TBP Balochi

جینیوا : بلوچ نیشنل مومنٹ( بی این ایم) ءِ سرکماش ڈاکٹر نسیم بلوچ ءَ ھم سنتیں راج ءِ کارگس ءِ دیم ءَ پی ٹی ایم یورپ ءِ زھرشانی ءَ بھر زرتگ۔

آئی ءَ گوں زھرشانی مچی ءَ تْران کنان ءَ گْوشتگ چیردستیں راجانی بھر کنوکیں وتساچیں سیمسری لیکارانی کور کنگ ءَ مارا ھم پت بیگ لوٹ ایت۔انچوش کہ مئے درد یک اَنت ھمے پیم مئے منزل ھم باید یک بہ بیت۔

آئی ءَ گْوشتگ چیردستیں راجاں پاکستان ءِ بگیر ءَ گوں تچکیں دیدانکے ءَ جھد کنگ لوٹ ایت انچوش کہ بلوچ نیشنل موومنٹ چہ پاکستان ءَ پہ بلوچ راجی آجوئی ءَ جھد ءَ اِنت۔

آئی ءَ گْوشتگ پاکستان چیردستیں راجاں پہ وڑے زوراکیانی نشانگ کنگ ءَ اِنت۔پشتون ، بلوچ ءُ سندیانی وس ءُ واک ءِ بھر کنگ ءَ وڑ وڑیں پندل کارمرد کنگ بیتگ۔ ’ڈیورنڈءِلیکار‘ رنگیں لیکار کشگ ءُ مارا بھر کنگ بیتگ۔اے پندلانی بگیری ءَ ما درساں جھد کرتگ ءُ جھد کنگ ءَ ایں۔مارا پہ اے زمزیلانی پْروشگ ءُ وتساچیں لیکارانی کور کنگ ءَ یکشلیں جھد ءُ ھم پتی پکار اِنت۔

’ ما گوں انچیں ریاستے ءَ دیم پہ دیم ایں کہ آ چہ وتی ناشرکاری ءُ مردمی اگبالانی لپاشگ ءَ زانگ بیت۔انچیں بے بند ءُ دودیں ریاستے کہ مارا مردم سرپد نہ بیت ایشی ءِ بگیر ءَ سوبمند بیگ پہ ما ھژدری اِنت پرچا کہ ایشی ءِ چیردستی ءَ مئے ربیدگ، زبان ءُ دومان بیرانی ءِ دیمپانی اَنت۔‘

آئی ءَ گْوشتگ پاکستانی ریاست ءِ ادارہ ماں مئے سیکولر ءُ مڑاھداریں چاگرد ءَ مزھبی تند روی ءَ نپت دیگ ءَ اَنت۔

ڈاکٹر نسیم ءَ وتی گْوشتانک ءِ تہ ءَ چیردستیں راجانی میان ءَ گوں تچکیں دیدانک ءَ ھم پتی ءُ ھمکاری ءِ سر ءَ زور داتگ ءُ گْوشتگ ما لوٹ ایں کہ مئے یکیں دژمن ءِ بگیر ءَ چیردستیں راجانی منزل ھم یک بہ بیت۔

آئی ءَ بی این ایم ءِ ’راجی آجوئی ءِ جھد‘ ءِ دیدانک ءِ سر ءَ درسیں چیردستیں راجاں جھد ءِ لوٹکی دیان ءَ گْوشتگ بی این ایم ءِ دیدانک چہ پاکستان ءَ بلوچ راج ءِ آجوئی اِنت ۔ما لوٹ ایں کہ ما پہ اے مول ءَ یکجاھی ءَ جھد بہ کن ایں –

بلوچستان ءَ گوستگیں بشی ھور ءُ توپان ءَ پد بیرانی درچ اوشت ءِ آماچ نہ بیتگ، توپان ءُ ھوراں نیزوریں لوگانی چھت ءَ دیوالانی کپگ ءَ دگہ دو مردم بیران بیتگ اَنت-

