TBP Balochi

سے روچی ئیں بلوچستان گرینڈ ٹورازم فیسٹیول گودار ءَ کنگ ءِ جاہ ءَ پاکستان ءِ بُنجاھی شھر اسلام آباد ءَ برجاہ ءَ اِنت-

فیسٹیول ءِ بندات بلوچستان ءِ سر وزیر سرفراز بگٹی ءَ کتگ، آئی ءَ ٹاہ داتگ کہ سے روچی ئیں گرینڈ ٹورازم فیسٹیول ءَ بلوچستان ءِ دود ءُ ربیدگ ءَ جھان ءِ دیم ءَ پیش دار ایں-

آئی ءَ دیمتر ءَ گوشتگ راجدپتر ءَ اولی رند اِنت وزیر ءِ سیل ءُ سواد، دود ءُ ربیدگ، پی ٹی ڈی سی، دست ھُنر ءَ چہ بلوچستان ءِ دود ءُ ربیدگ ءَ تالان کنگ ءُ آئی ءَ جھان ءِ دیم ءَ پیش کنگ ءِ ھاتر ءَ سے روچی ئیں بلوچستان گرینڈ ٹورازم فیسٹیول کنگ بیگ ءَ اِنت-

زانگ بہ بیت کہ اے فیسٹیول ءِ مول ءُ مراد گوادر ءَ باپاری کنگ ءِ ھاتر ءَ دری ءُ ڈیھی باپاریاں گوادر ءِ نیمگ ءَ آرگ اِنت- بلے پھازوکی ءِ تُرس ءِ سوب ءَ اے فیسٹول گوادر یا کہ بلوچستان ءِ جاگہ ءَ اسلام آباد ءَ کنگ بیگ ءَ اِنت-

زانگ بہ بیت اشی ءَ ساری پھازوکی تُرس ءَ چہ نیو گوادر ءِ انٹرنیشنل ائیرپورٹ ءِ جوڑ بیگ ءِ مراگش ھم گوادر ءِ جاہ ءَ اسلام آباد ءَ اونلائن کنگ بیتگ، اود ءَ پاکستان ءِ سر وزیر شھباز شریف ءُ چین ءِ سر وزیر چیانگ ءَ بھر زرتگ اَت – ءُ تاں انّو گوادر ءَ چہ ھمگرنچیں مراگش اسلام آباد ءَ کنگ بیتگ اَنت-

زانگ بہ بیت کہ گوادر ءَ سیل ءُ سواد، باپاری ءَ تلان کنگ ءِ ھاتر ءَ برجم اے مراگش سی پیک پروجیکٹ ءِ بھر اَنت، سی پیک بلوچ سیاسی ءُ سلاہ بندانی نیمگ ءَ چہ پُلپانچیں شوربندی ءِ نام دیگ بیتگ اَنت کہ ایشی ءِ پشدر ءَ سیاسی پارٹیانی نیمگ ءَ چہ تھی ءُ دری ڈیھاں جتاجتائیں پڑ ءَ زھرشانی کنگ ءُ بلوچ سلاہ بندیں آجوئی لوٹوکانی نیمگ ءَ سی پیک ءُ دگہ شوربندیاں نشانگ کنگ ءَ اَنت-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ سرمچاراں زھری ءَ زورگیریں پاکستانی لشکر ءِ دو کارندہ یک بمب اُرشے ءَ نشانگ کتگ ءُ کشتگ اَنت۔

جارکش ءَ گوشتگ کہ بلوچ لبریشن آرمی ءِ سرمچاراں 6 اکتوبر ءَ نزیک ادار یک ءَ زھری ءَ گزان، کوچو ءِ جاہ ءَ زورگیریں پاکستانی لشکر ءِ بم ڈسپوزل اسکواڈ ءِ پیادگ رؤکیں کارندہ ریموٹ کنٹرول آئی ای ڈی اُرش ءِ نشانگ کتگ اَنت چریشی ءِ آسر ءَ زورگیریں لشکر ءِ دو کارندہ ھما وھد ءَ مُرتگ ءُ دگہ سے ٹپیگ بوتگ انت۔

