TBP Balochi

بلوچستان ءِ دمگ کیچ ءَ پاکستانی پوج ءَ یک مردمے آوار جتگ ءُ بیگواہ کتگ-

گیشیں ھالانی رِد ءَ کیچ ءِ دمگ مند ءِ ھند کوہ پُشت ءَ پاکستانی پوج ءَ دوشی شپ ءِ ساھت دہ ءَ یک لوگے ءَ بیڑبرتگ ءُ یک مردمے آوار جتگ ءُ گوں وت برتگ-

آوار جنگ بوتگیں مردم ءِ پجّار عثمان ء لیاقت جھمنند کوہ پُشت نام ءَ چہ بوتگ-

آوار جنگ بوتگیں مردم ءِ کھول رِد ءَ پاکستانی پوج ءَ بیڑبرگ ءِ وھد ءَ پت وھدے کہ وتی چُک ءِ گر ءُ دار ءِ ھاتر ءَ دیم ءَ درتکگ گُڑا لشکر ءِ کارندھاں پت تُپنگ کُنداک جتگ ٹپی کتگ ھمے وھد ءَ لیاکت ءِ دگہ یک چُکے ھم آوار جتگ ءُ کمو رند آ لوگ دپ ءَ یل کتگ-

زانگ بہ بیت بلوچستان ءَ زورانسری آوار جنی ءِ دْرچ یکشل ءَ برجاہ ءَ اَنت-

بلوچستان ءَ سال دوھزار ءُ بیست ءُ یک ءَ یک سد ءُ بیست ءُ نُھ ناوشیں وئیل پیش اتکگ اَنت چریشاں ھپتاد ءُ ھشت مردم کُشگ بیتگ اَنت ءُ اشانی تہ ءَ پنجاہ ءُ ھپت زالبول ءُ بیست ءُ یک مردین ھوار اَنت –

سال دوھزار ءُ بیست ءَ گیرت ءِ نام ءَ کوشانی چل ءُ نُھ وئیلاں سِی زالبول کُشگ بیتگ اَنت-

“زالبول فاؤنڈیشن ” ءَ زالبولانی کوش ءِ درگت ءَ سالگشت ءِ رد ءَ بلوچستان ءَ آوارجنی ءِ ھشت وئیل، کوشی بیست ءُ نُھ، لوگی جیڑھاں بیست ءُ ھشت، وتکشی ءِ دو، گیرت ءِ نام ءَ چِل ءُ نُھ، زوراکی ءُ ھرابکاری ءِ پنچ، ترسینگ ءِ ھشت وئیل رپورٹ بیتگ اَنت چریشاں درستاں گیشتر سِی ءُ سَے وئیل شال، سِی وئیل نسیر آباد، یازدہ مستونگ ءَ رپورٹ بیتگ اَنت –

سال دوھزار ءُ بیست ءُ یک ءَ لوگی جیڑگانی وئیلاں ھپتاد ءُ ھشت مردم کُشگ بیتگ اَنت چریشانی تہ ءَ پنجاہ ءُ ھپت زالبول ءُ بیست ءُ یک مردین ھوار اَنت سِی زالبول گیرت ءِ نام ءِ سر ءَ کُشگ بیتگ اَنگ اشاں چکانی سر ءَ زوراکی ءِ دو وئیل شال ءُ ژوب ءَ رپورٹ بیتگ اَنت-

زالبول فاؤنڈیشن ءِ رد ءَ زالبولانی سر ءَ زوراکی شال ءَ سِی ءُ سَے وئیل، بارکھان ءَ دو، جعفر آباد ءَ ھپت، نسیر آباد ءَ سِی، پشین، پنجگور،کوھلو ءَ یک یکے، ژوب ءَ شش، ھاران ءَ یکے، ھزدار ءَ شش، قلعہ عبداللہ، سبی، کلات، نوشکی، چاغی، قلعہ سیف اللہ ءَ دو دو، مستونگ ءَ یازدہ، لسبیلہ ءَ نُھ، ڈیرہ بگٹی، ھرنائی ءُ کیچ ءَ سَے سَے وئیل رپورٹ بیتگ اَنگ ھمے بلوچستان ءِ دگہ دو جاگھاں جھل مگسی ءأ لورالائی ءَ ھچ کیس رپورٹ نہ بیتگ اَنت-