ھور ءُ توپان ءَ بیرانیانی کچ 325 ءَ سر بیتگ اَنت مھکمہ اُستانی ڈیزاسٹر مینجمنٹ اتھارٹی بلوچستان ءَ توپان ءَ چہ جانی ءُ دگہ تاوانانی شنگ کرتگیں رپورٹ ءِ رد ءَ اے بیرانیاں پد بلوچستان ءَ توپانی ھوراں داں انیگ ءَ بیرانیانی کچ 325 ءَ سر بیتگ ءَ زدگ بیتگینانی کچ 186 ءَ سر بیتگ اَنت-

رپورٹ ءِ رد ءَ بلوچستان ءَ توپان ءَ تباہ بیتگیں لوگانی کچ ھپتاد ءُ دو ھزار ءَ گیش اَنت چریشانی تہ ءَ بیست ھزار ءَ گیش لوگ سرجمی ءَ ڈرویتگ اَنت ءُ پنجاہ ءُ دو ھزاراں کمے کساس ءَ تاوان بیتگ-

پی ڈی ایم اے ءِ رپورٹ ءِ رد ءَ اُستان ءَ بشی ھوراں پنچ لک ءِ نزیک ءَ دلوت مرتگ اَنت ءُ دو لک ءَ گیش ایکڑ زمینی کشت ءُ کشاراں تاوان بیتگ توپان ءَ دوھزار ءُ یک سد ءُ نود ءُ ھشت کلو میٹر دگ ءُ بیست ءُ چار پُھل تباہ بیتگ اَنت-

زانگ بہ بیت توپان ءَ بلوچستان ءِ سی ءُ چار ھند اسرمند بیتگ اَنت ءُ اے دمگاں ھور ءَ پد نادراھی ءَ ھم وتی مانشان ایر داتگ اَنت یک ھپتگے ءِ وھد ءَ تپ، دل ءُ لاپ، ملیریا، چم ءُ پوست ءِ انفکیشن، ساہ کشی ءِ نادراھیاں ھوار ھوار دگہ نادراھیانی ھبدہ ھزار کیس رپورٹ بیتگ اَنت-

زانتکارانی گوشگ اِنت اگاں اے نادراھانی انی گر ءُ دار کنگ نہ بیت گڑا سارتی ءِ موسم ءَ بیرانیانی کچ گیش بیت کن اَنت-

بلوچستان ءِ بنجاھی شھر شال ءِ ھند ھزار گنجی ءَ کاونٹر تیررزم ڈیپارٹمنٹ ( سی ٹی ڈی) ءَ چار مردمانی گون ءَ میڑ ءَ جنگ ءِ ٹاہ داتگ-

سی ٹی ڈی ءِ جارکش ءِ نیمگ ءَ شنگ کنگ بیتگیں درشانی ءَ گوشگ بیتگ کہ چیریں ھالے ءِ رد ءَ بیڑ برتگ ءُ چریشی ءَ چار کس کُشتگ اَنت کہ آیانی سیادی ناشریں گل جماعت الاحرار ءَ اِنت-

سی ٹی ڈی ءَ کُشتگیں مردمانی نام پدر نہ کرتگ اَنت، سی ٹی ڈی ءَ گشتگ کہ جرمکارانی گور ءَ بیست ءُ ھپت سیر ہیروئن ءُ سلاہ دزکپتگ اَنت کہ ناشری ءِ شوربندی ءَ کمک ءِ واستا روگ ءَ بیتگ اَنت-

سی ٹی ڈی ءَ گشتگ کہ منشیات کھیپ ٹرک ءِ گون ءَ گلستان ءَ کراچی ءَ برگ ءَ بیتگ اَنت ءُ ٹرک ءِ دارگ ءِ جھد کرتگ بلے جرمکاراں سی ٹی ڈی ءِ کارمندانی سر ءَ تیرگواری کرتگ ءُ چریشی ءَ اے مردم جنگ ءِ میان ءَ کُشگ بیتگ اَنت-

زانگ بہ بیت بیست ءُ ستمبر ءَ ھمے وڑی ءَ ھزدار ءَ سی ٹی ڈی ءَ دو کسانی کُشگ ءِ ٹاہ داتگ ات ءُ گوشتگ ات کہ اے مردمانی سیادی ناشریں گل داعش ءَ اِنت –

