TBP Balochi

بلوچستان ءَ آجوئی دوستیں سلاہ بندیں گل بلوچستان لبریشن فرنٹ ءِ سرکماش ڈاکٹر اللہ نزر بلوچ ءَ بلوچستان ءَ بندوکیں ھالتاک سنگر نیوز ءَ شنگ کرتگیں یک نوکیں تامر بندے ءَ چائنہ ءُ بلوچ راج ءَ کلوھے ءِ دروشم ءَ شنگ کرتگ –

تامر بند ءِ تہ ءَ بلوچ رھشون ڈاکٹر اللہ نزر بلوچ ءَ بلوچستان ءِ زیردستی ءُ دگہ دگہ جاور ءُ وتی ھمساھگیں ڈیھاں کمک ءِ دزبندی کتگ-

ڈاکٹر اللہ نزر بلوچ ءَ وتی شنگ کرتگیں تامر بند ءَ گوشتگ منی گوں راج ءَ دزبندی انت کہ بِہ وان انت، اَلم بُوان اَنت بِلے نِزوریں تالیمے ءُ اِے تالیمی نساب مئے ھک ءَ نہ اِنت – اے گپ ڈاکٹر اللہ نزر بلوچ ءَ پہ بلوچ راج ءُ دنیا ءَ وتی نوکتریں تامری کلوہ ءِ تہ ءَ گوشتگ انت –

ڈاکٹر اللہ نزر بلوچ ءَ وتی تامری کلوہ ءِ تہ ءَ گوشتگ کہ منی راج ، بلوچ کوم ءُ بلوچ پیر ءُ ورنایاں من شمئے جُھد ءَ سد سلام پیش کن ایں کہ مرچی بلوچ راجی جھد ءِ تہ ءَ ھما گیشی اتکگ کہ ما سالانی سال آھانی ودار کرتگ وھدیکہ مروچی مئے پیر ءُ ورنا درست اے راجی جبر ءِ ھلاپ ءَ یکمشت انت اے بلوچ راج ءِ مستریں سوبمندی انت –

آئی ءَ گوشتگ کہ من ھما مردماں گوشگ لوٹیں کہ آھاں وتی اوست امیت پاکستان ءِ اسمبلیاں بستگ آ سرپد بہ بنت کہ بلوچ ءِ بنکی انسانی ھک یا کومی ھکانی ھپازت اد ءَ نہ بیت- من ھمے گپ ءَ جن ایں کہ مرچی مئے کسے کہ روت انت آئی ءَ چُنڈکے نان دئینت اسمبلی سیٹ ءِ دے اَنت یا وزیری ءِ دے اَنت یا دو ماہ ءِ وزیر اعلی ءِ کن انت بلے منی ھیال ءَ اشی ءَ ھچی بستار ءِ نیست اِنت اسل بستار ھما تاکت اِنت کہ آ چہ پنجاپ انت- پنجاپ ءِ مرچی وزیر اعظم آئی ءِ آپوزیشن پارٹی گوشگ انت کہ ادالت ءِ سر ءَ مارا باور نیست – گڑا من اے واجکاراناں ھمے جست کنگ لوٹیں کہ شما کجام سنس گوں شمے کجام وھی ھست انت گوں شما کجام ھما پرشتہ ھست انت کہ شما گوش یے کہ بلوچ ءِ بنکی انسانی ھکانی داروکیں ھمے ادالت انت ھمے اسمبلی انت – بلکیں ھمے اسمبلی ءُ ھمے ادالت ءُ پارلمنٹ ،اسٹبلشمنٹ دراہ یک انت بلوچ ءِ ھلاپ انت – آئی ءَ گوشتگ کہ مرچی اگاں پنجاپ ءَ کسانوکیں مسلہ ءِ بہ بیت آئی ءِ ادالت ایکشن زور ایت ادا لکانی ھساب ءَ بلوچ شھید بوتگ انت ءُ گار ءُ بیگواہ انت گڑا ادالت کج اَنت ؟ مرچی ادالت ءُ ادالت ءِ کمیشن دراہ پہ نام انت گڑا بائد انت بلوچ اشانی سر ءَ باور مہ کن انت –

بی ایل ایف ءِ سروک ءَ گوشتگ کہ وھدیکہ آزاتی ءِ جنگ ءِ تہ ءَ شدت اتکگ اے شدت ءَ چی دنیا ءِ نگاہ مئے کوم ءِ سر ءَ انت بلوچ راج ءِ سر ءَ انت کہ مرچی تیاب بگر تاں ڈیرہ گازی ھان ءَ ھچ چشیں جاہ ءِ نہ منتگ کہ اود ءَ بلوچ ءِ مزاھمت نیست ءُ بلوچ وتی راجی آزاتی ءِ واستا جنگ کنگ ءَ نہ انت – گڑا الم ایش دنیائے ھم گوشاں کپگ ءَ انت

