چھبار: ایرانی چیریں ادارھانی دست ءَ پنج جنک بیگواہ

روکپتی بلوچستان ءِ تیابدپی شھر چھبار ءَ ایرانی چیریں ادارھانی کارمنداں پنچ جنک دزگیر کنگ ءَ پد بیگواہ کرتگ اَنت-

گرگ بیتگیں جنک پانزدہ سال ءُ ھبدہ سالی گوشگ بیگ ءَ اَنت ھر پنچیں یکیں ٹک ءِ مردم اَنت-

گرگ بیتگیں جنک (س رئیسی)( آ رئیسی) (م عمر زئی) جھمنند کیشکور سرباز ءُ ( ف بلوچ ءُ ع بلوچ) جھمنند نیکشھر ءِ ناماں زانگ بیتگ اَنت –

ھالانی تہ ءَ گوشگ بیتگ کہ اے ھر پنچیں جنک ساز ءُ سامان ءِ زورگ ءَ بلوک بازار چھبار ءَ اتکگ بیتگ اَنگ ءُ پد ءَ چمود ءَ چہ چیریں ادارھاں دزگیر کرتگ ءُ برتگ اَنت-

اے جنک گوستگیں چار شمبے ءَ گرگ بیتگ اَنت بلے چیریں ادارھانی کارمنداں کھول کڈن کتگ اَنت شما اے ھال ءَ مہ کش ات ءُ شمبے ءِ روچ ءَ شمئے مردم یل کنگ بنت-

ھالانی تہ ءَ گوشگ بیتگ کہ شمبے ءِ گوزگ ءَ پد آ یل نہ بیتگ اَنت ءُ پد آیانی کھول ھال دیگ بیتگ کہ شمئے جنک چھبار ءَ دیم پہ زاھدان ءَ برگ بیتگ اَنت-

کھول ءَ را چیریں ادارھاں گوشتگ کہ شمئے مردم چارشمبے ءِ روچ ءَ چھبار ءَ بیوکیں زھرشانی ءِ وھد ءَ دزگیر کرتگ اَنت-

بلے ھالانی تہ ءَ گوشگ بیتگ زھرشانی سَے شمبے ءَ بیتگ ءُ اے مردم چار شمبے ءَ چھبار ءَ شتگ بیتگ اَنت-

گڈی ھالانی رد ءَ داں انگت آیانی باروہ ءَ دگہ گیشیں سرپدی نہ رستگ اَنت-