TBP Balochi

ھندوستانی آمیدگس ءَ آن لائن سٹریمنگ پلیٹ فارم آلٹ بالاجی ءَ شنگ بیتگیں وین سیریز ’ٹرپل ایکس ‘ ءِ پروڈیوسر ءُ ڈائریک-ر ایکتا کپور ءُ آئی ءِ مات ءِ دزگیری ءِ ارزی ءِ پرمان کتگ-

ھندوستانی روتاک ھندوستان ٹائمز ءِ رد ءَ ویب سیریز ءَ پوجیانی کمشرپی ءُ آئی ءِ کھول ءِ جزبگاں داگ چنگ ءَ ایکتا کپور ءُ آئی ءِ مات شوبھہ کپور ءِ دزگیری ءِ ارزی ءِ پرمان کتگ-

آن لائن پلیٹ فارم آلٹ بالاجی انڈیا ءِ ٹیلی ویژن کمپنی بالاجی ٹیلی فلمز ءِ بھر اِنت کہ آئی ءِ سروک ایکتا کپور اِنت ءُ آئی ءِ مات ھمے کمپنی ءَ ھوار اِنت-

اُستان بھار ءِ ھند بیگوسرائے ءَ آمیدگس ءِ جج وکاس کمار ءَ یک شھری کہ آئی ءِ نام شمبو کمار ءِ شکایت کنگ ءِ بنیاد ءَ دزگیری ءِ ارزی ھکم داتگ-

بیگوسرائے ءِ جھمنندیں شمبو کمار ءَ گوشتگ کہ سال دوھزار ءُ بیست ءَ شکایت نبشتگ کنائینتگ ویب سیریز ءَ پوجی ءِ زال ءِ بارو ءَ نا دلکشیں ندارگے پیش کتگ-

شمبو کمار ءِ وکیل ءِ گوشگ ات آمیدگس ءَ پرمان داتگ کپ ایکتا کپور ءُ آئی ءِ مات پیش بہ بنت-

وکیل ءِ رد ءَ ایکتا کپور آمیدگس ءَ ھال داتگ ءُ چریشی ءِ نا دلکشیں ندارگ کشگ بیتگ اَنت بلے آمیدگس ءِ پیش نہ بوگ ءِ سر ءَ آمیدگس ءَ آئی ءِ دزگیر کنگ ءِ پرمان داتگ-

زانگ بہ بیت سال دوھزار ءُ بیست ءَ ھندوستان ءِ نامی ئیں یوٹیوبر ’ھندوستانی بھاؤ‘ پنام ءِ عرفان فاتک ءَ ایکتا کپور ءُ آئی ءِ مات شوبھا کپور ءِ ھلاپ ءَ پولیس ءِ گور ءَ دزبندی کتگ ات کہ ویب سیریز ءَ پوج ءِ توھین کنگ بیتگ ارزی نبشتگ کنگ بہ بیت کانونی رنگ ءَ چارگ بہ بیت-

ویب سیریز ءَ گندگ بیت اِنت یک انڈین پوجی ءِ زال ءَ گوں یک مردمے مھری “رومانوی “سیادی ھست اِنت –

ویب سیریز ٹرپل ایکس جنسی سیادی ءِ جتا جتائیں رنگاں پیشدارگ بیتگ کہ آئی ءِ اولی سیزن سال دوھزار ءُ ھژدر ءُ دومہ سال دوھزار ءُ بیست ءَ شنگ ءُ تالان بیتگ-

ایکتا کپور تامرکاری ءِ گوستانک ءِ نامی ئیں ازمکار جیتنندر ءِ جنک اِنت ءُ نامی ئیں ٹیلی ویژن ءِ پروڈیوسر اِنت-

بلوچستان ءِ دمگ کوھلو ءَ ھلوائی دکانے ءِ سر ءَ بمب تراک ءِ آسر ءَ دو مردم بیران ءُ بیست ٹپی بوتگ اَنت-

تراک مروچی سُھب ءَ کوھلو بازار ءَ بوتگ- دکاندار ءِ سیادی پنجاب ءَ گْوشگ بوگ ءَ اِنت وھدے کہ تراک آسر ءَ دکان سرجم پروشتگ ءُ کپتگ اشی ءَ ابید کش ءُ گور ءِ دکاناں ھم تاوان رس اِتگ-

