TBP Balochi

بلوچستان ءَ دو روچانی تہ ءَ دو دمگاں ڈینگی ءِ دگہ 64 کیس رپورٹ بیتگ اَنت-

بلوچستان ءِ جانسلامتی ءِ گر ءُ دار کنوک ءِ رد ءَ اُستان ءِ دو دمگاں کیچ ءَ 49 ءُ گوادر ءَ15 کیس رپورٹ بیتگ اَنت چریشی ءَ پد اُستان ءَ یک ھپتگے ءِ تہ ءَ یک سد ءُ نود ءُ یک مردم ڈینگی آماچ بیتگ اَنت رپورٹ ءِ رد ءَ اُستان ءَ داں انگت ءَ ڈینگی ءَ گپتگیں مردمانی کچ سَے ھزار ءُ سَے سد ءُ ھشتاد ءُ نُھ ءَ سر بیتگ اَنت-

بلوچستان ءَ موسم ءِ بدل بیگ ءَ ھور ءُ توپاناں پد جانسلامتی ءِ ناگیگیں جاوراں ایر داتگ ھوراں ودی بیتگیں جتا جتائیں نادراھیاں بلوچستان وتی ارجان جتگ-

ھور ءُ توپاناں بلوچستان ءِ سی ءُ پنج دمگ اسرمند بیتگ اَنت ھور ءُ توپان ءَ سَے سد ءُ بیست ءُ سَے مردم بیران بیتگ اَنت اے اسرمندیں جاھاں نادراھی ءَ وتی لپیٹ ءَ زرتگ ءُ یک ھپتگے ءِ تہ ءَ ڈینگی، تپ، دل ءُ لاپ، ملیریا، چم ءُ جان ءِ پوستانی لِڑگ، ساہ کشی نادراھیان ھوار ھوار سی ءُ ھشت ھزار کیس رپورٹ بیتگ اَنت-

اُستان ءَ توپان ءَ تباہ بیتگیں لوگانی کچ ھپتاد ءُ دوھزار ءَ سر بیتگ اَنت کہ اشانی بیست ھزار ءِ کچ ءَ لوگ سرجمی ءَ کپتگ اَنت پنجاہ ءُ دوھزار لوگاں کمے کمے تاوانباری بیتگ اَنت-

بلوچستان ءَ گوستگیں ابرمی کھراں جانسلامتی ءِ بنجل ھم تباھی ءِ دیمپان بیتگ اَنت چریشی ءِ سبب ءَ دار ءُ درمان ءَ ھم مشکل ودی بیتگ اَنت-

بلوچستان ءَ یک ماھے ءِ وھد ءَ ھور ءُ توپاناں ھپت سد ءَ گیش جانسلامتی ءِ بنجل ءُ رول ھیلتھ سینٹرزاں تاوان بیتگ مھکمہ ءِ سھت ءِ نیمگ ءَ شنگ کنگ بیتگیں ماڑیانی تاوانی رپورٹ شنگ بیتگ انت چریشاں لھتے کامردی ءِ وڑ ءَ نہ اَنت چریشی ءِ سبب ءَ بلوچستان ءِ بیست ءُ شش جاھاں توپان ءَ جانسلامتی ءِ کار داشتگ اَنت-

گوستگیں ھوراں بلوچستان بے کساس ناگیگی ءِ دیمپان بیتگ ءُ سرکار ءُ آئی ءِ ادارہ اشانی سرجم کنگ ءَ بے سوب بیتگ اَنت ءُ بلوچستان ءَ دگہ جاھاں ھوار گیجوکیں دگ ءُ ریک پٹی سرجمی ءَ پرشت ءُ پروشی ءِ دیمپان بیتگ اَنت-

بلوچ نودربراں وتی ھکانی واستا زھرشانی کنان ءَ نندانک جتگ ءُ نیشتگ اَنت-

اسلامیہ یونیورسٹی بھاولپور پنجاب ءَ وانوکیں بلوچ نودربراں جامعہ انتزامیہ ءِ نیمگ ءَ بددھانی، آسراتی ءِ نہ بوگ ءِ ھلاپ ءَ زھرشانی کتگ – نودربراں جامعہ ءِ مزنیں گیٹ ءِ دیم ءَ زھرشانی نندانک جتگ ءُ نیشتگ اَنت اود ءَ دگہ شھری نودربر ھم ھوار بیتگ اَنت-

