TBP Balochi

بلوچستان ءِ جتاجتائیں دمگاں چہ دہ مردم آوار جتگ ءُ ناشناسیں جاھے ءَ برگ ءِ ھال اِنت-

ھالانی رِد ءَ اے مردم چہ شال، کلات ءُ کیچ ءَ آوار جتگ ءُ بیگواہ کتگ اَنت-

بیگواہ کنگ بیتگیں مردمانی پجّار شعیب احمد ء محمد بخش قمبرانی جھمنند شال، صدام ء عبدالھد جھمنند کلات، زبیر ء خلیل احمد جھمنند کلات، جواد ء عبدالرشید جھمنند کلات، عبدالرحیم ء برکت علی جھمنند میناز بلیدہ، آصف ء چیئرمین اسلام جھمنند میناز بلیدہ، یاسر ء بلوچ جھمنند میناز بلیدہ، علی احمد ء الطاف جھمنند میناز بلیدہ، رحیم بخش ء کریم بخش جھمنند میناز بلیدہ ءُ سفر خان ء محمد علی جھمنند شال نام ءَ چہ بیتگ اَنت-

کھول ءِ گوشگ اِنت کہ اے مردم جتاجتائیں وھداں لوگانی یا کہ نزیکیں دمگاں چہ آوار جتگ اَنت ءُ پد ءَ آیانی درگت ءَ ھچ وڑیں ھال نیست-

بلوچستان ءَ زورانسری آوار جنی ءِ جیڑہ گوستگیں دو دھکاں چہ یک گچینیں انسانی ھکانی جیڑھے جوڑ بیتگ- راجدوستیں گلاں ءُ انسانی ھکانی کارکنان ءَ بھتام جتگ کہ پاکستانی پوج مردماں آوار جن اَنت دراجیں مدتے ءَ دیم ءَ آرگ نہ بنت- انسانی ھکانی گل بازیں رند ءَ بلوچستان ءَ زورانسری آوار جنی دلپدردی درشان اِنت ءُ پلگاریں پٹ ءُ پول لوٹ کتگ اِت-

پنجگور ءِ دمگ چہ شاپاتان ءَ دزکپتگیں لاش ءِ پجّار شش ماہ ءَ چہ بیگواھیں یحییٰ نور ء نور محمد جھمنند پروم (تار آفس) نام ءَ چہ بیتگ-

کھول ءِ رِد ءَ یحییٰ نور ناشناسیں سلاہ بندیں مردماں ایئرپورٹ دگ ءَ چہ آوار جتگ، چریشی ءَ پد آ بیگواہ بیتگ-

اِھوالکار ءِ رِد ءَ شاپاتان کش ءُ گور ءِ دمگ ءَ لاش ءِ دزکپگ ءِ ھال سر بیتگ دمگی اِنتزامیہ جاہ پہ جاھی سر بیتگ اَنت ءُ لاش دستیگ کتگ ءُ پہ کاروائی ءِ ھاتر ءَ نادُراھجاہ برتگ، اود ءَ آئی ءِ پجّار یحیٰی نور نام ءَ چہ بیتگ-

زانگ بہ بیت کہ یحیٰی نور کساس شش ماہ ءَ ساری پنجگور ایئرپورٹ دگ ءَ چہ ناشناسیں سلاہ بندیں مردماں گاڑی ءَ سوار کتگ برتگ- دمگی اِھوالکار ءِ گوشگ اِنت کہ آوار جنوکانی سیادی سرکاری پلامرزی سلاہ بندیں ٹولی ڈیتھ اسکواڈ ءَ چہ بیتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءَ گوشتگ گل ءِ مزن کمانڈ کونسل ءِ پیسلہ ءِ رد ءَ “ آپریشن ھیروپ ٹو ” ءِ وھد ءَ دزگریں زورگریں پاکستانی پوج ءِ ھپت کارندہ مرگ ءِ سزا ءِ سر ءَ گامگیج چِست کتگ ءُ کشتگ انت- اے کارندھاں جہ آیانی سیادی دشمنیں پوج ءِ ریگولر یونٹس ءَ بیتگ- بلوچ راجی آمیدگس ءَ جنگی جرم، بلوچ نسل کُشی، زورانسری بیگواھیانی سروکی ءُ شھری آبادی ءِ سر ءَ زُلم ءُ زوراکیانی بے کساسیں سبوتانی بوگ ءَ مرگ ءِ سزا ءِ ھکم داتگ- گل ءَ میان اُستمانی جنگی رھبندانی ءُ گچینی انسانی واک ءِ پاسداری لنان ءَ چاردہ پروری ءَ اے بندیگانی مٹی ءَ بلوچ بیگواھیں مردمانی یل دیگ ءِ واستا یک ھپتگے ءِ مھلت داتگ چریشی واستا انسانی ھمدردی ءِ بیناد گیش چاردہ روچ گیش کتگ –

