TBP Balochi

بلوچستان ءِ دمگ نصیر آباد ءَ ناشناسیں مردماں پاکستانی پوج دو جتا جتائیں اُرشانی نشانگ کتگ ءُ ھمے وھد ءَ ناشناسیں مردماں بجلی ءِ ٹاور ھم دور داتگ انت-

اے ویل گوستگیں شپ ءَ پیش اتکگ انت کہ اود ءَ سلاہ بندیں مردماں پوج نشانگ کتگ – دومی نیمگ ءَ بی آر جی ءَ اے اُرشانی زمہ واری من اتگ انت-

بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءَ گوشتگ گوستگیں شپ ءَ بلوچ ریپبلکن گارڈز ءِ سرمچاراں نصیر آباد ءِ دمگ نوتال ءِ نزیک ءَ زورگیریں پاکستانی لشکر ءِ چیک پوسٹ ءِ سر ءَ گوں مزنیں ءُ نوکیں سلاھاں اُرش کتگ۔ اے اُرش ءِ آسر ءَ فورسز ءِ دو کارندہ جاہ پہ جاہ ءَ بیران بوتگ ءُ چار سک ٹپیگ بوتگ اَنت۔

جارکش ءَ گوشتگ ھمے وڑ نصیر آباد ءِ دمگ چھتر ءَ بی آر جی ءِ سرمچاراں چہ بلوچستان ءَ پنجاب ءَ بجلی ءِ لائن ءِ ٹاور تراک ءِ نشانگ کتگ انت۔ اے اُرش ءِ آسر ءَ دو ٹاور کپتگ اَنت ءُ دو ٹاوران سک تاوان رس اتگ اَنت۔

آئی ءَ گوشتگ سیمی اُرش سرمچاراں نصیر آباد ءِ ربی ءَ کتگ کہ گیس ءِ پھریزوکیں ھاتر ءَ ھستیں سیکورٹی پورسز ءِ کارندہ ریموٹ کنٹرول بمب تراک ءَ گوں نشانگ جوڑ کتگ اَنت۔ تراک ءِ آسر ءَ یک کارندھے بیران ءُ یکے سک ٹپیگ بوتگ۔

جارکش دوستین بلوچ ءَ گوشتگ اے اُرشانی زمہ واریاں بی آر جی من ایت ءُ اے اھد کنت بلوچستان ءِ آجوئی ءَ داں مئے اُرش برجاہ مان انت-

بلوچستان: جنگ یا راجی گھگیری؟

ٹی بی پی شونگال

بلوچستان ءِ مانگش اتگیں سروزیر سرفراز بگٹی ءَ شال ءَ 17 دھنی نیشنل ورکشاپ ءِ وھد ءَ بلوچستان ءَ برجاھیں سلاہ بندیں جنگ ھندوستانی ایجنسی ’را‘ ءِ پندل گوشان ءَ بلوچ راجی زرمبشت ناشرکاری ءَ گوں ھوار کتگ ءُ گوشتگ اے جنگ ایوک ءَ پوج ءِ نہ انت بلکیں سرجمیں راج ئیگ انت – اے لیکہ بلوچستان ءِ زمینی راستیاں گوں ھمدپ بیت نہ کنت پرچاکہ کجام ھم گھگیری زرمبشت ابید ءِ راج ءِ پلامرزی ءَ دو دھکاں داں برجاہ بیت نہ کنت انت-

بلوچستان ءَ پاکستانی پوج ءِ کاروائیاں ’ راجی جنگ‘ نامینگ یک سیاہ شپیں چَپی یے- مھلوک ءِ نیمگ ءَ اے جنگ ءِ ھلاپ ءَ یکشل ءَ بگیرداری جاڑیگ انت ، ءُ گھگیری ٹولی جتا جتائیں وھداں دوبر مھکم بیگ ءَ دیم ءَ آیگ ءَ انت – تاکت ءِ کارمردی ءَ اے زرمبشتانی چیر ترینگ ءِ جھد ازاروکی المی ھست انت بلے دیر ءَ ایشی ءِ گیش ءُ گیواری نیست انت-

گوستگیں سالاں بلوچستان ءَ گھگیری کاروائیانی توک ءَ گیشی اتکگ- شھدگ ءُ سرکاری کارجاہ درگان درگان انت، میان اُستمانی پریام ءُ پوجی بنجل یکشل ءَ نشانگ بیتگ انت – اے درست ھما راستیانی منانک انت کہ آجوئی ءِ زرمبشتیں جنگ ءِ جد ءُ جھد وتی زور ءَ گیش کنگ ءَ انت-

