TBP Balochi

نبشتانک: نمدی یے پہ شھید کمار اسحاق ءِ نام ءَ

نبِشتہ کار: شاھنواز بلوچ

دی بلوچستان پوسٹ

دْروت ءُ دراہ بات ئے نمیرانیں سنگت کمار جان جی منی پُل من جوڑ وش ءُ سلامت آں ، من ترا جوڑی نہ کناں پرچا کہ تو ابدمان ءُ نمیران ئے پہ وتن ، من پمیشکا پہ تو اے نمدی ءَ نبشتہ کنگ ءَ آں ترا وش آتک نہ کنگ ءَ آں کہ تو جسمانی اِھوال ءَ زندگ نہ ئے تئی پکر ءُ سوچ زندگ اَنت مئے رھشونی ءَ کنگ اِنت ، او کمار جان تو پہ چی ءَ یک روچے مئے واست ءَ سلامے راہ نہ دے ئے اڑے کربان آں ترا مئے واست ءَ زھیر نہ کنت تو یک روچے مئے ترانگ ءَ نہ کپ ئے ، پرچا مئے ترانگ ءَ نہ کپ ئے تئی نمیران بوّگ ءَ را (5)پنچ سال سرجم بوتگ تو مئے واست ءَ یک روچے ھم سلام دیم نہ داتگ تو مئے گوم ءَ سک بے وپائی کنگ ءَ ئے یکے تو مارا اَبیتک کُت ءُ شُت ئے تو زان ئے لُمہ ءِ وتن بانُک کریمہ ءَ ھم مارا یل کُت نمیران انت پہ وتن، آ وھداں تو ھر وھد ءَ دست بند بوتگ ئے گوں گل ءِ کاراں وتی وانگ ءَ گوں سنگتاں گوں تر ءُ تاب کُت برے اے میتگ برے آ میتگ ۔

اڑے مھروانیں پُل تو برھال مارا باز یات ءُ گیر کائے کہ مدام مئے گوم ءَ یکجاہ بیتگ ئے ترا یاد بیت من ءُ تو مدام ھواری بی ایس او آزاد ءِ کاراں ھوار اَت اِنت میتگ پہ میتگ تر ءُ تاب کُت ، ترا انگت دگہ گپے ھال دیاں نعیم ھم مئے ھمراھداری ءَ چہ تک ءُ دژمن ءِ دیم ءَ سر ئِے جھل کُت من اُشکُتگ مرچاں اَرب امارت ءَ کپتگ یک روچے ھم سنگتانی ترانگ نہ کپ اِیت نعیم ءِ گپ ءَ من یل کناں مارا ایوک ءَ تر ءُ تاب ھچ وش نہ بیت نوں تو بیا ما مدام تئی ترانگاں کپ آں من اے ھم زاناں کہ تو وتی ابدی جاہ ءَ شُتگ ئے نوں نیائے ءُ واتر نہ بہ ئے بلے چوش مہ کن الم مئے ترانگ ءَ بہ کپ کدی کدی ما وھدے کہ دیم پہ سنگتے ءِ کر ءَ دیوان ءَ رویں تو گوں نہ ئے مارا پاد نہ بر اَنت پد ءَ تئی یات کیت چمّانی آرس گُلگُل بنت ، آ ساھتاں کمار جان ما بے آٹیگ بہ ایں ءُ چہ ھستاں ھلاس بہ ایں تو مدام مئے گوم ءَ کند اِت ءُ مزاک کُتگ مئے روچ پہ وشی گْوستگ ءُ شُتگ اَنت تو آ روچاں نیتکّگ ئے مارا بے تو ھچ وش نیتکگ دمان ءَ ما اتکگیں تئی لوگ ءَ ترا توار کُتگ بیا رویں سلیم ءِ لوگ ءَ جنگو ءُ نعیم ھمود ءَ اَنت لیب کن اِیں ٹائم پاس بیت-

ھمے اڑے گپ گِند ئے ترا یات بیت تو ھر وھد ءَ آتک ئے گْوشت سلیم پُل اما جان ءَ بگش مرچی تئی چُک نان ءَ تئی مھمان اَنت بلے شیر ءُ روگن بہ دے وتی چُکاناں ، ماتی ءَ مدام مارا آ وھداں شیر ءُ روگن دات ما سک گل بوت ایں نوں مارا پہ شیر ءَ روگن ءَ سک زھیر کنت نوں ما ماتی ءَ چہ سک دِیریں تو ءُ سلیم پُل نمیران بوت ایں پہ وتن ما انگت ءَ اے کاروان راھی ئیں جھد کارے آں ۔

