TBP Balochi

بلوچستان ءِ دمگ سوراب ءَ پشمبے ءِ سُھب ءَ سلاہ بندیں مردمانی نیمگ ءَ چہ بُنجاھی شھدگ سر ءَ ناکہ بندی کنگ ءَ پد پاکستانی پوج ءِ گوما میڑ بیتگ-

دمگی اِھوالکار ءِ رِد ءَ پجّار نہ بوتگیں سلاہ بندیں مردم سُھب بانگواہ ءَ سوراب ءَ بُنجاھی ھائی وے سر ءَ ناکہ بندی کتگ آؤکیں ءُ رؤکیں گاڑی داشتگ اَنت پٹ ءُ پول بندات کتگ اَنت-

اِھوالکار ءِ گوشگ اِنت کہ وئیل ءَ پد پاکستانی پوج ءِ نیمگ ءَ پیشگامی کنگ جُھد کتگ چریشی ءَ سلاہ بندیں مردم ءُ پوج ءِ میان ءَ میڑ بندات بیتگ-

چمّگدانی رِد ءَ اے میان ءَ تیرگواری ءُ گولہ گواری ءِ توار ھم اش کنگ بیتگ- دمگی اِھوالکار ءِ رِد ءَ پوج ءِ نیمگ ءَ چہ بازیں گولہ گواری ءِ نشانگ ءَ آیگ ءَ چہ کم چہ کم سے مردم ٹپی بیتگ اَنت-

واکدار ءِ نیمگ ءَ چہ وئیل ءِ درگت ءَ ھچ وڑیں درشان دیم ءَ نیتکگ-

نانکہ بندی وئیل زمہ واری دگہ گلے ءَ زرتگ-

بلوچ لبریشن آرمی ءِ ھکل چینل ءَ آپریشن ھیروپ ٹو ءَ ھواریں دگہ سَے نمیرانیں ھمراھانی اکس ءُ اھوال شنگ کتگ انت-

اولی ءِ پجار فدائی سعد مینگل پنام ءِ شیھک ء غوث بخش مینگل جھمنند گدر سوراب ءِ نام ءَ کتگ – آئی ءَ نومبر 2023 ءَ بی ایل اے ءَ بھر زرتگ ءُ جنوری 2025 ءَ مجید بریگیڈ ءِ بھر جوڑ بیتگ ءُ بولان ءِ میدان ءَ ھوار بیتگ ءُ آپریشن ھیروپ ٹو ءَ نوشکی ءَ آپریشن ءِ کمانڈ بیتگ ءُ پوجی ھیڈکوارٹر اڈہ کیمپ ءَ جنگ کنان ءَ نمیران بیتگ-

فدائی سعد بلوچ آپریشن ھیروپ ٹو ءَ نوشکی ءَ اڈہ کیمپ ھیڈکوارٹر ءَ آپریشن کمانڈر بیتگ ، آئی ءَ بستار ءِ آپریشن کمانڈر ءُ یک فدائی سرمچارے ءِ مھکمیں گامگیج، تچکیں رھبند ءُ بے تواری بلے گیش توانمند اوشتانکی ءِ درچ ءَ دشمن ءَ را ھنچیں چَپ دستے جتگ دشمن ءَ را سکا پروشی ءِ دیمپانی بیتگ ءُ دشمن ءَ داں شش روچاں یکشل ءَ جنگ ءِ دیمپانی کنگ کپتگ- فدائی سعد بلوچ آپریشن درہ بوکان فیز ٹو ءِ وھد ءَ ھم ھوار بوتگ کہ اود ءَ آئی ءَ وتی جنگی سنچانی درچ ءَ جوانیں پیسلہ داری ءِ کرد پیلو کتگ انت-

ھکل ءِ رد ءَ سعد بلوچ ءَ بی ایل اے ءِ ھوار بوگ ءَ پد بولان ءَ وتی بھر ھوارینتگ ءُ بولان ءَ آئی ءَ ٹریننگ ءِ استادی ءِ دروشم ءَ ھم وتی کرد پیش داشتگ – آ اُرش ءَ پیش زمینی جاورانی ھالانی سر ءَ ھورتچاری ءَ رند کاروائی ءَ دلجمی بیتگ- کمے ازباباں ٹوھیں کارانی سرجم کنگ ءُ سنگر ءَ دارگ ءُ رھبندانی رد ءَ روگ آئی ءِ شونداتی ءَ بیتگ-