گڈسر ءَ گوشتگ ئِے کہ بلوچ لبریشن آرمی اے اُرش ءِ زمہ داری ءَ منّ اِیت ۔

بلوچستان ءِ جتاجتائیں دمگاں بروکیں ءُ بلوچستان ءَ پِتروکیں ریل سروس پچ کنگ نہ بیتگ-

گیشیں ھالانی رِد ءَ شال ءَ چہ کراچی ءَ رؤکیں بولان میل ریل گوستگیں بیست روچ ءَ چہ بند اِنت، وھدے کہ شال ءَ چہ پشاور ءَ چہ لاھور ءَ رؤکیں جعفرایکسپریس ءَ ھوار دگہ ریل سروس ھم بلوچستان ءَ پُترگ ءَ داشتگ-

ریل ءِ واکدار رِد ءَ ریل سروس ءِ پھازوکی تُرس ءُ مساپرانی کمی ءِ سوب ءَ بند کنگ بیتگ، واکدار ءَ تچک کتگ کہ نُھ اکتوبر ءَ کراچی ءَ چہ بولان میل ءِ روگی داشتگ ءُ کراچی ءَ ریل نیاگ ءِ سبب شال ءَ ھم آئی ءِ روگی داشتگ-

ریل ءِ واکدار ءِ گوشگ اِنت کہ ریل سروس بندی اداروکی گامیگجے ءُ انچش کہ پھازوکی جاور شر بنت ءُ مساپرانی کچ گیش بنت بولان میل دور پچ کنگ بیت-

واکدار ءِ رِد ءَ ریل انتزامیہ بلوچستان ءَ ریل سورس ءِ پچ کنگ ھاتر ءَ سیکیورٹی ادارھاں گوں یکشل ءَ ھال اھوال ایں دانکہ مساپر مُھر ءُ سپری آسراتی دیگ بیت-

زانگ بہ بیت کہ بلوچستام ءَ بلوچ آجوئی لوٹوکانی اُرشاں پد بلوچستان ءَ چہ دگہ دمگاں رؤکیں ھاسکار پنجاب ءُ پشاور ءَ رؤکیں جعفر ایکسپریس گوستگیں بازیں ماہ ءَ چہ بند اِنت، وھدے کہ شال ءَ چہ کراچی، پنجاب ءُ خیبر پختونخوا ءَ رؤکیں مساپراں سک دلسیاھی دیمپانی اِنت-

بلوچ آجوئی لوٹوکیں گلانی رِد ءَ پاکستانی پوج ءِ کارندہ، کہ پنجاب ءُ خیبر پختونخوا ءَ چہ بلوچستان ءَ آرگ بیتگ اَنت، کہ ریل ءَ چہ سپر کن اَنت ءُ ریل سروس ءِ یکشل ءَ بلوچ آجوئی لوٹوک اُرشانی نشانگ کنگ ءَ اَنت-

انچش ھمے سال ءِ مارچ ءَ بلوچ لبریشن آرمی ءَ جعفر ایکسپریس کہ شال ءَ چہ پشاور ءَ لاھور ءَ روگ ءَ بیتگ ک بازیں روچ ءَ دستیگ کنگ ءَ پد دو سد ءَ چہ گیش پاکستانی پوج ءِ کارندھانی کوش ءِ جار جتگ اَت-

غزہ ءَ اسرائیل ءُ ھماس ءِ نیام ءَ جنگ بندی ءِ سر ءَ امل کنگ ءَ پد ھزاراں فلسطینی وتی تباہ بوتگیں لوگاں واتر بوگ ءَ انت۔ شھری پھریزکاری ءِ جارکش محمود باسل ءِ رد ءَ تاں انوگ ءَ نزیک ءَ دو لکھ مردم غزہ ءِ رودراتکی دمگاں واتر بوتگ اَنت۔

