TBP Balochi

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ بی ایل اے ءِ سرمچاراں شال ءَ سریاب تھانہ ءِ ایس ایچ او ءِ گاڑی سریاب دگ سر ءَ ایری گیشن کالونی ءِ نزیک ءَ گوں چیرکتگیں بمبے ءَ نشانگ کتگ-

جارکش ءَ گْوشتگ کہ تراک ءِ آسر ءَ ایس ایچ او ءَ ھوار سے کارندہ ٹپی بوتگ اَنت وھدے کہ اشانی گاڑی ءَ سک باز تاوان رس اِتگ- اشی ءِ زمہ واری ءَ بی ایل اے منّ اِیت-

جیئند بلوچ ءَ دیمتر ءَ گْوشتگ کہ اے ایس ایچ او پاکستانی چیریں ادارھانی گوشگ پد ءَ دمگی فورس بوگ ءَ ناجائزیں پائدگ چست کنگ لوگانی سر ءَ بیڑبرگ، بلوچ راج سر ءَ لُٹ کُٹ ءُ دگانی سر ءَ پٹ ءُ پول نام سر ءَ بلوچانی ازت ءُ نپس تاوان دیگ ءَ ھوار اِنت-

جیئند بلوچ ءَ گْوشتگ کہ بلوچ لبریشن آرمی پولیس ءُ لیوز فورس ءَ بلوچ بوگ ءِ سبب ءَ ھیال داری کنگ ءَ ایں بلے اے فورس ھمکروچ اے ھیال داری ءِ ردیں پائدگ چست کنگ بلوچ راج سر ءَ زوراکی ءُ راجی جُھد ءِ دیم ءَ مک بوگ ءِ کرداں ھوار اَنت بلے پولیس ءُ لیویز فورس ءَ یکرندے پد ءَ بیھار ءَ شنگ کن ایں کہ آ ھرچ اے وڑیں چست ءُ ایراں چہ بدار اَنت کہ چریشی ءَ بلوچ راج ءُ یا بلوچ راجی جَھد ءَ تاوان بہ رس اِیت- اگاں اے فورس وتی رویشگ ءَ مٹ نہ کنت گُڑا بی ایل اے اشانی واستا ھما پالیسی ءُ رویشگ ءَ کار اِیت کہ زورگریں آرمی ءُ ایف سی ءِ گوم ءَ کنگ ءَ اِنت-

مھمکہ داخلہ بلوچستان ءَ جتا جتائیں دمگاں دو سواری ءِ سر ءَ پابندی ءِ جار شنگ کتگ-

مھکمہ داخلہ بلوچستان ءَ ھُزدار ، مستونگ ءُ سبی ءَ پرپٹ ءِ دو سواری ءِ سر ءَ پابندی جتگ، دو سواری، دیم گرگ، ءُ سلاھانی سر ءَ 144 جنگ بیت-

دو سواری ءُ دگہ پابندی دانکہ یک ھپتگے ءَ ھست بیت- مھمکہ داخلہ ءِ رِد ءَ 144 جنگ 14 اگست پھازوکی ھاتر ءَ کتگ-

مھکمہ داخلہ ءَ دمگی انتزامیہ ءَ پھاوزکی تُرند کنگ ءِ جار سر ءَ تُرندی ءِ منگوری ءِ ھکم داتگ، بگیری کنوک ءِ ھلاپ ءَ گامگیج زورگ بیت-

دی بلوچستان پتر ءَ سربوتگیں ھالانی رِد ءَ بلوچستان ءِ بنجاھی شھر شال ءَ ناشناسیں پرپٹ سواراں پولیس ءِ گاڑی ءِ دز بمب اُرش ءِ نشانگ کُتگ –

ھالانی رِد ءَ اُرش سریاب دگ ءَ ایرگیشن کالونی ءِ نزیک ءَ سریاب تانہ ءِ ایس ایچ او ءِ گاڑی ءِ سر ءَ کنگ بوتگ –

بلے تنی وھدی دزبمب اُرش ءَ ھچ وڈیں جانی تاوان ءِ ھال نیست، اُرش جاہ ءَ پوج ءُ کمکی ٹولی سربوتگ انت –

زیکین انت کہ اے دابیں بازیں اُرش بوتگ انت اشی ءَ پیش شال ءُ کلات ءَ پولیس کارمندانی سر ءَ دزبمب اُرش کنگ بوتگ ات –