آ آجوئی جنگ ءِ یک پرازم ءُ زانشتکاریں سپاھی ءِ بیتگ کہ آئی ءِ جد ءُ جھد ایوک ءَ پرز نہ بیتگ بلکیں وتی زندگی ءِ بھر جوڑ کتگ ھمے ستک ءُ باور ءِ سر ءَ آئی ءَ نوشکی ءِ پَٹ ءَ وتی ساہ ءُ سر ندر کتگ انت-

دومی ءِ پجار فدائی عنایت پنام ءِ توکلی ء امام دین سرمستانی جھمنند سموانی زھری ھزدار ءِ نام ءَ کتگ- آئی ءَ جنوری سال دوھزار ءُ بیست ءُ چار ءَ بی ایل اے ءَ بھر زرتگ ءَ جنگی میدان ءَ جنوری سال دوھزار ءُ بیست ءُ پنچ ءَ کوہ ءَ شتگ ءُ فروری دوھزار ءُ بیست ءُ پنچ ءَ مجید بریگیڈ ءِ بھر جوڑ بیتگ-

آئی ءِ رد ءَ فدائی عنایت بی ایل اے ءَ بھر زیرگ ءَ یک سالے ءَ داں شھر ءَ بیتگ ءُ بھادری ءُ جوانمردی ءَ آئی ءَ وتی زمہ واری پیلو کتگ انت ءُ گل ءِ پیسلہ ءِ رد ءَ دوھزار ءُ بیست ءُ پنچ ءِ بندات ءَ کوھی میدان ناگاھو ءَ شتگ ءُ ھزادر زھری ءِ ھاک ءَ سیادی داروکیں توکلی وتی اندر ءَ یک بے توار بلے مھکمین سِنچے ءِ واھند بیتگ – کوھی دمگ ءَ بھر زیرگ ءَ پد آئی ءَ بازیں مشکل دیستگ آں پد ءَ ھمے مشکلاں آئی ءَ وت ءَ مھکم کتگ-

مجید بریگیڈ ءَ بھر زیرگ ءَ پد آئی ءَ وتی زند کربانی ءُ گھگیری ءِ دیم ءَ ندر کتگ – ناگاھو ءِ میدان ءَ یک ھنچیں سرمچارے رستگ کہ ھمک ساھت ءَ جد ءُ جھد ءِ واستا ساجو بیتگ – آئی ءَ ستک بوتگ کہ آجوئی ءِ منزل کربانی ءُ مشکلین جاوراں اوشتگی ءَ دز کپ ایت توکلی ءِ اوپار ھمے راستی ءِ چیدگ انت – یک سرمچارے وتی ھاک ءِ آجوئی ءَ وتی زند ءَ گیش دوست دار ایت- گڑا آ راجدپتر ءَ یک زندگین گھگیری ءِ چیدگ جوڑ بیت انت-

فدائی عنایت توکلی آپریشن ھیروپ ٹو ءَ نوشکی ءَ جاڑیگ بیتگ ءُ اود ءَ آئی ءَ بھادری ءُ ھمت ءَ جنگی زانشتاں گوں بے دروریں کرد پدر کتگ انت ءُ دشمن ءَ را ھنچیں چَپ دست جتگ کہ آیانی توار بلوچستان ءِ کُنڈ کُنڈ ءَ سر بیتگ انت- فدائی عنایت ءَ نوشکی ءِ میدان ءَ آجوئی ءِ گچینی راہ ءَ وتی جان ندر کتگ-

سیمی ءِ پجار سھیل اھمد پنام ءِ سنگر ء رسول بخش سمالانی جھمنند کلی جمالدینی نوشکی ءِ نام ءَ کتگ – آئی ءَ فروری 2025 ءَ بی ایل اے ءَ بھر زرتگ ءُ مئی 2025 ءَ مجید بریگیڈ ءِ بھر جوڑ بیتگ-