زھرشانی کنوکیں نودربرانی گوشگ اِنت جامعہ اسلامیہ یونیورسٹی بھاولپور ءَ دور ءُ دراں اتکگیں نودربراں ترندیں جیڑھانی دیمپانی اِنت ھاسٹلز ءِ کمی ءُ جامعہ انتزامیہ ءِ نیمگ ءَ بلوچ نودربراں چمچاری ءِ دیمپانی کنگ بیگ ءَ اَنت ءُ چریشی ءِ ھلاپ ءَ نودربراں زھرشانی نندانک جتگ ءُ نیشتگ اَنت-

بلوچ نودربرانی رد ءَ جامعہ ءِ نیمگ ءَ سال دوھزار ءُ سیزدہ ءَ برجاھیں بلوچستان ءِ نودربرانی ریزروسیٹو ءِ ھلاس کنگ نودربراں زر لوٹگ ءَ اَنت چوشکہ بلوچ نودربرانی گون ءَ یک مزنیں نا انساپی یے جامعہ انتزامیہ بلوچستان ءَ اتکگیں نودربراں تریسنگ ءُ آیاں ٹک ءُ نشان چنگ اِنت –

زھرشانی کنوکاں لوٹ کرتگ کہ یونیورسٹی بھاولپور بلوچ نودربرانی واستا ریزورسیٹاں بہ دنت ءُ بلوچ نودربراں ٹک ءُ نشان چنگ ءَ بند بہ کنت-

زھرشانی کنوکاں دیمتر ءَ گوشتگ بلوچستان ءَ وانگی نزام نیست ءُ نابود اِنت بلوچ نودربر لاچار اَنت کہ پنجاپ ءَ وانگی ادارھاں وت ءَ بہ رسین اَنت دانکہ وتی وانگ ءَ سرجم کت بہ کن اَنت بلوچ نودربراں وانگی تکاں زمین تنک آرگ بیتگ-

زھرشانی کنوکاں گوشتگ سرجمیں پنجاپ ءَ دگہ اُستاناں اتکگیں نودربرانی گون ءَ ناوشین رویش اوپار کنگ نہ بنت انتزامیہ وتی رویشاں گھتر بہ کنت نودربرانی ٹک ءُ نشان چنگ ءَ بند بہ کنت ءُ وتی ھکانی واستا زھرشانی گیش کنگ بیت اِنت-

بلوچ لبریشن آرمی ءِ نیمگ ءَ شنگ کنگ بیتگیں یک کسانیں درشانے ءَ ھرنائی ءِ دمگ شاھرگ زرد آلو ءَ پوجی کارندھانی آوار جنگ ءُ ھیلی کاپٹر ءِ زمہ وار من اتگ اَنت-

بلوچ لبریشن آرمی ءِ جارکش جیئند بلوچ ءَ ناشناسیں جاھے ءَ وتی شنگ کرتگیں درشان ءَ گوشتگ گوستگیں شپ ءَ ھرنائی ءِ دمگ زردالو ءِ نزیک ءَ چیریں ھالے ءِ رد ءَ بیڑ برتگ ءُ پاکستانی پوج ءِ دو کارندہ دزگیر کرتگ ءُ برتگ اَنت-

جارکش ءَ گوشتگ چریشی ءَ پد پاکستانی پوج ءِ ھیلی کاپٹر دمگ ءَ سر بیتگ اَنت ءُ اے جاہ ءَ چہ پنچ کیلو میٹر ءِ دوری ءَ ھوست ءَ ھیلی کاپٹر ءِ جتگ ءَ دور داتگ ءُ چریشی ءَ ھیلی کاپٹر ءَ سواریں دو پائلٹاں ھوار شش کارندہ مرتگ اَنت-

