نبشتانک: مئے بے سَمائی کَدی پرُشّ ایت ءُ ما کَدی ھوش کن ایں؟
نبشتہ کار: ماھتاپ بلوچ
دی بلوچستان پوسٹ
اپریکی نبشتکار پرانز پینن ءِ رد ءَ اے بے سمائی ءُ بے وانکی، ھاموشی ،مرگ ءِ ترس ءُ تکانسری اناگتی نہ انت ناں کہ ویلے ءِ برورد انت بلکیں چونیں اوں زورگیری یے دیم ءَ نا وسی ءِ گمان وت اے تبی جیڑھاں ودی کن انت۔ ھمے دابیں گپے جولیا وتی کتاب (ہورر آف فہیر) ءِ تہ ءَ جنت کہ وتی دوستیں مردم ءُ چمدیدیں آزار بنی آدم ءَ زند ءُ مرَگ ءِ سیمسرانی سر ءَ اوشتارین ات کہ وتی زند ءُ مرگ ءِ ھچ وڈیں گمان کت نہ کنت بلوچستان اوں انچیں بے سمائی ءُ ھاموشی یے ءَ انگیر کتگ۔
اے بے سَمائی ءَ بلوچ اَنچین اَڑ ءُ جَِنجالانی تہ ءَ چَگّل دَاتگ کہ ھچ توجیل نگاھانی پیم ءَ نہ انت۔ ھما توجیل کہ سازی انت ءُ ھمے بے سمائی ءِ مجتی توجیل انت مئے راہ ءَ سر گرگ پہ آئھیگ ءَ زبھر انت ۔مئے نا توان کنگ ءَ دژمن اوں ھالیگ نہ نند ایت آ مئے پُروشگ ءُ جتا جتا کنگ ءَ پہ بازیں پَندل ساز ایت تاں ھما وھد ءَ ما اے اَڑاں چے دَراتک نَکں ایں داں یَکجاہ مہ بئیں.
بلوچ ءِ ھاتر ءَ تَھنا یَکجاہ بوگ پَشت کَپتگ. مئے یَکجاهی مئے سوبمندی اِنت. ابید ء یکجاهی ءَ بلوچ ءِ ھاتر ءَ ھچ پشت نہ کپتگ ءُ دگے ھِچ راہ ءُ دَر نِیست اگاں نا! استان بلوچ ءِ بیگواہ کنگ ءَ ھچ چَک ءُ پَد نہ بیت ءُ اِستان یک ءُ یک ءَ مارا ءُ شُمارا بِیگواہ کَنت پد ءَ شهید کَنت ءُ دُور دَنت ما ھِچّی ءَ سرپد نہ بئیں. مئے یَکجاھی دژمن ءَ تاوان دَنت آئی ءِ واب ءَ زوال کَنت ءُ بے سمائی ءِ تاوان مئے وتی بلوچ راج ءَ بیت.
