تربت : پاکستانی پوج ءِ دست ءَ زورانسری بیگواھیں مردمانی کھول ءَ زھرشانی کنان ءَ دگ بند کتگ

تربت ءِ دمگ چہ بھمن ءَ بیگواہ کنگ بیتگیں چاریں ورنایانی کھول ءَ جدگال ڈن سر ءَ نندانک داتگ M8 شھدگ بند کتگ-

چہ بھمن ءَ بیگواہ کنگ بیتگیں راھل علی محمد، روشن علی محمد ،نعیم بشیر ءُ آدم بلوچ ءِ کھول ءَ دراجیں مدتے ءَ بیگواھی ءِ پُشدر ءَ مروچی یکشمبے ءَ M8 شھدگ سر ءَ نندانک داتگ گاڑیانی روگ آیگ بند کتگ-

کھول رِد ءَ اے چاریں ورنا شپ وھد ءَ لوگاں چہ آوار جتگ ءُ بیگواہ کتگ اَنت کہ آیانی درگت ءَ مارا ھچ وڑیں سرپدی دیگ بیگ ءَ نہ اِنت- اشی ءَ ساری ما دمگی انتزامیہ ءَ چہ گپ دیوان کتگ ءُ زھرشانی ھم کتگ بلے آ دیم ءَ آرگ نہ بیتگ اَنت-

زھرشانی کنوکاں گْوشتگ کہ اے وھد ءَ جدگال ڈن ( ڈی بلوچ پوائنٹ ) سر ءَ ایم ایٹ شھدگ پچ کنگ نہ بیت دانکہ مئے چاریں بیگواھیں ورنا یل کنگ نہ بیت اَنت-

آیاں جار جتگ اگاں چاریں ورنا یل کنگ نہ بیت گڑا ما شھر ءَ شٹرڈاؤن ھڑتال ءِ جار ءَ دے ایں ءُ سرجمیں شھر ءَ بند کن ایں-