TBP Balochi

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ء تہ ءَ گوشتگ مئے سرمچاراں سی یک مارچ 2026 ءَ آواران ءِ دمگ چیری مالار ءَ برجاہ پاکستانی پوج ءِ بُنجل ءِ سر ءَ مزنیں سلاھاں چہ اُرش کتگ ءُ سک نزیک ءَ نشانگ کتگ – سرمچاراں آر پی جی ءِ بازیں گولھے آس داتگ، کہ بُنجل ءِ تہ ءَ کپتگ اَنت چریشی ءِ آسر ءَ پوج ءَ سک تاوان رس اِتگ-

جارکش ءَ گوشتگ کہ اشی ءَ ساری بیست نُھ مارچ 2026 ءَ سرمچاراں گیشکور ءَ زورگریں پوج ءِ بُنجاھی بُنجل سر ءَ یک مزنیں اُرشے کتگ- اُرش ءِ میان ءَ سرمچار اسنائپر ءَ دُژمن ءِ جتاجتائیں سنگر نشانگ کتگ اَنت، وھدے کہ دومی ٹولی ءَ آر پی جی ءَ چہ بُنجل ءِ سر ءَ گولہ گواری کتگ، چریشی ءِ آسر ءَ دُژمنیں پوج ءَ جانی ءُ مالی تاوان چست کنگ کپتگ-

جارکش ءَ گوشتگ پروش وارتگیں دُژمن ءَ وتی پروش ورگ ءِ چیر دیگ ھاتر ءَ چپ چاگرد ءَ ھستیں میتگانی سر ءَ مزنیں سلاھاں چہ تیرگواری کتگ، بلے سرمچار سوبمندی کاروائی ءَ پد سلامتی وتی اوتاکاں تاں سر بیتگ اَنت-

جارکش ءَ گوشتگ بلوچستان لبریشن فرنٹ اے دوئیں اُرشانی زمہ واری ءَ منّ اِیت-

بلوچستان ءِ جتاجتائیں دمگاں اُرشانی دْرچ یکشل ءَ برجاہ ءَ اِنت-

بلوچستان ءَ سے روچ ءَ ساری بندات بیتگیں اے یکجاھی اُرشانی دْرچ یکشل ءَ برجاہ ءَ اِنت، چریشی ءَ بلوچستان ءِ جتاجتائیں دمگاں پاکستانی پوج ءِ بُنجل، گیس پائپ لائن، ھال اھوال ٹاور نشانگ کنگ بیتگ اَنت-

نوکیں ھالانی رِد ءَ تربت ءَ ملٹری انٹیلی جنس ءِ کارگس ءِ سر ءَ سلاہ بنداں اُرش کتگ، وھدے کہ سبی ءِ دمگ مالسوریانی ءَ یک ھال اھوالی ٹاورے ناشناسیں سلاہ بندیں تباہ کتگ-

بیست ھشت مارچ ءَ چہ برجاہ اے اُرشاں بلوچستان ءِ جتاجتائیں دمگاں پاکستانی پوج ءِ بُنجاھی بُنجلاں ءُ چوکی نشانگ کنگ بیتگ اَنت-

بلوچ لبریشن آرمی ءِ جارکش جیئند بلوچ ءَ وتی یک کسانیں درشانے ءِ تہ ءَ گْوشتگ کہ بلوچستان ءِ دیر دراج اُرشانی درچ گوں تُرندی ءَ چہ برجاہ ءَ اِنت- اے درشان ءَ دیمتر ءَ گوشتگ کہ اے اُرش ءِ شوربندی ءِ رِد ءَ کنگ بیگ ءَ اِنت اے دْرچ آؤکیں وھداں ھم برجاہ بنت-

بلوچستان ءَ اے وڑیں اُرش گوستگیں سالاں چہ وھد وھد ءِ سر ءَ گندگ ءَ آیگ ءَ اِنت اود ءَ آجوئی لوٹوک جتاجتائیں کاروائی کتگ-

