TBP Balochi

زھری ءُ کش گوراں پاکستانی پوج ءُ سلاہ بندانی میان ءَ میڑ ءِ ھال، پنجگور ءَ ڈیتھ اسکواڈ کارندھانی تیرگواری ءَ چہ دو مردم ٹپی –

دمگی اِھوالکار ءِ رِد ءَ پاکستانی پوج گزان ءِ نزیک ءَ پیشگامی کنگ ءِ میان ءَ اُرشانی دیمپانی کنگ کپتگ وھدے کہ دمگ ءَ تراکانی ءُ تیرگواری ءِ توار اش کنگ بیتگ-

میڑ ءَ پد ءَ پوج ءِ یک کاروانے گزان نزیک ءَ اوشتاتگ، وھدے کہ بدو گُشت ءِ نزیک ءَ پُترگی پُھل تراکناکیں شوراں گوں تباہ روگ ءُ آیگ مھتل –

پُھل تباہ بیگ ءِ سوب ءَ گزان ءِ نزیک ءَ ساڑی کاروان ھم پُشت ءَ شُت ئِے نہ کتگ دمگ ءَ دگہ میڑانی ھال سر بیتگ –

ھمے وڑ سوراب ءِ نزیک ءَ پوج ءَ ناکہ بندی کنان ءَ زھری ءَ رؤکیں تھی ءُ ڈنی راہ بند کتگ اَنت، چریشی ءَ چہ بازیں مساپرے گٹ بیتگ اَنت-

گُڈی ھالانی رِد ءَ دمگ ءَ پوج ءِ بُرزی چاروگی برجاہ وھدے کہ اے میان ءَ راکٹ اُرش ءُ تیرگواری ءِ ھال ھم سر بیتگ اَنت-

زانگ بہ بیت کہ گوستگیں روچ ءَ ھم پوج ءِ یک کاروانے تُرندیں اُرش ءِ دیمپانی کنگ کپتگ-

دمگی اِھوالکار ءِ رِد ءَ گوستگیں اگست ءَ چہ زھری ءُ دگہ دمگ بلوچ آجوئی لوٹوکانی دست ءَ اِنت وھدے کہ اے میان ءَ پاکستانی پوج ءِ نیمگ ءَ چہ لشکر کشی، بُرزی چاروگی ءُ ڈرون اُرش ھم رپورٹ بیتگ اَنت-

گوستگیں روچ ءَ ھنجیرہ ءِ نزیک ءَ بیتگیں اُرشاں پوج ءِ پانزدہ کارندہ مرتگ ءُ بازین ئِے ٹپی بیتگ اَنت کہ آئی ءِ زمہ واری بلوچ لبریشن آرمی ءَ منّ اِتگ-

دمگ ءَ انٹرنیٹ سروس ءِ بندی ءِ ھال اِنت وھدے کہ بُرزک چاروگی یکشل ءَ برجاہ-

ھمے وڑ پنجگور ءِ دمگ پروم ءَ پجّار نہ بوتگیں سلاہ بندیں مردماں تیرگواری کتگ دو مردم ٹپی کتگ-

اے وئیل پروم ءِ دمگ جائین ءَ مگرب ءِ وھد ءَ بیتگ، اود ءَ ایرانی دوھزاریں گاڑی ءَ سواریں اُرشکاراں تیرگواری کتگ-

تیرگواری ءِ آسر ءَ دو مردم ٹپی بیتگ اَنت، کہ آیانی پجّار یوسف ء غلام جان ءُ عزیز ء محمد صالح ءِ نام ءَ چہ بیتگ اَنت – دمگی اِھوالکار ءِ رِد ءَ یوسف ءِ جاور نگیگ گوشگ بیگ ءَ اَنت-

زانگ بہ بیت اے اولی رند نہ اِنت اشی ءَ ساری ھم بلوچستان ءِ جتاجتائیں دمگاں ڈیتھ اسکواڈ ءِ کارندھاں باز بے میاریں مردم تیرانی آماچ کتگ کُشتگ اَنت یا کہ چست کتگ ءُ آیانی تیرسُپتگیں لاش دور داتگ اَنت-

زانگ بہ بیت آیانی ڈیتھ اسکواڈ ءِ کارندہ پاکستانی پوج ءِ چیردستی ءَ کار ءَ اَنت-

بلوچستان ءِ دمگ کیچ بلیدہ گلی ءَ گوستگیں شپ ءَ ناشناسیں مردماں پاکستانی پوج ءِ پرپٹ سواریں کارندہ یک آئی ای ڈی تراکے ءِ نشانگ کتگ انت کہ چریشی ءِ آسر ءَ سَے کارندہ مرتگ انت-

واکداراں سَے کارندھانی بیرانی ءِ ھال راست کتگ ءُ گشتگ اُرش ءَ نائیک ساد، سپاھی اسمائیل کہ یک سد ءُ سَے ونگ ءِ انجنیئرے بیتگ ءُ سپاھی اسد کہ شست ءُ یک ونگے کارندہ بیتگ-

