TBP Balochi

بلوچ لبریشن آرمی ءِ جارکش جیئند بلوچ ءَ ناشناسیں جاھے ءَ رسانکدراں گوں تران کنان ءَ گوشتگ کہ مروچی سَے شمبے ءِ روچ ءَ بلوچ لبریشن آرمی ءِ مجید بریگیڈ ءَ یک سوبمندیں اُرشے ءَ چینی آفیشلز نشانگ کرتگ اَنت،چریشی ءِ آسر ءَ سَے چینی آفیشل ہوانگ گواپنگ ردنگ موفانگ ءُ چن سائی مرتگ اَنت ءُ وانگ یوکنگ زدگ بیتگ – اُرش ءَ آیانی ڈرائیور خالد ھم مرتگ پھزداری ءَ دو پھزدار زدگ بیتگ اَنت بلوچ لبریشن آرمی اے اُرش ءِ زمہ واری ءَ من ایت-

جارکش ءَ گُشتگ کہ مروچی فدائی مشن ءَ سوبمندی ءَ سرکنوکیں فدا-ی بی ایل اے ءِ فدائین یونٹ مجید بریگیڈ ءِ شاری بلوچ پنام ءِ برمش کہ ڈاکٹر ھیبتان بشیر ءِ لوگبانک اِنت نظر آباد تربت ءِ جھنند بیتگ – دو زھگ ھشت سالی ئیں ماہ روش ءُ چار سالی ئیں میر حسن ءِ مات شاری بلوچ ءَ بلوچ راج ءِ آیوکیں پدریچ ءِ واستا یک آجو ءُ وشھالیں بانداتے ءِ ھاتر ءَ وتی وابتانی مانا کنگ ءَ وت ءَ دیمون کتگ ءُ بلوچ گھگیری ءَ یک نوکیں راجدپتر سوگات کتگ اولی بلوچ زالبول فدائی ءِ سوگات وتی نام ءَ کتگ ھستیں راجدپتر ءَ وت ءَ نمیران کتگ-

آئی ءَ گُشتگ کہ سِی سالی ئیں فدائی شھید شاری بلوچ یک زانت ءُ وانندگیں زالبولے بیتگ آئی ءَ زولوجی ءِ ماسٹرز کتگ ءُ وانگ ءِ پھنات ءَ ایم فل کنگ ءَ بیتگ آ یک استانی ءِ بیتگ ءُ گرلز ھائی اسکول کلاتک ءَ میٹرک ءِ جنکاں سائنس وانینگ ءَ بیتگ – شاری بلوچ نودربری ءِ وھد ءَ بلوچ اسٹوڈنٹس آرگنائزیشن ءِ پتر ءَ ھوار بیتگ ءُ بلوچ راجدوستی ءِ راجکاری ءِ بھر بیتگ ءُ بلوچ راجی گلامی ءُ ھستیں وھد ءِ بلوچ نسل.کشی ءَ جوانی ءَ سرپد بیتگ- آئی ءَ دو سال ءَ پیسر مجید بریگیڈ ءِ بھر جوڑ بیتگ ئے ءُ فدائی اُرشکارانی واستا کمکاری ءِ واستا وتی نام داتگ- چریشی ءَ پد مجید بریگیڈ ءِ رھبندانی رد ءَ دوچاری ءِ وھد دیگ بیتگ-

جارکش ءَ گُشتگ کہ اے دو سالانی وھد ءَ شاری بلوچ ءَ مجید بریگیڈ ءِ دومی چیریں یونٹانی پرکاریاں کار کتگ شش ماہ ءَ پیسر آئی ءَ دوچاری ءَ پد دوبر فدائی اُرش ءِ واھش ءِ گپ جتگ چریشی ءَ پد آئی ءِ نشانگ ءِ واستا جاہ گچین کنگ ءُ ھیلکاری بندات بیتگ-

جیئند بلوچ ءَ گُشتگ دو کسان سالیں زھگانی مات بوگ ءَ ابید ھم فدائی شاری بلوچ ءِ پکر راجی زانت ءِ نیمگ ءَ ھچ پشتکنزی نہ بیتگ ءُ وتی راجی پھریزگی ءِ گھگیری کتگ، بھادری ءُ نہ ترسی ءَ پیلو کنان دیمونی، زانت ءُ بھادری ءِ نوکیں درچے برجم کتگ – بلوچ لبریشن آرمی ءُ سرجمیں راج فدائی شاری بلوچ ءَ مزن نامیں منگھی ءِ ھواری ءَ یات کنت-