امریکی صدر ڈونلڈ ٹرمپ ءِ بیست نکاتی امن منسوبگ ءِ اولی بھر ءِ سر ءَ اسرائیل ءُ غزہ ءَ جشن ءُ مراگش بوگ ءَ اِنت بلے بازیں جیڑھ انگت ءَ بے پسو اَنت، ایشانی تہ ءَ ھماس ءِ بے سلاہ کنگ ءُ غزہ ءِ ھاترا پیش کرتگیں ھزاروکی اتھارٹی ھوار اِنت، اے امل ءِ سروک ٹرمپ بیت ءُ ایشی ءِ تہ ءَ برطانیہ ءِ پیسریگیں مزن وزیر ٹونی بلیئر ءِ مستریں کرد اِنت۔

یک میان استمانی تاکے کہ گیشتر عرب ءُ مسلمانیں ملکانی لشکر ھوار بنت، غزہ ءِ تہ ءَ ایمنی ءِ زمہ وار بیت۔

بلے ھماس ءَ آدینگ ءِ روچ ءَ دیر ءَ یک بیانے شنگ کتگ ءُ اے گپ ءَ را ”درملکی سرپرستی“ ءِ رد ءَ رد کتگ ءُ اے گپ ءِ سر ءَ زور داتگ کہ غزہ ءِ سر ءَ ھاکمی کنگ بس فلسطینی جیڑھے ۔

تحریک لبیک پاکستان ءَ چہ لاھور ءَ اسلام آباد ءَ ’’فلسطین ملین مارچ‘‘ ءِ لوٹ کتگ ءُ اسلام آباد ءَ امریکہ سپارت ھانہ ءِ دپ ءَ زھرشانی ءِ لوٹ کتگ۔ مذہبی پارٹی ءِ گشگ انت شمبے ءِ شپ ءَ مریدکے ءَ دھرنا دیگ بیت انت-

ٹی ایل پی ءِ مارچ ءِ وھد ءَ پنجاب ءِ پولیس ءُ زھرشانی کنوکیں مردمانی نیام ءَ بوتگیں جنگ ءُ چوپاں درجناں مردم ٹپیگ بوتگ اَنت

وفاقی دارالحکومت اسلام آباد ءَ تحریک لبیک مارچ ءِ رد ءَ شھر ءِ آیگی ءُ درآیگ ءِ راہ ءُ موبائل انٹرنیٹ سروسز بند کنگ بوتگ انت ءُ راولپنڈی ءِ دمگدار ءَ شھع ءَ 11 اکتوبر ءَ تاں 144 کاربند ءِ بندش جتگ-

وزیر مملکت طلال چوھدری ءَ گشتگ کہ ریاست ءَ را ’ھچ وڑیں گل ءِ نیمگ ءَ بلیک میل کنگ نہ بیت۔ کوشش کنگ بوھگ ءَ اِنت کہ زور کارمرز کنگ مہ بیت’-

دومی نیمگ ءَ ھال سر کنوکیں ادارہ بی بی سی ءِ رد ءَ گجرانوالہ پولیس ءِ ٹیم ءَ سادھکی ءَ ناکہ بندی کتگ کہ اود ءَ مرچی جی ٹی روڈ ءِ کڈ کونچ اتگ انت۔

آئی ءِ رد ءَ پنجاپ ءِ بازیں جاھاں راہ ءُ در بند کنگ بیتگ انت ءُ اود ءَ سرکار ءُ زھرشانی کنوکانی میان ءَ جنگ ءُ چوپانی ھال انت –

کراچی ءُ بلوچستان ءِ جتاجتائیں دمگاں پنچ مردم آوار جنگ ءُ بیگواہ کنگ بیتگ اَنت وھدے کہ دگہ سے یل کنگ بیتگ اَنت

گیشیں ھالانی رِد ءَ کراچی ءِ ھند رئیس گوٹھ ءَ پاکستانی پوج ءَ بیڑ برتگ ءُ کیچ ءِ جھمنندیں دو مردم آوار جنگ ءَ پد بیگواہ کرتگ اَنت۔

ھالانی رد ءَ زور بیگواھیں مردمانی نام عبدالستار ء مراد شاہ ءُ محمد حاصل ء ھدا بندگ اِنت کہ دوئیں کیچ ءِ ھند تمپ، سرنکن ءِ جھمنند اَنت ءُ دوئیں یکیں کھول ءِ مردم اَنت۔