جارکش ءِ رد ءَ اے دراجکشیں مھلت ءِ وھد ءَ راستی سرجم ءَ آشکار بیتگ کہ زورگریں پاکستانی ریاست ءُ آئی ءِ لشکری سروکی وتی کارندھانی جان رکینگ ءَ ھچبر سنجیدگ نہ بیتگ- دشمن ءَ بندیگانی مٹی ءِ درگت ءَ بنداتی رھوتی ءَ بس یک جنگی چالے ءِ رنگ ءَ کارمرد کنگ ءَ بس ھمے وھد ءَ دمگ ءَ پوج کشی ءُ بازیں کچے ءَ زوراکی ءِ وھد گپتگ – یک نیمگے ءَ ٹال مٹول ءِ گیش کنگ ءِ بھانگ کنان ءَ وھد زوالہ کتگ ءُ دومی ھمے ور ءَ ھمے دمگ ءَ گن شپ ھیلی کاپٹر، ڈرونرز ءُ مزنیں لشکری کمک ءِ رستری لشکری کشی بندات کتگ-

آئی ءَ گوشتگ بی ایل اے ءِ رد ءَ سینئر کمانڈ کونسل ءَ اے درچ ءَ سر بیتگ کہ دشمن، انسانی بنیادیاں داتگیں ریایت ءِ ناجائزیں پائدگ ءِ چِست کنگ ءَ گیش ھونریچیں ءُ بلوچ سرمچارانی انگیر کنگ ءَ کامرد کنگ ءَ ئے- گل ءَ شرپ ءُ سنچ ءَ میان اُستمانی رھندانی تک ءَ دشمن ءِ واتری ءَ ھر وڑ ءَ راہ داتگ بلے زورگریں پوج ءَ یکشل ءَ مکاری رویش ءُ میدان ءِ جنگ ءَ دوکہ دیگ سابت کتگ آ بس تاکت ءِ زبان ءَ سرپد بیت انت – بلوچ راجی آمیدگس ءَ گڈی پیسلہ ءِ رد ءَ اے ھپتیں جنگی بندیگاں مرگ ءِ سزا ءِ سر ءَ مروچی گامگیج زرتگ ءُ کشتگ انت- ایشانی مرگ ءِ زمہ واری تچک ءَ پاکستانی پوج ءِ ھائی کمانڈ ءِ سر ءَ کیت انت ٹ چریشی ءَ آ وتی سپاھیگانء زندگی ءَ ھچ شرپ نہ دنت ءُ وتی انا، جنگی زوراکی ءُ مکاری چالاں دیم ءَ برگ انت-

بلوچ لبریشن آرمی ءَ ھکل چینل ءَ آپریشن ھیروپ ءَ بھر زیروکیں سَے نمیرانیں ھمبلانی اکس ءُ اھوال شنگ کتگ انت-

ھکل ءَ اولی ءِ پجار امتیاز بلوچ پنام ءِ ازل ء صابر احمد جھمنند ماڑی پور کراچی ءِ نام ءَ کتگ – آئی جون 2022 ءَ بی ایل اے ءَ بھر زرتگ ءُ 2023 ءَ کوہ ءَ شتگ ءُ فروری 2024 ءَ مجید بریگیڈ ءَ ھوار بیتگ ءُ آئی ءَ بولان، کاھان،ناگاھو، دکی، شور پارود ءَ وتی کرد پیلو کتگ ءُ آپریشن ھیروپ ءَ نوشکی ءَ شھید بیتگ-

ھکل ءِ رد ءَ فدائی امتیاز بی ایل اے ءَ ھوار بوگ ءَ پد شھری پھنات ءَ پرکار بیتگ ءُ چریشی ءَ یک سالے ءَ پد آ کوہ ءَ شتگ- فدائی امتیاز آپریشن درہ بولان فیز ون ءُ آپریشن ھیروپ فیز ون ءَ ھم ھوار بوتگ-

آئی ءَ گوشتگ فدائی امتیاز بلوچ آجوئی جنگ ءَ یک ھنچیں بھادرے بیتگ کہ آئی ءِ سوچ، گام ءُ سلاہ ھرسئیں یکیں مول ءُ مراد ءِ واستا کارمرد کتگ انت- آ میدان ءَ دیمپان نا بلکیں پیسلہ داریں جد ءُ جھد سرپد بیتگ – ھرکجا سر ءُ پر گشینگ بیتگ انت ھمود ءَ ھمک وھد ءَ شیواری ءَ بیتگ- دشمن ءِ مُچانکی ءَ پروشگ، سر ءُ پراں چارگ ءُ وتی سنگراں مھکم کنگ آئی ءِ جنگی رپک بیتگ- آ ھمک چار ءُ تپاس ءَ پد رھوتی ءَ مھکم کنگ ءُ پیشگامی ءَ دیم ءُ جنزوکے بیتگ –