کاؤنٹر ٹیررزم ڈپارٹمنٹ ءَ شال ءِ رودراتکی شھدگ ءَ انٹیلجنس بیسڈ آپریشن ءِ بیڑ ءِ وھد ءَ ناشرکاریں گل ءَ چہ سیادی داروکیں شش مردمانی کوش ءِ ٹاہ داتگ-

سی ٹی ڈی ءِ جارکش ءِ رد ءَ رودراتکی شھدگ ءَ سی ٹی ڈی ءِ نیمگ ءَ انٹیلیجنس بیسڈ آپریشن ءَ داعش ءِ کماندار مھمد اصغر ءَ ھوار شش سلاہ بند کشتگ اَنت ءُ سلاہ بندیں مردمانی سیادی ناشرکاریں گل داعش ءَ اِنت –

سی ٹی ڈی ءِ رد ءَ مھمد اصغر ءِ سر ءِ نھاد بیست لَک ایر بیتگ –

سی ٹی ڈی ءِ رد ءَ ناشرکارانی گور ءَ بازیں کچے ءَ سلاہ ءُ تراکناکیں شورو دزکپتگ اَنت-

زانگ بہ بیت گوست ءَ ھم سی ٹی ڈی ءَ بازیں بیڑانی دیم پہ دیمی جنگ دروگ گوشگ بیتگ اَنت – رسانکدراں ءُ دگہ پھناتاں دروگیں دیم پہ دیمی میڑانی راستی پدر بیتگ اَنت کہ چریشانی تہ ءَ پیسر ءَ گرگ بیتگیں بیگواھیں بلوچ ءُ نیکراھی گلاں گوں بندوکیں مردم بیتگ اَنت –

بلوچستان ءِ دمگ لسبیلہ ءِ بنجاہ اُوتھل ءَ لمز یونیورسٹی ءَ ھمے ھپتگ ءَ پنچ شمبے ءِ روچ ءَ سالانہ مراگش ءِ اڑ دیگ بوتگ ات – ھما مراگش ءَ بلوچی دوچاپی ناچ ءِ تامر ءِ چاگردی ترامجاھاں شنگ بوتگ کہ آئی ءَ چہ پد باوست ءِ چست بوتگ کہ جنکیں نودرانی وتی نودربرانی ھمراھی ناچ پہ بلوچ دود ءُ ربیدگ ءِ بگیری اِنت یا دود ءُ ربیدگ ءِ شری اِنت –

تامر ءِ شنگ بوگ ءِ سبب ءَ ھمے بوتگ کہ جنکیں بلوچ نودربر وتی ھمراھیں نودرانی ھمراھی ءَ دو چاپی انت – ھر تک ءُ پھناتاں سیادی داروکیں مردماں تامر شنگ کُتگ لھتے ایر جتگ ءُ لھتے ءَ پلامرزی ءَ وتی ھیال درشان اتگ انت –

ھمے درگت ءَ دی بلوچستان پوسٹ ءِ اھوالکار ءَ گوں اُوتھل یونیورسٹی ءِ نودربر شمیم بلوچ ءَ گوں ھال کتگ آئی ءِ گوشگ ات کہ اے تامر یونیورسٹی سالانہ مراگش ءِ انت کہ یونیورسٹی ءِ واکدار ءُ یک پرائیویٹ بینکے ءِ نیمگ ءَ چہ برجم دارگ بوتگ –

آئی ءِ رِد ءَ اے مراگش ءَ زانشتی، لبزانکی ءُ جتا جتائیں راجانی دود ءُ ربیدگی پیشدارگ بیت اِنت ھمے وڑ بلوچ نودربراں دود ءُ ربیدگی ناچ دو چاپی کُتگ ءُ پیش داشتگ –

