بلوچ نودربرگل آزاد ءِ جارکش شولان بلوچ ءَ بلوچی زبان ءِ نامداریں آشوبی شائر مبارک کازی ءِ سالروچ ءِ درگت ءَ شنگ کتگیں درشان ءَ گوشتگ ایردستی ءِ دور ءَ وھدے راجے زوراکیانی آماچ بیت، آئی ءِ ھمک شے تاوانبار ءُ ھستانک پْروشگ بیت۔ مھلوک ءِ لس زِندمان تکانسر کنگ بیت، چہ آئی ءَ ھمک وڑیں وشی ءُ شادھانی پُلگ بیت۔ ھمے کُلیں زوراکیانی تہ ءَ زوراک ءِ جھد بیت کہ اِیردست ءِ سر ءَ گیش ھکمرانی کنگ ءِ ھاتر ءَ ھمک زانتکار ءُ نبشتہ کاراں بے توار بہ کنائین اِیت۔ پرے ھاتر ءَ آیاں باز جاھ ءَ لب ءُ لالچ دیگ بیت، زِندانیگ کنگ ءَ ھوار آیاں تُرس ءُ بیم ءِ آماچ کنگ بیت داں ایردستیں راج ءِ گُنگی گیش کنگ بہ بیت ءُ آیاں مھکمیں توارے رست مہ کنت۔ دنیا ءِ ایردستیں راجانی تہ ءَ چوشیں بازیں درور دست کپ ایت کہ اود ءِ نبشتہ کار، شائر ءُ زانتکار تُرسینگ ءُ چہ راجمان ءَ گِستا کنگ بوتگ اَنت۔
آئی ءَ گوشتگ بلے دنیا ءِ دپتر ءَ چہ چوشیں ھم زانتکار ءُ نبشتہ کاراں سَرّیچ اِنت کہ آیاں زوراک ءِ دیم ءَ وتی ند بے توار نہ کتگ ءُ ناں کہ چہ راجمان ءَ عملی دروشم ءَ وت ءَ یکِر کتگ۔
شولان بلوچ ءَ گوشتگ ھمے پَیم بلوچ راج ھم چہ ھمے رنگیں سراں پُر اِنت کہ آیاں وتی راجمان گُنگ بوگ ءَ نہ اِشتگ ءُ مدام پہ راج ءَ رھشونی ءِ کردار اِش پیلو کتگ۔ ھمے سرانی تہ ءَ شائر ءِ آشوب نمیرانیں مبارک کازی ھوار اِنت کہ آئی ءَ وتی زِند ءِ ھمک شے پہ بلوچ راج ءُ ڈیھ ءَ ببا داتگ ءُ پہ بلوچ ءُ بلوچستان ءَ شائری کتگ ءُ نبشتہ کنان بوتگ۔
جارکش ءَ گوشتگ ھما دور ءَ کہ بلوچ ڈیھ چہ درانی زیردستی ءَ زِھمیگ کنگ بوتگ داں مبارک کازی ءِ وڑیں شائر ءُ نبشتہ کاراں ھمے ایردستی ءِ کسہ ءُ مارشت وتی شائری ءِ کالب ءَ رنگ داتگ ءُ مھلوک ءِ دیم ءَ درشان کتگ اَنت۔ آئی ءَ بلوچ ڈیھ ءِ ھزام جتیں نوبت، راج ءِ کُشت ءُ کوش، بلوچ بچانی بیگواھی ءَ بہ گِر داں مُرگ ءُ دلوت، درچک ءُ دارانی دردیگ کسہ ھم وتی شائری ءِ تہ ءَ جاہ داتگ ءُ نازینتگ اَنت۔ آئی ءِ شائری ءَ تھنا لبزانی اَمبارے پھمگ گوں آئی ءِ اِزمی بالاد ءُ پگر ءَ بے ایمانی یے بیت۔
