TBP Balochi

بلوچستان ءِ جتاجتائیں دمگاں پاکستانی پوج ءَ ھشت مردم آوار جتگ ءُ بیگواہ کتگ اَنت-

گیشیں ھالانی رِد ءَ شال ءِ دمگ چہ سریاب دگ، کلی قمبرانی ءَ سیادی داروکیں سیف اللہ ء عطاء اللہ 12 مارچ 2026 ءِ شپ ءِ کساس دو ءَ چہ منوجان دگ، خلیفہ چوک شال ءَ پاکستانی پوج ءِ کارندھاں آوار جنگ ءَ پد ناشناسیں جاھے ءَ برتگ- سیف اللہ یک مکینکے ءُ آئی ءِ اُمر کساس بیست یک سال اِنت-

ھمے وڑ تیاب دپی شھر گوادر ءِ ھند چہ جیونی ءَ سیادی داروکیں مجید ء غلام محمد 13 مارچ 2026 ءِ سھب چار ءِ نزیک ءَ آئی ءِ جند ءِ میتگ چہ پانوان ایف سی ءُ ایم آئی ءِ کارندھاں آوار جتگ ءُ ناشناسیں جاھے ءَ برتگ- مجید اُمر کساس بیست سال اِنت ءُ آ نودربرے-

ھمے وڑ ھُزدار ءِ دمگ چہ زھری شھر ءَ سیادی داروکیں دو براتانی زورانسری آوار جنی وئیل دیم ءَ اَتکگ اَنت- ھالانی رِد ءَ شمس بلوچ ء حاجی قادر بخش دو مارچ 2026 ءِ بیگاہ ھشت ءَ آئی ءِ لوگ، چہ زھری شھر ھُزدار ءَ پاکستانی پوج ءِ کارندھاں آوار جتگ ءُ بیگواہ کتگ-

آئی ءِ برات قمر زھری ء حاجی قادر بخش اشی ءَ ساری نوزدہ فروری 2026 ءِ شپ کساس یک نیم ءَ شال ءِ دمگ چہ بی ایم سی لیبر کالونی ءَ سی ٹی ڈی کارندھاں آوار جنگ ءَ پد بیگواہ کتگ-

ھمے وڑ کراچی ءِ دمگ چہ ماری پور ءَ سیادی داروکیں دریاوردی امجد ء گوھرام پانزدہ جنوری 2026 ءِ سُھب ءَ اورماڑہ ءِ ھند ءَ ملٹری انٹیلیجنس ءِ کارندھاں آوار جنگ ءَ پد ناشناسیں جاھے ءَ برتگ – امجد ءِ اُمر کساس سی سال اِنت آ یک دریاوردی- وھدے کہ آئی دروگیں دزگیری چہ کراچی پیش داشتگ ءُ آئی ءِ سیادی یک سلاہ بندیں گلے ءَ ھوار کتگ-

کھول ءِ رِد ءَ اے مرد ءِ آوار جنگ ءَ پد آئی ءِ ھچ وڑیں ھال نیست نانکہ آمیدگس ءَ پیش کتگ-

کھول ءَ انسانی ھکانی گل ءُ دگہ میان استمانی ادارھاں چہ دزبندی کتگ کہ آ زورانسری آوار جنی ءِ ھلاپ ءَ گامگیج بزور اَنت بیگواھیِں مردمانی یل کنائینگ ءِ ھاتر ءَ کرد پیلو بکن اَنت-

ھمے وڑ چہ تربت ءَ بالاچ پیرل ء پیرل ءُ بالاچ نصیر ء نصیر کہ ناصر آباد ءِ جھمنند گوشگ بیگ ءَ اَنت، جمعہ ءُ شمبے ءِ میانی شپ ءَ پاکستانی پوج ءَ آوار جتگ ءُ ناشناسیں جاھے ءَ برتگ اَنت-

دمگی اِھوالکار ءِ گوشگ اِنت کہ دوئین مردم شپ ءِ وھد ءَ یک کاروائی ءِ میان ءَ آئی ءِ دمگ چہ برتگ اَنت، چریشی ءَ پد آیانی کھول ءَ آیانی درگت ءَ سرپدی دیگ نہ بیتگ-

ھمے میان ءَ گوستگیں شپ ءَ یکرندے پد ءَ اے دمگ ءَ پوج نیمگ ءَ چہ بیڑبرگ برتگ ءُ یک نادُراھجانیں کماشیں مردمے ءِ وتی ھمراھی ءَ برگ ءِ جُھد کتگ، بلے دمگ ءِ مردماں گھگیری کتگ چریشی ءَ کارندہ واتر شتگ اَنت-