چاگردی ترامجاھاں یک نیمگے بازیں مردم اشی ءَ بلوچ کلچر ءِ بگیری امل ءِ گوشگ انت آھانی گوشگ انت کہ زالبولانی دوچاپی ءُ ناچ بلوچ دود ءُ ربیدگ ءِ بھر نہ انت ھمود ءَ دگہ تک ءُ پھناتاں سیادی داروکیں مردم اشی ءَ جوانیں املے گوشگ انت ءُ بلوچ دود ءِ ربیدگ ءِ برزانکی ءِ املے گوشگ انت وھدیکہ اھانی تہ ءَ بازین مردم ھمے گوشگ انت کہ اے پیش ءَ چہ بلوچ دود ءِ ربیدگ ءِ بھر بوتگ –

دی بلوچستان پتر ءِ اھوالکار ءَ اے درگت ءَ یورپی ڈیھ جرمنی ءَ نندوکیں کلمکار ءُ پلم ساچ ھنیف شریپ ءَ اے درگت ءَ جست گپت آئی ءِ گوشگ ات کہ دو چاپی بلوچانی راجی ناچ انت ءُ بلوچ تھنا مردین نہ انت بلکیں زالبول ھم ھست انت ھمے وڑ کہ مردین اے ناچ ءَ کن انت گڑا زالبولاں ھم ھک ھست –

ڈاکٹر ھنیپ شریپ ءِ گوشگ ات کہ من وت تربت ءَ آروسانی وھد ءَ بلوچ زالبول دوچاپی کنگ ءَ دیستگ انت ءُ آروس ءِ وھد ءَ بلوچ زالبول دوچاپی کن انت مردین نہ کن انت –

ڈاکٹر ھنیپ ءِ گوشگ ات کہ ناچ ھم بلوچ ربیدگ انت ھر راج ءِ وتی دود ءُ ربیدگ ءَ زیریت اے ھیرانگی گپے نہ انت – بلوچ زالبول ھم ھمے راج ءِ بھر انت اگاں آھاں کسے وتی راج ءَ درکنگ لوٹ ایت دگہ گپ ئِے بلے وھدیکہ منی زھن ءِ تہ ءَ دو چاپی ءِ ھیال کیت گڑا زالبول کائینت ءُ مرچی باند ءَ بلوچ ورناہ ھم دوچاپی کن انت گڑا مار ءَ وشی بیت –

ھمے درگت ءَ درگت ءَ بلوچ اسٹوڈنس آرگنائزیشن ءِ گوستگیں سرکماش ظریف بلوچ ءِ گوشگ انت کہ بلوچ زالبول زھرشانیاں بچکاں چہ دیم بہ بنت پہ آھاں دیوال ءِ دیم ءَ مک بہ بنت گڑا اھانی سر ءَ پھر بندگی انت بلے ھمے زالبول مراگش ءَ وتی جزبگانی درشانی ءَ ناچ ءِ دروشم ءَ بہ کن انت گڑا لھتے مردم گیرت ءُ ربیدگانی ڈھل جنی ءَ شرو کن انت آئی ءِ گوشگ ات کہ اے جنکوانی سر ءَ ما پھر بندیں ھمے مئے باندات انت –

ھمے درگت ءَ بلوچ اھوالکار باہوٹ بلوچ ءَ چاگردی ترامجاہ ٹویٹر ءِ تہ ءَ پہ تژنی گوش ایت کہ بلوچ زالبول مردینانی ھمراھی ءَ زھرشانی کُت کناں بلے ربیدگی ناچ ناں –

بلوچ سوشل میڈیا ایکٹوسٹ فتح جان ءَ ھمے تامر شنگ کرتگ ءُ نبشتگ دود ءُ ربیدگ اوشتوکیں یا سارتوکیں املے ءِ نام نہ انت –