فدائی سھیل اھمد ءِ سیادی نوشکی ءِ ھما گھگیریں زمین ءَ بیتگ کہ اود ءَ ھروھد ءَ گھگیری، یک داب ءَ اوشتگ ءُ کربانی ءِ چکاریں کرداں ردوم زرتگ-

آئی ءَ گوشتگ ھما ھاک ءَ چم پچ کنوکیں سھیل اھمد وھدیکہ آجوئی ءِ زرمبشت ءِ سلاہ بندیں جھد ءِ بھر جوڑ بیتگ گڑا یک پردے نہ بیتگ بلکیں یک گچین کتگیں نام سنگرے ئِے نام ءِ جد ءُ جھد ءَ مھکمیں سنگرے بیتگ –

فدائی سھیل اھمد پنام ءِ سنگر آپریشن ھیروپ ٹو ءَ نوشکی ءِ پٹ ءَ جاڑیگ بوتگ اود ءَ ھیروپی لشکر ءِ ھمراھی ءَ ھوار بوتگ دشمن ءِ ھلاپ ءَ ترند ءُ مھکمیں اُرشانی پیسلھے کتگ- اے دراج کشیں جنگ ءَ سنگر ءَ منانکی گام ءَ گڈی ساہ اوشتوگ بوتگ- آئی ءَ کربانی پلسپہ ءَ امل کنان ءَ وتی ساہ ءُ جان ندر کتگ انت جنگ ءِ آجوئی ءَ ھروھد ءَ راجدپتر ءَ وتی نام نمیران کتگ- سنگر ءِ شھیدی اے ستک ءِ درشانی انت کہ آجوئی ءِ راہ ءَ چِست بیتگیں ھمک گام راجدپتر ءِ تاکاں یک نوکیں داستانے نویسان انت-

امریکی لشکر ءَ گوں ایران ءَ برجاھیں جنگ ءَ بیران بوتگیں دگہ دو امریکی لشکر پجار کتگ انت۔

امریکہ ءِ فوج ءِ رد ءَ یک شمبے ءِ روچ ءَ کویت ءَ یک فوجی بنجلے ءِ سر ءَ ایران ءِ اُرش ءَ 6 سپاھیگ بیران بوتگ اَنت۔

امریکہ فوج ءِ رد ءَ ایران ءِ ڈرون ءِ اُرش ءَ بیران بوتگیں پنچمی سپاھیگ میجر جیفری اوبرائن بوتگ کہ آ 2012 ءَ امریکی لشکر ءَ ھوار بوتگ ءُ آ ڈیلاس کاؤنٹی آئیووا نندوک بوتگ بلے 2019 ءَ کویت ءَ دیم دیگ بوتگ۔

دومی نیمگ ءَ پنٹاگون ءَ انوگ ءَ جار جتگ کہ گمان اِنت کہ کویت ءِ سر ءَ اُرش ءَ بیران بوتگیں ششمی سپاھیگ امریکی ریاست کیلیفورنیا ءِ 54 سالی رابرٹ ایم مرزان اِنت۔ رابرت ایم مرزان ءِ اکس انگت ءَ شنگ نہ بوتگ۔

امریکہ ءَ سئے شمبے ءِ روچ ءَ ایران ءِ گون ءَ جنگ ءَ بنداتی روچاں بیران بوتگیں چار امریکی پوجیانی پجار کتگ۔ اے امریکی فوج ءِ ریزرو ءِ 103 ءِ برجاہ دارگ ءِ کمانڈ (ڈیس موئنز، آئیووا) ءِ مردم بیتگ انت۔

ایشانی تہ ءَ 35 سالی کیپٹن کوڈی اے خورک چہ فلوریڈا ءِ ونٹر ہیون ءَ سیادی بیتگ ئے سرجن کلاس اول نوح ایل ٹیتجنز ، 42 سالی ، چہ بیلیو ، نبراسکا ءَ ۔ سرجن کلاس فرسٹ نیکول ایم امور 39 سالی چہ وائٹ بیر لیک، مینیسوٹا ءَ؛ ءُ سارجنٹ ڈیکلان جی کوڈی 20 سال ءِ چہ ویسٹ ڈیس موئنز، آئیووا ءَ بوتگ۔