ترا یاد بیت تو یکروچے چہ ھلک ءَ اَتک ئے ترا پہ من چیزے گون اَت تو گوں بچکندگیں لُنٹاں گشت کامریڈ من ءَ پرتو ٹھیکی یے گون اِنت؟ من گُشت بگوش باریں ترا چے گوں اِنت تو گشت تو ھر وھد ءَ کامریڈ ءَ چہ تلب کُتگ من گشت من ھر وھد ھمے سُوپاری ءُ دگہ چی تلب کُتگ تو کند اِت ءُ گشت ھھھھھھھ تو زانگ لوٹ ئے من پہ ترا چے آؤرتگ من گُشت ھو تو گْوشت من پہ ترا نگینہ سوپاری دو ڈبہ آؤرتگ من سک گل بوتاں ، تو ھپتگے ءَ پد شُت ئے من گشت زوت بیا من ءُ تو تر ءُ تاب ءَ رو ایں تو گشت ھو کربان آں الم کایاں بلے منی آیگ نہ بوت ۔ تو وت پد ءَ اتک ئے چہ ھلک ءَ ترا پہ من سوپاڑی گون اَت اُپ من ءَ مرچی تو باز گیر پیداک ئے من اے وھد ءَ سک مُلور آں چے ءَ کہ تو چو اِشتاپی کُت چے ءَ چو مارا تھنا یل کت نوں من زاناں تو بیھال ئے آتک نہ کن ئے بلکیں ترا زھیر بہ کنت پہ جاھو ءَ نمیران اَلی جان ءِ میتگ ءَ تلار جان بھیٹک ءَ پہ وتی پکری ءُ نظریاتی سنگتاں گیشتر ترا مات ءِ گم پِر اَت مارا تو باز سوج ءُ سر کُت ما بس پہ تئی بچکندگاں مُرادی اَتیں جاھو ءِ ڈُوک ءُ ڈَل نوں پہ ترا زھیروار اَنت ما گیشتر زھیر واریں مارا باز مھر داتگ تو ، تئی مھر ءِ شیرکنیں لِزّت مئے تُن ءَ نی نہ پُروش انت تو مارا یل دات ءُ پہ ابدی جاہ ءَ شُت ئے وتی گُڈی ھنکین ءَ اللہ پاک ترا بھشت ءَ نسیت بہ کنت تو مارا چہ بیھال مہ بُو برے برے مئے وابانی تہ ءَ بیا ما ترا گند ایں تو ھست ءُ ھیات ئے نمیران ئے دائمی پُل جان تئی ھمسپریں نابود شاھنواز نشتگ مدام تئی ءُ نمیران ھمبلانی یات ءَ کپ اِت۔۔
اڑے کمار جان بس منی سلاماں اُستاد اَلی جان ءُ ناکو ھیر بکش ءُ شاھباز ءَ بہ دے گوں شمئے درستیں نمیرانیں ھمبلانی جاہ بھشت ءَ بات ءُ شمے جھد ءِ کاروان انگت ءَ پہ منزل ءَ راھی اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نیشنل ڈیموکریٹک پاٹی ءِ جارکش ءَ وتی شنگ کرتگیں یک درشانے ءَ گُشتگ کہ گوستگیں یک ماھے ءَ چہ جھالاوان، مکران ءُ لورالائی میڈیکل کالجز ءِ نوودربر پی ایم سی ءِ نیمگ ءَ ناگتی جار ءَ یک گیر آئینی ءُ گیر کانونی ھاسیں چکاس ءِ ھلاپ ءَ اے کھریں سارتی ءَ شال ءِ پریس کلب ءِ دیم ءَ بنجل اش جتگ ءُ نشتگ اَنت، بلے بژن ءِ گپ ایش اِنت اُستانی سرکار ءُ جانسلامتی ءِ واکدار بے تھمبلی ءِ چیر ءَ نشتگ اَنت داں انگت ءَ نودربرانی جیڑھانی گیش ءُ گیواری ءَ بے سوب بیتگ اَنت-