دومی نیمگ ءَ بازیں مردماں اے دود ءُ ربیدگ ءِ بگیری ءِ دارگ ءِ املے گوشتگ ترندیں لھجہ ءَ گوں تنکید کتگ –

بلوچ وومن فورم ءِ آرگنائزر زین گل ءَ دی بلوچستان پوسٹ ءِ پتر ءَ گوں تران کنان ءَ آئی ءِ گوشگ ات کہ چاگرد ءِ دیمروئی گوں انسانانی برابری ءَ گوں بندوک انت بلوچ گوستانک ءَ زالبول ءِ مقدس ءِ جاھے، سیمک، بانڑی، گل بی بی، بلوچ زالبول جنگانی تہ ءَ ھم راج ءَ گوں ھمگام بوتگ انت مروچیگیں پڑ ءَ جنکانی وتی براتانی ھمراھی ءَ وتی دودربیدگی چاپ ءَ اے اے وتمانکی دود ، مزھبی تنگ نزری ءُ دم توسیں چاگرد مرگ ءَ سر کتگ ھمشاں چاگرد ءِ دیمروئی ءَ زالبول مدامی دور داشتگ انت –

آئی ءِ گوشگ ات بلوچ وومن فورم (سمو راج) اے بلوچاں دروت ندر کنت کہ آھاں وتی اے امل ءَ ھمے پیام داتگ کہ بلوچ چاگرد ءِ وتی سنچداری ءُ راجی رھبند انت کہ مردین ءُ زالبول ناکہ برابر انت بلکیں سنچداری انت –

ھمے درگت ءَ صائمہ بلوچ ءَ دی بلوچستان پتر ءِ تہ ءَ وتی ھیال درشان کُت ءُ گوشت کہ من این ڈی پی ءِ بنجاھی آرگنائزررنگ کمیٹی ءِ باسک ءُ بلوچ سیکولر زالبول اوتھل یونیورسٹی ءَ انی بوتگیں جنک ءُ بچکانی بلوچی دو چاپی ءِ جوانی ءَ پھماں پرچاکہ بلوچ بازیں دھکاں چہ سیکولر انت ءُ اے لیزگکاری ءِ ھم نہ انت جنگ چاپ ءِ تہ ءَ وتی سرجمی ءَ بلوچی پوشاک ءِ تہ ءَ انت بزاں سرجمی ءَ پردگ انت ءُ آھانی میان ھالیگ انت –

صائمہ بلوچ ءِ گوشگ انت کہ مارا اے گپ زانگی انت زانشجاھاں جنک ءُ بچکین نودربر یکجاہ انت، راجداری درگت ءَ ھم یکجاہ انت، زھرشانی ءَ ھم ھوار انت زانشتی ھوالہ ءَ یکجاھی ءَ وان انت گڑا یکجاھی ءَ دوچاپی چیا کُرت نہ کن اَنت ؟ وھدیکہ پد ءَ چاپ درسانی دیم ءَ بوگ انت منی ھیالاں اشی ءِ تہ ءَ ھچ ھرابی نیست بلے ھو ھرکس ءَ ردیں سوچ ءِ وتی تہ ءَ داشتگ آئی ءَ ردیں نگاھاں گوں چار ایت منی نز ءَ اشی ءِ تہ ءَ ھچ ھرابی نیست –

دی بلوچستان پتر ءَ سربوتگیں ھالانی رِد ءَ بلوچستان ءِ دمگ چہ بارکھان ءَ سیادی داروکیں ڈاکٹر سندھ ءِ دمگ لاڑکانہ ءَ چہ بیگواہ کنگ بوتگ –

اے درگت ءَ بارکھان ویلفئیر کمیٹی ءَ وتی شنگ کرتگیں درشان ءِ تہ ءَ گوشتگ سندھ ءِ دمگ لاڑکانہ کشمور ءَ پرائیوٹ نادراہ جاہ ءِ چلائینوک ڈاکٹر غلام حسین سَے روچ پیسر بیگواہ بوتگ –