دومی نیمگ ءَ ھاران ءَ ھم شمبے ءِ روچ ءَ ناشناسیں سلاہ بندیں مردماں عبدالغنی ء عبدالحفیظ کبدانی چہ خاران شھر تھانہ ءِ نزیک ءَ یک سرفیں گاڑی ءَ آوار جتگ-

چمّگدانی رِد ءَ سلاہ بندیں مردم اناگاہ ءَ سر بیتگ اَنت ءُ عبدالغنی زورانسری گاڑی ءَ سوار کتگ ناشناسیں جاھے ءَ شتگ اَنت-

بلوچستان ءِ دمگ تربت ءُ گوادر ءَ پاکستانی پوج ءِ سر ءَ اُرش، دو کارندھانی بیرانی-

گیشیں اھوالانی رد ءَ تربت ءِ بالی پٹ ءَ پاکستانی لشکر ءِ پوسٹ ءُ جیٹ فیول ءِ سائٹ ءِ جاہ سلاہ بندیں اُرش ءَ نشانگ جوڑ کنگ بوتگ۔

دمگی مردمانی رد ءَ اے اُرش یک شمبے ءِ شپ ءَ بوتگ کہ تربت بالی پٹ ءِ کش ءُ گوراں اناگہ ءَ تیرگواری ءُ تراکانی توار اشکنگ بیتگ انت۔ دمگی مردمانی گشگ انت کہ دمگ ءَ کم چہ کم دوازدی ءَ گیش تراک ءِ توار بوتگ ءُ وھد وھد ءِ سر ءَ مزنیں تیرگواری ھم بوتگ۔

اھوالانی رد ءَ اُرش کنوکاں پاکستانی لشکر ءِ پوسٹ ءُ بالی پٹ ءِ تہ ءَ جاہ منندیں جیٹ فیول ءِ زِر ءِ جاہ ءَ نشانگ جوڑ کتگ۔

واکداراں اے وئیل ءِ ھال راست کتگ ءُ گشتگ کہ تربت بالی پٹ ءِ نزیک ءَ کارجاہ ءِ سر ءَ اُرش کنگ بوتگ بلے اُرش ءِ گمانی تاوان ءُ مالی تاوان ءِ بابت ءَ سرکاری بیان شنگ نہ بوتگ۔

ھمے وڑ ءَ گوادر جیونی پانوان ءَ ناشناسیں مردماں پاکستانی کوسٹ گارڈ ءِ سر ءَ اُرش کتگ ءُ چریشی ءَ دو کارندہ جاہ پہ جاہ ءَ مرتگ انت-

بلوچ لبریشن آرمی ءِ آفیشل چینل ھکل ءَ آپریشن ھیروپ ٹو ءَ ھواریں دگہ دو نمیرانیں ھمراھانی اکس ءُ اھوال شنگ کتگ انت-

اولی ءِ پجار رضا پنام ءِ مشمار ء شبیر احمد گیشکوری جھمنند سبی ءِ نام ءَ کتگ- آئی ءَ سال 2025 ءَ بی ایل اے ءَ بھر زرتگ ءُ شور پارود ءَ بیتگ ءُ ایس ٹی او ایس یونٹ ءِ بھر بیتگ ءُ آپریشن ھیروپ ٹو ءَ نوشکی ءَ شھید بیتگ-

ھکل میڈیا ءِ رد ءَ آجوئی ءِ جنگ ءَ درستاِ مستریں تاکت انسان ءِ ستک ءُ آئی ءِ کربانی بیت انت- مشمار ھمے ستک ءُ پلسپہ ءِ ھواری ءَ سلاہ بندیں گھگیری ءِ بھر بیتگ- آئی اے راہ سرجم ءَ زانشت ءِ بندوکی ءِ ھواری ءَ سرجم کتگ- پرچاکہ آ سرپد بیتگ کہ زیردستیں راجانی آجوئی ءِ منزل ءَ سر بوگ ءَ دراھیں گھگیری، اوشتانکی ءُ کربانیاں گوں گوزگی انت –

