TBP Balochi

روکپتی بلوچستان ءِ بنجاھی شھر زاھدان ءَ ایرانی آمیدگس ءِ پرمان ءَ یک بندیگیں بلوچے پاھو دیگ بیتگ-

گیشیں ھالانی رد ءَ روکپتی بلوچستان ءِ بنجاھی شھر زاھدان ءِ مزنیں جیل ءَ ایرانی آمیدگس ءِ پرمان ءَ یک مردمے پاھو دیگ بیتگ –

پاھو دیگ بیتگیں مردم ءِ پجار قاسم شاہ بخش ءِ نام ءَ زانگ بیتگ –

ھالانی رد ءَ قاسم ایرانی سال نود ءُ ھشت ءَ ھما وھد ءَ گرگ بیتگ کہ آئی ءِ سر ءَ دو ایرانی لشکر ءِ کوشانی بھتام جنگ بیتگ اَنت-

روکپتی بلوچستان ءَ سر بیتگیں لس ھالانی رد ءَ قاسم ءَ دو ایرانی لشکر کشتگ ءُ آیانی سلاہ گون وت برتگ اَنت پد ءَ قاسم دزگیر کنگ ءُ زندانی بیتگ –

چرے زندانی ءَ پد آئی ءِ سر ءَ آمیدگس ءَ پاھو داتگ ءُ مروچی ھمے پاھو ءِ سر ءَ گامگیج زورگ بیتگ ءُ آ زاھدان ءِ مزنیں جیل ءَ پاھو دیگ بیتگ-

روکپتی بلوچستان ءَ دو ماھانی تہ ءَ بیست ءَ گیش مردم پاھو دیگ بیتگ اَنت-

پاھو دیگانی سبب نشہ باپاری ءُ دگہ دگہ بھتام ھوار اَنت –

ایرانی آمیدگس ءِ پرمان ءَ لس مردمانی پاھو دیگ ءِ پژدر ءَ انسانی ھکانی گلاں ھم زھر ء درشان کتگ اَنت-

امریکہ ءِ ٹیکنالوجی کمپنی ایپل ءَ وتی ایپ اسٹور ءَ روس ءِ نامی ئیں سوشل میڈیا نیٹ ورک وی کونٹاکٹے ( وی کے) کش اتگ –

فرانسیسی ھبر رساں ادارہ اے ایف پی ءِ رد ءَ چار شمبے ءِ روچ ءَ ایپل ءَ وتی شنگ کرتگیں درشانے ءَ گوشتگ کہ روسی سوشل میڈیا نیٹورک ایپ اسٹور ءَ چہ کش اتگ ءُ اشی ءِ سبب ءَ روسی دھشت ءُ بازیں وھداں برطانیہ ءِ نیمگ ءَ جنگ بیتگیں بندشانی سبب ءِ پژدر ءَ کنگ بیتگ-

زانگ بہ بیت برطانیہ ءِ سرکار ءَ یوکرین ءَ روس ءِ زیردست کتگیں ریفرنڈم ءَ پد نود ءُ نو روسی مردم ءُ ادارھانی سر ءَ بندش جتگ-

یوکرین ءِ نیمگ ءَ چہ روس ءِ ریفرنڈم ءِ ایرجنی ءُ آ دروگ گوشی ءُ روکپتی ڈیھانی واستا ترسناک گوشتگ –

روس ءِ شھر سینٹ پیٹرز برگ ءَ ھستیں ٹیکنالوجی فرم وی کے ءِ نیمگ ءَ پیش ءَ گوشگ بیتگ ات کہ نی آئی ءِ لھتے ایپلیکیشنز ایپل ایپ اسٹور ءَ دست نہ کپ اَنت، اے ایپ اسٹور ایپل موبائل ءَ الاٹ ءِ سر ءَ یک گیٹے ءِ وے کے ءِ رنگ ءَ کار کنت-

وی کونٹا کٹے ءِ ایپس ءَ کلوہ راہ داتگ کہ اشی ءَ ابید ڈیجیٹل ءِ دیگ ءَ ابید ءُ سامانانی بھا کنگ ءَ کارمرد بیت اِنت ءُ اے پیس بک ءِ رنگ ءَ یک دروشمیں چاگردی پلیٹ فارمے –