آئی ءَ گُشتگ سرجمیں دنیا ءَ چینی زرکاری، دودمانی ءُ سیاسی سنچ ءَ مُشگ ءِ سر ءَ یک چیدگی کنفیوشش انسٹیٹیوٹے ءَ کراچی برانچ ءِ ڈاریکٹر ءِ نشانگ کنگ ءِ مول ءُ مراد چین ءَ کلوہ ءَ تچک ءَ دیگ لوٹ ایں بلوچستان ءَ چین ءِ بے سرپدی یا سرپدی ءِ زور ھچ رنگ ءَ منّگ نہ بیت اِنت – بلوچ لبریشن آرمی ءَ اشی ءَ پیسر ھم بازیں بیھار ءُ اُرشانی زور ءَ چین ءَ را اے کلوہ داتگ کہ آ بلوچ مڈیانی پُلپھانچی ءَ گستہ بہ بیت ءُ بلوچستان ءِ سر ءَ پاکستان ءِ زوگری ءَ مھکم کنگ ءُ بلوچ نسل کُشی ءَ زورگریں پاکستانی پوج ءِ لشکری ءُ مالی کمک ءَ بند بہ کنت، بلے اشی ءَ ابید ھم چین داں انگت ءَ بلوچستان ءَ پیشی رنگ ءَ وتی دوستیگیں کاراں جاڑیگ اِنت-

جارکش ءَ گُشتگ بلوچ لبریشن آرمی چین ءَ یک رندے پد ءَ اے کلوہ ءَ دیگ لوٹ ایت کہ آ بلوچستان ءَ وتی بند ساچی شوربندی ءُ زورگر ءِ کمکاری ءَ بند بہ کنت اگاں ناں گڑا آئی ءِ سر ءَ مئے آوکیں اُرش ترند تر بنت-

آئی ءَ گُشتگ اے وھد ءَ بلوچ لبریشن آرمی ءِ مجید بریگیڈ بازیں کچے ءَ ھیلکاری کنوکیں مردین ءُ زالبولیں فدائی اُرشانی واستا جاڑیگ اِنت- سرجمیں بلوچستان ءَ ھوار پاکستان ءِ کجام شھر ءَ اُرشکاری ءِ زور ءَ دار ایت – ما زورگریں پاکستان ءَ اے کلوہ ءَ دیگ لوٹ ایں آ بلوچ نسل کُشی ءَ بند بہ کنت، ایمنی رنگے ءَ وتی پوج ءَ چہ بلوچستان ءَ بہ کش ایت ءُ بلوچ ڈیھ ءِ آجوئی ءَ بہ منّ ایت اگاں گیش اُرش ءِ واستا جاڑیگ بہ بیت-

بلوچستان ءِ ضلع ھُزدار ءِ تھسیل وڈھ مروچی تیرگواری وئیل ءَ یک مردمے کشگ بوتگ-

سربوتگیں ھالانی رِد ءَ ھُزدار ءِ دمگ وڈھ ناشناسیں مردماں تیرگواری کتگ ءُ گل محمد شیخ کُشتگ-

وئیل ءَ پد کھول ءَ گل محمد شیخ ءِ لاش شھدگ سر ءَ ایر کتگ ءُ زھرشانی بندات کتگ-

چریشی ءِ آسر ءَ شال کراچی بُنجاھی شھدگ سرجمی ءَ بند بوگ ءَ چہ مزنیں کچے ءَ مساپر ءُ دگہ گاڑیانی لین لگ اِتگ- روچگ ءُ گرمی ءِ جاوراں دلسیاھی ءِ دیمپان-

کوش سوب انگت زانگ نہ بوتگ-

بلوچستان ءِ بنجاھی شھر شال ءَ پاکستان پتر ءِ باسک ءُ بی این پی مینگل ءِ سروک سردار اختر مینگل ءَ یک نیادے ءَ تران کنان ءَ گُشتگ بلوچستان ءِ گپ کس ءَ چیر بیت نہ کن اَنت سوشل میڈیا ءِ وھد اِنت کسے ءِ سر ءَ کِچوکے کپ ایت ھم مردم ءَ ھال رس ایت-