امریکہ ءِ وزیر دفاع پیٹ ھیگسیتھ ءَ دوشمبے ءِ روچ ءَ گشتگ کہ کویت ءَ امریکی بنکر ایران ءِ بدلی ءِ اُرش ءَ چہ برزی دفاع ءَ چہ رکگ ءَ پد نشانگ جوڑ کنگ بوتگ۔

امریکہ ءِ فوج ءِ رد ءَ ایران ءِ ھلاپ ءَ اسرائیل ءِ ھمراھی ءَ یکجائی آپریشن ءِ بندات ءَ پد تاں انوگ ءَ سرکاری رنگ ءَ اے شش مردم بیران بوتگ اَنت۔

بلوچستان ءِ جتا جتائیں جاھاں تیرگواری ءُ بیگواھیں مردمے ءِ لاشے دزکپتگ-

اھوالانی رد ءَ مشکے ءَ بیگواہ بیتگیں مردمے ءِ لاش دزکپتگ-

گیشیں اھوالانی رد ءَ بلوچستان ءِ دمگ آواران ءِ ھند مشکے ءَ زورانسری بیگواھی ءِ آماچیں یک مردمے ءِ لاش دزکپتگ-

دزکپتگیں لاش ءِ پجار فتح ء شھداد ءِ نام ءَ زانگ بیتگ ءُ مشکے ءِ دمگ میوار ءِ جھمنند بیتگ ءُ آ ڈرائیورے بیتگ-

اھوالانی رد ءَ فتح سیزدہ جنوری دوھزار ءُ بیست ءُ شش ءَ ھما وھد ءَ آوار جنگ بیتگ کہ آ وتی گاڑی ءِ گون ءَ مساپراں گوں روگ ءَ بیتگ – کھول ءِ گوشگ انت کہ چرا روچ ءَ پد بیگواہ بیتگ-

ھمے وڑ ءَ کیچ ءِ جتا جتائیں دمگاں تیرگواری وئیلاں سَے مردم بیران بیتگ انت-

تربت ءِ دمگ ڈنک ءَ ناشناسیں سلاہ بندیں مردماں تیرگواری کتگ ءُ سناء اللہ سبزل جھمنند گوگداب کشتگ-

ھمے وڑ شاپک ءَ یک دکانے ءَ تیرگواری ءَ ھاتم ء خدا بخش بیران بیتگ-

ھمے وڑ تمپ کونشکلات ءَ ناشناسیں سلاہ بندیں مردمانی تیرگواری ءَ مسلم ء اسماعیل تیرگواری کتگ ءُ کشتگ-

ھُزدار ءِ دمگ کرخ ءَ چارشمبے روچ ءَ سلاہ بندیں مردمانی مزنیں کچے ءَ سرکاری جاہ دستیگ کتگ ءُ شھر ءِ گچینیں بھر دستیگ کتگ اَنت، وھدے کہ پاکستانی پوج ءِ گوما میڑ ءِ ھم ھال اِنت-

چمّگدانی رِد ءَ سلاہ بندیں مردماں کرخ پولیس تھانہ، نادرا کارگس ءُ دگہ سرکاری ماڑیانی سر ءَ بیڑبرتگ آ دستیگ کتگ اَنت- شھر ءِ پُترگی ءُ دراھگی راھانی سر ءَ ناکہ بندی کتگ-

اِھوالکار ءِ گوشگ اِنت کہ کرخ کراس ءُ مولہ کراس ءَ سلاہ بنداں چیک پوائنٹس جوڑ کتگ دگ بند کتگ- مولہ کراس سر ءَ برجاہ پولیس چیک پوسٹ سر ءَ دستیگ کنگ ءَ پد ماڈی مانداشتگ، وھدے کہ اود ءَ ساڑی پولیس کارمند دزگیر کتگ اَنت-

اشی ءَ پد دمگ ءَ پیشگامی کنوکیں پاکستانی پوج ءِ کارمندانی سر ءَ ھم اُرش ءِ ھال اِنت- سکیورٹی رِد ءَ دوئیں نیمگاں چہ تیرگواری کنگ بیتگ بلے تنی وھدے جانی تاوان ءُ دزگیری ھال دیم ءَ نیتکگ-

