بیست ھشت مولمان (مارچ) آدینگ ءِ روچ ءَ آنلائن رسانکدار ،،بلوچستان ٹائمز،، ءَ اے گپ پدر کُتگ کہ آیانی مزن شونکار ساجد ھسین چہ دو مولمان دو ھزار بیست ءَ بیگواہ اِنت. سی ءُ نُھ سالی بلوچ اھوالکار ءِ گوں گُڈی رند ءَ ھال ءُ اھوال دو مولمان ءِ سُھب ءِ یازدہ ءِ وھد ءَ سویڈن ءِ شهر اپسالہ ءَ بیتگ.
میان استمانی اھوالکارانی فیڈریشن ءِ اے درگت ءَ گشگ اِنت کہ “ساجد ھسین ءِ کوش ءِ بیھار رس اِتگ, لوگ ءِ سر ءَ بیڑ برگ، کهول ءُ وتی جند ءِ سر ترندیں چاریگی ءُ جست ءُ پرسانی سوب ءَ دو ھزار دوازدہ ءَ چَہ پاکستان ءَ تتکگ. ساجد چہ دو ھزار دوازدہ ءُ چَہ دو ھزار ھبدہ ءِ نیام ءَ اومان، امارات ءُ یوگانڈہ زند گوازینگ ءَ بیتگ، پد ءَ آئی ءَ سویڈن ءَ باھوٹی ءِ هاتر ءَ لوٹ ئِے کتگ.
ھیال درشانی ءِ آجوئی ءُ داں ھمک ھال ءِ سر بیگ ءِ اگبالانی ھاتر ءَ جھد کنوکیں جھانی گل ” اھوال کار ءَ ابید ،،سیمسر،، ءَ ساجد ھسین ءِ بیگواھی ءِ بھتام پاکستانی چیریں گل انٹر سروس انٹیلنجنس ( آئی ایس آئی ) ءِ سر ءَ جتگ.
ھمے گل کہ جھان ءِ “رپورٹرز ساں فرنٹیئرز” ءِ نام ءَ ھم زانگ بیت بھتام جنان ءَ گشتگ کہ مئے چیریں اھوالکارانی نیمگ ءَ رس اتگیں ھالانی رد ءَ گوں پاکستان ءَ دگری داروکیں ھما مردم کہ اے وھد ءَ درانڈیھ ءَ باھوٹی ءِ زند گوازینگ ءَ اَنت، ھمے مردمانی یک لڑے اے وھد ءَ آئی ایس آئی ءِ تھی دیوانانی تہ ءَ گردگ ءَ اِنت.
ھمے وڑیں یک ویلے دوھزار ھژدہ ءَ ھم دیم ءَ اتکگ، وھدے انسانی اگبالانی ھاتر ءَ کارکنوکیں یک جھدکارے راشد ھسین چہ متھدہ ارب امارات ءَ چہ اماراتی چیریں پولیس ءِ دست ءَ دزگیری ءَ پد بیگواہ کنگ بیتگ، بازیں مھکمیں اھوالانی رد ءَ راشد یک پرائیویٹ بالی گرابے ءِ سر ءَ پاکستان ءَ دیم دیگ بیتگ، بلے یک سالے ءِ گوزگ ءَ پد ھم داں انگت پاکستانی استانی گلاں دیم ءَ نیاؤرتگ.
ساجد ھسین ءِ درگت ءَ انگت سویڈش پولیس ءَ وتی گڈی اھوال دیم ءَ آرگی انت. ساجد ھسین ءِ بیگواھی ءَ اگاں پاکستان ءِ دست مان بیگ ءِ منانک دست کپت انت ،انچش کہ اھوالاکارانی گل بھتام جنگ ءَ اَنت گڑا یک گپے پدر بیت کہ بلوچستان ءِ جاوراں پدر کنوکیں بلوچ اھوالکارانی ءُ انسانی اگبالانی کارکنوکیں جھدکارانی ھاتر ءَ دگنیا ءِ یک کنڈے ھم پھریز (محفوظ) نہ اِنت.
یک نامداریں کردش بتلے “ابید چہ کوھاں دگہ سنگت نیست” کردانی اے نگیگیں جاور ءُ ایمنیں دگنیا ءَ چہ دلپروشی ءِ پدرائی ءَ کنت، وھدے گرانیں ساھتاں آیاں ایمنیں دگنیا ءَ چہ یک سنگتے ھم نہ دیست گڑا آیاں کوہ وتی سنگت کت اَنت.
همے وڑ ءَ بلوچ بلوچستان ءَ ھوار سرجمیں دگنیا ءَ نشانگ کنگ بیگ ءَ اِنت، اے گپ ءِ ترس ھست کہ بلوچ ھم ھما جاہ ءَ سر بیت کہ آ اود ءَ ابید چہ کوھاں دگہ سنگت نیست.