ایپل ءِ ایپ اسٹور ءَ ھما ایپس کشگ بیتگ اَنت اشی ءَ پیسر برطانیہ ءِ نیمگ ءَ منگ بیتگیں پاٹیانی سبب ءَ کارمرد بیتگ اَنت-

ایپل ءَ دیمتر ءَ گوشتگ کہ اے منگ بیتگیں پاٹیانی اکاؤنٹس ھم بند کتگ اَنت دومی نیمگ ءخ ایپل ءَ یک سرپدی یے دیان ءَ گوشتگ آ روسی سوشک میڈیا ءِ ایپ کش اتگ ءُ کانونی کنگ ءَ اِنت-

زانگ بہ بیت برطانیہ ءِ سیکریٹری ھارجہ جیمز ءَ گوشتگ کہ یوکرین ءِ زیردستیں جاھاں بیوکیں ریفرنڈم ءِ بارو ءَ آئی ءَ گیش گپ کنان ءَ گوشتگ’ اے دروگ ءِ سر ءَ ءُ توپک ءِ زور ءَ بیوکیں ریفرنڈم ھچ رنگ ءَ تچک بیت نہ کنت ءُ نانکہ ما اشی ءَ منّیں ‘-

آئی ءِ رد ءَ برطانیہ ءِ نیمگ ءَ روس ءِ بندش جتگیں مردم ءأ پلیٹ فارمزاں نشانگ کنگ اِنت کہ آ وسریں ووٹ کنگ ءَ دزمانجن اَنت ءُ لس تکاں ھم آیانی سر ءَ بندش جنگ بیتگ- کہ روس ءِ سرکار ءَ گیش برانز دیگ ءَ اَنت-

بلوچستان ءِ دمگ چہ ھزدار ءَ پاکستانی پوج ءَ یک ورنایے زورانسری آوار جنگ ءَ پد بیگواہ کرتگ-

سر بیتگیں ھالانی رد ءَ بیست ءُ شش ستمبر دوھزار ءَ بیست ءُ دو ءَ سراج اھمد ء بھرام خان جھمنند زھری پیرشار عوامی ھوٹل ءِ نزیک ءَ ھما وھد ءَ بیگواہ کنگ بیتگ کہ آ ھزدار ءِ شھر ءَ دیم پہ وتی ھند ءَ روگ ءَ بیتگ-

دمگی مردمانی رد ءَ عوامی ھوٹل ءِ ھند ءَ فرنٹیئر کور ءِ کارمنداں آ داشتگ ءُ دزگیر کرتگ ءُ پد ءَ ناشناسیں جاھاں برتگ ءُ اشی ءِ پجیگ ءَ آئی ءِ پرپٹ ھم گون وت اش برتگ-

دمگداراں اے درگت ءَ دگہ گپ دیم ءَ نیاؤرتگ اَنت-

ھمے وڑ کیچ ءِ دمگ تمپ نزر آباد ءَ چاردہ ستمبر دوھزار ءُ بیست ءُ دو ءَ آوار جنگ بیتگیں دلاور یل بیتگ-

بلوچ لبریشن آرمی ءِ سرمچاراں گوستگیں شپ ءَ مستونگ ءَ پوجی پوسٹ ءِ سر ءَ اُرش کرتگ ءُ زدگ کتگ اَنت – جیئند بلوچ

بلوچ لبریشن آرمی ءِ جارکش جیئند بلوچ ءَ رسانکدراں شنگ کرتگیں وتی درشانی ءَ پاکستانی پوج ءِ سر ءَ بیتگین اُرش ءِ زمہ واری منّ اتگ-

جارکش ءَ گوشتگ کہ گوستگیں شپ ءَ سرمچاراں مستونگ ءِ کیڈٹ کالج ءِ نزیک ءَ زورگریں پاکستانی پوج ءِ پوسٹ ءِ سر ءَ دزبمبے چگل داتگ –

جیئند بلوچ ءَ گوشتگ چرے بمب اُرش ءَ دشمنیں پوج ءِ دو کارندہ زدگ بیتگ اَنت ءُ اے اُرش ءِ زمہ واری ءَ مئے گل من ایت-

جارکش ءَ گوشتگ اے دابیں اُرش دشمن ءِ سر ءَ بلوچ سرڈگار ءِ آجوئی ءَ داں برجاہ مان اَنت-

بلوچ راجدوستیں رھشون ءُ عوامی ورکرز پاٹی ءِ سروک یوسف مستی خان بیران بیتگ، کھول ءِ رد ءَ یوسف مستی خان بازیں وھداں نادراھی ءَ پد مروچی سھب ءِ ساھت شش ءَ بیران بیتگ-