سی ٹی ڈی ءِ رد ءَ ھزدار ءَ کُشگ بیتگیں مردمانی تہ ءَ ناشریں گل داعش ءَ بندوکیں مطیع اللہ پنام ءِ بسم اللہ ھوار اِنت کہ پیسر ءَ آئی ءِ رندگیری ءَ بیتگ اِنت-

بلوچ اسٹوڈنٹس ایکشن کمیٹی ءِ چارمی بنجاھی پتر ءِ نیاد ماں شال ءَ گل سرکماش ءِ چیردستی ءَ برجم دارگ بوتگ – نیاد ءَ گل ءِ گوستگیں کار، شرگداری ، گل ءِ نشست ءُ میان استمانی ھندی جاورھالانی سر ءَ تران ءَ پد آؤکین گامگیجانی ایجنڈہ ءَ گل کارانی دیم ءَ برگ ءِ ھاتر ءَ بازیں پیسلہ ءِ زورگ بوتگ – دیوان ءَ اولی ایجنڈہ ءَ سیکٹری جنرل ءَ گل ءِ گوستگیں کار سنٹرل کمیٹی ءِ دیم ءَ پیش کتگ انت ءُ گل ءِ نیمگ ءَ اڈ داتگیں لیٹریچر کمیٹی میڈیا کمیٹی، فناس کمیٹی ءُ لٹریسی کمپئن کمیٹی ءَ ھم وتی کارانی رپورٹ پیش کتگ انت – گل ءَ گوست ءَ بلوچستان ءِ بازیں شھراں ادبی ءُ راجکاری مراگش اڈ داتگ ءُ نوشت میگزین ءِ ھواری ءَ دگہ لٹریچر باسکاں سر کتگ انت اشی ءَ ابید نودربرانی ھکانی ھاتر ءَ جھد ءُ بلوچستان زانت ءِ گھتری ءِ ھاتر ءَ گل ءَ وتی جھد برجاہ داشتگ – ھئور ءُ ھاراں اتکگیں توپان ءِ سوب ءَ ھار آماچیں بلوچ دمگاں بوتگیں تاوانانی پژدر ءَ گل ءِ نیمگ ءَ فلڈ ڈونیشن کمپئین اڈ دیگ بوتگ ءُ بلوچ راج ءِ مدد ءُ کمک ءَ بلوچستان ءِ گیشتریں ھند ءُ دمگاں کمکی مڈیانی سر کنگ ءَ گل سوبمند بوتگ – اشی ءَ ابید درسیں ھنکینانی کار ءُ کرد آھانی گیش تالان کنگے سر ءَ ھم باوست بوتگ – دیوان ءِ دومی ایجنڈہ شرگداری سر ءَ گل کارانی تہ ءَ بوتگیں نزوری ءُ کوتاھیانی سر ءَ ھم باوست بوتگ –

دیوان ءِ سیمی ایجنڈہ تنظیمی امور سر ءَ گل ءِ درسیں جیڑھانی سر ءل باوست کنگ بوتگ ءُ تنظیمی امور ایجنڈہ ءِ سر ءَ گل سر کماش ءَ باوست کنان ءَ گوشتگ کہ بلوچ اسٹوڈنٹس ایکشن کمیٹی بازیں مرحلہ ءَ گوستگ ءُ مروچی یک مھکمیں گل ءِ دروشم ءَ نودربرانی ترجمانی ءَ کنگ ءَ انت – گل ءَ کسانیں وھد ءَ جوانی گون وت ءَ ھنچیں جاہ ءِ سرکتگ کہ آ ناکہ تھنا بلوچ ورنایاں یک پلیٹ فارم ءَ یکجاہ کنگ ءَ انت بلکنہ سرکل ءُ لٹریچر ءِ سوب ءَ نودربرانء راجداری ءُ زانشتی زانت ھم دیگ انت – بلوچ اسٹوڈنٹس ایکشن کمیٹی ءِ سیاسی ءُ علمی زانت دربروکیں باسک بلوچ چاگردے باندات انت ءُ ھمے ورنا وتی سیاسی ءُ علمی زانت ءَ چہ چاگرد ءِ تہ ءَ گھتری کار انت –