زور بیگواھیں مردمانی درگت ءَ گوشگ بیتگ کہ ڈرانڈیھ ءَ مزدوری ءَ بیتگ اَنت ءُ وتی موکلاں اتکگ اَنت۔ آ چہ کیچ ءَ دیم پہ درانڈیھ ءَ روگ ءَ بیتگ اَنت کہ دوشی دوازدہ ءَ پاکستانی پوج ءُ چیریں ادارھانی کارندھاان چہ کراچی ءِ ھند رئیس گوٹھ ءَ آوار جتگ ءُ بیگواہ کتگ اَنت۔

ھمے وڑ کیچ ءِ دمگ چہ بلیدہ ءَ پاکستانی پوج ءَ دو ورنا آوار جنگ ءَ پد بیگواہ کتگ اَنت۔

ھالانی رد ءَ آوار جنگ بوتگیں ورنایانی نام مراد جان ء عبداللہ ءُ کمبر ء خدا بخش اِنت کہ دوئیں بلیدہ ءِ میتگ سلو ءِ جھمنند اَنت، پاکستانی پوج ءُ ڈیتھ اسکواڈ ءِ کارندھان پرندوشی بلیدہ سلو ءَ بیڑ برتگ ءُ آوار جنگ ءَ پد بیگواہ کرتگ اَنت۔

ھمے وڑ شال ءَ زورگریں پاکستانی پوج ءِ دست ءَ زورانسری آوار جنگ بیتگیں سے ورناہ چہ پوج ءِ آزار جاھاں یل کنگ بیتگ اَنت۔

اھوالکار ءِ رد ءَ 27 ستمبر 2025 ءَ چہ زورگریں پاکستانی پوج ءِ دست ءَ زورانسری آوار جنگ بیتگیں نوروز ء منظور جھمِنِند سنگ آباد کارکی کیچ 3 اکتوبر 2025 ءَ چہ پوج ءِ آزار جاھاں یل کنگ بیتگ ۔

دومی نیمگ ءَ 24 ستمبر 2025 ءَ چہ زورگریں پاکستانی پوج ءِ دست ءَ زورانسری آوار جنگ بیتگیں شاہ بیگ ء طاھر جھمِنِند ڈنڈال شاپُک کیچ 8 اکتوبر 2025 ءَ چہ پوج ءِ آزار جاھاں یل کنگ بیتگ ۔

ھمے وڑ 27 ستمبر 2025 ءَ چہ زورگریں پاکستانی پوج ءِ دست ءَ زورانسری آوار جنگ بیتگیں در محمد ء بھار جھھمِنِند سنگ آباد کارکی کیچ 9 اکتوبر 2025 ءَ چہ پوج ءِ آزار جاھاں یل کنگ بیتگ ۔

بلوچ یکجھتی کمیٹی ءَ اے سئیں ورنایانی یل بیگ ءِ گپ راست کتگ اَنت۔

ھمے وڑ شال ءَ بیگواھیں علی اصغر ءِ چُک غلام فرید ءِ سروکی ءَ زورانسری آوار جنی ءِ ھلاپ ءَ وی بی ایم پی ءِ برجاھیں زھرشانی بُنجل ءَ جمعہ ءِ روچ ءَ شال پریس کلب دیم ءَ پنچ ھزار نوسد ششت چار روچ سرجم بیتگ-

بلوچستان ءِ بُنجاھی شھر شال ءِ سول نادُراھجاہ ءَ بازیں وھدے ءَ ایریں بیستیں لاش بے وارس کتگ ءُ چھیپا پاؤنڈیشن ءِ سروکی ءَ دشت تیری میل کبرستان ءَ کل ءُ کسارت کنگ بیتگ اَنت-

کل ءُ کسارت کنگ ءَ ھمگرنچیں ادارھانی نمائندگ ءُ چھیپا پاؤنڈیشن کاردار ساڑی بیتگ اَنت-