تامری کلوہ ءِ تہ ءَ آئی ءَ دیمتر ءَ گوشتگ کہ من اد ءَ یک کردارے ءِ زکر ءَ کنگ لوٹ ایں آ کرد چین انت من بلوچ راج ءِ نیمگ چین ءَ گوشگ لوٹ ایں کہ تو مئے کابز ءَ گوں ھوار مہ بو اگاں تو سرمایہ کاری کنگ لوٹ ئے گڑا ترا انتزار کنگ لوٹ ایت کہ بلوچ وت واجھیں، آزاتیں ریاست ءِ بیت تو ھمائی ءَ گوں ھر وڑیں سودا ءُ باپاری کرت کن ئے -آئی ءَ گوشتگ کہ تو وت ھنچیں آشوبے ءَ گوستگے من آئی ءِ کمونسٹ پاٹی ءَ گوشگ لوٹ ایں کہ بلوچستان ءِ تہ ءَ سی پیک ءِ نام ءِ سر ءَ شما بلوچاں درانڈیھ کنگ ءَ یے بلوچاں شما چہ وتی ڈیھ ءَ کشگ ءَ ات بلوچ ءِ مال ءُ ملکتاں تباہ کنگ ءَ ئے یک ءُ نیم لک مردم شما رخشان ءَ بگر تانکہ کیچ ءَ ھمے سی پیک نام ءَ لڈینتگ انت – اے ھمے وتن ءِ جھمنند انت- زندگیں راجے ءَ تو ھچ وڑ مڑ ات کت نہ کن ئے ھنچو کہ تئی گون ءَ کس ءَ مڑ ات نہ کت، تو وت ءَ ازیمیں کوم ءِ گوش یے بلوچ ھم ھمے وڑ ءَ زندگیں کومے ءُ ما ترا بلوچ کوم ءِ نیمگ ءَ ھمے گوشگ لوٹاں تو مئے نسل کشی ءَ پنجاپ ءَ گوں ھور مہ بو –

آئی ءَ دیمتر ءَ گوشتگ کہ دومی بیرک گولڈ کہ آ کنیڈا ءَ گون انت من آئی ءَ ھم گوشگ لوٹاں کہ تو ریکوڈک ءَ سرمایہ کاری کنگایے بلوچ کوم ءِ رزا ءُ منشا گوں تو نیست ھمے ھاتر ءَ تو اشی ءَ مکن بھتر انت اگاں ناں تو وتی مڈی ءُ زر ءِ تاوان ءِ زمہ وار وت یے –

ڈاکٹر اللہ نزر بلوچ ءَ گوشتگ کہ مرچی ھمے پنجاپ کہ بلوچستان ءِ مڈیانی لٹ ءُ پُل ءَ کنگ ءَ انت اشاں بلوچستان ءِ زلورت نہ انت بلوچستان ءِ مڈی زلورت انت –

آئی ءَ گوشتگ کہ مرچی بلوچ راج ءِ پی ایچ ڈی شھید کنگ بوگ ءَ انت ڈاکٹر ءُ انجینئیراں شھید کنگ ءَ انت ڈگری ھولڈراں شھید کنگ ءَ انت دانشور، شوانگاں شھید کنگ ءَ انت بزاں کہ آ لس بلوچ ءَ وتی ءِ دژمن زانت ھتاکہ بلوچ ءِ سرڈگار ءُ جنگل ھم آئی ءِ دژمن انت ھر کجا گند ایت سوچ ات اش ءُ بلوچ راج ءِ بلوچ ورنایانی اے ھوسلہ کہ مروچی ھست انت ترندی ءَ گوں دژمن ءَ مڑگ ءَ انت-

ڈاکٹر اللہ نزر بلوچ ءَ وتی تامری درشان ءِ تہ ءَ چہ بلوچ راج ءَ دزبندی کتگ ءُ گوشتگ مارا اے جنگ ءِ شدت گیش کنگی انت ھنچوش کہ مروچی آرتگ باند ءَ چدوگیشتر آرگی انت تانکہ وتی منزل ءَ سربہ باں – آئی ءَ گوشتگ کہ اے سبرکنگی جھدے من ھر وھد ءَ ھمے گشاں کہ سبرآزما جھدے کہ مئے آوکیں نسل اشی ءِ مُز ءَ بور انت مئے نماسگ اشی ءِ مُز ءَ بور انت کہ وتی سرزمین ءِ کلیں اختیار بلوچ کوم ءَ بہ بیت –

آئی ءَ دیمتر ءَ گوشتگ کہ من وتی ھمساھگیں کوماں چہ انڈیا، اوگانستان ،ایران ءَ گوں ھمے امیت ءَ کنیں کہ آ بلوچ جھدے پلامرزی ءَ کن انت پرچا کہ یک مھکمیں ، یک آزاتیں بلوچستان ءِ اے دمگ ءِ تہ ءَ امن ایمنی ءِ زامن انت – پرچاکہ پاکستان ءِ دھشتگری ءَ چی امریکہ ھم نہ بچ اتگ اوگانستان، انڈیا، برتانیہ پرانس ھم نہ بچ اتگ انت – ھرچی کہ دنیائے تہ ءَ ناشرکاری بوگ ءَ انت، ھرابکاری ءِ بوگ انت آھانی تہ ءَ پاکستان ءِ دست مان انت ھتاکہ سئودی ءُ یو اے ای ھم پش نہ کپتگ انت -اگان دنیا اے دمگ ءِ تہ ءَ مدامی امن ءُ ایمنی لوٹ ایت گڑا آھانی واستا المی انت کہ آزات بلوچستان ءِ پلامرزی ءَ بہ کن انت –