آئی ءَ گُشتگ کہ مردم مئے شش نکات ءِ سر ءَ کندگ ءَ اَنت،پء ٹی آئی ءِ سرکار مئے چار ووٹانی سبب ءَ بیتگ –

سردار اختر مینگل ءَ گُشتگ بیگواھیں مردمانی واتر آرگ مئے بنداتی گامگیج بیتگ ءُ انگت ءَ ھم بیت اِنت بیگواھیں مردمانی ماتانی ھرس مئے وزیری سِیٹاں چہ مارا گچینتر اَنت-

آئی ءَ گُشتگ بیگواھیں مردمانی واتری ءَ داں ایمنی ءَ نہ ننداں – پی ٹی آئی ءَ مارا چہ اوٹ زرتگ ءُ گُشتگ بی این پی اوٹانی بستار نیست اِنت بلے مروچی آئی ءَ بستار زانتگ – بی این پء ءِ اوٹانی سبب ءَ عمران خان وزیراعظم ءِ ھاؤس ءَ چہ بنی گالہ ءَ راہ داتگ-

آئی ءَ گُشتگ کہ بلوچستان ءِ مھلوک ءُ زاہ ءُ زاکاری ءِ سیاست نہ کن اَنت، پی ٹی آئی ءِ لیڈراں جلسھانی تہ ءَ ھما گپ کتگ اَنت یکے دومی ءِ گوشدارگ ءَ اوپار کت نہ کنت-

سردار مینگل ءَ گُشتگ بی این پی ءِ اوٹ بس چار اَنت بلے آئی ءِ وزن گیش اِنت-

آئی ءَ گُشتگ کہ بلوچستان ءَ ھم مئے دہ ووٹانی بستار جام کمال ءَ زانت کہ نِی در پہ در اِنت-

بشتانک: پیرک جان دو سال پِر گوست

نبشتہ کار: میرو بلوچ

دی بلوچستان پوسٹ

جاگہ یار مھمد بازار ءِ ھند کلگ کور ءُ وشکوشین پروم ات نزیک شپ ءِ سَے ءُ نیم اَت سال دو ھزار ءُ بیست ءَ ماہ رمضان ات اناگہ تیر ءُ ٹوپانی تواراں جھان جکسینت ، تیرانی پشنگ چو رگام ءَ رچگ ءَ اِت اَنت مگلبیں ڈن ءَ ھمے ڈنّ ءِ سر ءَ سَے بان تاں کہ پاکستانی لشکر ءَ گوں ھندی چریکانی ھمبراھاں انگر کتگ ات اَنت ، لشکر گام جنان اَت دیم ءَ روگ ءِ کوشش کنگ ءَ ات بلے بان ءِ تہ ءَ سنگر گپتگیں بامرداں ترندی ءَ گوں لشکر ءِ گاماں پروشگ ءَ اِت اَنت کہ لشکر گوں وتی چاریگاں ابکہ ءُ ھیران بوت کہ ما اد ءَ باریں چینکس سرمچارانی دیمپانی ءَ کنگ ءَ ئیں ، پہ لشکر ءِ کمک ءَ دگہ بازیں لشکر رِچگ ءُ پیداک ات بلے لشکر انگت سوبین نہ بیت دیم ءِ کنزگ ءَ ءُ ھمے بامرداں گوں وتی سھر سریں تیراں لھتے سپاھیگ مرگ ءِ آماچ کتگ ات ءُ دگہ لھتے ٹپیگ کتگ ات شپ گوزان بیت گوں تیر ءُ ٹوپانی توار ءَ تاں روچ ءَ ٹِک کُت بلے انگت بان ءِ تہ ءَ سنگر گپتگیں بامرداں لشکر ءِ دیم داشتگ ات انگت ءَ بے کساس تیر ءُ ٹوپانی توار ایش کنگ بوگ ءَ اَت ساھت گوزان اَت ءُ راجی بامرد بلوچ راج دپتر ءَ نوکیں تمردی ءُ بامردی داستانی جوڑ کنگ ءَ اِت اَنت ، وھد گوست تاں سھب ءِ دہ بیت زمین ءِ لشکر گوں وتی چریکاں سک لاچار اِت اَنے ءُ وتی جوناں گندگ ءَ اِت اَنت کہ ڈنّ ءِ سرا تالان اِت اَنت ءُ پہ دیم ءِ کنزگ ءَ لگوریں لشکر ءَ بیم آیگ ءَ ات ، لشکر ءَ وتی لاچاری دیست ءُ بمباریں ھیلی کوپٹر لوٹائینت ءُ سر بوتاں اے وھد ءَ جنگ ءَ یازدہ ساھت گوستگ اَت ءُ سرجم بوتگ ءَ اے وھد ءَ بامردانی تہ ءَ سنگت مالک ءُ مومن شھید بوتگ ات اَنت بلے انگت دو تمردیں ھمبلاں گوں جنگی توکلاں میڑ داشتگ ات ، وھد گوزان ات لشک رءِ مردار ءُ ٹپیگ بیتگیں سپاھیگ گیش بوان اِت اَنت-