زانگ بہ بیت بلوچستان ءَ پاکستانی پوج یکشل ءَ اُرشانی نشانگ کنگ بوگ ءَ انت کہ گوستگیں روچ ءَ بلوچ لبریشن آرمی ءُ بلوچستان لبریشن فرنٹ ءَ جتا جتائیں اُرشانی زمہ واری من اتگ انت-

بلوچ لبریشن آرمی ءِ جار جیئند بلوچ ءَ گوستگیں روچ ءَ شنگ کتگیں درشان ءَ گوشتگ سرمچاراں زھری ءِ دمگ انجیرہ ءُ گزان ءَ پیشگامی کنوکیں پوج اُرش ءِ نشانگ کتگ-

جارکش ءَ گوشتگ اے اُرش ءِ زد ءَ اتکگیں دو گاڑی سرجم ءَ تباہ بوتگ انت ءُ گاڑیاں سواریں پانزدہ کارندھاں گیش مرتگ انت-

آئی ءَ گوشتگ زھری چہ یازدہ اگست ءَ سرمچارانی کنٹرول ءَ انت ءُ چل ءُ ھپت روچاں پاکستانی پوج ءِ پیشگامی بازیں براں بے سوب کتگ انت-

ھمے وڑ ءَ بلوچستان لبریشن فرنٹ ءِ جارکش گوھرام بلوچ ءَ شنگ کتگیں درشان ءَ گوشتگ سوراب ءُ واشک ءِ بنجاھی شھدگ ءِ سر ءَ ناکہ بندی کتگ ءُ کسٹم ءُ پولیس کارندھانی سرکاری سلاہ ءُ گاڑی پچگپتگ ءُ برتگ انت-

دومی نیمگ ءَ بلوچستان عوامی پارٹی ءِ بین پارٹی گچینکاریانی وھد ءَ پیسریگیں سر وزیر ءُ پیسریگیں اسپیکر جان محمد جمالی ءَ گْوشتگ کہ بلوچستان ءِ شھدسگ مئے واستا پھریزی نہ اَنت ھمے ھاتر ءَ آ ءُ دگہ بازیں سیاست دان سڑکاں سپر کنگ ءَ بے سوب اَنت۔

آئی ءَ وتی تران ءِ تہ ءَ گوشتگ کہ جاور ھال انچو نگیگ اَنت کہ ھچ وزیر سڑکاں سفر کنگ ءِ وس ءَ نہ کنت ءُ لھتیں رھشون لھتیں دمگانی تہ ءَ چہ گوزگ ءَ ترس ءُ بیم ءِ مارشت ءَ دار اَنت۔

آئی ءِ گشگ ءِ رد ءَ ترس ءِ سوب ءَ من چہ بولان ءَ گوست نہ کن آں ۔ آئی ءَ یک مسالے داتگ ءُ گشتگ کہ صادق سنجرانی ھم نوشکی ءَ سپر کت نہ کنت، ءُ کلات ءُ ایندگہ دمگانی جاور ھم پریشان کنوک انت۔

زانگ بہ بیت گوستگیں وھداں بلوچستان ءِ مزن شھدگانی سر ءَ بلوچ آجوئی دوستیں سلاہ بندیں گلانی زور گیش بوتگ۔ چیک ءُ تانی کنگ ھمک روچ رپورٹ بوگ ءَ انت-

بلوچستان ءَ یک نیمگے ءَ مردم یل بیگ ءُ دومی نیمگ ءَ مردمانی آوار جنگ ءُ بیگواھیانی درچ برجاہ انت ءُ گوستگیں روچاں ھپت ءُ چار روچاں بلوچ کھولاں ماں پاکستان ءِ بنجاھی شھر اسلام آباد ءَ زھرشانی نندانک داتگ بیتگ ءُ پد ءَ گوستگیں دو روچ پیش آیاں وتی زھرشانی نندانک ھلاس کتگ-

زھرشانی نندانک ءِ ھلاسی ءِ دزبندی بلوچ راجدوست میر محمد علی تالپور ءُ بیگواھیں بلوچانی واستا ماں اسلام آباد ءَ گھگیری کنوکیں انسانی ھکانی ءُ وکیل ایمان زینب مزاری ءَ وتی تامر بندی کلوہ ءَ کتگ ءُ گوستگیں دو روچ ءَ پیش نشتگیں کھولاں زھرشانی نندانک ماں اسلام اباد ءَ ھلاس کتگ ءُ گھگیری کنگ ءِ جار جتگ-

ھمے وڑ ءَ بلوچستان ءَ مردمانی آوار جنگ ءِ درچ برجاہ انت – پاکستانی لشکر ءَ جتا جتائیں دمگاں سئے مردم دزگیر کتگ ءُ بیگواہ کتگ انت ءُ دگہ سَے بیگواھیں مردم یل کنگ بیتگ انت-