آئی ءَ گوشتگ کہ بلوچستان ءَ زانشتی نزام نیستی ءِ ھساب انت بلوچستان یک ھنچین دمگ ءِ داب انت کہ اود ءَ زانت ھر سال پشت ءَ روان انت – ھستیں وھدے تاکتور بلوچستان ءَ زانشتی نزام نیستی ءَ مدامی یک مردمے ءِ سر ءَ لڈ انت بلے بلوچستان ءِ ورنایانی ھاتر ءَ زانت دروازگ پندل ءِ رِد ءَ بند کنگ بوگ ءَ انت – اگان مروچی بلوچستان ءِ زانشجاھانی کچ کساس چارگ بہ بیت گڈا اے وھدی بس لھتے زانشجاہ ھست انت زانت دیم ءَ برگے درچ ءِ برجاہ داشتگ بلے بلوچستان ءِ گیشتریں دمگاں تنی وھدی ڈگری کالج نیست انت – بلوچستان ءِ گیشتریِں دمگاں گیش پرائمری ءَ بگر تاں مڈل وانگجاہ بند انت – اے وڈیں جاوراں زانت ءِ تہ ءَ گیشی آرگے امیت دارگ ءُ زانت دربرگ ءَ ابید بلوچستان ءِ ورنایاں نوکتریں دنیایے بھر جوڈ کنگ واب ءِگندگ انت – ھمے جاورانی گندگ ءَ پد گل ءِ نیمگ ءَ بلوچ لٹریسی کمپئین جار جتگ کہ اولی مرحلہ ءَ بلوچستان ءِ گیشتریں دمگانی وانگجاھانی ریکارڈ یکجاہ کنگ بوتگ انت ءُ پدا ھمے درچ ءِ برجاہ داران ءَ مارا سرجمیں بلوچستان ءَ بلوچ لٹریسی کمپئین درگت ءَ مراگش برجم دارگی انت –

آئی ءَ گوشتگ کہ درسیں ھنکینانی نیمگ ءَ وھد وھد ءِ سر ءَ بلوچستان کتاب کاروان ءِ نام ءَ بک اسٹال جنگ بوتگ کہ اسٹالانی مول سرجمیں بلوچستان ءِ مھلوک ھاسکر بلوچ ورنا تہ کتاب وانگی ماھول جوانتر کنگ بہ بیت – کتاب ءِ وانگ ءَ ناکہ تھنا تو وت ءَ زانے بلکنہ ھر وڈیں چاگرد ءُ راجکاری ءِ بدل کنگے ھاتر ءَ مھلوک ءِ رھشونی ءَ کن انت – ھمے ھاتر ءَ درسیں باسک وت ءَ گون گل ءِ لٹریچر ءَ بندوک بہ کن انت وتی زانت ءِ تہ ءَ گیشی بیار انت وت ءَ گیشتر مھکم بہ کنت انت ءُ بلوچ ورنایانی رھشونی ءَ بہ کن انت – ھمے وڈ زانشتی ءُ لبزانکی مراگش بلوچ چاگرد ءِ تہ ءَ نوکیں باوست ءِ سوب جوڈ بوتگ انت درسیں ھنکیں وتی مرگشانی درچ ءَ ھمے وڈ برجاہ بہ دار انت –

آئی ءَ دیمتر ءَ گوشتگ کہ مئے جھد ھمیش انت کہ بلوچ راج ءِ دیمروئی ءُ آئی ءَ چہ زانت ءَ سر ریچ کنگ پرچاکہ زانت ءُ زانشت ءَ ھمگرنچیں کار مدامی پائدگ دئینت – توپان ءَ پد گل ءِ باسکانی راج ءِ کمک کنگ ءِ جھد ستا کرزیت – گل ءَ کوہ سلیمان،ڈیرہ جات، گرین بیلٹ، ھزدار، نوشکی، لسبیلہ، کلات ءُ مستونگ ءَ کمکی کار برجاہ داشتگ انت بلوچ راج باور کنائینتگ کہ گل ھر وڈیں ازاباں گوں شما ھم کوپگ انت ءُ زانت ءَ سر ریچین مئے ھر کار گوں شما بندوک انت – مارا وتی جھد ھمے وڈ برجاہ دارگی انت –