آئی ءَ گوشتگ کہ من ھمے بلوچ کوم ءِ نیمگ ءَ چہ اقوام متھدہ، یونائیٹڈ نیشن دزبندی کنیں کہ تئی چارٹر ءِ تہ ءَ انسانانی بنکی ھک، کومانی آزاتی مان انت بائد انت کہ گامگیج بہ زور پاکستان کہ انکس انسانی ھکانی لگتمالی ءَ کنگ ءَ انت لکانی کچ ءَ مردم گار ءُ شھید کرتگ انت – چِنکس کبرستان آباد کنگ بوتگ کہ دنیائے انٹرنیشنل میڈیا ھم منگ انت آھانی تہ ءَ دشت اسپلنجی، توتک ، رخشان ، وڈھ ءَ آباد کنگ بوتگ انت ھتاکہ مشکے ءِ تہ ءَ ھم ھست انت کہ دہ دہ مردم شھید کرتگ ءُ ھمود ءَ کڈ کرتگ انت – بازیں مھلوک ءِ چہ کسانی ءَ گار کنگ بوتگ انت کہ مرچی پیر انت مات ءُ پت ءِ پجار کرت نہ کناں –

آئی ءَ گوشتگ کہ ما دنیا ءَ لوٹ کن ایں کہ آ بلوچ قوم ءِ کومی ھیسیت ءَ بہ من انت ءُ اقوام متھدہ لوٹ کنیں کہ آ بلوچستان ءَ یک کمپلکٹ زون ءِ ڈکلئیر بہ کنت اقوام متھدہ ءُ نیٹو ءَ لوٹ کن ایں کہ بلوچستان ءَ یک نو پلائی زون ءِ ڈکلئیر بہ کناں امیت انت کہ بلوچ راج ھمے پیم ءَ گوں تیزی ءَ جھد کنگ ءَ انت اے جھد الم وتی منزل ءَ سربیت –

آئی ءَ وتی تامری کلوہ ءِ گڈسر ءَ گوں بلوچ راج ءَ دزبندی کتگ ءُ گوشتگ کہ بوان انت اَلم بُوان اَنت بِلے نِزوریں تالیمے ،بِلے اِے تالیمی نساب مئے ھک ءَ نہ اِنت بلے بُوَان اِت ھمے نِزوریں تعلیم ءَ گوں منی ورنایاں گوں دْز بندی انت کہ وتی برات آں بُوانین ات ءُ پیر ءُ کماشاں گوں دزبندی انت وتی زھگ ءُ نماسگاں بُوانین ات جِنک ءُ بچکاں دوئیناں بُوانین انت تاکہ ھماں ھمے نساب ءِ تَہ ءَ کپان ءُ چِست بُوان کہ ما وتی آزادی ءِ بھر ءَ کم ءُ گِیش پوہ بِہ باں – امیت انت کہ اے جنز دیم ءَ روت انت اے جنگ دیم ءَ روت –

آئی ءَ گوں ورنایاں لوٹ کتگ کہ کالج یونیورسٹیانی ورنا یکجاہ بہ بنت وت ءَ بہ زان انت وتی کوم ءَ بہ زان انت، وتی وتن ءَ بہ زان انت وتی وتن ءِ جیڑھاں بہ زان انت

اوگانستان ءَ ھواریں بلوچستان ءِ دمگ چاغی ءَ پاکستانی پوجے بیڑءِ تہءَ گاڑی ءِ کلینر بیران ءُ وھدے کہ ڈرائیور سک ٹپی بیتگ-

دمگی اھوالکارانی رِد ءَ اوگان سیمسر ءَ ھوار چاغی ءِ دمگ ءَ فرنٹئیر کور ءِ نیمگ ءَ چہ رندگیری ءِ سوب ءَ کود ءَ پُریں زامیاد گاڑی تُرند روگ ءِ سوب ءَ چپی بوتگ- وئیل ءَ کلینر عزت اللہ بیران ءُ وھدے کہ ڈرائیور ستار خان سک ٹپی بوتگ-

بیران ءُ ٹپی بیتگیں دوئیں مردم اوگان جھمنند اَنت کہ چہ بلوچستان ءَ کود زیرگ ءُ اوگانستان ءَ برگ ءَ بوتگ اَنت-

گوستگیں روچاں چاغی ءَ ڈیورنڈ لائن سر ءَ پاکستانی پوج ءِ لُٹ ءُ کُٹاں چہ بازیں پوریاگری سک ٹپی بوتگ اَنت-

ھندی مردمانی گْوشگ اِنت کہ ریکوڈک ءِ پچ بوگ ءَ چہ سمیسرانی بند بوگ ءَ دمگی مردماں تُرندیں دلسیاھیانی دیمپانی کپگ ءَ اِنت-

زانگ بہ بیت ڈیورنڈ لائن ءُ گولڈ سمڈ لائن ءَ ھواریں دمگ مردمانی گر ءُ دار سیمسر ءَ گوں ھمگرنچ باپاری ءَ بندوک اِنت-

اے دمگاں اشی ءَ ساری ھم اے وڑیں وئیل دیم ءَ اَتکگ اَنت کہ اود ءَ تیل ءُ دگہ باپاری ءَ ھمگرنچیں مردم پوج ءَ نشانگ کتگ اَنت-

