TBP Balochi

سندھ ءِ مزن شھر کراچی ءَ تیرگواری ءِ یک وئیلے ءَ یک چینی ءِ بیران دو زدگ بیتگ اَنت –

تیرگواری ءِ وئیل کراچی ءِ دمگ صدر ءَ ایمپریس مارکیٹ ءَ پیش اتکگ دمگی ھالانی تہ ءَ تیرگواری ءِ وئیل ڈینٹل کلینک ءِ سر ءَ کنگ بیتگ-

بیران بیتگینانی تہ ءَ چینی جھمنند ءِ پجار سی ءُ دس سالی ئیں رولنڈ رائمنڈ چاؤ ء جارج چاؤ ءِ نام ءَ زانگ بیتگ زدگ بیتگینانی تہ ءَ ریچڈ ءَ مارگریڈ نامیں زالبول ھوار اَنت-

وئیل ءَ پد پولیس بازیں کچے ءَ سر بیتگ –

لاش پوسٹ مارٹم ءِ واستا ھسپتال ءَ برگ بیتگ اَنت ءُ زدگ بیتگیں ھم درمانی ءَ ھسپتال ءَ سر کنگ بیتگ اَنت-

وئیل ءِ بارو ءَ دگہ گیشیں سرپدی انگت نہ بیتگ اَنت نانکہ دگہ کسے ءَ اشی ءِ زمہ واری زرتگ-

چریشی ءَ پیسر چینی شھری بلوچ آجوئی لوٹوکیں گلاں نشانگ کتگ اَنت بلے تنی وھدی اشی ءِ بارو ءَ ھچ گپ دیم ءَ نیتکگ اَنت-

سری لنکا ءَ گژن ءِ سبب ءَ بے ھوش بیتگیں اسکول ءِ زاھگانی گپانی دیم ءَ آیگ ءَ پد سرکار ءَ سرکاری باسک چاگردی تامجاھاں لیکہ درشان کنگ ءَ بندش جتگ-

ھبررساں ادارہ اے ایف پی ءِ رد ءَ سری لنکا ءِ وزارت برائے پبلک ایڈمنسٹریشن ءُ مینجمنٹ ءَ ڈیھ ءَ پانزدہ لک کارندھاں پرمان کتگ چاگردی ترمجاھاں وتی وتی ھیال ءُ لیکھاں درشان مہ کن ات-

اے گپ ھم دلگوش کرزیں گپے کہ سری لنکا ءِ سرکار ءَ سرکاری باسکاناں گوں اھوالکاراں تران کنگ ءِ سر ءَ بندش جتگ-

وزارت ءِ نیمگ ءَ شنگ بیتگیں پرمان نامہ ءَ گوشگ بیتگ ’ سرکاری آفسراں چاگردی ترامجاھاں ھال ءِ شنگ کنگ جرمے بروبری ءَ بیت اِنت ءُ اشی ءِ ھلاپ ءَ مزنیں بیڑ برگ بنت‘-

وزارت ءِ اے پرمان نامہ مھکمہ سھت ءِ اُستان ءِ باسک ءُ استادانی درشان ءَ پد شنگ کتگ چریشی ءَ آئی ءَ ٹاپار جتگ کہ وردنی ءِ نہ بوگ ءَ بازیں کچے ءَ نودربر وانگجاھانی تہ ءَ بے ھوش بوگ ءَ اَنت-

وزیر سھت ھیلیا رامبوک ویلا ءَ اے گپ رد کرتگ اَنت ءُ سھت ءِ باسکانی سر ءَ اے بھتامی گوشتگ آ پہ زانت ءَ اے جیڑاہ ءَ گیش کنگ ءَ اَنت-

زانگ بہ بیت میان اُستمان ءِ ورلٍ فوڈ پروگرام ءَ آئی ءَ وتی درشان ءَ گوشتگ کہ شست لک سری لنکن شھری چوشکہ یک نیمی آبادی وردنی ءِ کمی ءِ دیمپان اَنت ءُ انسانی بنچکی ءَ کمک ءِ اژدری اِنت-

سال دوھزار ءُ بیست ءُ یک ءِ گڈسر ءَ سری لنکا دو کروڈ ءُ بیست لک ءِ آبادی ناوشیں ڈکالی زرکاری ءِ دیمپان بیتگ ات-

مھتر رانیل وکرما سنگھے ءَ سرکار ءِ بگیرداری ءَ بیتگیں زھرشانیاں کریک ڈاؤن کتگ ءأ بنجاھی شھر کولمبو ءَ زھرشانی ءِ سر ءَ بندش جتگ ات-