اُرش ءِ زمہ واری انگت ھچ گل ءَ نہ زرتگ-

بلوچ لبریشن آرمی ءَ وتی ھکل چینل ءَ آپریشن ھیروپ ٹو ءَ بھر زیروکیں دگہ دو نمیرانیں سرانی اکس ءُ اھوال شنگ کتگ انت-

اولی ءِ پجار عدنان فقیر پنام ءِ تلار ء فقیر محمد جھمنند الندور بلیدہ ءِ نام ءَ کتگ، آئی ءِ وانشت بی ایس انگلش لٹریچر کتگ ءُ آئی ءَ اگست 2024 ءَ بی ایل اے ءَ بھر زرتگ ءُ فتح اسکواڈ ءُ زراب “ انٹیلیجنس ونگ” ءِ بھر بیتگ-

عدنا فقیر کہ گھگیری ءِ تکاں تلار ءِ نام ءَ زانگ بیتگ، بلوچ اسٹوڈنٹس آرگنائزیشن ( بی ایس او) ءِ فکری تک ھیلکاریں ورنایانی درچ ءَ ھوار بیتگ- کہ آیاں کلم ءُ توپک ءِ ریشگ ءَ را یک نوکیں انڈالے کِشتگ- یونیورسٹی آف بلوچستان ءَ انگریزی ادب ءَ بی ایس کنوکیں عدنان یک نودربرے نہ بیتگ بلکیں بلوچی زبان ءِ یک شوکیں شائرے بیتگ ءُ زانشتکاریں ادیبے بیتگ- آئی ءِ مارشتاں آ راجی گلامی ءِ درناکیں درد ءَ سما کنگ ءَ جیڑینتگ ءُ ساجو کتگ- 2019 ءَ بی ایس او ءِ پتر ءَ نودربر سیاست ءَ وتی سپر ءِ بندات کنوکیں عدنان ءَ سابت کتگ وتی زانشت سریچ بیت گڑا بے توار نہ بیت بلکین آشوبی رنگانی توک ءَ مٹ بیت انت-

اگست 2024 ءَ آئی ءَ سرجمی ءَ سلاہ بندیں جد ءُ جھد ءِ راہ گچین کتگ ءُ وتی پکری پھتوئی ءُ تکنیکی رنگ ءَ آ بی ایل اے ءِ انٹیلیجنس ونگ “ زراب ” ءِ بھر جوڑ بیتگ ءُ 2025 ءَ کوھی میدان ءَ شتگ چریشی ءَ پد گل ءِ بنداتی باسک فتح اسکواڈ ءَ ھوار بیتگ- جنگ ءِ میدان ءَ آئی ءِ پیشگامی، بھادری ءُ ھوسلگ نہ پروشگ بیتگ انت- عدنان ءَ سیاسی زانشت،آشوبی مزاج ءُ پوجی راہ ءُ رھبنداں ھمراھانی واستا ستکی ءِ چیدگ زانشت کتگ- آ ھمک زمہ ءَ پیشہ وارانا سنجیدگی ءُ آشوبی زانشتے گون ءَ پیلوے کتگ-

عدنان فقیر ءِ کرد ھما راستی ءِ رژنائیں منانک انت کہ بلوچ جنگ ءِ آجوئی ءَ نی وانندگ ءُ زانشتیں ورنایاں یکین پیسلہ کتگ کہ وتی آجوئی ءِ راہ جنزگی انت- آئی ءَ منیتگ وھدیکہ فکر گھگیری ءَ جوڑشت بیت گڑا آ راجدپتر ءِ مٹ کنگ ءِ سنچ ءَ ودی کنت انت- عدنان ءِ آجزی ءُ وت ءَ راجی زرمبشت ءِ واستا ندر جنگ ءِ پیسلہ انگیگین ءُ آیوکیں نسل ءِ واستا گھگیری، زانشت ءُ کڈنی ءِ جد ءُ جھد ءِ واستا یک رژنائیں راھے ءِ چیدگ گچین جتگ-