جارکش ءَ دیمتر ءَ گُشتگ جانسلامتی ءُ کالجز انتزامیہ ءِ وتی نااھلی ءُ ناکامی ءِ چیر دیھ ءِ واستا پی ایم سی ءَ رجسٹریشن ءِ جیڑہ ءِ سر ءَ ھاسیں چکاس ءِ جوڑینگ بیتگ درستیں بوج نودربرانی سر ءَ لڈگ بیتگ چُش اے وڑ ءَ نودربرانی سر ءَ زُلم ءُ ناانساپی یے – البت جانسلامتی ءِ واکدار ءُ کالجز انتزامیہ ءَ لوٹ ایت کہ آ پی ایم سی ءِ دراھیں شرتاں سرجم بہ کنت ءُ کالجزاں ھوار نودربرانی رجسٹریشن ءَ بہ کنت -یا دوبت پی ایم سی ءِ رولز ءِ رد ءَ جانسلامتی ءُ کالجز انتزامیہ ءِ جرمانھاں پر بہ کنت-

جارکش ءَ گُشتگ کہ انیگیں سرکار ءَ لوٹ ایت کہ میڈیکل نودربرانی جیڑھاں الکاپی ءَ بہ گیشین ایت نودربرانی گون ءَ گند ءُ نند بہ کنت ءُ آیانی جیڑھاں بہ گیشین ایت دانکہ نودربر ستکی ءَ اے زھرشانی ءَ ھلاس بہ کن اَنت ءُ وتی توجو ءَ وانگ ءِ نیمگ ءَ بہ دے اَنت اگاں اے وڑ بیت گڑا ما سرپد بہ ایں اے دراھیں جیڑھانی زمہ واری جانسلامتی ءُ سرکار ءِ سر ءَ بیت اِنت اگاں کجام نودربر ءِ وانگ ءِ سر ءَ اسر کپت گڑا اشی ءِ زمہ تچکی ءَ ریاست ءُ جانسلامتی ءُ اُستانی سرکار ءِ سر ءَ لڈگ بیت اِنت –

بلوچستان ءِ بنجاھی شھر شال ءَ گیس لیکیج سوب ءَ تراک ءِ تہءَ دو زھگ ءُ دو جنین آدماں ھوار شش مردم ٹپیگ بیتگ اَنت۔

رکینگی کارمندانی ردءَ شال ءَ سریاب دگ ءِ ھند غفور ٹاؤن ءَ لوگے ءَ گیس لیکیج ءِ سوب ءَ تراک بیتگ۔

تراک ءِ سوب ءَ ٹپی بیتگیں ءُ ستکگیں زھگ ءُ زالبول زیت بولان میڈیکل کمپلیکس ھسپتال ءِ برن وارڈ ءَ برگ بیتگ اَنت۔

زانگ بہ بیت کہ گوستگیں روچاں ھم شال ءِ ھند بلیلی ءَ یک لوگے ءَ گیس لیکیج ءِ سوب ءَ تراک بیتگ اَت کہ آئی سوب ءَ لوگے چھت کپتگ اَت۔ تراک ءَ لوگے 5 مردم ھم ستکگ ءُ ٹپی بیتگ اِت اِنت۔

سیو اسٹوڈنٹس فیوچر ءِ جارکش ءَ وتی شنگ کُتگیں درشان ءِ تہءَ گُشتگ کہ بلوچستان ءَ میڈیکل نودربراں چہ ھاسیں چکاس زیرگ یک زوراکیں گامگیج اِنت۔

زانگ بہ بیت کہ ھمے زیر ءَ پی ایم سی ءِ نیمگ ءَ شنگ کُتگیں پالیسی ءِ تہءَ گُشگ بیتگ اَت کہ بلوچستان ءِ سئے میڈیکل کالج جھالاوان میڈیکل کالج خضدار، مکران میڈیکل کالج تربت ءُ لورالائی میڈیکل کالج ءِ نودربراں چہ یک ھاسیں چکاس ءِ زیرگ بیت اِنت ءُ سوبمند نہ بیگ ءَ فرسٹ ءَ داں تھرڈ ائیر ءِ نودربرانی ڈگری کینسل کنگ بیت۔

درشان ءِ تہءَ گُشگ بیتگ کہ اے گامگیج نودربراں ھوار آیانی کھول سرءَ ھم ردیں سان یل کنت، اے میڈیکل کالجاں وانوکیں نودربر ایم ڈی کیٹ چکاس ءَ پاس کنگ ءَ پد میرٹ ءِ ھساب ءَ گچین کنگ بیتگ اَنت نی کہ نودربر وانگ ءَ ھاسیں چکاس آیانی نصابی وانگ ءِ تہءَ اوشت آرگ ءِ سوب بیت۔