آپریشن ھیروپ ٹو ءِ وھد ءَ نوشکی ءِ میدان ءَ جاڑیگ بوان ءَ جنگ کنان ءَ مشمار ءَ وتی جان ءُ ساہ ندر کتگ انت – بلے آئی ءِ کربانی ایوک ءَ یک مردمے ءِ کربانی نہ بیتگ بلکیں اے جد ءُ جھد ءِ بھر جوڑ بیتگ لہ یک راجے ءَ گلامی ءَ کش ایت – اے دابیں کرداں منینتگ وھدیکہ یک راجے ءِ ورنا وتی ساھانی نھاد ءِ سر ءَ آجوئی ءِ واب ءَ زندگ کن انت- گڑا راجدپتر ءِ تاک گڈسر ءَ آجوئی داب ءَ مٹ بنت-

دومی ءِ پجار افضل بلوچ پنام ءِ آفتاب ء عبدالرحیم جھمنند نلی مشکے ءِ نام ءَ کتگ- آئی ءَ 2025 ءَ بی ایل اے ءَ بھر زرتگ ءُ فتح اسکواڈ یونٹ ءِ بھر بیتگ – آ آپریشن ھیروپ ٹو ءَ نوشکی ءَ شھید بیتگ-

افضل بلوچ پنام ءِ آفتاب ءِ سیادی بلوچستان ءِ دمگ نلی مشکے ءَ بیتگ- بی ایل اے ءِ ھوار بوگ ءَ پد آ شور پارود ءَ شتگ – افضل بلوچ 2023 ءَ زورگریں پاکستانی چیریں ادارھاں آوار جتگ ءُ یک سالے ءَ داں بیگواہ بیتگ ءُ پد ءَ یل دیگ بیتگ- دشمن ءِ ٹارچر سیلاں یل بوگ ءَ پد آئی ءَ وتی راہ گچین کتگ- اے تجربگ ءَ آ گیش زانشتی رنگ ءَ مھکم کتگ ءُ اے کَچ ءَ سر بوتگ کہ راجی جیڑہ ءِ گیش ءُ گیوار تھنا گھگیریں جنگ انت- دشمن ءِ ٹارچر سیلاں ترندیں ازیت ورگ ءُ مرگ ءِ کبول ءَ ابید آئی ءَ کوہ وتی گِس جوڑینتگ انت دانکہ دشمن ءِ تاکت ءِ دیمپانی ءَ تاکتے پروز بہ دنت-ھمے زانشت ءِ پد ءَ آئی ءَ 2025 ءَ بی ایل اے ءَ بھر زرتگ ءُ وتی زانشت راجی آجوئی ءِ جد ءُ جھد ءَ گوں بندوک کتگ-

آفتاب آئی ءِ جنگی سنچ ءُ بودشت ءِ بنیاد ءَ گل ءِ بنداتی ٹولی فتح اسکواڈے گچین کتگ- آپریشن ھیروپ ٹو ءِ وھد ءَ نوشکی ءِ پٹ ءَ آفتاب ءَ وتی ھمراھانی ھواری ءَ جنگ ءَ ھوار بوتگ ءُ ھمے جد ءُ جھد ءِ وھد ءَ آئی ءَ وتی ساہ ءُ جان ندر کتگ-

ندر پہ بانکیں گوھار شھید پدائی ھوا ئے نام ءَ

لچہ: نمیران

لچہ کار: جیم گوھرام

بلوچیں زالبولے ءَ
پدائی سرمچارے ءَ
پہ شنک براتاں گوھارےءَ
مدام جنگ ءَ ساڑی ءَ
چو شیر زالیں بانڑی
گوھاریں میریں چاکری
پہ ننگ ءُ گیرت ءَ مری
بلوچی زھگے گیرتی
کہ سھتاں سوچی زرگری
نہ نندی تھت ءَ مھتری
کلات ءُ کوٹاں ڈاڈری
بداں گوں جنگ دنت مڑی
آ ملکموت ءَ مھتلی
داں تیر ءَ کنت گُڈسری
تپنگ ءَ آس دنت وتی
وتارا جنت ءُ وت کُشی
ءُ جنت کندگے گشی
آ بیل ءُ سنگتاں وتی
ھوار ھواری رُکستی
شھیدیں پہ وتن مری
مسال پہ نکش دروری
جہان ءَ نامی ایر بی

بلوچستان ءِ جتاجتائیں دمگاں پاکستانی پوج ءِ سر ءَ انّوگیں کلاکانی میان ءَ بازیں اُرشانی ھال اِنت آیانی تہ ءَ درزنانی کارندہ مرتگ ءُ ٹپی بیگ ءِ گمان کنگ بیگ ءَ اِنت-