ھمے ماہ ءَ سری لنکا ءِ سرکار ءُ میان اُستمانی کمکی زرکار (آئی ایم ایف) ءِ میان ءَ 2.9 ارب ڈالر مالہ کمک ءِ پیکچ ءِ ڈیل کتگ ات-

سری لنکا ءِ زرکاری ءِ گر ءُ دار کنوکیں دھنگان ءِ گون ءَ منگ ءِ سر ءَ اگاں 51 ارب ڈالر ءِ وامانی درچ ءَ بہ رویں گڑا سری لنکا ءَ درستاں گیشتر وام دیوکیں ڈیھ چین ءَ گیش وام دیگ ءِ گپ جتگ بلے گوستگیں وامانی گپ نہ بیتگ-

میان اُستمان ءِ سیکریٹری جنرل انتو نیو گوتریس ءَ ایرانی سرعک ابراھیم رئیسی ءَ چہ زھرشانی کنوکانی ھلاپ ءَ ناروائیں زورانی کارمرد نہ کنگ ءِ لوٹ کرتگ-

ھبر رساں ادارہ اے ایف پی ءِ رد ءَ سیکریٹری جنرل ءِ جارکش ءِ نیمگ ےَ شنگ بیتگیں بیان ءَ گوشگ بیتگ گوستگیں دو نیمگی گند ءُ ننداں انتونیوگوتریس ءَ سروک ابراھیم رئیسی ءَ گوں انسانی ھکانی آجوئی ءِ درشان کنگ ءِ شرپ ءِ سر ءَ زور داتگ-

درشان ءَ گوشگ بیتگ زھرشانی ءِ وھد ءَ زالبول ءُ زھگانی گیش کپوکیں بیرانی سر ءَ مارا پدر اِنت-

زانگ بہ بیت سیزدہ ستمبر ءَ ایرانی پولیس ءَ بیست ءُ دو سالی -یں کرد ایرانی جنک مھسا امینی برکہ ءِ سر ءَ نہ کنگ ءُ مودانی ڈن ءَ کنگ ءِ پژدر ءَ دزگیر کرتگ اَت-

چریشی ءَ پد مھسا پولیس ءِ دزگیری جاہ ءَ پد نادراہ جاہ ءَ تھتیگ بیتگ ات ءُ پد ءَ آئی ءَ شانزدہ دسمبر ءَ ساہ داتگ ات اَنت ءُ چرے مرگ ءَ پد ایران ءَ نہ کُٹوکیں زھرشانی یے بندات بیتگ ات –

ایران ءِ زھرشانی ڈیھ ءِ سرجمیں پھناتاں سر بیتگ ءُ اے زھرشانیانی تہ ءَ تنی وھدی بازیں ھسابے ءَ زالبول ءُ زھگاں ھوار مردین بیران بیتگ اَنت-

میان اُستمان ءِ جنرل سیکریٹری انتونیوگوتریس ءَ ایرانی سیکورٹی پولیس ءُ دگہ ادارھاں گوں ھم دزبندی کتگ کہ آ گیر ناروائیں زوراکیانی کارمرد کنگ ءَ وتی دستاں بہ دار ایت-

سیکریٹری جنرل ءَ مھسا امینی ءِ بیرانی ءِ سر ءَ تچکیں پٹ ءُ پول کنگ ءِ دزبندی ھم کتگ-

زانگ بہ بیت دوشمبے ءِ روچ ءَ ایرانی سروک ابراھیم رئیسی ءَ گوشتگ ات کہ مھسا امینی ءِ بیرانی ءَ پد بندات بیتگیں زھرشانیانی ھلاس کنگ ءَ ترندین گامگیج زورگ ءِ پیسلہ کرتگ ات –

مھتر ابراھیم رئیسی ءَ گوشتگ ات ’ ڈیھ ءَ سکیورٹی ءُ جاورانی ھراب کنوکانی ھلاپ ءُ مزنیں گامگیج زورگ ءَ پد ھلاسی بنت‘-

سَے شمبے ءِ روچ ءَ میانی اُستمانی انسانی ھکانی گل ایمنسٹی انٹرنیشنل ءَ گوشتگ ات کہ ایران ءَ سکیورٹی پورسز ءِ نیمگ ءَ لَٹ ءُ کُٹی گندگ بیتگ اَنت ءُ بیران بیتگیں زھرشانی کنوکانی کچ سرکاری ٹی وی ءِ رپورٹ ءَ باز گیش اَنت-