ھَما بَچ کہ مات ءَ پہ چّم ءِ چَارگ ءَ دل نَہ بیتگ مات ءِ چمانی کَل ءَ اِستان ءِ دَاشتگین دلار کاینت زورانسری بِیگواهی ءِ آماچ اش کَن انت کَس نزانت کُجا انت ءُ چے ھال ءَ اَنت داں لاش ءِ پہ ماتاں سر بنت. اے ماتانی چی ھال بیت؟ اے ماتانی چیهانٹ اَرش ءَ سر بنت. اے تھنا یک بلوچے ءِ کسہ نہ انت اے ھَمک بلوچ ءِ مات ءِ اندو اَنت. بَلے بے سمائی ءِ نادراهی مئے جان ءِ راگ راگ ءَ ایر نشتگ ءُ ما زانگ اوں نَہ لوٹیں. اگاں کمّو مردم پِکر بکنت ءُ راستی ءَ بِچار ایت سرجمیں چیزاں سرپد بیت. بلے ما اوں چہ استان ءِ تُرس ءَ راستی ءِ زانگ ءِ جهد ءَ نکنیں. کُشندہ ٹولی پہ 4 کلدار ءَ وتی بَرات ءُ گُهاراں گار ءُ بیگواہ کَنگ ءَ ھَچ چَکّ ءُ پَد نبیت. ایشانی مَجگ کار ءَ نہ اَنت؟ (اکل) یا مَازَگ اِش ھُشّک اَنت؟ سمائی رد ءَ ما ھیال کن ایں کہ ھاموشی منی زندگ بوھگ ءِ زامن انت دان من بے سما ءُ نا آژناگ آں گڑا زندگاں۔
بلے اے بے سمائی، ھاموشی ءُ ناسرپدی جنگی جاوراں ھمے مردماں گیش تاوان بھر کن انت کہ بے سمائی ءِ سیاهیں نکاب اش مان پوش اتگ . چاگرد ءِ ھَمُک تبک بے سَمائی ءِ نیمون ءَ ورد کنت آ زانتکار بیت یا نبیزانت، ماشٹرے بہ بیت یا ڈاکٹر، دانشورے بہ بیت یا ملا ءُ مُپتی یے. سرجم ءَ ھاموش اَنت، گُنّگ اَنت، گُش ئے ھِچی ءَ سرپد نہ انت.ھمے نازانت ءُ ناسرپد ءَ چہ گِیش مُپتی ءُ زانتکار اے بے سمائی ءِ گبار ءُ دنزانی تہ ءَ گار انت ھمے مپتی ءُ عالم کہ انسانی اگبالانی سر ءَ تران کن انت ھمساھگ ءِ اگبال ءُ بنیآدم ءِ اگبال ھمے کہ چاگرد ءِ باسمائیں نپر زانگ بنت انچو بے سما انت کہ ھچ ءَ وتی جیڑہ سرپد نہ بنت بلے اللّہ پاک ۔اے مپتی ءُ دانشوراں جست کنت کہ زانگ ءَ پد ھم ھاموش بوتگ انت رسول صلی اللّٰہ علیہ وسلم ءِ گُشتنے کہ “اگاں تو دریں کار ءَ گوں دستاں داشت کن ئے گڑا دارگ ءِ جھد ءَ ئِے بکن اگاں پہ دست دارگ تئی وس ءَ نہ انت پہ زبان آئی ءَ رد بگُش اگاں رد گُشگ تئی وس ءَ نہ انت گڑا دل ءِ تہ ءَ ایشی ءَ رد ھیال بکن ءُ اے ایمان ءِ نزورتریں جاہ انت “مپتی اللہ ءِ پاکین کُران ءُ رسول اللہ ءِ ھَبراں شَرتِر سرپد اَنت. مُلا واز کن اَنت.
پت ءُ برات بے ھساب بیگواہ اَنت بلے نوں گوانزگی تِپل ءُ زالبول بیگواہ اَنت انگت ءَ ملا ھاموش انت. دل ءِ تہ ءَ کُل بلوچ سرپد انت کے مارا چنچو آزار دئیگ بوھگ ءَ انت.اد ءَ ھمے پدر بیت کہ شوانگے ءُ مُلایے ءِ میاں ءَ ھِچ تَپاوت نیست ملا ھو اِستان ءِ گور ءَ تُرس اَنت. ڈاکٹر ءُ ماشٹر ھاموش انت آگاهی کے کار ایت؟ زانتکار ءُ اَدیب ھاموش اَنت گڑا ھَبر کے کنت؟ آگاہی دیگ ءُ ھبر کنگ المّی اِنت. اگاں نا کیامت ءَ چہ پیسر کیامَت کیت. تاں کَدی ءَ وتی تاسوکیں براتانی لاشاں کوپگ دے ات. تاں کَدی ءَ مات ءُ گهاراں اوپار کنگ ءِ ھاتر ءَ تسلہ دے ات. ماتانی سالونکیں بچانی جان گوں تیراں سوپتگ انت ءُ ماتانی جَگر روک اَنت ءُ گهار روچ ءِ سَد رَند ءَ بے ھوش بنت.