فدائی امتیاز بلوچ ءِ سیادی کراچی ءِ ھند ماڑی پور ءَ بیتگ – آئی ءَ راجی زرمبشت ءِ سپر آشوبء سیاسی پرکاریاں کتگٹ آئی ءَ آشوبی زانشت وتی اندر ءَ جاگہ دیان ءَ ماڑی کراچی ءَ وتی سپر ءِ بندات کتگ ءُ پد ءَ بولان ءِ پتر ءَ سر بیتگ- شھید امتیاز کراچی ءِ وڑین شھراں وشھالیں زند ءِ گوازینگ ءَ ابید راجی گلامی ءِ ھلاپ ءَ پیسلہ کنگ سکا ترندیں کارے بیتگ چریشی ءِ بنیاد ءَ آ بی ایل اے ءَ بھر زیر ایت ءُ راجی آجوئی ءِ واستا وتی کرد ءَ پیلو کنت ءُ ندر بیت انت- آئی ءِ دو برات زورانسری بیگواہ کتگ انت کہ آیانی توک ءَ یکے انگت ءَ بیگواہ انت – بلے شھید ءِ ازم ءُ ارادگانی تہ ءَ ھچ وڑیں لرزش نہ اتگ پرچاکہ آ پکری تک ءَ سکا مھکم بیتگ ءُ وتی مکسد ءَ داں گڈی ساہ ءَ جنگ ءَ بوتگ-

فدائی امتیاز بلوچ آپریشن ھیروپ ٹو ءَ نوشکی ءِ پھنات ءَ جاڑیگ بوتگ ءُ اود ءَ نوشکی ءَ امتیاز ءُ آئی ءِ ھمراھاں فرنٹ لائن ءَ بوگ ءُ جنگ کنان ءَ دشمن ءِ مھکمیں سنگرانی توک ءَ روگ ءُ دشمن ءِ گرور ھاکاں ھوارینتگ- فدائی امتیاز بلوچ دراج کشیں جنگ ءَ پد وتی جان ءَ ندر کنت ءُ آجوئی جنگ ءَ راجدپتر ءَ وتی نام ءَ نمیران کنت-

دومی ءِ پجار فدائی نثار بلوچ پنام ءِ زدگ ء ابن نور بانو جھمنند جمالدینی نوشکی ءِ نام ءَ زانگ بیتگ ، آئی ءَ 2020 بی ایل اے ءَ بھر زرتگ ءُ دسمبر 2020 مجید بریگیڈ ءَ بھر زرتگ ءُ بولان ءُ نوشکی ءِ پھنات ءَ بیتگ- آپریشن کمانڈ بیتگ ءُ نوشکی ایف سی ھیڈکوارٹر آپریشن ھیروپ فیز ٹو ءَ ھوار بیتگ-

آئی ءَ گوشتگ فدائی نثار بلوچ یک تجربگ کاریں سرمچارے بیتگ چریشی ءَ بولان ءُ نوشکی ءِ پھناتاں وتی کرد ءَ پیلو کنگ ءَ بیتگ – 2020 ءَ بی ایل اے ءَ ھوار بوتگ ءُ چریشی ءَ پد آئی ءَ مجید بریگیڈ ءَ وتی نام پیش کتگ –

آئی ءَ گوشتگ ایشی ءِ ھمراھی ءَ آ یک آشوبی شائرے بیتگ کہ آئی ءِ لبز بارود ءِ رنگ ءَ دل ءُ لاپاں شتگ انت آئی ءِ شائری ایوک ءَ جزبات نہ بیتگ بلکیں گھگیری ءِ زانشت ءِ جار بیتگ- کہ تُستگیں گاماں ھمت ءُ ھوسلگے داتگ ءُ سنگر ءَ ھم نَد زندگ داشتگ ءُ میدان ءِ جنگ ءَ ھم گھگیری برز کتگ – چوشکہ آئی ءَ توپک ءُ لبز ھم ھردوک سپاھی کتگ ءُ برانزیتگ انت – چریشی ءَ منیتگ کہ آشوبی جد ءُ جھد ءَ پکر ءُ جنگ یک دومی ءِ تاکت انت-