چہ سندھ ءَ بیگواھیں ڈاکٹر ءِ بیگواھی ءِ درگت ءَ بارکھان ویلفئیر سوسائٹی ءِ جارکش ءَ وتی درشان ءِ تہ ءَ گوشتگ کہ ڈاکٹر غلام حسین کشمور ءَ وتی کلینک ءِ چلائینگ ءَ بوتگ آ گِس گِس ءَ شُتگ مردمانی دلوتانی الاج کتگ ءُ آ چہ بزگریں کھول ءَ چہ سیادی داریت ءُ بارکھان ویلفئیر سوسائٹی ءِ باسکے –

جارکش ءَ گوشتگ کہ ڈاکٹر غلام حسین ءَ وتی کھول ءِ یکیں کمائینوک انت ءُ وتی دمگ ءِ ورنایانی وانگ ءُ زانگ ءِ درگت ھم بازیں جھدے کتگ اَنت –

آئی ءَ گوشتگ ما چہ بلوچستان ءِ سرکار ءُ بارکھان ءِ دمگی واکداراں چہ لوٹ کنیں کہ اے جیڑہ ءَ سنجیدگی ءَ بہ زور انت ءُ زوت ءَ زوت غلام حسین ءَ وش سلامتی یل بہ کنائین انت –

دی بلوچستان پتر ءَ سربوتگیں ھالانی بلوچستان ءِ دمگ ژوب ءُ بنجاھی شھر شال ءَ دو مردمانی جون دست کپتگ اَنت –

اولی جون گوستگیں روچ ءَ ژوب گنج میتگ ءَ دست کپتگ کہ سرکاری کارمند ءِ ئیگ اِنت وھدیکہ یک دگہ جونے شال مستونگ دگ ءِ سر ءَ دمگی واکداراں دست کپتگ آھاں جون نادراھجاہ ءَ سر کتگ –

پولیس ءِ رِد ءَ ژوب گنج میتگ ءَ دست کپتگیں جون ھالیگیں گِسے ءِ تہ ءَ دست کپتگ آ پولیس کارمند ئِے بوتگ ءُ آئی ءَ دو روچ انت کہ بیگواہ بوتگ –

ھردو وئیلانی گیشترین ھال رسانکدراں شنگ کنگ نہ بوتگ انت وھدیکہ ژوب ءَ اے چیزے روچانی تہ ءَ پنچمی جون انت اشی ءَ پیش ژوب ءَ یک ھونڈے ءِ تہ ءَ دمگی مردمانی چار جون دست کپتگ اَنت کہ پجار ھم کنگ نہ بوتگ انت –

زانگ بہ بیت اشی ءَ پیش ھم بلوچستان ءِ جتا جتائیں دمگاں جون دست کپتگ انت کہ آھانی پجار کنگ نہ بوتگ ءُ بید پجار ءَ کل کنگ بوتگ انت-

بلوچستان ءِ بازیں دمگاں جونانی دست کپگ ءِ درچ یکشل ءَ برجاہ انت اے جون گیشتر زانگول بوگ ءِ سبب ءَ پجار کنگ نہ بنت وھدیکہ بازیں جونانی پجار بوتگ کہ آ بیگواھیں مردم بوتگ انت –

سر بیتگیں ھالانی رد ءَ بلوچستان ءِ دمگ کیچ ءُ آواران ءَ سلاہ بندیں مردماں پاکستانی پوج ءِ چوکیانی سر ءَ اُرش کرتگ اَنت –

سر بیتگیں اھوالانی تہ ءَ گوشگ بیتگ کیچ ءِ دمگ دشت ءَ نوکیں راہ ءَ سلاہ بندیں مردماں پاکستانی پوج ءِ چوکی ءِ سر ءَ اُرش کرتگ-

دمگی اھوالانی رد ءَ پوج ءَ تاوانانی دیمپانی کنگ کپتگ، بلے تنی وھدی اشی ءِ راستی نہ بیتگ –