ھمے سال ءَ اے وڑیں دو وئیل دیما اتکگ اَنت کہ تیل ءِ باپاری ءَ ھمگرنچیں ڈرائیور تیرگواری کنگ ءُ کُشگ ءُ پد اے وئیل ءِ پُشدرءَ زھرشانی کنوکانی سر ءَ تیرگواری ءِ وئیل سر ءَ سرجمیں بلوچستان ءَ زھرشانی کنگ بوتگ- اشی ءَ ابید گوستگیں روچاں ھم پاکستانی لشکریانی تیرگواری ءِ سوب ءَ یک زالبولے ٹپی بوتگ-

بلوچستان نیشنل پارٹی ءَ رسانکدر ءَ شنگ کُتگیں درشانی ءِ تہءَ گُشتگ کہ بلوچستان سرکار ءِ نیمگ ھائی کورٹ ءِ کد ءَ زیارت وئیل ءِ سرءَ اڈداتگیں پَٹ ءُ پوکی کمیشن ءَ رد کنیں، انیگیں اڈ بیتگیں جوڈیشل کمیشن ھچ پئیماں راست نہ اِنت۔

بی این پی ءِ نیمگ ءَ شنگ کُتگیں درشانے تہءَ گُشگ بیتگ کہ چریشی ءَ پیسر ھم تو تک ءُ دالبندین ءِ وئیلانی پُشدرءَ ھائی کورٹ ءِ تک ءَ جوڈیشنل کمیشن اڈ دیگ بیتگ اَنت کہ آھانی رپورٹ داں روچ مروچی نہ اَتکگ اَنت اگں تو تک ءُ دالبندین وئیلانی سرءَ اڈ بیتگیں رپورٹ دیما آرگ بہ بیت اِنت گُڑءَ اے گپ باوری بیتگ اَت پیسرگیں کمیشنانی پئیم ءَ اے کمیشن ھم رپورٹ ءَ اڈ کنت ءُ راستی آں دیما کاریت۔

درشانے تہءَ گُشگ بیتگ کہ ھمینچو کمیشن کہ اڈ دیگ بیتگ اَنت آ درست حمود الرحمن کمیشن ءِ پئیم ءَ سرد ھانایانی تہءَ گار بیتگ اَنت بلوچستان نیشنل پارٹی اَے کمیشن ءَ نہ من اِت۔

آئی ءَ گُشتگ کہ اولی روچ ءَ چہ ما زیارت وئیل ءِ سرءَ تچکیں لیکہ داشتگ کہ اے مردم کُشیں گام زیروکیں مردم قانود ءِ دیما آرگ بہ بنت ءُ سزا دیگ بہ بنت دانکہ بیگواھیں مردمانی کھولاں انساپ بہ رس اِیت۔

درشانے تہءَ گُشگ بیتگ کہ مستریں آمید گِس سپریم کورٹ ءِ کچ ءَ ریٹائرڈ ججاں چہ اے وئیل ءِ پَٹ ءُ پول کنائینگ بہ بیت دانکہ انساپ کنگ بہ بیت ءُ زیارت وئیل ءَ ھما بیگواھیں مردم کہ کُشگ بیتگ اَنت آھانی جرمکاراں سزءَ بہ رس اِیت ءُ اِشی جاھاں پرگینگی تک ءَ اڈ بیتگیں کمیشن ھچ پئیما نہ من ایں ءُ اِشی ءَ رد کنیں۔

بلوچستان ءِ تیابدپی شھر گوادر آپ ءِ نیستی ءِ دیمپان، مھلوک یک رندے پد ءَ دگانی سر ءَ زھرشانی ءَ گندگ بیگ ءَ اَنت-

پشمبے ءِ روچ ءَ شھریانی زھرشانی ءَ حق دو تحریک ءِ رھشون مولانا ھدایت الرھمان، حسین واڈیلہ ءُ ماجد حیدر ءَ تران کتگ ءُ گوشتگ کہ ما گوش ایں آپ بہ دے ات، آ یورپ ءُ لندن ءِ شور ءَ اَنت ءُ گوش اَنت گوادر ءَ آپ کمی نیست اِنت آ افسیراں کہ ایم پی ءَ مھر اِنت آیانی تہ ءَ یکے شکیل ایکسین اِنت –

آیاں گوشتگ درستیں پاٹی اشانی درکنگ ءِ لوٹ ءَ کن اَنت اگاں اے گوادر ءَ بوت اَنت گڑا پد ءَ نندانک دے ایں-

آیاں گوشتگ کہ اشانی تہ ءَ کھدہ بابر لندن ءَ ترگ ءَ اِنت، عمان دوبئی لندن یا امریکہ یا کینڈا ءِ وشنود اَنت گوادر ءِ مھلوک تن ءَ بہ مر ایت آیان ھچ پرواہ نیست اِنت-

تران کنوکاں تران کنان ءَ گوشتگ کہ سرجمیں گوادر وانندگ بے روزگار اَنت ڈن ءَ یک کوریں مردمے ءَ ادے زمہ واری دیگ بیتگ اَنت-

آیاں گشتگ کہ روزگار، آپ، بجلی، ھما کہ بنکی زلوریات اَنت گوادر چہ آیان زبھر اِنت اگاں اے آپ دات نہ کن اَنت گڑا شرمے گپے مروچی مئے زھرشانی آیاں وتی کارگس بند کتگ ءُ تتکگ اَنت مارا اے کبل نہ دار اَنت ما نی شمئے کارگس جی ڈی اے ءُ پد ءَ ڈی سی ءِ کارگس ءِ دیم ءَ نندانک جن ایں –