اِھوالکار ءِ گوشگ اِنت کہ کل ءُ کسارت ءَ ھوار بیستیں لاشاں چہ چار لاش چہ منگچر ءَ آرگ بیتگ اَنت، کہ انّگیں کاروائی ءِ میان ءَ دزکپتگ اَنت- زانگ بہ بیت چہ منگچر ءَ آرگ بیتگیں لاشانی پجّار گل خان پنّام ءِ یاسین، عنایت اللہ، عزت اللہ ءُ شئے مراد ناماں چہ بیتگ اَنت، وھدے کہ آ دگہ لاشانی پجّار انگت نہ بیتگ اَنت-

زانگ بہ بیت کہ بلوچستان ءَ پاکستانی پوج ءِ کاروائیاں شکی گوشگ بیگ ءَ اَنت وھدے کہ بازیں کاروائیاں رسانکدر ءُ سانمندیں کھولاں دروگ گوشتگ اَنت بلے ھکومتی وزیر ءُ واکدار اے کاروائیانی نیمگی کن اَنت-

انّگیں چیزے وھد ءَ چہ بلوچ راجدوست پارٹی، انسانی ھکانی گل پاکستانی پوج ءِ نیمگ ءَ چہ پوجی لشکر کشی ءَ لَس آبادیاں نشانگ کنگ ءُ دروگیں میڑاں زورانسری بیگواھیں مردمانی کوش ءِ سر ءَ تُرس پدر کتگ-

بلے واکدار ءِ گوشگ اِنت کہ مروچی کل ءُ کسارت کنگ بیتگیں لاش جتاجتائیں کاروائیاں جنگ بیتگیں سلاہ بندیں مردمانیگ اَنت، آیانی تہ ءَ گوستگیں روچاں شال ایف سی ھیڈ کواٹر ءَ جنگ بیتگیں مردم ھوار اَنت-

ھمے وڑ کیچ ءِ دو جتاجتائیں دمگ دشت ءُ مند ءَ دو لاش دزکپتگ اَنت-

مند ءَ دزکپتگیں لاش ءِ پجّار مسلم ء نعمت اللہ جھمنند ھوزئی مند نام ءَ چہ بیتگ وھدے کہ دشت ءِ دمگ کوھک ءُ کھڈان ءِ میانی دمگ ءَ دزکپتگیں لاش ءِ پجّار محبوب ء بابو جھمنند دشت مکسر نام ءَ چہ بیتگ-

بلے تنی وھدے دوئیلانی کوش ءِ سوب زانگ نہ بیتگ اَنت-

بلوچستان ءِ جتاجتائیں دمگاں پاکستانی پوج ءُ راشن سر کنوکانی سر ءَ بلوچ آجوئی لوٹوکانی نیمگ ءَ اُرش یکشل ءَ برجاہ ءَ اَنت ءُ دومی نیمگ ءَ اے اُرشانی زمہ واری بلوچستان ءَ پُرکاریں گل بی ایل اے ءُ بی ایل ایف ءَ زرتگ اَنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں کولواہ ءِ دمگ ڈنڈار ءَ زورگریں پاکستانی پوج ءِ پیادگ کارندہ ھما وھد ءَ ریموٹ کنٹرول آئی ای ڈی اُرش ءَ نشانگ کتگ اَنت وھدے زورگریں پوج ءِ نُھ کارندہ یکیں جاہ ءَ مُچ بیتگ اَنت – تراک ءِ آسر ءَ زورگریں پوج ءِ سے کارندہ جاہ پہ جاھی مرتگ اَنت ءُ آ دگہ ٹپی بیتگ اَنت-

جارکش ءَ گوشتگ مئے سرمچاراں زورگریں پاکستانی پوج ءِ جوڑ کتگیں وتگڑیں ڈیتھ اسکواڈ ءِ کارندہ دادین ء یلان آئی ءِ اوتاک ءِ سر ءَ اُرش کتگ ءُ کُشتگ – اے چریک زورگریں پوج ءِ چیردستی ءَ دمگ ءَ سلاہ بندیں ٹولی ءِ ھمراھی ءَ ورنایاں نشانگ کنگ، لوگانی سر ءَ بیڑ، زورانسری آوار جنی ءُ زوراکی ءَ زورگریں پوج ءِ کمکاری ءَ تچکی ءَ ھوار بیتگ-