اگاں آجوئی ءِ جنگ راستی ءَ پندلے بیت انت گڑا پوج ءَ جتا جتائیں جاھاں مزنیں آپریشن کنگ ءِ درکاری نیست ات زھگ ءُ زالبولانی بیرانیانی ھال دیم ءَ آیگ ءَ انت چریشی ءَ لس آبادی سانمند بوگ ءَ انت-

پاکستان ءِ مزنیں واکدار زمینی راستیاں انکاری بلوچستان ءَ جنگ آماچی ءِ جاور ءَ ھچ مَٹی نیاؤرتگ ات- ازاروکی دنیا ءِ دیم ءَ جاوراں چیر دات کن ات بلے دراجیں وھدے ءَ اناں- بلوچستان ءِ انیگیں جاورھال تچک ءَ تچک کنگ انت کہ بلوچ راجی جد ءُ جھد وتی تاکت ءِ ھواری ءَ میان اُستمانی تَکاں کجام نا کجام ڈول ءَ وت ءَ منین ایت-

بلوچ یکجھتی کمیٹی ءِ بُنجاھی رھشون ڈاکٹر صبیحہ بلوچ ءَ وتی درشان ءِ تہ ءَ گوشتگ کہ ڈاکٹر ماہ رنگ بلوچ ءُ دگہ بلوچ یکجھتی کمیٹی ءِ باسکاں درکانودی بندیگ کنگ ءَ یک پدریں سیاسی بیرگیری اِنت –

رھشون ءَ گوشتگ کہ شش ماہ ءَ چہ گیش اِنت ڈاکٹر ماہ رنگ بلوچ ءُ آئی ءِ ھمراہ بید آمیدگسی مات ءُ انساپ ءِ گوشدارگ ءِ ھک ءَ بندیگجاہ ءَ داشتگ-

آئی ءَ گوشتگ کہ آئی ءِ جرم تھنا اش اِنت کہ آ بلوچستان ءَ زورانسری آوار جنی ءُ ریاستی زوراکی ءِ ھلاپ ءَ پُرایمنیں توار چست کنگ ءَ اِنت-

درشان ءِ تہ ءَ گوشگ بیتگ کہ وتی مستری ءِ دزگیری ناں تھنا انسانی انساپ ءِ بُنیادی راھبندانی ھلاپ ورزی اِنت بلکیں اکوام متھدہ ءِ انسانی ھکانی جار ءُ میان استمانی مھاد ءِ شھری ءُ سیاسی ھکانی ھم لگتمالی اِنت کہ اشی ءِ سر ءَ پاکستان دستھت کنوکیں ڈیھ اِنت-

رھشون ءَ اے گپ ءِ سر ءَ سک دلپدردی درشان اِتگ کہ بندیگجاہ ءِ تہ ءَ آمیدگسی کاروائی کنگ ءِ کار ءَ پلگار، بے رھبندی ءُ شرپ ءَ چہ زبھر کنت ءُ اشی ءَ چہ پدر بیت کہ آمیدگسی نزام ءِ زور ءُ تُرس ءَ چہ کارمرز کنگ ءَ اِنت-

درشان ءِ تہ ءَ گوشگ بیتگ کہ ڈاکٹر ماہ بلوچ ءُ آئی ءِ ھمراہ اے راج ءِ ھما مھکمیں توار ءِ نمائندگی ءَ کنت کہ راستی ءُ چُست ءُ پُرس ءِ لوٹ ءَ کنگ ءَ اِنت ، آیانی یکشلیں بندیگ کانودی ناانساپی ءِ ھمراھی ءَ ریاستی اکلاک ءِ بے سوبی ءَ ھم پیشدارگ ءَ اِنت-

گُڈی ءَ بلوچ یکجھتی کمیٹی ءِ بُنجاھی رھشون ڈاکٹر صبیحہ بلوچ میان استمانی ادارھاں چہ دزبندی کتگ کہ آ بلوچستان ءَ پُرایمنیں سیاسی باسکانی ھلاپ ءَ برجاہ اے ریاستی زوراکی ءِ سر ءَ توار چست بہ کن اَنت ءُ ڈاکٹر ماہ رنگ بلوچ ءَ ھوار سرجمیں دزگیریں بلوچ باسکاں زوت یل کنگ ءِ دلجمی ءَ بدے اَنت-

