TBP Balochi

بلوچ لبریشن آرمی ءَ وتی آفیشل چینل ھکل ءَ دگہ چار کسانی اکس ءُ اھوال شنگ کتگ انت –

اولی ءِ پجار فراز احمد پنام ءِ دوستین ء منیر احمد جھمنند گچک پنجگور ءِ نام ءَ کتگ – 2025 ءَ بی ایل اے ءَ ھوار بیتگ ءُ ھاران ءُ کلات ءِ میدان ءَ بیتگ ءُ فتح اسکواڈ یونٹ ءِ بھر بیتگ ءُ آپریشن ھیروپ ٹو ءَ ھاران ءَ نمیران بیتگ-

ھکل ءِ رد ءَ شھید فراز احمد پنام ءِ سیادی پنجگور گچک ءِ ھما ورنایاں ھوار بیتگ آیاں راجی آجوئی ءِ جد ءُ جھد یک ازاروکی نزیہ نا بلکیں یک املی زمہ واری ءِ رنگ ءَ من اتگ- بی ایل اے ءِ ھوار بوگ ءَ پد آئی ءَ کمو وھد ءَ وتی زانشت ءِ سبب ءَ زوت وتی پجار پدر کتگ ءُ چریشی ءِ آسر ءَ آ گل ءِ گچینی یونٹ فتح اسکواڈ ءَ ھوار بوتگ – اے یونٹ ءِ بھر بوگ اے چیدگ انت کہ دوستین ءِ مزن شانیں جنگی سنچ ءُ گچینی کاروائیاں کرد پیلو کنگ ءِ سنچے داشتگ – ھاران ءُ کلات ءَ آئی ءَ ھمک رھبند ءِ درچ ءَ وتی زمہ واری سرجم کتگ ءُ ھمک پتر ءَ رھبند، گچینی گام ءُ اوشتانکی ءِ درشانی کتگ-

آپریشن ھیروپ ٹو ءِ وھد ءَ ھاران ءَ جاڑیگ بوگ ءَ سرمچارانی مھکمیں گامگیج ءُ پرکاریں رنگے ءَ دشمن ءِ گون ءَ جنگے کتگ- ھمے درچ ءَ فراز گوں وتی ھمراھاں فرنٹ لائن ءَ جاڑیگ بوتگ ءُ گڈی ساھت ءَ داں جنگ کنان ءَ کربانی ءِ دیمھوی ءِ دروشم داتگ کہ آئی ءِ سر ءَ آجوئی ءِ زرمبشت ءِ راہ ھموار بیت انت-

دومی ءِ پجار شھید زاکر مینگل پنام ءِ نوتک ء حاجی خیر محمد امیر زئی مینگل جھمنند کلی قبول زنگی ٹاور نوشکی ءَ کتگ- اپریل 2025 ءَ آئی ءَ بی ایل اے ءَ بھر زرتگ ءُ آئی ءَ بی ایس انجینئرنگ الیکٹرانکس بھریہ یونیورسٹی اسلام آباد ءَ کتگ- آ شور پارود، نوشکی ءَ جنگی میدان ءَ بوتگ ءُ ھاران ءَ آپریشن ھیروپ ءَ شھید بیتگ-

زاکر بلوچ گوریلا پتر ءَ نوتک ءِ نام ءَ زانگ بیتگ – نوشکی ھما وش تبیں ھاک ءِ پسگ کہ اود ءَ اِلم ءُ گھگیری ھروھد ءَ جاڑیگ بیت انت- بھریہ یونیورسٹی آسلام آباد ءَ گچینی ادارہ الیکٹرانکس انجینئرنگ ءِ ڈگری ءِ گرگ ءَ پد زاکر ءِ دیم ءَ یک آرام ءُ وشھالیں راھے ءِ دراھیں در پچ بیتگ انت- بلے آئی ءِ زانشت ءُ تَب ءَ گھگیری پہ وت کتگ- اپریل دوھزار ءُ بیست ءُ پنچ ءَ بی ایل اے ءَ ھوار بوگ ایوک ءَ یک اَزمے نہ بیتگ بلکیں نوکیں دور ءِ جنگ ءِ سرجم ءَ کنگ ءَ یک سائنسی ءُ ازمکاری زھنے ءِ آرگ بیتگ-

نوتک زرمبشت ءِ ھما لھتے ٹیکنیکل سنگتاں ھوار بیتگ کہ آیاں وتی زانت ءَ راجی پھریزگ ءِ واستا ندر کتگ- آئی ءَ الیکٹرانکس ءِ وانگ ءِ امل ءَ بلوچ جنگ ءِ آجوئی ءَ نوکیں دور ءِ اَزم ءِ راہ ءَ پرینگ ءَ جوانیں کرد پیلو کتگ انت- آئی ءِ گوشگ بیتگ کہ دشمن ءَ پروشینگ ےخ بس ٹیکنالوجی ءُ زھنتی ءَ پروش دات کن ئے – شور پارود، نوشکی ءُ ھاران ءَ آئی ءِ ازم ءَ فنی کرد ءَ گل ءِ لشکر ءَ نوکیں ساھے داتگ-

