اکبر بگٹی: یک نامے ءَ تاں چیدگے ءَ
ٹی بی پی شونگال
مروچی ءَ چہ بیست سال پیسر، 26 اگست 2006 ءَ بلوچستان ءِ دمگ ڈیرہ بگٹی ءَ پاکستانی پوجی کاروائی ءِ وھد ءَ بلوچ کماشیں رھشون نواب اکبر خان بگٹی ءِ شھیدی ءَ بلوچستان ءِ رجدوستیں زرمبشت ءَ یک نوکیں سکینے داتگ- اے وئیل ایوک ءَ سیاسی رھشونے ءِ شھیدی نہ بیتگ بلکیں بلوچستان ءِ سیاست ءُ بلوچ راجی سرپدی ءِ یک ھنچیں راھے ءِ بستار بندات کتگ کہ ایشی ءِ سان مروچی دو دھکانی گوزگ ءَ ابید ھم سربرز انت – اکبر بگٹی ءِ نام وتی زندمان ءَ آئی ءِ سیاسی بستار سنچ بیتگ – آئی ءِ شھیدی ءَ پد یک چیدگے ءَ مٹ بیتگ – آئی ءِ شھیدی ءَ پجار، راجی ھک، سیاسی واک ءُ آجوئی ءِ جُست گیشتر جوڑینتگ –
26 اگست بلوچ گوستانک ءُ راجی زرمبشت ءِ سر ءَ یک ھنچیں رندپد یل داتگ انت آ ایوک ءَ وھد ءِ گوزگ ءَ ھلاس نہ بنت – اکبر بگٹی ءِ شھیدی ءَ بلوچ ورنایانی میان ءَ یل دیریگیں واب ءُ یک سماھے دوبر زندگ کتگ کہ چریشی ءَ نسلاں بلوچ چاگرد ءُ وتی لپیٹ ءَ مانپوش کتگ ءَ پیوست کتگ- یک ھنچیں وابے بیتگ چریشی ءَ سیاسی لگتمال، پوجی آپریشن ءُ ریاستی تاکت ءَ جتا جتائیں وھداں سرجمی ءَ ھلاس کت نہ کتگ-
اگاں اسلام آباد ءَ اے سماہ جاڑیگ بیتگ کہ یک نامانیں راجدوستیں رھشونے ءَ اَچ راہ ءَ دیر کن آں بلوچ گھگیری یا راجی زرمبشت نیزور کنگ بیت گڑا گوستگیں بیست سالانی گوستانک ءَ راستی ءِ الم جیڑگ ودی کتگ انت- اے وھد ءَ یک سرجمیں نسلے ءَ بلوچستان ءِ جیڑہ ءَ نوکیں سیاسی ءُ راجی سرپدی ءَ گندگ بیت انت – بیت کنت 26 اگست ءِ درستاں ماناداری ایش انت اے یک گوستانکی وئیلے ءِ یاداشت نہ انت بلکین آیوکیں ھمک وھد ءِ واستا گچین کنگ ءَ جیڑینگ ءَ لاچار کنت-