ایمنسٹی انٹرنیشنل ءِ رد ءَ ایرانی واکدار انسانی ھکانی لگتمالی ءِ پژدر ءَ وتی کرتگیناں چیر دیگ ءَ سرجمی ءَ یک رپک ءُ ھنُرے ءَ کنگ ءَ اِنت-

حب چوکی ءَ بیگواھ بوتگیں جنین ءُ چُک چہ کوھلو ءَ آجو بیتگ اَنت، بیگواہ کنوک دزگیر کنگ بیتگ اَنت-

سربوتگیں ھالانی رِد ءَ بلوچستان ءِ دمگ کوھلو ءَ لیویز فورس ءَ بیڑبرتگ ءُ چہ حب ءَ آوار جنگ بیتگیں زالبول ءُ دو چُک آجو کنائینتگ اَنت-

کوھلو واکدارانی رِد ءَ لیویز کیو آر ایف ءَ چیریں ھالانی سر ءَ تھسیل ماوند ءَ بیڑبرتگ ءُ چہ حب چوکی ءَ آوار جنگ بوتگیں زالبول (س) دو چُکاں ھوار صفیہ بی بی ءُ عبدالخان ءِ ھمراھی ءَ یل کنائینتگ اَنت، بیڑ ءِ وھد ءَ لیویز فورس فاروق نامیں بیگواہ کنوک ھم دزگیر کتگ-

کوھلو واکدارانی رِد ءَ زالبول ءُ چک پھازیتگیں جاھے ءَ برتگ اَنت دمگدار وئیلے درگت ءَ چہ جرمکار ءَ گیشیں پٹ ءُ پول کنگ ءَ اِنت-

پنجاپ ءِ شھر بھاولپور ءَ اسلامیہ یونیورسٹی ءَ وانوکیں بلوچ نودربرانی ھک ءِ واستا زھرشانی نندانک ءَ دو روچ سرجم بیتگ لوٹانی سرجمی ءَ داں جامعہ ءِ بنجاھی گیٹ ءِ دیم ءَ نندانک جنگ بیت اِنت-

زھرشانی بنجل ءَ جاڑیگیں نودربراں اھوالکاراں گوں گپ کنان ءَ گوشتگ بلوچستان ءِ بازیں نشستانی سر ءَ فیس ءِ تلب، ھاسٹل ءِ آسراتی، انتزامیہ ءِ وتمانی، نودربرانی ترسینگ ءُ ٹک ءُ نشان کنگ ءِ ھلاپ ءَ مئے نندانک ءَ دو روچ سرجم بیتگ اے درگت ءَ مارا چہ اھوالکاراں باز دلرنجی ھست اِنت شما وتی اھوالکاری ءُ جرنلزم ءِ وتمانی ءَ گوستگ اِت زھرشانی ءِ وھد ءَ نودربراں بازیں جنجال ءُ جیڑہ درپیش بیگ ءَ اَنت بلے شما مئے ھالانی دیگ ءَ بے تھمبل اِت کہ نودربرانی گون ءَ یک تچکیں ناانساپی یے-

بلوچ نودربرانی گوشگ ات کہ بلوچستان ءَ وانگی ادارھانی نیست ءُ نابودی ءِ آماچ اَنت چریشی ءِ سبب ءَ بلوچ نودربر وتی وانگ ءِ ھاتر ءَ جتا جتائیں جاھاں وانگ ءَ اَنت بلے بد بھتی ءَ بلوچ نودربراں ھمک روچ اے وڑی ءَ زھرشانی کنگ کپگ اِنت اے شھدربرجاھانی یک شور ءُ پندلے کہ بلوچ نودربراں چہ وانگ ءَ گستا بہ کن ایں ءُ آیاں جیڑھانی سرءَ دور بہ دے ایں ءُ زھرشانیاں گوں دزگٹ بہ کن ایں دانکہ آ وتی وانگی سپر ءَ نیزور بہ کن اَنت سرجم مہ بنت-