آیاں گوشتگ سرکار ءِ بگیردارگ ءِ سر ءَ مارا ھروھد ءَ بھتام جنگ بیت اِنت ما ھک ءِ گپ ءَ جن ایں ھما کہ آپ نہ دنت، بجلی نہ دنت ایف آئی آر ھمایانی بیگ لوٹ ایت مھلوک زھرشانی کنت پرچا ایف آئی آر بنت؟ پرچاکہ آپ لوٹ اَنت پرچاکہ بجلی لوٹ اَنت پرچا وتی بنکی لوٹانی لوٹ ءَ کن ایں –

ڈیھہ ءِ درستاں مستریں ءُ تاگت وریں ادارگ ءِ سروک بئیت ءُ مئے گپاں گوش بہ داریت ءُ باوری بہ دنت کہ مئے زورانسری بیگواھیں دوستیں مردم دروگیں میڑانی تہءَ کُشگ نہ بنت، گُڑءَ ما وتی زھرشانی ءَ ھلاس کنیں۔ ما اے ردءَ داں باندات ءِ وھد دئیں، ھمے نیام ءَ ما گیشتر زھرشانی روانک کشان بئیں ءُ چہ باندءَ آ دیم ما شال — کراچی مزن دگ ءَ بند کنیں۔

اے ھیالانی درشان زیارت وئیل ءَ پد مزن شھر شال ءَ گورنر ھاوس ءِ دیما زھرشانی نندانک ءَ نشتگیں زھرشانی کنوکاں مروچی پریس کانفرنس کنان ءَ گُشتگ۔

وائس فار بلوچ مسنگ پرسنز ءِ رھشون سمی دین بلوچ ءَ پریس کانفرنس ءَ تران کنان ءَ گُشتگ کہ ما گوستگیں یک ھپتگے ءَ چہ اِدءَ ریڈ زون ءَ وائس فار بلوچ مسسنگ پرسنز، بلوچ یکجہتی کمیٹی، نیشنل ڈیموکریٹک پارٹی، بلوچ وومن فورم ،بی ایس او، بی ایس او پجار ءِ باسکانی ھمراھی ءَ پر ایمنیں زھرشانی نندانک ءَ نشتگ اِنت، چہ اولی روچ ءَ مئے سئے لوٹ بیتگ اَنت کہ زیارت وئیل سرءَ جوڈیشل کمیشن ٹھینگ بہ بیت۔ مئے درستیں بیگواھیں مردمانی کھولاں باوری دیگ بہ بیت مئے دوستیگیں مردم دروگیں میڑانی تہءَ کُشگ نہ بنت۔ درستیں بیگواھیں مردم دیما آرگ بہ بنت۔

آھاں گُشتگ کہ ما وتی دوستیں مردمانی یل کنائنگ ءَ پہ داں انگت درستیں زھرشانیانی راہ کارمرز کُتگ اَنت، شال داں اسلام آباد ءَ دراجیں ءُ راجدپتری روانک، اسلام آباد ءَ نندانک ءُ آودہ گوں مزن وزیر پاکستان ءَ گوں نیاد کُتگ بلے داں انگت ھچ پئیمیں جوانیں دیمروی گندگ نہ بیتگ، نی مئے بیگواھیں دوستیگیں مردم سلامتی ءَ دیما آیگ ءِ جاہ ءَ، دروگیں میڑانی تہءَ کُشگ بئیگ ءَ اَنت۔

آھاں گُشتگ کہ مئے سئیں لوٹ ھق ءُ رھبندی اَنت، اے ڈیھہ ءِ یک پر ایمنیں شھری ءِ ردءَ ما چہ ریاست وتی ءُ وتی دوستیگیں مردمانی زندانی پھازگ ءُ ایمنی لوٹگ ءَ اِنت ءُ پہ اِشی ءَ مارءَ زھرشانی ءِ ھم سرجمیں ھق است اَنت، یک لوٹے کہ آئی تہءَ جوڈیشل کمیشن اڈ کنگ ءِ لوٹ کنگ بیتگ اَت، آئی سرءَ تھنا ھمینچو دیمروی بیتگ کہ زیک بلوچستان سرکار ءِ نیمگ ءَ رجسٹرار کارگس ھائی کورٹ ءَ جوڈیشل انکوائری کمیشن اڈ دیگ ءِ ھاترءَ نمدی نبشتہ کنگ بیتگ۔

آئی ءَ دیمتر ءَ گُشتگ کہ ما بیگواھیں مردمانی کھول کہ اشانی تہءَ پیریں ءُ نادراھیں مات ھوار اَنت، شیر مِچیں زھگ گون اَنت کہ گوستگیں یک ھپتگے ءَ چہ سارتیں شپاں ءُ گرمیں روچاں اے دگ ءِ سرءَ نشتگ اَنت بلے داں انگت کجام ھم پرگینگی وزیر اگں وزیرانی سیکریٹری ءِ مئے گورءَ اتکگ ءُ پنچ دمان ءَ نشتگ بہ بیت ءُ مئے گپ گوش بہ داشت اِنت یا مئے گوما یکجاھی ءِ درشان بہ کُتیں ءُ مئے رھبندی لوٹ بہ من اِت اِنت، ما سرپد بئیں کہ اے سرکار مئے جیڑہ ءَ سنجیدگی ءَ گوں زیرگ ءَ نہ اّنت ءُ نانکہ مئے درد ءُ اندوھانی اشاں مارگ است، مئے دو دگہ پرارزشتیڻ لوٹ اَنت کہ آیانی سرءَ ھچ پئیمیں دیمروی نہ بیتگ، اگں ھمے پئیم ءَ مارءَ گیشتر ڈالچار کنگ بہ بیت گڑءَ ما لاچار بئیں وتی زھرشانی ءِ تہءَ گیشی کاریں ءُ اِشی ءَ دیما بریں، بلوچستان ءَ ھزاراں مردم بیگواہ اَنت کہ آھانی کھول لاچاریانی سوب ءَ شال ءَ اتک نہ کن اَنت بلے آ وتی وتی شھراں در اتک ءُ اے زھرشانیانی بھر بیت کن اَنت۔