آئی ءَ گوشتگ فدائی نثار بلوچ آپریشن درہ بولان فیز ون فیز ٹو ءُ آپریشب ھیروپ فیز ون ءَ ھم ھوار بوتگ – آپریشن ھیروپ فیز ٹو ءَ آ نوشکی ءَ ایف سی ءِ ھیڈکوارٹرز ءِ مھاز ءِ آپریشن کمانڈر بیتگ – اود ءَ آئی ءِ سروکی ءَ زانشت ءَ پوج سکا نپسیاتی ءِ آماچ کتگ چریشی ءَ دشمن ءِ پوج جنگ ءَ پیش وتی پروشے من اتگ -ھمے درچ ءَ سرمچاراں نوشکی ءَ شش روچ ءَ سرمچاراں سرجمیں شھر کنٹرول کتگ آپریشن ھیروپ وتی دراھیں لشکری ءُ سیاسی مول ءُ مرادانی گرگ ءَ پد مھکمیں رنگے ءَ شھر ءَ دراتکگ انت-

سیمی ءِ پجار لیاقت زھری پنام ءِ وسیم بلوچ ء عبدالرحمان زھری جھمنند کند کاشمی زھری ھزدار ءِ نام ءَ کنگ بیتگ- آئی ءَ جون 2024 ءَ بی ایل اے ءَ بھر زرتگ ءُ ستمبر 2024 ءَ مجید بریگیڈ ءِ بھر بوتگ ءُ ناگاھو ءَ گشتی کمانڈ بیتگ-

ھکل ءِ رد ءَ لیاقت زھری آجوئی ءِ جنگ ءَ یک ھنچین سِتکداریں سپاھی ءِ بیتگ آئی ءَ جنگ ءِ ترندی وتی ھیلکاری ءِ بھر جوڑ کتگ انت- آئی ءِ واستا جد ءُ جھد یک مھکم ءُ یکشلیں درورے بیتگ آئی ءَ سرجمیں سنچ ءَ گوں پیلو کتگ – آئی ءِ جنگی ھیلداری گیشتر گشادی ءَ ابید چارگ ءُ تپاسکاری ءَ الکاپی ءَ بیتگ – آ دراجکشیں اوشتانکی بے تواریں سر ءُ پُر ءَ ناگیگیں راھاں پیشگامی کنگ ءِ سنچے داشتگ- آئی ءِ کرد ءَ نا ایوک ءَ آ ایوک ءَ مھکم کتگ بلکین آئی ءِ ھمراھی ءَ جنگول ھم مھکم کتگ انت آ داں گڈی ءَ ھمے گپ ءِ سر ءَ اوشتوک بوتگ کہ آجوئی ءِ راہ ءَ یکشل ءَ اوشتگ وت دُرستی انت ءُ ھمے ستک ءِ سر ءَ آئی ءَ جد ءُ جھد داں گڈی منزل ءَ سر کتگ-

فدائی لیاقت زھری 9 جون 2021 ءَ چہ ھزدار ءَ براھوئی زبان ءِ ورنائیں شائر تابش وسیم ءِ ھمراھی ءَ بیگواہ کنگ بیتگ ءُ داں دو سالاں آ دشمن ءِ تھاریں زنداناں بوگ ءَ پد یل بیتگ- لھتے وھد ءَ پد آئی ءَ دشمن ءِ دست ءَ بے تواری ءَ مِرگ ءَ ابید سلاہ بندیں جھد ءِ راہ گپتگ ءُ بی ایل اے ءَ ھوار بوتگ – زانگ بیت شھید لیاقت ءِ ناکوزتک شھید تابش وسیم 17 اکتوبر 2022 ءَ زورگریں پاکستانی پوج ءِ وتگڑیں کاؤنٹر ٹیررازم ڈیپارٹمنٹ ( سی ٹی ڈی) ءَ ھاران ءَ یک دروگیں میڑے ءِ نام ءَ کشتگ ءُ لاش چگل داتگ-

شھید لیاقت زھری ناگاھو ءِ میدان ءَ گشتی کمانڈ بیتگ ءُ آپریشن ھیروپ ٹو ءَ آ نوشکی ءِ میدان ءَ جاڑیگ بیتگ – اود ءَ آ فرنٹ لائن ءَ جنگ کنان ءَ دشمن ءِ زمین تنگ کتگ ءُ آپریشن ھیروپ ٹو ءِ سوبمندی ءِ واستا مزنیں کرد پیلو کرتگ – شھید لیاقت زھری ءَ نوشکی ءِ میدان ءَ وتی ندر کتگ ءُ ڈیھ ءِ واستا کربان بوتگ –

بی وائی سی ءِ رھشون ءِ کھول ءِ مردماں وتی بندیگ کنگ، کانونی لوٹ ءُ جان سلامتی ءِ بابت ءَ پریس کانفرنس کنگ لوٹ اِتگ۔

ھالانی رِد ءَ شال ءِ پولیس ءُ انتزامیہ ءَ شال پریس کلب ءِ گِر ءُ دار کتگ ءُ ماہ رنگ بلوچ ءِ کھول ءِ مردم ءُ دگہ دزگیریں رھشوناں پریس کانفرنس کنگ ءَ چہ مکن کتگ انت۔

