نوشکی ءِ خاران دگ ءِ سر ءَ لجے ءِ ھند ءَ یک پک اپ گاڑی ءَ گمانی رنگ ءَ تراکناکیں شورو لگت داتگ انت ءُ ایشی ءِ آسر ءَ ترندیں تراکے بوتگ۔ چہ تراک ءَ گاڑی ءَ مزنیں کساسے ءَ تاوانے رس اتگ ءُ وئیل ءَ پک اپ ءِ ڈرائیور بیران ءُ سئے مردم ٹپیگ بوتگ انت۔
دمگی مردمانی رد ءَ اے وئیل نوشکی ءِ خاران روڈ ءِ سر ءَ لجے ءَ بوتگ کہ اود ءَ پک اپ ءَ گمانی رنگ ءَ سڑک ءِ سر ءَ ایریں مائین لگت داتگ۔
مردمانی رد ءَ پک اپ ءِ تہ ءَ سرجم ءَ 11 مردم سوار بوتگ اَنت۔ تراک ءِ آسر ءَ ڈرائیور جاہ ءَ بیران بوتگ ءُ سئے مردم ٹپیگ بوتگ اَنت۔ رپورٹ ءِ رد ءَ گاڑی ءِ تہ ءَ ھواریں دگہ ھپت کارگر رک اتگ اَنت۔
تراک ءَ چہ ٹپی بوتگیں مردم ٹیچنگ ہسپتال نوشکی ءَ سر کنگ بوتگ انت کہ اود ءَ آ درمانی کمک کنگ بوگ ءَ انت۔
دمگی مردمانی گْوشگ اِنت بیران بوتگیں ڈرائیور ءُ سئے ٹپیگ نوشکی ءِ مردم اَنت۔