گیشتر گُشگ بیتگ کہ بلوچستان ءَ پیسر ءَ جانسلامتی ءِ نظام نہ بیگ ءِ ھساب ءَ اِنت، پی ایم سی ءَ لوٹیت کہ آ بلوچستان ءَ گیشتر میڈیکل کالج اڈ بہ دنت ءُ جانسلامتی ءَ شر کنگ ءِ جھد بہ کنت نہ پیش ءَ چہ میڈیکل کالجاں وانوکیں نودربرانی ھاترءَ گیشتر جیڑہ ودی بہ کنت۔

سیو اسٹوڈنٹس فیوچر ءِ جارکش ءَ گشتگ کہ مئے گل پی ایم سی ءِ اے پالیسی ءَ متعصبانہ سرپد ھیت، ھمک روچی ردءَ بلوچ نودربراں جتاھیں جیڑھانی تہءَ مانگشینگ زانشتی دشمنی ءِ سر ءَ کار بند بیوکیں پندل اِنت بلوچ نودربراں مدام چُشیں پندل بے سوب کُتگ اَنت ءُ دیما ھم کن اَنت اِش۔

تحریک طالبان پاکستان ءَ گوستگیں روچاں پاکستانی پوج ءِ جارکش آئی ایس پی آر ءِ نیمگ ءَ کُتگیں پریس کانفرنس ءَ ٹی ٹی پی ءِ درگت ءَ داتگیں درشان ءِ سر ءَ وتی لیکہ اِیر کنان ءَ گُشتگ کہ ٹی ٹی پی یکجاہ اِنت وھدیکہ پاکستانی پوج ءِ جارکش گپ ءُ تران ءُ ٹی ٹی پی ءِ تھی جیڑھانی درگتءَ دروگ بندگ ءَ اِنت۔

جارکیش محمد خراسانی ءَ وتی شنگ کُتگیں درشان ءِ تہءَ گُشتگ کہ گوستگیں روچاں ترسوکیں پوج ءِ جارکش ءَ یک پریس کانفرنس ءِ نیام ءَ دروگ ءُ ڈُنگ ءِ کھنیں عادت کارمرز کتگ ءُ یک رندے پدءَ جنگ ءِ پِڑ ءَ مایوسی ءَ پد دروگ بستگ ءُ لس مھلوک ءِ چماں ریک مان کُتگ۔

پریس کانفرنس ءِ نیام ءَ آئی ءَ ٹاہ داتگ کہ تحریک طالبان پاکستان ءِ تہءَ دگری است اَنت، شمارءَ زانگ لوٹیت کہ ھدا ءِ شگر ءَ چہ تحریک طالبان پاکستان ءَ ترندیں عھدی ءَ چہ دراتکگ ءُ گیشتر مھکم ءُ یکجاہ بیتگ اِشی زانگ جنگ ءِ پیڑ ءَ مئے دژمنانی کوکاراں چہ جنگ بیت کنت، پمیشکہ چُشیں ٹاھانی سرءَ باور کنگ مہ بیت۔

محمد خراسانی ءَ گُشتگ کہ پوج ءِ جارکش ءَ گُشیت کہ تحریک طالبان پاکستان نی مزنیں اُرش کُت نہ کنت رسانکدرانی ھما شنگ بیتگیں رپورٹ کہ آودہ مئے سرجمیں سال ءِ اُرشانی کساسانی درگت ءَ گُشگ بیتگ، شما گمان کُت کنے کہ ما گوستگیں یک سال یے تہءَ ما کج ءَ ءُ مئے دژمن کج ءَ بیتگ۔

پوج ءِ جارکش ءَ لس مھلوک ءُ اھوالکارانی دیما نومبر ءَ بیوکیں گپ ءُ ترانانی ءُ جنگ بندی ءِ درگت دروگ بندی کُتگ ءُ راستی ءِ چیر دیگ ءِ جھد کُتگ، بلے آئی دیما نشتگیں گیشتریں مردم چہ راستی ءَ آشنا بیتگ اَنت کہ اَے لگوریں پوج یک برے پدا دروگ، مکر ءُ قولانی پروشگے گوستاک نوک کُتگ۔