تراک ءِ تُرندی ءِ درگت ءَ چہ واکداراں تنی وھدے ھچ نہ گْوشتگ- تراک ءَ ٹپی بیتگیں مردم نادُراھجاہ ءَ برگ بوتگ اَنت ءُ گیشیں پٹ ءُ پول برجاہ ءَ اِنت-

روکپتی بلوچستان ءِ دمگ جاسک ءِ شھدربرجاہ ءِ نودربراں سکیورٹی پورسز ءِ زوراکیانی ھلاپ ءَ کلاسانی نہ گرگ ءِ جار پرینتگ –

آیاں گوشتگ کہ شھدربرجاھانی نودربراں چیریں ادارہ گرگ ءُ بیگواہ کنگ ءَ اَنت ءُ آیانی توار ءَ بے توار کنگ ءِ جھد ءَ اَنت چریشی ءِ پژدر ءَ ما نودربرانی ھرتال ءِ پلامرزی ءَ کن ایں-

آیاں گوشتگ کہ چیریں ادارھانی نیمگ ءَ نودربراں بازیں جیڑہ ءُ جنجالانی دیمپانی اِنت ءُ چریشی ءَ اے آؤکیں ھپتگ ءَ شھدربر جاہ ءَ کلاس نہ گریں-

زانگ بہ بیت ایران ءَ اے وھد ءَ مھسا امینی ءِ کوش ءَ پد ترندیں زھرشانی درچ بندات بیتگ اَنت ءُ چرے زھرشانی ایرانی دگہ اُستانانی وڑ ءَ روکپتی بلوچستان ءَ ھم سر بیتگ اَنت ءُ ھمے درچ ءَ مھلوک ءَ زھرشانی ءُ دگ ءُ دگہ جاھاں ھم بند کتگ اَنت –

زھرشانیانی میان ءَ سکیورٹی پورسز ءَ بازیں کچے ءَ مردم گپتگ ءُ بندیگ کرتگ اَنت ءُ کہ اشانی تہ ءَ نودربر ھم ھوار اَنت-

نودربراں گوشتگ کہ سکیورٹی پورسز ھک ءِ پژدر ءَ توار چست کنوکیں نودربراں ھم گرگ ءُ آیاں کشگ ءُ یا زندانی کنگ اِنت-

زانگ بہ بیت گوستگیں سَے شمبے ءَ روکپتی بلوچستان ءِ دمگ چھبار ءَ جلیل آرام ء گل مھمد جھمنند کنارک نامیں نودربرے زھرشانی پژدر ءَ چیریں ادارھاں دزگیر کرتگ ات کہ انگت ءَ گار اِنت-

ھالانی تہ ءَ گوشگ بیتگ کہ جلیل ھمے زھرشانیاں ھوار بیتگ ءُ آئی ءِ ھک ءِ واستا توار چست کرتگ چریشی ءِ سزا ءَ آ گرگ بیتگ-

اشاں ھوار ھوار چھبار ءَ پانزدہ سالی ئیں جنکے ءِ گون ءَ پولیس ءِ آفیسر ءِ زوراکی ءَ پد ھم مھلوک برانز گپتگ ءُ آیاں زھرشانی کرتگ ءُ سرکاری ادارھانی دیم ءَ سرکار ءِ ھلاپ ءَ اوگام ءُ انساپ ءِ لوٹ کرتگ –

چھبار ءَ پانزدہ سالی ئیں جنک ءِ گون ءَ زوراکی ءِ ھلاپ ءَ توار چست کنوکیں بازین مردم دزگیر کنگ ھم بیتگ اَنت –

روکپتی بلوچستان ءَ بندوکیں دو ٹک مولانا عبدالحمید مکی مسیت زاھدان جمعہ امام ءِ سروکی ءَ دل پہ دل بیتگ اَنت-

ھالانی رد ءَ مروچی ناروئی ٹک ءُ عمر زئی ٹک کہ بازیں وھداں وت ما وتی جیڑہ ءِ سر ءَ دلرنج بیتگ اَنت-

ھالانی تہ ءَ گوشگ بیتگ کہ ھردوکیں ٹکاں وتی دیریگیں دلرنجی ھلاس کتگ ءُ مھر درشان کتگ-

دیوان مکی مسیت زاھدان ءَ بیتگ کہ اود ءَ بازیں کچے ءَ مردماں بھر زرتگ ءُ اے کار ساڑاتگ –

چریشی ءَ پیش مولانا عبدالحمید اسماعیل زئی ءِ سروکی ءَ سِی ءَ گیش ھمے وڑیں جنگ ءُ چوپاں ناراز بیتگیں ٹک وش ءُ وشدل کنگ بیتگ اَنت-