بلوچستان ءِ دمگ سوراب ءُ گرگینہ ءَ سئے جتا جتائیں پاکستانی لشکر ءِ گاڑی ءُ پوسٹ سلاھبندیں مردماں اُرشانی نشانگ جوڑ کتگ اَنت ھمے وھد ءَ بلوچ آجوئی لوٹوکیں مردماں شال ءُ تفتان شاھدگ ءُ سر ءَ ناکہ بندی کتگ۔

سوراب ءِ دمگ بینچا ءَ پاکستانی لشکر ءِ دو گاڑیانی سر ءَ سنگر گپتگیں مردماں راکٹ ءُ دگہ وتکاریں سلاہانی گون ءَ نشانگ جوڑ کتگ انت کہ ایشی ءِ آسر ءَ سئے کارندہ بیران ءُ بازینے ٹپیگ بوتگ اَنت۔

دومی نیمگ ءَ مستونگ ءِ دمگ گرگینہءَ کردگاپ، گریڈ اسٹیشن ءُ کوتل ءِ جاھاں پاکستانی لشکر ءِ دو پوسٹ سلاہ بندیں مردمانی نشانگ جوڑ کتگ اَنت۔

دومی نیمگ ءَ بلوچ آجوئی لوٹوکیں مردماں شال ءُ تفتان مستریں شاہراہ ءِ سر ءَ چیک پوسٹ جوڑ کتگ ءُ سنیپ چیکنگ برجاہ اِنت۔ دمگی مردمانی رد ءَ شاھدگ ءِ سر ءَ بندش چار کلاک ءَ گیش برجاہ بوتگ۔

بلوچستان ءِ جتاجتائیں دمگاں پاکستانی پوج، شوربندی، ڈیتھ اسکواڈ ” سر ءَ اُرشانی درچ برجاہ ءَ اِنت-بلوچ لبریشن آرمی ءِ جارکش جیئند بلوچ ءَ کسانیں درشانے ءِ تہ ءَ گْوشتگ کہ بی ایل اے ءَ سرجمیں بلوچستان ءَ سی ءَ چہ گیش کاروائی کتگ ءُ گیش اُرشانی درچ برجاہ ءَ اِنت-

گوستگیں شپ ءَ کلات ءِ شھر منگچر ءَ چار کلاکاں چہ گیش جتاجتائیں ھندانی سر ءَ تُرندیں تیرگواری ءُ تراکانی ھال دیم ءَ اَتکگ اَنت-

نوکیں ھالانی رِد ءَ پاکستانی پوج ءِ بُنجاھی بُنجلاں، پوسٹاں ءُ چوکی نُھ ءَ چہ گیش ھندانی سر ءَ اُرشانی نشانگ کتگ اَنت-

اے اُرشاں پاکستانی پوج ءِ تھسیل بُنجل، بازار بُنجل، ڈور بُنجل، کالج ءَ برجاھیں بُنجل، بازار ءَ برجاہ چار پوسٹاں ھوار منگچر ءِ پترگی راھانی سر ءَ برجاھیں پوسٹ اُرشانی دیمپان بیتگ اَنت- پوج ءِ کمک ءِ ھاتر ءَ آؤکیں بکتر بند گاڑی اُرش ءِ نشانگ کنگ بیتگ-

چمّگدانی رِد ءَ اُرشکار مزنیں سلاھاں ھوار وتکاریں سلاہ گون بیتگ- -ھالانی رِد ءَ اے اُرشاں مزنیں کچے ءَ پوج ءَ جانی تاوان چست کنگ کپتگ-

کیچ ءِ دمگ کڈان ءَ پاکستانی لشکر ءِ بنجاھی بنجل اُرش ءِ نشانگ جوڑ کنگ بیتگ، وھدیکہ لشکر ءِ کمک ءَ سر بوھوکیں کاروان ءِ سر ءَ اُرش کنگ بوتگ۔ سلاہ بندیں مردماں لیویز پولیس اسٹیشن ءُ نادر ءِ کارگس ھم کنٹرول کتگ انت۔