کیچ ءِ دمگ دشت کنچتی ءَ بیست ءُ ھپت ستمبر ءِ شپ ءِ ساھت یک ءَ پاکستانی لشکر ءَ الطاف ء ھیبتان ءُ گلاب ء ایوب بلوچ دزگیر کتگ ءُ پد ءَ بیگواہ کتگ انت۔

ھمے رنگ ءَ کیچ ءِ دمگ ھیر آباد ءَ 25 ستمبر ءَ سھب ءِ 5 بج ءَ پاکستانی لشکر ءَ سعود ء ھاجی رھیم چہ آئی ءِ لوگ ءَ دزگیر کتگ کہ ایشی ءَ پد آئی ءِ بابت ءَ ھم ھچ وڑیں ھال ءُ اھوال دیم ءَ نیتکگ انت۔

دومی نیمگ ءَ سئے بیگواھیں مردم یل بیتگ ءُ وتی لوگاں سر بوتگ اَنت ۔ بارکھان ءِ نندوکیں شیراز ء غلام قادر 20 ستمبر ءَ دزگیر کنگ بوتگ ءُ ھپت روچ ءَ پد 27 ستمبر ءَ یل بوتگ ھمے رنگ ءَ بالگتر ھنگول ءِ نندوکیں سراج ء سنجر ھم 26 ستمبر ءَ چہ تربت ءَ دزگیر کنگ بوتگ ءُ دومی روچ ءَ بیست ءُ ھپت ستمبر ءَ وتی لوگ ءَ سر بیتگ ، چہ بارکھان ءَ سَے ماہ ءَ پیش بیگواہ بیتگیں اصغر کرمدانی پاکستانی پوج ءِ بندیگ جاہ ءَ یل بیتگ ءُ وتی لوگ ءَ سر بیتگ-

زانگ بہ بیت کہ بلوچستان ءَ زورانسری بیگواھیانی درچ بازیں سالاں برجاہ اِنت کہ چریشی سانمندیں کھول ءُ انسانی ھکانی گلاں دلپدردی درشان کنگ ءَ اَنت۔ کھولانی گشگ اِنت کہ آھانی نزیکیں مردم بے ھچ وڑیں کانونی کارروائی ءَ دزگیر ءُ بیگواہ کنگ بوھگ ءَ اَنت۔

بلوچ یکجھتی کمیٹی ءِ سروک ڈاکٹر ماھرنگ بلوچ ءِ گھار نادیہ بلوچ ءَ اسلام آباد نندانک ءُ آئی ءِ ھلاس کنگ ءِ درگت ءَ وتی ھیال درشان کتگ ءُ گوشتگ کہ ماں اسلام آباد ءَ ھپتاد ءُ چار روچاں برجاھیں نندانک ما زیک ھلاس کتگ ۔ وھدیکہ ما زھرشانی ھاتر ءَ رؤگ ءَ بوتگ انت گڑا مئے دل ءَ بازیں ھیالے اتکگ ۔ مارا ھچ وڑ ءَ اے امیت نہ بوتگ کہ پاکستانی ریاست مئے گپ ءَ گوشدار ایت پرچاکہ مارا چہ پیسر ھم بلوچاں باز رند ءَ اے جھد کتگ بوتگ ، بلے اسلام آباد ءَ مدامی اے پدر کتگ کہ اے ملک ءِ تہ ءَ بلوچ بس گلام زانگ بنت ءُ آ مارا ھچ وڑ ءَ انساپ نہ دے انت ۔

آئی ءَ گوشتگ کہ ایشی ءَ ابید ھم ما رؤگ ءِ پیسلہ کتگ مئے رؤگ ءِ مول اسلام آباد ءَ اے باور کنائینگ کہ ماھرنگ ایوک ءَ نہ ایں کہ آئی ءَ بندیگ کنگ ءَ چہ بلوچ راج ءَ جھد ءِ ھک پچگرگ بیت یا بلوچ راج چیر ترینگ بیت ۔ ماھرنگ ءُ بی وائی سی ءِ ایندگہ سنگتانی نزر بند کنگ ءِ بنکی مول ءُ مراد ھمے ترس پیداک کنگ کہ ھچ کس توار چست مہ کنت ءُ بلوچ چہ وتی ھکانی جھد ءَ دزکش بہ بنت بلے اسلام آباد ءَ اے دراھیں اڑاندانی دیمپان بوگ ءَ ابید ما ھپتاد ءُ چار روچاں نندانک داتگ ءُ اے پدر کتگ کہ ما ھچ وڑیں جاوراں ھاموش نہ بہ ایں ۔ مئے جھد ھاموش نہ بیت تاں ھما وھد ءَ کہ ریاستی زوراکی برجاہ بیت بلوچ جھد ءُ اے ماتانی پرایمنیں جھد ءَ ھچ کس داشت نہ کنت، تاں ھما وھد ءَ اسلام آباد ءِ زوراکی برجاہ بنت بلوچ راجی جھد برجاہ مان ایت ۔