سنگت نوتک ءَ اے منینتگ کہ یک دانشور ءُ انجینئر وھدیکہ توپک ءَ چِست کنت گڑا بس ایوک ءَ تیر نہ جنت بلکیں دشمن ءِ سرجمیں نزام ءَ پروش ایت – زاکر بلوچ ءَ وتی سرزمین ءِ آجوئی ءِ گچینی مول ءُ مراد ءِ واستا وتی ساہ ءُ سر ندر کتگ انت ءُ اے کلوہ داتگ کہ بلوچ راج ءِ نوکیں نسل وتی الم ءُ ھونانی ھواری ءَ آجوئی ءِ نوکیں راجدپتر ءَ کرد پیلو کنگ ءَ انت-

سیمی ءِ پجار قسیم مراد پنام ءِ تنویر ء مراد علی سیاہ پاد جھمنند گازی روڈ خاران ءِ نام ءَ کتگ- 2025 ءَ بی ایل اے ءَ ھوار بوتگ ءُ فتح اسکواڈ یونٹ ءِ بھر بیتگ ءُ آپریشن ھیروپ ٹو ءَ ھاران ءَ شھید بیتگ-

شھید قسیم مراد پنام ءِ تنویر ءِ سیادی ھاران ءِ ھما ھاک ءَ بوتگ کہ اود ءَ دنزانی میان ءَ گھگیری ءِ کِسہ ساہ کش انت- گھگیری ءِ درچ ءَ چِست بیتگیں قسیم بی ایل اے ءَ ھوار بوگ ءَ پد نوشکی ءُ ھاران ءِ میدان ءَ پرکار بیتگ- نوشکی ءُ ھاران ءَ نا ایوک ءَ جنگی میدان ءَ بیتگ بلکیں ھما راہ بیتگ کہ اود ءَ یک سرمچارے وپاداری، ھوسلہ ءُ جنگی زانشت ءِ چکاس ءَ دنت – آئی ءِ پلگاری ءِ قسیم ءَ گل ءِ بنداتی ٹولی فتح اسکواڈ ءَ جاھے پہ وت دست گپتگ، آ ھمک وھد ءَ ھمک سرپ ءَ اوشتوک بیتگ ءُ اود ءَ ھرھما گام ایر کنت کہ اود ءَ آیانی دل ءَ ترس ءَ ابید راجی آجوئی ءِ گوات زَر ایت-

ھکل ءِ رد ءَ آپریشن ھیروپ ٹو ءَ قسیم خاران ءِ میدان ءَ جاڑیگ بیتگ – ھاران ءِ پتر ءَ وتی ھمراھانی ھواری ءَ اوشتوک بیتگ اود ءَ آجوئی ءِ واب آئی ءِ رگاں ھون چِست بنت – گڈسر ءَ آئی ءَ جنگ ءُ چوپاں وتی ساہ ءُ جان ندر کتگ انت-

ھکل ءِ رد ءَ آئی ءِ کربانی ھاران ءِ ھاک ءَ یک ھنچیں داستانے بیت ءُ چِست بیت کہ آیوکیں نسلاں یاداشت کنت وھدیکہ وتی ھاک ءِ واستا جنگ کنت- آئی ءِ زندمان یک روچے الم بھر جوڑ بیت-

چارُمی ءِ پجار ناصر جتک پنام ءِ صدام ء نصیر جتک جھمنند سرآب زھری ءِ نام ءَ کتگ- 2024 ءَ بی ایل اے ءِ شھری گوریلا ءِ بھر بیتگ ءُ 2025 ءَ کوھی میدان ءَ کلات ءُ زھری ءَ شتگ ءُ فتح اسکواڈ ءِ بھر بیتگ ءُ آپریشن ھیروپ ٹو ءَ نوشکی ءَ شھید بیتگ-

ھکل ءِ رد ءَ شھید ناصر جتک ءَ شھری گوریلا سلاہ بندین جنگ ءِ بستار ءَ سپر ءِ بنداتے کتگ- آئی ءَ گچینی بے تواری ءُ زمہ واریاں وتی جد ءُ جھد ءِ زمہ واری پیلو کتگ انت-

ھکل ءِ رد ءَ شھری گوریلا تھنا جد ءُ جھد ءِ لوٹاں سرجم نہ کنگ بلکیں سکا رازداری، یکشلیں جد ءُ جھد ءُ گل ءِ پابندی ءِ بنکی بھر انت- صدام درستیں رھبندانی پابند بیتگ – کمو مڈی ءُ ترندیں جاوراں ابید اے منینتگ کہ یک مھکم ءُ مھنتی سرمچار ھم گھگیری ءِ مھکمی کنت-

ھکل ءِ رد ءَ 2025 ءَ گل ءِ پیسلہ ءَ کوھی دمگ کہ اود ءَ کلات ءُ زھری ءِ دمگ ءَ وتی زمہ واری پیلو کتگ انت- شھری گوریلا ءِ زانتکار ءُ یکشلیں مھنت ءِ درچ ءَ گل ءِ بنداتی ٹولی فتح اسکواڈ ءَ ھوار بیتگ –

آپریشن ھیروپ ٹو ءَ نوشکی ءَ جاڑیگ بیتگ کہ اود ءَ آئی ءَ وتی ھمراھانی ھواری ءَ ترندیں جنگ ءَ وتی ساہ ءُ جان ندر کتگ انت-

