ایران ءِ نیم سرکاری رسانکدر تسنیم نیوز ءِ رپورٹ ءِ رد ءَ پاکستان ءِ لشکری ءُ انٹیلی جنس ادارہ بلوچستان ءَ بلوچ آجوئی لوٹوکیں مردمانی ھلاپ ءَ کارروائی کنگ ءِ ھاترا سرکاری کمک ءِ سلاہ بندیں گلاں کارمرز کنگ ءَ اَنت ءُ اوگانستان ءِ پیسریگیں سیکورٹی ءِ یک ٹولی یے ھم اے گلانی تہ ءَ ھوار بوتگ اَنت۔
شش اگست ءَ شنگ بوتگیں اے رپورٹ ءِ تہ ءَ اے گپ ءِ پدر کنگ بوتگ کہ بلوچستان ءَ وتگڑیں ”لشکر“ (ڈیتھ اسکواڈ) پاکستانی سیکورٹی ادارھانی کمک ءَ کار کنگ ءَ اَنت ءُ فوج، سیمسر ءُ ملک ءِ ادارہانی انٹیلی جنس ءِ ھمکاری ءَ سیکورٹی آپریشن ءُ شورش کارروائیانی تہ ءَ کردے پیلو کنگ ءَ اَنت۔
رپورٹ ءِ رد ءَ اے گل پراکسی فورسز ءِ بستار ءَ کار کن اَنت ءُ ریاست ءِ بھر بوگ ءَ ابید پاکستان ءِ بازیں کاروائیانی بھر زور انت-
رپورٹ ءِ تہ ءَ گیش گْوشگ بیتگ کہ 2021 ءَ جمھوری سرکار ءِ ھلاس بوھگ ءَ پد اوگانستان ءِ پیسریگیں اوگان سیکورٹی کارندھانی یک ٹولی یے پاکستان ءِ سیکورٹی ادارگ ءُ وتگڑیں (ڈیتھ اسکواڈ) ھوار بوتگ اَنت۔ اے مردمانی بھرتی ءِ سبب ءِ رد ءَ فوجی ھیلکاری، جنگی تجربگ ءُ سیمسری کارروائیانی آشنا بوھگ ءِ درچ گوشگ بوتگ-
رپورٹ ءِ تہ ءَ گْوشگ بیتگ کہ پیسریگیں اوگان کارندھانی کارمرد کنگ ءَ چہ پاکستان ءِ کمک ءَ سلاہ بندیں گلاں اے موہ رس ایت کہ آ وتی سیکورٹی فورسز ءِ کساس ءَ تچک ءَ گیش کنگ ءَ ابید تجربگ کاریں کارندہ آناں چہ نپ چست بہ کن اَنت۔
رسانکدر ءِ رپورٹ ءَ گیش گوشگ بوتگ کہ پیسریگیں اوگان کارندھانی مستریں بنداتی مالی وسیلگ ءِ گرگ ءُ وتی زند ءِ برجاہ دارگ اِنت۔