دیوان ءَ بھر زیروکیں مردمانی میان ءَ تران کنان ءَ مولانا عبدالحمید ءَ گوشتگ کہ وت ما وتی جیڑہ ءُ جنجال ھنچش انسان ءُ تباہ ءُ برباد کنت کہ اشی ءَ چہ واجہ ھدا ھم ناوش بیت اِنت –

آئی ءَ گوشتگ کہ من ءَ ھمک انسان ءُ بلوچاں چہ ھمے اُمیت اِنت آ وت ما وتی جنگ ءُ چوپ ءُ دلرنجیاں یک گور کن اَنت ءُ مارا دگہ بر چوشین کارانی سرجم کنگ ءَ موہ نہ دے اَنت-

بلوچ سیاسی راجداریں باسکانی زورانسری آوار جنی ءِ بگیری ءَ بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی بنجل برجاہ، زھرشانی بنجل ءَ مروچی چار ھزار ءُ ھپسد ءُ ھپتاد ءُ پنچ روچ سرجم بوتگ انت –

مروچی زھرشانی بنجل ءَ بلوچ وومن فورم ء فرزانہ بلوچ، سلطانہ بلوچ ءُ ماھروش بلوچ ءَ بنجل ءَ اتکگ ءُ دلپدردی درشان اِتگ، زھرشانی بنجل ءَ گل ءِ سرکماش نصراللہ بلوچ ھم ساڑی بوتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ ھما کہ وتی زات بدل ءَ راجی یکجاھیں لوٹ گزرانی گپ ءَ جنت ریاست ھمائی ءَ نشانگ کنت، ریاست ھنچین شور بندی ٹھین ایت کہ بس وتی ھاتر ءَ پگر بہ کن ایت دومی ءَ بارہ ءَ ناں ھمے ھاتر ءَ آ ھمے وڈیں ھُنر کنت ھمے سوب انت کہ مردم یکے دومی ءَ گوں دلرنج انت –

آئی ءَ دیمتر ءَ گوشتگ کہ بلوچ راج درجکشیں جھد انت، بلوچ پرزند دیمھونی دیگ انت ھمے ھاتر ءَ ریاستی پوج ءُ چیریں ادارہ سرجمین بلوچ راج ءَ وتی دژمن زانگ انت – بلوچستان ءِ جتا جتائیں ھند ءُ دمگاً بلوچانی زورانسری آوار جنی ھمک روچی کار ءِ جوڈ بوتگ سیمسرانی سر ءَ ھنچیں جاور جوڈ کنگ بوتگ کہ یک دمگے ءب بلوچ دومی دمگ ءَ شُت نہ کن انت ھزاراں سال بلوچ ھما سرڈگار ءِ کہ واھند انت مروچی آ وتی سرڈگار ءِ سر ءَ دلسیاہ کنگ بوگ ءَ انت – بلوچانی رؤگ ءُ آیگے ھاتر ءَ سیمسر بند کنگ بوتگ انت، روزگار ءِ سرجمیں در بند کنگ بوتگ انت مزن ءُ شاھگانیں زر ءِ بوگ ءَ ابید بلوچ پہ پٹ ءِ آپ ءَ تلوسگ انت وھدیکہ نشہ ءِ باپاری چیریں ادارھانی چیردستی ءَ یکشل ءَ برجاہ انت –