گل ءِ نیمگ ءَ شنگ کرتگیں درشان ءَ گوشگ بیتگ کہ سرجمیں درشان کمے وھد ءَ پد شنگ ءُ تالان کنگ بیت اِنت-

زانگ بہ بیت چد ءُ پیسع ھم بی ایل اے ءَ ھمے وڑیں بیڑے ءَ کرنل لئیق بیگ ءُ آئی ءِ ناکوزتک عمر جاوید اوار جتگ ات اَنت ءُ پد ءَ آیانی جون جتا جتائیں جاھاں دزکپتگ ات اَنت-

بلوچستان ءِ دمگ ھرنائی ءَ سلاہ بندیں مردماں سرکاری کارندہ دزگیر کرتگ ءُ وتی ھمراھی ءَ برتگ اَنت-

ٹی بی پی ءَ سر بیتگیں ھالانی رد ءَ گوستگیں شپ ءَ سلاہ بندیں مردمانی بازیں کچے ءَ شاھرگ ءِ ھند زرد آلو ءَ بنجاھی شھدگ بستگ ءُ گاڑیانی پَٹ ءُ پول بندات کرتگ ءُ ھمے وھد ءَ سلاہ بندیں مردماں اشکر بروکیں گاڑی ھم نشانگ کتگ اَنت-

دمگی مردمانی رد ءَ سلاہ بنداں سرکاری کارندہ پجار کرتگ ءُ دزگیر کتگ اَنت ءُ پد ءَ وتی ھمراھی ءَ برتگ اَنت-

وئیل ءَ پد پاکستانی پوج ءِ نیمگ ءَ لشکر کشی بندات کنگ بیتگ گوستگیں شپ ءَ چہ دمگ ءَ ھیلی کاپٹرانی آیگ بندات اِنت ءُ بازیں جاھاں جنگ ءُ چوپانی ھال اِنت-

لشکر کشی ءِ وھد ءَ ھیلی کاپٹرے ءِ کپگ ء ھم ھال اِنت بلے تنی وھدی اشی ءِ راستریں ھال سر نہ بوتگ اَنت-

وئیل ءِ بارو ءَ واکداراں تنی وھدی دگہ گپ دین ءُ نیارورتگ اَنت ناکہ دزگیر کرتگیں کارندھانی زمہ واری کسے ءَ پہ وت ءَزرتگ اَنت-

ھمے وڑیں یک وئیلے بلوچستان ءِ شھر زیارت ءَ ھمے سال ءِ جولائی ءَ پیش اتکگ اَت کہ اود ءَ سیزدہ ءُ چاردہ جولائی ءِ میانی شپ ءَ ڈی ایچ اے شال ءِ سینیئع آفسر لیفٹیننٹ کرنل لئیق بیگ مرزا ءُ آئی ءِ ناکو زھگ عمر جاوید سلاہ بنداں دزگیر کنگ ءَ پد گوں وت برتگ ات اَنت-

وئیل ءَ پد پوج ءَ بازیں کچے ءَ بیڑ برتگ ات ءُ لشکر کشی بندات کتگ ات بلے گپتگیں ھردوکیں کسانی یلکنائینگ ءَ بے سوب بیتگ ات پد ءَ جتا جتائیں وھداں ھردوکانی لاش دزکپتگ ات اَنت-

آ ھردوکیں مردمانی برگ ءِ زمہ واری بلوچستان ءَ پرکاریں بلوچ آجوئی دوستیں سلاہ بندیں گل بلوچ لبریشن آرمی ءَ من اتگ اَت – گل ءِ جارکش ءَ گوشتگ اَت کرنل لئیق جرمانی پژدر ءَ بلوچ راجی آمیدگس ءَ مرگ ءِ سزا داتگ ءُ چریشی ءِ سر ءَ زوت ءَ چہ زوت گامگیج زرتگ ءُ سرجم کرتگ-