آئی گُشگ اَت کہ نی مئے ھمے لوٹ اِنت کہ ڈیھہ ءِ درستاں مستریں ءُ تاگت وریں ادارگ ءِ سروک مئے گپانی گُوشدارگ ءَ بئیت، مئے ھقی ایں رھبنداں بہ من اِیت ءُ مارا باوری بہ دنت کہ مئے زورانسری بیگواھیں مردم دروگیں میڑانی تہءَ کُشگ نہ بنت، گُڑءَ ما وتی زھرشانی ءَ ھلاس کنیں۔

زھرشانی کنوکاں گُشتگ کہ ماں اے ردءَ داں باندات ءِ وھد دئیں، ھمے نیام ءَ گیشتر زھرشانی روانک کُشیں ءُ چہ باندات ءَ رند ما شال – کراچی مزن دگءَ بند کنیں، اَے کجام ھم شھری ءَ چونیں ھم تاوانے بہ بیت اِشی زمہ وار ریاست بیت اِنت۔

آئی ءَ گُشتگ کہ اِدءَ موسم ءِ ترندی ءِ سوب ءَ مئے پیریں مات ءُ کسانسالیں زھگ نادراہ بیان اَنت، درستیں کھول سالاں چہ زورانسری بیگواھیانی آماچیں وتی دوستیگیں مردمانی زندءِ ھاترءَ سک جنجالی اِنت۔

بلوچستان ءِ دگہ جاھانی رنگ ءَ اوگانستان ءِ سیمسری دمگ چاگی ءَ ھورانی گوارگ ءَ بازیں جاہ آپ ءَ بڈینتگ اَنت –

گوستگیں روچ ءَ دالبندین ءُ دگہ کش ءُ گوری دمگاں گورتگیں ھورانی آپ ھار ءِ دروشم ءَ لوگاں مانریچگ ءَ بندات بیتگ – سر بیتگیں ھالانی رد ءَ دالبندین ءِ دمگ کچی آباد کلی مھمد رھیم آپ ءَ بڈینتگ ءُ لوگاں آپ سر بوتگ ءُ مھلوک بے لوگ اَنت-

دمگی مردمانی گوشگ اِنت توپانی ھار ءِ سبب ءَ بازیں لوگاں تاوان رس اتگ ءُ مھلوک وتی کمک ءَ وت چہ لوگاں آپاں شُلوپنگ ءَ اَنت مھلوک ءِ گوشگ اِنت پھریزی بند ءِ نہ بوگ ءَ لُھڑیں ھار ءَ میتگ مل اتگ-

ھمے وڑ چاگی ءِ بازر ءُ برآبچاہ ءَ ھار سر بوتگ ءُ ھار ءِ سبب ءَ دکاناں تاوانباری بیتگ-

ھمے وڑ ءَ ماشکیل ءَ بھگ ءِ ھند ھامون ماشکیل ءَ ھم توپانی ھار ءَ چہ ماشکیل ءِ دگہ جاھاں راہ ءُ در بند بیتگ اَنت ءُ چریشی ءِ سبب ءَ مھلوک شد ءِ دیمپان اِنت-

تنی وھدی دگہ جانی تاوانانی ھال سر نہ بوتگ اَنت ءُ سرکاری تکاں تنی وھدی ھم کمکی کار بندات نہ بیتگ اَنت-

شال ھشممی روچ ءَ زھرشانی نندانک ءَ نشتگیں کھولانی نیمگ ءَ سرکاری نا دلگوشی ءُ زھرشانی ءِ درگت ءَ کھول مروچی پریس کانفرنس کن اَنت۔ 

اے ھیالانی درشانی وائس فار بلوچ مسنگ پرسنز ءِ رھشون سمی دین بلوچ ءَ چاگردی رسانکدر ءِ تندجاہ  ٹوئٹر ءِ سرءَ کُتگ۔ آئی گُشگ اَت گوستگیں ھشت روچاں چہ زھرشانی ءَ نشتگیں بیگواھیں مردمانی کھولاں سرکار ءِ نیمگ ءَ باوری ءِ لوٹ ءَ سرکار ءِ نیمگءَ ڈالچار کنگ ءُ سرکاری گیر سنجیدگی ءِ بگیری ءَ مروچی روچ دوازدہ ءَ پریس کانفرنس کنگ بیت ءُ آیوکیں گامگیجانی جار جنگ بیت۔

سمی دین ءَ اھوالکار ءُ دگہ مردماں چہ زھرشانی ءَ بھر زیرگ ءِ دزبندی کُتگ ءُ گُشتگ زھرشانی نندانک ءَ ھوار بئیت ءُ مئے توار جوڑ بہ بئیت۔