نزیکیں مردمانی گشگ ءِ رد ءَ پولیس ءَ پریس کلب ءِ دپ ءَ پریس کانفرنس ءِ برجم دارگ ءِ کوشست ءَ ھم اڑانک جوڑ کتگ۔

یک سالے بیت کہ بی وائی سی ءِ رھشون بندیگ بوتگ۔ شال پریس کلب ءِ دپ ءَ اھوالکاراں گوں گپ ءُ تران کنان ءَ مھرنگ بلوچ ءِ گھار ءُ لوگ ءِ دگہ مردماں گْوشتگ کہ مرچی ما بی وائی سی ءِ سروکانی کیس ءُ ڈاکٹر مھرنگ بلوچ ءِ جان سلامتی ءِ بابت ءَ پریس کانفرنس کنگ لوٹ اِتگ بلے مارا چہ سھب ءَ پریس کلب ءِ دیم ءَ اوشتارینگ بیتگ ءُ گوشگ بیتگ کہ چہ ڈی سی ءَ این او سی ءَ بہ گر ات ءُ بیار ات-

کراچی ءُ بلوچستان ءَ زالبولے ءُ دو براتاں ھوار چار مردم زورانسری بیگواہ کنگ بیتگ اَنت-

گیشیں ھالانی رِد ءَ کراچی ءِ دمگ چہ کلری لیاری، علی محمد میتگ ءَ گوستگیں روچ ءَ پاکستانی پوج نیمگ ءَ چہ بازیں لوگانی سر ءَ بیڑبرتگ- کاروائی ءِ میان ءَ دو نودربر عائشہ ء لال جان ءُ داؤد ء ابراھیم آوار جتگ ءُ ناشناسیں جاھے ءَ برتگ اَنت-

دوئیں نودربرانی اُمر 18 ءَ چہ 20 سال ءِ میان ءَ گوشگ بیگ ءَ اِنت-

تنی وھدے آیانی درگت ءَ ھچ وڑیں سرپدی دز نہ کپتگ- چریشی ءِ چہ تُرس آماچ اَنت- دمگ ءُ کھول مردم ھمگرنچیں واکدار ءَ چہ لوٹ کتگ کہ دوئیں نودربر زوت یل کنگ ءُ پھاز دلجمی بدے اِت-

ھمے وڑ تربت ءِ دمگ چہ گلشن آباد ءَ پاکستانی پوج ءِ دستاں دو برات آوار جنگ ءَ پد بیگواہ کنگ بیتگ اَنت-

کھول ءِ رِد ءَ 28 فروری 2026 سَھور ءِ وھد ءَ سُھب کساس چار سی دمان ءِ سر ءَ پاکستانی پوج ءَ گلشن آباد ءَ کاروائی کنان ءَ ذکریا ء محمد عوض ءُ ریحان ء حاجی محمد عوض آوار جتگ اَنت، چریشی ءَ پد آیانی درگت ءَ ھچ وڑیں سرپدی دز نہ کپتگ-

کھول ءِ گوشگ اِنت کہ دوئیں برات آوار جنگ ءَ پد ناشناسیں جاھے ءَ برتگ اَنت ءُ تنی وھدے آیانی درگت ءَ ھچ وڑیں ھال نیست-

سانمندیں کھول ءُ انسانی ھکانی گلاں ءُ سیاسی پارٹیاں چہ دزبندی کتگ کہ دوئیں براتانی یل کنائینگ ھاتر ءَ توار چست بہ کن اِت ءُ آیاں پہ سلامتی یل کنگ ءِ ھاتر ءَ کرد پیلو بہ کن اِت-

بھرین ءِ بنجاھی شھر منامہ، دبئی، ابوظھبی ءُ دوھ ءَ دوشمبے ءِ سھب ءَ ھم بمب تراکانی توار اشکنگ بیتگ انت-

اے ایف پی ءِ رد ءَ عراق ءِ اربیل بالی پٹ ءِ نزیک ءَ کم چہ کم دو ڈرون اُرش ناکام کنگ بوتگ اَنت۔

وھدے کہ سی این این ءِ رد ءَ دبئی ءَ دو رند ءَ تراک ءُ جنگی بالی گرابانی بال کنگ ءِ توار اشکنگ بوتگ انت۔ قطر ءِ بنجاھی شھر دوھہ ءَ ھم گندگ ءَ میزائل اُرش ناکام کنگ بوتگ اَنت۔