جارکش ءَ گوشتگ ھمے وڑ زامران ءِ دمگ صابونی ءَ مئے سرمچاراں زورگریں پاکستانی پوج ءِ واستا سامان بروکیں یک گاڑی یے ریموٹ کنٹرول آئی ای ڈی اُرش ءَ نشانگ کتگ اَنت – اُرش ءِ آسر ءَ گاڑی ءَ سک تاوان رس اِتگ – مئے سرمچاراں پہ مردم ءِ تاوان ءَ چہ رکگ ءِ ھاتر ءَ گاڑی ءِ پُشت ءِ بھر نشانگ کتگ-

جارکش ءَ گوشتگ کہ ما گندگ ءَ ایں کہ زامران ءَ لھتے پرائیوٹ گاڑی واھنند لالچ ءَ کاینت ءُ زورگریں پوج ءِ واستا راشن سر کنگ ءَ ھمگرنچ اَنت، کہ تچکی ءَ زورگریں پوج ءِ کمکاری ءِ بھر ءَ کاینت – بلوچ لبریشن آرمی تچک کنت کہ زامران ءَ زورگریں پوج ءِ واستا راشن ءُ دگہ سامان سر کنگ ءَ سرجمی ءَ پابندی جنگ بیت-

جارکش ءَ گوشتگ اشی ءَ ساری ما تاواناں چہ رکینگ ءِ ھاتر ءَ وتی اُرشانی تُرندی کم کتگ، بلے نو مئے سرمچار زورگریں پوج ءِ کمکاری ءَ ھمگرنچیں گاڑیاں تچکی ءَ اُرش ءِ نشانگ کنگ ءِ پرمان شنگ کتگ-

ھمے وڑ بلوچستان لبریشن فرنٹ ءِ جارکش میجر گوھرام بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں نُھ اکتوبر ءِ بیگاہ شش نیم ءِ نزیک ءَ مند ءِ دمگ سورو ءَ زورگریں پاکستانی پوج ءِ چیریں ادارہ ایم آئی ءِ کارگس ءِ سر ءَ راکٹ لانچراں چہ نشانگ کتگ – اُرش ءَ راکٹ لانچر ءِ لگگ ءَ چہ یک سنگرے تباہ بیتگ، چریشی ءِ آسر ءَ پوج ءَ جانی تاوان چست کنگ کپتگ-

جارکش ءَ گوشتگ کہ دگہ یک کاروائی یے گوستگیں شپ ءَ بلوچستان لبریشن فرنٹ ءِ سرمچاراں سوراب ءِ دمگ بینچہ ءِ ھند سر ءَ کراچی شال ءِ بُنجاھی شھدگ سر ءَ ناکہ بندی ءُ پٹ پول کتگ – پٹ ءُ پول ءِ میان ءَ یک جھمنندے شک ءِ بُنیاد دزگیر کتگ ءُ آئی ءِ جُست ءُ پُرس برجاہ اِنت وھدے کہ سوراب ءَ چہ یک کنسٹرکشن شرکت ءَ کار کنوکیں ھپت مردم دزگیر کتگ اَنت بنداتی پٹ ءُ پول ءِ سرجم کنگ ءَ پد آ یل داتگ اَنت-

گُڈی ءَ دوئیں گلاں اُرشانی زمہ واری منّ اِتگ گوشگ کہ پاکستانی پوج ءُ آئی ءِ کمکارانی سر ءَ اُرش داں بلوچستان ءِ وتواجھی ءَ تاں برجاہ بنت-

پنچ شمبے ءِ شپ ءَ پاکستانی بالی گراباں اوگانستان ءِ بنجاھی شھر کابل بمب اُرشے کتگ۔ طالبان ءِ انتزامیہ ءَ گوشتگ تراکاں ھچ وڑیں تاوان نہ بوتگ بلے تحریک طالبان پاکستان ءِ سروک نور ولی محسود ءِ بیرانی ءِ ھال سوشل میڈیا ءَ شنگ بوتگ۔

اوگان سرکار ءِ جارکش زبیح اللہ مجاھد ءَ ایکس ءَ گْوشتگ: اے وئیل ءِ پٹ ءُ پول کنگ بوھگ ءَ اِنت بلے تاں انوگ ءَ ھچ وڑیں تاوان ءِ ھال سر نہ بیتگ انت ءُ ھرچی جوان اَنت۔