چہ بلوچ اسٹوڈنٹس آرگنائزیشن ءِ نیمگ ءَ ھانی بلوچ ءِ اولی سالروچ ءَ درگت ءَ بی ایس او ءِ جتائیں زونز ءَ پُرسی دیوان برجم دارگ بوتگ ءُ آشوبی شئیر ءُ سوت جتگ ءُ آ سھرچکیں دروت ندر کتگ ءُ مومبتی روک کتگ-

سیکرٹری ھال دیوک بی ایس او ءَ درشان شنگ کتگ ءُ گْوشتگ کہ ھانی بلوچ ءَ گوستگیں سال ءَ میڈیکل نودربر تھریک جوانیں کرد پیلو کتگ اولی سرپ ءَ اوشتاتگ ءُ نودربرانی راھشونی کتگ ءُ گوں دلیری ءَ جُھد ئِے کتگ – 24 ستمبر 2021 ءَ اناگتیں دروشم ءَ آ بیران بوتگ کہ بی ایس او ءَ ھوار بلوچ راج ءِ واستا یک درد ءُ گم سبب جوڑ بوتگ بلے داں گڈی ساہ ءَ بے مسال ءُ بے بھائیں جُھد ءُ گھگیری بی ایس او ءِ سنگتانی واستا یک دْرچتگیں راھے-

آئی ءَ گْوشتگ کہ سنگت ھانی بلوچ بے بھائیں جُھد کتگ وتی گھگیری ءِ زندمان ءَ چہ مارا اے کلوہ سبک داتگ کہ مارا جد ءُ جُھد نیمگ ءَ جُنزگ ءِ ھاتر بے ھساب دیمونی دیگ لوٹ اِیت، ءُ اے جد ءُ جُھد ءَ مارا وتی کھول ءَ بگر ریاست ءُ چاگرد ءَ بگر زورگری ءِ بگیری ءَ ھم دلبند کن کنگ لوٹ اِیت-

اشی ءِ ھمراھی ءَ مارا وت ءَ مھکم کنگ لوٹ اِیت ءُ وتی زات ءَ چہ یکشلہ یکر بوگ جد ءُ جھد اھمیت دیگ لوٹ اِیت ءُ مئے سر ءَ ایر کتگیں بندیش یکر کنگی اَنت ءُ یک نوکیں زندمانی گچین کگ لوٹ اِیت کہ دیم ءَ روگ ءَ یک آجو راج ءُ چاگرد ءِ بُنھشت ءَ ایر کن ایں-

درشان تہ ءَ گْوشگ بوتگ کہ ھُزدار ، مستونگ ،ھب اوتھل، شال، کوھلو ءَ ھوار بی ایس او ءِ سرجمیں زونز ءَ شھید ھانی بلوچ ءِ یات ءَ پُرسی دیوان برجم دارگ بوتگ، آشوبی سوت گوشگ بوتگ ءُ مومبتی روک کنگ بوتگ-

بی ایس او ءِ باسکانی تہ ءَ بنجاھی سکریٹری اطلاعات بالاچ قادر ءِ سروکی ءَ بلوچستان اکیڈمی کیچ ءِ تر ءُ تاب کرتگ ءَ چیئرمین بلوچستان اکیڈمی ڈاکٹر غفور شاد ءُ وائس چیئرمین عارف عزیز ءَ گوں گند ءُ نند کرتگ-

باسکانی تہ ءَ گل ءِ بنجاھی پتر ءِ باسک کریم شمبے، تربت ھنکین ءِ سروک کرم خان بلوچ، جونئیر نائب سروک شے مزار، جوائنٹ سیکریٹری کینگی ندیم، جونئیر جوائنٹ سیکریٹری اھمد حبیب ءَ ھوار لا کالج ءُ عطا شادڈگری کالج ءِ زمہ وار ھوار بیتگ اَنت گل ءِ باسکاں بلوچستان اکیڈمی ءِ نوک گچین بیتگیں پتر ءَ را مراد باتی گشتگ-