دومی نیمگ ءَ زھرشانی نندانک ءَ نشتگیں گلاں وتی ھواریں جار شنگ کُتگ۔ کہ اِشی تہءَ گُشگ بیتگ کہ پرگینگی سرکار ءِ نیمگ ءَ بلوچستان مزن آمید گِس ءِ رجسٹرار ءَ زیارت وئیل ءِ درگت ءَ جوڈیشل انکوائری کمیٹی ءِ ھاترءَ نمدی نبشتہ کنگ جوانیں ءُ جمہوری گامگیج اِنت کہ اِشی ءَشریں وڑے ءَ چاریں۔ آھاں گُشتگ کہ بلوچستان ہائی کورٹ ءِ  چیف جسٹس ءَ گوں دزبندی اِنت کہ آ جوڈیشل انکوائری کمیٹی ءَ زیت جوڑ بہ کنت ءُ انساپ ءِ لوٹ ءَ پیلو بہ کنت۔ ھواریں دروشم ءَ اے پیسلہ ھم کنگ بیتگ کہ بیگواھیں مردمانی کھولاں باوری دیگ ءُ دلجم کنگ ءَ داں اَےزھرشانی نندانک برجاہ بیت۔ 

زانگ بہ بیت زیارت وئیل درگت ءَ جوڈیشل کمیشن ءِ اڈ دیگ ءُ بیگواھیں مردمانی یل کنائنگ ءِ ھاترءَ گورنر ءُ سروزیر ھاوس ءِ دیما وائس فار بلوچ مسنگ پرسنز، بی ایس او، بی ایس او پجار، بلوچ یکجہتی کمیٹی، نشنل ڈیموکریٹک پارٹی ءُ بلوچ وومن فورم ءِ ھواریں نندانک مروچی ھشمتی روچ ءَ ھم برجاہ اِنت۔ 

شال ءِ نندانک ءَ نشتگیں بیگواھیں مردمانی کھولانی گوشگ انت کہ بلوچستان ءِ سرکار سنجیدگ نہ ایں –

بیگواھیں مردمانی کھولاں وتی دوستیگیں مردمانی یل نہ کنگے بگیری باند ءَ زھرشانی کنگ ءِ جار جتگ –

بیگواھیں مردمانی کھولاں گوشتگ کہ ایوان ءَ نشتگیں واکداراں چہ اے پُرایمنیں جھد ءَ ھچ پرک نہ بیت وتی دوستیگیں مردمانی یل کنائینگے ھاتر ءَ بیگواھیں مردمانی کھولاں وتی شوربندی مٹ کتگ ءُ زھرشانی ءَ نشتگ انت –

درنگاز کنوکاں سرجمیں بلوچستان ءَ زھرشانی کنگ ءِ جار جتگ –

زھرشانی ءَ نشتگیں بیگواھیں ڈاکٹر دین محمد ءِ زھگ سمی دین، بیگواھیں شبیر بلوچ ءِ گھار سیما بلوچ، ھزدار ءَ سیادی داروکیں سائرہ بلوچ، بیگواھیں راشد حسین ءِ مات، بیگواھیں سعید احمد ءِ مات، بلوچ باسک بیبو بلوچ ءَ ھوار دگہ بیگواھیں مردمانی کھولاں رسانکدراں وتی شنگ کرتگیں درشان ءَ دزبندی کتگ گوشتگ کہ شال ءِ نشتگیں بیگواھیں مردمانی کھول ءُ انسانی ھکانی باسک باند ءَ نندانک ءَ ھوار بہ بنت ءُ زھرشانی ءَ بھر بہ زور انت-

بیگواھیں مردمانی کھولاں گوشتگ کہ مروچی مارا ھپت روچ انت کہ ترندیں ھورانی سوب ءَ ابید ھم گورنر گارگس ءِ دپ ءَ نندانک جتگ ءُ نشتگ انت ھپتگ ءِ بیت کہ مئے گوشدارگ ءَ کس نہ اتکگ مئے سَے لوٹ انت مئے سَئیں لوٹ منگ بوگ ءَ نہ انت –

تامری کلوہ ءِ تہ ءَ سمی دین ءَ گوشتگ کہ سرکار ءِ دیم ءَ سَے لوٹ ایرکرتگ انت کہ دیمتر ءَ زیارت وڈیں وئیلانی گر ءُدار، بیگواھیں مردمانی یل کنگ ءُ زیارت وئیل ءَ جوڈیشنل کمیٹی لوٹ ھوار انت بلے پدا ھم سرکار ءُ ریاست ءَ سینزدہ سال انت کہ گیر سنجدگیں رویش وتیگی کتگ –

سمی دین ءَ گوشتگ کہ ریاست ءِ ھمے کارانی بگیری ءَ ما ھمک روچ زھرشانی کنگ ءَ لاچار انت بلے نوں ترندتریں زھرشانی ءِ درچ ءِ بندات کنگ بیت اِنت –

تامری کلوہ ءَ گپ جنان ءَ بیگواھیں نودربر رھشون شبیر بلوچ ءِ گھات سیما بلوچ ءِ گوشگ ات کہ اگاں زھرشانی میان ءَ مارا چیزے بہ بیت گڈا اشی ءِ زمہ دار پارلمنٹ ءَ نشتگیں وتگڑیں وزیر ءُ وتگڑیں راجدوستیں پاٹیانی سر ءَ انت –