بلوچستان ءِ دمف پنجگور ءِ ھند پروم جائین ءَ سلاہ بندیں مردماں یک مردمے آوار جتگ ءُ گوں وت برتگ۔

آوار جنگ بوتگیں مرد ءِ پجار زبیر احمد ء امان ءِ نام ءَ بوتگ۔

دمگی مردمانی رد ءَ سلاہ بندیں مردماں زبیر احمد گوں وتی ھمراھی ءَ ناشناسیں جاھے ءَ برتگ ۔

دمگی مردمانی گشگ اِنت کہ آوار جنگ بوتگیں مرد گوں سرکاری کمک ءِ سلاہ بندیں گلے ءَ ھمگرنچ اِنت کہ لس ”ڈیتھ اسکواڈ “ ءِ نام ءَ زانگ بیت۔ دمگی مردمانی گشگ ءِ رد ءَ اے گل دمگ ءَ آوار جنی، کوش ءُ دگہ زوراکیں چاگردی برائیانی تہ ءَ ھوار اِنت۔

بلوچستان ءَ ”ڈیتھ اسکواڈ“ ءِ گالوار پہ ھما سلاہ بندیں گلاں کارمرد کنگ بیت کہ آھانی سر ءَ سرکاری ادارگانی کمک ءَ پرکار بوگ ءِ گپ جنگ بیت۔

اے گلانی سر ءَ زورانسری بیگواہ کنگ، درکانودی ءَ کشگ ءُ دگہ چاگردی بدکاریانی ھم بھتام جنگ بیت۔

بلے پنجگور ءَ زبیر احمد ءِ آوار جنگ ءِ مول ءُ مراد انگت ءَ پدر نہ اَنت ءُ نہ کہ کس ءَ اے وئیل ءِ زمہ واری زرتگ۔

‏‎آپریشن ھیروف دو ءِ سپاھیگ

‏‎نبشتہ کار : سناء بھار

‏‎دومی ءُ گڈی بھر

دی بلوچستان پوسٹ

‏‎شال ءَ سھب ءِ ساھت انت، ھَور اوں بوتگ۔ چوناھا اگاں ھَور بیت گڑا بوسال پچ شانیت بلے مروچی بوسال ءِ جاہ ءَ آزمان ءَ بلوچستان ءِ ایدگہ دمگانی رنگ ءَ شال ءَ اوں شورھانی بوہ چِست بوت۔ ‏‎ھمد ءَ یک بلوچی درورے منی دل ءَ ات کہ ‏‎”چہ شام ءِ جَمّر ءُ سھب ءِ جنگ ءَ بِہ تُرس”چیا کہ جمّر اگاں شَپ ءَ کئیت گڑا سرجمیں شپ ھَور گوار ایت ءُ اگاں جنگے کہ سھب ءِ ساھت ءَ بندات بیت بزانکہ سرجمیں روچ ءَ وتی نام ءَ کنت۔

‏‎ھیروف دو بندات بوت سُھب ءِ ساھت اِنت کہ کنگراں دگ بَست ءُ مھلوک کئیت ءُ روت گوں وتی بلوچ سپاھیگاں دیوان کن انت‏‎کند انت ءُ ھمے کلوہ ءَ مدام دیگ ءَ اَنت کہ اے شومیں یزید ءَ تباہ بہ کن اِت۔ ‏‎من گنداں یک سئیکلی مردے اتک ءُ من اشی ءَ ھمے گُشت کہ بہ رو تو۔‏‎ بلے آ مرد اوشتات۔ ‏‎من گِنداں اے مرد ءِ چم چہ اَرس ءَ پر اَنت ءُ من ءَ گشتے “بہ گش سنگت من چے کرت کناں پہ شما۔”من ھمے پسو دات”کربان منتوار بس مارا کار نیست۔” بلے مرد مدام ھمے گپ ءَ کنت کہ “نہ من ءَ کارے بہ گش من پہ شما کارے کناں پد ءَ رواں۔” ‏‎“سنگت بہ رو کہ دژمن اگاں اتک جنگ بیت،” من گشت۔ ‏‎من اے مرد ءِ چمانی اَرس دیستاں۔ من وتی دل ءَ وت ھمے جیڑ ات کہ ھدا بہ زانت کہ اے ورناہ ءَ چنچو بزگی سَگ اِتگ۔

‏‎ایشی ءَ بلوچ سرمچارے دیست وتی اَرس داشت نہ کرت گڑا اگاں اے مرد ءِ دست ءَ تپنگ بہ بیت ءُ دژمن ءَ گوں دیم پہ دیم بہ بیت نہ زاناں دژمن چہ اشی ءَ وت ءَ چوں رکینیت۔ ‏‎کسانیں ساھتے ءَ چہ پد من گنداں دو کسان اُمریں گونڈل پیداک اَنت۔ اے دوئیں مئے نزیک ءَ اتک اَنت۔ “من نہ زاناں چیا بلے اے چو آیگ لوٹ انت بلے آھگ ءَ نیا اَنت۔”