نادیہ بلوچ ءَ گوشتگ کہ اسلام آباد ھچبر اے مارشت دیگ ءَ یل نہ دنت کہ مارا چی سمج ایت ۔ اے میان ءَ آئی ءَ مدامی ترسینتگ مارا پولیس ءُ ایجنسیانی دست ءَ چیر ترینگ ءِ جھد کتگ بلے اے مات ءُ گھارانی تمردی ءَ سلام انت کہ ریاستی زوراکیانی دیمپانی ءِ کتگ پد نہ کنز اتگ انت ۔

آئی ءَ گوشتگ کہ من یک وکیلے ءَ من شری ءَ زاناں کہ پاکستان ءَ کانود ءُ رھبندانی ارزشت چی انت ءُ اد ءَ کانود ءُ رھبندانانی گون ءَ چی وڑ ءَ مسکرا کنگ بیت بلے اشی ءَ ابید ما جیڑہ چار اتگ ءُ وتی زھرشانی اسلام آباد ءَ نبشتہ کنائینتگ تانکہ جھان ءَ پدر بہ بیت کہ بلوچستان ءِ تہ ءَ پاکستانی ریاست چی کنگ ءَ انت ۔ ما اد ءَ جھان ءِ دیم ءَ اسلام آباد ءِ زوراکیانی پدر کنگ ءَ یکجاہ بوتگ انت ءُ ما ایشی ءَ سوبمند بوتگ انت ۔

نادیہ بلوچ ءَ گوشتگ کہ وھدیکہ ما اسلام آباد ءَ رس اتگ انت گڑا مئے وش آتکی پولیس ءِ ترس ءُ بیھار ءَ زھرشانی ءِ ھک ءَ زبھر کنگ ءَ بوتگ ۔ مئے سر ءَ دو رند ءَ لٹ شاپی کنگ بوتگ مارا زاہ ءُ بد کنگ بوتگ ءُ بار بار مارا گلام بوگ ءِ مارشت دیگ بوتگ ۔ مارا پریس کلب ءِ دیم ءَ زھرشانی کنگ ءَ ھم نہ اشتگے وھدیکہ ما ھمود ءَ وت ءَ دارگ ءِ شور جتگ گڑا مئے سر ءَ چد ءُ گیشتر زوراکی کنگ بوتگ ۔

آئی ءَ گوشتگ کہ ھمودا ما کرایہ گس زرتگ گڑا ھما شپ ءَ ما چہ اود ءَ در کنگ بوتگ انت ءُ مردم بیھار دیگ بوتگ انت کہ ایشاں گس مہ دے ایت ایشی ءَ ابید وکیل ایمان مزاری ءُ الی ھادی کہ اے گرانیں ساھتاں مئے گون ءَ اوشتوک بوتگ انت آ ریاست ءِ نیمگ ءَ یکشل ءَ بیھار دیگ بوتگ انت ۔

نادیہ بلوچ ءَ گوشتگ کہ اے پیسلہ ءَ ما راجدپتر ءِ سر ءَ یل دے ایں کہ آ مارا کجا بارت بلے ما وتی زرمبشت ءُ جھد ءَ ھر وڑ ءَ برجاہ دار ایں ۔ منی گھار ءَ من ءَ ھمے درونت داتگ کہ انساپ ءِ شوھاز ءَ ھکانی گرگ ءِ جھد یک گرانیں ءُ دراجیں سپر ئے ۔ ما چہ اسلام آباد الم واتر بوتگ ایں بلے مئے جھد اد ءَ ھلاس نہ بیت اے برجاہ مان ایت ۔

بلوچستان ءِ جتاجتائیں دمگ پاکستانی پوج ءِ لشکر کشی برجاہ، دو مردم بیگواہ-

گیشیں ھالانی رِد ءَ بیست چار ستمبر 2025 ءَ بلوچستان ءِ دمگ نوشکی ءِ ھند جمالدینی ءَ پاکستانی پوج ءِ شپ ءِ وھد ءَ قدوس نامیں مردمے ءِ لوگ سر ءَ بیڑبرتگ آئی ءِ چُک وقار بلوچ آوار جتگ ءُ بیگواہ کتگ – کھول ءِ گوشگ اِنت کہ دزگیری ءَ پد وقار بلوچ ءِ ھچ وڑیں ھال دز نہ کپتگ-

ھمے وڑ بیست یک ستمبر 2025 ءَ کوہ سلیمان ءِ دمگ چوک موندہ ءَ پاکستانی پوج ءَ کوہ سلیمان ءِ جھمنند ءُ گُشندہ زھیر قیصرانی آوار جتگ ءُ بیگواہ کتگ –

