اھوالکارانی شال ءَ تر ءُ تاب، بلوچستان ءِ اکس کجام کساس ءَ سرجم؟
ٹی بی پی شونگال
گوستگیں ھپتگ ءَ چہ اسلام آباد ءَ پاکستان ءِ بازیں اھوالکار پاکستانی پوج ءِ چیردستی ءَ شال ءِ تر ءُ تاب اش کنائینتگ -ھمے وھد ءَ آیاں بلوچستان ءِ ھستیں جاورھالانی بارو ءَ پاکستانی پوج ءِ مزنیں اگدودار ءُ بلوچستان ءِ سرکار ءِ آڑوکی سروزیر ءِ نیمگ ءَ گپ ءُ تران دیگ بیتگ انت- ھمے وھد ءَ ریاستی واکداراں بلوچستان ءِ جیڑہ، ھستیں سلاہ بندین گل ءُ سرکار ءِ پالیسیانی درگت ءَ وتی لیکہ آیانی دیم ءَ ایر کتگ انت- ریااتی واکدارانی نیمگ ءَ اے لیکہ دیم ءَ اتکگ بلوچستان ءِ جیڑہ ءِ گیش ءُ گیوار تاکت ءِ کامردی ءَ اناں بلکیں گپ ءُ تران ءُ سیاسی املے – گپ ءُ باوست ءِ میان ءَ اے ٹاپار ھم جنگ بیتگ کہ گوستگیں سال ءَ بلوچستان ءَ ھزارانی مردم رھوت ءُ گند ءُ نند کنگ بیتگ انت- ھمے وڑ ھمے سال ءَ بازیں کچے ءَ مردم رھوتی ءَ آورتگ انت- اے ٹاپار ھم دیم ءَ آرگ بیتگ کہ ڈاکٹر ماہ رنگ بلوچ گپ ءُ تران ءِ واستا ھوارینگ ءِ داوت داتگ بلے آئی ءِ نیمگ ءَ اے امل ءِ بھر بوگ ءِ انکاری بیتگ- دومی نیمگ ءَ ماہ رنگ بلوچ ءِ گوھار نادیہ بلوچ ءِ نیمگ ءَ اے ٹاپار رد کنگ ءِ گپ دیم ءَ اتکگ – ھمے گپ ءُ تران ءَ بلوچستان ءَ برجاھیں سلاہ بندیں راجدوستیں زرمبشت ءِ درگت ءَ یک دراجیں وھدے ءِ کساس دَہ سال ءِ روڈ میپ ءِ گپ ءُ تران ھم بیتگ، ایشی ءِ مول ءُ مراد ریاستی واکدارانی رد ءَ اے سلاہ بندیں زرمبشت ءَ گر ءُ دار کنگ یا ایشی ءِ ھلاسی کنگی انت-
اد ءَ یک بنکی جُستے گپ ءُ تران ءِ نام ءَ بیت- ھاں گپ ءُ تران جتا جتائیں مردماں گند ءُ نند،جرگہ برجم دارگ یا بس لھتے مردماں گوں گپ ءُ تران ءِ نام انت؟ اگاں پاکستان واکی گپ ءُ تران ءَ جیڑہ ءِ گیش ءُ گیوار سرپد بیت انت گڑا گپ ءُ تران ءِ سیمسر، شرت، مردمانی بنگپ چی بیت انت؟ ھاں گپ ءُ تران بس ھما مردماں کنگ بیت کہ ریاست ءِ گون ءَ گپ ءُ تران ءَ جاڑیگ انت یا ھما سیاسی تاکتاں داں سر بیگ ءِ جھد بیت کہ چہ پاکستان ءَ سکا ایراد دار ابت؟ یا آیانی بنگپ منگ بیت انت؟
اد ءَ یک دگہ جستے چِست بیت انت- ریاستی لیکہ ءِ رد ءَ سلاہ بندین زرمبشت بس لھتے مردماں گوں بندوک انت گڑا آئی ءِ دیمپانی ءِ واستا دھکانی گچینی گامگیج درکاری پرچا پیش آیگ ءَ انت؟ اے جست آئی ءِ واستا ھم گچین انت کہ ریاست ءِ نیمگ ءَ یک نیمگے سلاہ بندیں زرمبشت ءَ بس لس گوشگ، ھمے وڑ دومی نیمگ ءَ آئی ءِ واستا دراجکشیں شوربندی ءِ گپ کنگ بیت انت- گندگ ءَ اے دوین یکے دومی ءَ آڑ اتگ انت –
بلوچستان ءَ رسانکدر سرجم ءَ بلیک آوٹ انت، اے جاورھالاں اھوالکاراں یک لس ءُ ریاستی چیردستی ءَ آیوکیں تر ءُ تاب بلوچستان ءِ سرجمیں جاورانی گندگ نہ انت بلکیں اھوالکاراں یک گچینی درشانے ءِ سرپد کنگ ءِ مول ءُ مراد انت- بلوچستان ءِ باندات یک پریس کانفرنسے، کجام یک جرگہ، کجام یک سیاسی پاٹی، کجام یک مردمے یا کجام ھم ریاستی درشانے ءَ سرجم بیت نہ کنت- بلوچستان ءِ باندات ءَ بندیں کوٹیاں نندگ ءُ پیسلہ ءِ سر ءَ ستکی ءَ کنگ نہ بیت – اے سرڈگار ءِ باندات ءِ راستیں ھک آئی ءِ مھلوک ءَ گون انت، پرچاکہ ھما پیسلہ آیانی زندمان، پجار، مڈی، سیاسی ھک ءُ آیوکیں پدریچاں سانمند کنت، ایشاں درستاں گیشتر بنکی ھک ھم ایشانیگ انت-