بلوچ وومن فورم کیچ ھنکین ءِ ھنکینی دیوان بُنجاھی آرگنائزر ڈاکٹر شلی بلوچ ءِ سروکی ءَ برجم دارگ بیتگ، دیوان ءِ گچینی مھمان سینٹرل کمیٹی ءِ باسک شہناز بلوچ بیتگ۔ دیوان ءِ بُن گپ بنجاھی سرکولر ، گل کاری، نگد کاری ، ہندی ءُ میان اُستمانی سیاسی جاور ھال ءُ آؤکیں گامگیج بیتگ اَنت۔
دیوان ءِ بندات چہ پجاری نشست ءَ بوت ءُ پد ءَ بنجاھی سنگت ءَ بنجاھی سرکولر ونت ءُ بازیں باوست ءَ پد گل کاری ءِ سر ءَ سنگتاں تران کنان ءَ گُشت کہ ما یک زالبول گلے ءَ گوں بندوک اَنت ءُ نیشنلزم ءِ بُنیاد ءَ لس بلوچ زالبولءَ بی ڈبلیو ایف ءِ پتر ءَ یکجاہ کنگ ءُ آیانی سیاسی ھیلکاری کنگ مئے اولی زمہ واری اِنت، بلوچستان ءِ کنڈ کنڈ ءَ بلوچ زالبولاں استانی زلم ءُ زوراکی ءُ چاگردی سیلکاری ءِ ھلاپ ءَ تربیت دیگ ءُ ھمک ترندیں جاورانی واستا ساڑی کنگ انت۔
آئی ءَ گوشتگ مئے جد ءُ جھد فیمنزم ءِ سٹریکچر ءِ تہ ءَ نہ اِنت بلکیں چہ پیور بلوچ نیشنلزم ءِ بنیاد ءَ بوگ ءَ اِنت بلوچ کہ مرچی ھست اَنت آ زالبول بنت یا کہ مردین بنت یکیں ھساب ءَ بلوچ جد ءُ جھد ءِ تہ ءَ کربانی دیگ ءَ اَنت ءُ اے جھد ءِ بھر اَنت، وھدیکہ تھریکانی سر ءَ کریک ڈاؤن کئیت کہ اودا پہ مردیناں سرپیس ءَ کار کنگ باز گران بیت گڑا زالبول لیڈنگ پوزیشن ءَ کئیت ءُ چیزاں لیڈ کنت،ھمے رنگ ءَ اگاں ما بچاریں ہندوستان ءِ سر ءَ وھدیکہ برطانیہ قبضہ کنت گڑا اودا پہ مردینانی واستا کار کنگ گران بیت گڑا آ انڈر گراؤنڈ بنت ءُ زالبول دیما کاینت لیڈ کن اَنت، گڑا برطانیہ ءِ ہوم سیکٹری گُشیت من ءَ ھچ چیز ءَ اینچو پریشان نہ کُتگ بلئے زالبولانی اے کچ ءَ درآھگ ءُ شعوری بنیات ءَ جہد ءِ بھر جوڑ بوگ ءَ منا سک نہ گیگ کُتگ، زاہر اِنت زالبولانی اے کچ ءَ ڈن ءَ درآھگ یک سپونٹینئیس چیزے نئے بلکہ ھما زلم ءِ تسلسل اِنت ءُ آیانی سر ءَ کار کنگ بیتگ ءُ آیاں ہر وڑیں جاور ءِ واستہ تیار کنگ بیتگ ، گڑا ھمے رنگ ءَ وھدیکہ ما مرچی بلوچستان ءِ گراؤنڈ ءَ بہ چاریں اعلانیہ یا گیر اھلانیہ مردینانی سْیاست ءِ سر ءَ پابندی جنگ بیتگ ءُ بلوچ زانتکارانی مزنیں لڑ ءِ ریاستی زندانی تہ ءَ بندیگ اِنت گڑا بلوچ زالبول لیڈنگ پوزیشن ءَ کاینت ، بلئے یک چیزے زانگی اِنت کہ زوراک ءِ واستا جنس مانا نہ داریت ءُ جنس ءِ بنیاد ءَ ٹارگٹ نہ کنت آ بلوچ کنت ءُ ٹارگٹ کنت گڈا بلوچ زالبول ھم زندانی کنگ بیتگ اَنت ءُ بوئگ اَنت ،مھرنگ بلوچ ، بیبو بلوچ ءُ گلزادی بلوچ کہ مروچی زندانی اَنت ءُ وڑ وڑیں آزار سگگ ءَ اَنت، چیز ہر وھد ءَ یک ھساب نہ بنت ھمے ترندیں جاورانی واستہ مارا لس بلوچ ءَ ھوار بلوچ زالبول ساڑی کنگی اِنت دانکہ آ راجی جہد ءَ وتی کرد ءَ پیلو کُت بہ کنت ، بانڈی ، ھاتون بی بی ءُ کریمہ ءِ کسّہ ءَ نوک بہ کنت۔
آئی ءَ گوشت کیچ چئیرمین گلام محمد ، کمبر ءُ کریمہ ءِ ھنکین اِنت اے ھنکین ءَ ہر دور ءُ باریگ ءَ راجی سر داتگ ءُ مُدام زوراک ءِ گوما جنگ کنان بیتگ اَنت ءُ پہ وتی تنگوئیں سرانی دیگ ءَ ھچبر چک ءُ پد نہ بیتگ اَنت بلکہ گھگیری ءِ چیدگ جوڑ بیتگ اَنت ءُ راجدپترءِ تاکانی تہا نمیران اَنت۔بی ڈبلیو ایف ءِ زمہ واری اِنت کہ آ لس بلوچ زالبولانی تربیت ءَ بہ کنت دانکہ آ پہ وتی راجی سْیتانی پھازگ ءِ واستہ ھچ بر چک ءُ پد مہ بنت ءُ پگری ھوالہ کاراں دیما بران بہ کناں ءُ ریاستی ھچ وڑیں پندالانی آماچ مہ بنت۔
آئی ءَ آؤکیں گام گیج ءِ تہ ءَ بلوچ وومن فورم کیچ ھنکین ءِ آرگنائزنگ باڈی جوڑ کنگ بیتگ ھنکینی آرگنائزنگ صابرہ بکوچ، ھنکینی ڈپٹی آرگنائزر حوا بلوچ ، ھنکینی آرگنائزنگ کمیٹی باسک، ماہ گنج بلوچ ، گلشن بلوچ ءُ بسما بلوچ گچین کنگ بیتگ اَنت۔