دومی نیمگ ءَ بلیدہ ءِ دمگ گردانک ءَ پاکستانی پوج ءَ لوگانی سر ءَ بیڑبرتگ، دمگی اِھوالکار ءِ رِد ءَ پوج ءِ نیمگ ءَ میتگانی سر ءَ تیرگواری کتگ-

ھمے وڑ پنجگور ءَ پاکستانی پوج ءِ نیمگ ءَ لشکر کشی ءِ ھال اِنت-

لشکر کشی ءِ تہ ءِ دمگاں حاجی حکیم بازار ءُ کڈان ھوار اَنت-

اِھوالکار ءِ رِد ءَ پوج ءَ لوگانی پٹ ءُ پول وھدے کہ دمگ ءِ تامُر ءُ اکس جوڑ کتگ اَنت بلے اے میان ءَ دزگیری جانی ءُ تاوان ھال سر نہ بیتگ-

مستونگ ءَ ایف سی ءِ کارندہ ءِ تیرگواری ءَ ڈرائیور ابراھیم بلوچ ءِ کوش ءَ پد مھلوک ءَ راہ بستگ ءُ زھرشانی نندانک بندات کتگ ۔

دمگی انتزامیہ ءُ زھرشانی کنوکانی میان ءَ کم ءُ دیر ءَ پیش گپ ءُ تران بے سوب بیتگ-

جاورانی رد ءَ دمگ ءَ پورسز ءِ کساس گیش کنگ بوتگ وھدے کہ اے ترس ھست کہ زھرشانی کنوکیں مردمانی ھلاپ ءَ کارروائی کنگ بوت کنت۔ مستونگ شھر ءُ زھرشانی ءِ جاہ ءَ ھم ڈرونانی بالیگ برجاہ اِنت۔

دمگی مردمانی رد ءَ انتزامیہ ءَ زھرشانی ءِ ھلاس کنگ ءِ تیاری ءَ اِنت ءُ گمانی رنگ ءَ لٹ ءُ کٹ، تیرگواری یا دزگیری ءِ جاورھال کاینت-

بلے زھرشانی کنوک وتی لوٹانی سر ءَ سدک اَنت ءُ انگت ءَ دھرنا ءِ سر ءَ نشتگ اَنت۔ آ گوں ھاسیں لوٹ ءَ کن اَنت کہ ملزمیں کارندہ ءِ ھلاپ ءَ ایف آئی آر درج کنگ بہ بیت ءُ آ دزگیر کنگ بہ بیت۔

زانگ بہ بیت بلوچستان ءَ گوستگیں وھداں ھم پاکستانی لشکر ءِ تیر گواری ءِ آسر ءَ بازیں ڈرائیور وتی جان ندر کتگ بلے انگت ءَ ھچ وڑیں کارندہ دزگیر کنگ نہ بیتگ۔

ڈرائیور گش انت کہ وھدے کہ آ فورسز ءِ چیک پوسٹاں بھتہ ءِ زرّ دیگ ءَ چہ انکار کن انت گڑا آ ٹارچر یا تیرگواری ءِ آماچ بنت۔

بلوچستان ءِ دمگ ھزدار ءَ پاکستانی لشکر ءُ سلاہ بندانی میان ءَ دومی روچ ءَ جنگ ء چوپ برجاہ انت ۔

انجیرہ ءُ گزان ءِ دمگاں ھیلی کاپٹر بال ءَ گندگ بوتگ انت ءُ جتاجتائیں جاھاں ہیلی کاپٹراں تیرگواری کتگ۔

دمگی مردمانی رد ءَ لشکر ءِ نیمگ ءَ مارٹر گولہ باری کنگ بوھگ ءَ اِنت بلے انگت ءَ ھچ وڑیں تاوان ءِ ھال سر نہ بیتگ اَنت۔

گوستگیں روچ ءَ انجیرہ ءِ دمگ ءَ مزنیں اُرشے ءَ پاکستانی لشکر ءَ را تاوان رس اتگ ، اُرش ھما وھد ءَ کنگ بیتگ لشکر دہ گاڑیانی کاروان ءَ دیم ءَ جنزگ ءَ بیتگ- ھالانی رد ءَ پورسز ءِ چار گاڑی اُرش ءِ آماچ بوتگ انت۔

واکداراں اے درگت ءَ انگت ءَ ھچ وڑیں ھال ءُ اھوال نہ داتگ۔

زانگ بہ بیت چہ اگست ءَ زھری ءِ شھر ءُ آئی ءِ کش ءُ گوری دمگ بلوچ آجوئی لوٹوکیں گلاں دستیگ کتگ انت کہ اود ءَ سلاہ بندیں آجوئی لوٹوک شھر ءَ گشت کنگ ءَ گندگ بوتگ انت ءُ جتا جتائیں جاھاں سنگر اش گپتگ ءُ نشتگ انت-

