ بیتگ-

مروچی سھب ءَ اسرائیل ءُ امریکہ ءَ ایران ءِ بنجاھی شھر تھران ءَ ھوار اسپھان، گرج ءُ سیستان ءُ بلوچستان ءِ جاہ کنرک ءُ چھبار ءَ ھم اُرشانی اھوال دیم ءَ اتکگ انت-

امریکہ ءُ اسرائیل ءِ اُرشاں پد ایران ءَ امریکہ ءِ بنجلانی نشانگ کنگ بندات کتگ انت کہ بنداتی ءَ ایران ءَ اسرائیل ءَ تلب ابیب ءُ دگہ جاہ نشانگ کتگ انت-

ایران ءَ امریکہ ءِ بنجل بھرین، قطر،امارات، کویت ءَ نشانگ کتگ انت کہ چریشی ءَ شھراں ترس ءُ بیم تالان بیتگ انت-

شنگ بیتگین تامر ءُ اکساں گندگ بیت برز ءَ دوت چِست ءُ شھراں مزن مزنیں توار اشکنگ بوگ ءَ انت-

چریشی ءَ پد بازیں ڈیھاں برزی رھگوزی راہ بند کتگ انت ءُ چریشانی توک ءَ ایران، اسرائیل ءُ امارات ءَ ھوار دگہ جاھاں ھم برزی رھگوزی بند کتگ انت-

سعودی عرب ءَ ھم امریکہ ءِ بنجل ءِ نزیک ءَ تراکانی توار اشکنگ بیتگ انت-

چادر ءُ چاردیوالیانی گپ جنوک

نبشتہ کار: مُروارد بلوچ

دی بلوچستان پوسٹ

وتی باری ءَ گران اِنت ؟ تو ھمے پنجابی ءِ ھمراھی ءَ شپ ءِ نیم ءَ دور کن ئے مھلوک ءِ لوگاں ، ورنایاں چست کن ئے ، مات ءُ گھاراں گِرّان کن ئے ، لٹ دے ئے ءُ ماتانی چُکاں بر ئے ترا شرم نکنت ،تو بلوچے نہ ئے؟ آ ٹیمب ءَ ترا چادر ءُ چاردیوالی پکر نئیت کہ بلوچے ئے چو بے ازت کنگ ءَ ئے مرچی کہ تئی جند ءِ باریگ آتک تو نشتگ ئے کہ چادر چاردیوالی ، چُک جنیں ، بلوچی گیرت گپ ءَ جنگ ءَ ئے لج نہ کنت ترا ۔ ھیٹ مناپک ،چم جہلیں پیٹو ، اے گپ جنگ ءَ ترا شرم بیتکیں کہ تو بہ نند ئے ءُ چار چاردیوالی ءُ جنین چُک ءُ بلوچیت ءِ گپ ءَ بجن ئے، پنجابی کاسہ لیس جوڑ بوتگ ئے پہ چار کلدار ءَ ۔۔ اڑے چارکلدار ءَ تو وتی ایمان ،مزھب ، راج ، زمین ،زبان درست بھا کرتگ اَنت ،ترا زندگ بوگ ءِ ھچ ھک نیست ءُ ھما مردم کہ تئی پشت پناھی ءَ کنت یا تئی ھمراہ اِنت آئی ءَ زندگ بوگ ءِ ھک نیست ، شما بوج اِت زمین ءِ سر ءَ ، اللہ ءِ لٹ شمارا انچو لگ اِتگ کہ نوں شمئے گڈی وھد اِنت ھرچی نہ کُرتگ بکن اِت ، چد ءُ دیم بلوچ شمارا انچو کن اَنت کہ شمارا ناں بلوچ ءِ زمین زور اِیت ناں پنجابی ۔۔
دلار ۔۔۔ اے نام ءِ پِر بوگ ءَ ساری انسان بمِرات بلے شمارا آپ مان نیست شمئے زمیر مُرتگ کہ شمارا ھچ پرواہ نیست کسے دلار گش اِیت یا بڈوا ۔۔
شمئے مَرگ ءَ پد شمئے پت ، مات ءُ گھارانی چے ھال بیت ، چون چماں چست کن اَنت مھلوک ءِ دیم ءَ، کجا رو اَنت کئی درّ ءَ ٹُک اَنت اگاں بزگ بہ بنت ، تو چے گش ئے تئی مَرگ ءَ پد اے پنجابی تئی پِت ماتاں زور اِیت ءُ پود اِیت ، لاپ اِش دنت ، یا پھازیت اِش۔

