مزن وانگجاہ کمیشن پاکستان ءِ کارمستر تارک بانوری ءَ اے جار جتگ کہ آئی ءِ گل ءَ درستیں مزن شاہ در برجاہ ءَ آنلائن کلاسانی بندات کنگ ءِ گُشتگ۔ آئی ءَ اے ھم گُشتگ کہ آئی ءَ دامگ (انٹرنیٹ) ءِ آسراتی دیوکیں کمپنیاں گوں اے دزبندی ھم کُتگ کہ آ مزن شاہ دربرجاھانی بینڈ وڑتھاں گیش بہ کن اَنت دانکہ آنلائن کلاسانی نیام ءَ ھچ وڑیں جیڑہ دیم ءَ مئیت۔
ھیر، آنلائن کلاسانی بنداتی پنجاب وڑیں ھنداں سوب مند بیت کنت کہ آ اود ءَ دامگ ءِ آسراتی یک گوھریں شَے ئیں نہ اِنت بلکیں ھمروچی شَے یے جوڑ بیتگ، بلے بلوچستان ءِ وڑیں دمگے کہ بُنکی آسراتیاں چہ زبھر اِنت، آ اود ءَ بورڈ ءُ کلم ءَ ابید دگہ کجام ھم وڑ ءَ وانگ ءِ ھبر کنگ، دگہ یک جھانے ءِ ھبرانی دروشم ءَ دے اَنت.
بلوچستان ءَ وانگ ءُ زانگ ءِ نگیگیں جاورانی اندازگ جوانیں وڑے ءَ گوں اے کساس ءُ نمبراں گوں جنگ بیت کنت کہ بلوچستان ءَ تھنا سی ءُ ھشت درسد مردین وانندگ زانگ بنت، جنین آدمانی کساس گوں ھژدہ درسد ءَ گیشتر گنتر اِنت۔ اے گپ ھم بے ھجال کنگ مہ بیت کہ بلوچستان وانندگ ھما مردم ھم زانگ بیت کہ تھنا نبشتہ کنگ ءُ وانگ زانت۔
بلوچستان ءِ نزوریں وانگ ءِ جاوراں چارگ ءُ جیڑگ بہ بیت، گُڑا زانگ بیت کہ بلوچستان ءَ آنلائن کلاسانی بزانت ایش بیت کہ ھما نودربرانی ھاتر ءَ ھم جیڑہ پیداک کنگ بہ بیت کہ آ چُشیں ناوشیں جاورانی تہ ءَ ھم گیشتریں وانگ ءُ زانگ ءِ ھاتر ءَ چہ لوگ ءَ در کپتگ اَنت۔
کیچ دمگ کہ بلوچستان ءِ دومی مستریں دمگ اِنت، آ مزنیں مدتے ءَ چہ تھری جی ءُ فور جی دامگ (انٹرنیٹ) ءَ چہ سیکیورٹی ترس نام ءَ زبھر کنگ بیتگ۔ ھمے وڑ ءَ پنجگور، کلات ءُ مستونگ ءِ دمگ ھم گوستگیں پنچ سال ءَ چہ نزانتگیں جیڑھانی سوب ءَ چہ تھری جی ءُ فور جی دامگ ءَ چہ زبھر اَنت۔
اے درستیں دمگ بلوچستان ءِ شھری ءُ مزنیں ھند زانگ بنت کہ اد ءَ مزنیں کساس مردم نشتگ اَنت، دومی نیمگ کہ میتگ ءُ کشاوردی ھنکینانی گپ اِنت آ ھنکینانی تہ ءَ پون ءِ آسراتی ءَ ھم مردم یک مزنیں دادے ( نعمتے) سرپد بنت۔
ھما نودربر کہ ھاسیں وڑے ءَ چہ کراچی ءُ پنجاب ءِ شھدربر جاھاں چہ واتر بلوچستان ءَ اتکگ اَنت، ھما درستاں گیش اسرمند بنت۔ پرچاکہ آیانی شھدربرجاہ آیانی جاوراں سرپد بیگ ءَ ابید کورس (وانگ) ءَ دیم ءَ بران کن اَنت۔
بیست ءُ شش مولمان( مارچ) ءَ پاکستان ٹیلی کمیونیکشن اتھارٹی ءَ وتی یک درشان ءِ شنگ کنان ءَ گُشتگ کہ کورونا وبا ءَ چہ پد جنُزوکیں (لاک ڈاون) ءِ سوب ءَ دامگ کارمرز کنوکیں مردمانی کساس پانزدہ درسد ودیتگ۔ آیاں گُشتگ کہ ھاکم اے گیشی ءُ دامگ ءِ کارمرز کنگ اِنت چہ ایشی گیشتر ھم گمانیں گیشی ءَ جوانیں وڑ ءَ کمک کنگ ءُ رکینگ ءِ آسراتی دار اِیت۔
جیڑگی گپ ایش اِنت کہ ھما ھاکم کہ دامگ ءِ کارمرز کنگ اِنت اے ترندیں گیشی یے بھر ءَ چِست کنگ ءِ لائکی دار اَنت۔ آ مدام بلوچستان ءِ پدمنتگیں ھند ءُ دمگاں دامگ ءِ سر کنگ ءَ چہ بے سوب ءُ بے دزرس پیش دار اَنت۔
اے سرجمیں جاورانی تہ ءَ کہ جوانیں گپے دیم ءَ اتکگ آ ایش اِنت کہ بلوچستان ءِ ھما نودربر کہ کوئٹہ اگاں ھُزدار وڑیں شھراں جھمنند اَنت، کہ اود ءَ دامگ چہ دگہ ھند ءُ دمگ ءَ کمو گھتر اِنت، دامگ ءَ کارمرز کنگ ءُ گوں مردماں ھال کنگ ءَ اَنت ءُ کرونا وڑیں جھانی وبا ءَ چہ وتا رکینگ ءِ ھاتر ءَ آنلائن سیمینار اڈ دیگ ءَ اَنت۔
دانکہ بلوچستان ءِ ھمے دمگاں دامگ ءِ آسراتی پچ کنگ نہ بنت تاں ھما وھد ءَ بلوچستان ءَ آنلائن کلاس پہ نودربراں کمک ءِ جاہ ءَ گنتر جیڑہ ءُ تاوان بار بنت۔