‏‎ھیر من سوج کرت،”ھال کن ات سنگتاں چیا اوشتاتگ اِت؟”‏‎ چہ اے گونڈلانی نیمگ ءَ یک توارے اتک کہ (کربان نُمکِن کنا ایلماک) گوں اے دوئیں گونڈلاں کسانیں دیوانے بوت ءُ نوں روچ اتکگ اَنچوشکہ دَہ اِنت نوں من گنداں آزمان ءِ دیم ءَ بالی گراب ءُ ڈرون اتک سَر بوت انت۔‏‎ملنگیں یارے ہمدا بُرز ءَ بالی گراب ءَ چار ایت ءُ گش ایت تو کمو جھل ءَ بیا پر تو کسانیں کارے ھست ھاھاھا۔ ‏‎ھیر اشی ءَ سنگت ءِ گپ نزآورت جھل وَ نیا انت بلے سنگتاں اشی ءَ را دل ءِ وڑ ءَ جت شوم بُرز اَت سک پمیشکا بہ چت۔ ‏‎نوں دژمن اوں وتی یزیدی آدت ءَ اھتک ءُ شیلنگ ئِے بندات کرت اے میان ءَ ترندیں جنگے بوت گوں بالی گراباں اے جنگ ءِ تہ ءَ دژمن ءَ پروش وارت ءُ وتی پِس ءُ پِیرُکی آدتاں مجبور بوت بزاں کہ پَدکِنز اِت ۔‏‎دژمن شُت من گنداں لس مھلوک سک باز اھتکگ ءُ گوں راجی کنگراں گپ ءُ تران کنان اَت ۔‏‎یک پٹھانے اھتک منی کر ءَ گشیت (آپ لوگوں کو سلام ہے ) ‏‎من ھیر پسو نہ دات بس اَنچوش وتی دست ءَ را وتی سینگ ءَ اِیر کرت بزاں منتوار ۔ ‏‎ھمے وڑ ءَ جنگ برجاہ اَت۔ دگ سنگتانی کنٹرول ءَ اَت ۔‏‎نوں دو ءِ وھد انت ، من کمو یک نیمگے اھتاں آپ ءُ نانے چاراں وراں کہ دوشیگین انت ھِچ نہ وارتگ من آپ نہ وارت کہ تیرانی توار بوت منی نزیک ءَ سنگتے ھست اَت من سوج کرت ھالاں دئے کربان گش ایت پاکو اھتکگ کہ اے بری بالی گراب نیست زمین ءَ اھتکگ انت۔.‏‎اے جنگ ءِ تہ ءَ لھتیں پوجی مُرت ءُ ایدگہ جِست ءُ شت انت۔ ‏‎چہ ھمد ءَ منی گوں آپریشن ھیروف دو ءِ گڈی وھد اھتک ءُ من سنگت ءَ نہ رُکست کرت ءُ در اھتک اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ جتاجتائیں دمگاں زورانسری آوار جنی ءِ دْرچ یکشل ءَ برجاہ ءَ اِنت- سر بیتگیں ھالانی رِد ءَ پاکستانی پوج ءَ بازیں مردمے لوگ ءُ جتاجتائیں ھنداں چہ آوار جتگ ءُ بیگواہ کتگ اَنت-

ھالانی رِد ءَ ھمے سال ءِ دہ مارچ ءِ شپ ءَ گوادر ءِ دمگ چہ پانوان جیونی ءَ کمبر ء امام بلوچ پاکستانی پوج ءَ لوگ سر ءَ بیڑبرتگ ءُ ناشناسیں جاھے ءَ برتگ- ھمے دمگ ءَ چہ ھمے روچ ءَ زیم ء محمد رحیم ھم پاکستانی پوج ءَ آوار جتگ ءُ بیگواہ کتگ-

ھمے وڑ یازدہ مارچ ءَ کیچ ءِ دمگ چہ جوسک سری کھن، تربت ءَ خالد حبیب ء حبیب اللہ پاکستانی پوج ءَ آوار جتگ ءُ ناشناسیں جاھے ءَ برتگ-

پنجگور ءِ دمگ چہ تسپ ءَ جاسف ء عارف ھم آوار جنگ ءَ پد بیگواہ کتگ-

ھالانی رِد ءَ شال ءِ دمگ چہ کلی قمبرانی نبی بخش بلوچ ء بھرام بلوچ چہ لوگ ءَ آوار جنگ ءَ پد بیگواہ کتگ، وھدے کہ نوشکی ءِ دمگ چہ کلی جمالدینی ءَ مدثر ء فیض اللہ ھم پاکستانی پوج ءَ آوار جنگ ءَ پد ناشناسیں ھندے ءَ برتگ-

دومی نیمگ ءَ زورانسری بیگواہ بیتگیں پنچ مردم یل کنگ بیتگ اَنت، آیانی تہ ءَ کلیم اللہ ء اسداللہ، جھمنند خداآباد، پنجگور ھوار اِنت کہ آوار جنگ ءَ پد دوازدہ مارچ 2026 ءَ ھب چوکی ءِ ھند ءَ یل کنگ بیتگ-

ھمے وڑ زاھد ء عبدالرحمان، جھمنند جیونی آوار جنی ءَ پد 26 فروری 2026 ءَ یل کنگ بیتگ-