ھمے وھد ءَ پیرک جان ءَ وتی پیگام سنگتانی سر ءَ دیم دات کہ منی دو سنگت مالک جان ءُ مومن جان شھید بوتگ اَنت بلے ماں انگت میدان ءَ میڑ داشتگ ءُ تاں گڈی تیر ءَ جنگ ءَ داراں ءُ اچ مارا پد منی سنگت ءُ منی راج جنگ ءَ دیم ءَ ببر انت پیرک جان ءَ وتی مکھین مات ءُ آریپین پت ءَ را پیگام داتگ اَت کہ منی شھادت ءَ دردیگ مہ بہ اِت ءُ موتک میار اِت ءُ منی سر ءَ پھر بہ بند اِت-

کساس نیمروچ ءِ 12:30 ھال سر بیتگ اَت کہ میڑ آسر بوتگ ءُ پیرک جان ءُ تمردیں گلاب جان نمیران بوتگ گوں وتی سنگتاں پہ وتی ماتیں گلزمین ءَ –

پیرک جان دو سال سرجم بوت تو گوں ھمبلاں اچ ما گسر بوت ئے پہ شما سرجمیں راج پھر بند ایت پہ شما ھَمُک سھت ءَ پروم ءُ بالگتر ءِ کپوت نال انت ءُ زر اَنت پہ شمئے تُپنگ ءِ تیرانی توار ءَ بلوچستان ءِ کوہ زر انت تئی سنگت انگت گیر کار اَنت تئی جنگ ءِ داستاناں نہ تو ھر جنگ ءَ دشمن پروش دات ءُ لگور کت ، اے پدی دشمن ءَ جند ءِ براتانی ھمراھی ءَ تئی پروش دَیَگ کوشش کت بلے انگت ءَ تو گوں سنگتاں پروش دات ءُ وت ءَ نمیران کت ، پیرک جان شما پروم ءِ کوھانی سر بلند تِر کت پیرک جان شمئے تمردی داستان بلوچ راجدپتر ءِ تہ ءَ ابدمان بوت-

شھید سلمان ھمل گُش ایت
“ملکموت نشتگ مرچی ھیرانیں”
“نورا گوں ھمراھاں نمیرانیں”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءِ بنجاھی شھر تربت ءَ کوہ ءِ مراد ءِ زیارت ءِ ھاتر ءَ بلوچستان ءَ ھوار ءَ سند ءُ دگہ دمگانی مردمانی آھگے درچ برجاہ انت –

کوہ ءِ مراد زیارت ءَ بازیں مردمے آھگ انت ءُ آھانی تہ ءَ لھتے پیادگ سپر کنگ انت اشانی تہ مزنیں کچ ءَ چُک ءُ زالبول کماش ھوار انت –

ھالانی رِد ءَ گوستگیں شپ ءَ کیچ ءِ دمگ ڈاندار ءَ پاکستانی پوج ءَ زیارتیانی یک ٹولی ءِ داشتگ ءُ آ پوجی بنجل ءَ برتگ انت کہ آھانی تہ ءَ زالبول ھم ھوار انت –

ھالانی رِد ءَ زیارتی بازیں اداراں دارگ ءَ پد یل کنگ بوتگ انت بلے ھنگت ناکو ابراھیم نامیں کماش ءِ پوج ءَ داشتگ ءُ یل نداتگ – دارگے سوب ھم پھازگی لشکر ءَ نہ گوشتگ –