عدنان فقیر آپریشن ھیروپ ٹو ءَ رودبن ءِ میدان ءَ جاڑیگ بیتگ ءُ اود ءَ وتی فتح اسکواڈ ءِ ھمراھانی ھواری ءَ فرنٹ لائن ءَ بوتگ ءُ دشمن ءِ ھلاپ ءَ جنگ کنان ءَ شھید بیتگ- عدنان فقیر شھید فدائی یاسمہ بلوچ ءِ گوھار زتک ءُ شھید فدائی زربار بلوچ ءِ ناکوزتک بیتگ – شھید فدائی یاسمہ ءُ شھید زربار بلوچ آپریشن ھیروپ ٹو ءَ کوسٹ گارڈ ھیڈکوارٹرز پسنی ءِ میدان ءَ شھید بیتگ انت-

دومی ءِ پجار سھیل اھمد گرگناڑی پنام ءِ فیصل ء محمد یونس گرگناڑی جھمنند کلی جمالدینی نوشکی نام ءَ کنگ بیتگ- آئی ءَ سال 2022 ءَ بی ایل اے ءَ بھر زرتگ ءُ فتح اسکواڈ ءِ بھر بیتگ شورو پارود، نوشکی ءَ جنگی میداناں جاڑیگ بوتگ- آ آپریشن ھیروپ ٹو ءَ نوشکی ءَ نمیران بیتگ-

سھیل گرگناڑی ھما ھمرھاں فیصل ءِ نام ءَ گوانک جتگ ، نوشکی ءَ ھما ھاک ءِ زھگ بوتگ کہ آئی ءَ ھروھد ءَ گھگیری ءِ نوکیں پدریچ ودینتگ – 2022 وھدیکہ آئی ءَ سلاہ بندیں جد ءُ جھد ءِ راہ گچین کتگ، چوشکہ اے ایوک ءَ جزباتی ءِ پیسلہ نہ بیتگ بلکین جھلانکیں زانشتی ءِ گچین بیتگ – آئی ءِ ابرمی زانشت ءُ رھبندانی پژدر ءَ بی ایل اے ءِ سکا پرکاریں یونٹ فتح اسکواڈ ءِ بھر جوڑ کتگ-اود ءَ آئی ءَ کمے وھد ءَ وتی بھادری ءِ دراجکشین نکش یل داتگ انت-

سھیل ءَ شور پارود ءُ نوشکی ءِ ترندیں جاوراں دشمن ءِ ھلاپ ءَ بازیں وھداں درستاں پیسر بیتگ – آئی ءِ دھشت ءِ ازلم ءُ زانشگ پھتوئی ءِ وھد بیتگ- وھدیکہ آپریشن ھیروپ ءِ بندات بیتگ گڑا سھیل اھمد ءَ وتی ھلک نوشکی ءَ دشمن ءِ ھلاپ ءَ ھما پیسلہ داریں دراھیں لشکری رھبند وتی بھر جوڑ کتگ انت- ترندیں جنگ ءُ چوپ ءَ وتی ھمراھاں پھریزان ءَ وت نمیران بیتگ -سھیل ءِ کربانی اگپ ءِ گواہ انت کہ وھدیکہ راجانی ورنا وتی زاتی واھشتاں آجوئی ءِ راہ ءَ مٹ کن انت گڑا راجدپتر ءَ چوشیں مردمانی ناماں باج نبشتگ بیت انت-

اسرائیل ءِ لشکر ءَ ٹاہ داتگ کہ ایران ءِ بندات کتگیں نوکیں کاروائیانی پسو ءَ اسرائیل ءِ سر ءَ اُرش کنگ ءَ اِنت۔

اسرائیل ءِ واکدارانی نیمگ ءَ شنگ بوتگیں بیان ءَ گْوشگ بیتگ کہ گوستگیں لھتیں کلاکاں اسرائیل ءَ سائرن ءِ توار جنگ بیتگ ءُ چہ ایران ءِ نیمگ ءَ جنگ بوتگیں میزائلانی بابت ءَ مردماں ھال دیگ بوتگ۔

سائرن ءِ توار برجاہ بوتگ ءُ اسرائیلی شھریاں وتی موبائل فون ءَ شیواری رس اتگ ءُ آھاں سوج دیگ بوتگ کہ آ پناہ گاھاں بہ رو انت ءُ داں دگہ نوٹس ءِ رسگ ءَ اود ءَ بہ نند انت۔