بیگواھیں مردمانی کھولاں وتی تامری کلوہ ءِ تہ ءَ چہ بلوچ راج ءَ دزبندی کتگ ءُ گوشتگ کہ آ باند ءَ زھرشانی ءِ زرمبشت ءِ بندات کنگ ءَ انت ءُ درسیں دمگاں زھرشانی کنگ بیت اِنت –

درنگاز کنوکاں دیمتر ءَ گوشتگ کہ تاں ھما وھد ءَ سرکار ءُ واکدار مئے لوٹاں گوں سنجیدگی ءَ گیشگیوار نہ کن انت بیگواھیں مردمانی کھولانی زھرشانی ءَ برجاہ داریں –

ھاران ءَ سی ٹی ڈی ءِ دست ءَ زورانسری آوار جنگ بوتگیں ورنایے بیگواھی ءِ بگیری ءَ آئی ءِ کھول ءَ زھرشانی کتگ –

ھاران ءَ آوار جنی ءَ پد بیگواہ کنگ بوتگیں اسلم مینگل ءِ کھول ءَ ورنایے یل نہ کنگ ءِ بگیری ءَ مروچی ھاران پریس کلب ءِ دیم ءَ وتی زھرشانی نبشتہ کنائینتگ، کھول ءَ لوٹ کتگ کہ اسلم یل کنگ بہ بیت –

اھوالکارانی رِد ءَ اسلم مینگل ء ابراہیم مینگل ھمے سال ءِ ھژدہ جولائی ءِ شپ ءَ سی ٹی ڈی ءَ چہ ھاران ءِ دمگ کلان ءَ آوار جتگ ءُ بیگواہ کتگ، ورنایے یل کنائینگے ھاتر ءَ مروچی ھاران پریس کلب ءِ دیم ءَ زھرشانی روانک ءِ کشگ بوتگ – روانک ءَ بیگواھیں ورنایے کھول، سول سوسائٹی ءُ نودربراں مزنیں کچ ءَ بھر زرتگ –

درنگاز کنوکاں لوٹ کتگ کہ اسلم مینگل ءَ ھوار ایندگہ بیگواھیں مردم یل کنگ بہ بنت ءُ سی ٹی ڈی ءِ اے وڑیں درکانودی کار گرءُدار کنگ بہ بنت –

درنگاز کنوکانی گوشگ ات کہ ھاران ءِ سی ٹی ڈی ءَ گوستگیں روچاں ھاران ءُ چپ چاگردی دمگاں بازیں ورنایے آوار جتگ ءُ درکانودی گوں وت برتگ انت وھدیکہ آوار جنگ بوتگیں مردم دیم ءَ ھم آرگ بوگ ءَ نہ انت – چہ ھاران ءَ بازیں مردمے تنی وھدی سی ٹی ڈی ءِ بندیگ جاھاں بند انت –

درنگاز کنوکانی گوشگ ات کہ اگاں سی ٹی ڈی ءَ ھاران ءِ تہ ءَ وتی اے کار بند نہ کُتاں ءُ بیگواھیں مردم یل کنگ نہ بوتاں گڈا دمگی ءُ بیگواھیں مردمانی کھول لاچار بنت کہ ترندیں زھرشانی بہ کن انت –

بیگواھیں اسلم مینگل ءِ کھول ءَ واکداریں ادارگ ءُ انسانی ھکانی گلاں گوں دزبندی کتگ کہ اسلم یل کنائینگ ءَ آھانی ھمراہ داری ءَ بہ کن انت –

وائس فار بلوچ مسنگ پرسنز ءِ زھرشانی بنجل ءَ چار ھزار ءُ ھپسد ءُ دوازدہ روچ سرجم بوتگ انت، ھمک تک ءُ پھناتاں سیادی داروکیں مردماں بنجل ءَ اتکگ ءُ یکجاھی درشان اتگ –

وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچ راج پاد اتکگ بلوچستان ءِ چُک چُک ءَ وتی ایردستی مارشت بوتگ، ھر یکے ءَ واب ءَ بُست کُتگ، ھر یکے بیگواھیں مردمانی ھاتر ءَ توار چست کنگ ءَ انت ءُ اے جھد ءَ ھون رچگ ءَ انت ءُ ھون ریچیت ءُ اے ھون ھشک ءَ نہ رچ انت، چہ اے شھیدانی ھوناں جھد مھکم بوگ ءَ انت –

ماما قدیر بلوچ ءَ دیمتر ءَ گوشتگ کہ بلوچ ورنایانی تہ ءَ ڈاکٹر، انجینئیر ءُ زند ءِ ھر تکاں سیادی داروکیں ورنا اے جھد ءَ ھوار انت مروچی مئے دژمن ءَ اے بلوچ ورنا دیستگ انت ترس آماچ بوتگ آھانی پگر ءُ نزریہ ءَ ریاست پریشان کُتگ ھمے واست ءَ ریاستی لشکر ءَ بلوچستان ءِ تہ ءَ وتی لشکر کشی گیش کرتگ انت – نوں اے جست ءَ ھر یک مردمے ءِ ماژگ ءَ جاہ کُتگ کہ لھتے مردم کہ ریاست ءِ کمک ءَ کنگ ءَ انت بلوچ راج ءَ رد دیگ ءَ انت نوں آھانی گِرءُدار المی انت –