دیوان ءِ گڈی ایجنڈہ دیمتری کارانی ھاتر ءَ باوست ءَ پد گل ءِ کارانی دیم ءَ برگے ھاتر ءَ نوکتریں پالیسی ارگ بوتگ انت – گل ءِ نیمگ ءَ جار جنگ بوتگیں بلوچ لٹریسی کمپئین کارانی تہ ءَ چدوگیشتری آرگ بہ بیت تاں گڈسر ء- گوستگیں وھد ءَ نوشکی ءُ سوراب ءِ گیر پھالیں ھنکین چیزے وھدے ھاتر ءَ ھلاس کنگ بوتگ انت – گل ءِ سنٹرل کمیٹی ءِ باسک وحید بلوچ ءِ استعفی گیشتریں باسکانی منگ ءَ پد کبول کنگ بوتگ –

شال ءِ دمگ جوائنٹ دگ ءَ گاڑی ءِ سر ءَ ناشناسیں سلاہ بندیں مردمانی تیرگواری ءَ چہ نامداریں ڈاکٹر ءِ سے چُک بیران بوتگ اَنت-

پولیس ءِ رِد ءَ چہ چمن ءَ سیادی داروکیں آرتھوپیڈک ڈاکٹر ناصر اچکزئی ءِ کھول آروسی دیوان ءِ بھر زورگ ءَ پد جوائنٹ دگ ءِ سر ءَ برجاھیں ریلو ءِ ھاؤسنگ سوسائٹی ءَ آیگ ءَ بوتگ اَنت کہ ناشناسیں مردماں لوگ ءِ نزیک ءَ آیانی گاڑی ءِ سر ءَ تیرگواری کتگ ءُ چریشی ءِ آسر ءَ ڈاکٹر ءِ سے چُک ھما دمان ءَ مرتگ اَنت-

وئیل ءَ پد پولیس ھما دمان ءَ سر بوتگ وھدے کہ لاش سول ھسپتال شال ءَ برتگ اَنت- آئی جی پولیس بلوچستان ءَ وئیل ءِ گامگیج زرتگ ءُ ڈی آئی جی ءَ چہ رپورٹ ءِ لوٹ کتگ-

سول سوسائٹی خاران ءِ برجم داشتگیں رخشان یونیورسٹی آف خاران جار ءِ شنگ کنگ ءُ سب کیمپس خاران ءِ جیڑہ ءِ درگت ءَ چہ شھید نواب اکبر بگٹی اسٹیڈیم خاران ءَ چہ مزنیں روانکے کشگ بوتگ-

روانک مزنیں کچے ءَ خاران ءِ جنک ءُ بچکیں نودربرانی ھمراھی ءَ دمگ معدمع، سیاسی ءُ چاگردی گلانی باسک ھوار بوتگ اَنت، روانک خاران ءِ جتائیں شھدگاں جنزان خاران پریس کلب دیم ءَ یک زھرشانی ءِ دروشم ءَ اَتکگ –

خاران ءِ زھرشانی کنوکانی گْوشگ اِنت کہ خاران وانگ لوٹ اِیت مئے چکاں کتاب ءُ ند درکار اِنت، خاران ءَ مروچی بوتگیں زھرشانی ءِ مول ءُ مراد وتی راجی ھساس وانگی ادارہ رکّینگی اَنت اے زھرشانی ءَ ھوار خاران ءِ راج ءَ پدر کتگ کہ خاران ءِ بلوچستان ءِ راج زانت دوست اَنت-

زھرشانی کنوکانی گْوشگ اِنت کہ یونیورسٹی سب کیمپس خاران ءِ آسراتی نہ بوگ ءِ زمہ وار ایچ ای سی ءُ پروجیکٹ ڈائریکٹر سر ءَ داتگ ءُ گْوشتگ کہ ایچ ای سی واھگنداری ءُ مالی بے راھبندی ءِ سبب ءَ چہ مروچی یونیورسٹی سب کیمپس استاداں نندانکجاہ ءُ نودربراں ھاسٹل ءِ آسراتی ءُ دگہ بُنکی آسراتی دیگ نہ بوتگ اَنت تھنا سے پروشت ءُ پروشیں کلاس اَنت-