پاکستان ءُ اوگانستان ءِ میان ءَ ھستیں سیمسری جنگ ءُ چوپاں رند دوئیں ملکاں 48 ادار ءِ واستا ادارکی جنگ بندی ءِ سر ءَ تپاک کتگ۔

پاکستان ءِ ڈنی وزیر ءُ اوگانستان ءِ ھکومت ءِ جارکش ءِ رد ءَ جنگ بندی ءِ اے پیسلہ ءَ رند دوئیں نیمگاں چہ اُرش بند کتگ اِش ۔

پاکستان ءِ ڈنی وزیر ءِ نیمگ ءَ چہ گوشتگیں بیان ءَ گوشتگ کہ ھکومتِ پاکستان ءُ اوگانستان تالبان انتزامیہ ءِ میان ءَ 48 ادار ءِ ادارکی جنگ بندی ءَ تپاک کتگ ئِے ۔ چش کہ مرچیگیں بیگاہ ءِ ادار 6 چہ اسر مند بیتگ ۔

بیان ءِ رد ءَ جنگ بندی ءِ وھد ءَ ھمے امیت داشتگ اِش کہ دوئیں ملک اے کٹ اِتگیں بلے کابلِ ھل ءِ مسلہ ءَ پُرامن ءُ نوکیں گیش ءُ گیوار ءِ واستا گپ ءُ دیوان ءَ ھوار بنت انت۔

تالبان ھکومت ءِ جارکش ذبیح اللہ مجاھد ءَ جار جتگ کہ پاکستان ءِ پاٹی ءِ لوٹ ءُ بازیں گوشگانی سر ءَ دوئیں ملکانی میان ءَ جنگ بندی مرچی بیگاہ ادار 5:30 بیتگ ۔

آھاں گوشتگ کہ امارتِ اسلامیہ ءَ وتی درستیں پوج بیگاہ ادار 5:30 چہ جنگ بندی ءِ کامل پابندی ءِ سوج دیگ بیتگ انت۔ ھما شرت ءَ کہ ھچ نمیگ ءَ زوراکی مہ بیت ۔

دلگوش بہ اِت کہ مرچی سھب ءَ شرو بیتگیں جنگ ءُ چوپاں پاکستان ءِ پوج ءِ نیمگ ءَ چہ اوگانستان ءِ ھند اسپین بولدک ءُ کابل ءَ برزی کاروائی ءِ وھد ءَ تالباناں تاوان رسگ ءِ ٹاپار جتگ ، وھدیکہ تالبانانی نیمگ ءَ چہ ھم ھمے وھد ءَ سیمسری جنگ ءُ چوپاں یک ءَ چہ گیش پاکستانی پوج کشگ ءُ دستگیر کنگ ءِ ٹاپار دیم ءَ اتکگ ۔

اوگانستان ءِ ھکومت ءِ جارکش ذبیح اللہ مجاھد ءَ ایشی ءَ چہ پیسر اوگانستان میڈیا ءِ تہ ءَ داتگ ءُ گوشتگ کہ پاکستان ءِ برزی بمباری ءَ لس اوگان شھری نشانگ بیتگ ، پسھی بدل ءَ چمن بارڈر ءُ دگہ سیمسری بنجلانی سر ءَ اوگان ءِ پوج ءَ پاکستان ءِ چوکی نشانگ کتگ اَنت ءُ آیانی ءُ دگہ ساز ءُ سامان کبزہ کتگ اَنت ۔

گیشتر ایشی ءَ ابید اوگان ءِ میڈیا ءَ پاکستان ءِ اُرشانی انگت درزنانی درزن لس شھریانی بیرانی راست کتگ انت چریشاں چہ یک سھاپی یے ءُ ھپت کارگر ھور اِنت، ھمے وھد ءَ پاکستان ءَ چمن ءِ سیمسری ھنداں جاھمنندیں مردم مجبور کتگ اَنت اے الاکہ ءَ ھالیگ بہ کن اَنت ۔

پاکستان ءِ میڈیا ءِ رد ءَ چمن بارڈر ءِ سر ءَ جنگ ءُ چوپاں چہ پد دوئیں ملکانی میان ءَ ھستیں دوستی ءِ گیٹ کامل ءَ تباہ بیتگ ۔ وھدیکہ اوگان ءِ پوج ءِ تیرگواری ءَ چہ یک چکے بیران بیتگ ۔