دمگی مردماں پھازگی لشکر ءِ اے رویش ایرجتگ گوشتگ کہ ادا ھمک روچ ترسینگ ءُ آوار جنگ بنت نوں زیارتی ھم دلسیاہ کنگ بوھگ انت –

بلوچستان ءِ دمگ پنجگور ءَ گوستگیں روچاں جنگ بوتگیں ورنا فٹبالر داد جان عنایت ءِ کھول ءَ یکشمبے ءِ روچ ءَ پنجگور پریس کلب ءَ اھوالکاراں گوں تران کنان ءَ کُشندھانی دزگیر کنگ ءِ لوٹ کتگ – اے وھد ءَ پریس کانفرنس ءَ پنجگور ءِ جھمنند، سیاسی باسک ءُ ملاھانی مزنیں کچے ساڑی بوتگ –

بیران بوتگیں ورنائیں برات ءِ گوشگ ات کہ بیست ءُ یک اپریل ءِ روچ ءَ ادار دو نیم ءَ مئے سر ءَ ھنچیں زوراکی ءِ کنگ بوتگ کہ ما آئی ءِ گپاں گوں درشان کُت نہ کنیں کہ آئی ءِ درشانی ءَ من ءَ زبان ھمراھداری ءَ نہ انت مئے گِس ءِ چراگ دیدوک بلکیں من بگوشاں خدابادان ءِ مردمانی چمانی استال ورنائیں فٹبالر داد جان عنایت کہ دو وھد ءِ نان ءِ شوھاز ءَ وتی دکان ءَ نندوک بوتگ کہ ھمے میان ءَ پرپٹ سواریں ناشناسیں مردماں تیرباران کتگ ءُ شھید کتگ – کہ چریشی ءَ تھنا مئے گِس ناں بلکیں سرجمیں بلوچستان پرسیگ انت –

داد جان عنایت ءِ برات ءِ گوشگ ات کہ مئے کسے ءِ گون ءَ زاتی دژمنی ءِ نیست ما گریبیں مردمیں کہ شپ روچ مزوری کن ایں وتی چکاں لاپ دئیں بلے رمزان ءِ اے ماہ ءَ مئے سر ءَ ھنچیں زلم ءِ کنگ بوت کہ درور دیگ نہ بیت – اشی ءَ پیسر ھم خدابادان ءَ تیرگواری کنگ بوتگ ءُ مئے ورنا مرتضیٰ بلوچ ءُ صغیر شھید کنگ بوتگ انت – اے وڑیں جاور ھالانی تہ ءَ کہ کسے وتی گِس ءِ تہ ءَ چاکو ءِ زرت ءُ تر ات نہ کنت بلے سرپ گاڑیاں سواریں سلاہ بند کہ آھاں نوکتریں سلاہ ھم گون سربازار چکر انت روچ رھمانی دزی ھم کناں –

کُشگ بوتگیں ورنا ءِ برات ءِ گوشگ ات کہ داد جان بلوچ ءِ کشندھانی شوھاز کنگ ءُ آھاں سزا دیگ ریاست ءِ زمہ واری انت بلے ریاستی ادارھانی گوشاں مور ھم نوارت – ما چیف جسٹس، بلوچستان سر وزیر، آئی جی پولیس، پنجگور ڈپٹی کمشنر، ڈی پی او، ءُ ریاستی ادارھاں چہ لوٹ کنیں کہ شھید داد جان ءِ کُشندھاں زوت دزگیر بہ کن انت –

آئی ءِ گوشگ ات کہ اے وئیل ءَسَے روچ پرگوستگ بلے انگت سرکار ءِ نیمگ ءَ ھچ وڑیں گامگیج زورگ نہ بوتگ ھمے ھاتر ءَ ما سرکار ءَ بیست ءُ چار ادار ءِ وھد دئیں کہ شھید داد جان ءِ کُشندھاں دزگیر بہ کن انت اگاں بیست ءُ چار ادارانی میان ءَ شھید داد جان ءِ شھیدی ءَ ھواریں مردم دزگیر کنگ نہ بوتاں گڈا ما دمگی مردماں گوں نندیں دیمتری کار درگت ءَ پیسلہ زوریں –