کماشیں بلوچ سیاسی رھشون، عوامی ورکرز پاٹی ءِ سروک یوسف مستی خان شانزدہ جولائی نوزدہ سد ءُ چل ءُ ھشت ءَ سندھ کراچی ءَ ودی بیتگ – آئی ءَ بنداتی وانگ کراچی ءِ دو اسکول ءَ کتگ، گیشین وانگ ءِ ھاتر ءَ ھشتمی جماعت برن ھال اسکول ایبٹ آباد ءَ سرجم کتگ، سے سال ءَ پد آ واتر بیتگ ءُ کراچی ءَ گرامر اسکول ءُ سینٹ پیٹرک ھائی اسکول، کراچی ءَ دگہ گیشیں وانگی سرجم کتگ اَنت-

آئی ءَ لھتے وھداں سندھ آرٹس کالج، کراچی ءَ وانگ سرجم کرتگ ءُ نوزدہ سد ءُ شست ءُ ھشت ءَ گورنمنٹ نیشنل کالج کراچی ءَ بی اے ءِڈگری سرجم کرتگ-

یوسف مستی خان ءِ بیرانی ءَ چاگردی رسانکجاھاں چہ بلوچ مھلوک ءِ نیمگ ءَ پدردی درشان کنگ بیگ ءَ اِنت-

پنجاپ ءِ شھر بھاولپور ءَ اسلامیہ یونیورسٹی ءَ وانوکیں بلوچ نودربرانی زھرشانی گوستگیں سَے روچاں چہ برجاہ اِنت، نودربراں گوشتگ کہ مئے نُھ سنگت یونیورسٹی ءِ انتزامیہ ءَ زھرشانی ءِ پژدر ءَ کش اتگ اَنت-

بلوچ نودربر اسلامیہ یونیورسٹی ءِ دیم ءَ بلوچستان ءِ گچینی ءِ نشستانی المی ءِ واستا نندانک ءَ نشتگ اَنت زھرشانی کنوکیں نودربراں اے گمان داتگ کہ دانکہ مئے لوٹانی سر ءَ سرجمی ءَ گامگیج زورگ نہ بیت اِنت ھما وھد ءَ اے زھرشانی برجاہ بیت اِنت-

بلوچ نودربرانی گوشگ ات کہ دانکہ ما وتی ھکانی لوٹ ءَ نشتگ اِنت جامعہ ءِ نیمگ ءَ ما جتا جتائیں رنگاں ترسینگ بیگ ءَ ایں جامعہ انتزامیہ ءِ گوشگ ءِ پد ءَ ڈسٹرکٹ ءِ جتا جتائیں لشکریاں نودربرانی ھاسٹلزاں بیڑ برتگ ءُ بلوچ نودربر جسمانی ءُ زھنی ترسینتگ اَنت آیانی اکس کش اتگ اَنت بلوچ نودربرانی موباھل پچ گپتگ ءُ کوڈانی پچ کنگ ءَ لاچار کرتگ اَنت –

گوستگیں روچ ءَ پریس کانفرنس کنان ءَ بلوچ نودربراں گوشتگ ات کہ بلوچستان ءَ وانگی نیست ءُ نابودی ءِ سبب ءَ بلوچ نودربر وانگ ءِ ھاتر ءَ پنجاپ ءَ کاینت بلے بدبھتی ءَ بلوچ نودربراں ھمک روچ زھرشانیانی دیمپانی کنگ کپ ایت چوشکہ جامعہ یک زانشتے ءِ رد ءَ بلوچ نودربراں چہ وانگ ءَ پشکپینگ ءَ اے وڑیں ھنر ءُ پندلاں کنگ اِنت دانکہ بلوچ نودربر زھرشانیانی تہ ءَ بہ اڑ اَنت ءُ آیانی زندمان زوال بہ بیت –

بلوچ نودربرانی گوشگ اِنت مئے لوٹانی تہ ءَ یکے ھراسمنٹ ءُ دومی ٹک ءُ نشان چنگ ءِ ھلاسی اِنت-

سربوتگیں ھالانی رِد ءَ کراچی ءِ بلوچانی دمگ لیاری ءَ پاکستانی پوج ءَ پت ءِ گوں ھمراھے چُک ءَ زورانسری آوار جتگ ءُ بیگواہ کتگ انت –