ھمے وڑ پاکستان ءَ اوگانستان ءِ دگہ دگہ ھند گچین دارالھکومت ءَ برزی بمباری ءَ تالبانانی بنجل نشانگ کنگ ءِ ٹاپار جتگ ،انگت اوگان ھکومت ءِ نیمگ ءَ چہ اے ٹاپارانی ھال انگت منّگ نہ بیتگ ناں کہ انکار ۔

اوگان طالبان ءِ گشگ انت کہ پاکستانی لشکر ءِ اوگانستان ءِ سر ءَ اُرشانی تہ ءَ یک درجنے ءَ چہ گیش لس مردم بیران ءُ سداں گیش ٹپی بوتگ انت۔ پاکستانی کارندھانی رد ءَ اوگان لشکر ءَ بے کساس ءَ تیرگواری کتگ کہ ایشی ءِ پسو دیگ بوتگ۔

اوگانستان ءِ واکداراں چار شمبے ءِ روچ ءَ اے ایف پی ءَ گوں تران کنان ءَ گْوشتگ کہ اوگانستان ءُ پاکستان ءِ سیمسر ءَ نوکیں درگیریانی تہ ءَ 15 لس مردم بیران ءُ درجنے ٹپیگ بوتگ اَنت۔ دمگی ھال رسانی ءِ کارگس ءِ جارکش علی محمد حقمل ءِ رد ءَ اوگانستان ءِ زرباری دمگ اسپین بولدک ءَ شپ ءِ دیر ءَ اے درگت ءَ بندات بوتگ ءُ آئی ءِ رد ءَ 15 لس مردم بیران بوتگ اَنت۔

اسپین بولدک ءِ دمگی نادراھجاہ ءِ واکدار عبدالجان بارک ءَ ھم اے ایف پی ءَ گوں گپ ءُ تران کنان ءَ اے گپ ءِ پدرائی کتگ ءُ گْوشتگ کہ اے وئیل ءَ 80 ءَ چہ گیش جنین ءُ چُک ھم ٹپیگ بوتگ اَنت۔

اوگان طالبان ءِ جارکش ذبیح اللہ مجاھد ءَ سوشل میڈیا ءِ سر ءَ وتی پوسٹ ءِ تہ ءَ ھم گْوشتگ کہ چار شمبے ءِ روچ ءَ پاکستانی لشکر ءَ اوگانستان ءِ سر ءَ اُرشانی تہ ءَ 12 ءَ چہ گیش لس مردم بیران ءُ 100 ٹپیگ بوتگ اَنت۔ بلے بیان ءَ سیکورٹی فورسز ءِ تہ ءَ ھچ وڑیں تاوان ءِ ھچ وڑیں ھال ءُ اھوال نہ بوتگ انت۔

دومی نیمگ ءَ پاکستانی پوج ءِ جارکش آئی ایس پی آر ءِ رد ءَ چارشمبے ءِ روچ ءَ اوگانستان ءِ سیمسری ھند اسپین بولدک بلوچستان ءَ چار جاھاں اُرش کتگ انت ءُ پاکستانی پوج ءَ بے سوب کتگ انت-

آئی ایس پی آر ءَ ٹاہ داتگ کہ اے اُرش لس شھری آبادی ءِ توک ءَ کنگ بیتگ انت-

درشان ءَ گوشگ بیتگ اوگان تالبان ءَ وتی سیمسر ءَ پاک اوگان ءِ گیٹ ھم پروشتگ-

پاکستانی پوج ءِ رد ءَ پسھی اُرش ءَ بیست یا پانزدہ اوگان تالبان بیران ءُ بازیں کچے ءَ زدگ بیتگ انت ءُ تچکیں ھال نیست انت بلے سیمسر ءَ اوگان تالبان ءِ مُچ بوگ دوبر یکجاہ انت-

پاکستانی لشکر ءِ دست ءَ یک ورنایے بیگواہ ءُ یک ورنایے یل بیتگ۔

بلوچستان ءِ دمگ کیچ ءِ ھند تمپ ءَ چہ تربت ءَ اتکگیں ھالانی رد ءَ 13 اکتوبر ءِ روچ ءَ پاکستانی لشکر ءَ موٹرسائیکل مستری رحمت حلقو ولد ء محمد بخش حلقو دزگیر کتگ ءُ گوں وت برتگ۔

پاکستانی لشکر ءِ دست ءَ چہ دزگیری ءَ رند ورنا دیم ءَ آرگ نہ بوتگ۔

زورانسری بیگواھی ءِ آماچیں رحمت حلقو ءِ کھول ءَ چہ انسانی ھکانی ادارھاں دزبندی کتگ کہ آ رحمت ءِ یلو دیگ ءِ آواز ءَ چست بہ کن اَنت آئی ءِ یل کنائینگ ءَ دلستکی بہ کن انت۔