دمگی اِھوالکار ءِ رِد ءَ اُرش ھاران، ڈغاری ءُ پنجگور ءِ دمگاں کنگ بیتگ اَنت-

ھاران ءِ دمگ گرُک ءِ نزیک ءَ سلاہ بندیں مردماں پاکستانی پوج ءِ گاڑیانی کاروان تُرندیں اُرش ءِ نشانگ کتگ- دمگی اِھوالکار ءِ رِد ءَ اُرش ءَ پوج ءِ کم چہ کم شش گاڑی تچکی ءَ نشانگ ءَ اتکگ اَنت- ناسرجمیں ھالانی رِد ءَ اے اُرش ءَ بیست چار ءَ گیش پوجی کارندہ مرتگ اَنت وھدے کہ بازین ئِے ٹپی بیگ ءِ ھم ھال اِنت-

اِھوالکار ءِ رِد ءَ اُرش ءَ پد دمگ ءَ پوج ءِ مزنین کچے ءَ اوشتارینتگ ءُ برزی چاریگی ءِ ھاتر ءَ ڈرون بالگرد بال داتگ اَنت-

واکدار ءِ نیمگ ءَ چہ وئیل ءِ درگت ءَ ھچ وڑیں درشان شنگ کنگ نہ بیتگ-

ھمے وڑ گوستگیں روچ ءَ ھاران ءِ ھمے یکیں دمگ گرُک ءَ پاکستانی پوج ءِ گرکُ چیک پوسٹ ءِ واستا راشن بروکیں یک ٹرکیں گاڑی یے سلاہ بنداں داشتگ ءُ گوں راشن ءَ ھوار دستیگ کتگ برتگ-

ھمے میان ءَ شال ءِ نزیک ءَ ڈغاری ءِ دمگ پنگو ءَ ھم پاکستانی پوج نشانگ کنگ بیتگ اود ءَ پاکستانی پوج ءِ یک گاڑی یے تراک ءِ نشانگ ءَ اَتکگ- بنداتی ھالانی رِد ءَ تراک ءَ جانی تاوان بیتگ بلے بیرانی ءُ ٹپّیانی کچ زانگ نہ بیتگ اَنت-

دمگی اِھوالکار ءِ گْوشگ اِنت کہ اشی ءَ ساری ھمے ھند ءَ انسداد ناشرکاری ( سی ٹی ڈی) ءِ کارندہ ھم نشانگ کنگ بیتگ اَنت- سلاہ بندیں مردماں ھما وھد ءَ نشانگ کتگ وھدے کارندہ وتی جند گاڑی ءَ سپر ءَ بیتگ اَنت- اے اُرش ءَ دو کارندہ جاہ پہ جاھی بیران بیتگ اَنت-

ھمے وڑ گوستگیں شپ ءَ پنجگور ءِ دمگ پروم ءَ سلاہ بندیں مردماں پاکستانی پوج ءِ یک کاروانے سنگر گپتگ ءُ اُرش کتگ گمانی تھرمل اسکوپس ءُ نائٹ وژن کارمرز کنگ بیتگ-

بنداتی ھالانی رِد ءَ اُرش ءَ پوج ءِ یک گاڑی یے تچکی ءَ نشانگ جوڑ بیتگ ءُ وھدے کہ دو گاڑیاں ھم تاوان رس اِتگ-

اے اُرش ءَ پد وھدے کمانڈنٹ ٹپاسی ءِ ھاتر ءَ وئیلجاہ سر بیتگ اَنت گُڑا اود ءَ ساڑی کارندہ گمانی اسنائپر اُرش ءِ نشانگ کتگ ءُ کشتگ، چمّگدانی گوشگ اِنت اُرش ءَ کشگ بیتگیں کارندہ ءِ لاش نزیکیں پوجی بُنجل ءَ برگ بیتگ-

دمگی اِھوالکار ءِ رِد ءَ اے اُرش ءَ پاکستانی پوج ءَ مزنیں کچے ءَ جانی تاوان چست کنگ کپتگ بلے تنی وھدے سرکاری نیمگ ءَ ھچ وڑیں درشان شنگ کنگ نہ بیتگ-