گیشیں ھالانی رِد ءَ گوستگیں شپ ءَ پاکستانی پوج ءَ لیاری ءِ دمگ کلری سرگوات ءَ اصغر ءِ گِس ءَ بیڑ برتگ ءُ اصغر ءُ آئی ءِ چُک سراج زورانسری آوار جتگ ءُ بیگواہ کتگ انت –

اھوالکار ءِ رِد ءَ پوج ءَ اصغر پدا رند ءَ یل داتگ بلے آئی ءِ چُک سراج ھنگت بیگواہ انت –

دمگی اھوالکار ءِ رِد ءَ لیاری ءِ دمگ کلی سرگوات ءُ کش ءُ کری دمگاں بازیں روچ ءِ بیت کہ پاکستانی پوج ءُ چیریں ادرھانی کارمندانی تر ءُ تاب ءِ تہ ءَ گیشی اتکگ ءُ چریشی ءَ دمگ ءِ مردمانی تہ ءَ تُرس ءِ ودی بوتگ –

زانگ بہ بیت پاکستانی پوج، رینجرز ءُ چیریں ادارھانی کارمنداں چہ لیاری ءَ پیسر ءَ ھم بلوچ ورنا آوار جتگ ءُ بیگواہ کتگ انت –

بلوچستان ءِ بُنجاھی شھر شال ءَ چہ ھمگرنچیں دمگ مستونگ ءَ سلاہ بنداں پاکستانی پوج چوکی گوں دزبمب ءَ نشانگ کتگ-

سربوتگیں ھالانی رِد ءَ مستونگ ءَ کیڈٹ کالج کراس سر ءَ پاکستانی پوج ءِ چوکی سر ءَ دزبمب اُرش ءَ یک کارندھے ٹپی بیتگ- اُرش ءَ پد آ دگہ کارندھاں تُرندیں تیرگواری کتگ-

اِھوالکارانی رِد ءَ سلاہ بندیں مردم تچگ ءَ سوبمند بیتگ اَنت وھدے کہ پوج ءَ دمگ انگر ءَ کتگ اُرشکارانی پٹ ءُ پول بندات کتگ-

اُرش ءَ ٹپی ئیں کارندہ پوج ءَ پہ الاج ھاتر ءَ نادُراھجاہ برتگ-

زانگ بہ بیت اے دمگ ءَ آجوئی لوٹوکیں گل ھست اَنت بلے مرچگیں اُرش زمہ واری ھچ گل ءَ نہ زرتگ-

پاکستان ءِ مزن شھر کراچی ءَ مروچی نیمروچ ءِ وھد ءَ چینی شھریانی سر ءَ بوتگیں اُرش ءِ زمّہ واری نوکیں سندھی سلاہ بندیں گل سندھو دیش پیپلز آرمی ءَ منّ اِتگ –

اے اُرش مروچی چارشمبے ءِ روچ ءَ سندھ ءِ باپاری ءُ رش کشیں دمگ سدر ایمپریس مارکیٹ ءِ نزیک ءَ پارسی ڈسپنسری ءِ بوتگ – نوکیں سندھی سلاہ بندیں گل سندھو دیش پیپلز آرمی ءِ جارکش سوریھ سندھی ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں کراچی رش ءُ کشیں دمگ سدر ءَ چینی کارمندانی کلینک ءِ سر ءَ اُرش کُتگ چریشی ءَ یک کارمندے مُرتگ ءُ سَے زدگ بوتگ انت –

آئی ءَ وتی درشان ءِ تہ ءَ دیمتر ءَ گوشتگ کہ اے اُرش ءِ زمّہ واری ءَ مئے گل سندھو دیش پیپلز آرمی منّیت ءُ ما چائنا سرکار ءَ ترندی ءَ گوں مکن کن ایں کہ آ سندھ ءِ سرڈگار ےِ تہ ءَ زورگیریں پاکستان ءِ کمک ءَ وت بہ پھریزیت ءُ وتی لٹ پُل ءِ شوربندیاں مئے سرڈگار ءِ تہ ءَ سرجمی ءَ بند بہ کنت اگاں ناں دیمتر ءَ ما ترندتریں اُرش کن ایں –