چہ شال ءَ 27 اگست ءَ پاکستان لشکر ءِ دست ءَ دزگیری ءَ چہ رند زورانسری بیگواھی ءِ نشانگ کتگیں ثاقب بزراد نامی ئیں ورنایے یل بوتگ ءُ وتی گس ءَ سر بوتگ۔

بلوچستان ءَ جتاجتائیں دمگاں پاکستانی پوج ءِ سر ءَ اُرش ءُ پولیس ءِ سلاہ ءُ گاڑیانی برگ ءِ زمہ واری بلوچ آجوئی لوٹوکیں سلاہ بندیں گل بلوچ لبریشن آرمی ءُ بلوچستان لبریشن فرنٹ ءَ من اتگ انت-

بی ایل اے ءَ شنگ کتگیں درشان ءِ تہ ءَ گوشتگ کہ بلوچ لبریشن آرمی ءِ سرمچاراں سے شمبے ءِ شپ ءَ تربت ءِ نزیکیں دمگ ءَ بُنجاھی شھدگ سر ءَ برجاہ زورگریں پاکستانی پوج ءِ چوکی ءِ سر ءَ اُرش کتگ- سرمچاراں زورگریں پوج ءِ سر ءَ راکٹ لانچر گولہ آس داتگ، چریشی ءِ آسر ءَ آیاں جانی ءُ مالی تاوان رس اِتگ انت-

جارکش ءَ گوشتگ بی ایل اے ءِ سرمچاراں شال ءَ میاں گنڈی ءِ ھند ءَ پولیس کارندھانی سلاہ ءُ دگہ سامان ھما وھد ءَ دستیگ کتگ اَنت ھدے آ موٹر سائیکل ءِ سر ءَ گشت کنگ ءَ بیتگ اَنت – کارندہ کڈن کتگ ءُ پد ءَ یل داتگ اَنت-

جارکش ءَ گوشتگ کہ بلوچ لبریشن آرمی ءِ سرمچاراں ھاران تاں نوشکی ءُ ھاران تاں بسیمہ ءَ بُنجاھی شھدگ بستگ- سرمچاراں پٹ ءُ پول چہ دو کلاکاں گیش برجاہ داشتگ، اے میان ءَ دو شکی ئیں مردم دزگیر کتگ اَنت آیانی جُست ءُ پُرس برجاہ ءَ اِنت-

جارکش ءَ گوشتگ سرمچاراں پولیس کارندھانی یک گاڑی یے ھم دستیگ کتگ-

بلوچستان لبریشن فرنٹ ءِ جارکش میجر گوھرام بلوچ ءَ رسانکدر ءَ وتی شنگ کُتگیں درشان ءِ تہ ءَ گوشتگ کہ بی ایل ایف ءِ سرمچاراں سے شمبے ءِ بیگاہ ءِ ساھت ءِ پنچ ءَ ڈھاڈر ءِ ھند اللّہ یار شاہ ءَ زورگریں پاکستانی پولیس ءِ تر ءُ گرد کنوکیں کارندھاں گوں دوچار کپتگ اَنت ۔ سرمچاراں گوں شوربندی ءَ پولیس کارندہ انگِر ءَ کُتگ ءُ دزگیر کُتگ اَنت ءُ چہ آیاں سلاہ دستیگ کُتگ اَنت ءُ آیانی سرکاری گاڑی مانداشتگ ۔

جارکش ءَ گوشتگ پولیس کارندہ بنداتی جُست ءُ پُرس ءَ آیاں بلوچ راج ءُ بلوچ راجی زرمبشت ءِ ھلاپ ءَ ھچ وڑیں کارانی تہ ءَ آ گون نہ بیتگ اَنت ھمے سوب ءَ آ ھچ وڑیں تاوان نہ داتگ ءُ یل داتگ اَنت ۔

بلوچستان ءِ جتاجتائیں دمگ تربت ءُ شال ءَ بیگواھیں غنی بلوچ ءُ امجد علی ءِ کھولاں پریس کانفرنس کنان ءَ وتی مردمانی یل کنائینگ لوٹ کتگ-