گوستگیں روچاں زھری ءِ دو جاگہ ​​پاکستانی لشکر ءَ گوں جیٹ ءُ ڈرون ءَ بمبگواری کتگ انت ءُ چریشی ءَ لس مردم نشانگ جوڑ کنگ بوتگ انت۔ بمبگواری ءَ بیران بوتگیں مردمانی تہ ءَ جنین ءُ چُک ھم ھوار اَنت۔

بلوچستان ءَ اے وھد ءَ بلوچ چُکچینی گوں تُرندی ءَ برجاہ ءَ اِنت ھمکروچ بلوچانی ورنایانی تیرسُپتگیں لاش، آوار جنگ ءُ بیگواہ کنگ یکشل ءَ برجاہ ءَ اِنت ھمے دو ماھانی تہ ءَ کساس دو دزن ءَ گیش بیگواھیں مردمانی لاش دور دیگ بیتگ اَنت بلوچستان ءِ جتاجتائیں دمگ، آواران، ھُزدار، کیچ، بارکھان ءَ دروگیں میڑاں بیگواھیں مردم کُشتگ ءُ دور داتگ اَنت-

گیشیں ھالانی رِد ءَ کیچ ءِ تھسیل بلیدہ ءَ ھمے یکیں ھپتگ ءَ اے سیمی بیگواھیں ورنا ءِ لاش اِنت کہ دزکپگ ءَ اِنت-

دی بلوچستان پوسٹ ءَ دزکپتگیں ھالانی رِد ءَ گوستگیں شپ ءَ پاکستانی پوج ءُ سرکاری پلامرزی ٹولی ءَ یوسف ء عبدین چہ کڈکی کوہ ءَ ڈیوٹی ءِ میان ءَ چست کتگ ءُ وتی ھمراھی ءَ برتگ پد ءَ مروچی آئی ءِ تیرسُپتگیں لاش دور داتگ-

دمگی مردماں گوشتگ کہ بازیں دھکاں چہ بلوچ تُرس ءِ ساھگ ءِ چیر ءَ زند گوازینگ ءَ لاچار اَنت- زورانسری آوار جنی، درکانودی کوش بلوچستان ءِ تھلیں راستی یے جوڑ بیتگ- یوسف عبدین کوش ھچ چُش جتا نہ اِنت بلکیں بلوچ راج ءِ ھلاپ ءَ ریاستی زوراکی ءُ کُشت ءُ کوش ءِ مھمکیں بھرے-

زانگ بہ بیت ھمے ھپتگ ءَ چہ بلیدہ ءَ دگہ دو ورنایانی لاش دزکپتگ اِت اَنت آ پاکستانی پوج ءُ دمگی سرکاری پلامرزی ٹولی ءِ دست ءَ بیگواہ کنگ بیتگ اِت اَنت-

ھمے وڑ کراچی، واشک ءُ کیچ ءَ ایڈووکیٹ ءَ ھوار چار مردم آوار جنگ ءُ بیگواہ کنگ بیتگ اَنت-

گیشیں ھالانی رِد ءَ چہ واشک ءَ گوستگیں روچ ءَ ورنائیں ایڈووکیٹ حنیف بلوچ زورانسری بیگواہ کنگ بیتگ-

کھول ءِ رِد ءَ ایڈووکیٹ حنیف بلوچ پاکستانی پوج ءِ کارندھاں آئی ءِ لوگ ءَ چہ ناگ واشک آوار جنگ ءَ پد ناشناسیں جاھے ءَ برتگ –

کھول ءِ گوشگ اِنت کہ آیاں تنی وھدے ھچ وڑیں سرپدی دیگ نہ بیتگ، کھول ءُ چاگردی مردماں اے گامگیج ایر جنان ءَ ایڈووکیٹ حنیف بلوچ ءِ پہ سلامتی یل کنائینگ لوٹ کتگ-

ھمے وڑ گوستگیں شپ ءَ کیچ ءِ دمگ چہ مند ءَ پاکستانی پوج ءَ نصرت سید محمد جھمنند کوہ پشت ءُ عالم نصیر آوار جتگ ءُ بیگواہ کتگ اَنت-

بلوچستان ءَ اَبید کراچی ءَ ھم جھمنندیں بلوچ مُھر نہ اَنت ھمے وڑ گوستگیں روچ ءَ کراچی ءِ دمگ چہ نوکیں لین لیاری ءَ رینجرز ءِ کارندھاں زاکر علی ء محمد ابراھیم آوار جتگ ءُ بیگواہ کتگ-

زاکر علی ءِ آوار جنی ءِ گپ بلوچ یکجھتی کمیٹی ءَ راست کتگ ءُ آوار جنی ءِ ھال شنگ کتگ-

دومی نیمگ ءَ چہ کیچ ءَ بیست ھشت مارچ 2025 ءَ چہ آپسر ءَ بیگواہ کنگ بیتگیں عبدالصمد ء میار شش ماہ ءَ پد گوستگیں روچ ءَ دیم ءَ آرگ بیتگ-