نبشتانک: ماتویں چاگرد

نبشتہ کار: سیپ بلوچ

سیمی بھر

دی بلوچستان پوسٹ

شَپ وتی تهلیں اندوهاں گوں جُنزان بوت سَمل ءَ کتاب بستہ ءَ مان کُت اَنت ءُ اَرس پَهک کت انت نپاد پَچ کُت اَنت ءُ گژنگیں لاپ ءَ وپت ماتو ءُ دهکان ءَ نان وارت ءُ وپت اَنت دهکان ءَ ماتو ءَ را گْوشتگ اَت کہ سمل ءَ سهب ءَ وانگ جاه ءِ روّگ ءَ مئیل بلے کہ همد ءَ گٌوں تو چلْوپگاں گوں مان گیش اِیت ، سهب ءِ بام ءَ دات سمل مهلہ پاد اتک نان پچ ءَ اتک کہ نوں کماش بانگْواهی شُتگ ات دیم پہ ڈگاراں کُوپے چاہ پَچگراں وراں جُنزاں دیم پہ وانگ جاه ءَ ، همئے کہ سمل نان پچ ءَ اتک ماتو ءَ گْوشت کہ سمل اِیران ڈن ءَ ایر اَنت شَود اِش کہ من رواں بُزگل ءَ کَدیم کن آں ، سمل اَجکہ بوت اے چونیں گپے من ءَ وانگ ءَ روْگی اِنت ماتو ءَ چو گْوشت؟ ، سَمل ءَ دْرائینت اما من رواں وانگ جاه ءَ کہ وانگ جاه ءِ کِشک دُور اِنت نوں منی دْراهیں دْزگْوهار در شُتگ اَنت ماتو ءَ گْوشت کہ نہ لوٹ ایت وانگ تئی پت ءَ گْوشتگ کہ سمل ءَ بُگش نوں وانگ ءَ مَرو ،،سَمل ءَ زارِے جت کہ من چہ شما هچ نہ لوٹ آں من ءَ بِل اِت کہ وان آں ماتو ءَ بد بُرت سمل ءِ گْور ءَ اتک سمل ءِ شهماتے جتے من ترا گْوشگ ءَ آں برو اِیراناں مُش تو برے گپے کنگ ءَ ئے نوں تو پهک ءَ زبانے رُودینتگ سمل ءَ ماتو ءِ گپ نہ زرت لوگ ءَ پُترت بستہ بڈا جت کہ در رواں ماتو ءَ بستہ پچ گپتگ سمل ٹیٹ لٹ ءُ شاپ کت سمل ءِ دْراهیں کتاب ءُ کاپی دِرت ءُ هورت کت اَنت سمل زار زار ءَ گریوگ ءَ ات بلے سمل ءِ دردانی کساس کنوک نیستگ اَت سمل ءَ پہ گریوگ ءَ وتی سر زمین ءَ مُشت داں ساهت یازده بج ءَ نشتگ اَت ءُ گریوگ ءَ ات داں ماتو ءَ بُزگل جنگل ءَ بُرتگ ات ءُ اتک ءُ دْراهینت ئِے سمل منی چک من تئی کماش ءِ دیم ءَ مجبوراں هرچی تئی کماش گْوش ایت چے کت کن آں داں سمل ءِ زهن ءِ جوڑ کت سمل ءِ رد دات بُرت ئِے لوگ ءَ کہ بیا من تو مات چک باں گد دوچاں دگہ جنکی کار هست اَت اے وانگ ءُ زانگ پم ءَ گریباں نہ اِنت-

سمل ءَ پهک زانت کہ نوں وانگ ءَ و من ءَ نئیل اَنت ماتو ءُ پت دگہ هچ راه نیست بس سمل ءَ وتی چاگردے گُلامیانی دیم پان کُت وت ءَ هنچو وهد روان داں شش ماه آسر بوت سمل ءِ دل زَدگ بوتگیں شانتلے ءِ پیم ءَ ات ساهت ءُ دمان ارسانی مهری ءَ سوار اَت کہ ششمی ماه ءَ پد سمل ءِ ناکو زتک چہ مشکت ءَ واتر اِت، چوناها سمل ءِ ناکو زتک چہ کسانی ءَ میتگ ءِ شُپانک بیتگ ، رند ءَ مردماں ویزا کَش اِتگ دیم داتگ مشکت ءَ اود ءَ هم پسانی کار ءَ بوتگ ، وهدے کہ سوالی ، سمل ءِ ناکو زتک چہ درملک ءَ واتر اِتگ اَت سمل ءِ کماش ءُ سمل ءِ ناکو ءَ وت ماں وت سانگی پیسلہ ڈگارانی سر ءَ ٹاهینتگ اَت کہ سمل ءِ ناکو ءَ همے گْوشتگ اَت کہ سوالی چہ درملک ءَ کیت گوں سمل ءَ سیر دیان ئِے-

روان اِنت—

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ ھرنائی ءَ پاکستانی پوج ءِ نیمگ ءَ لشکر کشی برجاہ انت ءُ اے لشکر کشی کھوسٹ، زردآلو ءُ کش ءُ گور ءِ کوھی دمگاں کنگ بوگ ءَ انت –

دمگی اھوالکار ءِ گوشگ انت کہ گوستگیں روچاں پوجی بالگرد ءِ کپگ ءَ پد گوستگیں بیگاہ ءَ یکرندے پد ءَ لشکر کشی بندات کنگ بوتگ ءُ لشکر کشی ءَ پیادگیں پوجی ٹولی ھم مزنیں کساسے ءَ گون انت –