مروچی بوتگیں اُرش ءِ زمہ واری ھچ گل ءَ نہ منّ اِتگ –

پنجگور ءَ دل ءُ لاپ نادراھی ءِ گیش بوھگ ءَ چار زھگ بیران بوتگ انت ءُ وھدیکہ دگہ بازینے دل ءُ لاپ ءَ گپتگ انت – پنجگور ءُ نزیک ءُ گور ءِ دمگاں دل ءُ لاپ نادراھی تیزی ءَ گوں تالان بوگ ءَ انت – دل ءُ لاپ نادراھی ءِ آماچ بوتگیں مردم الاج نہ بوگ ءِ سوب ءَ سک باز دلسیاہ انت، نادراھی ءِ رکّگ ءِ ھاتر ءَ نادراجاھاں درمان نیست اِنت –

دل ءُ لاپ وبا ءَ نادراھانی کچ روچ پہ روچ گیش بوان انت، نادراھجاھاں درمان ءِ کمی انت ، دمگ ءَ رینگرز گلوکوس ھم رسگ ءَ نہ انت ءُ دگہ دمگاں ھم دل ءُ لاپ نادراھی ءِ ھال آھگ ءَ انت –

دمگی مردمانی گوشگ انت کہ پنجگور ءَ ھئورانی سوب ءَ جاندراھی ءِ واکداراں ھچ وڈیں پھریزی گامگیج نہ زرتگ چریشی ءِ سوب ءَ پنجگور ءَ دل ءُ لاپ نادراھی ءِ گیش بوان انت – نادراھجاھاں جاہ نیست اِنت ھمک روچ نادراھ ٹیچنگ ھسپتال ءُ دگہ کلینکاں رؤگ ءَ انت، نادراھانی گیش بوگ ءَ رینگرز گلوکوس ھم ھلاس بوتگ انت –

درمان نہ رسگ ءِ سوب ءَ دمگی مردم دلسیاہ انت – پنجگور ءِ ٹیچنگ نادراھجاہ ءِ ڈاکٹرانی گوشگ انت درمانانی درگت ءَ جانسلامتی ءِ واکداراں برزی تبک ءِ اپسر سرپد کرتگ انت – جاور ھال نگیگ انت ھمینچو سامان مئے گور ءَ ھست ما آھاں کارمرز کنگ ءَ انت –

پنجگور نادراھجاہ ءِ واکداراں دل ءُ لاپ ءِ نادراھی ءَ بیران بوتگیں چار زھگانی ھبر راست کُتگ – آھانی گوشگ انت کہ ھمک روچ سد ءَ گیش زھگ نادراھجاہ ءَ آرگ بوگ ءَ انت کہ دل ءُ لاپ ءِ نادراھی ءِ آماچ انت – مئے گور ءَ رینگرز ءُ اینٹی بائیوٹک درمان نیست اِنت – نادراھانی کھول لاچار انت کہ بازار ءَ اے درماناں زورگ ءَ انت –

اوگانستان ءِ بنجاھی شھر کابل ءَ دینی وانگ جاہ ءَ وتکش تراک ءِ بوتگ ءُ چریشی ءَ رحیم اللہ حقانی بیران بوتگ –

ناموریں دینی زانتکار شیخ رحیم اللہ حقانی تالبانانی نزریاتی استاد ءِ زانگ بوتگ – اوگان واکدار بلال کریمی ءِ اے ھبر راست کُتگ کہ وتکش تراک ءَ شیخ رحیم اللہ حقانی بیران بوتگ –

تالبان کامندانی گوشگ انت کہ شیخ رحیم ءِ سر ءَ اُرش آئی ءِ دینی وانگجاہ ءَ بوتگ – اسلامی امارت سرکار ءِ تہ ءَ شیخ ءِ ھچ وڈیں اگدہ نہ بوتگ بلے آ بازیں تالبانانی اُستاد بوتگ –

واکدارانی گوشگ انت کہ وتکشیں اُرشکار شیخ رحیم ءِ دچار کپگ ءَ اتکگ بوتگ بلے تنی وھدی ھچ کس ءَ اے اُرش ءِ زمہ واری نہ منّ اِتگ بلے پدا ھم تالبانانی سر ءَ اُرشاں ھمے گوشگ بیت کہ داعش ٹولی کنگ ءَ انت –

شیخ حقانی سر ءَ اے اُرش ءَ پیش ھم اُرش کنگ بوتگ – بی بی سی ءِ سکندر کرمانی ءِ گوشگ انت کہ شیخ سر ءَ چدو پیش پاکستان ءِ تہ ءَداعش ءَ اُرش کتگ بلے آ رکّ اِتگ –