پولیس ءَ برتانیہ ءِ رسانکدر ءَ گوں تران کنان ءَ اے درگت ءَ گوشتگ کہ یک مردمے دنتان ءِ کلینک ءِ اتکگ ءُ نشتگ ءُ بیست ملٹ ءَ تاں آئی ءَ وتی باریگ ءِ ودار کتگ ھنچوش کہ آئی ءِ باریگ اتکگ آئی ءَ ھما دمان تیرگواری کتگ چریشی ءَ یک مردمے مرتگ ءُ دو زدگ بوتگ انت –

بیران بوتگیں مردمے پجار رونالڈ رائمنڈ چاؤ ءِ نام ءَ چہ بوتگ کہ آئی ءِ گور ءَ پاکستان ءِ پجار کارڈ ءِ ھم بوتگ – ایس ایس پی ءِ رِد ءَ آ پاکستانی شھری ءِ بوتگ کہ آئی ءَ سر ءَ تیر وارتگ –

پولیس ءِ گوشگ انت کہ اُرشکار ءَ وتی سنگت ءِ گوم ءَ ھال ءَ بوتگ، آئی ءَ ھچ وڈیں پاکستانی شھری تاوان نہ داتگ انت ءُ در شُتگ بوتگ –

بلوچ اسٹوڈنٹس فرنٹ جامعہ بلوچستان یونیورسٹی ءِ بُنزہ ءِ نیمگ ءَ ڈاکٹر مبارک علی ءِ کتاب ” غلامی اور نسل پرستی ” ءِ سرھال ءِ سر ءَ زانشی دیوانے ھکمت کمبر ءِ سروکی ءَ برجم دارگ بوتگ دیوان ءِ تران کنوک بی ایس ایف ءِ بُنجاھی پتر ءِ باسک گل ھسن بوتگ۔

دیوان ءَ تران کناں ءَ گْوشت کہ اِیردستی (غلامی) انچیں سلیں نادراھی یے کہ ھما راج اِیردست کنگ بیت آئی زند ءُ دودماں ،زبان ءُ ربیدگ ھرچی لگت مال کنگ بیت گلام ءَ را انچو اھساس دیگ بیت کہ تو وتی ھاکم ءُ آقا ءَ چہ کم ءِ تی زندگی ءِ مول ءُ مراد بس وتی ھاکم ءِ ھدمت کنگ ءَ ھاکم ءِ زوراکیاں وتی واست ءَ الله ءِ ازاب سرپد بیت۔

دیم ترا گل ھسن ءَ تران کناں ءَ گْوشت کہ دنیا ءِ ھر چاگرد ءِ تہ ءَ ایردستی ءِ یک رواجے بوتگ تاں مروچی برجاہ اِنت بلے آئی رنگ ءُ دْروشم بدل کنگ بوتگ اَنت ۔ ھر چاگردے ءَ تہ ءَ گلام ءَ را وتی ملکیت سرپد بوتگ اَنت آئی گوم ءَ ھر وڑیں رنگ ءَ پیش اتکگ اَنت آئی کُشگ ءُ سزا دیگ ءَ ھچ چک ءُ پد نہ بوتگ اَنت۔
دنیا ءِ تہ ءَ کُجام ھم چاگرد کہ گلام بوتگ اَنت آوانی گیشیتگیں نامے نہ بوتگ بلکن ھر ھاکم ءُ وتی وڑ ءَ آوان ءَ نام داتگ وھدے آوانی ھاکم بدل بوتگ آوانی نام ھم بدل بوتگ۔

دیم ترا آئی ءَ تراں کنان ءَ گْوشت کہ اگاں ما گلامانی راجدپتر ءَ چمشانکے بہ دیں ما گند ایں گلامانی ھچ وڑیں راجدپترے نبشتہ کنگ نہ بوتگ ھما زمانگ ءَ کہ گلامانی گلام داری بندات بوتگ بلے اِے کتاب ءِ تہ ءَ نبشتہ اِنت 15 ویں کرن ءَ پرتگیز ءُ ھسپانوی افریقہ ءَ درگیج اَنت 16ویں کرن ءَ انگریز افریقہ ءَ مان رِچ اَنت افریقہ ءِ سیاہ پاماں وتی اِیردست کن اَنت آوان ءَ وتی ملکاں کار اَنت کار گَر اَنت مبارک علی ءِ گْوشگ اِنت کہ 1840/60 ءِ دھک ءَ 10تاں 11 ملیون مردم افریقہ ءَ دیم پہ یورپی ملکاں آرگ بوتگ افریقہ ءِ پورئیں نیم آبادی یورپ ءَ آرگ بوتگ وتی ایردست جوڑ کُتگ اَنت۔
وھدے یک گلامے ءَ وتی آقایے ءَ را کُشتگ آئی بدل ءَ گلام ءِ پورئیں لوگ ءِ مردم کُشگ بوتگ اَنت اِے چیز رومی سلطنت ءَ بکائیدگ کانون بوتگ یک وھدے بیت یک گلامے یک وتی آقایے کُش ایت آئی وجہ ءَ آقا ءِ پوج ھما گلام ءِ کہول ءِ 400 ءِ کد ءَ مردم کُش ایت ادا زانگ بیت چنچو گلاماں گوں زوراکی کنگ بوتگ ل۔