کویت ءَ امریکی سفارتخانہ ءِ نزیک ءَ دوت چست بوھگ ءَ گندگ بیتگ انت اے ایف پی ءُ رائٹرز ءِ رد ءَ کویت ءَ امریکی سفارتخانہ ءِ نزیک ءَ دوت ءِ چست بوھگ گندگ بوتگ۔

رائٹرز ءِ رد ءَ جاہ ءَ آس ءِ برنز ءُ ایمبولینس گندگ بوتگ اَنت۔

امریکی سفارت خانہ ءَ وتی ویب سائٹ ءِ سر ءَ مردماں کڈنی داتگ کہ آ “سفارتخانہ ءَ مہ بیا اِت”۔

”وتی لوگانی جھل ترین جاھاں پناہ بہ گِر ءُ چہ دریگاں دور بہ بئے“۔ در مہ رو۔’

امریکہ ءَ کویت ءَ وتی شھریاں پنت ءُ شون کتگ کہ آ پھریز بہ بنت۔ ‘مھریں جاھاں، اُرش ءِ وھد ءَ سیکورٹی منسوبھانی سر ءَ چار ءُ تپاسی کن ءُ آیوکیں وھد ءَ گیشیں اُرشانی ھاتر ءَ شیوار بہ بئے۔’

دومی نیمگ ءَ کویت ءَ امریکہ ءِ یک جھازے ھم کپگ ءَ گندگ بیت انت بلے لس اھوالاں گوشگ بیتگ اے جنگی جھاز امریکہ ئیگ انت بلے داں انگت ءَ سرکاری تکاں ایشی ءِ پدراھی نہ بیتگ-

اے ھم زانگ نہ بیتگ اے جنگی جھاز ایران ءِ میزائلانی نشانگ ءَ کپتگ یا وتی ھرابی ءِ سبب ءَ گپ کپتگ-

خلیج ءِ ڈیھانی تہ یَ ایران ءِ اُرشاں پد بازیں بالی پٹ بند کنگ بوتگ انت، بندرگاہ ءِ کار ءُ مالیاتی بازار سک باز تاوان بوتگ انت۔ اے جھانی ءوبا ءَ پد کاروباری پرکاری ءِ سر ءَ مزنیں پروشی اِنت۔

یک زانتکارے ءِ گشگ اِنت کہ ایران ءَ ھرچ مڈیانی ھلاس کنگ ءِ پالیسی زرتگ۔ آئی ءَ خلیج ءِ بالی پٹانی سر ءَ اُرش کتگ ءُ گمان اِنت کہ آ اُرش ءَ برجاہ دار اِیت۔ ”

دبئی، ابوظھبی ءُ دوھہ ءِ وڑیں شھراں دھکانی چہ جھد ءُ کوشست ءَ پد تیل ءُ گیس ءِ سر ءَ وتی بوج کم کتگ۔ آہاں برزی ، سیل ءُ سواد، مالیات ءُ رسد ءِ تک ءَ وتی مڈی ءَ را گیش کتگ، ایشی ءِ ھاتر ءَ درملکی باسک ءُ سرمایہ کاری ءَ موہ پیداک کتگ۔

امارات ءِ ھکومت ءِ رد ءَ گوستگیں سال ءَ دبئی ءَ 20ملین سیل ءُ سواد کنوکاں تر ءُ تاب کتگ۔

ایران ءَ دبئی مرینا ءُ پام جمیرہ ءِ وڑیں عیش ءُ آرام ءِ جھمنندی دمگ نشانگ جوڑ کتگ انت، فیئرمونٹ دی پام سوتکگ ءُ برج العرب ءَ ھم تاوان رس اتگ۔ اے گپ ءَ چہ اے گپ ءِ پدر بوھگ ءَ اِنت کہ اماراتی رئیل اسٹیٹ ءُ ھوٹلانی تَک ھم ٹارگٹانی تہ ءَ ھوار اِنت۔

سعودی عرب ءُ قطر ءَ را تیل ءِ بھا ءِ تہ ءَ گیشی ءَ چہ ازاروکی نپ رس ایت۔ بلے ھاسیں رنگ ءَ امارات ءَ تجارت، آیوک ءُ سیل ءُ سواد ءِ سر ءَ سکیں زور ودگ اِنت۔

برزی رھگوزی ءِ بند کنگ ایشیا، یورپ ءُ افریقہ ءِ واستا تجارتی بنجل ءِ بستار ءَ خلیج ءِ کرد ءَ را ھترہ ءِ آماچ کنگ ءَ اِنت۔ وھدے کہ رمضان ءِ وھد ءَ دودمانی دبوج ءُ سھری ءِ بندوبست ھم بند کنگ بوتگ۔