بلے مارا سما نیست. سما کنگی اَنت کے درْستانی باریگ کیت ءُ پد ءَ مئے دُژمن چہ رَستّراں ھم گَنتر اِنت. اے رستّر مئے برات ءُ مردماں تھنا تیر بار نہ کنت ءُ شهید نہ کنت بلکیں آیاں اَنچیں آزار دنت کہ چہ بازیں اَزیتانی اوپار نہ کنگ ءَ شهید بَنت. اِستان ءِ داشتَگیں کُشندہ ٹولی گِساں دُور کن اَنت شَپ ءِ نِیم بیت یا روچ ءُ نِیمروچ ھِچ نچار اَنت نا زالبُول نا کَماش نا مات نا گهار بس بِجن پُروش یا گار ءُ بیگواہ بکن پد ءَ شهید کن ءُ آھانی جوناں گیابان ءَ دور بدئے. بازیں لاشانی چِست کنگ ءَ کوپگ زِیم اَنت ءُ چماں نوں ارس ءِ پِٹّگ ءَ ھون دَر کیت. کس وتی گِس ءَ چہ دراتک نہ کنت. ھمک نیمگ ءَ تُرس ءَ مان پتاتگ، بازار ءِ روگ ءَ پیسر ھزار ھیال دل ءَ کیت. پرچا کہ اے وڑ ھم باز بَراں بوتگ کہ چہ گِس ءَ مات ءِ سالونکیں بچ پہ چیزی ءِ زورگ ءَ دراتکگ اَنت چیز گس ءَ سر نبوتگ اَنت لاش پیسر ءَ اتکگ.
”لھتیں بے گُناہ ءُ بے میاریں شهید بلوچ پسگانی نام“ ”سال(2026) جنوری تاں اپریل“. بارکان ءَ پوج ءِ دست ءَ یکیں کول ءِ 10 مردم شهید بیت. بازینے ٹپی بیت. ”پنجگور، ھاران، تربت ءُ بلیدہ ءَ لاشانی امبار دور دئیگ بنت. ”اندگہ اوں بازیں جاہ آوار انت“بے سمائی ءَ بس کن اِت یکجاھی ءُ یکمُشتی ءِ وھد اِنت مار ءَ تھنا بلوچ بوگی انت پرچا کے ھمے بلوچ بوگ مار ءَ یکجاہ کنت. وتئ پُل ءُ تاسوکیں بچانی ھون ءَ پہ وشیں دلے یل مکن اِت اے کُشندہ ٹولی پیسر ءَ چہ استان ءَ دل ءِ بند انت اے من ءَ ءُ ترا ھچ میم نہ کن انت بلے مئے شمئے سرجمینانی یکجاھی ءُ بلوچ بوھگ ایشانی چماں پچ کنت بیا اِت یکجاہ بہ ایں ءُ دژمن ءَ بے واب کنیں. دژمن ءَ بے سوب کنیں. دژمن ءَ وتی تاسوکیں بچ ءُ براتانی یک یک ءَ ھساب ءَ لوٹیں. نوں اے نابیزانتی ءَ وت ءَ چہ دور بدار ات کے من پَشت کَپاں وتی مَجگ ءَ پراہ کن اِنت. وتی راج ءَ گوں یکجاہ بیں ءُ وت ءَ تھنا بلوچ نبشتہ بکن ات. باز نا سرپد گُشّت کے مار ءَ کار نیست من پشت کپتگ آں کس پشت نکپ ایت سرجمیں ھمے آچ ءَ بُنگر انت. ترا اگاں کار ھَست ءُ نِیست بلے ترا بلاھیں دژُمِنے هست آئی ءَ تئی ھرچ کار ءَ کار هست.