اسرائیل ءَ ٹاہ داتگ کہ آئی ءَ چہ لبنان ءَ بوتگیں بازیں میزائلانی ھم چار ءُ تپاسی کتگ کہ اود ءَ حزب اللہ اسرائیل ءِ اُرشانی آماچ بوتگ۔

اسرائیل ءِ رد ءَ میزائل ءُ دگہ پروجیکٹائلز ھلاس بوتگ اَنت ءُ ھچ وڑیں تاوان ءِ ھال ءُ اھوال نہ بوتگ۔

دومی نیمگ ءَ ایران ءِ سر ءَ امریکہ ءُ اسرائیل ءِ اُرشاں 181 زھگاں ھوار یک ھزار مردم بیران بیتگ انت-

امریکہ ءَ ھستیں انسانی ھکانی ادارہ ھیومن رائٹس ایکٹوسٹس نیوز ایجنسی ءَ گوشتگ بیست ءُ ھشت فروری ءَ داں انگیگ ءَ 1097 شھری بیران بیتگ انت کہ ایشانی توک ءَ 181 زھگ ھوار انت-

ھمے وڑ ایران ھم خلیجی ڈیھانی سر ءَ اُرش کنگ ءَ انت ءُ ھمے وڑ امریکہ ءِ میڈیا ءِ رد ءَ دوشمبے ءِ روچ ءَ سعودی عرب ءَ امریکہ سپارتھانہ ءِ توک ءَ سی آئی اے اسٹیشن ڈرون اُرش ءِ نشانگ بیتگ-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بی ایل ایف ءِ سرمچاراں گوستگیں روچ ءَ دو مارچ 2026 ءَ تربت ءِ دمگ آبسر ءَ پاکستانی پوج ءِ دو گاڑی ءُ پرپٹاں ھواریں کاروان آئی ای ڈی اُرش ءَ نشانگ کتگ اَنت- اے کاروائی ھما وھد ءَ کتگ وھدے پوج ءِ کاروان کھدا یوسف میتگ ءَ چہ گوزگ ءَ بیتگ- اود ءَ پیسر ءَ چہ سنگر گپتگ ریموٹ کنٹرول بمب ءَ چہ کاروان نشانگ کتگ، چریشی ءِ نشانگ ءَ آیگ ءَ یک پوج ءِ گاڑی یے سرجمی ءَ تباہ بیتگ- تراک ءِ آسر ءَ گاڑی ءَ سوار سے کارندہ مرتگ ءُ دو سک ٹپی بیتگ اَنت-

جارکش ءَ گْوشتگ کہ تراک ءَ پد پروش وارتگیں دُژمنیں پوج ءَ دمگ ءَ تیرگواری کتگ ءُ لَس شھری تُرسینتگ اَنت، کہ آئی ءِ پروشی سسّائی مسال اِنت-

جارکش ءَ گْوشتگ کہ دگہ یک کاروائی یے سرمچاراں 03 مارچ 2026 ءَ پنجگور ءِ دمگ چتکان ءَ برجاہ فرنئیر کور ( ایف سی) ھیڈ کوارٹر ءِ تہ ءَ زورگریں پوج ءِ چیریں ادارھانی کارگس نشانگ کتگ- سرمچاراں ھیڈ کوارٹر ءِ تہ ءَ برجاہ انٹیلیجنس کارگس سر ءَ نُھ گرنیڈ لانچر ءِ گولہ آس داتگ- کہ آ وتی تچکیں نشانگ ءَ کپتگ اَنت- اے کاروائی ءِ آسر ءَ زورگریں پوج ءَ مزنیں کچے ءَ جانی ءُ مالی تاوان چست کنگ کپتگ-

گُڈی ءَ بی ایل ایف ءَ پاکستانی پوج ءِ سر ءَ بیتگیں اُرشانی زمہ واری منّ اِتگ اَنت-

بلوچستان ءِ دمگ کیچ ءِ بنجاھی شھر تربت ءَ دو جتا جتائیں وئیلانی تہ یَ پاکستانی فوج ءِ کاروان ءُ پوسٹ نشانگ جوڑ کنگ بوتگ انت۔