ھمے وڑ ءَ آواران ءِ دمگ جھاؤ کوھڑو ءَ پاکستانی پوج ءِ بنجل ءِ سر ءَ سلاہ بندیں مردماں اُرش کرتگ –

دمگی مردمانی رد ءَ اُرشکاراں پوج ءِ سر ءَ راکٹ لانچر ءُ دگہ سلاھاں اُرش کرتگ-

زانگ بہ بیت مروچی بلوچستان ءِ دمگاں اے دومی اُرش اِنت کہ پوج ءِ سر ءَ بیگ ءَ اِنت ءُ پوجی واکدارانی نیمگ ءَ تنی وھدی اے اُرشانی گپ دیم ءَ نیتکگ اَنت ءُ نانکہ سلاہ بندیں گلاں اُرشانی زمہ واری منّ اِتگ اَنت-

بلوچستان ءِ دمگ پنجگور ءَ شھید نواب اکبر خان بگٹی ءِ چار راہ ءِ سر ءَ ایرکنگ بوتگیں نواب بگٹی ءِ بُت برگ بوتگ –

گوستگیں روچ ءَ چاگردی ترامجاھاں اکس ءِ شنگ کنگ بوتگ کہ آئی تہ ءَ گندگ بیت چار راہ ءِ سر ءَ ھستیں ھُشتر ءِ سر ءَ کہ اکبر بُگٹی ءِ بُت بوتگ آ گار اِنت –

اے چار راہ ءَ پنجگور ءَ چتکان ءَ بالی پٹ دگ ءِ سر انت اے دمگ پنجگور ءِ پوش دمگ ءِ زانگ بیت کہ دمگی واکدارانی کارگساں ھوار پولیس ھیڈکواٹر ءُ ایپ سی ھیڈ کواٹر ھم ھست انت –

اے دمگ ءَ اکبر بگٹی ءِ بُت گار بوھگ ءَ مردمانی تہ ءَ تشویش گندگ بیت –

پنجگور ءِ جاھمنند اھوالکار سفر خان بلوچ ءَ چاگردی ترامجاہ ٹویٹر ءَ ھمے چار راہ ءِ اکس شنگ کرتگ نبشتگ کہ کہ پنجگور ءَ شھید نواب اکبر خان بگٹی ءِ چار راہ ءَ نواب بگٹی ءِ بُت بیگواہ کنگ بوتگ – پیسر ءَ زندگیں مردم بیگواہ کنگ بوتگ انت نوں یاتگاری بُت بیگواہ کنگ بوھگ ءَ انت نوں بلوچستان چی گوشگ بہ بیت ؟

بلے تنی وھدی واکدارانی نیمگ ءَ ھچ وڈیں موقف دیم ءَ نہ اتکگ –

نبشتانک: شاھو، ترا 2022 ءِ نوکیں سال مُراد بات

نبشتہ کار: معصومہ شاھین

دی بلوچستان پوسٹ

ھردیں کہ شپ بیت چمانی دیم ءَ تئ بچکندگانی اکس زاھر بیت، مروچگیں سارتی منی جبین ءَ ایر کپان اِنت ءُ منئ روح ءِ تہا تئ یاتاں برپ بستگ ءُ من چو بُت ءَ اُشک آں،منی بانکی مائیں بانڈی شپ ءَ تئی دید ءِ اوشام گونیں کہ منئ واھگانی استی ءَ ساہ کندن ءَ رسینان اِنت ءُ من ءَ بے تاھیر کنان اِنت۔