کڈان ءِ دمگ ءَ گوستگیں شپ ءِ شپ ءِ وھد ءَ مزنیں تیرگواری ءُ تراک بندات بوتگ کہ تاں شپ ءِ نزیک ءَ 10 بج ءَ برجاہ بوتگ انت۔

دمگی مردماں ٹی بی پی ءَ گوں تران کنان ءَ گْوشتگ کہ اے اُرش ءَ مزنیں کساسے ءَ سلاہ بندیں مردماں لشکر ءِ بنجاھی بنجل نشانگ جوڑ کتگ ءُ لشکر ءِ کمک ءَ سر بوھوکیں کاروان ءِ سر ءَ ھم اُرش کنگ بیتگ کہ اود ءَ بمب تراک ءَ لشکر ءِ بکتر بندیں گاڑی تباہ بوتگ۔

دمگی مردمانی رد ءَ سلاہ بندیں مردماں لیویز پولیس اسٹیشن ءُ نادر ءِ کارگس ھم دستیگ کتگ انت ءُ کارندھانی سلاہ دست کپتگ اَنت۔

اے درگت ءَ انگت ءَ واکداراں ھچ وڑیں ھال ءُ اھوال نہ داتگ۔

گوستگیں شپ ءَ شال ءَ گوں ھمگرنچیں لکپاس ءَ پاکستانی لشکر ءِ پوسٹ ءِ سر ءَ سلاہ بندیں مردمانی اُرش بوتگ ءُ اُرش کنوکاں اُرش ءِ وھد ءَ کوہ ءِ سر ءَ ایریں ریڈار سسٹم ھم سوتکگ ءُ تباہ کتگ۔

ایشی ءَ چہ پیسر ضلع واشک ءِ شمسی ایربیس ءِ سر ءَ بی ایم 12 راکٹ اُرش کنگ بوتگ۔

گوستگیں روچ ءَ جھل مگسی ءَ تھانہ ءِ کنٹرول ءَ پد دمگ ءَ سر بوتگیں فوج ءِ کاروان ءِ اُرش ءَ نشانگ جوڑ کنگ بوتگ کہ ایشی ءِ آسر ءَ فوج ءِ سئے گاڑی تباہ بوتگ ءُ بازیں کارندہ بیران بوتگ اَنت۔

مارچ ءَ چہ برجاہ بوتگیں اے اُرشانی سلسلگ ءِ زمہ واری بلوچ لبریشن آرمی ءَ زرتگ انت۔

بی ایل اے ءِ جارچین جیئند بلوچ ءَ گوستگیں شپ ءَ یک کسانیں بیانے ءِ تہ ءَ گْوشتگ کہ بلوچستان ءِ سرجمیں دمگاں پاکستانی لشکر ءِ سر ءَ مئے ھمگرنچیں اُرش سرجمیں زور ءَ برجاہ اَنت۔

جارکش ءِ رد ءَ تاں انوگ ءَ جھل مگسی، شال، مستونگ، نوشکی، واشک، دلبندین، خاران، پنجگور ءُ کیچ ءَ ھوار جتا جتائیں دمگاں پاکستانی لشکر ءِ کیمپ، فوجی تنسیبات ءُ زور گیر لشکر ءِ ”ڈیتھ اسکواڈ“ ءِ سر ءَ سی ءَ چہ گیش اُرش کنگ بوتگ انت۔

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ زورگریں بلوچستان ءِ دیر دراج زورگریں پاکستانی پوج ءِ ھلاپ ءَ مئے یکجاھی اُرشانی دْرچ گوں تُرندی ءَ چہ برجاہ ءَ اَنت- تنی وھدے جھل مگسی ، شال، مستونگ، نوشکی، واشک، دالبندین، ھاران، پنجگور ءُ کیچ ءَ ھوار جتاجتائیں دمگاں زورگریں پاکستانی پوج ءِ بُنجلاں، لشکری شوربندیاں ءُ زورگریں پوج ءِ ” ڈیتھ اسکواڈ” ءِ اوتاکانی سر ءَ سی ء چہ گیش اُرش کنگ بیتگ-