شال پریس کلب ءَ غنی بلوچ ءِ کھول ءَ پریس کانفرنس کنان ءَ آئی ءِ یل کنگ ءِ ھاتر ءَ یکرندے پد ءَ واکدار ءُ انسانی ھکانی ادارھاں چہ زوت کاروائی ءِ لوٹ کتگ – کھول ءَ گوشتگ کہ غنی بلوچ 25 مئی 2025 ءَ زورانسری بیگواہ کنگ بیتگ تاں مروچی آئی ءِ ھچ وڑیں ھال دز نہ کپتگ-

کھول ءَ گوشتگ کہ غنی بلوچ ءِ زورانسری بیگواھی ءَ 142 روچ گوستگ، بلے پولیس، انتزامیہ یا آمیدگس تنی وھدے اے نہ گوشتگ کہ کجا اِنت ءُ کئی دست ءَ اِنت- آیاں گوشتگ کہ ما ھرچ آئینی راہ ءَ شتگیں، آمیدگس ءَ شتگیں سرجمیں منانک داتگ اَنت، بلے ھچ ادارہ پٹ ءُ پول دیم ءَ نہ برتگ-

پریس کانفرنس ءَ گوشگ بیتگ کہ ھُزدار ڈسٹرکٹ اینڈ سیشن کورٹ کیس اے بُنیاد ءَ در کنگ بیتگ کہ کھول زورانسری آوار جنی ءِ پٹ ءُ پول پدر نہ کتگ- کھول ءَ اے گپ رد کتگ کہ پٹ ءُ پول کنگ سانمندیں کھول ءِ نہ اِنت ریاستی ادارھانی کار اِنت- آئی ءَ گوشتگ کہ ما تاریک، جاگہ، ءُ ٹرانسپورٹ شرکت ءِ سرجمیں ریکاڈ داتگ اَنت، بلے پولیس ءَ ناں شرکت ءَ چہ سرپدی زرتگ، ناں وئیلجاہ یا کوچ کیمرھانی تامُر لوٹ اِتگ اَنت-

کھول ءِ گوشگ اِنت غنی بلوچ ءِ زورانسری آوار جنی ناں تھنا کھول ءِ جند گم اِنت بلکیں آئین ءِ تچکی ءَ ھلاپ ورزی اِنت- آیانی رِد ءَ آئین ھرچ شھری ءِ زندگی ءُ آجوئی ءِ ھک زمانت ءَ دنت، ءُ کجام مردم ءَ دزگیر کنگ ءَ پد آمیدگس ءِ دیم ءَ پیش کنگ الّمی اِنت-

کھول ءَ دیمتر ءَ گوشتگ کہ چار ماہ ءَ چہ گیش گوزگ ءَ اَبید ناں غنی بلوچ پیش کنگ بیتگ نانکہ گوشگ بیتگ کہ آ کجا اِنت – اے ناں تھنا آئین بلکیں انسانی ھکانی ھم ھلاپ ورزی اِنت-

آیاں آمیدگس، ھکومت، انسانی ھکانی ادارہ ءُ رسانکدر ءَ چہ دزبندی کن ایں کہ آ اے درگت ءَ توار چست بہ کنت ءُ غنی بلوچ ءِ یل کنائینگ ھاتر ءَ جوانیں گامگیجے بہ زور اِیت- کھول ءَ جار جتگ کہ آ وتی دوستناکانی واتری ءَ بے تواری ءَ نہ ننداں-

ھمے وڑ کیچ ءِ دمگ گوگدان ءِ جھمنند امجد علی ء شیر محمد ءِ بیگواھی ءَ یک ماھے ءَ چہ گیش گوستگ بلے تنی وھدے آ یل کنگ نہ بیتگ- کھول ءِ رِد امجد علی پانزدہ ستمبر ءَ پجّار نہ بوتگیں مردماں آوار جتگ ءُ دنیگت ءَ ھچ وڑیں ھال نہ بیتگ-

چہ گوگدان ءَ سیادی داروکیں امجد علی ءِ کھول ءَ تربت پریس کلب ءَ سے شمبے ءَ یک پریس کانفرنسے ءِ میان ءَ تُرس ءُ درد ءِ درشان ءِ کنان ءَ گوشتگ کہ آ گوستگیں سی روچاں چہ گم، تُرس، بے دلجمی ءَ جاوراں زند گوازینگ ءَ اَنت-

کھول ءِ رِد ءَ ما ھچ نزان ایں کہ آوار جنوک کے اَنت ءُ آیانی مول ءُ مراد چی اَنت- آیاں گوشتگ تنی وھدے ھچ کس ءَ ھال نہ کتگ – ما دزبندی کن ایں کہ آ امجد ءَ پہ سلامتی یل بہ کن اَنت-