چار روچ ساری ھرنائی دمگ زرد آلو ءَ سلاہ بندیں مردماں بنجاھی شھدگ بستگ ءُ گاڑی پٹ پول کتگ انت ءُ پجار کنگ ءَ پد سلاہ بندیں مردماں دو مردم گوں وت برتگ وھدیکہ ھمے وھد ءَ سلاہ بندیں مردماں اشکر بروکیں چار ٹرکانی سر ءَ ھم تیرگواری کتگ ءُ آھانی ٹیر تراکینتگ انت –

اے وئیل ءَ پد پاکستانی پوج ءَ لشکر کشی بندات کتگ ءُ کہ لشکر کشی ءَ بھر زورکیں دو بالگردانی تہ ءَ یک بالگرد ءِ سر ءَ سلاہ بندیں مردماں اُرش کتگ ءُ جتگ ءُ چگل داتگ –

بالگرد ءِ کپگ ءُ تباہ بوگ ءَ پاکستانی پوج ءِ شش کارمند ھم مرتگ انت –

آئی ایس پی آر ءِ رِد ءَ بالگرد ءَ پائلٹ میجر محمد منیب افضل، پائلٹ میجت خرم شہزاد، نائیک جلیل ق صوبیدار عبدالواحد، سپاھیگ محمد عمران ءُ سپاھیگ شعیب سوار بوتگ انت –

بالگرد ھرنائی ءِ دمگ ءَ کپتگ کہ اے دمگ بلوچستان ءِ جنگ زدھیں دمگانی تہ ءَ ھوار بیت انت –

گوست ءَ ھم ھرنائی ءَ بلوچ آجوئی لوٹوکیں سلاہ بندیں گل ءُ پاکستانی پوج ءِ میان ءَ جنگ چوپ بوتگ انت –

دو ماہ ساری بزاں جولائی ءِ ماہ ءَ زیارت ءُ ھرنائی ءِ کوھی دمگاں پوج ءِ ڈیفنس ہاؤسنگ اسکیم (ڈی ایچ اے) ءَ سیادی داروکیں اپسر لیفٹننٹ کرنل لیئق مرزا بیگ ءُ آئی وارس ءِ ھم آوار جنگ بوتگ انت-

پدا رند ءَ آھانی جون دست کپتگ انت ءُ آھانی زمہ داری بلوچ آجوئی لوٹوکیں سلاہ بندیں گل بلوچ لبریشن آرمی منّ اِتگ ات –

آ وئیل ءَ پد پھازگی لشکر ءَ ڈی ایچ اے ءِ اپسر لیفٹننٹ کرنل لئیق بیگ مرزا ءُ آئی ءِ وارس ءِ کوش ءَ ھواریں نُھ مردمانی کوش ءِ دروگیں ٹاہ داتگ ات ءُ آھانی تہ ءَ ھپت مردمانی پجار بوتگ ات کہ آ پیش ءَ زورانسری آوار جنگ ءُ بیگواہ کنگ بوتگ انت –

اے دروگیں میڑ ءِ بگیری ءَ بیگواھیں بلوچانی کھولاں پنجاہ روچاں تاں شال گورنر کارگس ءِ دیم ءَ نندانک جتگ ءُ زھرشانی کتگ ات –

گوستگیں روچ ءَ بلوچستان پولیس سی ٹی ڈی ءِ ڈپٹی انسپکٹر جنرل (ڈی آئی جی) ءَ وتی جار ءِ تہ ءَ ھمے گمان زاھر کتگ ات کہ سلاہ بندانی نیمگ ءَ کار ءِ کنگ بوگ ءِ گمان انت کہ سرکاری اپسر آوار جنگ بوت کن انت –

پوجی بالگرد ءِ جنگ ءُ دور دیگ ءُ سرکاری کارمندانی دزگیری ءِ زمّہ واری بلوچ لبریشن آرمی ءَ منّ اِتگ –

بی ایل اے ءِ جارکش جئیند بلوچ ءَ رسانکدرانی اھوالکاراں ای میل دیم داتگ گوشتگ کہ بی ایل اے ءِ سرمچاراں ھرنائی دمگ زرد آلو ءَ پاکستان ءِ دو پھازگی کارمند دزگیر کتگ انت –

