خاران دگ ءِ سر ءَ ڈپٹی کمشنر خاران منیر سومرو ءُ آئی ءِ زاتی پھزداراں ھوار رھوتی ءَ بند بوتگ۔ پولیس ءِ بنشون ءِ رد ءَ ڈپٹی کمشنر خاران گوں وتی دوئیں زاتی پھزداراں خاران نوشکی روڈ ءَ سپر کنگ ءَ بوتگ بلے ھمے وھد ءَ گوں آھاں رھوتی بند بوتگ۔
پولیس ءِ بنشوم ءِ گشگ انت کہ ڈپٹی کمشنر منیر سومرو ءُ آئی ءِ دوئیں گارڈانی موبائل فون یکشل ءَ بند ءَ انت کہ ایشی ءِ سبب ءَ گوں آہاں رھوتی کنگ مشکل انت۔
بنشون ءِ رد ءَ بنداتی ھالاں پدر بوتگ کہ ڈپٹی کمشنر خاران ءُ آئی ءِ گارڈ نوشکی خاران روڈ ءَ سلاہ بندیں مردماں آوار جتگ اَنت۔ بلے پولیس ءَ انگت ءَ ڈپٹی کمشنر ءُ آئی ءِ دوئیں گارڈانی آوار جنگ ءِ سرکاری رنگ ءَ پدر نہ کتگ۔
پولیس ءِ واکدارانی رد ءَ ڈپٹی کمشنر ءَ گوں رھوتی کنگ ءِ واستا یکشل ءَ کوشست کنگ بوھگ ءَ اِنت، وھدے کہ آھانی جاڑیگی بوھگ ءُ بابت ءَ زانتکاری جم کنگ بوھگ ءَ اِنت۔
دومی نیمگ ءَ پولیس بنشون ءِ رد ءَ ڈپٹی کمشنر خاران ءِ شوھازگ ءِ واستا نوشکی، خاران ءُ چاگی پولیس شیوار کنگ بوتگ انت۔ پولیس ءِ ٹیم چہ وتی دمگاں پٹ ءُ پول ءُ زانتکاری ءِ درگیجگ ءِ ھاترا جتا جتائیں جاھاں پٹ ءُ پول کنگ ءَ اَنت۔
پولیس بنشون ءَ گشتگ کہ اے وئیل ءِ بابت ءَ گیشیں زانتکاری جم کنگ بوھگ ءَ انت ءُ جاور ھال پدر بوھگ ءَ پد ڈپٹی کمشنر ءُ آئی ءِ پھزدارانی بابت ءَ گڈی جاور ھال پدر کنگ بنت۔
واکداراں انگت ءَ اے وئیل ءِ سرجمیں ھال ءُ اھوال، ڈپٹی کمشنر ءِ سپری جاہ ءُ گمانی سلاہ بندیں مردمانی بابت ءَ ھال ءُ اھوال شنگ نہ کتگ اَنت۔