ھمے وڑ مروچی جمعہ ءِ روچ ءَ کیچ ءِ جتاجتائیں دمگاں چہ بیگواہ کنگ بیتگیں دو مردم عبدالرحمان ء سخی داد جھمنند ڈڈے دشت اے وھد ءَ گوکدان، دو ھپتگ ءَ پد ءُ احمد ء غلام محمد جھمنند مند چل شش روچ ءَ پد یل بیتگ-

سئیں مردم پاکستانی پوج ءَ آوار جتگ ءُ وتی ھمراھی ءَ برتگ اَنت چریشی ءَ پد آ بیگواہ بیتگ اَنت-

دمگی انتزامیہ ءَ سئیں مردمانی یل بیگ ءِ گپ راست کنان ءَ گوشتگ کہ آ وتی لوگ ءَ واتر سر بیتگ اَنت-

بلوچستان ءِ انسانی ھکانی کونسل ءِ رد ءَ سال 2016 ءَ بگر تاں 2025 ءَ بلوچستان ءِ تہ ءَ انسانی ھکانی لگتمالی ءِ سرا یک سرجمیں رپورٹ ءِ یورپی یونین ءِ جی ایس پی پلس کمیٹی ءَ دیگ بوتگ ۔

رپورٹ ءِ تہ ءَ پاکستان نیمگ ءَ معاہدہ ءِ شرتانی سرا امل نہ کنگ ءِ سوب ءَ آئی ءِ جی ایس پی پلس در کنگ ءِ لوٹ کنگ بوتگ ۔

رپورٹ ءِ رد ءَ بلوچستان ءَ انسانی ھکانیئےلگتمالی ھما ھد ءَ شتگ ءُ سربوتگ انت کہ انسانیت ءِ بگیری ءَ کتکاری ءِ زمرہ ءَ کائینت ۔

رپورٹ ءِ گچینی شک

کم چہ کم 6744 مردم زورانسری آوار جنگ بوتگ انت کہ پاکستانی پوج ءَ کھول ءِ دیم ءَ چست کتگ انت ۔

2559 مردم پوجی زندانانی تہ ءَ بازیں لٹ شاپ کنگ ءَ پد یل کنگ بوتگ انت 215 مردمانی ژانگولیں جون پدا رند ءَ دست کپتگ انت کہ آ سک باز لٹ کٹ کنگ بوتگ انت ۔ دگہ 173 مردم دوروگیں میڑاں وھدیکہ 231 مردم پوجی ارش ءُ دگہ وئیلاں کشگ بوتگ انت ۔

سرکار ءَ ھستیں وھد ءَ جونانی پجار زاھر نہ کتگ ءُ آیانی کل ءُ کسارت کنگ ءِ درچ بندات کتگ ۔

یکجاھیں کبراں سدانی کچ ءَ انسانی ھڈ دست کپتگ انت کہ آیانی تہ ءَ بازیں مردمے زورانسری آوار جنگ بوتگ بلے گیشتر بید پجار ءَ کل کنگ بوتگ انت ۔

زانشجاہ ءُ دگہ جاہ پوجی بنجلانی تہ ءَ مٹ کنگ بوتگ انت کہ چریشی شھری زند سک باز سانمند بوتگ ۔

سدانی کچ ءَ میتگ زورانسری ھالیگ کنگ بوتگ انت ماندارگ بوتگ انت ، لٹ پل کنگ بوتگ انت ھاسکر سی پیک دگ ءِ کش گورانی کہ کساس دہ ھزار مردم بے گس بوتگ ۔

سیاسی ءُ انسانی ھکانی مچیانی سرا لٹ شاپی کنگ بوتگ ، آیانی باسک کشگ یا دروگیں بھتاماں پنسارینگ بوتگ انتئے، زالبولیں باسک ھم سر زاھری ترسینگ ءُ لٹ شاپ کنگ بوتگ انت ۔

انسانی ھکانی باسک دزگیر کنگ ءُ درکانودی بندیگ کنگ بوتگ انت ءُ چہ وتی ھکانی ٹرائل ءَ زبھر کنگ بوتگ انت ۔

پنجاپ ، اسلام آباد ءُ سندھ ءَ بلوچ نودربر نسلی ، ترسینگ ، زورانسری آوار جنگ لٹ ءُ کٹ ءُ درکانودی کوش ءِ دیمپان انت ۔

پولیس پھازگی کارمندانی بگیری ءَ ارزی نبشتہ کنگ ءَ نہ انت وھدیکہ آمیدگس ھم اے زوراکیاں دلگوش دیگ ءَ نہ انت ءُ پوجی پالیسیانی پلامرزی ءَ کنگ ءَ انت ۔

بیگواھیں مردمانی ھاتر ءَ جوڈ کنگ بوتگیں کمیشن ھم سرجمی ءَ ھلاس انت ۔ ھچ وڈیں پوجی یا انٹلی جنس اپسر تنی وھدی جواب دھی ءَ آرگ نہ بوتگ ۔ وھدیکہ اکوام متھدہ ءِ نمائندگاں بلوچستان ءِ تہ ءَ ھچ دست رس نیست ۔