وتی کاراں ھمک روچ کنگ ءَ انت روچے لاشے مارا بَکشگ ءَ اِنت. ھمک روچ سوشل میڈیا ءَ ما شما درواہ گندگ ءَ ایں بلوچستان ءِ پلان جاگہ دُژمن ءَ بیڑ بُرتگ بازیں مردمے بیگواہ کتگ بلوچستان ءِ پلان جاگہ کشندہ ٹولی ءَ نوجوانے شهید کتگ بلے انگت بے سما ایں ءُ ترس ءَ مئے مَجگ ءَ جاگہ کتگ نوں پہ تُرسگ ءَ ھچ پشت نَکپتگ ءُ نیکہ پہ تُرس ءَ کس پشت کپّ ایت نو وتی تُرس ءَ چہ مَجگ ءَ دَر بکن ات اے تُرس ءَ مار ءَ وتی بچ ءُ براتانی لاش کوپگ ءَ داتگ اَنت دیگ ءَ ھچ. بیا ات یکجاہ بیں ءُ دژمن ءَ دیم پہ دیم ءَ گُشیں نوں گوں ما گِیشتر لاش چست کنگ نہ بیت بیا ات یکجاہ بیں ءُ دژمن ءَ ترس ءِ آماچ کن ایں مئے یکجاھی ءُ بلوچ بوگ دژمن ءَ سِیرین پُروش کنت ما سرجمیں چیزاں گِندگ ءَ ایں بلے انگت بے سما ایں. اے بے سمائی مارا دیم پہ تھاری ءَ زورگ ءُ روگ ءَ اِنت ءُ پد ءَ مارا اَنچین چاتے ءَ چَگل دنت کہ ما ھچبر دَراتک نَہ کنیں.
رمزان ءِ ماہ ءَ کُشندہ ٹولی ء روچ ءُ رھمانی بلیدہ میناز ءَ تالب نزیر ءَ آئی ءِ دکان ءِ تہ ءَ شهید کنت. کمبر ء خدا بخش کہ سُلو بلیدہ جاهمندے ات لهتے روچ پیسر آئی ءِ لاش ایم 8 ڈی بلوچ ءَ دست کپ ایت. 2 ءُ 3 ھپتگ ءَ پیسر یک ورنایے شهاب نزیر کہ تربت ءَ کُشندہ ءِ ٹولی آئی ءَ شهید کنت ءُ آئی ءِ لاش اسکول ءِ کِر ءُ کشاں دست کپ ایت. 8 ماہ ءِ بیگواھی ءَ رند مھمد سادک ء ملا نور اللہ ءُ مسلم ء سھی داد ءِ لاش تربت ءَ کیچ کور ءَ گندگ بنت. 2 ءُ 3 روچ پیسر بلیدہ میناز ءَ کَسان سالیں چاکر برکت ءَ کشندہ ٹولی بے رھمی ءَ شهید کنت کَمو روچ پیسر بلیدہ میناز ءَ جاہ مند شے ھک ء رحیم بخش ءِ لاش پسنی ءِ ھند ءَ دست کپ ایت. ھاران ءَ مھمد اشرپ ء مھمد سدیک ءِ لاش گندگ بیت. بارکان ءَ لھنہ زرین ءَ پوج ءِ بمباری ءَ چہ یکیں کھول ءِ 10 مردم شهید بیت. شهید بوتگینانی تہ ءَ زالبول ھم ھوار انت پانچ تاریک ءِ بیگواہ کُتگیں ورنا مروان حمزہ ءِ لاش پنجگور ءَ گوں دگہ 3 بلوچ ورنا ءَ دور دیگ بیت مروان حمزہ ءِ برات دلاور حمزہ پیسری سال ءَ کُشندہ ٹولی ءِ دست ءَ شهید کنگ بوتگ. انوں 3 روچ پیسر بُرھان یودین ءِ ملا نعیم ناگ زامران ءِ جاهمنند 6 ماہ ءِ بیگواھی ءَ پد آئی ءِ لاش کیچ کور ءَ دست کَپ ایت. تاں زی ءُ پِیری ءَ انگت ماتانی سالونکیں بچانی لاش سوگات کنگ بوتگ انت. روچے یک ورنایے ءِ لاش ماں گیابان ءَ دست کپ ایت مئے پُرس ءِ پتّر بند بوگ ءِ نام ءَ نزانت ”تاں یک بلوچ ماتے ءِ بچ بیگواہ انت یا استان مارا لاش سوگات کنگ ءَ انت اے نبشتانک روان انت“
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-