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں 23 فروری 2026 ءِ روچ ءَ پنجگور ءِ دمگ دستّک ءَ بُنجاھی دگ سر ءَ ناکہ بندی جتگ- اے میان ءَ روچ ءِ کساس 1:30 ءِ نزیک ءَ بگیریں نیمگے ءَ چہ یک سرف ءُ دو گاڑی ناکہ بندی ھند سر ءَ اَتکگ اَنت وھدے کہ آیانی سیمی گاڑی سک گستائی ءَ بیتگ- گاڑیاں سوار سرجمیں مردم سلاہ بند بیتگ اَنت- سنگر گپتگیں سرمچاراں آ دارگ ءِ اشارہ کتگ ءُ گوں تُرندیں توار ءَ گوشتگ کہ ما سرمچاراں ایں چہ آیاں چہ آیانی پجّار ءِ درگت ءَ جُست کتگ- اے سلاہ بندیں مردماں وتی پجّار کنگ جاہ ءَ گھگیری راہ گچین کنان ءَ سرمچارانی سر ءَ سر ءُ دیم تیرگواری کتگ- ھالانکہ سرمچاراں پیسر ءَ سنگر بند بیتگ اَنت ھمے ھاتر ءَ رکّ اِتگ اَنت-

جارکش ءَ گْوشتگ کہ سر ءُ دیم تیرگواری ءِ پسّہ ءَ سرمچاراں زوت وتی پھاز ءَ جوانیں وڑے ءَ کاروائی کنان ءَ دوئیں گاڑی نشانگ کتگ چریشی ءِ آسر ءَ دوئیں گاڑیاں سوار سرجمیں ششیں سلاہ بندیں مردم جاہ پہ جاھی مرتگ، وھدے کہ سیمی گاڑی کمو گستائی ءَ ساڑی بیتگ اَنت، کوہ گپتگ تیرگواری کنان ءَ تچگ ءَ سوبمند بیتگ اَنت-

جارکش ءَ گوشتگ سرمچاراں اے سوبمندی پھازی کاروائی ءَ پد وئیلجاہ ءَ چہ مرتگیں مردمانی سرجمیں سلاہ دستیگ کتگ اَنت آیانی تہ ءَ یک روسی LMG, پنچ کلاشنکوف ءَ یک امریکی تُپنگے ھوار اِنت- اے سلاہ بندیں مردمانی یک گاڑی یے میڑ ءِ میان ءَ گولہ ءِ لگگ ءَ چہ سرجمی ءَ سُتکگ ءُ دومی گاڑی سرمچاراں مانداشتگ- اشی ءَ پد بی ایل ایف ءَ اے وئیل ءَ مرتگیں سلاہ بندیں مردمانی پجّار ءِ درگت ءَ پٹ ءُ پول کتگ گڑا رسانکدر ءَ جیش العدل نام ءَ چہ پُرکاریں ٹولی ءِ یک درشانے دیستگ کہ آئی ءَ دستک وئیل ءَ مرتگیں مردم وتی باسک پدر کنان ءَ بلوچستان لبریشن فرنٹ ءِ ھلاپ ءَ زھر درشان اِتگ ءُ وتگڑیں بھتام جتگ-

جارکش ءَ گوشتگ کہ جیش العدل نامیں پر کہ پرستیں سلاہ بندیں ٹولی پنجگور، پنچی ءَ چہ چیدگہ سیسمر ءَ تاں دراجیں سیمسری دمگ بگدر، سوراپ، سوراپ تنگ ءِ راہ، دستک، جوانگز، نکر ءُ گور کادان ءَ زورگریں پاکستانی ریاست چریک جوڑ بیتگ اَنت ءُ پاکستانی پوج ءِ چیردستی ءَ چہ سرجمیں سیمسری راھانی سر ءَ اے ٹولی وتی دستیگ برجاہ دارگ ءِ جُھد ءَ اَنت-

جارکش ءَ گوشتگ یات بہ بہ اِت کہ جیش العدل ءَ چہ ھمگرنچیں سلاہ بندیں مردماں ناں تھنا منشیات ءِ برگ ءِ راھانی پھازی ءَ کن اَنت بلکیں بلوچ چُکچینی ءَ ھوار پاکستان ءِ ملٹری انٹیلجنس(MI ) ءِ تچکی ءَ چیردستی ءَ چیدگی سیمسر ءِ سر ءَ رائج پیکیج سسٹم ءِ گرگ ءُ دیگ ءِ ھمے مردم اَنت کہ ھمکروچی ھساب ءَ زر گر اَنت 120 گاڑیانی کاروان ءَ سیمسر ءَ گوازینگ ءِ کمکاری ءَ کن اَنت-