شولان بلوچ ءَ گوشتگ آئی ءِ راستیں شائری ءِ اَبرم آشوبی شائری یے کہ بلوچ ڈیھ ءَ گوں بندوکیں ھمک راجمانی چِست ءُ ایرانی سر ءَ اَنت بزاں بلوچ راجمان ءِ آدینک اَنت۔ آئی ءَ ھرچی کہ دِیست ءُ مار اِت گوں نیک ءُ تَچکیں روشت ءَ بلوچ راج ءِ دیم ءَ ایر ئِے کُت داں بلوچ مھلوک باسما بہ بیت ءُ گوں راجی جُھد ءَ ایماندار بوان ءَ عمل بہ کنت۔
آئی ءَ گوشتگ مبارک کازی ھما آشوبی ءُ دلیریں شائر اَت کہ ھمک ڈولیں سکی ءُ ھزاباں گوزان بوت بلے راجی جُھد ءُ بلوچستان ءِ نازینگ ئِے یلہ نہ دات۔ آ بازیں رند ءَ زِندانیگ کنگ بوت، تُرسینگ ءُ بیھار دیگ بوت، بچ ءِ نمیرانی سگّ اِت ئِے، وتیگانی ھبر ءُ تھمت ئِے اوپار کت اَنت بلے چہ بلوچ جھد ءَ پَشت کِنز نہ بوت ءُ ناں کہ گلگ ءُ زاری ئِے کت بلکیں آ گیش مھکم بوت ءُ بلوچ راجمان ءِ کسھاں دْرنگازگ ءَ بوت۔
جارکش ءَ گوشتگ آئی ءَ بد ءُ رَد کنگ بوت بلے ناں تَھنا آئی ءَ کِمار نہ کت بلکیں بلوچ راج ءَ ھم کازی ءِ کردار بدیں نگاھاں نہ چار اِت۔ کازی ءَ وتی زِند ءَ مزن نام ءُ کرداریں ھَستی یے جاھ رست ءُ ھمک مردم ءَ آ گوش داشت ءُ دوست ئِے داشت، ایشی ءِ سوب اِش اَت کہ کازی راجی شائرے اَت، بلوچ ءُ بلوچستان ءِ کسہ ءَ دْرنگاز ءَ اَت ءُ اے کسہ ءِ تہ ءَ ھمک بلوچ نَپر ھوار اَت پمیشکا آئی ءِ شائری پہ ھمک بلوچ نَپر ءَ اَت، ھمک کس ءَ وت ءُ وتی کسہ شائری ءِ تہ ءَ دِیست اَنت۔ کازی ءَ بام ءِ آجوئی ءِ سپر ءَ شائری کنان ءَ 16 ستمبر 2023 ءَ اے دنیا ءَ سپر کُت ءُ داں اَبد بلوچ گلزمین ءِ باھوٹ بوت۔
آئی ءَ گوشتگ نمیرانیں مبارک کازی ءِ پہ بلوچ ءُ بلوچستان ءَ آشوبی شائری کنگ ءِ دروت ءَ بی ایس او آزاد ءَ آئی ءَ شائر ءِ آشوب ءِ پنام دات۔ اے پنام پہ آئی ءِ شائری ءُ پگر ءِ پھمگ ءَ مستریں چیدگ اِنت۔ آئی ءِ زِند ھزاباں گوں سَرّیچ اِنت بلے کازی اِنت کہ اوشتاتگ ءُ بلوچ راج ءَ وتی شائری ءِ دروشم ءَ درس دیگ ءَ اِنت۔ کازی ءِ رنگیں نبشتہ کار ءُ شائر کزا ودی بہ بنت، بلے ھردے کہ ودی بوت اَنت داں آ وتی اِزمی بالاد ءَ زوراک ءِ چماں سیاھ ءُ تھاریں ھیروپ بنت ءُ دیم ءَ کاینت۔ کازی ءَ جسدی دروشم ءَ سپر کتگ بلے داں بلوچ سرزمین ءِ سر ءَ یک جھدکارے جھد ءَ اِنت ءُ بلوچ ڈیھ ءِ سر ءَ بوھوکیں یک ھم زوراکی ءِ تہ ءَ کازی ءِ شائری الھان کنت ءُ پہ بلوچ ءَ پنتے ءُ پہ دژمن ءَ جوریں کھرے بیت ءُ کئیت۔