یورپی یونین ءِ لوٹ :

بلوچستان ءِ انسانی ھکانی کونسل ءَ چہ یورپی یونین ءَ لوٹ کتگ کہ آ جی ایس پی ریگولیشن ءِ آرٹیکل (a)(1) 15 ءِ رد ءَ پاکستان ءِ بگیری ءَ پٹ ءُ پول بندات بہ کنت ۔

پاکستان چہ جی ایس پی پلس ءَ ماٹو یا درکنگ بہ بیت تا ھما وھد ءَ انسانی ھکانی ٹارگٹ سرجم نہ بنت ۔ بلوچستان ءَ سول سوسائیٹی ءُ سانمندانی گوم ءَ تچکی ءَ ھال اھوال کنگ ءُ مانیٹرنگ میکنزم برجم کنگ بہ بیت ۔
پاکستان ءَ چہ لوٹ بہ کنت کہ آ زورانسری آوار جنیانی درگت ءَ میان استمانی کنونشن ءِ توثیق ءُ نفاذ ءَ بہ کنت ۔

زورانسری آوار جنی ءِ ھلاس کنگ ، درکانودی کشت ءُ کوشانی زمہ دارانی بگیری کاروائی ، زالبولانی سرا لٹ شاپی ءِ گر ءُ دار وانگ ءُ جانسلامتی وڈیں تکاں بنکی اصلاح ترجیح دیگ بہ بنت

ڈاکٹر ماہ رنگ بلوچ ءُ آئی ءِ دگہ ھمراھانی پانزدہ روچ ءِ جسمانی ریمانڈ ءِ ھلاس بوگ ءَ آمیدگس ءَ پیش بیتگ انت-

پیشی ءِ وھد ءَ بندیگانی نیمگ ءَ ایڈوکیٹ شعیب مینگل ءُ ایڈوکیٹ جتک پیش بیتگ انت – سی ٹی ڈی ءَ بندیگانی واستا گیشیں جسمانی ریمانڈ ءِ لوٹ ءِ درھواست کتگ بلے جج ءَ اے دزبندی رد کتگ ءُ بندیگ جیل ءِ کسٹڈی ءَ دیم دیگ ءِ ھکم داتگ انت-

زانگ بہ بیت یازدہ ستمبر ءَ شال ءِ انسداد دھشتگردی ءِ آمیدگس ءَ پولیس ءِ دزبندی ءِ سر ءَ ڈاکٹر ماہ رنگ ءُ دگہ رھشونانی جسمانی ریمانڈے گیش کتگ بیتگ-

دومی نیمگ ءَ اسلام آباد ءَ بی وائی سی ءَ 73روچی زھرشانی نندانک ھلاس کتگ، جھد ءِ برجاہ دارگ ءِ جار جتگ-

اسلام آباد ءَ نیشنل پریس کلب ءِ نزیک ءَ بلوچ یکجھتی کمیٹی ءِ برجاھیں زھرشانی دھرنا 73 روچ ءَ پد ھلاس کنگ بوتگ۔ بی وائی سی ءِ رھشوناں جار جتگ کہ اگاں زھرشانی نندانک ھلاس کنگ بوھگ ءَ اِنت بلے پرایمنیں جھد ھرچ وڑ ءَ برجاہ بیت۔

زھرشانی ءِ سروکی ءَ بی وائی سی ءِ بنجاھی سمی دین بلوچ ءُ پہ زور بیگواھیں ڈاکٹر مھرنگ بلوچ ءِ گھار نادیہ ایڈووکیٹ ءَ کتگ کہ ایشی ءِ تہ ءَ زالبول، نودربر ءُ سول سوسائٹی ءِ نمائندگاں مزنیں کساسے ءَ بھر زرتگ۔

راجدوستیں رھشون میر محمد علی تالپور ءِ دزبندی ءُ انسانی ھکانی وکیل ایمان زینب مزاری ءِ لوٹ ءِ سر ءَ زھرشانی ءِ آسر کنگ ءِ پیسلہ کنگ بوتگ۔

زھرشانی ءِ مستریں مول ءُ مراد ڈاکٹر ماہ رنگ بلوچ ءُ آئی ءِ ھمراھانی دزگیر کنگ ءِ ھلاپ ءَ زھرشانی کنگ ءُ سرجمیں ملک ءَ پہ زور بیگواھیانی ھلاس کنگ ءِ لوٹ کتگ-

بی وائی سی ءِ رھشوناں اے گپ پدر کتگ کہ زھرشانی ءِ آسر بوھگ ءِ بزانت جھد ءِ آسر نہ اِنت۔ آئی ءَ گوشت کہ زلم ءِ ھلاپ ءَ پرایمنی ءُ جمھوری جنز برجاہ مان ایت ۔