دیمتر ءَ بی ایل ایف ءَ پنجگور، دستک ءَ سلاہ بندیں مردمانی گوما میڑ ءَ شش سلاہ بندیں مردمانی کوش ءُ آیانی سلاہ دستیگ کنگ ءِ زمہ واری منّ اِتگ گْوشتگ کہ پر کہ پرستیں سلاہ بندیں گل جیش العدل ءَ کڈن کن ایں کہ آ رودرتکی زورگپتگیں بلوچستان ءَ بلوچانی کُشکار زورگریں پاکستانی پوج ءُ ایم آئی ءِ گوما وتی گند ءُ نند ءُ بلوچ راجی زرمبشت آجوئی، ھاسکار بی ایل ایف ءِ بگیریں پُرکاریاں یل بکنت- ما بلوچ راج ءَ چہ ھم دزبندی کن ایں کہ آ سرمچارانی ناکہ بندی ءِ میان ءَ آیانی گوما بے تُرس ءَ کمک بہ کن اَنت دانکہ بدگمانی ءُ شک ءِ بُنیاد ءَ کسے ءَ جانی تاوان مہ بیت-

بلوچ لبریشن آرمی ءِ ھکل چینل ءَ آپریشن ھیروپ ءَ ھواریں دو باسکانی اکس ءُ اھوال شنگ کتگ انت-

بنداتی ءِ پجار اسفند قمبرانی پنام ءِ روکین ء منور علی جھمنند شال ءِ نام ءُ کتگ ءُ آ کلات ءَ گشتی کمانڈر بیتگ ءُ فتح اسکواڈ بنزہ ءِ باسک بیتگ ءُ کلات ءَ نمیران بیتگ ءُ آئی ءَ نومبر سال دوھزار ءُ بیست ءُ چار ءَ بی ایل اے ءَ ھوار بیتگ-

آئی ءَ گوشتگ شھید اسفند قمبرانی ءِ سیادی شال ءَ بیتگ ءُ بی ایل اے ءَ ھوار بوگ ءَ کمو وھد ءَ پد زوت گل ءِ گشتی کماندر نامینتگ –

آئی ءَ گوشتگ گل ءِ گچینی ٹولی فتح اسکواڈ ءَ ھوار بیتگ – شھید اسفند تَشکیں تلاراں، دراج کشیں انگیر ءُ بارودی جاوراں تچکیں ھوسلگے داشتگے-

آئی ءَ گوشتگ بنجلجاہ ءَ ترندیں زور ءَ جنگ ءَ را المی سرپد بوگ ءُ بلے وتی پوزیشنے یل نہ داتگے ءُ آئی ءِ اجلداری ھمراھانی واستا بے دروریں جوڑ بیتگ- وھدیکہ ھرکس وتی اوپار ءَ سلاہ بہ کنت گڑا وتی اَزم ءِ راستیں تاکت کتگ-

شھید اسفند 6 دسمبر 2025 ءَ وھدیکہ آپریشن ھیروپ ءِ چن ءُ لانچ ءَ بیتگ- کلات ءِ کوھاں دشمن ءِ گون ءَ دیم پہ دیم بیتگ وتی فتح اسکواڈ ءِ ٹیم ءَ میدانِ جنگ ءَ فرنٹ ءَ جاڑیگ بیتگ-

دومی ءِ پجار عصمت اللہ پنام ءِ سلال ء حافظ عبدالستار مینگل جھمنند قادر آباد نوشکی ءِ نام ءَ کتگ ءُ بی ایل اے ءَ اپریل دوھزار ءُ بیست ءُ چار ءَ ھوار بیتگ کوھی دمگ ءَ اپریل دوھزار ءُ بیست ءُ پنچ ءَ شتگ- آ ایس ٹی او ایس ءِ بنزہ ءَ ھوار بوتگ ءُ نوشکی ءَ ھوار بیتگ-

آئی ءَ گوشتگ شھید عصمت اللہ آجوئی جنگ ءِ یک ھنچیں سپاھی ءِ بیتگ ءُ وتی وجود ءِ زرمبشت ءِ آجوئی ءِ زانشت ءَ یک پرکاریں تاکتے بیتگ ایشی ءَ گھگیری ازاروکی نہ بیتگ بلکیں بلکین رھبند ءُ زانشت ءِ گامگیج ءِ دیم ءَ جنزان بیتگ – آئی ءَ زانتگ کک آجوئی ءِ منزل ءَ ھما مردم گپت کن انت کہ راجمانانی کربانی ءِ سرشار ءَ مھکم کن انت –

شھید عصمت اللہ آپریشن ھیروپ ٹو ءِ وھد ءَ نوشکی ءِ میدان ءَ جاڑیگ بیتگ ءُ اود ءَ آئی ءَ اسپیشل ٹیکٹیکل آپریشن اسکواڈ ءِ ٹیم ءَ ھمراھی ءَ گچینی مھاز سمبال اتگ گمے مھاز ءَ جنگ کنان ءَ شھید بیتگ-