ھمے وڑ عدنان ء دلمراد ءُ احسن ء دلمراد جھمنند جیونی آوار جنگ ءَ پد ھمے سال سے ءُ نُھ مارچ ءَ یل کنگ بیتگ-

انچش عبدالوھاب ء عبدالغنی، جھمنند گریشگ، ھُزدار آوار جنگ ءَ پد دہ مارچ ءَ پنجاب ءِ شھر لاھور ءَ یل کتگ-

سانمندیں کھولاں انسانی ھکانی گلاں ءُ میان اُستمانی ادارھاں چہ دزبندی کتگ کہ آ بلوچستان ءَ برجاہ زورانسری آوار جنی ءِ سر ءَ زوت گامگیج بزور اَنت ءُ بیگواھیں مردمانی یل کنائینگ ءَ دلجمی دیگ ءَ کرد ءَ پیلو بہ کن اَنت-

بلوچستان ءِ دمگ کچھی ءِ ھند ڈھاڈر ءَ چہ رسوکیں ھالانی رد ءَ بلوچ آجوئی لوٹوکیں مردماں میر باغ ءَ کنٹرول کتگ ءُ ناکہ بندی کتگ۔

دومی نیمگ ءَ تربت ءَ نیوی ءِ بنجل ءِ سر ءَ اُرش ءِ ھم ھال رس اِتگ ۔ دمگی مردمانی رد ءَ تربت نیول بیس ءِ سر ءَ ایم 12 ءِ گولہ باری ءَ تیرگواری کنگ بیتگ ۔ دھماکہ ءِ توارں بیم ءُ ترس ءِ تالان بیتگ۔

زانگ بہ بیت کہ بلوچستان ءِ جتا جتائیں دمگاں بلوچ آجوئی لوٹوکیں مردمانی نیمگ ءَ بندش برجاہ انت۔ ناکہ بندی ءِ وھد ءَ سلاہ بندیں گل ءُ پاکستانی لشکر ءِ نیام ءَ جنگ ءُ چوپ برجاہ اَنت ءُ سرکاری گاڑیانی ھوار شکی ئیں مردم ءُ کارندہانی دزگیر کنگ ءِ ھال پیداک انت۔

مرچی سُھب ء خضدار ءَ پاکستانی لشکر ءُ بلوچ آجوئی لوٹوکیں مردمانی نیام ءَ ترندین جنگ ءُ چوپ بوتگ ءُ کرخ ءَ سی پیک ءِ راہ ءِ سر ءَ آجوئی لوٹوکیں مردمانی کنٹرول چارمی روچ ءَ برجاہ اِنت۔

اھوالانی رد ءَ گوستگیں شپ ءِ دوازدہ ءُ نیم ءَ پاکستانی پوج ءَ سیاسی باسک ءُ بلوچ یکجھتی کمیٹی ءِ رھشون سید بی بی بلوچ ءِ لوگ ءَ بیڑ برتگ ءُ پٹ ءُ پول کتگ-

دمگی مردمانی رد ءَ سید بی بی ءِ نام چہ سرکار ءِ نیمگ ءَ شنگ بیتگیں پورتھ شیڈول ءَ ھم ھوار کنگ بیتگ ءُ آ ھمک ھپتگ ءَ سی ٹی ڈی ءِ گور ءَ پیشی ءَ ھم روگ ءَ اِنت۔

اے درگت ءَ سید بی بی ءَ رسانکدراں گون گپ کنان ءَ گوشتگ دوزادہ ءُ نیم ءِ نزیک ءَ سی ٹی ڈی، ایف سی ءُ چیریں ادارھانی کارندھاں لوگ ءِ سر ءَ بیڑ برت-

آئی ءِ رد ءَ کارندھاں زھگ ءُ زالبول چہ واب ءَ پاد کتگ اَنت۔ موبائلانی پٹگ ءِ ھواری ءَ لوگ ءِ سامان ھم چگل دیاں کتگ اَنت ءُ کھول زھنی ازیت ءُ ترسانی دیمپانی کنگ کپتگ۔

آئی ءِ گوشگ اِنت کہ اے وھد ءَ کارندھانی رویش گوں زالبولاں زوراکی ءُ گیر زمہ واری بیتگ- سید بلوچ ءِ رد ءَ کارندھاں آئی ءِ سر ءَ ناشرکاری ءِ کمکار ءُ گوں ڈاکٹر ماہ رنگ ءَ رھوت کنگ ءَ ھوار دومی ڈاکٹر ماہ رنگ جوڑ بوگ ءِ بھتام جتگ۔

آئی ءَ گیش گوشتگ کہ کارندھاں بیگواھیں ساجد اھمد ءِ بابت ءَ جست کتگ ءُ آئی ءِ برات ڈاکٹر حنیف شریف ءِ بابت ءَ جست گپتگ ءُ آئی ءِ نمبر زرتگ۔ سید بی بی ءَ گوشتگ کارندھانی نیمگ ءَ ھمے گوشگ بیتگ کہ ترا چہ ڈن ءِ ڈیھاں پنڈ رسگ ءَ اِنت۔