تنی وھدے بیتگیں اُرشانی زمہ واری ھچ گل ءَ نہ زرتگ اَنت

منی ءُ کوھانی مھر

نبشتہ کار: سدرہ بلوچ

دی بلوچستان پوسٹ

منی ءُ کوھانی میان ءَ اے چونیں مھرے نہ زان آں، بلے من ءَ کوہ انچو وتی نیمگ ءَ بر اَنت گُش ئے من اِیشانی کرنی ئیں نمیران بوتگیں یک مھرے ءِ بھر آں۔ منی دم بُرتگیں ارواہ ھردے کوھانی شِنگ اِتگیں، سارتیں ساھگاں دمے بالاں کنت منی اندر ءِ درائیں شُور ءُ شار مَدان مَدان ءَ گار بوان بنت ءُ لھتیں پُرمھریں تاھیر سینگارگ بنا کن اَنت۔ روچ وتی روکیں بالاد ءَ کوھانی پُشت ءَ چیر بوان بیت ساھگ وت ءَ تپتگیں زمین ءِ سر ءَ پچ کنان کن انت روزرد ءِ سُھریں شھم کوھانی سر ءَ سر کَش انت چو بانوری ءِ گُشان ءَ وت ءَ مانپوش اَنت ءُ شَھمانی رنگ چّمانی سیاھیاں ایر دے انت گُش ئے کوھانی ساھِگ ءُ روچ ءِ رُژنائی ءِ میان ءَ ھما لشکرانی جنگی پِڑاں سھرا بنت کہ ھاک ءُ ھونانی مجُاں سنگر اِتگ آں۔

ھمے ساھت ءَ کوش کوھانی دامن ءَ رکس کنگ ءَ بہ بیت گوں لھمیں داباں ھاموشیں کوھسار ءِ بالاد ءَ ایر بئیت ترا چو پُرشتگیں وابے ءِ وڑ یلءَ وتی امبازاں بہ زور اِیت، پدا اناگہ ءَ گُشان ءَ گوں وت برگ ءِ جھد ءَ بہ کنت مھپراں چو مھراں مرتگیں سپاھی ءَ بہ شنگین ایت گڑا ھمے سما بیت اے کوھانی دامن ءَ یک بے تواریں مھرے گردان اِنت کہ آئی ءِ کسّہ انگت ابدمان اِنت۔

ھَمک نیمگ ءَ ھاموشی ءُ ابیتکیانی لشکر ایر دیگ ءَ بہ بنت کوہ وتی ھنکین ءَ شَیر رجگ ءَ بہ بنت ھمے دمان ءَ ھَور گوں ترانگانی ھمراھی ءَ گوارگ بنا بکنت آزمان وت ءَ اِزمکارے جوڑ بکنت جمبرانی ھَمک دابیں اِزم کوھانی سر ءَ سازگ ءَ بہ بیت ءُ ھُشکیں زمین تر بوان بہ بیت ترّیں ھاکانی ھما وشبوہ تالان بہ بیت کہ گُش ئے دو مھر کنوکانی آروس ءِ بوھاں مینگ بوتگ آں۔ پُل ءُ گلاب میسّگ ءَ بہ بنت۔ درچک ءُ دار پد ءَ وتی ورنائیں دروشم ءَ جَنَگ ءَ بہ بنت۔ ھار کوھانی سر ءَ مَلّگ ءَ بہ بنت۔ شیپ ءُ کور تچگ ءَ بہ بنت۔ پد ءَ ھَور ءِ گام سُبک بوھان بہ بنت۔ بالوانی رمگ ءِ گلزمین ءَ سمبھینگ ءَ بہ بنت۔ مُرگ وتی کُدوھاں چہ بال کنان ءُ آزمان ءِ دل ءَ بانزلاں پچ کنان بہ باں ۔ ءُ من اے سرجمیں ندارگانی کلکشان ءَ بہ اوشتاں ءُ اے جیڑگ ءَ بہ باں ابیتکی ھم برے برے مھر ءِ جُھلانک تریں دروشم اِنت۔

اے کوھانی دلبند ءَ ھردیں من گاماں دیم ءَ بران باں منی واھگ گیش بوھان بنت آ کوہ ءِ پُشتی ندارگ چون بیت؟ بلکیں اود ءَ روچ دگہ رنگ ءُ دابے ءَ گوں ایر بُک اِیت۔ بلکیں اود ءِ گواتاں دگہ کسّہ گوں۔ بوت کنت کوھانی پُشت ءَ دگہ آزمانے ھست گیشتر زیبدار ءُ گیشتر شاھگان اِنت؟ ھَمک گام ءَ یک نوکیں ندارگے پیسری ءَ چہ گیشتر دلکش ءُ گیشتر زیبدار اِنت۔

