بلوچستان ءِ دمگ کیچ ءِ ھند مند ءَ بیگواھیں مردمانی کھولانی نندانک مروچی چارُمی روچ ءَ ھم برجاہ انت کہ اود ءَ زھرشانی نندانک ءَ کھولاں گوشتگ ما باندا مند ءِ بازار ءَ ھرتال ءِ جار ءَ جن ایں-
شنگ بیتگیں درشان ءَ گوشگ بیتگ انچش کہ شما سرپد ات مرچی مئے زھرشانی نندانک ءِ چارمی روچ انت کہ برجاہ انت۔ 23 اکتوبر ءِ شپ ءِ سئے بج ءَ ایپ سی ءُ پاکستانی چیریں ادراھاں مئے لوگ ءِ سر ءَ بیڑ برتگ جنین ءُ چُک کم شرپ کتگ انت مئے سئے کسان سالیں ورناہ فھد ولد عثمان ،ھارون ولد محمد جان، حمود ولد محمد جان زورانسری آوار جنگ ءَ پد بیگواہ کتگ انت کہ دنیگا مارا آیانی بابت ءَ ھچ سرپدی دیگ نہ بیتگ کہ مئے چُک کجام میار ءِ پد ءَ بیگواہ کنگ بیتگ انت آیانی گناہ چی انت۔
آیاں گوشےگ دو روچ پیش ھندی انتظامیہ اتکگ ءُ گوں ما گپ ءُ تران کتگ اے میان ءَ ما وتی زھرشانی ءِ لوٹ انتظامیہ ءِ دیم ءَ ایر کتگ انت کہ مئے مردم تانکہ آجو کنگ نہ.بنت ما وتی زھرشانی ءَ برجاہ داریں ءُ روڈ ءُ دگ بند بنت۔ اے میان ءَ انتظامیہ ءَ دہ روچ ءِ مُھلت لوٹ اتگ ءُ گشتگ کہ شما وتی زھرشانی ءَ ھلاس کن ات دہ روچ ءِ توک ءَ شمئے مردم یل کنگ بنت بلے ما بیگواھیں ورنایانی کھول ءَ انتظامیہ ءِ گپ نہ من اتگ انت ءُ گشتگ تانکہ مئے مردم یل کنگ نہ بنت مئے زھرشانی برجاہ بیت۔
آیان گوشتگ یکبرے پد ءَ ما اے پریس کانفرنس ءِ نیمگ ءَ اے گپ ءَ گوں تچکی ءَ گشیں کہ تانکہ مئے مردم آجو کنگ نہبنت مئے زھرشانی نندانک برجاہ بیت ءُ روڈ سرجم ءَ بند بیت۔
آیاں گوشتگ ما چہ بیگواھیں ورنایانی نیمگ ءَ مند ءِ سرجمیں بازار ءِ بند کنگ ءِ جار ءَ جنیں ءُ امیت انت کہ بلوچ مھلوک مئے اے جار ءِ پلہ مرزی ءَ کن انت ءُ وتی دوکاناں یکروچے بند کن انت، ءُ مئے توار جوڑ بنت، سرجمیں بلوچ راج ءُ بلوچ سیاسی پاٹیاں گوں دزبندی کنیں کہ مئے توار جوڑ بہ بنت تانکہ مئے چک پہ وش ءُ سلامتی آجو کنگ بہ بنت-