تالبان کارمند ءَ گوشتگ کہ شک کنگ بوگ ءَ انت کہ اے اُرش لنگیں مھمان ءَ کُتگ – تالبان پٹ پول کنگ ءَ انت کہ اُرشکار کئے بوتگ ءُ کئی گوشگ ءِ پدا ءَ دچار کپگ ءَ اتکگ بوتگ – زانتکارانی گوشگ انت کابل ءِ تہ ءَ بلاھیں مردمے ءِ سر ءَ وتکشیں اُرش کنگ اسلامی امارت ءِ کانود جوڈ کنوکیں ادارھانی ھاتر ءَ یک چیلنج یے –

وائس فار بلوچ مسنگ پرسنز ءِ رھشون سمی دین بلوچ ءَ چاگردی ترامجاھاں گوشتگ کہ بلوچستان ءَ زورانسری آوار جنیانی بگیری ءَ باند ءَ شال ءَ زھرشانی روانکے کشگ بیت اِنت –

ھمے درگت ءَ بیگواھیں مردمانی کھول ءِ نیمگ ءَ جار ءِ شنگ کنگ بوتگ ءُ ھمے گوشگ بوتگ کہ زورانسری آوار جنگ بوتگیں مردمانی کھولاں سَے ھپتگ ءَ گیش انت کہ شال ءَ ریڈ زون ءَ گورنر کارگس ءِ دیم ءَ زھرشانی نندانک ءَ نشتگ انت کہ آھانی تہ ءَ کسانیں شیر مچیں چُک، کماش ءُ نادراھیں مات ءُ گھار ھوار انت کہ اے ھاکم ءُ سیاستدان اشاں نہ گند انت –

دیمتر ءَ ھمے گوشگ بوتگ کہ زورانسری آوار جنگ بوتگیں مردمانی کھول وتی دوستیگیں مردمانی ھاتر ءَ وتی ھند ءُ دمگ یل داتگ ءُ شال ءَ اتکگ انت تانکہ مئے پریات گوشدارگ بہ بیت ءُ مئے اے جھد ءَ شمے پلامرزی لوٹیت – اگاں ما دراہ یکجاہ بہ بہ ایں ءُ اے زلم زوراکی ءُ زورانسری آوار جنیانی ھاتر ءَ جھد بہ کن ایں گڈا ما الم یک ناں یک روچ ءِ اشاں داریں –

آھاں گوشتگ کہ زنداناں بندیگیں ھرکس کتکار نہ انت بیا ات آھاں انساپ دیائین ایں آھاں نوکیں زند ءِ دیگ ءَ مئے ھمراہ داری ءَ بہ کن ایت – بے گناھے ءِ رکینگ چہ جھاد ءَ کمتر نہ انت – بیا ات پہ اے ماتانی رتکگیں ارسانی ھاتر ءَ، پہ شیر مچیں زھگانی ھاتر ءَ، ھما جنیں چُکانی ھاتر ءَ کہ ھچبر وتی گِس ءَ در نہ اتکگ انت کہ مروچی وتی براتانی یل کنائینگ ءِ ھاتر ءَ دگانی سر ءَ در اتکگ ءُ نارہ جنگ ءَ انت – اے درد چکاریں توار ءَ مئے ھم توار بہ بئے –

دیمتر ءَ گوشگ بوتگ کہ ھما زمین ءِ سر ءَ کہ شما رستگے آ مات ءِ بستار ءَ داریت آئی ءَ شمار ءَ رودینتگ ھمے زمین ءِ سر ءَ زلم زوراکی ءُ ناھکی ءِ کانود انت اگاں شما لوٹ ایت کہ سرڈگار ءِ سر ءَ زلم زوراکی ھلاس بہ بنت – اگاں شما پھمیت کہ اے سرڈگار ءِ سر ءَ نشتگیں ما شما دراہ یک انت مارا وتی مات ءُ گھار زان یے گڈا بیا ات بیگواھیں بلوچانی ھاتر ءَ اے پُرایمنیں جھد ءَ مئے ھمراہ داری ءَ بہ کن ایت –

جار ءِ تہ ءَ گوشگ بوتگ کہ بیگواھیں بلوچانی کھول باند ءَ بزاں دوازدہ اگست ءَ آدینگ ءِ روچ ءَ بیگاھے ادار چار ءَ بی ایم سی ءِ گیٹ دپ ءَ یک زھرشانی روانک ءِ کش انت اے زھرشانی روانک تاں گورنر کارگس ءِ دیم ءَ روت ءُ ھلاس بیت ما شمارا دزبندی کن ایں کہ اے زھرشانی روانک ءَ بھر بہ زوریت –

دومی نیمگ ءَ ھمے درگت ءَ شال ءِ جتا جتائیں جاھاں پمپلٹ بھر کنگ بوتگ کہ مردماں ھمے گوشگ بوتگ کہ زھرشانی رونک ءَ بھر بہ زوریت –