اے وھد ءَ پنجگور ءِ سیاسی ءُ مزھبی ءُ سول سوسائیٹی ءِ پنجگور ءِ رھشون ھم ساڑی بوتگ انت کہ آھاں ورناھے کوش ایرجتگ –

اھوالکاراں گوں تران کنان ءَ سول سوسائٹی رھشون ءِ گوشگ ات کہ دمگ ءِ تہ ءَ کشندہ ٹولی سربازار تر ءُ تاب کن انت دگہ چاگردی سلکاریاں ھم ھوار انت نشہ باپاری دزی ڈنگی وڈیں کارانی ھم بھر انت بلے انگت سرکار نیمگ ءَ ھچ گوشگ نہ بنت- سول سوسائیٹی ءِ پنجگور ءِ رھشوناں مزھبی ءُ چاگردی گلاں چہ لوٹ کتگ کہ دمگ ءِ تہ ءَ ساڑی ایں سلاہ بندیں ٹولیانی بگیری ءَ توار چست بہ کن انت

دمگی سرپرستاں سرکار ءُ پنجگور ءِ واکدار ھمے گوشتگ انت کہ آ داد جان ءِ کوش ءَ ھواریں مردماں زوت دزگیر بہ کن انت اگاں ناں سرجمیں پنجگور کھول ءِ گوم ءَھوار بیت ءُ ترندیں رد امل ءِ دنت –

آھاں گوشتگ کہ پنجگور ءَ سلاہ بندیں ٹولیاں کئی سرپرستی ءَ چلگ انت درست سرپد ءُ زان انت بلے اد ءَ ترس ءِ ودینگ بوتگ –

نصیر آباد ءَ سلاہ بندیں مردمانی تیرگواری ءَ دو کس بیران بیتگ اَنت-

گیشیں اھوالانی رد ءَ بلوچستان ءِ دمگ نصیر آباد ءِ ھند ڈیرہ مراد جمالی ءَ بس ءِ آڈہ ءِ سر ءَ سلاہ بندین مردماں دکانے ءِ سر ءَ تیرگواری کتگ ءُ تیرگواری ءَ پد تتکگ اَنت – تیرگواری ءَ دو کس بیران بیتگ اَنت ءُ دو زدگ بیتگ اَنت-

پولیس وئیل جاہ ءَ سر بیتگ ءُ لاش زدگ بیتگیں مردم چست اژ کتگ ءُ ھسپتال ءَ سر اش کتگ اَنت – انتزامیہ ءِ رد ءَ وئیل ءَ خیرجان لھڑی ءُ علی دوست کھیازئی کشگ بیتگ اَنت-

چریشاں پد وئیل ءَ وئیل ءَ ھواریں دو مردم کوش ءَ ھواریں دزگیر کتگ اَنت پولیس ءِ رد ءَ وئیل کوھنیں دشمنی ءِ سبب ءَ پیش اتکگ ءُ گیشیں پَٹ ءُ پول بیگ ءَ اِنت-

وانگجاہ ءَ ماسٹرانی ڈوٹی نہ دیگے بگیری ءَ نودربراں زھرشانی کتگ ءُ دگ بند کتگ –

گورنمنٹ ہائی سیکنڈری سکول ناگ واشک ءِ نودربراں وانگ جاہ ءَ ماسٹر نہ بوھگے سوب ءَ زھرشانی کتگ ءُ سی پیک دگ بند کتگ –

زھرشانی کنوکیں نودربراں ھر نیمگ ءَ رؤگ آھگے ھاتر ءَ دگ بند کتگ –

گورنمنٹ ہائی سیکنڈری وانگجاہ ناگ ءِ نودربرانی گوشگ انت کہ آھانی وانگ جاہ ءَ ماسٹر ڈوٹی دیگ نہ انت وانگجاہ ءَ نودربر مدامی ساڑی انت بلے آھانی وانینگ ءَ ماسٹر نیست انت –

زھرشانی کنوکاں لوٹ کتگ کہ آھانی وانگ جاہ ءَ نوکیں ماسٹر دیم دیگ بہ بیت –

زانگ بہ بیت بلوچستان ءِ بازیں دمگاں سرکاری وانگجاہ جوڈ کنگ بوتگ انت بلے تنی وھدی ھچ ماسٹر ءَ ڈیوٹی نہ داتگ لھتے روچ ساری شال ءِ دمگ سریاب ءِ سرکاری وانگجاہ ءِ نودربراں وتی زھرشانی نبشتہ کنائینتگ ءُ ماسٹرانی آرگے لوٹ کتگ –