فرانس ءِ ھال سر کنوکیں ادارہ اے ایف پی ءِ رد ءَ اولی زوریں تراک دمگی وھد ءِ رد ءَ شپ ءِ 9:50ءِ نزیک ءَ بوتگ ءُ دومی تراک ھم لھتیں دمان ءَ پد اشکنگ بوتگ ۔

دومی نیمگ ءَ سوشل میڈیا ءَ پاکستانی فوج ءَ گوں ھمگرنچیں اکاؤنٹاں اے گپ ءِ ٹاپار جتگ کہ کابل ءَ بوتگیں تراک ءَ تحریک طالبان پاکستان ءِ سروک مفتی نور ولی محسود بیران بوتگ۔

پاکستانی سرکار ءِ نیمگ ءَ چہ ھچ وڑیں اُرش ءِ سرکاری راستی نہ بوتگ انت۔ اسلام آباد ءَ گوستگیں وھداں پاکستان ءِ نیمگ ءَ بوتگیں گمانی اُرشانی بابت ءَ ھم ھچ گپ نہ جتگ۔

اوگانستان ءِ نامداریں اھوالکار بلال سروری ءَ ایکس ءِ سر ءَ نبشتگ: ”گشگ بوھگ ءَ اِنت کہ کابل ءِ بمب تراک ءَ ٹی ٹی پی ءِ ھاسیں سروک نشانگ جوڑ کنگ بوتگ اَنت۔“

بلال سروری ءِ رد ءَ اے بمبتراک ھما وھد ءَ بوتگ کہ اوگانستان ءِ ھزاروکی سرکار ءِ دری کارانی وزیر مولانا امیر خان متقی بھارت ءِ تر ءُ تاب ءَ اِنت۔

پنچ شمبے ءُ جمعہ ءِ روچ ءَ 12 نیم ءَ چہ سوشل میڈیا ءِ سر ءَ یک نا پدریں آڈیو پیگامے ھم شنگ ءُ تالان اِنت کہ ایشی ءِ تہ ءَ یک مردمے ءِ گپ گوشدارگ بیت کہ آ (مبینہ) مفتی نور ولی محسود اِنت ءُ مرچی 9 اکتوبر ءَ پاکستان ءِ قبائلی دمگاں جاڑیگ انت ءُ آئی ءِ کُشگ ءِ ھال نیست انت-

اے آڈیو پیگام انگت ءَ ٹی ٹی پی ءِ نیمگ ءَ چہ پدر نہ بوتگ ءُ نہ کہ ٹی ٹی پی ءَ مفتی نور ولی محسود ءِ بابت ءَ بیان شنگ کتگ۔

سوشل میڈیا ءِ سر ءَ بازیں مردماں تراک ءِ توار ءِ اشکنگ ءُ ڈرون ءِ گندگ ءِ ھال داتگ۔

اے ایف پی ءِ اھوالکار ءَ دیستگ کہ بنجاھی شھر ءِ دمکانی تہ ءَ سیکورٹی فورسز ءِ ھال ءُ اھوال ءُ گاڑیانی پٹ ءُ پول کنگ دیستگ۔ موبائل فون ءِ سروس ھم بازیں میتگاں بند بوتگ انت۔

برطانیہ ءِ ھال سرکنوکیں رائٹرز ءِ رپورٹ ءِ رد ءَ اولی تراک عبدالحق اسکوائر دمگ ءَ بازیں وزارت ءُ نیشنل انٹیلی جنس ایجنسی ءِ کارگسانی نزیک ءَ بوتگ ءُ کابل ءِ نندوکاں شھر ءِ شہر نو ءِ میتگ ءَ دگہ تراکے ھم اشکتگ کہ ایشی ءِ پدر کنگ نہ بوتگ۔