مرچیں 2022 ءِ دومی روچ اِنت، ھرکس اے سال ءَ وش اَتک کنگ ءَ اِنت کہ بگندے اے سال پہ ھاواں وش ءُ شوکیں سالے بہ بیت، بلے پہ مارا ہرچ سال ءُ روچ چو کربلاہ ءَ گران اَنت، ہر سائت دردچکار اَنت، منی شاھُل من اے ساھت ءَ تئی کار ءِ کوٹی ءَ نِشتگ آں ءُ تئی جوڑ کُتگیں پینٹنگانی گوما گپ کنگ ءَ آں ءُ تئی دوری ءِ گم ءَ موتک آرگ ءَ آں ءُ جیڑگ ءَ آں کہ دریگتیں زندگی کمو پُشتہ بہ کِنزیتینیں ءُ من ترا وتی امباز ءُ بُزرتینیں۔

منی شاھُل! ھر نِدارگ ءِ تہ ءَ تئی شوھاز ءِ کترا منی جبین ءَ ماندارگ ءَ اَنت، منی ھستی ءَ نیستی ءِ تہ ءَ بدل کنان اِنت، شاھو روزرد ءِ وھد ءَ مُدام تئ شوھاز ءِ اوشام من ءَ ابیتک کنت ءُ پد ءَ من انچیں سفرے ءَ گوں تو درکپاں کہ پد ءَ واتر بوھگ پہ من سک گران بیت، ہمے تئی شوھاز ءِ سفرے کہ من ءَ زندگ ئے داشتگ،

منی پُلیں بانڈی، من ءَ پہ تی نازرکیں بچکندگاں زھیر بوھگ ءَ اِنت، زھیر بوھگ ءَ اِنت پہ تی وشیں توار ءَ کہ انگت منی روہ ءِ تہ ءَ کید اِنت، شاھو چہ تو پد مئے زندگی تہاری ءَ مانشانتگ ءُ ما ھمے اُمیت ءَ زندگیں کہ بلکیں تئی کُشندہ دزگیر کنگ بہ بیت ءُ مارا دمے کرار بہ اِت اِنت بلے شاھو تو وَ اے مُلک ءِ ھال ءَ سرپدے کہ اِد ءَ انگت تک کسی کُشندہ دزگیر کنگ ءُ سزا دیگ نہ بوتگ اَنت، بلے ما لاچاراں ھما وھد ءَ تک مارا کرار نئیت اِنت کہ تئی کُشندہ دزگیر کنگ نہ بیت ۔

شاھو، تئی وابانی یک بھرے منی نسیب ءَ کپتگ، تئی گولڈ میڈل ءِ داد من شُت ءُ اسٹیج ءِ سر ءَ چہ دست گِپت، اے ساھت ءَ اللہ زانت کہ من گوں کُجام دردانی دیمپان بوتگاں، شاھو تئی گولڈ میڈل ءِ بار منی نیزوریں بالاد ءَ زُرت نہ کُت، بلے من لاچار اِت آں کہ اے ھم تئی زندگی ءِ وابانی تہ ءَ یک وابے اَت کہ تئی دنیا ءَ چہ رُکست بوگ ءَ پد سرجم بوت، منی شاھُل من بس پہ تئی وابانی سرجم کنگ ءَ زندگ آں۔

شاھو، مرچی سالے ءَ بُرز اِنت کہ ما جُھد کنگ ءَ آں تئی کُشندہ مھراب گچکی پاھو دیگ بہ بیت، بلے منی بانُکیں گُھار پاھو دیگ دورے گپ ئِے آ انگت دزگیر کنگ ھم نہ بوتگ، انگت آزات اِنت ءُ وتی زند ءَ پہ ایمنی گوازینگ ءَ اِنت۔

شاھو بلے تئی کُشندہ ءَ ما ایمن بوگ ءَ نئیلیں، تئی کُشندہ ءَ یک روچے الم ما پاھو ءِ سرکناں، تو زان ئے اے روچ ءَ ما سک گَل باں، اے روچ مئے زندگی ءِ وشتریں ءُ شرتریں روچ بیت کہ تئی کُشندہ دزگیر کنگ ءُ سزا دیگ بہ بیت۔

شاھو ترا 2022 ءِ نوکیں سال مُراد بات تو مئے دلانی تہ ءَ انگت زندگ ئے داں جھان ھست اِنت تو ھست بہ ئے۔ تو نمیران ءِ منی بانُکیں گ