امجد علی ءِ کھول ءَ پہ بستار بلوچ زالبول، آوار جنوکاں چہ انسانی ہمدردی ءِ رِد ءَ یل کنگ ءِ دزبندی کتگ گوشتگ کہ اگاں کسے ردی ءُ مول ءُ مراد ءِ بُنیاد ءَ آ چست کتگ کم چہ کم کھول ءَ ھال بدے اِت-

آیاں گوشتگ کہ کسے ءَ بیگواہ کنگ ءُ آئی ءِ درگت ءَ ھچ وڑیں سرپدی ندیگ ناں تھنا درکانودی انسانی کارے بلکیں بلوچستان ءِ ھرچ لوگ ءِ گم ءِ بھر جوڑ بیتگ-

کھول ءِ رِد ءَ امجد علی جتاجتائیں نادُراھیانی آماچ اِنت، آئی ءِ دل آپریشن بیتگ ءُ ھمکروچ دوا درمان وارت-

اگاں آئی ءَ دوا درمان نہ رس اَنت گُڑا آئی ءِ جان ءَ سک ھترہ بیت کنت-

پریس کانفرنس ءَ کھول ءَ اِھوالکار، انسانی ھکانی گلاں ءُ ھمگرنچیں ادارھاں چہ دزبندی کتگ کہ آ توار جوڑ بہ بنت ءُ امجد علی ءَ زوت پہ سلامتی یل کنائینگ ءِ ھاتر ءَ کرد پیلو بہ کن اَنت-

بلوچستان ءِ جتا جتائیں جاھاں پاکستانی پوج ءَ سَے مردم آوار جنگ ءَ پد بیگواہ کتگ انت- آوار جنگ بیتگیں مردم پوج ءَ چہ کلات ءُ پنجگور ءَ آوار جتگ ءُ برتگ انت-

گیشیں اھوالانی رد ءَ کلات ءَ مزدوری کنوکیں کھڈکوچہ، مستونگ ءِ نندوکیں عبدالناصر ء عبدلخالق11 اکتوبر ءَ پاکستانی لشکر ءَ چہ کلات ءِ کوھنگ ءِ دمگ ءَ زورانسری بیگواہ کتگ ، اھوالانی رد ءَ ناصر ھما وھد ءَ بیگواہ کنگ بیتگ کہ آ سھب ءِ نماز ءِ وانگ ءَ روگ ءَ بیتگ-

سئے روچ ءِ گوزگ ءَ ابید ھم ورنا ءِ بابت ءَ ھچ وڑیں ھال ءُ اھوال دیم ءَ نیتکگ انت- واکداراں ھم اے درگت ءَ انگت ءَ ھچ وڑیں گپ دیم ءَ نیاؤررگ انت-

ھمے وڑ ءَ چہ پنجگور ءَ پت ءُ چک پوج ءَ آوار جتگ ءُ بیگواہ کتگ انت-

پنجگور ءِ دمگ عیسی تاناپ ءَ پاکستانی پوج ءَ یک لوگے ءِ سر ءَ بیڑ برتگ ءُ اود ءَ عبدالقادر ءُ امجد نامیں دو مردم آوار جتگ ءُ برتگ انت –

اھوالانی رد ءَ اے مردم گوستگیں شپ ءَ آوار جنگ ءُ بیگواہ کنگ بیتگ انت ءُ پد ءَ ایشانی بارو ءَ دگہ اھوال دیم ءَ نیتکگ انت-

زانگ بہ بیت بلوچستان ءَ زورانسری بیگواھیانی درچ یکشل ءَ برجاہ انت ءُ یک کمے کساسے ءَ مردم زندگی ءَ یل بنت ءُ آیانی توک ءَ گیشتریں بھر لاشانی دروشم ءَ کھولاں دزکپگ ءَ انت-

گوستگیں روچاں شال ءَ بیست لاش ناپجاری دروشم ءَ کل ءُ کسارات کنگ بیتگ انت ءُ چریشی ءَ بیگواھیں مردمانی دل ءُ لاپاں ترس گیشتر ود ایت کہ آیانی بیگواھیں مردمانی بارو ءَ ھچ اھوال نیست –

بلوچستان ءَ دزکپتگیں گیشتریں لاش کوھنی ءِ دروشم ءَ پجار نہ بنت ءُ آیانی شریں رنگے ءَ ٹیست ءُ چیزانی نہ کنگ ءِ بنیاد ءَ لاش بے پجاری کل ءُ کسارات کنگ بوگ ءَ انت-