ھَمُک گام ءَ دور یک آبشاریں توارے من ءَ وتی نیمگ ءَ بارت گُش ئے یک مھروانے منی نام ءَ گِرگ ءُ من ءَ توار پر جَنَگ ءَ اِنت۔ برے دور یک شوانگے ، درچکے ءِ ساھگ ءَ نشتگ گوں ملوریں چمّاں وتی رمگ ءَ چارگ ءَ اِنت گُش ئے یک شھیدی ءَ وتی واب ھما شوانگ ءِ امانت کُتگ اَنت ءُ رُکست بوتگ اَت۔ برے کُل ءِ ساھگ ءَ یک دمبرتگیں سرمچارے ءَ وتی مھگونگ ءِ گُشان ءِ لَمب پر داتگ ءُ ایمنی واب کپتگ۔ برے یک پیرزالے ءَ ءُ گوں وتی کماش ءَ نشتگ نُماسگاں گوں وتی وھد ءِ کسّہ ءَ آرگ ءَ انت۔ برے بزگر ءِ وتی ھیالانی تہ ءَ گار اِنت نِشتگ ءُ پات ءَ گْوپّگ ءَ اِنت۔ برے کسانیں زھگ ءُ گونڈل اَنت کوہ ءِ وتی لَیبجاہ جوڑ کُتگ اَنت۔ برے ورناہ ءُ شیرزالانی کاروان ءِ سلاہ اِش بڈ ءَ اَنت پہ وتن رھادگ اَنت۔ برے جنگ داتگیں ٹولی یے کوپگ ءَ سنگتانی جون بڈ ءَ اِنت واتر اِنت۔

ھُمک گاماں کوھانی بے تواری ءِ تہ ءَ یک نوکیں سوتے گُوشاں کپ اِیت، اے سوتانی تہ ءَ ناں لبز ٹھنت، نا ساز ءُ سروز گُش ئے اے سوت کوھاں وت پربستگ اَنت۔ برے تاکانی زیمر اَنت وت ماں وتاں سُک سُک ءُ ھلوت ءَ اَنت۔ برے سینگانی اندر ءَ زھمانی زھاں پاد ءِ پادینک ءَ چُکّگ ءَ اَنت۔ برے گوات ءِ بے تواری ءِ تہ ءَ گُش ئے آشوب ءِ اوگام اَنت۔ ویرانیں کِشکانی رپتگیں مردمانی پاد بْرمش اَنت۔ بھارانی تچوکیں آبشارانی بشارت گُش ئے بنا کُتگیں زیبائیں جنگی ءِ جار اِنت۔ نازبوھانی چاپ ءُ نازینک، شپ ءَ استالانی لیلو گُش ئے اے دمبرتگیں کوھاں وتی امبازاں واپینگ ءَ اَنت۔

ھردے من کَور ءِ لمب ءَ ننداں پاداں تچوکیں آپ ءِ تہ ءَ جنان ءُ چمّاں کوھانی نیمگ ءَ شانک دیاں گڑا اِیشانی بُرزیں بالاداں گیش من ءَ اِیشانی مھکمیں توکل ءُ اوپار ھیران کن اَنت منی ھیال ءَ دگہ بے تاھاپیں کِشکے ءَ سرگر آں، پد ءَ سما کناں اے کوھاں وتی سینگ ءَ چنچو ٹپّی ئیں جنگول وتی گُڈّی ساہ ءِ زُورگ ءَ دیستگ اَنت۔ اے سنگانی لُنٹاں چنچو جندندریانی پیشانی چُک اِتگ ءُ گُڈی ساھتاں رُکست کُتگ اَنت۔ جنگانی میان ءَ اے کوہ چنچو رند ءَ جنگولانی دیم ءَ اُوشتاتگ اَنت سِستگیں تیر ءَ پیسر وتی دلبند ءَ وارتگ اَنت۔ چنچو رند ءَ شوروھانی (بارودانی) آس ءَ ایشانی سر ءَ وت ءَ پروشتگ۔ چنچو زمین زادگاں تُپنگ ءِ نلءِ سر ءَ سکّ داتگ ءُ چمّ آزمان ءَ کُتگ اَنت لنٹانی سر ءَ بچکندگ ءِ سمبھینتگ ءُ گُڈی تیر ءِ پلسپہ زُرتگ۔ چنچو ایردستیں راجانی درد ءُ بزگی اے کوھاں وتی دل ءَ بار داتگ اَنت۔ چنچو لاش ماں ویرانگاں واپینتگ اَنت۔ بارے اے کوھاں چنچو دیمونی دیستگ اَنت، چنچو اھدے جنگ وتی کوپگاں زُرتگ۔ چنچو کرن ءِ گلامی سگ اِتگ، چنچو دَری کدم اے سَرزمین ءِ سر ءَ گّوستگ اَنت چنچو بیرک مٹینگ بوتگ چنچو دود ءُ زبان اتکگ ءُ شُتگ انت۔ پد ءَ دَرسما ئِے باں اے کوہ چو مھکم چون بوت کن انت دردانی مھاراں اِشانی دیم ءَ سلاہ چگل داتگ اَنت، اگاں اندوہ ءِ سیاہ گواتاں وتی سَر اِیشانی کدماں دور داتگ اَنت۔ اے گریوگ نہ زان اَنت اگاں اِیشانی ارس آبشار بنت ریچ اَنت۔ اِشانی ٹپّ گِندگ ءَ نیا اَنت اگاں سنگانی چادر ءَ چیر دیگ بوتگ اَنت۔