تربت ءِ دمگ ناصرآباد ءَ پاکستانی فوج ءِ کاروان ءِ سر ءَ سلاہ بندیں مردماں سنگر گپتگ ءُ اُرش کتگ ءُ ایشی ءِ آسر ءَ دو گاڑی ءُُ یک بکتر بندیں گاڑی ءِ سر ءَ دیم پہ دیم اُرش بوتگ۔

چمدیستگیں مردمانی رد ءَ دمگ ءَ مزنیں تیرگواری ءُ تراک ءِ توار بوتگ ءُ ھمے وھد ءَ گمانی مرگ ءُ ٹپیگ ءِ ھال ھم دیم ءَ اتکگ۔

دومی نیمگ ءَ تربت گنہ ءَ پاکستانی فورسز ءِ یک چیک پوسٹے ءَ دستی بم ءِ نشانگ جوڑ کنگ بوتگ۔ تراک ءِ توار دمگ ءَ اشکنگ بیتگ ءُ بلے ک تاوان ءِ بابت ءَ ھچ وڑیں ھال ءُ اھوال نہ بیتگ۔

یات بہ بیت کہ ایشی ءَ پیسر کیچ ءِ دمگ نودِز ءَ سلاہ بندیں مردماں بنجاھی شھدگ ءِ سر ءَ راہ بستگ ءُ بازیں ادارھاں سنیپ چیک کتگ ءُ دیم ءَ روگ ءَ بوتگیں فوجی کاروان ءَ را نشانگ جوڑ کتگ ات کہ ایشی ءِ آسر ءَ یک بکتربندیں گاڑی یے ءَ را تاوان رس اتگ۔

بی وائی سی ءِ نیمگ ءَ برجم داشتگیں میڈیا ٹاک ءِ وھد ءَ شال پریس کلب ءُ بلوچستان یونین آف جرنلسٹانی سروکی ءَ پریس کلب ءِ تہ ءَ پولیس ءِ دزمانجنی تُرندی ءَ ایر جتگ۔

شال پریس کلب ءَ برجم داشتگیں اژدری دیوان ءِ تہ ءَ گشگ بوتگ کہ پولیس ءِ کارندہ پریس کلب ءِ کش ءُ کراں گیر آرگ ءُ اھوالکارانی کوریج ءَ چہ مکن کنگ ءُ آھاں تنگ کنگ پریس ءِ آزاتی ءُ بیان ءِ آزاتی ءِ ھلاپ ءَ کارے ۔ بیان ءِ رد ءَ پریس کلب ءَ پریس کانفرنس یا میڈیا ٹاک ءِ برجم دارگ ھر شھری ءِ ھک اِنت ءُ پریس کلب ءِ تہ ءَ ھچ وڑیں جاور ھال ءَ پولیس ءِ کارروائی اوپار کنگ نہ بیت۔

ھمگرنچیں بیان ءَ گشگ بوتگ کہ پیسر ءَ ھم پریس کلب ءِ بند کنگ ءِ وئیلے بوتگ کہ ایشی ءِ سر ءَ اھوالکارانی چاگرد ءَ زھرشانی کتگ ءُ پد ءَ اے جیڑہ سرکار ءِ دلجمی ءَ گوں آسر بوتگ بلے یک رندے پد ءَ پولیس ءِ نیمگ ءَ دزمانجنی جیڑگ ءُ نا اوپاری اِنت۔

اھوالکار گلاں لوٹ کتگ کہ میر سرفراز بگٹی، ایڈیشنل چیف سیکرٹری ھوم حمزہ شفقت ءُ آئی جی پولیس بلوچستان ءَ اے وئیل ءِ زوت نوٹس بہ زور اَنت ءُ ایشی ءَ ھواریں کارندھانی ھلاپ ءَ ترندیں گامگیج بہ زور اَنت۔

بیان ءَ گیش گوشگ بوتگ کہ ھکومت ءُ پریس کلب ءِ شرپ ءِ برجائی ءِ ھاترا جوانیں گامگیج چست کنگی اِنت ءُ آیوکیں وھد ءُ اے وڑیں دزمانجنیانی گر ءُ دار کنگ ءِ ھاتر ءَ جوانیں گامگیج چست کنگی اِنت اگاں نہ دیمتر ءَ وتی گامگیج ءِ جار جنگ بیت۔