سید بی بی بلوچ ءَ گوشتگ منی نام پیسر ءَ ھم پورتھ شیڈول ءَ ھوار اِنت ءُ من ھمک وھد ءَ سی ٹی ڈی ءِ کِر ءَ پیشی ءَ ھم روگ ءَ آں۔ چہ ایشی ءَ ابید لوگ ءَ بیڑ برگ ءُ کھول ءِ ترسینگ ءُ سامانانی پروشگ چہ پھم ءَ ڈن اِنت۔

بلوچ لبریشن آرمی ءِ چینل ھکل ءَ آپریشن ھیروپ ءَ ھواریں دگہ دو نمیرانیں ھمراھانی اکس ءُ اھوال شنگ کتگ انت-

اولی ءِ پجار امیتاز بلوچ پنام ءِ حاجی توکل ء جنگیان بلوچ جھمنند بالیچہ تلوکان ءِ نام ءَ کتگ – آئی ءَ 2017 ءَ سلاہ بندین جھد ءَ ھوار بوتگ ءُ 2018 ءَ کوھی میدان ءَ اتکگ- آ 2020 ءَ بی ایل اے ءَ ھوار بوتگ، زامران، کلبر، دشت، تربت ءُ دگہ ھند ءُ دمگ ناصر آباد، میر آباد ءَ شھری نیٹ ورک ءِ زمہ واری ءِ گون بوتگ- فتح اسکواڈ یونٹ ءِ باسک بوتگ- آ آپریشن ھیروپ ٹو ءَ رودبن ءَ آپریشن کمانڈر بیتگ ءُ ھمود ءَ شھید بیتگ-

ھکل ءِ رد ءَ امتیاز بلوچ پنام ءِ حاجی توکل ھما زانتکاراں گوں ھوار بوتگ کہ آیاں بازیں.وھدے ءَ راجی آجوئی ءَ سلاہ بندیں جد ءُ جھد ءَ پرکار بیتگ انت-

آ چہ دوھزار ءُ ھبدہ ءَ سلاہ بندیں جھد ءَ ھمگرنچ بیتگ ءُ زوت وتی ستک ءُ باوری ءَ سنگتانی میان ءَ وتی کرد پیلو کتگ ءُ 2018 ءَ کوھی میدان ءَ اتکگ ءُ چریشی ءَ پد زامران، کلبر، دشت ءُ تربت ءَ ھواریں دمگاں جنگ ءَ بھرے زرتگ-

ھکل ءِ رد ءَ حاجی توکل نا ایوک ءَ کوھی دمگاں پرکار بیتگ بلکیں شھری نیٹورک ءَ ھم پرکار بیتگ ءُ جوانیں کردے پیلو کتگ انت – ناصر آباد ءُ میر آباد ءِ دمگاں شھری نیٹورک ءِ زمہ واری ءِ بستار ءَ گچینی رازداری ءُ رھبندانی درچ ءَ وتی کرد پیلو کتگ – ءُ کوھی ءُ شھری دویں دمگاں بلدکاریں سرمچارے بیتگ جتا جتائیں جاوراں جوانیں کردانی ھواری ءَ گام چِست کتگ انت-

ھکل ءِ رد ءَ حاجی توکل گل ءِ بنداتی ٹولی فتح اسکواڈ ءَ ھوار کتگ ءُ ایشی ءِ ھواری ءَ کیمپ ءِ شور ءُ سلاھانی کمیٹی ءِ باسک کتگ-

ھکل ءِ رد ءَ آپریشن ھیروپ ٹو ءَ رودبن ءِ ھند ءَ کمانڈر ءِ بستار ءَ وتی ھمراھانی رھشونی ءِ کتگ ءُ دشمن ءِ ھلاپ ءَ ترندیں جنگ کنان ءَ آجوئی ءِ واستا وتی ساہ ءُ سرے کربان کتگ انت- امتیاز بلوچ پنام ءِ حاجی توک جد ءُ جھد ءِ ھما راستی ءِ چیدگ بوتگ کہ زانتکار، رھبند، کربانی ءِ ستاہ ءَ گوں گھگیری زرمبشت مھکم بیت کن انت- اے ڈولیں کرد وتی زندگی ءَ پد جد ءُ جھد ءِ راجدپتر ءَ یک رژنائیں درورے بنت ءُ پشت کپ انت-

دومی ءِ پجار شھید لیاقت پنام ءِ نود ء مولابخش جھمنند کوھاڈ تمپ ءِ نام ءَ کتگ – آ 2019 ءَ بی ایل اے ءَ ھوار بوتگ ءُ زامران ءُ کلبر ءِ میدان ءَ بیتگ- آ گشتی کمانڈ بیتگ ءُ سائیڈ کیمپ کمانڈر زامران بیتگ ءُ آ زانتکارین مائن کارے بیتگ ءُ فتح اسکواڈ یونٹ ءِ بھر بیتگ ءُ آپریشن ھیروپ ٹو ءَ پل آباد ءَ نمیران بیتگٹ

ھکل میڈیا ءِ رد ءَ لیاقت پنام ءِ نود ءَ بی ایل اے ءَ ھوار بوگ ءَ پد زامران ءُ کلبر ءَ یکشل ءَ پرکار بوتگ ءُ وت ءَ یک زانتکاریں جنگولے ءِ دروشم ءَ دیم ءَ برتگ- کوھی دمگانی ناگیگیں جاوراں ابید نود ءَ ھروھد ءَ دیم دیم ءَ کتگ ءُ آئی ءِ جنگی سوچ زانتکاری ءِ اُنڈالاں گوں بندوک انت-