گلامانی زندگی ساھدارانی زندگی ءِ وڑ ءَ بوتگ ھچ وڑیں آسراتی دیگ نہ بوتگ نہ زندمان ءِ تہ ءَ وشی گلامانی منڈی لگیتگ یورپی ملکانی مھلونک ءَ آوان ءَ بھا گیپتگ ءُ بُرتگ آوانی زالبول ھمدا پشکپتگ اَنت ھالی مردین اش بُرتگ اَنت تانکہ مردیں شریں وڑے ءَ کار کُت بہ کن اَنت ما گندیں گلامانی زندگی ھچ اھمیت دیگ نہ بوتگ افریقہ ءِ ملکاں دیم پہ یورپ ءَ برگ بوتگ اَنت راہ ءَ گلام ٹرک ءُ لانچانی تہ ءَ چہ برگ بوتگ اَنت راہ ءَ کِج ءُ بُج ءَ وجہ ءَ ھزاراں مردم مُرتگ بلے آقایان ءَ ھچ جیڑہ نہ بوتگ۔

وھدے سامراج گْوش ئے یا آقا اِے وت ما وت دژمن جوڑ بنت وت ما وتی جنگ ءَ ھمے گلاماں کارمرز کن اَنت گڑا ھمدا گلامانی تہ ءَ بھروسہ یے ودی بیت کہ ما یکے دومی ءِ بگیری ءَ جنگ کُت کن ایں وتی آزاتی ءِ واست ءَ چیا کُت نہ کن ایں گُڑا گلامانی تہ ءَ بھروسہ ودی بیت جنگ بندات کن اَنت آوانی مزنیں جنگ 1790 ءَ دھک ءَ بندات بیت ۔ ھمے گلامانی جنگ ءِ برورد اِنت 19 ویں کرن ءَ برطانوی پارلیمنٹ ءَ گلامانی ھلاس ءِ جار جنگ بیت ادا برطانیہ ءِ وتی لھتیں نپ ءُ پائیدگ بنت۔

ایردستی (غلامی) ءَ پد ما نسل پرستی ءِ نیمگ ءَ چمشانکے بہ دیں ما گنداں ھما وھداں گلامانی یورپی منڈیاں بھا کنگ ءُ یورپی ملکانی تہ ءَ برگ بوتگ اَنت گُڑا سفید فام ءُ سیاہ فامانی درمیان ءَ تپاوتے بندات بوتگ تاں روچ مروچی دنیا ءِ ھر کُنڈ ءَ برجہ اِنت نسل پرستی ءِ تہ ءَ کہ گیشی اتکگ آ 18 ویں کرن بیت ۔ یہودی ءُ یونانی بنت آ وتارا چہ افریقہ ءِ سیاہ فاماں برز تر پھم اَنت آوانی چُکچینی ءَ کن اَنت ۔ ھما اَسرات مروچی ترا مزھبی ھوالہ ءَ دست کپ اَنت ھرکس وتی مزھب ءَ برز پھم ایت یا ٹکّ کُٹم ءِ ھوال ءَ دست کپ اَنت ھرکس وتارا بُرز لیک ایت ایشانی مزنیں وجہ ایردستی (غلامی ) اِنت اگاں گلامی ھلاس کنگ بہ بیت اِے نسل پرستی کم کم ءَ وت ھلاس بیت تاں ایردستی ھست نسل پرستی برجم دارگ بیت۔ دیوان ءِ گُڈ سر ءَ سنگتاں بازیں جُست کُت، اے جُستانی پسو سنگت گل ھسن ءَ جوانے وڑے دات اَنت۔