بلوچ یکجھتی کمیٹی کراچی ھنکین آرگنائزنگ باڈی ءِ نیاد برجم دارگ بیتگ

نیاد ءَ آمنہ بلوچ آرگنائزر ءُ لالہ وھاب بلوچ ڈپٹی آرگنائزر دارگ بیتگ اَنت –

دی بلوچستان پوسٹ

بلوچ یکجھتی کمیٹی کراچی ھنکین ءِ آرگنائزنگ نیاد لیاری ءَ برجم دارگ بیتگ،نیاد ءَ گوست ھال، سوج، آرگنائزنگ ءِ بنگیج ءَ آؤکیں کارانی سر ءَ گپ ءُ تران بیتگ –

نیاد ءَ بلوچ یکجھتی کمیٹی کراچی ھنکین ءِ کلانیں باسک آمنہ بلوچ ءَ نیاد ءَ بھر زیروکیں مردمانی دیم ءَ کمیٹی ءِ کار ءُ رپورٹ پیش کرتگ اَنت ءُ بھر زیروکاں کمیٹی ءِ کار چار اِتگ ءُ کارانی باوست کرتگ ءُ وتی نیزوریانی پدراھی کرتگ ءُ دیم ءَ کمیٹی ءِ گھتری ءِ سنچ دارگ ءَ وت ءَ ساجو کتگ –

شَور ءُ سِلاھانی بنگپانی سر ءَ بھر زیروکاں وتی شَور داتگ ءُ باوست بیتگ- نیاد ءَ پنچ رکنی آرگنائزنگ باڈی ءِ بنگیج کنگ ءِ سوڑگ بیتگ ءُ کہ چریشی ءَ آمنہ بلوچ ءِ سر ءَ اوست دارگ بیتگ ءُ آرگنائزر برجم دارگ بیتگ ھمے رنگ ءَ لالہ وھاب ڈپٹی آرگنائزر دارگ بیتگ –

آرگنائزنگ باڈی ءِ بنگیج ءَ پد بلوچ یکجھتی کمیٹی کراچی ءِ آرگنائزر آمنہ بلوچ ءَ نیاد ءَ مردمانی دیم ءَ تران کنان ءَ گوشتگ کہ درساں پیسر بلوچ یکجھتی کمیٹی ءِ ھمراھانی منت ءَ گراں کہ آیاں منی سر ءَ اوست داشتگ ءُ من ءَ یک مزنیں اگدوے ئِے سر ءَ نادینتگ-

آئی ءَ دیمتر ءَ گوشتگ کہ کراچی ءَ بلوچانی واستا بلوچ یکجھتی کمیٹی جوانتریں گل بیت اِنت کراچی، بلوچستان، پنجاب ءُ سندھ ءَ ھوار ھرکجا کہ بلوچ آباد اَنت آیانی ھکانی واستا جد ءُ جھد کنت –

آمنہ بلوچ ءَ گوشت کہ کراچی ءَ آبادین بلوچ بازیں وھداں انسانی ھکانی لگتمالیانی آماچ اَنت، یک نیمگے ءَ منشیات فروش سر ء بازار بازیں جاھاں نشہ بھا کنگ ءَ اَنت ءُ ورنایانی پدریچ ءَ علم ءُ ادب ءَ دو کنگ ءُ برگ ءَ اَنت ءُ دومی نیمگ ءَ لیاری، ملیر ءُ دگہ جاھاں گینگ وار دارگ بیتگ ءُ بلوچانی سیاسی توار ءَ بند کنگ ءِ پندل بیگ ءَ اَنت –

بیست ءُ یکمی کرن ءَ پیسر لیاری پہ زانت ءُ زور شوربندی ءَ منشیات ءُ گینگ وارانی دست ءَ دیگ بیتگ ءُ بیست سال ءَ پد لیاری منشیات ءُ جواہ ءِ بنجل جوڑ بیتگ –

آئی ءَ گوشت سرکار ءَ منی جست ایش اِنت کہ مھلوک ءِ زند ءُ پھریزگ ءِ زمہ واری تئی سر ءَ بیت اِنت ءُ گیرکانودی کارانی دارگ ءَ گامگیج ءِ لوٹ کنگ بیتگ-

نیاد ءَ اے گپ منّگ بیتگ کہ دوازدہ مارچ ءَ لیاری ءَ عوامی مھاز ءِ ڈیواھی مراگش ءِ پلامرزی ءُ جھٹ پٹ مارکیٹ ءِ شھیداں ستاشانی پیش کنگ ءُ سِی مارچ ءَ سالہ مھمد گوٹھ انسداد منشیات ءِ جار ءِ پلامرزی ءَ کنگ بیت ءُ مھلوک ءَ گوں دزبندی اِنت کہ مراگشاں بھر بہ زیرو ایت ءُ چاگردی کارانی واستا گھتری ءَ دست ءَ ھوار بہ گیجین اِت –