ھکل میڈیا ءِ رد ءَ نود ءَ وتی زمہ واریانی زانتکاری ءَ گشتی کمانڈری ءِ بستار دیگ بوتگ ءُ آئی ءَ کوھی ناگیگیں راھاں وتی ھمراھانی سروکی کنان ءَ دشمن ءِ سر ءَ ٹوھیں اُرش کتگ انت- ءُ دشمن ءِ سر ءُ پرانی سر ءَ سکا نگاہ ایر کتگ انت- چریشی ءَ پد آ زامران ءِ سائڈ کیمپ کمانڈر کتگ ءُ آئی ءَ رھبند جوانی ءَ زانتگ انت – ءُ آ مائن کاری ءَ سکا بلد بوتگ ءُ شورواں سکا پھریزکاری ءَ آئی ءَ کار کتگ- دشمن ءِ نیزور کنگ ءُ آئی پیش گامی ءِ دارگ ءَ جوانیں رپکے زانتگ انت- آ آجوئی لوٹوکیں گلانی ھمگرنچیں براس ءِ بازیں اُرشاں ھوار بوتگ ءُ ھمک تک ءَ یکشل ءَ اوشتانک بیتگ –

ھکل میڈیا ءِ رد ءَ نود ھمے جنگی رپک ءُ زانشت ءِ سبب ءَ گل ءِ فرنٹ لائن ٹولی فتح اسکواڈ ءَ ھوار بوگ ھمے چیدگی بیتگ- نود نا ایوک ءَ بودناکیں بیتگ بلکیں سکا گچینی پیسلہ داریں کاروائیاں آ زانتکار بیتگ- آپریشن ھیروپ ٹو ءِ وھد ءَ پل آباد ءَ آئی ءَ وتی ھمراھانی سروکی کنان ءَ دشمن ءِ ھلاپ ءَ سکا جنگ کتگ ءُ آجوئی ءِ راجدپتر ءَ نمیران بوتگ-

بلوچستان ءِ دمگ خضدار ءَ پاکستانی لشکر ءُ بلوچ آجوئی لوٹوکیں مردمانی میان ءَ مزنیں جنگ ءُ چوہ برجاہ اَنت، چارمی روچ اِنت کہ کرخ ءَ سی پیک روٹ ءِ سر ءَ آجوئی لوٹوکیں گلانی کنٹرول ءَ اِنت-

چہ خضدار شھر ءَ نزیک ءَ 70 کلومیٹر دور کرخ ءِ دمگ ءَ بلوچ آجوئی لوٹوک مرچی چارمی روچ ءَ سی پیک روٹ ءِ سر ءَ نشتگ انت کہ اود ءَ جتا جتائیں جاہاں چیک پوائنٹ جوڑ کنگ بوتگ انت ءُ سنیپ چیکنگ بوگ ءَ انت۔

دمگی مردماں ٹی بی پی ءَ گوں تران کنان ءَ گْوشتگ کہ مرچی سھب ءَ پاکستانی لشکر ءَ چہ جتا جتائیں جاھاں پیادگ ءَ دیم ءَ روگ ءِ کوشست کتگ ءُ ڈرون ءِ کمک ءَ کتگ ءُ ھمے وھد ءَ پاکستانی لشکر ءُ آجوئی لوٹوکیں مردمانی نیام ءَ ترندیں جنگ ءُ چوپ بندات بوتگ۔

دمگی مردماں گْوشتگ کہ اے جنگ ءُ چوپ سئے کلاک ءَ گیش برجاہ بوتگ ، ءُ ھمے وڑ دمگ ءَ تیرگواری ءُ تراک ءِ توار انگت ءَ ھست انت۔

گوستگیں روچ ءَ بمبتراک ءِ تہ ءَ فورسز ءِ پیادگیں سپاھیگ نشانگ جوڑ کنگ بوتگ اَنت۔ ھالانی رد ءَ اے تراک ءَ چہ دو سیکورٹی کارندہ بیران ءُ یکے ٹپی بوتگ۔

واکداراں انگت ءَ دمگ ءِ جاور ھال ءِ بابت ءَ ھچ وڑیں ھال ءُ اھوال نہ داتگ۔

ھالانی رد ءَ گوستگیں روچاں کرخ ءَ ناکہ بندی ءِ وھد ءَ تچگ ءِ کوشست ءَ دو مردم بیران ءُ یکے دزگیر کنگ بوتگ کہ گمان اِنت کہ آ پاکستانی انٹیلی جنس ایجنسی آئی ایس آئی ءِ بوتگ انت۔

اے سال ءِ 31 جنوری ءَ بلوچ لبریشن آرمی ءِ آپریشن ہیروف دوم ءِ وھد ءَ خضدار ءِ دمگ اورناچ ءَ چہ پاکستانی لشکر ءِ 7 کارندہ دزگیر کنگ بوتگ انت۔