تحریک طالبان پاکستان ءَ وتی درشان ءِ گُڈ سرءَ گُشتگ کہ ما پاکستانی مھلوک ءِ سر ءَ یک برے پدءَ اے گپ ءَ پدر کنگ لوٹیں کہ ما جنگ ءُ گپ ءُ تران دوھینانی ھاترءَ جاڑیگ اِنت، مئے جنگی ءُ سیاسی تاگت چہ پیش ءَ ودیتگ ءُ ما کدی ھم دژمن ءِ دروگ بندیانی ءُ پُرشت ءُ پروش ودی کنوکیں درشاناں چہ پروش ءِ آماچ نہ بئیں۔

بلوچ اسٹوڈنٹس آرگنائزیشن پجار ءِ بنجاھی جارکش ءَ وری شنگ کرتگیں درشانی ءَ گُشتگ کہ یونیورسٹی انتزامیہ ءُ نام گپتیں اسٹیک ھولڈرز ءِ نادلگوشیں وڑ ءُ پیم ءِ سر ءَ ایراد گران ءَ گُشتگ بیگواھیں مردمانی جیڑہ گوست ءِ رویشی تپلانی سھڑینگ ءُ کراٹگانی سر ءَ بندوک اِنت نودربرانی بے چینی ءَ گیش کنگ اِنت –

آئی ءَ گُشتگ کہ زانت ءِ واجھیں بلوچ نودربر بنداتی روچ ءَ اے گپ ءَ سرپد بیتگ اَنت ھما مردم جمھوری زھرشانی ءَ پادانی چیر سرپد بنت مسامی لگتمالی ھمایانی بُنچگ ءَ گون اِنت – بلے پُر ایمن ءُ جمھوری جد ءُ جھد ءِ روادار بیگ ءِ سر ءَ ما آیاں ھرچ تکاں وھد دیگ ءَ ایں بیت کنت روچے نا روچے ءَ آیانی اندر ءِ وپتگیں واب بست کنت ھرچ رنگیں سنچداری ءُ دودمانی ریشگاِ وتی بنکی سرپد بہ ایں-

جارکش ءَ گُشتگ گوادر ءِ نندانک ءِ آسر ھاکماناں دلگوش کتگ ءُ گُشتگ کرتگیں کول ءُ ریکوڈک ءِ جیڑہ ءِ سر ءَ مسام بندی کنگ ءُ وابیں چماں نادلگوش دیگ یک جھلانکیں بژنیگے ءِ مھلوک ءِ زھرشانیانی دیم ءَ پروش وارتگیں ھاکمانی وش کنگ ءِ کول بس یک سیاسی پینتربازی ءِ رنگ ءَ کارمرز بیگ اِنت اشی ءَ ھمینکس ایر بہ جن ئے کم اِنت-

گیش جارکش ءَ گشتگ کہ نودربر الائنس ءَ ھواریں یک بھرے ءِ باسکاں بے کردانی دست ءَ دیگ ءِ سر ءَ گُشتگ اے سنگتاں الائنس ءِ بے کساسیں جد ءُ جھد ءِ ھلاپ ءَ سلطانی گواہ بیوکہں پوزیشن ءَ وتی کتگ ھزارانی جوانیں نودربر دلپروش کرتگ اَنت یک نودبرے شاھان شاھان نہ اِنت بلے شاہ ءَ چہ گیش شاہ ءِ وپادار بیگ ءِ جھد ءَ نودربر بگیر داروکیں تاکتانی دربار ءَ سر جھل بہ اَنت نودربر الائنس ءِ ھلاپ ءَ کارمرز بنت – اشی ءَ گیش بژنی گپ ایش اِنت باروگُش داروکیں نودربراں بھرانکی زمہ واراں اے جیڑہ ءِ سرجم ءَ بے تواری ءِ وتی نیمگ ءَ کتگ ما نودربر گل ءِ چیردستی ءَ اے لوٹ کنگ ءِ ھک ءِ پھریز ءِ واک ءَ داریں – آ اے جیڑہ ءِ سر ءَ وتی پوزیشن ءِ راست بہ کنگ دانکہ اتھاد ءِ سست ءُ سیدی ءِ گمان ھلاس بہ بیت اِنت –

سندھ ءِ مزن شھر کراچی ءَ وائس فار بلوچ مسنگ پرسنز ءِ زھرشانی ءَ مروچی چار ھزار ءُ پنچ سد ءُ چل ءُ ھشت روچ سرجم بیتگ – جماعت اسلامی ءِ اُستانی جنرل سیکرٹری ءُ بلوچستان ھک دو تھریک ءِ رھشون مولانا ھدایت الرھمان ءَ بنجل ءِ تر ءُ تاب کرتگ ءُ کھولانی گون ءَ پدردی درشان اِتگ-