سریاب ءِ نندوکاں گوشگ انت کہ سریاب ءَ زند گوازینگے سھولتاں پیسرا چہ زبھر انت بلے پدا ھم سرکاری وانگجاہ ءِ جوڈ کنگ بوتگ بلے ماسٹر نیست انت چریشی ءَ دمگی نودربر وانگ ءَ چہ زبھر انت –

بلوچ یکجھتی کمیٹی ءِ نیمگ ءَ شمبے ءِ روچ ءَ پاکستان ءِ بنجاھی شھر اسلام آباد ءُ پنجاپ ءِ شھر لاھور ءَ زھرشانء کنگ بوتگ –

بلوچ یکجھتی کمیٹی ءِ نیمگ ءَ چہ چاگی ءُ نوکنڈی ءِ مزورانی کوش ءُ پرایمنیں زھرشانی سر ءَ تیرگواری ءَ ھوار گوستگیں روچ ءَ پنجگور ءَ داد جان ءِ کوش ءِ پژدر ءَ جار جنگ بوتگ – زھرشانی ءَ بلوچ نودربراں ھوار دگہ سیاسی ءُ چاگردی باسک ھوار بوتگ انت –

زھرشانی کنوکاں وئیلانی بگیری ءَ روانک کش اِتگ ءُ نارہ جتگ –

زھرشانی کنوکانی گوشگ ات کہ چاگی ءَ پُرایمنیں زھرشانی کنوکانی سر ءَ ھما وھد ءَ تیرگواری کنگ بوتگ کہ وتی سنگت ءِ کوش ءِ بگیری ءَ ھک لوٹگے ھاتر ءَ زھرشانی ءَ بوتگ انت – چاگی ءِ وئیل بلوچستان ءِ تہ ءَ اولی وئیل نہ انت بلکنہ چشیں دگہ ھزاراں وئیل بوتگ انت –

زھرشانی کنوکانی گوشگ ات کہ بلوچستان ءَ ھمک روچ یکے ناں یکے کُشگ بیت ءُ اے کوشانی پُشت ءَ ریاستی ادارہ ءُ آھانی داشتگیں ھما مردم انت کہ دمگ ءِ جاورھالانی ھراب کنگ ءَ مھار گُٹ دیگ ءُ یل کنگ بوتگ انت –

آھاں گوشتگ کہ دو روچ ساری پنجگور ءَ ورنا داد جان ء عنایت روچ رھمانی تیرباران کنگ ءُ کُشگ بوتگ اے وڈیں وئیلانی دارگے ھاتر ءَ بلوچ ءِ گور ءَ بید زھرشانی ءَ دگہ ھچی راہ پشت نہ کپتگ آھاں گوشتگ کہ بلوچستان ءَ چشیں زوراکیانی بگیری ءَ مدامی توار چست کن انت -.

آھانی گوشگ ات کہ چاگی ءِ مھلوک روزگار ءِ دیگے بدل ءَ تیرباران کنگ بوھگ انت –

ترانکارانی گوشگ ات کہ چاگی ءِ وئیل ریاستی زلم زوراکیانء نوآبادیانی پالیسی ءِ درچ یے پرچاکہ اے ریاست اولی روچ ءَ چہ ھمے پھمگ انت بلوچستان ءِ جیڑہ گیش گیواری ءَ بس توپک انت –

ھمے وڈ بلوچ یکجھتی کمیٹی ءَ وئیل ءِ بگیری ءَ چاگردی ترامجاھاں کمپین جار جتگ – چاگی ءِ وئیل ءِ بگیری ءَ بلوچستان ءِ جتا جتائیں شھراں زھرشانیانی درچ برجاہ انت –

زھرشانی کنوکانی لوٹ انت کہ چاگی وئیل شری ءَ پٹ پول کنگ بہ بیت تانکہ دیمتر ءَ سیمسراں کار کنوکیں مزورانی سر ءَ دیمتر ءَ چشیں وئیل مہ بنت –