اے واب ءَ مہ گند ، تو انچو مِر ئے اے پنجابی تئی ھاندان ءَ جنت لگتے کس ءَ دپی جُستے نہ کنت ، توری شُد ءَ مِرگ ءَ بہ بنت ، بازار بہ پنڈاں بلے اے پنجابی جُستے نکنت پرچا کہ تو ایشی ءِ دلارے بوتگ ئے برات ءُ سیاد وارس نبوتگ ئے، تو مِر ئے تئی جاگہ دگِرے دار اِیت کُچک کنت آ کہ مِر اِیت دگرے ءَ پٹہ ءَ گُٹ ءَ دنت کچک کنت۔

انگت ماھلہ وت ءَ بہ رکین اِت چہ سِلکاریاں دور بہ بہ ئے اے پنجابی ءِ کاسہ لیسی ءَ ویل بہ کن اِت ، اگاں ناں تئی مَرگ ءَ رند تئی پت ءَ ھرکس بگند اِیت گش اِیت اے ھما دلار ءِ پت اِنت مرچی چو زلیل اِنت یا تئی ھاندانے یک مردمے کسے بگند اِیت گش اِیت اے ھما دلار ءِ ھاندان اِنت کجا شَرّ بیت ۔۔ داں تئی ھاندان ءِ یک مردمے زندگ بہ بیت اے کلّنک دور نئیت ۔ اے شگان داں ھپت پُشت ءَ پہ شما ایر اَنت بلکیں داں بلوچے ھست بیت تئی نام دلاّر ءَ چہ زانگ بیت ۔۔ انچو کہ میرمُھیم ھان بوتگ ، دادشاہ پہ وتی ھک ءَ پہ مردی شھید بوت ءُ نمیران بوت سر ئِے جھل نکت ءُ دست ئِے چست نکرت اَنت بلے میر مُھیم ھان راج دپتراں یک گدارے ءِ نام ءَ ایر بوتگ مرچی میر مُھیم ھان ئی چُک ءُ نماسگ چہ شرم ءَ نام گیپت نہ کن اَنت کہ ما میر مُھیم ھان ئی چُک ءُ نماسگیں پرچاکہ مُھیم ھان پہ گداری مُرتگ ءُ رُزواہ بوت ، کجام مردم یک دلّار ءُ گدارے وتی کنت بھ نکنت توری آئی ءِ چُک بہ بیت بھ نام نہ گیپت، چماں چست کرت نکنت اگاں بگش اِیت من پلاں دلّار ءِ سیاداں وارساں یا براتاں ، انگت ماھلہ اِنت وھد ھست وت ءَ بہ رکین اِت چہ اے پنجابی ءِ چاپلوسی ءَ ۔ زندگ اِت شما وت ءَ بہ رکین اِت کہ پد ءَ راجدپتر ءِ تہ ءَ رُزواہ سیاہ روہ مہ بہ ئے ۔۔بلوچ بہ بہ ئے ، پہ چار کلدار ءَ بھا مہ بہ اِت ، چم جھلی مہ سگ اِت توری ھرچی بکنت پنجابی ، وتی گیرت ءَ انچو دوست دار اِت دومیگ ءَ انچو دوست بدار ، وتی مات گھارا انچو دوست اَنت گڑا دومی مات گھاراں پہ بدّی مکن ، کسے بے گناھیں چُک ءَ مپت ء ناھک ءَ بیگواہ مہ کنائین ، مہ کُش ، کس ترا بھ زرّ نہ دنت ءُ تئی نام ءَ نہ گِیپت ، بلوچ ءِ چادر ءُ چاردیوالی ھیال ءَ بدار کس تئی چادر ءُ چاردیوالی ءَ نہ پروش اِیت ۔ اے وَ ھاوند ءِ گُشگ اِنت کہ ھرچی انسان ھراب کاری کنت اللہ تعالی پد ءَ ھما رنگ ءَ آئی ءِ سر ءَ کار اِیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت- 