مدام زُلمانی سیاہ گواتاں اے سرزمین ءِ سر ءَ وتی گام ایر کُتگ اَنت گَھگیری ءَ کوھانی دامن داشتگ۔ اے کوہ ھُمک دور ءَ بلوچ ءِ پاسبان بوتگ اَنت ۔ شھراں زُلم ءُ زوراکیاں جاگہ کُتگ تُرس ءُ بیم ھَموک ھند ءُ میتگاں ایر کپان بوتگ اَنت گڑا پیش ھمے کوھاں جنگ ءِ چادر مانپوشتگ، ءُ ھمے سکین ئِے داتگ مارا تھنا جنگ کنگی نہ اِنت وتی تہ ءَ مھکم بوھگ ءِ تاب آرگی اِنت۔ اے کوہ گوستانک ءِ ھمک دور ءِ راجدپترانی تاک اَنت ناں سوچگ بنت ءُ نیکہ ولگوج بنت، اگاں اے بہ زبان مہ بوتین ءَ گڑا بہ گند ئے راجدپترانی ھَمک کتاب ھاموش اِت اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ دمگ کیچ ءَ پاکستانی پوج ءَ یک ورنایے آوار جتگ ءُ بیگواہ کتگ-

اِھوالکار ءِ رِد ءَ بیگواہ کنگ بیتگیں مردم ءِ پجّار نظام بلوچ ء محمد بجار ءِ نام ءَ چہ بیتگ کہ کیچ ءِ دمگ سنگ آباد ءِ جھمنند اِنت-

دمگی اِھوالکار ءِ گوشگ اِنت کہ نظام بلوچ پاکستانی پوج ءَ دوازدہ مارچ ءِ شپ ءِ بے وھد بیتگ-

کھول ءِ رِد ءَ نظام بلوچ ءِ دزگیری ءَ پد آئی ءِ ھچ وڑیں ھال سر نہ بیتگ، چریشی ءَ پد کھول سک تُرس ءِ آماچ اِنت-

ایران ءِ لشکر ءَ متحدہ عرب امارات ءُ عراق ءَ امریکہ ءِ لشکری ​​بنجل ءُ اسرائیل ءِ رھشونانی نشانگ جوڑ کنگ ءِ ٹاہ داتگ ۔

بی بی سی عربی ءِ رد ءَ شمبے ءِ روچ ءِ سھب ءَ ایران ءِ یکجاھیں فوجی کمانڈ ءِ جارکش خاتم الانبیہ ءَ وتی بیان ءَ ٹاہ داتگ کہ ایرانی لشکر ءَ 10 جاگہ ​​نشانگ جوڑ کتگ کہ آھانی گشگ اِنت کہ آ اسرائیل ءِ رھشونانیگ اَنت۔

جارکش ءَ گشتگ کہ اے اُرشاں متحدہ عرب امارات ءِ الظفرہ بیس ءُ عراق ءِ اربیل ھم میزائل ءُ ڈرون ءِ گوما نشانگ جوڑ کنگ بوتگ انت۔

بلے ایرانی لشکر ءَ اے اُرشانی سبب ءَ بوتگیں تاوان ءُ مال ءِ تاوان ءِ بابت ءَ ھچ وڑیں ھال ءُ اھوال نہ داتگ انت۔