زھرشانی ءِ نندوکاں گوں اھولکاراں گوشتگ مروچی بلوچ اسٹوڈنٹس کونسل بھاولپور ءِ زھرشانی نندانک ءَ دو روچ سرجم بیتگ ابید جیڑھانی گیش ءُ گیوار ءَ جامعہ ءِ انتزامیہ وتی مزنیں سُنٹبری ءَ بلوچ نودربراں جتا جتائیں رنگاں ترسینگ ءَ اِنت ءُ مروچی جامعہ ءِ گوشگ ءَ ڈسٹرکٹ ءِ جتا جتائیں پورسز ءَ مئے نودربرانی ھاسٹلاں بیڑ برتگ ءُ آ جسمانی ءُ زھنی ترسینگ اَنت ءُ آیانی اکس کش اتگ اَنت ءُ بلوچ نودربرانی پون پچ گپتگ ءُ آیانی پاوسڈانی پچ کنگ ءَ کڈنی کتگ اَنت-

بلوچ نودربرانی گوشگ ات کہ مئے لوٹانی تہ ءَ یک لوٹے ترسینگ ءُ دومی ٹک ءُ نشان چنگ ءِ ھلاسی ءِ ھلاپ اِنت اے وڑیں چیزاں بلوچ نودربر نہ من انت-

آیاں گوشتگ کہ ما رسانکدر ءِ کمک ءَ جامعہ انتزامیہ ءَ سرجمی ءَ گوشگ لوٹ ایں اگاں مئے نودربراں کجام ھم رنگے جیڑھے درپیش بوت گڑا آیانی درستانی زمہ واری جامعہ انتزامیہ ءُ وائس چانسلر بنت اِنت- اشی ءِ ھلاپ ءَ بلوچ کونسل گیش زھرشانی ءِ ھک ءُ واک ءَ دار ایت یک رندے پد ءَ ما جامعہ انتزامیہ ءُ وائس چانسَلر ءَ اے گپ ءَ تچک کنگ لوٹ ایں ما تی کجام ھم گیر آئینی ءُ گیر اکلاکی دروشماں پشت ءَ کنزوک نہ ایں دانکہ مئے جائزیں لوٹانی سر ءَ دلجمی نہ بیت اِنت ءُ مئے زھرشانی برجاہ مان ایت-

نودربراں دیمتر ءَ گوشتگ کہ بلوچستان ءِ ھما بے گچینی نشستانی سر ءَ نودربر وانگ ءَ اَنت کہ کسے ءِ دیم ءَ بروک نہ اَنت بلوچستان ءِ نیزگاریں نودربر ٹیسٹ دے اَنت ءُ پنجاپ ءُ بنجاھی جامعاتاں وت ءَ سر کن اَنت بلے بدبھتی ءَ جامعاتانی انتزامیہ نسلانی بنیاد ءَ نودربراں زورانسری نا امیتی ءِ دوچار کن اَنت دانکہ آ وتی وانگی سپر ءَ ھشکیں دستاں آسر بہ کن اَنت مئے ھک اِنت ما وتی لوٹانی واستا آیوکیں باندات ءِ رکینگ ءَ جوانیں گامگیج چست بہ کن ایں وتی نودربرانی ھمراھداری ءَ بہ کن ایں-

آیاں گوشتگ اے ناوشین جاوراں بلوچ کونسل سرپدیں مھلوک، نودربر گک ءُ کونسلز ءَ گوں دزبندی کنت جامعہ اسلامیہ ءَ گچینی نشستانی سر ءَ فیس تلبی ءُ جامعہ ءِ گنڈاہ گردی ءِ ھلاپ ءَ زھرشانیانی درچ ءَ بندات بہ کنت-

بلوچستان مولم ءِ مٹ بوگ ءُ ھئور ءُ توپاناں پد جانسلامتی ءِ جاور نگیگ بوان انت – ھئوراں پد بلوچستان ءَ بازیں نادراھی اتکگ انت –

بلوچستان ءَ ھار آماچیں دمگاں یک روچ ءِ میان ءَ ملیریا ءِ سَے ھزار ءُ شش سد کیساں ھوار ایندگہ نادراھیانی شش ھزار کیس رپورٹ بوتگ انت، نصیر آباد ءَ ھوار ھار آماچیں ایندگہ دمگاں وبائی نادراھی تیزی ءَ گوں شنگ بوان انت –

بلوچستان ءَ ھار آماچیں دمگاں بازیں وڈ وڈیں نادراھیاں جہہ جتگ ءُ اے دمگاں درمان نیستی ءِ سوب ءَ بازیں نادراھیانی الاج نہ بوگ ءَ انت وھدیکہ دگانی پرشت ءُ پروش ءِ سوب ءَ مزنیں شھراں پہ الاج ءِ سپر بازیں مشکلانی دیمپانی کنگ کپگ انت –