اوگانستان ءِ پیسریگیں امریکی سفیر زلمی خلیل زاد ءَ وتی ایکس اکاؤنٹ ءِ سر ءَ نبشتگیں پیگام ءِ تہ ءَ ھم جُست کُتگ کہ آیا پاکستان ءَ کابل ءَ بمب تراک کتگ کہ ایشی ءِ تہ ءَ ٹی ٹی پی ءِ مفتی نور ولی ءِ بیرانی ءِ گمان اِنت۔

پیگام ءَ گیش گْوشگ بیتگ کہ بنداتی ھال رد بوت کن اَنت بلے جنگ ءِ چاگرد جوڑ کنگ بوتگ۔

تراک ءِ تہ ءَ مفتی نور ولی ءِ بیرانی ءِ انگت ءَ کابل ءُ پاکستانی سرکار ءَ اے گپ ءِ پدرائی نہ کتگ ءُ ٹی ٹی پی ءِ انگت ءَ آزاتیں رنگ ءَ اے گپ ءِ پدرائی نہ بوتگ۔

پاکستان ءَ فوج ءِ سر ءَ بازیں اُرشانی پد ءَ ٹی ٹی پی ءِ یک مستریں سروک ءِ کوش ءُ کابل ءِ سر ءَ بالی اُرشانی ھال شنگ بوھگ ءِ گمان اِنت۔

چار شمبے ءِ روچ ءَ پاکستان ءِ قبائلی ضلع اورکزئی ءَ جنگولانی تیرگواری ءَ دو افسر ءَ ھوار 11 فوجی کارندہ بیران بیتگ اَنت ءُ پنچ شمبے ءِ روچ ءَ جعفر ایکسپریس ءِ سر ءَ لھتے وھد ءِ تہ ءَ سیمی رند ءَ اُرش کنگ بوتگ۔

گوستگیں لھتیں سالانی تہ ءَ خیبر پختونخوا ءُ بلوچستان ءِ اُستانی تہ ءَ پاکستانی لشکر ءِ سر ءَ اُرش گیش بوتگ اَنت کہ اسلام آباد ءِ گْوشگ اِنت کہ اے اُرش تحریک طالبان پاکستان ءُ بلوچ جنگولی گل بی ایل اے ءِ نیمگ ءَ کنگ بنت کہ آیاں بازیں وئیلانی زمہ واری زرتگ انت۔

پاکستان ءِ بھتام اِنت کہ اے گلانی سروک اوگانستان ءَ بنجاہ دار اَنت ءُ لوٹ کتگ کہ کابل ءَ اے جنگولیں گل ءُ آھانی سروکانی ھلاپ ءَ کارروائی بہ کنت۔

بلے کابل ءِ اوگان طالبان انتظامیہ اسلام آباد ءِ نیمگ ءَ اے بھتاماں رد کنگ ءَ انت۔

زورانسری بیگواھیں بلوچ زالبول ماہ جبین ءِ برات یونس چار ماہ ءَ پد بندیگجاہ ءَ یل بیتگ-

یونس ءِ کھول ءَ گْوشتگ کہ چار ماہ پہ آھاں بے دروریں گرانیں ماہ بوتگ اَنت بلے آئی ءِ واتر بوھگ ءَ آھانی دل ءَ کمے سکون داتگ۔ بلے ماہ جبین ءِ بیگواھی ءِ جیڑہ انگت ءَ گیش ءُ گیوار نہ بوتگ ءُ آئی ءِ کھول سک پریشانی ءِ تہ ءَ اَنت۔

کھول ءُ انسانی ھکانی گل ماہ جبین ءِ زوت آجو کنگ ءِ لوٹ ءَ کنگ ءَ انت۔ یونس ءِ کھول ءِ گشگ اِنت دوا انت کہ ماہ جبین ھم زوت وتی لوگ ءَ واتر بہ بیت۔

بلوچستان ءَ بیگواھیانی درچ برجاہ انت اود ءَ یک نیمگے ءَ مردم یل کنگ ءُ دومی نیمگ ءَ دو سری ءِ کساس ءَ مردم گرگ ءُ بیگواہ کنگ بوگ ءَ انت-

بلوچستان ءَ بیگواھیانی ھلاپ ءَ کھول ءُ انسانی ھکانی گل یکشل ءَ زھرشانی کنگ ءَ گندگ بوگ ءَ انت-