ھمے وھد ءَ ڈاکٹر غفور شاد ءَ بی ایس او ءِ باسک بلوچستان اکیڈمی ءَ وش اھت کتگ انت ءُ گوشتگ کہ بلوچی ءُ براھوئی زبان ءُ ادبی کارانی دیمروئی ءِ واستا آیاں سائمٹفک ءِ دروشم ءَ دیم ءَ برگ ءَ اکیڈمی ءَ ھروھد ءَ جھد ءُ جھد کرتگ-

آئی ءَ گوشتگ کہ ھمے زوتاں ماتی زھانانی دیمروئی ءِ مجلس ءِ دیم ءَ آرگ بیتگ آئی ءِ مول ءُ مراد ماتی زبان ءِ سبب ءَ آیاں وانگ ءُ آیاں سرکاری دلگوش دیگ ءِ جد ءُ جھد کنگی اِنت – بلوچی، براھوئی ءَ ھوار دگہ ماتی زبانانی بارو ءَ جوانیں شور ءُ سوڑگ ءُ وانگجاھاں سرجم کنگ ءِ اژدری اِنت-

آئی ءَ گوشتگ کہ دنیا ءِ توک ءَ بے کچ ءَ اے وڑیں زبان ھست اَنت نا دلگوشی ءِ آماچ بیتگ ءُ آ چہ بنچک ءَ ھلاس بیتگ اَنت- میان اُستمانی ھواریں ادارہ یونیسکو ءِ یک رپورٹے ءِ رد ءَ براھوئی ھم ھما زبانانی تہ ءَ ھوار اِنت آیاں آیوکیں باندات ءَ ھلاسی ءِ ترس اِنت بلوچی ءُ براھوئی کوھنتریں زبانان چہ ھواریں زبان اَنت ءُ اے جاور چارگ لوٹ اَنت ءُ آیانی دیمروئی ءِ واستا جوانیں گامگیج زوراگی اَنت –

آئی ءَ گوشتگ کہ بی ایس او ءِ آئین ءَ مادری زبانانی دیمروئی ءِ واستا زور داتگ براھوئی، بلوچی ءَ ھوار دگہ مادری زبانانی واستا سرکاری تکاں یکشل ءَ نادلگوشی ءِ آماچ بیتگ اَنت اے جوانیں جد ءُ جھد ءَ بلوچ اسکالرز، استاد، اکیڈمیز ءُ ادبی مردماں اوشتگ لوٹ ایت-

آئی ءَ گوشتگ کہ بلوچستان اکیڈمی تربت ءِ ھزمت دلجمی ءَ ستاشانی اَنت زبان ءُ لبزانک ءَ ھوار دگہ پھناتاں کار کنگ ءَ اکیڈمی ءَ ھروھد ءَ جوانیں کرد پیلو کرتگ اَنت اکیڈمی چاگرد ءِ شپانی رژنائیں روچ اِنت سرکار ءَ بلوچستان اکیڈمی ءَ ھوار دگہ لبزانکی جاھانی واستا زری کمک کنگی اِنت-

بلوچستان ءِ جتا جتائیں جاھاں پیش اتکگیں وئیلاں زالبولے ءَ ھوار دو مردم بیران بیتگ اَنت-

گیشیں ھالانی رد ءَ بلوچستان ءِ دمگ دکی ءَ مرد ءَ تیرگواری کرتگ ءُ زال بیران بیتگ – لیویز بنشون ءِ رد ءَ لونی ءِ ھند ءَ کلی کاریز ءَ روز الدین ءَ تیرگواری کرتگ ءُ وتی زال کُشتگ ءُ وت تتکگ –

زالبول ءِ زھگ ءِ لاش سول ھسپال ءَ برتگ ءُ وت تتکگ، وئیل لوگی جیڑھے ءِ سر ءَ پیش اتکگ-

دومی وئیل شال ءَ روکپتی شھدگ ءَ ڈمپر ءِ ٹکر جنگ ءَ ورنائیں قاسم ء پیرجان بیران بیتگ ءُ لاش ھسپتال ءَ برگ بیتگ ءُ اود ءَ اژدری چار ءُ ٹپاس ءَ پد کھول ءِ ھوالگ ءَ کنگ بیتگ-