بلوچستان ءِ دمگ تربت ءَ کیچ کور ءَ چہ دزکپتگیں دوئیں لاشاں چہ یکے ءِ پجّار زورانسری آوار جنی ءِ نشانگ بیتگیں مردمانی پجّار عمران ء تاج محمد جھمنند پیدراک نام ءَ چہ بیتگ-

کُشگ بیتگین ءِ 25 جون 2025 ءَ بیگواہ کنگ بیتگ، ءُ آئی ءِ یل کنگ ءِ ھاتر ءَ تربت ءَ نودربر ءَ زھرشانی ھم نکش کنگ بیتگ-

واکدار ءِ رِد ءَ لاش کسگ ءِ پجّار کارڈ دزکپتگ، چریشی ءِ کمک ءَ چہ پجّار کنگ بیتگ-

دوئیں لاش جمعہ ءِ روچ ءَ کیچ کور ءِ دمگ ءَ دزکپتگ- پولیس ءَ اژدری کاروائی ءَ پد لاش پوسٹ مارٹم ءِ کنگ ھاتر ءَ ٹیچنگ ھستپال تربت ءَ برتگ-

پولیس ءِ واکدار ءِ رِد ءَ لاشانی سر ءَ تیرانی نشانگ بیتگ اَنت، وھدے کہ دومی لاش ءِ پجّار ءِ جُھد ءِ برجاہ ءَ اِنت-

زانگ بہ بیت اشی ءَ یکروچے ساری کیچ ءِ دمگ چہ بلیدہ ءَ ھم یک لاشے دزکپتگ ءُ آئی ءِ پجّار نصرم ء پیربخش نام ءَ چہ بیتگ-

بلوچستان ءِ دمگ ھزدار ءِ ھند اورناچ ءَ پاکستانی پوج ءِ آپریشن برجاہ ءَ اِنت اود ءَ لوگ لوگ ءَ پٹ ءُ پول کنگ بیگ ءَ اِنت اے میان ءَ مردمانی سر ءَ لَٹ ءُ کُٹانی نشانگ ءِ ھم ھال اِنت-

گوستگیں یک ھپتگے ءَ چہ اورناچ ءُ کش گوراں پاکستانی پوج آپریشن کنگ ءَ اِنت- اے آپریشن ءَ تیرگوار ءُ دگہ ھیلی کاپٹراں ھوار ڈرون بالگرد بھر زیرگ ءَ اَنت وھدے کہ بازیں ھندانی سر ءَ شیلنگ کنگ بیتگ-

ھالانی رِد ءَ مروچی سُھب پاکستانی پوج ءَ اورناچ ءِ آبادی انگیر ءَ کتگ لوگ ءُ لوگ ءَ پٹ ءُ پول بندات کتگ- لوگاں ساڑی زالبولاں ھوار دگہ مردم زوراکی ءِ نشانگ کتگ اَنت- دزگیریانی درگت ءَ تنی وھدے ھچ وڑیں ھال نیست-

زانگ بہ بیت کہ بلوچ لبریشن آرمی ( بی ایل اے ) آپریشن ھیروپ ءِ میان ءَ اورناچ ءِ دمگ ءَ چہ پاکستان آرمی ءِ ھپت کارندہ دزگیر کتگ اَت – گل ءَ بندیگایانی مٹ کنگ ءِ ھاتر ءَ ھپتگے وھد داتگ اَت-