بلوچستان لبریشن فرنٹ ءِ جارکش میجر گْوھرام بلوچ ء شنگ کتگیں درشان ءِ تہ ءَ گْوشتگ بی ایل ایف ءِ یک جاڑیگیں ٹولی ءَ دوازدہ مارچ 2026 ءَ گوادر ءِ ھمگرنچیں دمگ میرجت ءُ ڈومب ءِ میانی ھند سر ءَ سنگر گپتگ زورگریں پاکستانی پوج ءِ دو موٹر سائیکلاں سوار چار کارندہ نشانگ کتگ اَنت- نشانگ بیتگیں پوجی کارندہ تیل کشیں گاڑیاں چہ زر گرگ ءَ ھمگرنچ بیتگ اَنت- زانگ بہ بیت زورگریں پاکستانی پوج ءُ دگہ پورسز تیل کشیں گاڑیاں چہ زر گر اَنت بلوچ ٹرانسپورٹراں مالی پُلپانچ کن اَنت – بی ایل ایف اے کاروائی ءِ آسر ءَ دُژمنیں پوج ءِ سے کارندہ جاہ پہ جاھی مرتگ اَنت، وھدے کہ یک سکا ٹپی بیتگ اَنت-

جارکش ءَ گْوشتگ ھمے یکیں روچ ءَ دگہ کاروائی ءَ بی ایل ایف ءِ سرمچاراں تربت شھر ءَ دُژمن ءِ گچین ءِ پوجی بُنجاہ نیول بُنجل سر ءَ 107mm ءِ دو راکٹ آس داتگ ءَ آ نشانگ کتگ- دوئیں میزائل بُنجل ءِ میان ءَ وتی گچین کتگیں نشانگ ءَ کپتگ اَنت- چریشی ءِ آسر ءَ زورگریں پوج ءَ مزنیں کچے ءَ جانی ءُ مالی تاوان چست کنگ کپتگ- دُژمن ءِ ماڑی بندیں اوتاکانی تہ ءَ اے میزائل اُرش ءَ اے راستی ءِ منانک اِنت کہ زورگریں پوج سرمچارانی دست ءَ ھچ جاہ ءَ ھم مُھر نہ اِنت-

جارکش ءَ گوشتگ دگہ یک کاروائی یے ءَ سرمچاراں شش مارچ 2026 ءَ جھاؤ ءِ دمگ گزی ءَ پوجی چیک پوسٹ سیکورٹی ءَ اوشتوکیں پوجی کارندہ ءِ سر ءَ اسنائپر رائفل ءَ چہ اُرش کتگ، اُرش ءِ آسر ءَ یک پوجی کارندھے جاہ پہ جاھی مرتگ-

جارکش ءَ گُڈی ءَ بیتگیں اُرشانی زمہ واری منّ اِتگ اَنت-

سلاہ بندیں مردماں گوستگیں روچاں ناکہ بندی ءِ میان ءَ ڈپٹی کمشنر ءِ ڈرائیور سرکاری گاڑی ءَ ھوار دزگیر کتگ-

گیشیں ھالانی رِد ءَ ھمے ماہ ءِ پنچ مارچ ءَ بلوچستان ءِ دمگ بیسیمہ ءَ سلاہ بندیں مردماں دگ ءِ ناکہ بندی ءِ میان ءَ آوار جنگ بیتگیں کمشنر مکران ڈویژن ءِ پھازوک زھور ء عزت، جھمنند تنزگ ءُ اے سری کھن ءِ جھمنندیں کہ آئی ءِ برات نوید احمد ءَ آوار جنگ بیتگین مات ءُ لوگ بانُک ءُ چکانی ھمراھی ءَ پریس کانفرنس کنان ءَ زھور ء عزت یل کنگ ءِ لوٹ کتگ-

کھول ءَ گْوشتگ کہ کجام ھما سلاہ بندیں ٹولی ءَ زھور ء عزت دزگیر کتگ، ما آئی ءَ چہ لوٹ کن ایں کہ آئی ءَ بلوچ بیگ ءِ بُنیاد ءَ یل بکن اِت-

زانگ بہ بیت کہ کمشنر مکران گاڑی شال ءَ چہ تربت نیمگ ءَ روگ ءَ بیتگ، کہ آئی ءِ پھازوک ءُ ڈرائیور برگ ءَ بیتگ اَنت، راہ ءَ سلاہ بندیں مردماں گاڑی داشتگ ءُ دستیگ کتگ اے میان ءَ ڈرائیور ءُ یک پھازوکی ھم وتی ھمراھی ءَ برتگ-

بلوچستان ءَ گیشتریں وھداں بلوچ آجوئی لوٹوکانی ناکہ بندی جنگ ءُ پٹ ءُ پول کن اَنت اے وئیلانی زمہ واریاں ھم من اَنت بلے اے وئیل ءِ زمہ واری انگت ھچ گل ءَ نہ زرتگ-