نودربراں لوٹ کتگ کہ سب کیمپس ءَ نوکیں ڈیپارٹمنٹ جوڑ بہ کن اَنت ءُ نودربراں بُنکی آسراتیانی دیگ ءَ گپ باور بہ کنائین اَنت-

زھرشانی کنوکانی گْوشگ اِنت کہ خاران ءَ وانگی ادارہ گار اَنت اد ءِ نودربر شال، کراچی ءُ پنجاب ءَ روگ ءَ لاچار اَنت بازیں ورنایے دیر ءُ درازیں دمگاں وانگی ھرچ ءُ درچاں اوپار کُت نہ کن اَنت، دمگ ءَ وانگی ادارھاں شر کنگ جاہ ھما کہ وانگی ادارہ ھست اَنت آھاں ھم بند کنگ ءَ اَنت اے پدر اِنت کہ وانگ دُژمنی کرد اَنت-

آیاں گْوشتگ کہ وانگ ءَ چہ بلوچ ءِ دوستی پترت نہ اِنت اے ھما ھب ءُ واھگ اِنت بلوچ ءَ پکری دروشم ءَ وتی تہ ءَ ودی کتگ پرچاکہ مئے مرچگیں ورناہ اے زان اَنت کہ گلامی ءَ ھلاس کنگ ءِ ھاتر ءَ وانگ الّمی اِنت وانگ سر ءَ ھچ وڑ اینگو ءُ آنگو بوت نہ کنت-

زھرشانی کنوکاں لوٹ کتگ کہ رخشان یونیورسٹی آف خاران شور ءُ کرار صوبائی اسمبلی ءَ چہ پاس بوتگ اَنت زوت جار شنگ کنگ بہ بیت زھرشانی کنوکاں گوشتگ لوٹانی منّگ نہ بوگ ءَ خاران نودربر ءُ راج ءَ وتی زھرشانی ءَ دیمتر ءَ جُنزین اَنت-

دو دژمن کارمندانی دزگیری ءُ بالگرد ءِ جنگ ءُ دور دیگے زمّہ واری ءَ منّ ایں – بی ایل اے

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ ھرنائی ءَ دو پوجی کارمندانی دزگیری ءُ پوجی بالگرد ءِ جنگ ءُ دور دیگ ءِ سرجمیں ھال شنگ کتگ ءُ گوشتگ کہ مئے سرمچاراں بی ایل اے ءِ انٹیلیجنس ونگ ءِ چیریں راستیں ھال دیگ ءَ پد شھرگ ءَ آپریشن ءِ کتگ ءُ زورگیریں پوج ءِ یک جونئیر کمیشند ءِ اپسر ءُ چیریں ادارھانی کارمندے دزگیر کتگ انت ءُ ھمے میان ءَ اشکر بروکیں ٹرکانی سر ءَ ھم اُرش کتگ وھدیکہ اے پوجیانی یل کنائینگے ھاتر ءَ سربوتگیں پاکستانی پوج ءِ گوم جنگ ءَ سرمچاراں دژمن پوج ءِ بالگرد ءِ ھم جتگ ءُ چگل داتگ کہ آئی ءَ سواریں ششیں کارمند مرتگ انت –

بی ایل اے ءِ جارکش ءَ گوشتگ کہ مئے سرمچاراں گوستگیں شپ ءَ ھرنائی ءِ دمگ شھرگ زرد آلو ءِ ھند ءَ بنجاھی شھدگ بستگ ءُ پاکستانی پوج ءِ یک جونئیر کمیشند ءِ اپسر ءُ چیریں ادارھانی کارمندے دزگیر کتگ انت، کہ آھانی تہ ءَ ایف سی 114 ونگ ءِ لورلاءی اسکاؤٹ ءِ کمک سوبیدار کلیم اللہ ءُ چیریں ادارھانی کارمند محمد فیصل جھمنند قصور پنجاپ ھوار انت اے ھردو کارمند جنگی کتکاریانی تہ ءَ ھوار انت کہ آھاں بلوچ ورنا آوار جتگ ءُ آھانی سر ءَ زوراکی کتگ –