اوگانستان ءِ واکداراں برانز داتگ کہ اوگانستان ءَ پاکستان ءِ بنجاھی شھر اسلام آباد ءَ ھوار بازیں شھراں بالی اُرش کتگ بلے پاکستان ءِ گْوشگ اِنت کہ ملک ءِ سئے شھراں گوں کسانیں ڈروناں اُرش کنگ ءِ کوشست بے سوب بوتگ اَنت۔

اوگانستان ءِ وزارت دفاع ءِ نیمگ ءَ آدینگ ءِ روچ ءَ ایکس ءِ سر ءَ شنگ بوتگیں پیام ءَ گْوشتگ کہ ‘اسلام آباد، نوشیرا ءُ ایبٹ آباد ءِ فوجی کیمپ بالی اُرشانی تہ ءَ نشانگ جوڑ کنگ بوتگ اَنت۔

پوسٹ ءَ گوشگ بیتگ کہ ‘اے اُرش سوبمند بوتگ اَنت۔’

طالبان ھکومت ءِ وزارت دفاع ءِ گشگ انت کہ اے اُرش پاکستان ءِ وتی سیمسراں بالی اُرشانی پسو ءَ کنگ بوتگ انت۔

اے درشانانی پد ءَ پاکستان ءِ وزیر ءِ اھوالکاری عطا تاوڑ ءَ ایکس ءِ سر ءَ وتی پیام ءِ تہ ءَ گْوشتگ کہ ’’فتنہ الخوارج ءِ ناشرکاراں ایبٹ آباد، سوابی ءُ نوشیرہ ءَ کسانیں ڈرون ءِ ارش ءِ کوشست کتگ۔‘‘

آئی ءَ گوشت کہ ‘اینٹی ڈرون سسٹم ءَ سرجمیں ڈرون ءِ سر ءَ تیرگواری کتگ۔ ھچ وڑیں جانی تاوان ءِ ھال رسگ ءَ نہ اِنت۔‘‘

آئی ءَ گیش نبشتگ کہ ’’اے وئیل یک رندے پد ءَ اوگان طالبان ھکومت ءُ پاکستان ءِ ناشرکاری ءِ نیام ءَ تچک ءَ سیادی ءَ پدر کن اَنت۔‘‘

نامداریں تندجاہ بی بی سی ءِ نمائندگ عزیز اللہ خان ءِ رد ءَ خیبر پختونخوا ءِ سوابی دمگ ءِ واکداراں کسانیں ڈرون ءِ کپگ ءِ ھال راست کتگ۔

واکدارانی رد ءَ ڈرون یک وانگجاھے ءِ نزیک ءَ کپتگ ءُ اے وئیل ءَ یک جنکے ٹپی بوتگ۔

سوابی ءِ پولیس افسر وقاص رفیق ءَ گشتگ کہ ڈرون اگاں چہ یک آبادی یے ءِ نزیک ءَ کپتگ بلے ایشی ءَ بازیں تاوان نہ داتگ۔ آئی ءَ گْوشتگ کہ زاھر ءَ اے اُرش ءِ نشانگ وانگجاہ نہ بوتگ۔

زانگ بہ بیت گوستگیں شپ ءَ اوگانستان تالبان ءَ پاکستان ءَ پسھی اُرشاں سیمسراں بازیں کچے ءَ اُرش کتگ ءُ چریشی ءَ اوگانستان تالبان ءِ رد ءَ بازین چیک پوسٹ دستیگ ءُ کارندہ کشگ بیتگ انت-

پد ءَ چریشی ءَ رند پاکستان ءَ برزی اُرشاں کابل ءُ کندھار ءَ ھوار دگہ جاھ نشانگ کتگ انت-