جارکش ءَ گوشتگ کہ ھما وھد ءَ کہ اے دؤئیں کارمند دزگیر کتگ انت گڈا پاکستانی پوج ءِ دو بالگرد اتکگ انت گڈا بی ایل اے ءِ سرمچاراں ھرنائی کھوسٹ ءِ نزیک ءَ بالگرد جتگ ءُ دور داتگ –

بلوچستان ءِ آجوئی لوٹوکیں سیاسی پاٹی بلوچ نیشنل مومنٹ ءَ منشیات ءِ تالان ءُ بلوچ چاگرد ءِ کرد ءِ سر ءَ پنتاک شنگ کرتگ، اے پنتاک ءِ ھواری ءَ آئی ءَ یک اکسے شنگ کرتگ ءُ اکس ءِ تہ ءَ آئی ءِ نشہ ءِ درگت ءَ ناگیگیانی درگت ءَ پیش داشتگ –

شنگ کرتگیں پنتاک ءَ آئی یَ نبشتگ کرتگ منگھیں بلوچ راج! ھچ راج تیوک ءَ سلاہ ءِ زور ءَ ایردست کنگ نہ بیت۔ نوک آبادی زوراک مدام راجانی ایردست کنگ ءَ جتائیں پندل کارمرد کن اَنت،اے پندلانی تہ ءَ نوک آبادی نپانی پھریزگ ءَ مزھبی پوشاک، زوراک ءِ گوں ایردست ءَ براتی ءِ ھامگیں اوگام،نوک آبادی وانگ ءُ زانگ ءِ تْرام،ریاست ءِ رودینتگیں ھزگار،مردم کشیں سلاہ بندیں رمب ءُ منشیات ءِ تالان کنگ۔پاکستانی ریاست ءِ لشکر ءَ ھوار جتائیں ادارہ بلوچستان ءَ منشیات ءِ تلان کنگ ءَ مدام پُرکار بیتگ اَنت،اِد ءَ منشیات ءِ مزن مزنیں بارکش ءُ منشیات ءِ باپاریاں سرکار ءِ سروکی ءُ کمک گون اِنت۔بلوچستان ءِ شھر چہ پیش ءَ منشیات ءِ زھراں تباہ بیتگ اَنت نوں گوں شوربندی یے ءَ کوہ ءُ کوچگی دمگاں منشیات تالان کنگ بیگ ءَ اِنت۔ برجاھیں زْرمبشت ءِ بنداتی روچاں آجوئی دوستیں گلاں منشیات ءِ بگیری ءَ گوں سوبمندیں تکشامے برجاہ داشتگ اَت ءُ کوہ ءُ کوچگی دمگاں منشیات آسر کرتگ اَت،مردمانی کمک ءَ برجاہ بیتگیں تکشام ءِ سان کوہ ءُ کوچگی دمگانی ھواری ءَ شھرانی سر ءَ ھم کپتگ اَت ۔اے شریں سوبمندی یے گُمان کنگ بیگ ءَ اَت ءُ پہ پاکستانی ریاست ءَ چہ مزنیں بےسوبی یے ءَ کمتر نہ اَت بلے وھدے کہ لشکرکشیانی ھواری ءَ سرجمیں بلوچستان ءِ کنڈ کنڈاں لشکری پانگسانی دام تالان کنگ بوت،سلاہ بندیں رمب چہ نوک سر ءَ جوڑ کنگ بوت اَنت ءُ سلاہ ءِ زور ءَ پد ءَ سرکار ءِ واک برجاہ کنگ بوت گڑا یکبرے پد ءَ منشیات ءِ زھر ھژدری بھر ءِ وڑ ءَ بلوچ چاگرد ءِ رگ ءُ ریشگاں تالان کنگ بوت ءُ اے تباھیں شوربندی ءِ سر ءَ داں انی گوں تْرندی ءَ کار برجاہ اِنت۔

آئی ءَ گوشتگ منشیات یک انچیں زھرے کہ مردم ءِ جیڑگ ءِ توان ءَ پچ گیپت ءُ مردم ءَ دابہ جوڑ کنت، شکر ورنا کہ نشھی بہ نت گڑا زندگیں کنٹ جوڑ بہ اَنت،پہ راجے ءِ جانی ءُ سسائی پل ءُ پانچ ءَ چہ منشیات ءَ گھتریں دگہ سلاہ نیست ۔پاکستان بلوچ راج ءِ بگیری ءَ گوں تْرندی ءَ ھمے سلاہ ءَ کارمرد کنگ ءَ اِنت داں بلوچ راج ءِ ورنا راجی ایردستی ءِ انگیزانی باروا جیڑ اِت ءُ کار کنگ ءَ زبھر بہ بہ اَنت ءُ پہ مدامی ایردستی ءِ گپچل ءَ مان بہ گیش اَنت۔

