بولان ءَ سلاہ بندیں مردماں راہ بستگ، بلوچستان اسمبلی ءِ باسک ءِ پھزداری سلاہ پچگرگ بیتگ انت

یکشمبے ءِ روچ ءَ بلوچستان ءِ دمگ بولان ءَ سلاہ بندیں مردماں بازیں کچے ءَ جتا جتائیں جاھاں راہ بستگ انت ءُ ھمے وھد ءَ پاکستانی پوج ءُ سلاہ بندانی میان ءَ ترندیں جنگ ءُ چوپ ھم بیتگ انت ءُ پورسز ءِ بکتر بندیں گاڑی ھم اُرشانی نشانگ کنگ بیتگ انت-

دمگی مردمانی رد ءَ بولان ءَ راہ ءِ بندگ ءِ وھد ءَ سلاہ بندیں مردماں پی پی پی ءِ ایم پی اے لیاقت لھڑی انگیر کتگ ءُ گن مینانی سلاہ پچگپتگ ءُ لیاقت لھڑی سرپد کنگ ءَ پد پھزدارانی ھمراھی ءَ واترینگ بیتگ-

دومی نیمگ ءَ آئی ایس پی آر ءَ ٹاہ داتگ کہ سلاہ بندیں مردماں آیوکیں پورسز ءِ راہ ءِ بندگ ءِ واستا چیر بیتگ انت ءُ ھمے وھد ءَ ایف سی ءُ سلاہ بندانی میان ءَ تیرگواری بیتگ-

آئی ایس پی آر ءَ ٹاہ داتگ کہ کاروائی ءِ وھد ءَ چار سلاہ بندیں مردم جنگ بیتگ انت ءُ ھمے وڑ یک گاڑی ءَ تاوان رس اتگ – بلے آئی ایس پی آر ءِ گپ لس اھوالانی توک ءَ راستی نہ بیتگ –