جارکش ءَ گوشتگ کہ اے ھردو کارمند بلوچ لبریشن آرمی ءِ گور انت ءُ آھاں جست پرس کنگ بوگ ءَ انت – جست پُرس ءَ پد آ بلوچ راجی آمیدگس ءَ پیش کنگ بنت کہ ھمودا آھانی کسمت ءِ پیسلہ کنگ بیت اِنت ءُ ھر پیسلہ ءِ کنگ بیت پدا آ رسانکدراں دیگ بیت اِنت –

جارکش جئیند بلوچ ءَ دیمتر ءَ گوشتگ کہ گوستگیں شپ ءَ شھدگ ءِ بندگ ءِ میان ءَ بلوچ سرمچاراں بلوچ راجی مڈیانی لٹ پُل ءَ ھواریں چار ٹرکانی سر ءَ ھم اُرش کُتگ اے ٹرک چہ اشکر ءَ پُر بوتگ، بلے پدا ھم سرمچاراں ٹرکانی ڈرائیور مکن کتگ ءُ پدا یل داتگ انت –

جارکش ءَ گوشتگ کہ کارمندانء دزگیری ءَ پد زورگیریں پوج ءَ اے دمگ ءَ پوجی ٹولی دیم داتگ ءُ ریسکیو آپریشن بندات کتگ ءُ بازیں جاھے ءَ پوجی کارمند ایرگجگ بوتگ انت آھاں برزی کمک ھم گون بوتگ – بلے سرمچاراں جونیں جنگی رپک ءُ ھنراں گوں اے کارمندانی سر ءَ اُرش کتگ ءُ دیم آیگ ءَ نہ اشتگ انت ءُ وت وش ءُ سلامتی بندیگانی ھمراھائی ءَ اوتاگ ءَ سر بوتگ انت – ھمے میان ءَ سرمچاراں دژمن ءِ جنگی بالگرد ءِ سر ءَ راکٹ لانچر ءُ دور جنگیں سلاھاں گوں اُرش کتگ جتگ ءُ چگل داتگ کہ چریشی ءَ دژمن پوج ءِ شش کارمند مُرتگ انت کہ آھانی تہ ءَ میجر خرم، میجر منیب، نائیک جلیل، گنر شعیب، صوبیدار عبدالوحید، ھوالدار محمد عمران ھوار انت –

جارکش ءَ گڈسر ءَ وتی درشان ءِ تہ ءَ گوشتگ کہ بلوچ لبریشن آرمی اے اُرش ءَ پوجی کارمندانی دزگیری ءِ زمّہ واری ءَ منّیت ءُ ھمے کول ءَ کنت کہ بلوچ راجی آجوئی ءِ جنگ ءَ بلوچستان ءِ آجوئی ءَ ترندی ءَ گوں برجاہ داریت ءُ بلوچستان ءَ جنگی کتکاریاں ھواریں زورگیریں پوج ءِ کارمنداں شزا دنت –

شال ءِ پریس کلب ءِ دیم ءَ برجاھیں بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی ءَ چار ھزار ءُ ھپسد ءُ ھپتاد ءُ دو روچ سرجم بوتگ انت – کلمکار آغا گل، علی بلوچ ءَ ھوار دگہ جنین ءُ مردیناں بنجل ءَ اتکگ ءُ دلپدردی درشان اتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچ راج پاکستان ءِ زلم زوراکیانی دیم ءَ اُوشتاتگ –

ماما قدیر بلوچ ءَ گوشتگ کہ وھدیکہ جونانی کپگ ءِ درچ بندات بوتگ گڈا ترس زھری ءِ تہ ءَ مٹ بوتگ پرچاکہ زھرے ھم سیمسرے بیت اِنت ھمیچو زھر گیش بیت مرگ ءِ ترس کمتر بوان بیت وھدیکہ زھر وتی سیمسراں سرگوز کنان کنت گڈا املے نیمگ ءَ روان کنت اے وھدی بلوچ چاگرد ءِ تہ ءَ ھما مردم دژمن ءِ سر ءَ گیشتر زھر انت آ گیشتر امل کنت –