میان اُستمان ءِ ورکنگ گروپس ءَ چہ پاکستان ءَ عبدالطیف بلوچ ءُ آئی ءِ زھگ ءِ درکانودی کوش ءُ گلزار دوست ءِ دزگیری ءِ بارو ءَ پدجنی ءِ لوٹ کتگ-

اقوام متحدہ ءِ ورکنگ گروپس ءَ یک ھواریں نمدی یے پہ پاکستان ءِ سرکار ءَ نبشتہ کتگ کہ آئی ءِ تہ ءَ بلوچستان ءَ اھوالکار ءُ انسانی ھکانی پھریزکار عبداللطیف بلوچ ءُ آئی ءِ چُک سیف بلوچ ءِ درکانودی کُشگ ءُ آھانی ھاندان ءِ سر ءَ کاروائی کنگ ءِ ھلاپ ءُ انسانی ھکانی جھدکار گلزار دوست ءِ دزگیری ءِ سر ءَ پدردی درشان کتگ-

اگست 2025 ءَ شنگ بوتگیں نمدی ءِ تہ ءَ اقوام متحدہ ءِ ھاسیں رپورٹراں چہ پاکستان ءِ ھکومت ءَ لوٹ کتگ کہ آ اے وئیل ءِ سرجمیں، آزات ءُ پلگاریں رنگے ءَ پٹ ءُ لوٹ ءَ بہ کنت-

نمدی ءِ تہ ءَ گْوشگ بیتگ کہ 24 مئی 2025 ءَ عبداللطیف بلوچ آواران ءِ دمگ مشکے ءَ آئی ءِ لوگ ءَ سلاہ بندیں مردماں تیر گواری کتگ ءُ آئی ءِ چُک سیف بلوچ 28 فروری 2025 ءَ پاکستانی سیکورٹی پورسز ءَ دزگیر کتگ ءُ بیست ءُ شش مارچ ءَ آئی ءِ لاش دزکپتگ-

دیمترا گْوشگ بیتگ کہ عبداللطیف بلوچ پیسر ءَ ھم سیکورٹی ادارھانی بندیگ کنگ ءُ ٹارچر کنگ ءِ آماچ بیتگ، وھدیکہ آئی ءِ برات رشید علی بلوچ 2011 ءَ بندیگ کنگ ءَ پد کُشگ بوتگ۔

اقوام متحدہ ءِ زانتکاراں گوشتگ کہ گلزار دوست کہ تربت سول سوسائٹی فورم ءِ کوآرڈینیٹر انت 6 جولائی 2025 ءَ چہ وتی لوگ ءَ دزگیر کنگ بوتگ آئی ءِ سر ءَ ناشرکاری ءِ ھوالگ ءَ بھتام جتگ بلے دزگیر کنگ ءِ وھد ءَ ھچ وڑیں وارنٹ پیش نہ بوتگ۔ رند ءَ یک اگست ءَ زمانت ءِ سر ءَ یل کنگ بوتگ۔

نمدی ءِ تہ ءَ گْوشگ بیتگ کہ بلوچستان ءَ انسانی ھکانی کارکن، اھوالکار ءُ بلوچ چاگرد ءِ ھلاپ ءَ درکانودی کشگ، زورانسری بیگواہ کنگ ءُ ناشرکاری ءِ ھلاپ ءَ کانود ءِ ناجائز کارمرد کنگ ءِ سر ءَ میان اُستمانی جیڑک سک باز اَنت۔

اقوام متحدہ ءِ نمائندگاں چہ پاکستانی سرکار ءَ ھپت نکاتی پدجنی لوٹ کتگ کہ ایشی ءِ تہ ءَ عبداللطیف بلوچ، سیف بلوچ ءُ رشید بلوچ ءِ کوش ءِ پٹ ءُ پول ءِ بابت ءَ جُست ءُ پُرس، گلزار دوست ءِ دزگیری ءِ کانونی بنیاد ءُ ناشرکاری ءِ ھلاپ ءَ کانودانی تہ ءَ پلگارگ ھوار اَنت۔

نمدی ءِ تہ ءَ اے گپ ءِ سر ءَ زور پر دیگ بوتگ کہ پاکستان ءَ وتی میان استمانی زمہ واریانی رد ءَ زند ءِ ھک ، لیکہ ءِ آجوئی ءُ انسانی ھکانی رکینگ ءَ را دل یکیمی کنگ لوٹ ایت۔