کیچ ءِ دمگ سورک بلنگور نندوکیں مردمے گوستگیں روچ ءَ پاکستانی لشکر ءَ دزگیر کتگ ءُ زورانسری ءَ بیگواہ کتگ۔
زانگ بہ بیت کہ بلوچستان ءَ زورانسری ءَ بیگواہ کنگ ءِ سلسلگ برجاہ اِنت، ءُ ریاستی زور ءُ دھمکیانی سبب ءَ بازیں کیس وھد ءِ سر ءَ ھال دیگ نہ بنت۔
دومی نیمگ ءَ بلوچستان ءَ زورانسری ءَ بیگواھیانی ھلاپ ءَ شال پریس کلب ءِ دیم ءَ وائس فار بلوچ مسنگ پرسنز ءِ برجم داشتگیں زھرشانی بنجل گل ءِ چیئرمین نصر اللہ بلوچ ءِ سروکی ءَ 6364 روچ ءَ برجاہ انت۔
اے درچ ءِ سر ءَ ھواریں مردماں بلوچستان ءَ برجاہیں زوراکیں بیگواھی ءُ درکانودی کشت ءُ کوش ءِ سر ءَ دلپدردی درشان کتگ ءُ لوٹ کرتگ کہ دراھیں بیگواھیں مردمانی زوت پُجارینگ المی بہ بیت۔ ھما کہ آھانی سر ءَ ھرچ وڑیں الزام جنگ بیتگ انت، آ دیم ءَ آرگ بہ بنت ءُ آمید گس ءَ پیش کنگ بہ بنت ءُ آھاں کانونی پھریزگ ءُ رکینگ ءِ سرجمیں ھک دیگ بہ بنت۔
آئی ءَ گیش لوٹ کتگ کہ زورانسری ءَ بیگواہ کنگ ءُُ آئین ءَ چہ دریں گامگیج زوت ھلاس کنگ بہ بیت ءُ ھمے وھد ءَ بیگواھیں مردمانی کیسانی تہ ءَ تچکیں پٹ ءُ پول ءُ کانود ءِ کارروائی دلستکی کنگ بہ بیت۔