زانگ بہ بیت بشی ھئور ءُ توپان ءَ بلوچستان ءِ سِی ءُ پنچ دمگ سانمند بوتگ انت ءُ ھئور ءُ توپان ءَ سَے سد ءُ بیست ءُ پنچ مردم بیران بوتگ انت وھدیکہ سانمندیں دمگاں وبائی نادراھیانی آیگ ءَ ھپتگے ءِ میان ءَ ڈینگی، ڈائریا، دل ءُ لاپ، ملیریا ءُ چم ءُ پوست ءِ انفیکشن ءُ ھِسک ءِ نادراھیانی سِی ءُ ھشت ھزار ءَ گیش کیس رپورٹ بوتگ انت –

بلوچستان ءَ چہ توپان ءَ ھپتاد ءُ دو ھزار ءَ گیش گِساں تاوان بوتگ کہ آھانی تہ ءَ بیست ھزار کچ ءَ سرجمی ءَ کپتگ انت وھدیکہ پنجاہ ءُ دو ھزاراں کم تاوان بوتگ – وھدیکہ گوستگیں ماھے ءَ گیش ھپت سد ءَ گیش جانسلامتی ءِ بنجل ءُ رورل ہیلتھ سنٹر پُرشتگ ءُ کپتگ انت –

ایران ءَ ھواریں بلوچستان ءِ سیمسری دمگ چاغی تفتان سیمسر ءَ ایف سی کارندھاں گوں زاہ ءُ بد کنگ ءِ بھتام ءَ دو مزنیں اپسر در کنگ بوتگ اَنت-

تفتان سیمسر ءِ سر ءَ ایف سی ءُ لیویز فورس ءِ کارندھانی میان ءَ دپ جاک کنگ ءَ پد ڈپٹی کمشنر چاغی حسین جان بلوچ ءُ اسسٹنٹ کمشنر تفتان عصمت اللہ اچکزئی ءَ گمانی دروشم ءَ گیر زمہ واریں رویش ءُ بے ادبی کنگ ءِ سوب ءَ در کنگ بیتگ اَنت-

ھالانی رِد ءَ تفتان سیمسر ءَ ساڑی ئیں ایف سی کارندھاں ایران ءَ پتروکیں پاکستان ریلوے ءِ کارندہ داشتگ چریشی ءَ پد کمشنر چاغی ءُ اسسٹنٹ کمشنر چاغی ءُ لیویز ٹولی ایف سی کارندھاں تُرندیں جاک ءُ کُکّار ءُ زاہ بد کنگ بوتگ-

وئیل درگت ءَ تران کنان ءَ یک دمگی اِھوالکارے ءَ گْوشتگ کہ ایران ءَ سپر کنوکیں مردم دمگی انتزامیہ ءَ چہ سپری کاگد دزگپتگ اَنت بلے ایف سی کارندھاں آ ایران ءِ پُترگ ءَ موکل نداتگ-

اھوالکار رِد ءَ اپسراں کانودی دروشم ءَ ریلوے کارندہ سپری کاگد داتگ اَنت بلے ایف سی کارندھاں آ ایران ءَ پُترگ ءَ داشتگ چریشی ءَ پد اپسر ءُ ایف سی کارندھانی میان ءَ جاک ءُ کُکّار بوتگ کہ پد ءَ دوئیں اپسر در کنگ بوتگ اَنت-

شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ چار ھزار ءُ ھپسد ءُ ھپتاد ءُ سَے روچ سرجم بوتگ انت، مروچی بلوچ وومن فورم ءِ فرزانہ بلوچ، ہیومن رائٹس ءُ سوشل ایکٹیوسٹ حمیدہ نور ءَ ھوار دگہ مردماں بنجل ءَ اتکگ ءُ دلپدردی درشان اتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچانی توار ءِ ایرموش کنگ ءَ ریاست ءِ مشینری سک کار انت، بمب ءُ ٹوپاں گوں مردمانی توار ءِ ایرموش کنگ ءِ ھنر کنگ بوگ ءَ انت – ماورائے عدالت کشت ءُ کوش ءُ زورانسری آوارجنی ءِ درچ یکشل ءَ برجاہ انت، میان استمانی انسانی ھکانی گل ہیومن رائٹس واچ، ایمنسٹی انٹرنیشنل ءُ ایندگراں باز براں رپورٹ ھم کتگ-