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءَ مال ءُ مڈیانی لُٹ ءُ پُل انگت برجاہ ءَ اَنت کہ آئی ءِ منانک ءَ چائنا ءُ پاکستانی ھکمران وت کنگ ءَ اَنت-

سربوتگیں ھالانی رِد ءَ سیندک کاپر ءُ سُھر پروجیکٹ ءَ چہ گوستگیں سال ءَ 74 ملین ڈالرز ءِ پائدگ چین ءُ پاکستان ءَ کتگ ، اود ءَ چینی کمپنی ایم سی سی ریسورس ڈویلپمنٹ پرائیویٹ لمیٹڈ ( ایم آر ڈی ایل) ھمے سال ءَ پنچ ملین ٹن ءُ کنسنٹریٹ کتگ 16426 ٹن بلسٹر کاپر در کتگ کہ آئی یکجاھی مالیت پنچ لک پنجاہ ھزار ڈالر بوتگ اَنت-

چاغی ءَ چہ مال ءُ مڈیانی مزنیں کچے ءَ لُٹ ءُ پُل ءِ درگت ءَ ایم آر ڈی ایل ءِ چیئرمین ہی زوپنگ ءَ وتی درشان ءِ تہ ءَ گوشتگ-

آئی ءَ گوشتگ کہ اشانی شرکت ءَ پاکستانی ھکومت ءِ کمک ءَ چہ گوستگیں سال ءَ کرونا وبائے گر ءُ دار ءِ ھاتر ءَ 1.98 ملین ڈالر ھرچ کتگ چریشی ءَ چہ 1740 پاکستانی کاردار ءُ دمگی نندوکانی ویکسینیشن کتگ وھدے کہ 800 مردم بوسٹر ڈوز جتگ اَنت-

آیانی رِد ءَ 2020 ءَ کرونا وائرس رکگ ءِ بند ءُ بست ءِ ھاتر ءَ اے وباء ءَ چہ اسرکپتگیان مردمانی کمک ءِ ھاتر ءَ ھکومت پاکستان ءَ 43 ملین ڈالر داتگ اَنت وھدے کہ وت شرکت ءَ یک کروڑ 75 کلدار ءِ ورگ ءُ ورگی تیل3312 لاچاریں کھولاں بھر ءُ بانگ کتگ-

اشانی رِد ءَ ایم آر ڈی ایل 3000 دمگی نندوکیں پروجیکٹ ءَ ھستیں سرکاری ھکومت مپت لین ءُ ساپیں آپ دیگ ءِ ھاتر ھم سال یک لک ڈالر ھرچ کنت وھدے کہ اشی ءِ ابید دمگی مردماں مپت وانگ ءُ سِھت ءِ جوانیں آسراتی ھم دیگ بیت-

آئی ءَ گْوشتگ کہ گوستگیں 19 سالاں آپریشن ءِ وھد ءَ سیندک پروجیکٹ ءَ چہ ھکومت پاکستان ءَ دنیگت ءَ ٹیکس ءُ دگہ ھرچ ءُ پائدگ ءِ 468 ملین ڈالر وھدے کہ پروجیکٹ ءَ چہ 1900 مردم سرروزگار اَنت-

آئی ءَ اے ھیال درشان کتگ گوشتگ کہ پاک چین سنگتی ءِ مسال جوڑ بؤکیں سیندک پروجیکٹ ءِ مھاد ءِ نوکترین ءَ پد دوئیں ڈیھانی دیمروئی وشھالی ءِ سپر برجاہ بیت-

زانگ بہ بیت چاغی ءَ ھستیں دومی مزنیں مڈی ریکوڈک ءِ لُٹ ءُ پُل ءِ درگت ءَ چہ پاکستانی پوج ءُ سیاسی اسٹیبلشمنٹ شور بندی ءَ دلگوش اَنت-