جارکش ءَ گْوشتگ کہ اے کاروائیاں نوکیں سلاھانی کارمرز کنان ءَ زورگریں پوج ءِ درزنانی کارندہ کشتگ ءُ بازین ئِے ٹپی کتگ، وھدے کہ دُژمن ءَ مزنیں کچے ءَ جانی ءُ مالی تاوان ءِ دیمپانی کنگ کپتگ- اے سرجمیں اُرشاں ءُ دُژمن ءَ رستگیں تاوانانی سرپدی ءَ زوت رسانکدر ءَ شنگ کن ایں-

بلوچستان ءِ جتاجتائیں دمگاں گوستگیں روچ ءَ چہ اُرشانی دْرچ یکشل ءَ برجاہ ءَ اِنت- شال، مستونگ، نوشکی، ھاران، دالبندین، واشک، سبی، نصیرآباد، جھل مگسی ءُ کیچ ءَ بازیں اُرشاں رپورٹ نکش بیتگ اَنت-

نوکیں ھالانی رِد ءَ شال رودرتکی بائی پاس سر ءَ سلاہ بندیں مردماں ایگل اسکواڈ سر ءَ تیرگواری کتگ چریشی ءِ آسر ءَ دو پولیس ءِ کارندہ بیران بیتگ اَنت-

بیران بیتگیں کارندھانی پجّار کانسٹبیل محمد نور ءُ کانسٹیبل محمد ایوب نام ءَ چہ بیتگ اَنت-

زانگ بہ بیت کہ گوستگیں بیست چار کلاکانی تہ ءَ شال ءَ پاکستانی پوج، ملٹری انٹیلی جنس کارگس، پولیس ءَ اَبید ریل ٹریکس، پُھل ءُ گیس پائپ لائن ھم نشانگ کنگ بیتگ اَنت-

واکداراں اے اُرشاں پوج ءِ کارندھانی بیرانی، ٹپی بیگ ءُ ریل ٹریکس ءِ تاونانی پدری کتگ-

تنی وھدے اُرشانی زمہ واری انگت ھچ گل ءَ نہ زرتگ اَنت-

چہ خضدار ءَ اسمبلی ءِ سیٹ این اے 256 ءِ زمنی گچین کاری ھستیں جاور ھالانی سبب ءَ مھتل دارگ بوتگ ۔

بندات ءَ اے گچین کاری 5 اپریل ءَ بوھگی بیتگ بلے بلوچستان سرکار ءَ الیکشن کمیشن ءَ چہ لوٹ کتگ کہ گچین کاری ءَ مھتل بہ کنت ۔

الیکشن کمیشن ءَ سوبائی ھکومت ءِ لوٹ منگ ءَ پد زمنی گچین کاری ءَ را دگہ نوٹسے ءِ وھد ءَ تاں مگتل کتگ ءُ نوٹیفکیشن شنگ کتگ۔

واکدارانی رد ءَ نوکیں رمس ءِ جار ھما وھد ءَ جنگ بیت کہ جاور ھال شر بہ بنت۔ ایشی ءَ ابید چیف سیکرٹری بلوچستان ءُ آئی جی پولیس ءَ را وت ءَ لوٹائینگ بوتگ ءُ امن ءُ ایمنی ءِ بابت ءَ سرجمیں اھوال دیگ ءِ پرمان داتگ دانکہ انوگیں ھترھانی سرجمیں ارزشت دیگ بہ بیت۔

بلوچستان ءَ 28 مارچ ءَ بلوچستان ءِ 11 دمگانی تہ ءَ بلوچ آجوئی جھدکاراں یکشلیں اُرش کتگ انت۔