بی این ایم ءَ گوشتگ منگھیں بلوچ راج! پاکستان ءَ برتانیا ءِ لوٹانی پد ءَ بیست ءُ ھپت مارچ 1948 ءَ بلوچستان دستیگ کُرت ءُ پہ زور یک نوک آبادی تْرامے جوڑ کرتگ۔اے تْرام ءِ بگیری ءَ بلوچ راج چہ بنداتی روچاں جھد کنگ ءَ اِنت داں کہ پاکستانی تْرام ءَ چہ بلوچستان ءَ بہ گْوج ایت ءُ انچیں تْرامے ءِ بنیاد ءَ ایر بہ کنت کہ آ اود ءَ بلوچ راج پہ آجوئی ءَ زندگی گْوازینت کرت بہ کنت ۔اے ھپتاد ءُ چاریں سالانی جھداں پاکستانی ریاست ءَ وتی درسیں زور بلوچ آجوئی زْرمبشت ءِ لپاشگ ءَ کارمرد ک کرتگ۔ بلوچ راج ءِ ھمک بھرگ ءِ مردم پہ زور بیگواھی ءِ نشانگ کنگ ءُ آیانی ژانگولیں کنٹ دور داتگ اَنت۔ججھدکارانی کھول مچی سزا ءِ نشانگ کرتگ اَنت۔زور بیگواھیں مردمانی کُنٹ یک گور کرتگ اَنت ءُ دروگیں میڑاں شھید کنگ بیتگ اَنت بلے بلوچ آجوئی زْرمبشت ءِ لپاشگ ءَ سرجم ءَ بےسوبی ریاست ءِ بھت جوڑ بیتگ۔

منگہ داریں بلوچ راج! بلوچستان ءِ کنڈ کنڈ ءَ تالان کنگ بیتگیں لشکری پانگساں ھمک مردم ءُ نودربر چِک ءُ تان کنگ ءَ پد نی گْوزگ ءِ موکل دیگ بہ اَنت،چہ ھمے پانگساں بلوچ پسگ پہ زور بیگواہ کنگ بہ اَنت بلے چہ ھمے پانگساں ٹَنّانی کچ ءَ منشیات ابید ء جست ءُ پرس ءَ دمگاں تالان کنگ بیگ ءَ اِنت۔اے گپ ءَ ھچ شکے نیست کہ پاکستان تچکی ءَ سرکاری شوربندی ءِ ھواری ءَ مئے ورنائیں پدریچ ءِ تباہ کنگ ءَ مروچی بلوچستان ءِ درسیں دمگاں منشیات ءَ تالان کنگ ءَ اِنت داں بلوچ ورنا نشھی بہ بہ اَنت ، چہ جیڑگ ءُ سرپد بیگ ءِ توان ءَ زبھر بہ بہ اَنت ءُ ماں آجوئی ءِ جھد ءَ ھچ وڑیں کِرد پیلو کرت مہ کن اَنت داں پاکستان وتی نوک آبادی پنجگاں مھر بہ کنت۔

آئی ءَ گوشتگ گیدریں بلوچ راج! اے گْوستانکی راستی یے ھما راجاں کہ زور ءُ زوراکی ءِ بگیری ءَ جھد کرتگ مروچی آ راج آجو ءُ پرمنگھیں زندمانے گْوازینگ ءَ آنت۔بلوچ راج ءِ دیمروی گوں آئی ءِ آجوئی ءَ بندوک اِنت۔داں وھدے بلوچ راج ایردست اِنت آئی ءِ دیمروی وابے کہ بھ پیلو نہ بیت۔پرچا کہ ایردستیں چاگردے ءَ زورگر ھچ بر مردماں پرانکی (مثبت ءُ دیمروی ءِ کار) ءُ جْوانیں سرگرمیانی موکل ءَ نہ دنت پرچا کہ ایردستیں راج وھدے جیڑگ ءَ بندات کنت گڑا آ زورگیپت ءِ بنیاداں چہ وتی سرڈگار ءَ ولگْوج کنت ءُ آجوئی ءِ جھد ءَ ھوار بیت ءُ اے کار راج ءِ دیمروی ءِ بنیاد ءَ ایر کنت۔