آئی ءَ گوشتگ کہ بلوچستان اے وھدی نگیگیں جاورانی تہ ءَ گوزگ انت، ریاستی زلم زوراکیانی آماچیں مھلوک نوں چہ توپان ءَ دلسیاہ انت، ما ھما گمان کتگ بوتگ ات آ راست بوان انت کہ ریاستی پوج آواران ءِ زلزلہ وھدے وڈا دوبر کمک ءِ نام ءَ پوجی لشکر کشی ءَ برجاہ دارگے ھاتر ءَ ھار آماچیں دمگاں مانریچ ایت، ھمودا بنجل کنت ءُ مردماں بازیں ھُنر ءُ ھیلھاں گوں دلسیاہ کنت، ریسکیو ءِ بدل ءَ مردم زورانسری آوار جنگ ءُ بیگواہ کنگ بنت –

آئی ءَ گوشتگ کہ ھئور ءُ ھارانی نگیگیں جاوراں ھم زورانسری آوار جنی درچ دارگ نہ بوتگ انت، بلوچستان ءِ سر ءَ کبزہ کنگ ءَ پد زلم ءُ زوراکیانی درچ ھچبر ھلاس کنگ نہ بوتگ کہ اشی ءِ سر ءَ میان استمان ءَ توار چست کنگ لوٹیت تانکہ بلوچستان ءَ انسانی ھکانی لگتمالی دارگ بہ بیت –

بلوچستان ءِ دمگ ھزدار توتک ءَ یازدہ سال ساری زورانسری آوار جنگ بوتگیں فدا احمد ءُ ضیاء اللہ ءِ برات اشرف قلندرانی مروچی بلوچستان ءِ بنجاھی شھر شال ءَ وائس فار بلوچ مسنگ پرسنز ءِ بنجل ءَ اتکگ ءُ بازیں سالاں بیگواھیں وتی براتانی یل کنگ ءِ لوٹ کتگ –

اشرف قلندرانی ءِ رِد ءَ آئی ءِ یک براتے فدا احمد سال دوھزار یازدہ ءِ فروری ءِ ماہ ءَ پوج ءَ چہ توتک ءَ لشکر کشی ءِ میان ءَ آوار جتگ ءُ بیگواہ کتگ وھدیکہ ھما سال ءِ نومبر ءِ ماہ ءَ دومی برات ضیاء اللہ چہ ھزدار ءَ باغبانہ ءَ آر سی ڈی شھدگ ءِ سر ءَ آوار جتگ ءُ گوں وت برتگ کہ ھما انت گار ءُ بیگواہ انت –

اشرف قلندرانی ءَ سرکار، ھمے ادارہ ءُ انسانی ھکانی گلاں گوں دزبندی کتگ کہ آ آئی ءِ براتانی یل کنگ ءَ وتی کرد ءَ پیلو بہ کن انت –

اشرف قلندرانی ءَ گوشتگ کہ براتانی زورانسری آوار جنی ءَ پد آئی ءِ کماش وتی چکانی ودار کنان ءَ بیران بوتگ نوں آئی ءِ مات ھم وش وش نہ انت – اگاں منی براتانی سر ءَ ھر وڑیں کتکاری ءِ الزام ءِ ھست گڑا ریاست آھاں آمیدگس ءَ بیار ایت وتی بے میاری ءِ موہ بہ دنت اش –

زانگ بہ بیت سال دوھزار یانزدہ ءَ ھزدار ءِ دمگ توتک ءَ مزنیں کچے ءَ لشکر کشی ءِ بندات کنگ بوتگ ءُ آ لشکر کشی ءِ میان ءَ پوج ءَ گِس گس پٹ ءُ پول کتگ انت ئِے قلندرانی ٹک ءِ بازیں مردمے زورانسری آوار جتگ ءُ گوں وت برتگ انت کہ آھانی تہ ءَ لھتے مردم یل کنگ بوتگ انت بلے تنی وھدی سینزدہ مردم انگت گار ءُ بیگواہ انت –

لشکر کشی ءِ سَے سال ءَ پد بزاں سال دوھزار ءُ چاردہ ءَ ھمے دمگ ءَ یکجاھیں کبرے ءَ کساس یکسد ءُ شست ءُ نُھ مردمانی ھڈ ءُ کانپول در اتکگ انت – میان استمانی انسانی ھکانی گلانی رِپورٹ ءِ رِد ءَ اے جون بلوچستان ءَ پوج ءِ دست ءَ آوار جنگ بوتگیں بیگواھیں مردمانی بوتگ انت –