سرجمیں بلوچستان ءَ پاکستانی لشکری ​​کارجاہ، پولیس اسٹیشن ءُ سرکاری کمک ءَ ھستیں ٹولیانی سر ءَ اُرشانی یک سلسلہ یے برجاہ اِنت۔ بنجاھی شھر شال ءَ ھوار دگہ دمگاں ھم اُرشانی ھال ھست انت ۔

نوکیں ھالانی رد ءَ مرچی سھب ءَ واشک ءَ پاکستانی فوج ءِ شمسی ایئربیس ءِ سر ءَ اُرش ءَ نشانگ جوڑ کنگ بوتگ ۔

بنشون ءِ رد ءَ ایئربیس ءِ سر ءَ بازیں پروجیکٹائل آس دیگ بوتگ انت کہ جتا جتائیں جاھاں کپتگ اَنت۔

انگت ءَ واکداراں اے تاوان ءِ بابت ءَ ھچ وڑیں ھال ءُ اھوال نہ داتگ بلے دمگی مردمانی رد ءَ دمگ ءَ چہ دہ ءَ گیش مزنیں تراکانی توار اشکنگ بوتگ انت۔

اڑوکی شمسی ائیر بیس شال ءَ 300 کلومیٹر زرباری روکپتی دمگ واشک ءَ انت۔ ستمبر ءِ اُرشاں پد اکتوبر 2001 ءَ اے بالی پٹ امریکہ ءِ دست ءَ دیگ بوتگ کہ چہ اود ءَ سی آئی اے ءُ امریکی بالی اُرد ءَ نہ ایوک ءَ اوگانستان ءَ طالبان ءُ القاعدہ ءِ ھلاپ ءَ بالی کارروائی بندات کتگ بلکیں 2006 ءَ چہ اے بالی پٹ ءَ پاکستان ءِ قبائلی دمگاں ڈرون ءِ اُرش ھم کتگ۔

کراچی ءِ بلوچانی گیشتریں دمگ چہ ملیر ءَ زورانسری بیگواہ کنگ بیتگیں عاصم اصغر ءِ دزگیری سی ٹی ڈی ءِ نیمگ ءَ چہ دروگیں کاروائی ءِ گوشگ بیگ ءَ اِنت-

اِھوالکار ءِ رِد ءَ عاصم اصغر شانزدہ مارچ ءَ ملیر ءِ دمگ شرافی گوٹھ ءَ یک فٹبال میچے ءِ میان ءَ دو سد ءَ چہ گیش مردمانی دیم ءَ پاکستانی پوج ءِ کارندھاں آوار جتگ، چریشی ءَ پد آ بیگواہ بیتگ آئی ءِ درگت ءَ ھچ وڑیں سرپدی دیم ءَ نیتکگ-

بلے مروچی بیست نُھ مھکمہ انسداد ناشرکاری ( سی ٹی ڈی) ءَ یک بیڑے ءِ میان ءَ عاصم اصغر ءِ دزگیری پدر کتگ آ بلوچ لبریشن آرمی ( بی ایل اے) ءِ باسکے پیش داشتگ-

دمگی اِھوالکار ءُ کھول ءِ گوشگ اِنت کہ عاصم اصغر پیسر ءَ شانزدہ مارچ ءَ ریاستی دستیگ بیتگ، ھمے ھاتر ءَ آئی ءِ دزگیری یک نوکیں وئیلے ءَ پدر کنگ راستی ءِ ھلاپ اِنت-

انسانی ھکانی کارکنان ءِ گوشگ اِنت کہ اے وڑیں وئیل گوستانک ءَ ھم رپورٹ بیتگ اَنت، اود ءَ زورانسری بیگواہ کنگ بیتگیں مردم پد ءَ جتاجتائیں ایف آئی آرانی سر ءَ پیش داشتگ ءُ بھتام جتگ اَنت-

کھول ءَ عاصم اصغر ءَ زوت یل کنگ ءِ لوٹ کنان ءَ گْوشتگ کہ آ آمیدگس ءَ پیش کتگ ءُ زورانسری آوار جنی ءِ اے وئیلاں پلگاری پٹ ءُ پول کنگ بہ بیت-