آئی ءَ گوشتگ کہ بلوچ راجی زْرمبشت( بی این ایم) بلوچ راج ءِ توانمندی ءِ سر ءَ باور دار ایت ءُ ما دلجم ایں کہ وھدے بلوچ راج ریاست ءِ شونداتانی بگیری ءَ سرپ ءِ دیوال جوڑ بیت گڑا آئی ءِ شونداتاں بےسوبی بھر بیت۔ما اوست دار ایں کہ بلوچ راج بلوچستان ءَ منشیات ءِ گِر ءُ دار کنگ ءُ ورنایانی چہ منشیات ءَ پھریزگ ءَ جْوانیں کِردے پیلو کنت،آجوئی ءِ زْرمبشت ءِ بھر جوڑ بیت ءُ اے چراگ ءَ رُژنا کنت کہ پہ ایشی ءِ رُژنا کنگ ءَ بلوچ پسگاں ھون ریتکگ سوب الم مئے بیت۔

روکپتی بلوچستان ءِ تیابدپی شھر چھبار ءَ گوستگیں روچ ءِ بیگاہ ءَ ایرانی چیریں ادارھاں یک چاگردی باسکے دزگیری ءَ پد بیگواہ کرتگ-

بیگواہ کنگ بیتگیں مردم ءِ پجار مبین بلوچ جھنند صدیق زئی میتگ دشتیاری ءِ نام ءَ زانگ بیتگ کہ اے وھد ءَ ا چھبار ءَ نندوک بیتگ-

ھالانی تہ ءَ گوشگ بیتگ مبین ءِ دزگیری ءِ سبب روکپتی بلوچستان ءِ دمگ چھبار ءَ ایرانی پولیس ءِ آفیسر ابراھیم کوچکزئی ءِ سر ءَ یک بلوچ جنکے ءِ گون ءَ زیادتی کنگ ءِ بھتام ءَ توار چست کنوکاں چہ یکے بیتگ –

ھالانی رد ءَ گوشگ بیتگ مبین ءَ گوستگیں روچاں جنک ءِ گون ءَ بیتگیں زیادتیانی ھلاپ ءَ توار چست کرتگ ءُ پد ءَ انساپ ءِ لوٹ کرتگ –

ھالانی رد ءَ گوشگ بیتگ کہ مبین ءَ گوستگیں روچاں چھبار ءَ پارلیمنٹی لس مجلس ءَ ھم جنک ءِ انساپ ءِ لوٹ کرتگ ءُ چرے گپانی کنگ ءَ پد مبین گوستگیں روچ ءِ بیگاہ ءَ چیریں ادارھاں دزگیر کرتگ ءُ برتگ-

ھمے وڑ ءَ روکپتی بلوچستان ءَ بندوکیں نامی ئیں گشندہ وھید بلوچ ءَ ھم چیریں ادارانی نیمگ ءَ بیھاری رھوت سر بیتگ اَنت-

وھید بلوچ ءَ وتی انسٹاگرام ءَ نبشتگ کرتگ کہ ایرانی اطلاعات ءِ کارندھاں من ءَ رھوت کرتگ ءُ گوشتگ کہ تو جنک ءِ واستا گپ جتگ ءُ چریشی ءِ سر ءَ وتی گپاں بہ دار –

زانگ بہ بیت ھمے ماہ ءَ چھبار ءَ ایرانی پولیس ءَ یک جنکے کوش ءِ بھتام ءَ پٹ ءُ پول ءَ لوٹ اتگ ءُ پد ءَ آئی ءِ گون ءَ سلکاری کرتگ ءُ چریشی ءِ پژدر ءَ روکپتی بلوچستان ءَ مردماں بازیں جاھاں ھم زھرشانی کرتگ ءُ انساپ ءِ لوٹ کرتگ ات-

چریشی ءَ پد ایرانی پولیس آفیسر ناشناسیں مردماں آوار جتگ ءُ بیگواہ کرتگ ات ءُ پد ءَ آئی ءِ لاش زاھدان ءَ دزکپتگ ات –

ایرانی پولیس ءِ کوش ءِ زمہ واری تنی وھدی کس ءَ پہ وت ءَ نہ زرتگ ات ءُ پد ءَ دگہ گیشیں سرپدی نہ بیتگ ات اَنت بلے گمان ھمے بیت اِنت آ جنک ءِ وئیل ءَ کُشگ ءُ چگل دیگ بیتگ-