اے وھد ءَ مولانا ھدایت الرھمان ءَ گُشتگ ترندیں نگاھانی ءُ تڑپوک گوں ترندی ءَ دیم ءَ نند ایت گڑا آئی ءَ ھچ سرپدی نہ بیت واتری ءِ ودار دروازگ ءِ دپ ءُ چاروک بنت آئی ءَ گُشتگ انی شک ءِ نھال وتی ترندیں واب ءِ وپاداری ءِ پھک دامنی ءِ سر ءَ بے وپائی ءِ پولینگی بندات کرتگ –

وی بی ایم پی ءِ رھشون ماما قدیر بلوچ ءَ گُشتگ درست ابید ءِ ارزی گرزی ءَ دزگیر کنگ بنت بازیں ماھاں ترندیں زندانیانی تہ ءَ لَٹ ءُ کُٹانی نشانگ کنگ بنت ءُ گدار گوشگ بنت ءُ پد ءَ آیانی لاش ویرانگ ءُ جنگلاں رسترانی دپار کنگ ءُ دور دیگ بنت –

ھمے وڑ ءَ ھمے سال ءِ دو جنوری ءُ نیچاری دگ شال ءَ بیگواہ کنگ بیتگیں نعمت اللہ نیچاری ءِ برات ءُ پت وائس فار بلوچ مسنگ پرسنز ءِ سرکماش نصر اللہ بلوچ ءِ گون ءَ شال ءَ دوچار کپتگ اَنت ءُ نعمت اللہ بلوچ ءِ زورانسری آوار جنی ءِ درگت ءَ سرپدی ءِ داتگ –

نصر اللہ بلوچ ءَ آیاناں باورکنائینتگ ءُ گل رھمت اللہ ءِ کیس ءَ اُستانی ءُ بنجاھی سرکار ءُ کمیشن ءِ گور ءَ سر کنت ءُ سلامتی ءَ یلو کنگ ءِ واستا ھمک تک ءَ توار چست کنت – نصراللہ بلوچ ءَ گُشتگ آیانی گند ءُ نند اُستانی میشر داخلہ میر ضیاء لانگو ءَ بیتگ مشیر داخلہ ءَ آیاں بیگواھیں مردمانی یل کنگ ءُ آوار جنی ءِ گر ءُ دار کنگ ءِ سدکی داتگ اَنت –

بلوچستان ءِ دمگ کیچ ءَ سلاہ بندیں مردماں پوجی چوکی ءِ سر ءَ اُرش کتگ-

اُرش کیچ ءِ دمگ زامران نرم سابونی ءَ بیتگ کہ اود ءَ پوجی چوکی سلاہ بندیں مردماں چوکی ءِ سر ءَ اُرش کرتگ-

ھالانی رد ءَ اے اُرش ءَ پوج ءَ را تاوانانی دیمپانی کنگ کپتگ بلے داں انگت ءَ اشی ءِ راستی نہ بیتگ –

اے دمگاں پوج ءِ سر ءَ اُرش یکشل ءَ بیگ ءَ اَنت کہ اے اُرشانی زمہ واریاں بلوچ سلاہ بند منگ ءَ اَنت بلے داں انگت ءَ اے اُرش ءِ زمہ واری کس ءَ نہ زرتگ-

بلوچ آجوئی لوٹوکیں سلاہ بندیں گل یونائیٹڈ بلوچ آرمی ءِ جارکش مزار بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں مروچی باپاری شھر ھب چوکی ءَ ساکران دگ ءِ سر ءَ زورگیریں پوج پیرا ملٹری ءِ گاڑی تراک ناکیں شوروانی نشانگ جوڑ کتگ –

جارکش ءَ گوشتگ کہ اُرش ءِ زد ءَ اتکگیں زورگیریں پوج ءِ گاڑی سرجمی ءَ تباہ بوتگ ءُ گاڑی ءَ سواریں سَے کارمند ھما دمان ءَ مُرتگ انت وھدیکہ سَے کارمند زدگ بوتگ انت – زدگ بوتگیں کارمند پہ الاج ءِ ھاتر ءَ کراچی ءَ دیم دیگ بوتگ انت-

جارکش ءَ گوشتگ کہ یونائیٹڈ بلوچ آرمی کول کنت کہ بلوچستان ءِ آجوئی ءَ تاں زورگیریں دژمن ءِ سر ءَ مئے اُرش برجاہ مان انت –