بی ایل اے ءَ زندانیان ءِ بدلی ءِ شرت ءَ گپتگیں کارندھانی یلہ کنگ ءِ واستا یک ھفتگے ءِ ڈیڈ لائن داتگ ات بلے پد ءَ اے جار جنگ بوتگ کہ ءِ گامگیج ءِ نہ زورگ ءِ پشدر ءَ کارندھانی کُشگ ءِ جار جنگ بوتگ ات۔

عمان ءِ بھریہ ءَ آبنائے ہرمز ءَ یک تھائی جھازے ءِ سر ءَ اُرش ءَ پد بیست ملازم رکینتگ انتٹ

عراق ءِ اگدہ دارانی گشگ انت کہ بسرہ ءِ بندرگاہ ءِ نزیک ءَ خلیج فارس ءَ دو درملکی تیل ءِ ٹینکر ءِ سر ءَ تراک ءِ سبب ءَ یک مردمے بیران بوتگ۔

عراق ءِ جنرل کمپنی فار پورٹس ءِ سروک ءَ وتی بیان ءَ گشتگ کہ عراقی تیلاں لوڑیں دو درملکی ٹینکر ناشناسیں ارش کنوکاں نشانگ جوڑ کتگ انت۔

واکدارانی گشگ انت کہ 38 جھاز ءِ کارندہ رکّینگ بوتگ انت ءُ یک مردمے بیران بوتگ۔

جھاز ءِ ٹریکنگ ویب سائٹ ءِ رد ءَ دوئیں جھازانی نزیک ءَ ریسکیو کشتی گندگ بوتگ انت۔ انگت ءَ تراکانی سوب زانگ نہ بیتگ۔

بسرہ ءِ یک سیکورٹی بنشونے ءَ سی این این ءَ گوں تران کنان ءَ گْوشتگ کہ ایران ءِ یک کشتی یے کہ بوت کنت کہ آئی ءِ تہ ءَ تراکناکیں چیز ھوار بوتگ اَنت آ جھازے نشانگ کتگ اَنت بلے پٹ ءُ پول برجاہ اِنت۔

دومی نیمگ ءَ برطانوی میری ٹائم مانیٹر ءَ ھم ھمے وڑیں ھال رسگ ءِ پدرائی کتگ۔ عراق ءِ اسٹیٹ آئل مارکیٹنگ آرگنائزیشن ءَ اے وئیل ءِ سر یخ سک باز دلپدردی ءِ درشانی کتگ۔ عراقی اگدہ دارانی رد ءَ اے اُرش ءَ پد تیل ءِ بندرگاھانی سر ءَ آپریشن مھتل کنگ بیتگ اَنت۔

ایشی ءَ چہ پیسر عمان ءِ بھریہ ءَ آبنائے ھرمز ءَ تھائی جھاز ءِ سر ءَ اُرش ءَ پد بیست ملازم رکینتگ اَنت۔ اے وئیل عمان ءِ کش ءُ گوراں چہ 24 کلومیٹر ءِ دوری ءَ بوتگ کہ ملک ءِ سرکاری ھال رسانکی ادارہ ءَ اے گپ ءِ پدرائی کتگ۔

پنجگور ءَ یکیں روچ ءِ تہ ءَ دومی لاشیں دزکپگ ءَ اِنت- دمگی اِھوالکار ءُ پولیس ءِ رِد ءَ پنجگور ءِ دمگ وشاپ پُھل ءِ نزیک ءَ یک ورنایے ءِ لاش دزکپتگ کہ آئی ءِ پجّار ضمیر ء ناصر ڈگارزئی نام ءَ چہ بیتگ-

اِھوالکار ءِ رِد ءَ ضمیر سے مارچ ءَ ناشناسیں مردماں آوار جتگ اَت چریشی ءَ پد آ بیگواہ بیتگ- بلے لھتے روچانی گوزگ ءَ پد آئی ءِ لاش ءِ دزکپگ ءِ گپ دیم ءَ اَتکگ-

اے وئیل یک انچیں کھولے ءَ گوں ھمگرنچ اِنت کہ آئی ءِ کسّہ پیسر ءَ چہ دردناکیں راجدبترے ءَ دار اِیت- ضمیر ءِ پت ناصر ڈگار زئی 2011 ءَ پاکستانی پوج ءَ آوار جتگ اَت – اِھوالکار ءِ رِد ءَ اے وھد ءَ آ تیر جتگ کشتگ ءُ لاشے سرپد بیتگ چگل داتگ بلے آ وشبھتی ءَ رکّ اِتگ-

بلے اے کسّہ ھلاس نہ بیتگ- جولائی 2011 ءَ ناصر ڈگارزئی دوبر آوار جتگ ءُ پد ءَ آ کُشتگ-

نو سالاں پد آئی ءِ چُک ضمیر ءِ کوش ءَ اے کھول ءِ ٹپّ دوبر نوک کتگ اَنت- ضمیر لھتے روچ ءَ ساری آوار جتگ اَت ءُ نو آئی ءِ لاش دزکپتگ-

زانگ بہ بیت پنجگور ءَ ھمے روچ ءَ اشی ءَ ساری ھم یک لاشے دزکپتگ اَت ءُ آ کلات ءِ جھمنند گوشگ بیگ ءَ اِنت-